رواية قلبان علي حافتي الحلم الفصل الثالث والعشرون 23 والرابع والعشرون 24 بقلم شذى عبد المكرم
شادي كان مهموم بخصوص اعمام صوفيا وإنهم حيدخلوا المحكمة كان خايف من انه يخسرها لانهم مصرين انهم يزوجوها لود عمها وهو ما حيقبل بحاجة زي دي وما كان في حل غير انه يتصل لعمران لانه كان متؤكد حيلقى عنده الحل رد ليه بعد مسافة
__ شنو يا مان سافرت روسيا ونسيتنا خلاص
_ دا ما وقت عتابك انا في مشكلة ، عمران اتخلع
__ مشكلة شنو؟ احكي لي
_ اعمام صوفيا تاني رجعوا والمرة دي قالوا حيمشوا المحكمة
__ والحل شنو حاليا؟
_ ما عارف والله وما قادر افكر وجيت عندك عشان تفكر بدلي
__ ما تتوتر حنلقى حل ان شاءلله
_ لو أخدوها حيزوجوها لود عمها
__ وانت ما عاوز يآخدوها ولا ما عاوز يزوجوها؟ ، سكت مسافة لمن عمران فكر ان الخط فصل
_ ما عاوز يزوجوها
__ خلاص اعقد عليها انت ، شادي اتفاجأ من جواب عمران
_ ما بتجي
__ بتجي بس انت فكر فيها
_ عمران عليك الله دا ما وقت ألغازك اتكلم عديل
__ انت عارف الزمن دا كل الناس بتفكر في مهر البت يعني اقنع ابوك بالعقد انك عاوز تعقد عليها عشان ما يآخدوها ويقنعهم بمهر عالي احتمال يقتنعوا ، شادي سكت مسافة وهو بفكر في كلام عمران
_ لكن هي هل بتوافق؟
__ انت عارف انها بتحبك بس ما عاوز تقنع روحك بالكلام دا ، طبعا ماف زول بفهم شادي غير عمران
_ بس يا عمران ياااخ صعبة اقول لأبوي داير اعقد على صوفيا موقف محرج
__ خلاص خليها لمن يجوا يآخدوها ويزوجوها لواحد تاني وتعال قول لي محرج ، اتنهد تعب
_ والله ما عارف
__ ياااخ اتهور عشانها ولا ما بتستاهل؟
_ بتستاهل والله
__ بس خلاص
_ياااخ لولاك ما عارف كنت حأعمل شنو؟
__ اصلا لولاي كنت حتضيع ما داير ليها اتنين تلاتة ، شادي ضحك
_ اصلا اها كيف الحياة مع شاهيناز؟
__ اختك منجضاني نجاض ، شادي ضحك شديد
_ انا كلمتك قولت ليك شاهيناز طباعها صعبة بس انت دقيت صدرك وقولت بتتحملها ، عمران ضحك
__ ما ممكن ارجعها وآخد قروشي؟ ، شادي يضحك بس
_ والله للاسف ما ممكن
__ كويس ، بعدها عمرلان اتكلم مع شادي بخصوص المقدمة المفروض يقولها لابوه وقفل منه شادي اخد نفس تقيل وطلعها زفيق وطلع الشغل واليوم كله بفكر وكيف يواجه ابوه بالموضوع دا لحدي ما رجع البيت واخد حمام يخفف بيه التوتر لمن طلع لقى تلفونه بيرن لمن عاين للمتصل كانت صوفيا اتنهد تنهيدة طويلة عرف انها حتتكلم معاه في موضوع اعمامها واكيد بتبكي قام رد ليها بس ظنه خاب ما كانت بتبكي
__ شادي بابا محمد كلمك انو اعمامي تاني رجعوا صح؟
_ كلمني الصباح
__ حأمشي معاهم صح؟
_ انت قبل كدا قولت ليكي شنو؟
__ قولت ما حتخليهم يآخدوني
_ وخلاص ليه بتقولي كدا؟
__ ما عارفة يمكن لانك بعيد خايفة شوية
_ شوفي لو انا في المريخ ماف زول حيآخدك خليكي واثقة فيني
__ انا دايما واثقة فيك عشان كدا ما بكيت المرة دي ، قالتها بطفولة كدا ضحك ليها
_ ايي شايف بتي طلعت فالحة وما بكاية ، هي ضحكت على كلامه
__ شوفت كيف
_ اها كيف اليوم في الجامعة واوع تجيبي لي سيرة ليث دا ، ضحكت شديد وهو قاصد يضحكها عشان تنسى التوتر وهو مع ضحكتها بنسى كل همومه
__ والله ليث زول كويس ما عارفة انت شايلها معاه ليه
_ والله ما يقرب منك بس وتاني ما عندي معاه مشكلة ، هسي بقيت تتفصل على غيرته عليها
__ خلاص ما يقرب
_ بس كدا يلا صوفي حبيبي كدا داير اتصل لابوي عندي معاه موضوع ضروري بخلص بتصل عليك
__ خلاص تمام ، قفل منها واتصل على ابوه
_ اها يا حاج تاني اعمامها ما غلغلوا براحتك صح؟
__ لسه بس حيرجعوا تاني ، شادي سكت مسافة
_ ابوي أنا ناوي اعقد على صوفيا ، ابوه من الصدمة ما نطق كلمة كأنه بحاول يستوعب كلام شادي
__ انت جنيت داير تعقد على اختك؟ ، هنا الكلام وجعه بس أكلها
_ أول حاجة يا ابوي انا وصوفيا ما طلعنا من رحم واحد بس صح اتربينا سوا ودا ما بمنع وانا بقول كدا عشان ما يآخدوها ممكن تدفع ليهم مهر عالي انا متأكد انهم حيقبلوا يعقدوا ليها علي وكدا حلينا مشكلة المحكمة وبعدين نشوف موضوع العقد دا بس فكر في كلامي دا كويس ، ابوه سكت وهو بحاول يستوعب الكلام دا
_ لكن يا شادي انتو اخوان
__ صوفيا ما أختي صوفيا بت خالتي ولو قصدك على كلام الناس انا لي اربعة سنين منكم يعني كأني ما عايش معاكم وهسي حاليا ماف وغير دا ما ضروري الإشهار لحدي ما نشوف البحصل
_ كدا بنظلمها للبت يعني نطلعها من زواج ونرميها في زواج؟
__ انت اتكلم معاها وشوف رأيها وقول ليها لحدي ما تخلص جامعة باقي ليها سنة ونص بعدها تقرر مصيرها براها
_ والله ما عارف وكلامك دا كبير يا شادي
__ عارف انه كبير وحتى انا عشان اقول ليك اخدت زمن بس ماف حل تاني وصوفيا لو مشت مع اعمامها حياتها حتدمر صدقني
_ عارف والله يا ولدي
__ بس خلاص اسمع كلامي قول ليهم شادي عاوزها واعرض عليهم مهر كبير لدرجة ما يقدروا يرفضوا
_ لكن بشوف صوفيا بالأول
__ تمام منتظر منك رد وسلم على امي
_ تمام ، وقفل منه واتنهدت بتعب ما صدق انه اتكلم مع ابوه في موضوع عقده على صوفيا والمحادثة كانت إيجابية بس باقي صوفيا ورأيها مع تفكيره فيها اتذكرها واتذكر انها بتكون منتظراه رسل ليها رسالة عادي " صاحية؟ " طوالي ردت لانها كانت منتظراه بالفعل " صاحية " طوالي اتصل عليها واتكلم معاها مسافة وما حسسها بأي حاجة
بهناك محمد مشى اتكلم مع ثريا بكلام شادي والاقتراح العرضه عليه صدمتها ما كانت اقل من صدمة محمد لمن سمع كلام شادي بس اقنعها ان العقد لحدي صوفيا تخلص جامعتها ويشوفوا البحصل وشافت ان قرار شادي صح لانها ما حتتحمل فراق صوفيا احسن تكون تحت نظرها وخلى ثريا هي تتكلم مع صوفيا مشت ليها في غرفتها لقتها بتتكلم بالتلفون قعدت جنبها صوفيا عرفت ان امها عاوزة تتكلم معاها
__ شادي يلا مع السلامة ، امها ابتسمت لانها بتتكلم مع شادي وان علاقتهم رجعت احسن بس فجأة اتذكرت انها ناوية تتكلم معاها بموضوع يمكن يكون صعب عليها
__ دا شادي؟
_ ايي
__ كيف هو لي يومين منه
_ كويس والله كنت بحكي ليه بدرامات الجامعة وكدا
__ ايوااا وهو ما جاب ليكي سيرة اي حاجة؟ ، صوفيا استغربت
_ حاجة زي شنو؟
__ عندي معاكي موضوع ضروري بس بتمنى تتفهمي ، وبدت تحكي ليها الموضوع كله وطول ما هي بتتكلم صوفيا كانت بتعاين ليها بصدمة وحكت ليها كل الموضوع الاقترحه شادي وانه لحدي ما تخلص جامعة وكل التفاصيل صوفيا كانت مصدومة بس
_ دقيقة دقيقة شادي يعقد علي انا؟
__ ايي بس لحدي ما تخلصي السنة ونص حقت الجامعة دي عشان اعمامك ما يكون عندهم دخل فيكي تاني
_ واعمامي حيقبلوا؟ لانهم مجهزين لي عريس مسبقا
__ الموضوع كله عند شادي بس انتي قولتي شنو؟
_ ماما مدام شادي قال كدا انا بثق فيه وهو اصلا قال لي الموضوع عندي يبقى بعمل زي ما قال المهم ما امشي من جنبك ، امها حضنتها شديد
__ ما حتمشي من جنبي ان شاءلله
_ ان شاءلله ، قعدت معاها شوية وطلعت خلت صوفيا براها ورجعت لصدمتها تاني وبقت تردد " شادي يعقد علي انا؟ " ما كانت مصدقة ابدا قربت تصرخ
اليوم التاني محمد كلم شادي بقرار صوفيا انها موافقة على الخطوة دي فرح شديد واتفق مع ابوه على الحيحصل وخططوا للموضوع وكلموا عمران بالحيحصل لانه حيواجه الجماعة ديل مع محمد وشادي كان متهرب من انه يواجه صوفيا وفي نفس الوقت مشتاق انه يسمع صوتها لانه بتصل عليها الصباح والمساء بس من حصل الموضوع يوم كامل ما اتكلم معاها وكان بتكلم مع عمران
__ اها اتصلت عليها؟
_ ما قادر
__ شادي انت مخلوق من اي طينة؟
_ عمران انت عشان ما محلي ما قادر تحس بي
__ الحمدلله ما كنت محلك الزمن دا كنت حاليا ببكي معاك على فراقها ، شادي ضحك شديد
_ انت قاعد تحاقر بي شديد لو ملاحظ؟
__ لانك بتديني فرصة احاقر بيك هسي طير من هنا اتصل ليها عشان ما تحسسها انك كنت مجبور تتخذ الخطوة دي في حين انك واقع على خشمك اصلا ، شادي يضحك
_ ربنا يخليك لينا يا ابو النسب ، وقفل منه واتصل لصوفيا طوالي ردت ليه بعد المكالمة التانية وكانت ساكتة ما قادرة تتكلم
__ عارف انك مصدومة من الحصل والحيحصل بس خليكي واثقة فيني دايما ما بعمل حاجة بتأذيكي وكل الدايره منك انك تنبهي على دراستك باقي ليكي سنة ونص وبعدها نشوف البحصل شنو هسي احكي لي يومك كان كيف ، كلامه كان راحة بال بالنسبة ليها وهي اصلا مبسوطة من الحيحصل بس خافت يكون شادي مجبور على الخطوة دي وخافت انه ما يتكلم معاها تاني بس لا شادي رجع معاها احسن من زمان...........
______________
في يوم كنت مشتهية لي كسرة ودي حصلت كيف ما عارفة ما كنت بحبها نهائي بس ماما لمن بتعملها بتعملها لابوي قومت طلعت الحاجات وطبعا انا زيرو في شغل المطبخ جيبت الدقيق وخلطه كيف كيف كدا ووسخت نفسي ووسخت المطبخ وما كنت عارفة انو لازم العجين يقوم وكدا ما عندي سابق معرفة بس جيبت صاج البيتزا وبقيت اعمله فيها وما ظبطت جا عمران داخل المطبخ لقاني انا بحالة سيئة والمطبخ حالته اسوء مني
__ دا شنو دا
_ حاولت اعمل كسرة ما قدرت ليها ، وخلاص دايرة ابكي
__ مبالغة طبعا يا ناز خليكي من دا كلو اها الكسرة كنتي عاوزة تأكليها بشنو؟ ، يداب ركزت في الحتة دي
_ ما عارفة ان شاءلله بزبادي بس نفسيتي دخلت فيها ، طلع تلفونه واتصل لامه وانا واقفة بعد سلم عليها
عمران: امي الليلة مشتهي كسرة فيكي تعمليها لي؟
امي: ما عندي اي مشكلة بس مرتك وين؟
عمران: انا داير اكله من يدك
امي: طوالي خلاص تعالو اتغدوا معانا
عمران: تمام الغدا بنكون عندكم ، وقفل منها وانا واققة بعاين ليه
__ يلا الغداء مع ناس امي كسرة
_ وااااي اخيرا
__ امي حزرتني كتير بس ما سمعت كلامها ربنا يعيني ، كلامه وجعني بقيت ابكي هو اتخلع
_ مدام ندمان طلقني بس ، جا علي
__ ناز بهظر معاكي بس والله ، وانا لسع ببكي
_ ما بتهظر وانا من البداية قبل ما نتزوج كلمتك قولت ليك عمران انا ما بعرف اطبخ يعني ما غشيتك ، ندم انه قال لي الكلام داك وبقى يحنس فيني
__ والله انا قبلان بيكي كدا وكنت بهظر بس معاكي ، زحيت منه وطلعت من المطبخ مشيت الغرفة لحقني وجراني عليه
__ ناز يعني عشان قولت كدا بتبكي؟ زمان كنتي بتقولي لي انت اتدبست ماف حل تاني الليلة الحصل شنو؟ ، انا ذاتي استغربت في نفسي زمان لمن يتنمر علي في حاجة برد ليه شكله عندي لخبطة في الهرمونات
_يعني ما ندمان على زواجك مني؟ ، مسح لي دموعي
__ يا هبلة مستحيل اندم لو اقضي حياتي كلها زبادي وطحينة ، أبتسمت ليه بحب بعدها قلبت ليه عيوني باستهبال
_ يبقى الفطور زبادي وطحينة ، قام ضحك شديد
__ انا ربنا يعيني بالجد ، هنا ضحكت ليه
_ لكن بالجد ربنا يعينك خلاص رايك شنو نطلب بيتزا؟
__ هسي انتي مليانة دقيق كدا لو دخلوكي الفرن بتبقي بيتزا ، ضحكنا
_ عمران ما تتنمر قولنا يااخ خلينا نطلب بيتزا
__ عزابة نحنا؟ ، ضحكت شديد على كلامه
_ يعني البيتزا حق العزابة بس؟
__ عموما الاكل الجاهز لكن ما حنك نطلب بيتزا
_ بالفراخ ، وقام مشى طلب لينا بيتزا وانا خلطت عصير مسافة الطلب يوصل وجهزت طحنية وزبادي والبيتزا وصلت ختيتها واكلنا والغدا مشينا على ناس عمتو احلام واتغدينا معاهم واكلت كسرة بمزاج
بعدها حياتنا اتقلبت مع عمران وبقى كلها مشاكل وجوطة وانا بقيت من اقل حاجة لازم اعمل مشكلة وبقى في توتر بينا
_____________
عدت علينا فترة مع شاهيناز كلها مشاكل وهي اتغيرت شديد يعني من اقل حاجة بتعمل مشكلة بقيت ما قادر افهمها ابدا ودي ما شاهيناز القديمة لمن تشد كنت بحاول اني ارخي حتى لو ما غلطان مع اني ديمة ما كنت غلطان وبحاول بقدر الإمكان اني امشي حياتنا كنت مفكر انها فترة وحتعدي بس لا حياتنا كانت ماشة للاسوأ زمان كنت بحاول اني اخلص شغل بدري عشان ارجع البيت كنت بكون مشتاق ليها بس حاليا بحاول اطول في الشغل عشان لو رجعت حنتشاكل
في يوم طلعت مع زملائي في الشغل اتغدينا برا واصلا زعل منها بس ما كلمتها مع انها اتصلت علي زمن الدوام وفجأة في نص الكلام قفلت الخط ما حاولت اني ارجع ليها خلصت من المشوار ورجعت وانا رايق دخلت الصالة كانت قاعدة في بتشاهد في الشاشة اتكلمت بدون ما تعاين لي
__ شرفت ، حاولت امسك اعصابي عشان ما داير اخرب مزاجي
_ الحمدلله شرفت كيف امسيتي؟
__ يعني بهمك كتير؟ ، مسحت وشي بزهج
_ شاهيناز داير افهم انتي الحاصل معاكي شنو لا يعجبك اي حاجة بعملا ، قامت وقفت وجاتني وقفت قدامي
__ هو انت غير الطلوع مع النسوان بتعمل شنو داير يعجبني؟ ، هنا وصلت حدي
_ انا ساكت ليكي كتير عشان ما داير اشتبك معاكي بس كترتيها لقيتيني وين طلعت مع نسوان؟
__ والقبيل البتقول ليك عمران منتظرينك برا ديك شنو حبيبي انا؟
_ والله ما مضطر افسر ليكي حاجة ولا حأدخل معاكي في نقاش لان الكلام معاكي عقيم والله وانا رايق ما داير اخرب مزاجي ، واتحركت ماشي
__ يعني بقيت اخرب ليك مزاجك والله حلو ، عاينت ليها مسافة
_ والله يا ناز زمان برجع البيت متلهف عشان بكون مشتاق ليكي ونفسي اشوفك بس حاليا بقيت اتأخر عشان ما اشتبك معاكي كدا احكي لي الحاصل شنو؟ قصرت معاكي في حاجة؟ قنعتي من العيشة معاي؟ حسيتي انو دا ما جوك ولا حياتك؟ ندمانة على زواجك مني؟ كدا احكي لي عشان نحل المشكلة من اساسها ، كانت بتعاين لي بس حسيت انها اتأثرت بكلامي
__ دايرة امشي بيتنا ، عاينت ليها مسافة
_ جدا البسي عبايتك ، مشت لبست عبايتها وطلعنا كانت ماشة بعربيتها
__ حأوصلك انا ، عاينت لي وجات مدت لي مفتاح عربيتها وركبت عربيتي وطول الطريق ساكتين وصلنا بيتهم
__ فكري براحتك ومنتظر جوابك ، نزلت من العربية من سكات وانا بعاين فيها ضربت الجرس في زول فتح ليها ما انتظرت حتى اشوف الفتح ليها منو وطوالي اتحركت........
لأول مرة شعرت بعدم الألفة نحو المكان الذي اعتدت المجيء إليه، وهذا كان الأقسى على الإطلاق💔
24
بعد الخلاف الحصل بيني وبين عمران وصلته لمرحلة بعيدة لمن فكر اني قِنعت من العيشة معاه وعاوزة الانفصال لدرجة قولت ليهو ماشة بيتنا قال لي جداً وهو بنفسه وصلني بيت ابوي وقال لي افكر وبس مجرد ما فتحت صوفيا لي الباب مشى وانا دخلت معاها
صوفيا: ليه عمران ما نزل سلم؟ ، كنت ساكتة بس ولقينا امي في الصالة
امي: اهلين شوشو
شاهيناز: ماما كيفك؟
امي: مالك كمان اوع يكون اتشاكلتي مع راجلك تاني؟ مشيت قعدت جنبها وانا زعلانة شديد
صوفيا: اكيد اتشاكلت معاه لانو وصلها وطوالي مشى بدون ما يدخل يسلم حتى ما من عوايده
امي: مالك يا بتي مع راجلك وليه بقيتوا دايما في مشاكل؟ متأكدة ما عملتي ليهو حاجة ؟
شاهيناز: ليه ما يكون هو عمل لي حاجة؟
امي: والله البعرفه انو عمران واعي وعاقل في تصرفاته ودايما لمن بتجي هنا زعلانة بجي علي نفسه كثير وبجي عشان يصالحك حتى لو ما غلطان
صوفيا: والله ماما كلامها صح ، كنت بسمع في كلامهم وانا من جوا زعلانة شديد طوالي بكيت لان كل كلامهم صح وحتى انا مستغربة في روحي ليه بعمل كدا وصلت عمران لدرجة انه بقى يتأخر في الشغل عشان ما يقعد معاي في حتة وحدة
امي: ما تبكي خلاص المرة دي حيجي زي كل مرة وحيصالحك ، هزيت ليها رأسي بمعنى لالا
شاهيناز: ما حيجي لان المرة دي زعلته شديد
امي: عملتي شنو كمان؟
شاهيناز: والله يا ماما بقيت ما فاهمة روحي ودايما بشاكل فيه وهو بسكت عشان ما يجوط معاي الموضوع وبقيت عصبية ونكدية زيادة عن اللزوم وبدقق على اقل حاجة وبعمل منها مشكلة ، قامت ضحكت
امي: والله كنت زيك كدا لمن كنت حامل بشادي لحدي محمد وداني بيتنا ما جيت الا بعد الولادة ، ضحكنا كلنا على كلامها فجأة هي وقفت ضحك وبقت تعاين لي بصدمة !!!!!!!
شاهيناز: مالك ماما بتعايني لي كدا؟ ، صوفيا فكت الضحكة
صوفيا: ماما شاكة انك حامل ، عاينت لامي بصدمة
شاهيناز: احتمال اكون حامل؟
امي: تصرفاتك دي تصرفات مرأة حامل ، بقيت ادعي في سري اني اكون حامل عشان الطفل دا حيشفع لي قدام عمران وعشان زواجي منه ما ينتهي ويكون في رابط بياناتنا
امي: قومي صوفيا البسي عبايتك وامشي مع اختك المستوصف القريب دا افحصوا ليها ، صوفيا مشت تلبس وانا بقيت اعصر في اصابعي بتوتر وحاسة بإحساس غريب
شاهيناز: ماما انتي حاسة كدا؟
امي: ما حاسة انا متأكدة بس خلونا نقطع الشك باليقين ، هزيت رأسي وانا متوترة ومنتظرة صوفيا تطلع وبالفعل مشينا المستوصف وعملت الفحص
شاهيناز: صوفيا ادعي معاي اكون حامل عشان اعرف ارد لعمران بعدين ، ضحكت فيني
صوفيا: والله عمران دا مسكين ما عارفة متحملك للان كيف ، طوالي بكيت وبقيت اشكر ربي على وجود عمران جنبي وانه للحظة دي ما اتخلى عني مع ان مشاكلنا كترت شديد بس اتحملني وان شاءلله اطلع حامل عشان كدا بكون لقيت اجابة لتقلبات المزاج اللي عندي دا شوية والنتيحة طلعت رجعت للدكتور قال لي حامل في شهرين بكيت في مكتب الدكتور وجاتني صوفيا والدكتور وصف ليها الادوية لاني كنت ببكي بس وما مركزة معاه رجعنا البيت
امي: اها بشروا
صوفيا: زي توقعك حامل ، جات حضنتني وبكت معاي وانا فتحت بيت البكاء من اول وجديد
امي: عمران لمن يعرف انك حامل حيفهم الحاصل وحيغير من تعامله معاكي بس انتي خففي نكد عشان ما يجدعك لي ، صوفيا بتضحك
صوفيا: هو انا مستغربة عمران ليه صبر للوقت دا ومن زمان ما جدعها لينا ، ضحكت معاهم
شاهيناز: كيس بطاطس انا؟
صوفيا: كيس نكد ، تاني ضحكنا
امي: امشي جوا ارتاحي عشان اكيد صرفتي عربي كتير زمن الشكلة ، ضحكوا مع صوفيا
شاهيناز: ماما ياااخ
امي: خلاص خلاص ادخلي غرفتك وانا بجيب ليكي عصير وما تتوتري وكل حاجة حتكون تمام ابتسمت ليها
شاهيناز: تمام ، ودخلت غرفتي وطلعت عبايتي وطوالي نومت صحيت آخر الليل فتحت تلفوني ما لقيت ولا مكالمة من عمران زعلت وانا ما عارفة زعلت ليه لاني متوقعة ما حيتصل قومت دخلت المطبخ وفتحت التلاجة وأي حاجة فيها طلعتها وختيتها في طاولة الاكل وبقيت أكل بزعل شديد وبفكر في عمران واثناء ما بشرب في الموية الكباية وقعت مني اتكسرت غمضت عيوني شديد فجأة امي وصوفيا طلعوا من غرفهم على الصوت واتفاجأوا بالوضع الأنا فيه فكوا الضحكة فيني عاينت ليهم بزعل وواصلت أكل
امي: والله يا بتي ما بسألك منزلة التلاجة كلها؟
شاهيناز: جوعانة أعمل شنو؟
صوفيا: والله الأكل القدامك دا بأكل دولة قال جوعانة قال
امي: خليها دي هرمونات الحمل
صوفيا: والله عمران ربنا يعينه حيشوف مناظر زي دي آخر الليل
امي: رأيك شنو تقعدي معاي فترة حملك دا؟ ، بقيت اتكلم وأنا الأكل مالي خشمي
شاهيناز: لالا انا راجعة بيتي انتو بتتنمروا فيني ، تاني ضحكوا فيني وجروا كراسي وقعدوا جنبي
امي: هسي كدا خلي الأكل شوية عندنا معاكي موضوع ضروري
شاهيناز: موضوع شنو؟
امي: شادي داير يعقد ، عاينت اتجاه صوفيا بطرف عيني كانت متوترة وبتضغط في اصابعها وبعدها بقيت اتكلم وانا خشمي مليان
شاهيناز: على صوفيا صح؟ ، الاتنين عاينوا لي بصدمة
امي: الكلمك منو؟ ، تاني عاينت اتجاه صوفيا بطرف عيني نفس النظرة الفاتت كانت بتعاين لي بصدمة
شاهيناز: العصفورة كلمتني
امي: عمران كلمك صح؟ ، استغربت يعني عمران عارف وما كلمني هنا الاكل طار لي من بالي رفعت رأسي من الصحن
شاهيناز: يعني حتى عمران عارف وانا آخر من يعلم؟ ، عاينوا لي بإستغراب
امي: شاهيناز انتي جنيتي صح؟ هسي ما قولتي لينا يعني انتي عارفة
شاهيناز: والله انا خمنت بس ، تاني عاينوا لي بصدمة
امي: كيف يعني خمنتي هسي موضوع زي دا بتخمن؟
شاهيناز: دا هرمونات الحمل أعتقد ، حاولت اتهرب من الموضوع
شاهيناز: هسي كدي احكوا لي كيف حيحصل كدا وانتوا موافقين على الحاجة دي؟ ، امي حكت لي الموضوع كله ما اتفاجأت كتير بس شايفة الموضوع خيالي خيالي ومستحيل كدا بس كمان صوفيا بتحبه وحاسة ان شادي بحبها الباقي ما مهم المهم انها تقعد جنبنا بس تاني اتذكرت عمران ليه ما كلمتني حيكلمني كيف ونحنا يوم واحد ما قعدنا بسلام
شاهيناز: صوفيا اعملي لي عصير في كبايتي بتاعت الايس كوفي الاكبر مقاس ديك وجيبيها لي
امي: هسي يا شاهيناز بعد الاكل دا كله بتقدري تشربي عصير؟
شاهيناز: بقدر ان شاء الله ، ضحكوا فيني وقومت دخلت غرفتي رقدت وانا بعاين في السقف وبحاول افكر في الأحداث الحصلت دي كلها من جهة مشاكلي مع عمران ومن جهة اخواني العاوزين يعقدوا ديل وشايفة الموضوع خيالي والمواضيع كلها داخلة في بعضها جات صوفيا داخلة وقعدت جنبي وانا كنت لسه بعاين في السقف
شاهيناز: بتحبيه صح؟ ، ما ردت لي عاينت ليها بطرف عيني كانت منزلة رأسها بخجل كدا
شاهيناز: كنت حاسة والله بس حاولت اكذب الموضوع لاني قولت مستحيل صوفيا تفكر في شادي بطريقة تانية بس احساسي طلع صح ، عاينت ليها حسيت كلامي جرحها كدا ودمعت وكانت بتمسح دموعها براحة
شاهيناز: بتبكي مالك؟
صوفيا: انا ما كنت عاوزة يحصل كدا وتاني حاجة اخلص جامعة بس ويطلقني وهو حيعمل كدا عشان اعمامي
شاهيناز: هبلة مدام بتحبي ما تخليه موش حيبقى حقك يبقى تحافظي عليه ، رفعت رأسها عاينت لي بصدمة ما اتوقعت اقول ليها كدا ضحكت على الريأكشن حقها
صوفيا: ما بتجي وكلام الناس؟
شاهيناز: حتخلي الناس تشيل سعادتك؟ هزت لي رأسها بمعنى لالا
شاهيناز: يبقى عافري عشانه وحريقة في كلام الناس من زمان شادي كان حق صوفيا وحيفضل حق صوفيا ما تخلي حقك لزول ، بقت تبكي
شاهيناز: هووي اديني عصيري وامشي ابكي في غرفتك انا مرا حامل وما بحب جو التوتر دا ، فكت الضحكة وضربتني في كتفي خفيف كدا وضحكت معاها واتونسنا شوية وهي رجعت غرفتها وانا نومت نوم عميق......
اليوم الثاني اتصلت لمزن اني ما حأجي الصيدلية حتشتغل براها وقعدت في البيت مع امي وصوفيا مشت الجامعة فطرنا انا وامي بس ومن عرفت اني حامل الوحم بدأ
شاهيناز: ماما انا راجعة بيتي
امي: حترجعي بدون ما عمران يجي يرجعك؟
شاهيناز: لالا برجع عشان خليت البيت جايط شديد وعاوزة المرة دي انا احل الموضوع
امي: اخيرا بقيتي زول عاقلة؟ ، ضحكت على كلامها
شاهيناز: ماما انا من زمان عاقلة ، عاينت لي بطرف عينها نظام منو العاقلة دي ضحكت شديد
شاهيناز: دايما ظالماني ، وضحكنا
امي: الزمن لسه بدري خليني اشد الغدا واديكي تشيليه جاهز
شاهيناز: والله ما قصرتي معاي ، وقامت عملت الغدا وكبت لي واجرت ترحال رجعت بيتي لان عمران امس وصلني وعربيتي في البيت اول حاجة بديت بالمطبخ لميته وطلعت الصالة وشوية شوية لمن خلصت البيت وختيت المبخر في الصالة ورجعت المطبخ غسلت عدتي ودخلت استحميت ودخلت نومت لمن صحيت لقيت المغرب دخل اتخلعت انا نايمة الزمن دا كله وعمران اكيد رجع لكن ليه ما صحيت بحركته؟ طلعت برا شوفته بشاهد في الشاشة ما فتحت خشمي معاه وهو عاين لي بدون كلام مشيت الحمام وغسلت وشي ورجعت الغرفة صليت الصلوات الفاتتني وطلعت الصالة قعدت جنبه وميلت رأسي في رجله اتخلع ما اتوقع مني الحركة دي لاني اخر فترة كنت بنفر منه
_ اتغديت؟ ، كان بعاين فيني بس
_ عمران بتكلم معاك اتغديت؟ ، زح عيونه مني وركب الوش التاني
__ ما عاوز ، عرفته لسه زعلان مني ومستحيل يعديها لي كدا غمضت عيوني وانا بصلح رقدتي
_ خمسة دقايق واقوم ارص الغدا وبعد الغدا نقعد كناس كبار ونحل المواضيع ونصل لحل يا واصلنا يا واصلنا
__ ليه نواصل ونحنا يوم واحد ما بنقعد بدون مشكلة؟ فتحت عيوني وعاينت ليه في عيونه وانا رأسي في رجله
_ قنعت مني؟
__ واضح القنع من التاني منو
_ عمران بالجد بقيت تكره انك ترجع البيت بدري عشان بس ما تشوفني؟ ، هنا دمعتي نزلت غمض عيونه ومسح وشه
__ والله يا شاهيناز بقيت ما اقادر افهمك
_ حتى بقيت ما بتناديني ناز للدرجة دي كرهتني؟
__ ما بكرهك انا ولا في يوم حأكرهك عمرك ما تفكري كدا ، ختيت ايدي في بطني وانا بتكلم
_ والله البحصل دا كله ما مني انا
__ من منو؟
_ من ولدك هو الملخبط لي هرموناتي ومخليني نكدية ، بقى يعاين فيني مرة ويعاين في ايدي الخاتها في بطني مرة وبحاول يستوعب كلامي لمن فهم قال لي براحة بهمس
__ حامل؟ ، هزيت ليه رأسي وانا دموعي في عيوني ختا اياديه في وشه مسافة ما عرفت احساسه في اللحظة ديك بس اخد صنة وانا بعاين فيه فجأة مسح دموعه هنا قومت من رجله وحضنته هو شدد علي وبقيت ابكي بصوت
_ والله يا عمران تصرفاتي الفترة الفاتت دي كلها من الحمل
__ ناز انتي حامل؟ ، عرفت ان صدمته لسه ما فكت زحيت منه
_ ايي حامل ، رجع تاني حضني وبعدها سلم علي في رأسي كم مرة وتاني سلم علي في ايادي الاتنين وهو فرحان شديد تقريباً نسى كل المشاكل الحصلت الفترة الفاتت دي كلها بعدها عاين لي ومسح لي دموعي
_ عمران ما حتقول حاجة؟
__ يعني نرفزاتك ديك كلها من الحمل؟ ، هزيت ليه رأسي بمعنى ايي
_ انت عارفني انا ما كدا
__ حتى انا كنت مستغرب وبقول ناز مالا اتغيرت فجأة كدا هل راجعت حساباتها وشافت انها ما بتقدر تواصل في العيشة دي؟ ، رجعت حضنته
_ مستحيل افكر كدا والله ابدا هنا بيتي وهنا جوي وهنا حيكون بيتي و اولادي ، عاين لي بحب
_ يعني هسي حتجيبي بيبي نكدي زيك كدا؟ ، ضحكت
__ حيكون عندك بنك بتاع نكد ، قام ضحك ومسك وشي بأياديه الاتنين
__ بس متأكد حأحبهم زي ما بحب امهم ، وطبعها لي هنا فصلت وبقيت اخجل وعاينت ليه بحب وخجل لينا شهر ونص ما قعدنا جلسة هادئة وكلها حب كدا
__ عمران
_ عيون عمران ، عاينت ليه بعبس
__ انا جوعانة ، ضحك ومسكني من انفي
_ قومي رصي الاكل يبقى
__ بس انا حامل والمفروض ما اتعب وكدا ، عاين لي بحيرة
_ والنظف البيت منو؟ ، عاينت ليه ببلاهة
__ انا ، فك الضحكة
_ لا هسي منظفة البيت من فوق لتحت ومبخراه بس غالبك ترصي الغدا ؟ ، لسه بعاين ليه بنفس النظرة
__ اتخيل بس ، قام ومسكني قومني من الجلسة
_ ورح اساعدك ، وقومنا بحماس فجأة رفع ايدي فوق ولفاني وانا بضحك وطايرة من الفرح واخيرا المياه رجعت لمجاريها رصينا الغدا مع بعض واتغدينا في جو كله حب واهتمام وبعدها دخلنا غرفتنا كنت راقدة في رجل عمران وهو شغال بتلفونه بيد و بيلعب بشعري باليد التانية فجأة اتذكرت موضوع شادي وصوفيا
__ عمران انت عارف انك خائن؟ ، رفع عينه من التلفون وعاين لي بإستغراب ووجه لي التلفون اتجاهي
_ والله بتصفح في تويتر بس ، ضحكت لانه فهم كلامي بطريقة تانية
__ لالا حبيبي انا ما قصدي خيانة فعلية يعني؟ رجع عاين لي بحيرة وهبش جبيني افتكر حرارتي ارتفعت تاني ضحكت على صدمته فيني
_ ناز انتي كويسة؟ ولا دي هرمونات الحمل؟ كنت بضحك بس
__ ياااخ عمران ما هرمونات حمل ياااخ انا قصدي خائن لانك ما كلمتني بموضوع شادي وصوفيا وانت عارف ، هنا ضحك شديد
_ ياااخ خلعتيني قولت الخلاها تقول خائن شنو
__ ما تخاف ما بشك فيك ابدا ، قلب لي عيونه بملل وحاكى صوتي
_ انت غير الطلوع مع النسوان بتعمل شنو؟ هنا فكيت الضحكة ورفعت ايادي فوق ومسكت وشه
__ دي اسمها غيرة حبيبي انا بحبك عشان كدا بنكد عليك ، عاين لي بحب وميل سلم علي في رأسي
_ والله يا بت محمد رغم الحصل دا والحيحصل بحبك ، غطيت وشي بخجل ضحك وواصل تصفحه في تلفونه المشكلة نسيت الموضوع الفتحته
__ عمران نسيتني الكلام ياااخ كنت بتكلم معاك في موضوع شادي وصوفيا ، قفل تلفونه وخاتي جنبه وبقى يلعب في شعري
_ اها شادي وصوفيا الحاصل معاهم شنو؟
__ عمران ياااخ انت عارف ما تعمل فيها غبي
_ وانتي رأيك شنو؟
__ والله قولت لصوفيا شادي حقك وما تتنازلي عنه
_اوووو دا كلام كبير شديد واحتمال شادي ما بحبها؟
__ حيحبها ماف طريقة ، قام ضحك
_ الموضوع رجالة يعني؟
__ ما رجالة بس حاسة ان شادي بحبها
_ يعني حاسة بس ما متأكدة؟
__ والله يا عمران انا متأكدة انك عارف اي حاجة بس خسيس منك ماف ، ضحك شديد
_ والله يا ناز الموضوع ما كدا بس المواضيع البتخص شادي بحب اني اتحفظ عليها
__ عمران شادي اخوي ود امي وود ابوي وانا دايرة سعادته بس ، عاين لي مسافة
_ يبقى سعادته مع صوفيا
__حتى صوفيا سعادتها مع شادي
_ بتحبه؟
__ ايي ، سكت كأنه بفكر في حاجة ما حبيت اضغط عليه اكتر وقفلنا على كدا........
____________
محمد مشى مع عمران لأعمام صوفيا وطلبها لولده شادي وعرض عليهم المبلغ الكبير حق المهر ما قدروا يرفضوا فأتفقوا على العقد وحددوا يوم ليه ومحمد رجع مع عمران واتصل لشادي كلمه بالحصل وقفلوا على كدا بعدها عمران اتصل ليهو
__ السيد العريس
_ شنو يا وزيري
__ اها جاهز؟
_ ما ممكن اتم عرسي من هسي؟ عمران قام يضحك
__ كدي اضمن العقد أول العرس هين الخوف يظهر ليها عم من مافي يقد ليك الشغل كله
_ والله انتحر بيهو ، عمران يضحك بس
__ الشافك هسي ما يشوفك وانت بتقول ما بتجي دي اختي
_ عمران الله يخليك للشماتة بس
__ لازم لازم
_ شوف محل مرتك وين يا مان
__ بكرة بتجيني راجع
_ بكرة شنو والله اديني ساعتين بس بجيك راجع وضحكوا الاتنين وقفل منه واتصل على صوفيا
__ ست البنات امست كيف؟ ابتسمت بحب على كلامه دا وسكتت مسافة
__ صوفي انتي معاي؟ ردت بدون تنتبه
_ دايما معاك ، عجبه ردها
__ وانا ما عاوز اكتر من كدا اها كيف امسيتي؟
_ امسيت مشتاقة بس وينك من الصباح؟
__ الشوق كتلني كتل بس كنت مضغوط مع الشغل عشان كدا ، ردت ليه بدلع معاه حزن
_ ولا حتى رسالة ما بترسلها لي؟ طبعا صوفيا حساسة وبتحب تتدلع فيه وهو بحب دلالها دا
__ ما حبيت ارسل رسالة عشان اقدر افضي روحي واسمع صوت الجميل دا ، هي فصلت مسافة ردت ليه بدلع
_ اممممم اقتنعت خلاص ، هنا ضحك عليها انه قدر بكلمة بس يقنعها
__ ياااخ عسل عسل
_ دايما كنت عسل ، ضحك تاني
__ والله النرجسية يخلوها ليكي انتي بس
_ يلا اخليك ترتاح عشان اكيد رجعت تعبان من الشغل
__ انا كدا مرتاح والله
_ امممم شادي عاوزة اسألك من حاجة حساسة شوية
__ اسألي
_ نحنا حنعقد صح حتى لو فترة مؤقتة صح؟ ما عاوز يقول ليها انه ناوي يكمل معاها
__ الحاصل شنو؟
_ طيب روزلين موقفها شنو؟ حتنتظرك؟
__ حابة تعرفي الحيحصل مع روزلين كنوع من الفضول ولا في حاجة تانية؟
_ لو ما حابي تتكلم خلاص خليه
__ حابي انو اي حاجة بينا يكون فيها شفافية
_ امممممم
__ بالنسبة لروزلين فأنفصلنا لينا شهر وحاجة ، فرحت شديد بس ما بينت ليه
_ ليه ما كلمتني؟
__ ما جات فرصة بس
_ شااادي!! قام ضحك
__ فارق معاكي انفصالي من روزلين؟
_شديد
__ من اي جهة؟
_ ما عارفة المهم بس
__ افهمها غيرة يعني ولا شنو؟
_ بغير في حالة الحاجة تكون ما حقتي
__ وانا حقك يعني؟
_ شادي انت كويس؟ قام ضحك شديد
__ خلاص يا صوفيا عارف حكيتها معاكي شديد
_ كويس انك عارف ، اتكلموا شوية وأي واحد مشى نام
بعد يومين كان العقد واصلا عقد عادي بس حسب الاتفاق فبعد تم العقد الكل كان حاسي انه الموضوع خيال بس بقى واقع محمد اتصل لشادي وكلمه ان العقد تم وصوفيا انكتبت على اسمه اخد صنة مسافة بحاول يستوعب انها بقت حلاله قفل من ابوه واخد فترة مع نفسه بعدها اتصل ليها اتفاجأ بيها بتبكي
__ صوفي ليه بتبكي الحصل شنو؟ في زول ضايقك؟ كانت بتبكي بس
_ لالا
__ خلاص ليه البكا ؟
_ لانك ما خذلتني ودايما واقف معاي وبتحميني حتى لو على حساب نفسك ، اتنهد كأنه بفرغ الطاقة السلبية لانه اتوقع زعلانة من حاجة
__ لو احتجت ليكي في يوم ما حألقاكي؟
_ بس قول صوفي
__ صوفي ، قامت ضحكت
_ عيون صوفي اها محتاجني في شنو؟
__ في وحدة اسمها صوفيا هبلة وبتبكي كتير دايرك تتكلمي معاها
_ اقول ليها شنو
__ قولي ليها مرت شادي المفروض ما تكون بكاية ، هنا اخدت صنة وهي بستوعب كلمة مرت شادي لانها كبيرة بالجد وهي ما مصدقة للان انها بقت مرته
_ شادي انا مرتك؟ الاتنين سكتوا مسافة بعدها ضحكوا مع بعض
__ والله شايفها خيال خيال
_ حتى انا والله ، بعدها اخد وضعية الجد
__ صوفيا
_ نعم
__ بما انك حاليا على ذمتي في حاجات لازم تعرفيها انا زول بحب اضع بصمة الملكية على اي حاجة بتخصني يعني طول ما انتي على ذمتي حتمشي بقوانيني يعني ممكن تفهميها تحكم عديل
_ ليه يا شادي؟
__ والله دا العندي ، زعلت من كلامه وقالت ليه براحة
_ وقوانينك شنو؟
__ لبسك للجامعة ما عاجبني ابدا حيتغير تماما وماف تعامل مع الشباب ما تقولي لي سنير ولا حاجة ما حأفهم ليكي حاجة زي دي حتمشي تشتري دبلة ومحبس ومن ايدك ما حتطلع عشان الكل يعرف انك متزوجة
_ بس انت قولت العقد فترة مؤقتة ؟
__ والله طول ما انتي على ذمتي ما عاوز زول يقرب منك لحدي ما نشوف الفترة المؤقتة دي وتاني حاجة تلفونك يكون جنبك دايما لاني بقلق فما حأتصل لامي عشان اعرف اخبارك واخيرا وليس آخرا اي خطوة حتعمليها لازم يكون عندي علم بيها لو ما كنت اونلاين ما تعملي الخطوة العاوزة تعمليها دا ، كلامه دا كان تحكم شديد هي ذاتها اتخلعت في الشخصية الاتغيرت فجأة دا كأنه ما شادي القديم........