رواية بين الضياع واللقاء الفصل الثاني عشر 12 والثالث عشر 13 بقلم شذى عبدالمكرم
محمد: واقفين بتعملو شنو هنا والجابكم هنا بالليل شنو . اي وحدة بقت تعاين للتانية وبقينا نرجف
محمد: بتكلم معاكم يا زفت انتو . كان معصب شديد
شمائل: جينا البوتيك بس
محمد: بوتيك وهنا؟ شمائل بتعملو هنا شنو؟ ما اعيد كلامي
شمائل: والله يا محمد جينا البوتيك
محمد: وماف بواتيك في الحي؟
شمائل: في بس دا جديد وكان عليهو تخفيضات؟
محمد: عرفنا انكم جيتو البوتيك الموقفكم المحل دا شنو وبتعاينو في شنو هسي لو رفعوكم مع الجماعة بتاعين المخدرا*ت ديل تعملو شنو . سكتنا
محمد: انتو رأسكم ما حيفتح اذا ما بيتو يوم في الحراصة
شمائل: واااي لا انا عندي بنات حارسيني
نعيمة: وانا عندي خطيب حارسني . عاين لي وكان معصب
محمد: عندك شنو؟ . قلبي عمل شح
نعيمة: قصدي عندي اب وام حارسيني والله قصدي كدا
محمد: افتحي رأسك دا كويس . هزيت ليهو رأسي
شمائل: محمد رجعنا
محمد: جيبتكم انا؟ . هزينا رأسنا بمعنى لا وطبعا كان لابس مدني
شمائل: وانت بتعمل هنا شنو دا ما شغلكم دا شغل الشرطة
محمد: ما دخلك . سكتت طبعا كانت ضربة ليها قربت اضحك بس مسكت نفسي
محمد: طيرو سريع البيت ولسع شغلي معاكم ما انتهى
شمائل: محمد اكيد جيت بعربية رجعنا ياااخ
نعيمة: الدنيا ليل يرضيك نتجهجه مع الموصولات؟
شمائل: صح كدا يا محمد يرضيك؟
محمد: انتو شكلكم ناويين جد تبيتو في الحراصة . قام التفت جهة المشكلة والجوطة ونادى بصوت عالي
محمد: يا شرطي تعال . الشرطي استغرب وجا علينا وانا وشمائل اتخلعنا طبعا
الشرطي: في شنو
محمد: ارفع معاك الاتنين ديل؟
الاتنين مع بعض: محمدددد!!!!
الشرطي: السبب شنو وانت منو . طوالي محمد طلع بطاقتو لمن الشرطي اتجهجه وخاف
الشرطي: جدا جنابو يلا قدامي
شمائل: محمد بتهظر صح
نعيمة: حلفتك قول انك بتهظر
الشرطي: امشو قدامي . شمائل من الخوف لمن بكت وانا عاينت ليها وبكيت لاني اتذكرت اول مرة اتلاقينا فيهو ورفعني لمن شافنا بنبكي
محمد: تعال معاي . مشى على جنب مع الشرطي شكلو قال ليهو داير اخوفهم بس لانو الشرطي قام ضحك ومشى ومحمد جا راجع لينا ونحنا كنا بنبكي بس
محمد: قدامي . ومشينا قدامو و اي وحدة بتمسح في دموعها ركبنا العربية من سكات عاين لينا بالمراية
محمد: تاني وحدة تطلع بالليل؟ . ماف وحدة فتحت خشمها بكلمة لمن وصلنا وقف جنب بيتهم نزلنا كنت ماشة على بيتنا
محمد: دقيقه تعالي جوا عندي معاكم كلام ما انتهى دخلنا جوا وقعدنا في الصالة اتكلم بهدوء جات خالتو مريم تسأل الحاصل شنو
خالتو مريم: مالكم اتأخرتو كدا وليه شكلكم كدا
محمد: امي ممكن تخلينا برانا داير احكي معاهم في حاجه مهمة . هزت رأسها ومشت جوا
محمد: هسي العملتو دا صح؟ انا قاصد اخوفكم لانو طلوعكم الزمن دا براكم ما صح وبالاخص انكم بنات براكم هسي لو حصلت ليكم حاجة ياااخ انا ضابط وبعرف الجرائم البتحصل دي وتاني حاجه قولنا طلعتو بس البخليكم تقيفو في محل مشبوه كدا شنو ومدام شوفتو مشكلة كدا المفروض ما تقيفو لانو ممكن عادي يرفعوكم معاهم هسي موقفكم كان شنو لو رفعوكم مع ناس مخدرا*ت حتشرحو موقفكم كيف ولا حتقولو لناس الدنيا شنو بس يااخ انتو كبار وعاقلات هسي يا شمائل لو حصل ليكي حاجه اقول ل عاكف شنو " راجلها " حاليا انتي امانة عندنا بعيدا عن انو اختي وانتي يا نعيمة ابوي لو سأل اها . كلامو اثر فينا شديد
شمائل: محمد اسفة ما حيحصل مني تصرف ذي دا تاني
نعيمة: محمد اسفة وانا برضو ما حيحصل مني تصرف ذي تاني
محمد: وتصرفي دا من خوفي عليكم . ابتسمنا ليهو
محمد: شمائل خلينا نقدم نعيمة لانو الزمن اتأخر
شمائل: تمام . طلعو قدموني لمن ضربت الباب وفتح لي عبدالله
عبدالله: اتأخرتي كدا وين
محمد: كانت مع شمائل
عبدالله: اهلين جنابو محمد اتفضلو
محمد: مرة تانية ان شاء الله دي الامانة وصلناها
عبدالله: شكرا ما قصرت
محمد: تصبحو على خير
انا وعبدالله: وانت من اهل الخير . ودخلنا وقفلنا الباب مشيت غرفتي رقدت كدا اتذكرت الحصل كلو بقيت ابتسم لانو محمد كان خايف علي ذي شمائل جا عبدالله ضرب لي الباب
نعيمة: اتفضل . دخل
عبدالله: نعيمة بكرة الصباح بدري لازم تمشي الجوازات عشان الزحمة وكدا
نعيمة: تمام حأطلع بدري
عبدالله: بتقدري براكي ولا امشي معاكي
نعيمة: لالا بمشي عادي
عبدالله: تمام تصبحي على خير
نعيمة: وانت من اهلو
اليوم التاني قومت بدري شديد نضفت سريع وجهزت الشاي وطلعت والشوارع كانت شبه فاضية لانو الزمن بدري في عربية وقفت لي وكانت بتاعت محمد
محمد: اركبي . طلعت معاهو
محمد: ماشة وين من الصباح بدري كدا
نعيمة: الجوازات عاوزة اطلع جواز وطلعت بدري عشان الزحمة وكدا والصف ما يبقى لي طويل
محمد: تمام . سكتنا شويه
نعيمة: امس لمن قولت للشرطي ارفعهم اتذكرت لمن كان خليت علي يرفعني اتذكرت التفاصيل كلها وكيف كنت برجف و.... . سكتا ما قدرت اتم عاين لي
محمد: ما كنت عايز ارفعك الزمن داك بس كنتي حقارة وحقرتي بي شديد ما عجبني اسلوبك كان
نعيمة: كنت معصبة شديد وفضيتو فيك
محمد: وانا ذنبي شنو؟
نعيمة: اسفة
محمد: لالا عادي الموضوع حصل بدري شديد وانتهى
نعيمة: اممممممم
محمد: عايزة تطلعي الجواز مسافرة ولا شنو
نعيمة: احتمال امشي لاخوي عبدالرحمن في السويد
محمد: جد؟
نعيمة: والله لانو كان قال لي لو خلصتي جامعة انا بلقى ليكي فرصة عمل برا بس للان ما قررت
محمد: ايواااا يعني النية موجودة
نعيمة: بس كمان من جانب تاني ما بقدر اخلي امي وابوي براهم بالاخص اخواني كلهم بعاد
محمد: احتمال تتزوجي وبرضو كدا حتبعدي
نعيمة: بس بعد لبعد بتختلف صح؟
محمد: صح خلاص ما تسافري
نعيمة: قولت كدا؟ . عاين لي مسافة
محمد: ايي
نعيمة: تمام . شوفتو ابتسم بالراحة طوالي ابتسمت انا . وصلني الجوازات
نعيمة: شكرا
محمد: دقيقه حأنزل معاكي . ونزلنا ودخل معاي وطبعا بحكمو رائد طوالي دخلنا للمدير جوا وفضلنا وطلع بعرف المدير لانو سلم عليهو بأسمو وقعدنا
محمد: عايزين نطلع جواز
المدير: جدا ما عندكم اي مشكله . نادى زول من الشغالين ديل وبدأ لي الاجراءات ومليت الاستمارة جوا المكتب وعملو لي اي حاجة في محلي كان باقي التصوير بس جا واحد ناداني للتصوير
محمد: امشو معاهو انا بنتظرك هنا
نعيمة: اوكي . ومشيت معاهو واتصورت و على كدا خلصت كل الاجراءات قال لي الاستلام بعد عشرة ايام
محمد: شكرا يااااخ ما قصرت معانا
المدير: العفو ياااخ دا واجبنا .
نعيمة: بالجد شكرا
المدير: الرائد محمد دا معزتو عندي كبيرة
محمد: حبيبي ياااخ . ودعناهو وطلعنا
نعيمة: محمد بس ما دفعت رسوم الجواز . كنت منتظرة متين يقولو لي امشي الحسابات بس ما حصل خلصو لي وانا جوا المكتب
محمد: الموضوع تميتو
نعيمة: كيف يعني تميتو ما برضى بكدا
محمد: نعيمة مشينا بالله
نعيمة: محمد خليك جادي ياااخ لازم ادفع رسوم الجواز
محمد: رسوم الجواز حليتو . طوالي طلعت رسوم الجواز ومديتو ليهو عاين لي ببرود كدا
محمد: دخلي القروش دي
نعيمة: ما برضى بالحاجة دي قروشك الدفعتها لي
محمد: اذا قولت ليكي المدير صحبي ورفض يدفعني قروش الجواز
نعيمة: كذاب . حمر لي
نعيمة: اسفة ما قصدي
محمد: نعيمة امشي قدامي . دخلت القروش جوا الشنطة ومشيت ركبت العربية
محمد: جيعانة؟
نعيمة: لا
محمد: بس انا جيعان خلينا نفطر في محل وعارفك انك جوعانة بس ما دايرة تقولي . صح كلامو مشى بينا حوش بتاعت سمك وطلب نوعين من الاسماك
نعيمة: انا حأدفع لانو انت ساعدتني في موضوع الجواز واصلا ما شالو مني الرسوم فحأدفع انا . قام ضحك
محمد: لا هسي حتتوقعي مني اوافق يعني
نعيمة: لازم توافق
محمد: اخر الزمن بت تدفع لي
نعيمة: فيها شنو يعني
محمد: فيها تقليل من رجولتي
نعيمة: لالا ياااخ . وعملت ليهو حركة بوشي نظام استهزاء كدا قام يضحك
محمد: والله يا نعيمة انتي الوحيدة الما محترماني كرائد كدا الكل بعمل لي الف حساب عداكي انتي المخلوقة دي . قومت ضحكت شديد
نعيمة: والله يا محمد بتفاصح معاك كدا بس مرات بخاف منك بالاخص لمن تحمر لي كدا . وعقدت حواجبي بحاول احاكي فيهو قام يضحك وبقينا نتونس ونضحك لمن جابو لينا الاكل اكلنا في جو ظريف شديد وكانت ذكرى حلوة شديد لي مع محمد ودي اول مرة تحصل لمن خلصنا وشربنا العصير ومشى حاسب وطلعنا
نعيمة: الليلة أخدت يومك كلو وعطلتك
محمد: كونو عطلتيني دا اصلا عطلتيني . قومت ضحكت شديد
نعيمة: هسي كنت متوقعة انو تقول لي لالا عادي ياااخ بس نسيت انك محمد نصرالدين . قام يضحك
محمد: خلاص يا ستي عادي ما عطلتيني ولا اي حاجة اليوم فداكي . ابتسمت ليهو بخجل كدا قام ضحك
محمد: هبلة . واتحركنا ووصلني البيت ومشى شغلو دخلت البيت وانا مبسوطة شديد وبلف في شنطتي في الهواء ساي
لقيت امي
امي: خلصتي بدري افتكرتك حتقيلي هناك . في سري قولت يحليلك انا من خلصت الاجراءات عندي تلاتة ساعات
نعيمة: ايي خلصت بدري انا ذاتي ما اتوقعت
امي: اخت ليكي حاجه تأكليها؟
نعيمة: شكرا امي اكلت برا
امي: خلاص امشي ارتاحي عملت ذي ما قالت لي ودخلت طلعت ملابسي ونومت طوالي.......
__________
من جانب محمد
بعد وصل نعيمة طلع على مكتبتو وكان مبسوط شديد بالمشوار دا ودي اول بت في حياتو يتعامل معاها ويكون عفوي معاها كدا فيحاء ما كان بتعامل معاها كأنو ما زوجتو لانو ما حاسي بالانتماء ليها حاول كدا ما قدر يبادر ابدا هي الكانت بتتصل وبتسأل منو لمن شافت انها الطرف الوحيد البقدم تضحيات قامت انسحبت من الزواج دا لانو الزواج رحلة عمر محتاج دعم من الطرفين فما قدرو يستمرو مع بعض بس علاقتو بنعيمة غير وحتى حسا انو مرتاح في التعامل معاها هي الوحيدة الما بتخاف منو وبتتكلم بأريحية معاهو
بعد اسبوع كدا امو تاني رجعت فتحت ليهو موضوع العرس وما العرس
_ يا امي الموضوع دا موش قفلنا؟
__ عمرو ما حيقفل يا ود انت ما داير رضاي؟ . يلا لعبت على الوتر الحساس قام اتنهد بتعب
_ اها المرة دي مرشحة لي منو
__ نعيمة بت خالتك سامية . هنا اتفاجأ وسكت
_ نعيمة صحبت شمائل؟
__ هو انت بتعرف كم نعيمة اصلا . ما رد وسرح ما قادر يرفض ليه ما عارف
__ اها قولت شنو
_ مصيرها حيكون ذي فيحاء
__ لا ما حيكون
_ وليه متأكدة كدا
__ لاني عارفه انو نعيمة دي الوحيدة البتقدر ليك . قام ضحك لانو امو كلامها صح
_ ضحكت معناهو كلامي صح
__ صح شنو يا امي ضحكت لانو كلامك مضحك انا ماف زول بقدر لي
_ نشوف بس اها قولت شنو
__ هي ما حتوافق
_ انت العرفك شنو خليك من توافق ولالا انا دايرة اعرف انت رأيك شنو
__ امي اختياراتك كارثية
_ انت ما بينفع معاك الا الاختيارات الكارثية لانو الاختيارات الطبيعية ما حتعمل ليك حاجه . قام ضحك
__ انا مظلوم منكم . جات شمائل داخلة
شمائل: والله مظلومين بنات حواء البعرفوك ديل
محمد: دايما مع امك مطلعيني كعب . تلفونو اتصل قام فوق
امو: ما قولت لي قرارك
محمد: كدا لمن ارجع . وطلع
امي: حيوافق؟
شمائل: ما شايفة وشو منور كيف ولمن بضحك لانو السيرة كانت فيها نعيمة والله محمد دايرها وانا متأكدة
خالتو مريم: ان شاء الله يا رب والله لو دايرها بالجد حأمشي اتكلم معاها لمن توافق عليهو
شمائل: هسي مشينا كويس
خالتو مريم: انا حاسة كدا لانو لمن قولت ليهو نعيمة سكت وسرح
شمائل: شوفتي كيف اصبري بس ......
13
اخوي عبدالله خلاص اجازتو خلصت وكان راجع وطبعا اي ام سودانية عندها طقوس معينة لازم تشيلو حاجات كمية عشان ما يحتاج بالاخص انو عذابي وكدا فكنت بساعدها في التستيف
كنت في السوق اتصل لي رقم غريب حسيت كأنو بعرف الرقم دا رديت وانا ملخومة كنت بشتري في حاجة
_ الو
__ كيفك نعيمة
_ معاي منو
__ معقولة ما عرفتي صوتي
_ انا في السوق وما سامعة كويس
__ معاكي محمد . عرفتو بس حبيت ادعي الغباء
_ محمد منو
__ لمن تعرفيني ارجعي لي . طق قفل الخط قولت هسي كدا بقى ليكي حلو يا نعيمة تستاهلي ما قدرت ارجع ليهو لاني مشغولة واصلت اشتريت الحاجات المحتاجها ورجعت البيت استحميت وجيت انوم كنت اتذكرت محمد والمكالمة قولت اتصل تاني قولت انوم اتصل بالليل بس ورقدت نومت بالليل اتصلت ليهو
_الو محمد كيف
__ اتذكرتيني يداب يعني
_ ما كدا بس كنت في السوق مع الجوطة والزحمة ما كنت مركزة وجيت تعبانة ونومت
__ لالا تمام
_ ما يكون زعلت
__ لالا عادي
_ تمام اها كنت عاوز تقول شنو
__ جوازك طلع واستلمتو ليكي
_ عليك الله اخيرا بالجد شكرا ليك تعبتك معاي
__ لالا عادي بكرة بسلمو ليكي لمن نتلاقى . دايرة ارد كدا دخل لي مكالمة من زميلي كنا في الجامعة سوا وكنت منتظرة المكالمة دي
_ محمد كدا عندي مكالمة داخلة
__ اخدي راحتك . رديت وفي الخيارات بدل اعمل انهاء لمحمد عملت دمج للمكالمتين
حزيفة: خطيبتي
نعيمة: حزيفة احترم نفسك
حزيفة: قاسية خلاص يا خطيبتي
نعيمة: قاسي الزمن
حزيفة: عشان كلامك دا ولا بسلم عليكي ذاتو كنت داير اقول ليكي الشهادات طلعت كنت عاوز استلم ليكي معاي بس قال الاستلام شخصي
نعيمة: ما مشكله شكرا انك كلمتني
حزيفة: العفو اها نعوم قولتي شنو
نعيمة: بالنسبة؟
حزيفة: لموضوعنا داك والله قولي انك موافقة الجمعة تلقيني مع ابوكي بس محتاج الضوء الاخضر منك
نعيمة: حزيفة حواء والدة شوف ليك غيري
حزيفة: انا ما شايف غيرك عليك الله حني علي شوية
نعيمة: حزيفة لا يااخ
حزيفة: عليك الله فكري في الموضوع بس انا منتظرك
نعيمة: تمام حأفكر
حزيفة: يلا تصبحي على خير . قفل لقيت انو محمد في الخط يعني كان منتظرني قلعت عيوني ما يكون سمع مكالمتي مع حزيفة
_ الو
__ حمدالله
_ محمد انا كنت معلقاك ولا كنت جوا المكالمة
__ ما عارف
_ محمد خليك جادي ياااخ
__ ليه المكالمة كانت خطيرة ولا شنو
_ لا بس دي خصوصيات
__ ايواااا
_ ما رديت على سؤالي
__ ما مضطر ارد . عصبني ببرودو والله حسيت انو سمع المكالمة من طريقة كلامو الاتغير دا
_ انت مالك
__ بكرة بدي شمائل الجواز تسلمو ليكي . وقفل الخط اتمحنت معناهو سمع عشان كدا اتصرف التصرف دا قبل المكالمة قال داير يسلمها لي بنفسو بس هسي غير رأيو والله زعلت زعل بس كمان انا ما عملت حاجة غلط يلا بعد دا لنفسو اتففت ورقدت نومت
مشيت اليوم التاني لشمائل عشان اشيل الجواز بتاعي ادتني ليهو
_ اخوكي دا منفسن خلاص
__ مالو كمان عمل شنو
_ بحكي ليكي بس الضحك والشماتة ممنوعة تمام . قامت ضحكت
__ تمام
_ من هسي بتضحكي
__ لا خلاص . قومت حكيت ليها انو ساعدني في الجواز بس ما قولت ليها موضوع العزومة وكدا وحكيت ليها موضوع المكالمة خلصت قامت تضحك قرصتها
_ شمائل
__ خلاص والله ما بضحك بس ما فهمتي الحاصل شنو
_ شنو
__ شكلو محمد غيران . رأسي عمل ايرور وعاينت ليها ببلاهة كدا
_ غيران؟
__ ايي يا هبلة كدا ركزي شويه
_ ما يمكن يكون قرفان مني؟
__ والسبب
_ انو اتكلمت مع حزيفة وقال لي خطيبتي
__ بغض النظر عن خطيبتي بس باين زعلو انو حزيفة اتقدم ليكي وكدا شكلو غار
_ ما ظنيت اخوكي دا حجر بس ما بحس
__ كويس نشوف
_ خليني امشي بيتنا احسن لي . قومت طلعت اطاقشت معاهو في الباب
نعيمة: شكرا استلمت الجواز . ورفعتو ليهو هز لي رأسو بس نظام تمام والله ما باقي لي الا اخبتو بيهو في رأسو الكبير دا اتجازوتو ورجعت بيتنا وانا بسب ليهو في سري وساعدت امي ستفنا باقي حاجات عبدالله
نعيمة: عبدو استلمت الجواز الليلة
عبدالله: الف مبروك اها ناوية تعملي شنو تسافري لعبدالرحمن
نعيمة: لغيت الفكرة ما بقدر اخلي امي وابوي براهم صح انها فرصة ما بتتعوض بس كمان انتو بعاد لمن راشد يخلص السنة الباقية ليهو دا ويرجع بعدها بشوف البحصل شنو
عبدالله: عين العقل حبيبتي . ابتسمت ليهو . اليوم التاني سافر يحليلو........
____________
من جانب محمد
من لمن سمع مكالمة نعيمة وحزيفة كان زهجان وفي نفس الوقت خايف انو نعيمة توافق بيهو وفي نفس الوقت شمائل كانت بتخطط مع امها
شمائل: امي تعالي عندي ليكي خطة
امها: شنو
شمائل: موش دايرين نعرف اذا محمد داير نعيمة ولالا
امها: ايي
شمائل: بس خلاص ترجعي تفتحي ليهو موضوع العرس بس التغيير في انو تختاري ليهو بت تانية ولمن يسألك من نعيمة او ما يسألك انتي بأي طريقه توصلي ليهو انو نعيمة جاها عريس وكدا طفشت ونشوف ردت فعلو دايما الطريقة دي بتنفع
امها: شمائل خايفة كمان بالمرة يرفض موضوع العرس نهائي
شمائل: امي عليك الله على اساس هسي هو ما رافض . امها ضحكت
امها: والله صح
انتظرت لمن محمد رجع وادوهو اكل وشرب الشاي امو جات قعدت جنبو وبقت تعاين ليهو هو طوالي فهم الموضوع
محمد: امي انتي دايرة تتخلصي مني بأي طريقة والله
امو: معقولة يا جنا بطني في ام ما بتريد انو اولادها يكونو جنبها؟ بس دي سنة الحياة كدا ودايرة لمن اموت اضمن انكم كلكم استقريتو في حياتكم
محمد: ما تقولي كدا ربنا يطول في عمرك
امو: الاعمار بيد الله ما معروف احتمال بكرة ما اكون معاكم من بعد ابوك مشى بقيت اخاف عليكم اكتر وانت اكتر واحد لانك اتغيرت واتحملت مسؤوليتي ومسؤولية اخوانك وما قصرت معاهم قريتهم كلهم وهسي زوجتهم كلهم بعد دا شوف حياتك عليك الله يا ولدي
محمد: يا امي انا مرتاح كدا
امو: دي ما راحة والله كدا دينك ذاتو ناقص
محمد: امي انتي بعينك شوفتي حياتي مبرمجة كيف ما بقدر وشايفة المرة الفاتت حصل شنو
امي: الفات مات ما ضروري كل التجارب تكون سوا
محمد: اها يا امي عندك لي وحدة بتتحملني بحياتي دي
امو: عندي بت صحبتي بتقدر تتحملك
محمد: صحبتك منو والبت منو
امو: بت صحبتي قسمة اسمها مروة . سكت شوية افتكر كان حتقول ليهو نعيمة ذي المرة الفاتت بس خاب ظنو
محمد: والمرة الفات قولتي نعيمة لشنو غيرتي رأيك . امو ابتسمت براحة لانو شبه اتأكدت من كلام شمائل
امو: مروة احسن قوة تحملها اكبر وانا اتكلمت معاها
محمد: كيف يعني اتكلمتي معاها وكيف تتكلمي معاها دون موافقتي
امو: ما بالدقري كدا
محمد: يا امي قولت ليكم ما داير اتزوج لو بتريديني كدا اقفلي السيرة دي . وقام مشى امو اتنهدت وخلاص قنعت منو وقالت تقفل السيرة دي وكلمت شمائل
شمائل: خلي لي انا بس اديني يومين
بعد يومين شالت ليها قهوة وادتو لقيتو بشرب في سجاير وهي بتتفصل ساي
محمد: مالك بتتفصلي كدا
شمائل: مبسوطة بس صحبتي عروس ان شاء الله
محمد: صحبتك منو
شمائل: نعيمة
محمد: متين حصل الكلام دا
شمائل: ما عارفة المهم هي في حالة تفكير ادوها اسبوعين تفكر بس حأقنعها . وطلعت خلتو
ختا الكباية بجاي ولحق شمائل طوالي
محمد: شمائل تعالي هنا
شمائل: نعم
محمد: نعيمة بالجد حتتزوج؟ . قالو بزعل كدا شمائل لمن شافتو كدا حنت عليهو
شمائل: محمد انت دايرها؟ . سكت
شمائل: لو دايرها انا بساعدك بس لو ما دايرها بقنعها تتزوج الاتقدم ليها دا . سكت وطلع جا اخر الليل لقى امو مع شمائل قاعدات
محمد: امي
امو: نعم . سكت مسافة
محمد: انا داير اتزوج . عاينو لي بخلعة ما اتوقعو تجي منو
امو: شمائل الحقي اخوكي حاصلة ليهو حاجه
محمد: امي انا جادي داير اتزوج بس تكون نعيمة غير كدا ما حأتزوج ابدا . وطلع خلاهم هم لسع بستوعبو الصدمة فجأة شمائل صرخت بفرحة وامو فكت الزغروتة وقامت تبكي وشمائل لمن عاينت لامها بتبكي قامت تبكي
شمائل: امي خلاص يااخ ما دايرين دموع
امي: ما سمعتي اخوكي براهو الجا قال داير يتزوج بدون ضغط عشان يوافق دا يوم سعدي ويوم مناي بعد دا نعيمة كيف نقنعها
شمائل: خليها علي هي قالت لي عندها زميلها عاوز يتقدم بشوف عملت شنو
امو: حيا يا شمائل اخوكي غير نعيمة ما داير
شمائل: وانا ذاتي غير نعيمة ما حأديهو لزول لانو مستحيل تاني يفكر في الزواج عشان كدا بقول ليكي خلي الموضوع علي
امو: كويس . طبعا امها بتقتنع بكلام شمائل فخلتو عليهو ومشت اتصلت نعيمة
__ اها عملتي شنو في موضوع حزيفة
_ ما عملت حاجه
__ ترفضي بس
_ والسبب
__ اول حاجه انتي ما دايرة بس دا كلو زعل من محمد
_ شمائل اقعد اباري في اخوكي دا والله اموت بايرة . شمائل قامت تضحك
__ ما بتموتي بايرة ان شاء الله
_ اخوكي دا لو اتقدم لي ما بوافق
__ والسبب
_ ما بنتفق
__ والله كذابة
_ والله هو شخصية براها وانا شخصية براها ف لقاءنا حتكون كارثة والله
__ وضياعكم كارثة برضو
_ ما بين الضياع واللقاء
__ نشوف اي واحد حيفوز اللقاء ولا الضياع
_ نشوف