رواية بين الضياع واللقاء الفصل الرابع عشر 14 والخامس عشر 15 بقلم شذى عبدالمكرم
14
حزيفة رجع فتح لي الموضوع بس رفضت لاني ما بقدر لاني ما بحبو ما بقدر اظلمو معاي وهو اتفهم رأيي وقولت اسمع كلام شمائل واشوف اخوها البارد دا نهايتو شنو
في يوم اتفقنا مع شمائل نمش السوق اتجهزنا وطلعنا
شمائل: خلينا نمش لمحمد بالاول
نعيمة: نمشي لمحمد وين
شمائل: محل شغلو
نعيمة: نعمل شنو
شمائل: عندي حاجه ماشة اشيلا منو وبالمرة تعرفي محل شغلو الجديد
نعيمة: وانا علاقتي شنو بمحل شغلو . وضيقت ليها عيوني
نعيمة: شمائل لا اله الا الله؟ . قامت تضحك وجرتني واجرنا عربية ومشينا وصلنا كدا المحل كلو كاكي مسكت في شمائل قوي
نعيمة: شمائل الله يرضى عليكي خلينا نرجع
شمائل: والله بعد وصلنا هنا مستحيل نرجع . ودخلنا الضباط كلهم بعاينو فينا جا واحد علينا
ضابط: عاوزين حاجه
شمائل: مكتب الرائد محمد نصرالدين وين
ضابط: عايزين منو حاجه
شمائل: ايي هو منتظرنا انا بكون اختو
ضابط: ممكن اشوف هويتك . طلعتو وشوفتو
ضابط: اتبعوني مشينا وراهو لمن وصلنا هو دخل وطلع
ضابط: اتفضلو . ودخلنا لقينا قاعد في مكتبو قام فوق سلم علينا
محمد: اتفضلو . قعدنا في الكراسي المقابلة للمكتب وهو رجع لكرسيهو
محمد: الليلة نورتو المكتب
شمائل: منور بيك يا حضرة الرائد . قام يضحك وبقى يحكي معاها وانا بعاين فيهم بس
محمد: نعيمة ليه ساكتة
نعيمة: اممممم ما حاجه
محمد: ما عاجبك الجو؟
نعيمة: لا ما كدا
محمد: اها
شمائل: نعيمة بتخاف من الضباط وكدا . وضحكت حمرت ليها
محمد: بسببي صح؟
نعيمة: لا والله دا كان زمان
محمد: لالا تمام . وبقى يسألني عشان يخفف مني التوتر الحاصل معاي لمن كسرتو ودخلت في الجو وجاب لينا عصير والباب ضرب
محمد: اتفضل . جا داخل راجل لابس كاكي وعندو صقر ونجمتين حاجة كدا هيبة عرفت قال عقيد طوالي محمد قام فوق وضرب تحية وطلع من مكتبو ومشى عليهو وسلم عليهو ونحنا وقفنا فوق
محمد: اتفضل سعادتك
العقيد: معاك ضيوف ما ازعجك
محمد: معقولة ياااخ دي شمائل اختي . هي سلمت عليهو
العقيد: ما شاء الله اتشرفنا
محمد: لي الشرف
محمد: و دي المدام . فتحت عيوني بخلعة مدام منو يا الله مد لي ايدو وسلمت عليهو
العقيد: ليه ما كلمتنا انك اتزوجت
محمد: لسع ما اتزوجت بس قريب ان شاء الله
العقيد: ايوااا ربنا يتم ليك على خير
محمد: اللهم آمين يارب معقولة بس اتزوج وانتو ما موجودين ما بتجي والله . وضحكو
العقيد: ما بتجي يلا استأذن كنت داير اتناقش معاك في آخر مأمورية بس مرة تانية
نعيمة: خليك قاعد سعادتك اصلا نحنا كنا طالعين
العقيد: يعني ما قطعت عليكم الونسة
نعيمة: لا والله كنا طالعين اصلا يلا بنستأذنكم
محمد: ممكن تتفضل سعادتك بس اكلم علي يوصلهم
العقيد: تمام . وطلع معانا ولقى علي
محمد: علي وصلهم محل ماشيين
علي: تمام اتفضلو . ودعناهو وطلعنا مع علي ونحنا في العربية اتذكرت كلام محمد انو انا المدام وسرحت لمن استوعبت قرصت شمائل لمن صرخت
شمائل: مالك ياااخ
نعيمة: اخوكي دا قال للعقيد شنو قال انا المدام مدام منو هااا . قامت تضحك
شمائل: مدام محمد
نعيمة: اكيد جن
شمائل: زول داير يتزوج بكون جن؟
نعيمة: كيف يعني يقول كلام ذي دا بدون ما يستشيرني
شمائل: ما موافقة؟
نعيمة: اكيد ما موافقة
شمائل: سامعة قال لمديرو انك مرتو اكيد ما حتخجلي قدام مديرو صح
نعيمة: وانا دخلي شنو ودقيقة متين محمد بتفق معاي لمن يقول داير يتزوجني
شمائل: انا شن عرفني اسألي انتي
نعيمة: اشك انو عندك دخل في الموضوع كويس لمن اشوف نهايتكم وين . قامت تضحك وعلي وصلنا السوق ورجع شغلو ونحنا اشترينا احتياجاتنا ورجعنا البيت
بعد العصر كدا اتصلت لمحمد عشان افهم منو
نعيمة: محمد دا شنو القولتو للعقيد
محمد: كدا سلمي بالاول
نعيمة: ما بسلم جاوبني بالاول
محمد: هسي انا مشغول نتكلم بعدين
نعيمة: ما حأتكلم معاك تاني
محمد: ما مشكله ما ضروري . الشخصية دي باردة
نعيمة: موش بتتكلم معاي كدا شوف لو وافقت عليك
محمد: كويس . طوالي قفلت الخط في وشو ياااخ شخصية بترفع الضغط ياااخ بقيت اتفف بس
المغرب كان في بيتنا مع ابوي ومعاهو اعمامو جا عشان يتقدم لي اتفاجأت طبعا بعد طلعو ابوي ما فتح لي السيرة ابدا بس عرفت من امي اتصلت لشمائل
نعيمة: انتي يا وسخة لشنو ما قولتي لي محمد اخوكي حيتقدم لي الليلة
شمائل: والله ما كنت عارفة جا راجع البيت قال لي كلمت اعمامي وحيتقدم المغرب اتفأجانا ذيك كدا
نعيمة: بس خليكي عارفة ما موافقة والله
شمائل: ليه يا نعيمة
نعيمة: انتي ما عارفة اخوكي بتعامل معاي كيف ولا بتكلم معاي كيف والله ما اغشك ما بقدر اتحملو ودا مشوار عمر كامل اذا من هسي ما اتفاهمنا حنتفاهم متين . هي سكتت لانو عارفة اخوها كويس
شمائل: ما تتسرعي فكري براحتك عليك الله
نعيمة: تمام بس 80٪ رافضة . قفلت منها وبقيت افكر صح بحبو بس الحب ما كل حاجه كمان لابد من التفاهم اذا من هسي بارد معاي كدا متين حيتغير ..........
___________
من جانب محمد
مشى اتقدم لنعيمة القعدة كانت ايجابية بس ابوها قال يشاور البت واخوانها واعمامها الاول بعدها حيشوف البحصل شنو طلع مع اعمامو هم رجعو وهو مشى البيت مبسوط
امو: اها بشر
محمد: اتقدمنا الحمدلله بعد دا حأنتظر الموافقة
امو: ربنا يتكتب ليك الخير
محمد: ان شاء الله يا رب
ومشى غرفتو طوالي شمائل لحقتو
شمائل: نعيمة ما موافقة . اتخلع
محمد: كيف يعني
شمائل: الواحد دا والله هسي اتصلت لي قالت لي ما موافقة
محمد: السبب
شمائل: تصرفاتك دي قالت لي اخوكي بارد اذا ما اتفاهمنا من هسي بعدين ما حنتفاهم ودا سبب مقنع محمد ليه ما داير تتغير
محمد: اعمل شنو بس
شمائل: اتكلم بطريقة حلوة اطلع من قناع الشخصية الباردة دي عليك الله والله حتخسرها صدقني وانت غير نعيمة ماف بت بتنفع معاك ما تخسرها ياااخ . وطلعت خلتو بقى يفكر صح هو بارد بس حيحاول معاها مسك تلفونو واتصل ليها ........
___________
من جانب نعيمة
قاعدة محتارة لمن ابوي يجي يفتح لي الموضوع اقول شنو وارفض كيف وفي نفس الوقت انا كلي كدا دايراهو بس تصرفاتو بتخليني اخاف في عز تفكري اتصل لي محمد اترددت ارد ولالا شيلت نفس ورديت
__ نعيمة
_ نعم . سكت مسافة عرفتو داير يقول كلام بس ما عارف اتنهدت
__ محمد انت ليه اتقدمت لي
_ كيف ليه اتقدمت ليكي
__ محمد الزواج دا عمر ورحلة حياة
_ عارف
__ هسي انت متأكد انو ناوي تكفي عمرك معاي
_ لو ما متأكد ما كنت جيت اتقدمت ليكي وانتي الوحيدة الكنتي اختياري . اتأثرت بكلامو
__ بس يا محمد نحنا ما بنتفق
_ بنتفق بس ادي علاقتنا فرصة حننجح لانو لو ما انتي ما حتكون في بت غيرك
__ اممممم حأفكر
_ ما حأضغط عليكي
__ تمام . وقفلنا وبقيت افكر محمد عاوزني اكفي معاهو باقي العمر بس هو اتقدم لي لانو شايفني المناسبة ولا لانو بحبني رأسي عمل ايرور بس في النهاية انا اختيارو دا كان المفرحني شديد
اليوم التاني ابوي فتح لي الموضوع ووراني الحاصل عملت روحي متفاجأة وقولت ليهو بفكر في الموضوع امي جاتني
امي: انتي رأيك شنو
نعيمة: خايفة شوية
امي: من شنو
نعيمة: امي محمد فسخ عقدو قبل ما يتم العرس خايفة يحصل فيني نفس الحصل
امي: والله ديك كانت قسمتهم مع بعض ليكي الحق تخافي بس كمان هو لو ما اتزوجك انتي حيتزوج وحدة تانية يعني هو ما حيوفق حياتو ليهو حق يتزوج ما بنقدر نقول زواجو الاول ما نجح يعني التاني ما حينجح . طبعا امي زولة متفهمة شديد وكلامها ريحني شديد صح اذا الاول ما نجح ما ضروري التاني ما ينجح اخدت اسبوع افكر وطبعا شمائل بهناك بتضغط فيني وبتحاول تطلع لي الجانب الايجابي في محمد اما هو ما اتصل لي تاني عاوز يديني مساحتي الخاصة وانا ما كنت عاوزة المساحة دي عاوزة يحسسني ويضغط علي بس هو شخصيتو كدا اعمل شنو بس بعد الاسبوع خلص ابوي رجع سألني
ابوي: اها يا بتي قولتي شنو الجماعة ديل منتظرين ردك
شمائل: انت رأيك شنو ابوي
ابوي: والله دي حياتك انتي وانتي الحتعيشي معاهو
شمائل: اخواني قالو شنو
ابوي: اذا زول كويس هم ما عندهم مشكله وعبدالله موافق وراشد موافق بس عبدالرحمن عشان ما اتعامل معاهو ما بيعرف بس مشى اتجاه اخوانو بس الرأي الاخير ليكي انتي
شمائل: البتشوفو مناسب يا ابوي
ابوي: نقول مبروك؟ . هزيت ليهو رأسي بمعنى ايي
ابوي: ربنا يتم ليكي على خير
شمائل: ان شاء الله يا رب . وقومت طلعت رجعت غرفتي وكنت متوترة خلاص اديت الموافقة بعد دا اتحمل البحصل لي وشعور الخوف متملك مني
بالليل اتصل لي محمد
_ شيلت الموافقة من ابوكي
__ امممممم
_ ما مبسوطة؟
__ خايفة بس
_ عارف بس عشانك حأتغير وثقتك ما حتضيع . انبسطت بكلامو دا
__ وانا حأحاول افهم شخصيتك دي
_ نعتبرها لعبة؟ . قومت ضحكت
__ ممكن وانا احاول احل اللغز دا
_ ممكن بس من غير رفع ضغط . ضحكت
__ معقولة انا برفع الضغط؟
_ كأنو اول مرة اتعامل معاكي
__ لانك بارد
_ وانتي مستفزة
__ شخصيتين مختلفتين كل الاختلاف
_ الاختلاف بخلق التجاذب
__ اسمعني دا كلام فيزياء بس . قام ضحك
_ والفيزياء اساس الحياة
__ محمد ما اقنعتني . ضحك
_ البقنعك شنو
__ اممممم ما عارفة
_ خلاص بكرة بعزمك على فنجان قهوة ونشوف الحيقنع التاني منو
__ ممكن
_ تمام . واتفقنا على الموعد وقفلنا وبقيت اعاين على الفون بتاعي كانت مكالمة حلوة مع جنابو حقي......
اليوم التاني اتصل لي
__ رجعت البيت بغير ملابسي وانتي المسافة دي اجهزي اوكي؟
_ تمام . وقومت اتجهز هو شكلو خلص عشان كدا اتصل لي كنت بعمل في الميكب
__ خلصتي؟
_ اديني خمسة دقايق بس قربت
__تمام . حاولت اتسرع شوية بعد خلصت اتصلت ليهو وطلعت برا لقيتو واقف ركبت معاهو كانت لابس فريم رهيب بقيت اعاين ليهو بطرف عيني بس طبعا هو بالكاكي هيبة وبالمدني قصة تانية
__ نمش وين
_ لا يعني عازمني وما عارف نمش وين
__ ما هو القهوة ممكن نشربها في اي كافيه بس اختاري لينا وحدة
_ هسي ما مجمعة
__ المشكله انا ما فاضي للطلعات لانو زمني كلو مليان من مأمورية لمأمورية
_ معناهو نضيفك لفئة الشياب ما للشباب ابدا . قام ضحك
__ وانتي بتفضلي اي فئة
_ هسي الاجابة ما حتفيد بحاجة
__ لانك اتدبستي صح
_ لسع انا في بر الامان ما انخطبنا حتى يعني ممكن بعد الطلعة دي ارفضك عادي
__ جهزي الجمعة دي خطوبتنا
_ بتهظر صح
__ ليه اهظر
_ اخطب براك
__ نشوف
_ لا محمد خليك جادي
__ والله جادي ودقيقة ليه نأجل اتقدمت واخدت الموافقة بعدين بتكلم مع ابوكي
_ شايفاك اي حاجة بتعملا براك على فكرة انا طرف مهم لو ناسي
__ بعد دا كلامي مع ابوكي بس
_ محمد رجعني بيتنا
__ مالك
_ ما دايرة امشي معاك حتة
__ نعيمة مالك هسي عشان قولت داير اخطبك يعني
_ لا عشان ما استشرتني وقررت براك
__ خلاص اها ناوية الخطوبة متين
_ ما عارفة
__ خلاص خلينا نوصل المحل الماشيين ليهو ونتفق هناك
_ ايي قول كدا من الاول نتفق بعداك . قام ضحك
__ كويس تاني اي حاجة نتفق عليها بالاول . ربعت ايادي برضا وابتسمت
_ كدا نتفق
__ والله شكلي حأغير حاجات كتيرة فيني عشان نتفق
_ انت كلك على بعض ما عاجبني حأغيرك توتليا . قام ضحك
__ ماف حاجة عاجباك فيني ابدا؟
_ الا كم نضارتك اللابسة دي بس . قام ضحك وقلعها اداني ليها
__ لو عاجبكي تستاهليها على الاقل تكون عربون محبة
_ والله انت الليلة ما براك اكيد حفظوك من البيت انا عارفه انو دي عمائل شمائل
__ حصل . وضحكنا
اخترت كافيه ظريف ومشينا ليهو وطلبنا قهوتنا
_ الخطوبة الجمعة اها كيف
__ لا الجمعة قريبة لازم اعزم صحباتي
_ اعزمي المهمين والعرس اعزميهم كلهم
__ لا حيزعلو كدا
_ خلاص اعملي البريحك
__ ولا اقول ليك نعمل خطوبة عادية لانك ذاتو ما فاضي
_ نعيمة والله لو دايرة حفلة خطوبة ما عندي مشكله بس ما نأخرها لانو احتمال الاسبوع الجاي تطلع لي مأمورية
__ اتخيل تطلع ليك يوم الخطوبة حتمشي؟ . عاين لي وما رد لانو سؤال صعب قومت ضحكت
_ سؤال صعب صح . ضحك
__ شديد لانو التفكير فيهو ذاتو مصيبة . ضحكت
_ خلاص يا محمد الخطوبة الجمعة
__ اخيرا اتفقنا على حاجة
_ لازم نحتفل بالمناسبة دي
__ والله بالجد محتاج احتفال . طلب لينا تونيز بالمناسبة دي بعد خلصنا رجعني البيت
__ مبسوطة؟ . ابتسمت وهزيت ليهو رأسي بمعنى اي
15
حددنا انو الخطوبة الجمعة وعزمت شلتي بس والباقيات للعرس الكبير بس لانو عملاهو حاجة بسيطة بس للعائلة وكدا بس لانو ماف زمن للتجهيز ضربت لشمائل
__ شمائل افزعيني ما عندي فستان للخطوبة
_ ورح السوق احتمال تلقي واحد يعجبك
__ تمام بس نمش بتين
_ اكيد بعد الفطور لانو بكرة الخميس حيكون عندك تفاصيل ماف زمن تاني للسوق
__ اي والله خلاص بعد الفطور نطلع
_ تمام
بعد الفطور مشيت السوق معاها لفينا كدا لقينا انواع كتيرة بس ما حلوة ولقينا الحلوات بس الاسعار غالية شديد ما كنت خاتة ليها الميزانية دي
نعيمة: هسي اعمل شنو
شمائل: لسع في دكانين خلينا نشوف
نعيمة: تمام . لفينا كدا ولقيت واحد عجبني بس طلع غالي شديد
نعيمة: ياااخ دي محنة شنو دي . وطلعنا شمائل اتصل ليها محمد وسلمت عليهو
شمائل: والله في السوق بنفتش لنعيمة في فستان الخطوبة
محمد: ........
شمائل: لقينا واحد بس سعرو غالي شديد فلسع بنفتش
محمد: ..........
شمائل: تمام . وقفلت منها
_ محمد قال تشيلي الفستان العجبك ونرسل ليهو رقم الحساب
__ لالا ما بقبل بحاجة ذي دي ما حأشيل منو جنيه
_ بس دا خطيبك يا هبلة
__ حتى ولو ما بقى راجلي انسي موضوع انو يشتري لي الفستان خلينا نشوف اي محل تاني وبشيل اي فستان
_ عنيدة خلاص ورح خلاص . اقرب دكان شيلت لي واحد عادي لونو حلو وشيلت لي هاي هيلز وشوية حاجات ورجعنا البيت عملت لي ماسك لوشي لمن جفا غسلتو ونومت اتصل لي محمد بالليل
__ مساء الخير
_ مساء الخير
__ كيف يومك
_ متعب من لف السوق وانت
__ كالعادة روتيني العادي
_ اممممم
__ ليه رفضتي تشتري الفستان
_ اصلا الفستان ما عجبني شديد
__ ما تكذبي
_ محمد ما بشيل منك حاجة لانك ما مسؤول مني حاليا لمن نتزوج حيكون عندي حق اشيل منك
__ تمام اها ولقيتي فستان مناسب
_ لقيت
__ الحمدلله اها ناقصة ليكي حاجه؟
_ محمد حتى لو ناقصة ما حأكلمك هسي كنا بنقول في شنو . قام ضحك
__ خلاص يا نينا
_ منو قال لي اسم الدلع حقي نينا
__ البسأل ما بتوه
_ اممممم يعني مهتم
__ ليه ما اكون مهتم
_ لاني بشوفك رجل آلي بس و اهتماماتك معينة . قام ضحك
__ والله ظروفي هي الشكلت شخصيتي
_ اممممم وحتتغير بتغير الظروف
__ اي ظروف
_ لمن ادخل حياتك
__ نشوف لو بتقدري تغيري فيني
_ مع الزمن بنشوف . اتكلمنا شوية وقفلت
اليوم التاني من الصباح جاتني شمائل وبدينا موال النضافة لانو الجمعة ضيقة وجوني صحباتي وعملنا المعجنات وخبائز وجهزنا جزء من الحاجات وشمائل قالت ماشة السوق ومشت العصر كدا ورجعت المغرب ساعدنا تاني لمن جهزنا اي حاجة
تاني يوم جاتني بعد الفطور مع بناتها ومعاها كيس كبير مدتو لي
_ دا شنو
__ هدية من جنابو حقك . استغربت وفتحتو لقيتو نفس الفستان العجبني وخليتو
_ شمائل!! . وضيقت ليها عيوني
__ ما تسأليني انا اسألي محمد والله امس رجعني السوق غصب قال اشيلو ليكي يعني انا ما عندي ذنب
_ انتي السبب من البداية يلا رجعي ما دايرة
__ انتي هبلة جابها ليكي هدية والهدية ما بترجع وهسي افرحي حتطلعي نجفة فيهو
_ بعرف احاسبو كيف امسكي كدا . مديت ليها الكيس ومشيت اتصلت لمحمد
_ محمد ليه جيبت لي الفستان امس قولت ليك شنو
__ انا جيبتها ليكي كهدية يعني انتي ما طلبتي
_ ما بقبلها
__ والله لو ما لبستي في الخطوبة بزعل منك
_ محمد ياااخ
__ نينا لو انتي جيبتي لي هدية وانا رفضتها احساسك حيكون كيف . سكتت قام رد هو
__ يلا دا احساسي لو رجعتيهو
_ خلاص بقبلها بس تاني ما تعمل كدا
__ حاضر
_ وين انت حاليا
__ في الحلاق
_ اممممم تمام ما اشغلك نتلاقى بعدين
__ تمام . وقفلت منو ومشيت لشمائل في الغرفة
__ تعالي جربي نشوفو حيطلع كيف لانو امس ما قيستيهو في السوق . مشيت جربتو ظبط لمن اتكيفت ورجعت قلعتو
جا زمن الخطوبة والناس كلها كانت مجتمعة كنت في غرفتي ومعاي فردوس كنت متوترة شديد
فردوس: فستانك حلو شديد
نعيمة: انتي الاحلى حبيبتي
فردوس: مالك بترجفي كدا
نعيمة: متوترة ياااخ
فردوس: ما تتوتري كلها ساعة وحتكوني خطيبتو والموضوع بنتهي
نعيمة: ان شاء الله
فردوس: والله كنت قايلاكي بتهظري في موضوع جنابو دا وبالاخص لمن كان قولتي لينا اوع تجيبو لي سيرتو متذكرة . دا كان لمن عقد كنت بكره سيرتو
نعيمة: لف الزمن ودار وبقيت قسمتو
فردوس: محظوظة والله . قطع كلامنا دخول شمائل
شمائل: اطلعو خلاص
نعيمة: بسم الله . اتنهدت وقومت طلعت معاهم مشينا الصالة لقيت العائلة كلها مجتمعة قعدت جنب محمد في المكان المخصوص لي المفروض اسلم عليهو من التوتر قعدت بس التفت علي
_ مالك
__ محمد ما تسألني نهائي . ضحك خفيف كدا لانو فهمني اني متوترة
_ شيلي نفس ماف داعي تتوتري الموضوع ايزي
__ لانك ما اول مرة تخطب اكيد ما حتكون متوتر زيي . سكت التفت ليهو
__ اسفة ما قصدي اقول كدا
_ صح كلامك ما اول مرة اخطب بس اول مرة اخطب البت الانا دايرها . زعلت من نفسي لاني قولت ليهو كلامي داك
__ محمد انا متوترة ما تزعل مني عشان ما اتوتر اكتر . ضحك خفيف كدا
_ تمام ما حأزعل وانتي استرخي . هزيت ليهو رأسي بمعنى تمام جاتنا شمائل
شمائل: خلو الوشوشة الليل طويل تحكو براحتكم
محمد: شمائل!! . طوالي سكتت لانو كان معناهو تحميرة خفيفة شوية مراسم الخطوبة بدت ولبسنا الخواتم وخلص الخطوبة على خير
محمد: مبروك
شمائل: الله يبارك فيك . والناس انشغلت بالونسة
محمد: الفستان طلع فيكي حلو . ابتسمت بخجل
نعيمة: دا من ذوقك
محمد: ما ناوية تصوري الخواتم عشان الاستوري وكدا . ابتسمت بفرحة لاني كنت ناوية اعملا بس خوفت انو محمد يكون ابجيقة وما بحب الحاجات دي بس جات منو تعالو شوفو ابتسامتي
نعيمة: نعملها؟
محمد: ليه لا جيبي ايدك . مسك يدي الفيها الخاتم بأيدو الفيهو الخاتم وصورو تاني عملنا كم حركة كدا واي صورة مرت علي في السيوشيال ميديا بتاعت خطوبة عملتها ومحمد ابدا ما ملا مني وجات شمائل صورتنا كنت مبسوطة شديد
محمد: مبسوطة؟
نعيمة: شديد وانت
محمد: اكيد مبسوط . اتصلو لي اخواني كلهم فيديو كول في نفس الوقت شكلو كانو مخططين و باركو لي وفرحتي بقت فرحتين لمن بكيت وانا بتكلم معاهم دي كانت احلى حاجة في الخطوبة وخلصت الخطوبة على اكمل وجه والناس مشت بقى على النضافة بتاعت البيت فضلنا انا وامي بس
امي: يا الست المخطوبة امشي قلعي فستانك دا وتعالي للنظافة
نعيمة: خايفة الخاتم يتوسخ ما بقدر . امي قامت تضحك وفنتني بأقرب حاجة جنبها
نعيمة: براحة يا حجة بكلم ليكي خطيبي
امي: تحجي وانتي واقفة يا بعيدة . قومت ضحكت وجيت حضنتها
نعيمة: امي انتي غيرانة؟
امي: شديد
نعيمة: خلاص بكلم محمد بقول ليهو ما عندنا بنات للعرس
امي: ايي قولي ليهو كدا لانو بتي وحدة بس وما قنعانة منها لسع . كلامها بكاني ضميتها علي شديد هي ذاتها بكت
امي: حتمشي تخليني براي؟
نعيمة: والله ما بهون علي اخليكي براكي يا جميل انت والله هسي بمشي لمحمد بقول ليهو تعال شيل خاتمك
امي: لا يا هبلة اصلا يوم من الايام حتتزوجي وما عارفه انو الايام مشت سريع كدا
نعيمة: ما تخافي بسكن قريب منك هنا لو اشتقتي لي تلقيني
امي: كويس . وبعدها غيرت وجينا لمينا المكان و اي وحدة مشت نامت
اليوم التاني رفعت صور الخطوبة في الاستوري والكومنتات مطر بس اخر صورة رفعتها كتبت " الما عندها جنابو خليها تعمل ليها جنابو" كانت مغزرة للبنات وحدات وقعو فيني نبز نظام مغرزتهم ضحكني تعليق سمر قالت لي " الجنابو هين بس جنابو لجنابو بفرق واحد محمد بلقى؟ " اما محمد شاف الاستوري وضحك لي مشيت قروب الشلة كتبت ليهم اي وحدة تغير اسمي عندها بمرت جنابو فاهمات قامو ضحكو
فردوس: اسمعيني يا بايرة انتي الخاتم في يدك ما ثبت لسع طلعتي زيتنا لو تميتي عرسك الا نحظرك
نعيمة: خليني اعيش الدور لاني ما ضامنة العرس . قامو يضحكو
سمر: حيطفش صح
نعيمة: حيطفش لانو ابجيقة رسمي وقانوني وانتو عارفين صحبتكم مافي داعي اقول هدية ورضية وتملا العين وتسد الدين . قامو يضحكو
ريم: بنثبتو بشيخ
نعيمة: ضروري جدا . وبقيت اتونس مع صحباتي ونضحك
يومين بس من الخطوبة اتصل لي محمد
__ نعيمة ظهر لي مأمورية
_ سبحان الله نفس احساسك عشان كدا عملنا الخطوبة بدري
__ اي عشان كدا
_ وطالع بتين
__ بكرة الصباح ان شاء الله
_ حتطول؟
__ اسبوعبين بالكتير
_ ايوااا حلو
__ حأختفي اسبوعين لانو احتمال تكون ماف شبكة
_المحل خطير؟
__ ما بقدر اخوفك
_ وكدا خوفتني محمد المحل خطير؟
__ لا ما خطير بس لازم تتوقعي اي حاجة وتكوني مستعدة تحت اي لحظة . كلامو دا خوفني شديد
_ محمد ما تمشي
__ نعيمة عشان تكوني مرت ضابط لازم تقوي قلبك
_ محمد . كنت خلاص حأبكي
__ نعيمة انا يمكن ارجع المرة دي بس ما ضامن كل مرة حأرجع
_ ليه صعب انك تكوني مرت ضابط
__ ممكن تنسحبي من البداية عشان ما نوصل لنقطة الانسحاب يكون مستحيل
_ انا لمن دخلت المعركة دي عارفة العواقب بس كمان ما بقدر ما اخاف عليك
__ امي دي سنين بالحالة دي وكل مرة ارجع سالم بتبكي
_ وانا حأعيش عمري كلو بالخوف دا؟
__ عشان كدا بقول ليكي لو عاوزة تنسحبي.... . قاطعتو
_ محمد انت ما عاوزني في حياتك؟
__ لو ما عاوزك ما كان بهمني خوفك وما عاوز اعيشك في توتر دائم
_ خلاص ليه اتقدمت لي من البداية
__ ما شايف نفسي الا معاكي انتي وفي نفس الوقت ما عاوز اظلمك
_ حأنتظرك كل مرة ترجع سالم وانا متأكدة انك حترجع
__ لانو عارف انو حتكوني مستنياني
_ خلي بالك من نفسك ولازم ترجع لي
__ حأرجع
_ وانا حأنتظرك . ودعتو وقفلت بقيت ابكي لانو خوفت من كلامو لانو ضابط ممكن تحت اي لحظة يموت بس كمان الموت حق حاولت اشغل نفسي بأي حاجة عشان ما افكر في الحاجة دي قبل ما انوم رسلت ليهو رسالة انو قبل ما يتحرك يتصل علي كنت بالجد حابة اسمع صوتو قبل ما يمشي ورقدت نومت الصباح اتصل لي ما رديت كنت نومت المكالمة التانية حتى صحيت رديت وانا نعسانة
__ صباح الخير
_ صباح النور
__ صحيتك صح؟
_ امممم انا الطلبت انك تتصل لي اها طالع خلاص؟
__ايي خلاص كنتي عاوزة حاجة قبل ما اطلع
_ سلامتك بس كنت عاوزه اتمنى ليك التوفيق في المأمورية بس
__ تسلمي
_ خلي بالك من نفسك
__ حاضر وتاني؟
_ ما تنسى انو في ناس منتظرينك
__ ما حأنسى وتاني؟ . قولت ليهو بالراحة وبهمس
_ حأشتاق ليك . قام ضحك
__ ما سمعت علي صوتك
_ لا سمعت يلا في آمان الله
__ وانا حأشتاق ليك مع السلامة . وقفلت منو ورجعت نومت ..........