رواية قلبان علي حافتي الحلم الفصل الواحد والعشرون 21 والثاني والعشرون 22 بقلم شذى عبد المكرم
شادي قرر السفر خلاص وصوفيا كل يوم بتبكي عشان هو مسافر وحيخليها لمن خلاص بفكر انه حيلغي السفر عشانها بس تاني بتراجع وبقول احسن ليها وليه انه يسافر ومشى معاها كلموا شاهيناز ورجعوا في الطريق
__ حتقضيها بكي كدا؟ ، ما ردت ليه كانت ساكتة
__ صوفي ما تصعبيها علي عليك الله ، مسحت دموعها
_ انت اخترت روزلين علينا ، رد ليها بزهج
__ ما اخترتها ياااخ كم مرة اقولها ليكي؟
_ خلاص ليه مصر على السفر كدا
__ صوفيا انا حياتي كلها هناك وشغلي كمان انا مآخد إجازة بس
_ تمام يا شادي سافر ما حأسألك تاني نهائي ، وسكتت منه واتجهت على الشباك وهو زهج خلاص وضرب الدركسون بعصبية التفت ليه
_ ما تتعصب فيني تمام؟ ، وقف العربية فجأة
__ ما هو ما ممكن معاكي يا صوفيا
_ شادي لو زهجان مني نزلني هنا ، وطوالي نزلت من العربية هو عصب شديد ونزل وراها
__ صوفيا يستحسن تركبي العربية لاني على آخري والله ، كان معصب شديد طوالي زادت بكي
_ ما راكبة معاك ، مسح وشه بزهج
__ عايني منظرنا بيش كيف قدام الناس اركبي نتفاهم في البيت ، عاينت ليه من دون كلام اتنفس براحة لانه عارف لو شد حتعمل عكس كلامه
__ صوفي حبيبي اركبي الله يرضى عليكي ، براحة ركبت من دون كلام ووصلوا البيت وماف زول فتح خشمه مع التاني وكانت ماشة غرفتها جراها من ايدها ودخلها غرفته
__ حأنزل الاجازات ان شاءلله ما حأنقطع بالسنين كدا تاني
_ احلف
__ والله وإحتمال المرة الجاية اجيب معاي روزلين موش قولتي عاوزة تشوفيها؟ ، وضحك خفيف حمرت ليه
_ ما عاوزة اشوفها وما تجيبها معاك ، ضحك شديد
__ ودا منو الكان عنده فضول وقال عاوز يشوفها؟
_ ما عارفة
__ خلاص حأجيبها لامي تشوفها ، حمرت ليه وكانت طالعة مسكها وهو بضحك
__ خلاص ما تنفخي لي جضومك ديل ما حأجيبها هسي انا جيبتك هنا عشان تساعديني في التستيف
_ بس انت مسافر بعد بكرة
__ بكرة حنمشي السوق عندي شوية حاجات ما حألقى زمن أحسن ابدأ من هسي
__ حتمشي مع منو؟
_ مع منو كيف معاكي انتي اكيد ، رفعت ليه حاجبها بإستفهام
__ امشي معاك السوق انا؟
_ ايي ولا عندك مشكلة؟
__ لالا حأمشي معاك خلاص خليني امشي اغير وأجي أستف معاك
_ تمام منتظرك ، مشت غرفتها وغيرت ملابسها ولبست جلباب استقبال عشان مريح وجات لقته غير ملابسه وطلع الملابس كباها في السرير بقت ترتب معاه
__ هاكي القميص دا زكرى مني
_ بس انت بتحب القميص دا شديد
__ ما يغلى عليكي ، مسكته بفرحة وبقت تعاين في القميص كان كاروهات بيجي ببني حلو شديد ختته بالجنبة وواصلوا تستيف
_ شادي الريحة دي حأشيلها منك
__ تدفعي كم؟ ، قالت ليه بدلع
_ ما بنختلف في السعر بس عارفة انها ما بتغلى علي ، ضحك على كلامها
__ تمام تمام ، ختتها مع القميص في دفتر صغير وقع من الملابس رفعته واستغربت كان اسود
_ شادي دا دفتر شنو؟ ، عاين اتجاهها وجا سريع شاله منها اتخلعت في تصرفه
_ مالك؟ ، حاول يبين انه طبيعي
__ ماف حاجة
_ وشايلها بالطريقة دي ليه مدام ماف حاجة
__ فيها حاجة خاصة
_ اممممم تمام ، طبعا ختت الموضوع في رأسها وهو خاته بالجنبة هي استغلت انشغاله وشالت الدفتر وقامت جارية انتبه ليها وقام جاري وراها وهو بنادي فيها دخلت غرفتها قفلتها سريع بقى يضرب في باب الغرفة وهي تضحك
شادي: صوفيا جيبي الدفتر والله بختلف معاكي
صوفيا: الا اشوف الحاجة الخاصة دي ، فتحتها لقتها عبارة عن ألبوم فيها صورهم لمن كانوا صغار وأغلب الصور حقها هي إستغربت انه محتفظ بالصور دي وهو كان زعلان منها وفي نهاية الدفتر كأنها مفكرة كاتب فيها كلام كتير
شادي: صوفيا لو شوفتي الدفتر والله عمري كله ما حأسامحك ، هنا إتخلعت في كلامه قفلت الدفتر بدون ما تقرأه وفتحت الباب شال منها الدفتر بعنف
صوفيا: ما قريته والله بس شوفت صورنا وحتى شوفت الصورة الاولى والتانية بس ، صرخ فيها
شادي: انا موش قولت ليك حاجة خاصة تاني شنو؟ ، هي اتخلعت في ردت فعله وفي النهاية صورهم هم بس
صوفيا: شادي ليه معصب كدا هي صورنا في النهاية يعني؟ ، عاين ليها ومشى خلاها زعلت من حركته دي تبعه الغرفة
صوفيا: شادي للدرجة دي الحاجة خاصة؟ لو كدا أسفة والله ، عاين ليها كانت زعلانة شديد مسح وشه بتعب وجا عليها
شادي: ما قاصد أعصب فيكي كدا بس انا من البداية كلمتك انها حاجة خاصة
صوفيا: عاوزة أعرف الخاص فيها شنو؟
شادي: إنتي الحاجة الخاصة من زمان كنتي حاجة خاصة بالنسبة لي وحتفضلي كدا ، نزلت رأسها بخجل وبقت تفرك في أصابعها بتوتر
صوفيا: امممممم تمام خلينا نتم التستيف ، ابتسم على خجلها
شادي: تمام ، وواصلت التستيف وخلصوا وهي رجعت غرفتها بقت تفكر في كلامه كتير حتى نامت.......
اليوم التاني مشوا السوق اشترى بعض الحاجات ورجعوا وستف الحاجات الاشتروها وخلاص خلص اي حاجة بالليل ناداها في الصالة
__ اعملي لينا نسكافيه الوداع وتعالي نحضر فيلم مع بعض ، هزت رأسها ومشت عملته ولقته موصل تلفونه مع الشاشة وبقوا يحضروا جات امه طالعة
امي: خلصت اي حاجة؟
شادي: ايي الحمدلله
امي: المفروض تنوم بدري عشان السفر وكدا
شادي: داير أحضر فيلم مع السنفورة البكاية دي بس يخلص حأنوم ، امه ضحكت ومشت خلتهم
صوفيا: سنفورة في عينك ، وحمرت ليه عاين ليها
شادي: حأشتاق ليكي والله
صوفيا: شادي لو ما سكتا حأبكي ليك هسي والله وانت عارفني قاعدة على الهبشة بس ، ضحك شديد
شادي: لالا خلاص بكيتي كتير اليومين ديل كفاية ، ورجعوا يشاهدوا في الفيلم لمن خلص و أي واحد دخل غرفته ونام الصباح بدري قام واتجهز وعمران جا مع شاهيناز عشان حيوصلوه المطار جات صوفيا لابسة جاهز
شادي: ماشة الجامعة؟
صوفيا: حأمشي معاك المطار وبعدها بمشي الجامعة ، ما كان عاوز تمشي معاه لانها حتبكي تاني بس ما بقدر يمنعها
عمران: نطلع خلاص؟
شادي: تمام ، مشى ودع امه وبكت كدا بس طمنها انه حيرجع وطلعوا المطار من الطريق صوفيا دموعها كانت بتنزل بس ما بتبين لمن وصلوا ومشى مع عمران خلص الاجراءات وجات لحظة الوداع ودع عمران وودع شاهيناز وهي بتبكي لمن جا يودع صوفيا كانت زحت منهم مشى عليها ووقف قدامها
شادي: يلا يا سنفورة حأمشي انا ، ختت رأسها في صدره وبكت كدا بصوت لمن هو ذاته بكى معاها بس مسح دموعه وإبتسم
شادي: صوفي ما تبكي خلاص ياااخ
صوفيا: انت وعدتني حترجع
شادي: وعد حأرجع خلي بالك من نفسك
صوفيا: وانت كمان
شادي: حاضر واوع تقطعي التواصل معاي
صوفيا: قبل ما تركب الطيارة حأتصل عليك ، ضحك
شادي: ايي كدا ، مسح على رأسها وعاين ليها مسافة ومشى مسكت شاهيناز وبكت معاها
صوفيا: مشى خلاني تاني
شاهيناز: بس المرة دي غير المرة دي ما زعلان منك يعني بتقدري تتصلي ليه مكالمة فيديو عادي صح و لالا؟ ، زحت منها ومسحت دموعها
صوفيا: صح ، وطلعوا وصلوا صوفيا الجامعة هي طوالي اتصلت لشادي كان ماشي على الطيارة خلاص
صوفيا: شادي تعال راجع ياااخ ، ضحك ليها
شادي: هرموناتك قامت عليكي خلاص؟
صوفيا: شوق ليك بس ، ضحك تاني
شادي: ليه ما كنت شايف الشوق دا زمان
صوفيا: ما فيك حسنة سافر سافر ، ضحك ليها واتكلم معاها دقيقتين وقفل.........
أحياناً غياب شخص واحد
قد يشعرك بأنك وحيد جداً .💔
______________
قرار شادي للسفر كان مفاجئ وكانت صدمة بالنسبة لينا كلنا وأكتر اتنين اتأثروا عمران وصوفيا لكن صوفيا نهائي ما صبرت وحتى لمن وصلناه المطار بتبكي بس للحظة حسيت انها بتحبه وعندها مشاعر اتجاهه لمن قام خلاص بكت بحرقة شديد وبعدها وصلناها الجامعة
__ رأيك شنو نفطر برا؟
_ ما عندي مشكلة ، مشينا اقرب مطبخ ودخلنا وطلبنا
__ ما قدرت أسفرك برا لشهر العسل ، إبتسمت ليه بحب
_ المكان الانت فيه بالنسبة لي عسل ، إبتسم لي بحب
__ والله يا ناز انا بحبك شديد وبحب فيكي كل حاجة ، نزلت رأسي بخجل وقولت ليه براحة
_ ناز ذاتها بتحبك
__ انتي عارفة ان انا بحبك من زمان شديد ، عاينت ليه بصدمة
_ كذاب؟ ليه انا ما عارفة ولا حصل حسيت بالحاجة دي
__ لأني انا ما كنت عاوزك تحسي بالحاجة دي
_ ليه بس؟
__ اول حاجة ما كنت متأكد من مشاعرك اتجاهي يعني نحنا سلام ما كنا بنسلم لبعض بس كنت بديكي الشوكلاته حقك وبمشي تاني سبب كنا من طبقتين مختلفتين ودا كان البخليني ما اتقدم خطوة لأني كنت شايف انك عاوزة زول من طبقة أعلى من طبقتك وتالت حاجة ما كنت شايف نفسي حأقدر اقدم ليكي الحاجات الانتي عاوزاها بس بعدها ضربت كل الحاجات دي عرض الحائط قولت مدام بحبها اعافر عشانها لانها بتستاهل لحدي ما نلت ، كنت بعاين ليه بحب شديد وفخر
_ على فكرة ما براك البتحب من زمان ، عاين لي بصدمة ضحكت فيه
_ ايي ما تنصدم حتى انا بحبك من زمان وأول حاجة لمن رجعت من ألمانيا سألت صوفيا عمران لمن بجيكم كان بسأل مني؟ قالت لي لالا ما حصل جاب سيرتك حسيت بخيبة أمل رهيبة قولت ليها عمران عمره ما حيعاين لي وكنت زعلانة شديد بس بعدها اتقلبت كل الموازيين وبقينا نصيب بعض ، كان بعاين لي بصدمة لسع
__ ناز جادة ولا بتكذبي علي؟ ، ضحكت شديد
_ والله جادة بحبك من زمان ، كان مبسوط شديد بأعترافي دا
_ وانت عارف حبيتك اكتر متين؟ ، ابتسم لي
__ متين؟
_ لمن جيبت لي بوكس الشتاء كانت معبرة شديد بالنسبة لي
__ عشان كدا قضيتها بكي بس ، ضحكنا الاتنين وبعد خلصنا لفينا شوية ورجعنا بيتنا فجأة اتذكرت صوفيا
_ عمران
__ نعم
_ ما عارفة لكن حاسة كأن صوفيا بتحب شادي ، عاين لي بدون رد للحظة حسيته عارف حاجة
_ انت عارف حاجة صح؟
__ انا ما بعرف صوفيا عشان اعرف مشاعرها ممكن إنتي تسأليها بطريقة غير مباشرة ، فكرت في كلامه ولقيتها ممكن
_ تمام
بعدها استغيرنا في حياتنا وأي واحد فينا نزل الشغل حقه والحياة بقت روتينية وكنت بحاول شوية شوية اتعلم الطبخ بمساعدة امي عرفت الحاجات الخفيفة خفيفة لحدي في يوم كنت في الشغل تلفوني ضرب كان عمران
__ يا مزة ، اتخلعت رجعت عاينت للتلفون لقيته عمران رديت ليه بأستغراب
_ اهلين
__ طبعا مرتي الايام دي ما شغالة بي فقولت اشوفك لو فاضية نمش البحر نشرب قهوة على البحر رأيك شنو؟ ، لمن شكيت قولت عمران مفكرني وحدة تانية ولا شنو؟
_ ومرتك لو عرفت؟
__ بقول ليها انتي اهملتيني هسي خليكي منها رأيك شنو؟
_ ما عندي مشكلة حتجيني ولا نتقابل هناك؟
__ نتقابل هناك ممكن عشان عربيتك وكدا
_ خلاص حلو نتلاقى ، وقفلت منه وضحكت عمران دا مجنون بس بحب جنونه استأذنت من مزن وطلعت وصلت البحر اتصلت ليه جاني كان وصل اصلا
__ قولت لي مرتك ما مهتمة بيك
_ اتخيلي بس عشان كدا ضربت ليكي تجي داير اخلطك ، هنا فكيت ضحكت
__ ومالو اخلطني ساي ، ضحك ومد لي ايده مسكها وبقينا ماشين اتجاه الرواكيب وطلبنا قهوة جوا البحر قلعنا الجزم ختيناها جنب ست القهوة وشيلنا الكراسي ودخلنا بيها البحر عمران كفكف البنطلون حقه بس انا الاسكريت ما قدرت رفعتها شوية بس ودخلت بيها كدا
__ عمران عاين الاسكريت حقي ، ضحك فيني
_ اصلا نهاية الدوام وحترجعي بعربيتك ما مشكلة المهم نستمتع بالجو دا ، ضحكت
__ صح كلامك ، وبقينا قاعدين في البحر وكراسينا جنب بعض وقام مسك ايدي ضحكت البشوفنا بقول مرتبطين ما متزوجين او متزوجين جداد
_ انتي عارفة فجأة في نص الدوام اتذكرتك قولت السجمانة دي قاعدة تعمل شنو حاليا ياااخ اشتقت ليها ، فكيت الضحكة
__ انت عارف لمن رديت وقولت لي يا مزة للحظة شكيت ورجعت عاينت للاسم قولت عمران قاعد يخوني ومفتكرني وحدة تانية ، قام ضحك وبعدها عاين لي بحب
_ عمرك ما تفكري انني ممكن اخونك او ممكن اعاين لمرا تانية الا في حالة وحدة ، عاينت ليه بإستغراب
__ اي حالة دي؟
_ ممكن اعاين لست مطعم بس عشان طبخك الما مفهموم دا ، هنا ضحكت شديد وضربته كتير
__ عمران ما تتنمر على طبخي فاهم؟
_ ما هو انتي بتكون قاصدة حاجة وبتطلع حاجة تانية ، وبقينا نضحك
__ لكن للان عايشين يعني الامور تحت السيطرة ، ضحك شديد
_ والله حالتنا دي السيطرة تحت الامور ، وضحكنا بعدها سلم علي ايدي
_ بالرغم من دا بحبك لانك بتحاولي عشاني وانتي عمرك ما دخلتي مطبخ
__ لانك بتستاهل حبيبي انا ، وبعدها بقينا نحب في بعض شوية وهو يتريق علي ونضحك وكان احلى يوم لحدي ما حضرنا الغروب مع بعض وطلعنا وكنا راجعين خلاص
_ نشيل اكل جاهز؟
__ في أكل في التلاجة ممكن اسخنها لو ما عندك مشكلة
_ انتي ما عاوزة حاجة؟
__ انا ما عندي مشكلة في اي حاجة ، خلينا موضوع الاكل وأي واحد ركب عربيته ورجعنا بيتنا غيرنا وسخنت الاكل واتغدينا في جو حلو كالعادة.....
ظننتك عاديًا،
فإذا بكل شيءٍ كان عادي، إلا أنـت.❤
____________
شادي وصل روسيا واول حاجة عملها انه اتصل لصوفيا لانه عارف حتكون منتظرة بفارق الصبر انها تطمن عليه وبعدها اتصل لابوه وبعدها عمران واستقبلته في المطار روزلين
__لقد اشتقت إليك كتيرا
_انا ايضا
__ لقد استغرقت وقتا طويلا معهم
_ انهم عائلتي
__ اجل اعرف ذلك كيف حالهم
_انهم بخير ، بعدها وصلته الشقة تبعه شكرها ودخل غير ونام طوالي صحى متأخر من النوم ووصل الوايفاي وطلب اكل جاهز من مطعم وكان منتظر مسك تلفونه قعد يتصفح الدنيا ليل فكر يتصل لصوفيا بس قال بتكون نايمة بس قال احتمال قافلة باقة الانترنت بس اتصل طوالي ردت ليه وهي يداب صاحية من النوم
__ حلمت بي ولا شنو؟ ، قالت ليه بصوتها النعسان قام ضحك
_ يداب صاحي من النوم انا
__ على ما افترض الفرق بينا ساعة بس يعني عارف اني نايمة قولت اغلغل براحتها موش؟ ، قام ضحك
__ ممكن تقولي كدا وممكن تقولي مشتاق ، مع جملته دي قامت من السرير
_ قولت شنو؟
__ شنو؟
_ قولت يمكن تقولي شنو؟
__ ما قولت حاجة يا زولة شكلك نعسانة عشان كدا ، هنا اتغاظت شديد منه
__ تمام تصبح على خير
_ وانتي من اهل الخير ، وقفلت الخط في وشه وهي مغيوظة منه ورجعت كملت نومها وهو هناك بضحك
شادي حاول انه يبعد عن صوفيا بس كل مرة بلقى نفسه قريب منها يكون قاعد كدا بشتاق ليها بقول ما حيتصل عليها بس بلقى روحه ماسك التلفون ومتصل ليها يعني السفر ما فاد بشئ إنما قربهم اكتر
في يوم قام الصباح بدري واتصل ليها فيديو كول ردت وهي كانت بتسرح في شعرها وبتتكلم معاه
__ طالعة الجامعة؟
_ اتخيل بس واتأخرت شديد والله
__ دايما متاخرة
_ بس المرة دي غير وكمان ليث منتظرني من قبيل بتصل علي عشان يديني المحاضرات ، هنا الغيرة اكلته
__ ليث دا منو؟
_ سنيري في الجامعة
__ ما تتعاملي مع الاولاد
_ دا سنير يا شادي وحتى شاهيناز وعمران بعرفوه
__عمران لقاه وين؟
- أسأل عمران حيحكي ليك انا مستعجلة يلا باي
__ دقيقة ارجعي ورا اشوف لبستك ، رجعت ورا كانت لابسة اسكريت ضيق عصب من لبستها
_ صوفيا موش حذرتك من الاسكريت الزفت دا؟
__ شادي ما ضيق ياااخ
_ ما شايفة مبين ليكي جسمك كيف؟ غيريه سريع
__ اوف يا شادي اوف
_ سريع غيريه او ألبسي قميص اطول وانا منتظرك اوع تقفلي المكالمة ، مشت طلعت قميص طويل ولبسته وجات وقفت في الكاميرا
__ كدا تمام تاني اوع تلبسي كدا
_ حتلقاني وين؟
__كدا يعني؟
_ لالا بهظر اها في حاجة تانية؟ ،
__ دي اخر مرة تتعاملي مع اسد ولا لبوة دا ما عارف ، قامت ضحكت شديد
_ ليث يا شادي اسمه ليث
__ ما علي بإسمه المهم حذرتك
_ تمام وتاني ؟
__ خلي بالك من نفسك ، أبتسمت بحب وودعته وقفلت وهي بتضحك على غيرته ومشت جامعتها.......
كيف أخبرك بأني اشتقتُ إليك بالطريقة التي تجعلك لا ترى من الدروب إلا طريقًا يأتي بك إلي❤❤
22
جا اول رمضان لي وانا في بيتي وعارفين تجهيزات رمضان والبرامج البتحصل فيها يعني الواحد بغير طريقة حياته كلها كنت متوترة اعمل شنو وكيف اطلع لعمران صينية وانا الصينية العادية كانت صعبة بالنسبة لي والمفروض انزل السوق للتجهيزات كلمت امي عشان تمشي معاي براي ما بقدر وبعدها مشيت لعمران
__ عمران حأنزل السوق مع ماما عشان رمضان وكدا
_ خلاص تمام حأحول ليكي قروش السوق بعدين
__ تمام ، وكنت بعاين للفراغ هو انتبه لي
_ مالك؟
__ماف حاجة
_ خايفة من رمضان ولا شنو؟
__ عمران شغل رمضان متعب وانا براي يعني اطبخ للفطور وانا ما بعرف العصيدة واحل العصائر وتاني العشا والسحور هل بقدر لكل دا وانا ما متعودة؟ ، عاين لي مسافة ومد لي ايده
_ تعالي ، مشيت قعدت جنبه والله ملامحي بتوحي بالزعل والخوف
_ ما تخافي دا اول رمضان ليكي حيكون صعب بس ما تخافي انا معاكي ورمضان الجاي بتكوني اتعودتي ان شاءلله ، اتنهدت بتعب
__ ان شاءلله لكن مشكلة العصيدة احلها كيف؟
_ بكلم أمي ممكن تعملها ليكي وانا لمن اكون راجع من الشغل تختها لي في ساخن بارد ، فكرت مسافة
__ لا خلي أكلم ماما تعملها لي عشان ما اتعب عمتو احلام
_ هي أمك في النهاية برضو ، نزلت رأسي بخجل وقولت ليه براحة
__ عشان ما تقول مرت ولدها ما بتعرف تطبخ ، قام ضحك شديد
_ على اساس ما عارفة يعني؟ ، رفعت رأسي سريع بخلعة
__ عمران احلف انها عارفة ، وانا فاتحة خشمي بصدمة هو يضحك بس
_ المشكلة الدنيا كلها عارفة خلي امي ، ضربت ارجلي بحسرة
__ يا فضيحتك يا بت محمد الدنيا كلها عارفة بخايبتك وانتي ما جايبة خبر ، عمران يضحك بس
_ اعملي فيها انك ما عارفة ان الدنيا عارفة ، عاينت ليه وضحكنا
__ كدا العصيدة اتحلت بس باقي الحاجات؟
_ انا بتنازل ليكي بالعصائر وممكن اساعد في الرص دي اقصى امكانياتي
__ ما قصرت والله على الاقل خففت عني حاجة ، وقومت مشيت ضربت لامي واتفقنا على موضوع السوق وبالفعل مشينا واشتريت كل الحاجات المحتاجاها والعدة البتحتاج ليها وجات معاي ورتبنا اي حاجة وجهزنا وكلمتني ببعض الوصايا لرمضان
امي: حيكون ليكي صعب تصومي راجل وانتي متعودة على الراحة بس الحاجة دي تعويدة بس اول اسبوع صعب بس حتتعودي ان شاءلله
شاهيناز: ان شاءلله ، قيلت معاي وبعدها رجعناها البيت مع عمران
جا اول يوم في رمضان وكنت في الشغل خلصت بدري مشيت لامي لقيتها جهزت لي العصيدة والمليل شيلتهم ورجعت بيتي نومت من التعب لمن عمران جا من الشغل وقومت جهزت العشا عشان ما اتعب والمغرب كان قرب عمران جا ساعدني في العصائر ورصينا الصينية حقته وشالها وطلع وانا فطرت براي لمن رجع من برا جا داخل وهو شايل صينيته دخلها المطبخ وجا وقف قدامي وفي وشه ابتسامة بلهاء كدا
_ فطرتي كيف يا بيبي؟ ، هنا ضحكت شديد
__ الحمدلله وانت يا بيبي
_ الحمدلله ، وجيبت الشاي وشربنا وقعدنا نتونس وبعدها طلع لصلاة العشا والتروايح مع بعض وانا صليت العشا ونومت طوالي ما صحيت الا عمران صحاني عشان العشا لقيته جهز العشا يحليله حبيبي يا ناس اتعشينا
عمران: وكدا اول يوم عدا على خير
شاهيناز: لانك معاي وجنبي عدا
عمران: ناز انا لمن سوقتك من بيت اهلك عارفك ما بتعرفي بشغلة البيت كتير بس كنت رضيان بالحاجة دي وحأكون رضيان دايما لانك بتحاولي عشاني ، قومت من محلي مشيت قعدت جنبه وميلت رأسي في رجله
شاهيناز: بوعدك مع مرور الزمن اكون ست بيت ناجحة
عمران: والله ما عاوز تكوني ناحجة بس عاوز تكوني مبسوطة معاي ، صلحت رأسي بحال يكون مقابل وجهه وانا راقدة في رجله
شاهيناز: وفي انبساط اكتر من كدا؟ ياااخ انا طايرة من الفرحة ان ربي رزقني براجل حنين زيك كدا لو واحد تاني اسبوع بس وحأرجع بيت ابوي ، مسح على شعري
عمران: لانه ما بعرف قيمتك ، بقيت اعاين ليه بحب بس وانا مستغربة عمران بحبني للدرجة دي حتى بدون ما اقدم ليه اي حاجة بالعكس مقصرة في حاجات كتيرة اتجاهه بس بتجاوزها لي كلها
اليوم التاني عدا بمساعدة عمران وطلعنا بعد الافطار عشان نغير جو وكدا وننزل الموية الشربناها دي وبعدها عدت ايام رمضان ومشينا فطرنا يوم مع اهل عمران ويوم مع اهلي ويوم علا ويوم مع جدو لمن رمضان قرب يخلص خلاص وبديت تجهيزات العيد وطبعا مع امي وخلصنا اي حاجة وجا اول يوم في العيد صحيت بدري ونضفت ومشيت اصحي عمران عشان يركب لي الستائر
__ ناز خليني انوم شوية الصلاة لسه
_ عمران قوم ياااخ ركب لي الستائر وارجع نوم
__ شوية قولنا
_ قوم الله يرضى عليك حبيبي انا قوم يا سيد الناس يا دهب داماس يا عسلي انا ، فتح عينه وحدة وعاين لي
__ عيدي القولتي دا تاني عشان عجبني ، قومت ضحكت وقربت منه وميلت عليه
_ حأعديها ليك خمسة مرات حبيبي انا بس قوم ، ابتسم ابتسامة عريضة وقام
__ اغسل وشي وحأركبها ليك ، وجا سلم علي في رأسي ومشى الحمام وانا رجعت واصلت شغلي وهو ركب لي الستائر وساعدني في بعض الحاجات ما قصر
_ يلا امشي جهز للصلاة
__ تمام ، ومشى وانا جهزت المبخر وبخرت البيت وهو جا طالع للصلاة العيد
__ ناز انا طالع
_ دقيقة ، شيلت مبخري ومشيت بخرته وحصنته
_ في آمان الله ورعايته ، أبتسم لي بحب وطلع وبعدها انا جهزت نفسي وكنت منتظراه جا راجع من الصلاة
عمران: كل عام وانتى محلية كل أعيادي كل عام وانتي عيدي ، سلم على رأسي مسافة وانا مبسوطة وحاسة بالدفا
شاهيناز: كل عام وانت لحياتي حياة
لبست وطلعنا على الاهل وعيدنا ليهم كلهم ورجعنا وانا مبسوطة بأول عيد في بيتي
__ امشي اعملي كبايتين لبن وجيبي جردل الخبيز معاكي ، ضحكت
_ الجردل عديل كدا ولا حتى في صحن؟
__ انا صايم 30 يوم فخليني في حالي ، ضحكت كدا
_ على اساس انا فاطرة 30 يوم كدا
__ والله انا عن نفسي عارف اني صايم بس انتي ما عارف ، جيت ضربته
_ عمران!!!
__ مالك؟
- بحبك ، هنا فصل ضحكت فيه وخليته واقف ومشيت المطبخ عملت الشاي وجيبت جردل الخبيز زي ما قال عمران وقعدنا نتونس ونحنا بنتاكل
عدت فترة وانا بزهج من أقل حاجة وهرمون النكد عندي زاد فحصلت بينا مشكلة كبيرة المرة دي طوالي ركبت عربيتي ومشيت بيت ابوي امي استغربت فيني
__ مالك عاملة كدا؟
_ اتشاكلت مع عمران وتاني ما راجعة البيت داك ، امي اتخلعت في كلامي
__ مالكم كمان كنتوا حلوين ضربتكم عين ولا شنو؟
_ ماف عين ضربتنا وانا زهجت خلاص ودايرة اتطلق بس ، ومشيت خليتها ودخلت غرفتي طلعت عبايتي وصمتا تلفوني وديك النومة ........
_____________
كنت مبسوط ومستقر في حياتي مع ناز بس فجأة بقت تعمل من أقل حاجة مشكلة ما عارف الجاها شنو فلمن تشد انا برخي عشان المشكلة ما تكبر لمن في يوم كنت زهجان شديد من تصرفاتها وبدل ارخي شديت معاها وحصلت مشكلة كبيرة انتهت بأنها لبست ومشت بيت اهلها وانا قعدت زهجان شديد آذان العشا اذن قومت مشيت الجامع وأستغفرت كدا والإمام اتكلم عن النساء وانهم ناقصات عقل ودين يعني الواحد يحاول انه يصبر عليهن واتذكرتها واتذكرت كل لحظاتنا الحلوة قبل المرة ورجعت البيت ضرب لي المدير وقال اني لازم بكرة اسافر احضر الاجتماع بدل نائب المدير لانه حصلت ليه ظرف فوافقت وطوالي اتصلت لناز عشان لازم اعرفها بالسفر رغم ان بينا مشكلة بس ما بتهون علي ان اخطي خطوة بدونها في الاول ما ردت ختيت في رأسي انها زعلانة فما عاوزة ترد تاني حاولت مرتين وتلاتة واربعة ماف رد قولت أحسن اني اواجهها مباشر ركبت عربيتي واتجاهت على بيتهم وصلت فتحت لي امها
__ عمتو كيفك
_ كويسة الحمدلله اتفضل ، ودخلت معاها
_ تعال دايرة اتكلم معاك ، عرفت اني حأختى في المواجهة دي
__ ايي يا عمتو
_ طبعاً المشاكل بتحصل بين الازواج ودي حاجة عادية
__ عارف الحاجة دي
_ وطبعا شاهيناز شوية طبعها صعب فلازم تصبر عليها شوية
__ عارف والله وما عندي مشكلة مع طباعها ودايما لمن تشد انا برخي بس المرة دي شديت معاها عشان كدا وهسي جيت عشان احل الموضوع دا عشان الجفوة بينا ما تكبر
_ طول عمرك كنت عاقل وواعي ، أبتسمت ليها
__ وين هي حاليا؟
_ في غرفتها نايمة
__ ممكن ادخل ليها؟
_ ما تستأذن دي مرتك ادخل وحلوا مشاكلكم ، هزيت ليها رأسي وإستذأنت منها ودخلت غرفتها لقيتها نايمة قولت يعني ما بترد لانها نايمة قربت منها
__ ناز ، وهزيتها خفيف كدا صحت وبقت تعاين لي كأنها بتحاول تجمع بقت تفتح في عيونها وبتغمض ضحكت على منظرها يداب جمعت وقعدت
_ عمران!!!
__ ايي عمران
_ الجابك شنو؟
__ كيف يعني الجابني شنو ما اجي ولا كيف؟ ، بقت تمسح في وشها وهي لسه بتجمع
_ لا ما كدا بس تقريبا الزمن فات
__ ايي الزمن فات ولو كان رديتي على تلفونك ما كان عملت لناس البيت ازعاج
_ تلفوني صامت ، وعاينت لي مسافة شكلها يداب جمعت اننا كنا متشاكلين
_ دقيقة دقيقة نحنا تقريبا حصلت بينا شكلة وانا خليت ليك البيت صح؟ ، هنا ضحكت شديد
__ حمدلله على السلامة
_ الله يقبل حمدك وما دايرة معاك كلام
__ جيت عشان نحل المشكلة عشان ما تزيد الجفوة بينا وما داير اسافر وانتي زعلانة مني ، عاينت لي بصدمة
_ مسافر وين ومتين؟ ، اتنهدت
__ مسافر........ عندي مؤتمر بكرة ان شاءلله
_ وليه ما كلمتني؟
__ قبل شوية بس المدير ضرب لي واتصلت ليكي اكتر من عشرة مرات ما رديتي عشان كدا انا هنا حاليا
_ امممممممم
__ ما حبيت اسافر من دون ما اكلمك وما حبيت اسافر وانتي زعلانة
_ ما بتقدر تعملا
__ اصلا ما بقدر اعملا لأنك جزء مني فلو زعلانة انا برضو حأكون زعلان وكل اموري بتجوط والله ، هنا بكت طوالي
_ عمران انا نكدية صح؟
__ ما عارف الفترة الاخيرة دي مالك بس ما تخافي انا بستحملك بكل حالاتك بس المرة دي كنت زهجان شوية وبعتذر اني ما رخيت المرة دي ، هنا بكت زيادة وجات ضمتني كنت عارف السياسة البتمشي معاها وانا حافظها اكتر من نفسها بقت تبكي وتعتذر لي
__ عمران انا ما بستاهلك نهائي والله
_ والله دايرك زي دا بس ، مسكت فيني قوي بقيت اضحك عليها وكدا اتصالحنا
_ اها ما نرجع بيتنا بعد دا؟
__ طبعا نرجع بيتنا راجلي بكرة مسافر لازم اجهز ليه ، ضحكت على كلامها ولبست عبايتها وطلعنا لقينا امها في الصالة وانبسطت لمن لقتنا طالعين مع بعض
شاهيناز: ماما راجعة مع عمران
ثريا: ربنا يعدل طريقكم
الاتنين: آمين يا رب ، وطلعنا رجعنا بيتنا وجهزت معاي شنطة السفر اصلا يومين وحأرجع
__ نازي اها حتمشي بيتكم اليومين ديل تمام؟
_ تمام ،
الصباح وصلتني المطار بعربيتها ومشت شغلها وانا سافرت........
___________
علاقة شادي وصوفيا كانت بتقوى كل مرة ولسه متواصلين ويمكن اكتر وصوفيا دايما بتحاول تستفز شادي بليث فكان بعصب شديد منها
__ انتي فهمك شنو مجنناني بليث دا والله بنفي ليكي
_ ما عندي اي فهم بس انت سألتني من برنامجي بكرة قولت ليك المفروض في محاضرات استلمها من ليث
__ هي محاضراتك البتستلميها من ليث دي ما بتنتهي؟
_ انت مالك معصب حاليا كدا؟
__ لانك مستفزة الصىراحة
_ وين الاستفزاز في الموضوع ، عاوز يرد كدا دخل ليه مكالمة تانية
__ كدا دقيقة داخلة لي روزلين في الخط ، هي طوالي فصلت الخط وبقت تبكي خمسة دقايق اتصل كدا ما رد حاول كم مرة هي قفلت النت وبقت تتكلم براها " للان مربط معاها وما خلاها وجاي يحاسبني على ليث؟ "
هو بهناك لمن روزلين اتصلت ليه كانت بتلومه وهي زعلانة
_ انت لم تعد تحبني
__ لا اعلم ماذا اقول ليكي؟
_ احببت فتاة اخرى؟ ، سكت مسافة ما رد ليها هنا هي عرفت ان كلامها صح بقت تبكي
__ لماذا فعلت بي هذا وانت تعلم اني احبك كثيرا؟
_ كنت احبها منذ الصغر ولم استطيع تجازوها لا اعلم مشاعرها اتجاهي لكنني احبها وانا آسف جدا على هذا ،
__ لماذا لم تخبرني من قبل لماذا جعلتني احبك وانت تحب فتاة اخرى لماذا ارتبطت معي وانت قلبك مع اخرى؟
_ ظننت انني سأنساها بهذه الطريقة لكنني لم استطيع انا آسف اعلم انني جرحتك بهذا الكلام كثيرا لكنني لا استطيع المواصلة معكي هكذا
__جعلتني انتظرك كثيرا لن اسامحك على هذا ابدا
_ أنا آسف حقا ، قفلت الخط في وشه زعل شديد من العملته بس ماف طريقة ما بيقدر يغشها اكتر وهو ما بحبها وقلبه محل تاني ومحل مستحيل في نظره اتنهد ورجع لصوفيا ما ردت ليه وقفلت النت جدع التلفون بزهج " كملت والله " ومشى نام قال يتصل عليها الصباح وبالفعل اتصل ليها فيديو كول الصباح ما ردت بس رجعت ليه بمكالمة واتس عادية
__ امس مالك قفلتي النت لمن اتصلت ليكي؟
_ انت بهمك في شنو قفلي للنت حبيبتك وكنت بتتكلم معاها ، جاط فيها
__ مالك ومال حبيبتي انا سألتك سؤال محدد جاوبي حسب السؤال
_ ما بجاوب يا شادي وانت مالك بتتزهج فيني؟
__ لإنك بتعصبي الواحد بتصرفاتك دي
_ تصرفاتي عملت شنو هسي انا؟
__ كل دقيقتين مدخلة روزلين في النص
_ عشان ما انسى انك عندك حبيبة
__ ودا علاقته بالموضوع شنو؟ ، طبعا شادي نهائي ما قادر يفهمها لانه ما عاوز يفهم فسكتت خلته
_ شادي عندي محاضرة ماشة اتأخرت ، عرف انها عاوزة تنهي النقاش بتوزيعه
__ قولي ما عاوزة اتكلم معاك بس لانك ما شغالة الليلة ، وقفل الخط اتففت بزهج لان كلامه صح ما كانت شغالة الليلة بس ما كانت عاوزة تحسسه بكدا عاوزة حجة تقفل بس جات بطريقة غلط رجعت اتصلت ليه بس المرة دي فيديو كول كان مكشر
__ نسيتي حاجة؟ ، عاينت ليه بإبتسامة ومثبتة وشها على ايدها وقالت ليه بدلع
_ شاااااادي ، جرت الكلمة بدلع ما حاول يعاين ليها في عيونها
__ مالك
_ شاااااادي ، حاول انه يثبت
__ نعم
_ شااااادي ، عاين ليها وهنا ما قدر يثبت قدام عيونها ودلعها
__ عيون شادي ، هنا هي ضحكت لانها قدرت عليه
__ سجمانة خلاص ، لسه كانت بتضحك لانها بتعرف كيف تراضيه
_ بعرف كيف بزعلك وبعرف كيف أراضيك ، اتنهد بتعب
__ الوحيدة المجهجهة كياني ، عاينت ليه بدلع وقالت
_ لأنك حاجة بتخصني ، هنا عاين ليها مسافة وجملتها بتتردد في دواخله هل هي قاصداه بالمعنى الحرفي
__ هي امشي يا سجمانة طالع على الشغل
_ تمام خلي بالك من نفسك ، ابتسم ليها
__ تمام نتلاقى بعدين
عدا اسبوع واتصل ليه ابوه
_ شادي اعمام صوفيا تاني جوني في البيت وقالوا عاوزين بتهم بالحسنة
__ ابوي اوع يكون وافقت؟
_ مستحيل طبعا بس قالوا حيمشوا المحكمة
__ خليهم يمشوا
_لو مشوا عادي ممكن يآخدوها لان اعمامها اولى ، ما عرف يعمل شنو لكن مستحيل صوفيا تمشي معاهم
__ حألقى حل وحأكلمك
_ تمام ، وقفل من ابوه واصلا ماف زول حيحل ليه الموضوع دا غير عمران طوالي اتصل ليه.........