رواية شلة بنات الفصل الثالث 3 والرابع 4 بقلم شذى عبدالمكرم
عدا يومين وانا بفكر في كلام سام وانو اديهو فرصة عقلي بقول لي لا حتغشي الولد ساي وقلبي بقول لي شكلو بالجد بحبك بس لازم تختي شروطك وصلت لحل لمن وصلت الجامعة لقيت سام وهو اتجاهلني لانو عاوزاني افكر براحتي بس قومت اشرت ليهو اتفاجأ وجا علي
سام: كيفك
روز: كويسة الحمدلله وانت
سام: مدام انتي كويسة انا كويس . في سري قولت دا شنو الوهمي دا بس بلعتها ابتسمت بس
روز: فكرت في كلامك
سام: اها اسمع
روز: انا حأديك فرصة بس عندي شرط
سام: شرطك شنو
روز: طبعا ما بوعدك انو اقدر احبك بس لو شوفت نفسي ما في العلاقة دي حأنسحب تمام
سام: موافق
روز: تمام يلا
سام: سريع كدا؟
روز: صحباتي منتظريني
سام: تمام بينا تلفونات
روز: تمام . طبعا عندو رقمي بس انا ما سجلتو برسل لي مرات في الواتس بس انا سافهاهو بس بعد دا ما بقدر ما عرفت بعد كلامي معاهو حسيت بحاجة غريبة رجعت للبنات
روز: روز تعلن ارتباطها . عاينو لي بخلعة
قمر: روز منو انتي ولا روز وحدة تانية
هديل: كدا اقيس حرارتك
نوسة: روز انتي شاربة حاجة؟
روز: هووي مالكم علي
ريان: دا منو الرماكي دا اصدمينا لانو مستحيل تكوني روز صحبتنا
روز: ليه متفاجئين كدا . وضحكت
نوسة: كدا اصدمينا منو تعيس الحظ دا
روز: بالجد تعيس الحظ بس يستاهل حأخليهو يكرهني
نوسة: من كلامك دا معناهو سام . هزيت راسي بمعنى ايي جاااك صرخو لمن اتخلعت
نبأ: دا موش نفس سام الشابكانا أنو ملصق فيكي ودايرة تتخلصي منو وانو سيرتو بتعمل ليكي طمام . عرفتها دايرة ترمي كلام
روز: اتخيلي بس دا ذاتو سام الواحد دا الكان بعمل لي طمام هسي ارتبطنا
نوسة: خليكي من دا كلو كيف يعني ارتبطتو . عدلت قعدتي وحكيت ليهم الحصل كلو
قمر: والله حاسة انو في نهاية النفق حتحبي
ريان: ياااخ واضح انو بحبك شديد
روز: وريتو بالواضح ممكن انسحب في اي لحظة
نوسة: هسي نفسي اعرف حتتعاملي معاهو كيف . ضحكنا
روز: دا انا ذاتي دايرة اعرف . قعدنا نتونس وحضرنا باقي المحاضرات ولمن خلصنا فجاة نزلت لي رسالة عادية
" حتتطلعي طوالي ولا حتقعي شوية ؟ "
استغربت رسلت ليهو معاي منو جاني الرد قال انا سام رسلت ليهو اهااا حاطلع طوالي رسل لي تمام خلي بالك على نفسك وطمنيني لو وصلتي . قريت وما رديت لانو الحنك الذي دا بشوف الزول كضاب كضاب طلعنا مع نوسة ورجعت البيت ونسيتو ليك عديل غيرت ونومت لمن صحيت ومسكت التلفون لقيت منو رسالة " وصلتي كيف؟ " رديت ليهو وقومت اشوف لي شغلة.......
___________
_ انت يا مان ليه البت دي بالذات
__ كدا بس قلبي رادها هي
_ بس هي ما عاوزاك
__ حتريدني غصبا عنها وهسي اخدت خطوة حلوة
_ خطوة شنو
__ ارتبطنا
_ مستحيل عملتها كيف
__ بتمسكي بيها بس هي لو ما لقت نفسها في العلاقة دي حتنسحب وكويس انها كلمتني من البداية
_ هي لو شافت الحب البتكنو ليها ما حتشوف غيرك
__ حتشوف ان شاءلله
___________
بالليل سام رسل لي واتس اتكلمت معاهو شوية اسئلة عادية وونسة عادية هو البفتح مواضيع لمن نعست كلمتو وطلعت ونومت اليوم التاني مشيت الجامعة حضرت المحاضرة الاولى ومشينا فطرنا
هديل: هووي حمزة قال داير يجي لابوي
روز: خطوة حلوة شديد
هديل: بس انا ما دايرة هسي وهو يداب خلص الجامعة
ريان: يعني مشكلتك في انو خلص الجامعة يداب
هديل: والله ما السبب الرئيسي لانو اصلا هو شغال وبقرأ الجامعة بس السبب خايفة انو يجهز نفسو طوالي ويقول داير يتم العرس وانا لسع ما خلصت جامعة
روز: وانتي ما كلمتي
هديل: لالا خايفة يقول انا ما دايراهو
روز: كلنا عارفين انو انتي بتحبي اكتر ما هو بحبك
قمر: روز معاها حق
روز: انتي ما تسبقي الاحداث كلميهو ولو بحبك حيفهمك صح
هديل: امممم تمام . قاعدين كدا جا سام
سام: السلام عليكم
كلنا: وعليكم السلام . سلم علينا حلو وسألنا من الدراسة طبعا هو سنيرنا عشان كدا
سام: بستأذن منكم داير روز خمسة دقايق
قمر: طوالي
ريان: ماف مشكله
هديل: بس لازم ترجعها . قام ضحك
سام: ان شاءلله حأرجعها . قومت معاهو وقفنا بعيد شوية
سام: ليه ما بتردي . عاينت ليهو بأستغراب
روز: ارد على شنو
سام: تلفونك
روز: هااا صامت من المحاضرة ما فكيت الصوت وقاعد جوا الشنطة
سام: ايواا تمام كيف كانت المحاضرة
روز: يعني يعني ماشي حالها
سام: عندك محاضرات تانية؟
روز: باقي لي وحدة بعد شوية
سام: ايوااا تمام انا طالع توتي مع اصحابي هسي
روز: ايواا حلو
سام: لو تكوني طالعة من الجامعة رسلي لي رسالة
روز: تمام . طلع لي شوكولا من جيبو واداني ليها عجبتني الحركة دي ابتسمت ليهو
سام: خليني ارجعك لصحباتي عشان ما يقولو غنجت بيكي . ضحكت ورجعني
سام: اهو رجعتها ليكم . ضحكو وهو مشى وانا قعدت وكنت ببتسم ساي
قمر: ياااخ سام دا الذوق انتهى فيهو
ريان: والله صح كلامك ياااخ هيبة وماشة على الارض
روز: ايي امدحو قدامي يعني طلعوني كعبة . قامو ضحكو
ريان: جيبتي الشوكولاتة دي من
روز: اداني ليها سام . كلهم في نفس الوقت
كلهم: وااااو . تاني ضحكنا ودخلنا المحاضرة وبعد خلصنا وجينا نرجع البيت نسيت ارسل ليهو رسالة ولمن كنا في الركشة وجيت احاسب لقيت الشوكولا في الشنطة اتذكرت انو كان المفروض ارسل ليهو بس نسيت رسلت ليهو " سام انا رجعت البيت نسيت انو ارسل ليك لمن كنت في الجامعة " رد لي " ماف مشكله المهم انك وصلتي بخير ارتاحي نتكلم بعدين " رسلت ليهو " تمام " . وعملت ذي ما قال لي وارتحت .........
4
مر اسبوع على ارتباطي ب سام صح كان بهتم بأدق تفاصيلي كان بتصل لي بالليل نتكلم شوية وبقفل عشان لسع ما متعودة عليهو هو الببادر اما انا لا في الجامعة الا لو لقيتو صدفة بنسلم على بعض بس وبمشي لحدي يوم لقاني واقفة منتظرة نوسة كنت براي في شجرة جاني وقف معاي
_ الجميل واقف براو ليه. ابتسمت ليهو
__ منتظرة نوسة مشت الكافتيريا
_ كان تمشي معاها بدل تقيفي هنا
__ ما شايف الزحمة ديك لا انا ما بقدر عليها
_ ليه بتجيكي شنو
__ بحس بخنقة وضيق نفس وبعمل لي حساسية
_ اوووو خلاص خليكي هنا
__اممم
_ عاوزة شنو انتي
__ سندوشات وانا عاوزة بيبسي ونوسة عاوزة كولا
_ اتصلي ليها ترجع لانو حتتأخر كدا مع الزحمة
__ وحنفطر بشنو
_ صاحب الكافتيريا صحبي بتصل يجهزو لي
__ تمام . بالفعل اتصلت لنوسة رجعت وهو اتصل لصحبو
نوسة: كيفك سام
سام: تمام الحمدلله وانتي
نوسة: الحمدلله بالله دي شنو الزحمة دي
روز: للمغرب ما حتقدري تشتري حاجة
نوسة: وهسي الحل شنو
روز: سام اتصل لصحبو حيجيب لينا طلباتنا
نوسة: شكرا
سام: العفو . تلفونو ضرب رد واتحرك خمسة دقايق على الكافتيريا وجاب لينا طلباتنا وزيادة علي شوكولاتة لينا الاتنين
روز: شكرا بالجد
سام: ماف داعي للشكر . نوسة ادتني قروش الطلبات مديتها ليهو
سام: دا شنو
روز: قروش الطلبات دي . حمر لي شديد
سام: روز يستحسن ما تتكرريها تاني . حسيتو زعل مني بالراحة رجعت القروش في الشنطة ونوسة شالت الكيس وشكرتو وانسحبت خلتني معاهو
سام: افهم شنو من حركتك دي
روز: ما قصدت حاجة بس . قاطعني
سام: ماف حاجة اسمها بس تاني ما تكرريها
روز: حاضر . ابتسم لي تلقائيا قولت ليهو
روز: ما تزعل . ابتسامتو زادت
سام: ما بزعل منك يلا امشي افطري نتلاقى بعدين . ابتسمت ليهو
روز: اوكي باي . ومشيت لنوسة لقيتها بدت تأكل السجمانة
نوسة: راجلك دا مكمل الذوق والله ربنا يخليهو لينا . ضحكت على كلامها
روز: كدا خليني اكل واحكم . وقعدت اكل معاها......
___________
هديل كدا مقلقة من انو حمزة يجي يتقدم ليها كل مرة بتلقى حجة لحدي ما خاتها قدام الامر الواقع
_ هديل انا ناوي اجي لابوكي الجمعة الجاية ودا اخر كلام
__ بس يا حمزة
_ انتي ما عاوزاني ولا شنو
__ الموضوع ما كدا
_ احكي سامعك لانو شايفك بتتهربي مني دايما في النقطة دي وانا داير ادي لعلاقتنا دي مسمى شرعي
__ انا فاهمة عليك بس انت كمان لازم تفهمني
_ احكي
__ حمزة انا دايرة اواصل الجامعة واخلص وانت لو اتقدمت لي احتمال يجي يوم وتقول داير تتم العرس وكدا بس انا دايرة اخلص الجامعة بتمنى تفهمني
_ انا فاهم عليكي وانتي كان تقولي لي من البداية كدا ونلقى حل بس التهرب ما حل
__ عارفة ما حل واصلا كدا كدا ما حأتهرب فترة طويلة
_ شوفي هنا يالسمحة ذي ما انا خلصت جامعة انتي ذاتك حتخلصي جامعة
__ بالجد حنتظرني
_ ليه ما انتظر واصلا انا عارفك بتفكري في شنو وعارف انو قرايتك اهم واصلا لمن كنت بقول داير اتقدم ليكي دا عشان اضمنك بس واهلك يكونو عارفين علاقتنا كلها سنتين تتخرجي ونتم زواجنا قولتي شنو . قامت تبكي كانت مفتكرة انو حمزة حيجوط ويقول انتي بتتهربي بالقراية بس لا طلع فاهمها
__ انت عارف يا حمزة انا محظوظة بيك شديد والله ربنا ما يحرمني منك
_ ولا منك يا رب
__ خلاص تمام حأفاتح امي في الموضوع وهي حتكلم ابوي وبديك خبر
_ تمام هسي كدا ادخلي الواتس حأصور ليكي حاجة وارسلو ليكي
__ تمام . طلعت من المكالمة ودخلت الواتس رسل ليها صورة فيهو مجموعة كاملة من cera Ve رجعت ليهو بمكالمة سريع
__ حمزة انت بتمزح صح الصورة دي منزلها من قوقل صح؟ . قام ضحك
_ خلاص دقيقه ارجعي الواتس . فصلت ودخلت الواتس اتصور هو والمجموعة جنبو في السرير ورسلو ليها رجعت اتصلت سريع لمن رد صرخت جاااك قام ضحك
_ بالراحة يا مجنونة
__ ما مصدقة ابدا جيبتها من وين يا حمزة
_ عندي صحبي برا السودان طلبت منو اتنين وحدة ليكي والتانية لهيام " اختو"
__ وانت عرفت كيف انو عاوزاها وانا لمن ارفعو استوري قاعدة اعمل ليك استثناء . قام ضحك
_ ليه بتعملي لي استثناء
__ فكر فيها
_ امممم عرفت بس ما تعملي لي استثناء عشان اعرف اي حاجة نفسك فيها واجيبو ليك
__ حبيبي انا شكرا بالجد
_ العفو حبيبتي
__ اها ما قولت لي عرفت كيف
_ سألت روز من الحاجة البتفرحك وكلمتني . لمن عيونها دمعو
__ والله ما عارفة اقول ليك شنو
_ قولي لي ابوي وافق تجي الجمعة . قامت تضحك
__ حيقول ان شاءلله . وقعدو يتونسو بمزاج واليوم التاني عزمها برا الجامعة واداها الهدية تبعها........
_____________
ريان تاني ما قابلت ريان من حادث الاوراق الا في يوم لقتو في الجامعة بنتاقش مع بت وكأنو بتشاكلو هي افتكرت انو شبهتو بس لمن قربت طلع هو ذاتو سمعتو بقول
ريان الشب: يا بت الناس هسي انتي عاوزة شنو حبيبتي لو شافتك معاي حتزعل
البت: انت ما عندك حبيبة بس عاوز تمشيني بس
ريان الشب: امشيكي ليه بس
البت: خلاص خليني اشوفها عشان اصدقك
ريان الشب: بس حتزعل كدا
البت: لو كلامك صح انا بوضح ليها سوء التفاهم . هو مسح وشو بأيدو ريان ما عارفة في حاجة قالت ليها ساعديهو مشيت وقفت معاهم
ريان البت: السلام عليكم . ردو ليها السلام
ريان البت: ريان من قبيل منتظراك دي منو . وقامت وقفت جنبها ومقاصداهو وغمزت ليهو هو طوالي فهم وابتسم
ريان الشب: دي منى زميلتي هسي كنت بكلمها عنك
ريان البت: بالجد منوية كيفك . وسلمت ليها حلو بس منى كانت بترد بطرف نخرتها
ريان البت: لو ماف موضوع خلينا نطلع
ريان الشب: تمام حبيبتي يلا يا منى مع السلامه. وقامو مشو كم خطوة كدا
ريان الشب: لو شكرتك لبكرة ما بكفيكي حقك
ريان البت: المرة دي انقذتك بس خفف علاقاتك يا ريان توأمي . قام ضحك
ريان الشب: والله علاقاتي ما كتيرة بس العوراض كمية . قامت ضحكت
ريان الشب: بس انتي عرفتي كيف . قامت حكت ليهو الحصل قام ضحك وهو حكى ليها عن منى وهي ضحكت ومشو وهو بتونسو كأنهم بعرفو بعض ......