رواية خطايا واجتثات الفصل الرابع والاربعون 44 بقلم نور علي البصري
عــــــــــــــــــــــــــــون
أجت وياي مرت أبوي بالسيارة نفتر بالمنطقة ندورها گلت خاف الولد كذاب ويجوز مـريم سفّت منا لو مناك.
أم مـريم.. ظلت تلطم على رجلها وتلوم بروحها:
— صوجي ما قفلت باب المطبخ يمة مـريم.. بنيتي وين ألگاج عـون.. دبرني ولك يمة شسوي!
ساكت على أعصابي كل ما أشوف أحد يمر أوگف السيارة و أسأله لمن شفت مرية فاتت صحت:
— الله بالخير حجية ممكن سؤال؟
بس المرية سرعت بمشيتها خافت
عبالها نيتي شر صحت بيها أفهمها:
— حجية لا تروحين من شنو خايفة بس أريد أسألج سؤال هم شفتي بالمنطقة بنية حلوة؟
أنطيتها أوصاف مـريم.. وختمت كلامي بقهر : عدها أضطراب نفسي.
حيل أضوج من كلمة (مخبلة أو جنون) أستبدلها بهالعبارة لأنها أرق و أكثر لباقة ما أتحمل اللي وصلت إله مـريم.. المرية وگفت من أمنت وهنا حاجتها أم مـريم:
— بنيتي مريم بنيتي ما شفتيها؟
المرة باوعت لأم مـريم وردت :
— أنتِ مو المرة الكاعدة وي بتها ببيت أبو ياسر.. الله يرحمه؟
— أي من فدوة أروحلج ما شفتيها؟
— أي...، أي شفت الأستاذ قصي أخو المرحوم وياه واحد من عمامه أخذوها وياهم يعني ما تدرين؟!
المرية جانت فضولية و أنطلقت تحجي:
— والله شفتهم أخذوها گلت مسكينة أم ياسر.. وين جانت و وين صارت؟ يا دنيا دارت بيكم يا خية والله يا خية ما أهتميت گلت أهلها ذولة لو أدري ما تدرين جان دگيت الباب عليج و نبهتج والله گلت حماها أعرفه هو و عمهم الصغير ياما يجون لبيت أخوهم المرحوم.. والله أم ياسر.. ما تستاهل اللي صار بيها أمس جان زواج أبن أبو مصعب.. و متجمعين نسوان المنطقة ولله كلّنا حيل مقهورين عليها.
حسيت بملل المرة تعيد و تصقل بالحجي تدخلت:
— شكراً الج خالة نترخص.
سقت سيارتي والتفتت على أم مريم:
— نقدم بلاغ خطف؟ ترى من حقج تبلغين عليهم أنتِ الوصية عليها.
— بالأول خلي نروح الهم يمة ذولة خاف مأذيها بـنيتي.. يمة بس لا أذوها!
— مو بكيفهم بس خلي بأصبع يأذوها أكسرهم تكسر.
ظلت تبجي و سألتها:
— بعدهم بنفس البيت لو لا ؟
— لا أنباع من زمان هم مأجرين بيت گال نوري بحي الـ............
— وين بالضبط؟!
— هاا ما أعرف!
ألتفتت إلها:
— ما تعرفين؟!
— بس أبوك يندلهم تعرفه من رافقهم ضدي لأني عفته و أخذت بنتي لبيتها.
— أوكي لا تحجين.. راح أتصل بي.
طلعت الموبايل وآني أراقب الشارع:
— شلونك يابة.. شخبارك؟
لحظة صمت و شوي و جاوبني:
— ها بوية... داگلي الناعمة؟ هم تعلمت؟! نوعيم على خوالك أبو خنيس... شتريد وجايني بلهفة تسأل و تسلم علية؟ فلوس ما عندي بيع گلادة مرتك الذهب يمي تشيع عنها ما عدها ذهب ولا مدندشة و تلبس شبه حتى لا تساعدوني وآني مديون!
هو يحجي وآني أنقر بأصبعي على ستيرن السيارة بملل مجبر أسايره:
— يابة أريد عنوان قصي.. محتاجة بشغلة أحتمال أهاجر و آخذك للخارج بعد شتريد؟
— منين نزلت عليك كل هالحنية ولك أبن أستبرق شلك بيها هاي؟
— العنوان يابة خلصني!
— أكيد تريد مـريم.. أعرف أخذوها أهلها... ها بوية أقتنعت قررت تعرس؟ ولك خلف منها وريث حفيدي يورثها وأكسر خشم قصي رايدها حتى يخلف منها و يضمن الملك يرجع الهم.. ولك صير ذكي!
سايرته : إن شاء الله هو ليش أريد العنوان؟ أجيبها و أخذ أمر محكمة و موافقة زواج من مضطربة نفسيًا.. بحجة صالحها و للحفاظ عليها.
أنطاني العنوان وسديته باوعت لمرت أبوي:
— شلون تگولين بحي الـ...؟
— ها ما أدري.
— طلع بشارع...... يلة سهلة قريب مو بعيد.
بس وصلنا نزلت مرت أبوي تدك الباب حيل:
— وينكم يا ظالمين بنتي.. عدكم أريدها ولكم كل هذا حقدكم عليمن؟ من ساعة السودة اليوم اللي أخذت المرحوم و مـريم.. ما شافت بنيتي راحة بهذلتوها ودمرتوها ولكم دمرتوا بنيتي كرهًا بية طلعوها لا أشتكي عليكم.
لزمتها من جتفها أهدأها:
— مو هيج الحجي.
ضغطت عالجرس طلعت مرت قصي وجهها أحمر وعرگانة ومعصبة شافت أم مريم و جلبت بيها:
— بتج المسودنة تصير ضرتي آني؟ لا والله غير أگلبها للدنيا و النوب وسخة ريحتها الجايفة تكتل شلون تبولت بالصالة لو شعرها المعكر ما يتمشط عوع يالجايفات!
دنكت مرت أبوي تبجي من القهر
تدخلت:
— العفو خوية مبينة تعبانة كولش منها أنطينا البنت.
— أنت تحجي صدك؟ حتى قصي.. يشحتني لو عمي ترى ما ينطوها هم أهلها و الحق أول و تالي وياهم وثق بس ياخذها قصي ضرة علية لا عبالكم أسكت والله أهججها بالشوارع!
كلامها ما يطمن ظل بالي يم مـريم.. المسكينة شنو حالها هسة شديسوون بيها جوة إيدين عمها وحماها.
— صار راح أشوف شلون ما تنطوها.
أخذت مرت أبوي اللي تعاركت وياها ما قبلت تروح إلا ومـريم.. وياها بس قنعتها إن الوصية الج وما يگدرون ياخذوها و أنتِ أمها عايشة تونا جاي نركب السيارة وگفت سيارة نزل منها قصي وعمه شافوني و هدوا علية تدافعوا وياي:
— هاي شتسوي هنا يا منعول الوالدين تبرينا منك ها ولك أبو العرك شعندك
جاي تريد بنتنا؟ شنو من جرأة على بنتنا.
رد قصي : أي والله و بصفتك شنو و منو؟ و جاي تطالب بمريم.. أبن عمها؟ أخوها؟ شتقربلها؟ حي الله جدي الحجي الله يرحمه هو عم أبوك العار شلون عائلة عارات و أنحسبوا زلم عالعشيرة صچيچة!
الظاهر نسوانهم خابرولهم وهم بمكان قريب من البيت تولوني بوكسيات ودفع هنا ما تحملت أخذت وضعية القتال اللي تعلمتها وبرستيج الجودو و الكراتيه و المصارعة هاي تفيد وي ناس التفهم بثقافة القتال مو ذولي الهمج بس علية وعلى أعدائي خليتهم يحتارون منين تجيهم الضربة وگعتهم بالكاع وتفلت بصفهم عشت دور بطل بفيلم أجنبي ومشيت بثقة لسيارتي أشرت لمرت أبوي:
— يلة يمة أمشينا.
ألتفتت الهم:
— ما أنتهت قضيتنا آني ألكم بسيطة.
ركبت سيارتي و مرت أبوي مصفنة وبس تبجي على بنتها.
ـــ يمة بنتي شحالج يمة؟ أخذوج مني الظالمين.
رحنا للمركز وخليت مرت أبوي تقدم بلاغ خطف لأنها هي الوصية والقيمة على مـريم.. فاتت ساعتين وسحلوهم للمركز وسلمونا مـريم.. بس يا مريم! حتى بأضطرابها النفسي ماكو تمثال و يحركونه لازمها شرطي يمشيها عيونها متوسعة عن الطبيعي ونظرتها فارغة بلا حياة ولا رد فعل.
الضابط باوع وسأل أمها:
— شنو حالتها المرضية؟ أسألها لبنتج ما تجاوب وضعها عبالك عقلها مخدر؟
أمها جاوبته وهي ممرود گلبها:
— والله يمة هي أبنها ورجلها انذبحوا و مرت بصدمة هذيان صدمي يمكن هيج كال الطبيب بس مو هيج وضعها مثل هسة لا يمة هي حركة هواي تتحرك عبالك والله تلعب وتهلوس وتحجي أوقات عبالك طبيعية بس بدون ذاكرة ناسيتنا و أوقات تهيج حتى تضربني لو هاجت هم الله يعلم شسولها.
حسيت گلبي ممرود باوعت لعيونها وين؟ وصلتي يا مـريم.. يا بنت گلبي وروحي يا حبي الدفنته وگلت أنساج بس آخ.. آخ شنسى ولج؟ أنسى سنين طفولتج؟ أنسى تتلگيني وآني صغير جنت أشتغل حمال حتى بس أجيبلج نساتل؟ أنسى ذكرياتي و ذكرياتج؟
غمضت عيوني وآني أعاتبها بصمتي و أتحسر لأن هاجن بگلبي سنيني المضت بگلبي عتاب ألج ولج شنسى أنسى غدرج لو خيانتج؟ غرتج فلوس أهلج يا مريمة وعفتيني أنسى دمارج؟ أنسى الحال الأنتِ بي؟ لا ربي ما أكدر أنسى وهي ضلع من ضلوعي هنا نابتة بگلبي ولج أحبج لو تعرفين شكد آني أحبج أموت عليج بس الكلام الداخلي ما طلع لشفتي بلهفة لزمتها وعيوني تترجم قلق و دموع وألم و قهر لوضعها أحس خنجر ضربني مرضها بلهفة حجيت:
— مريم شبيج؟
لزمت إيدها رفعت إيدها وخرت إيدي بقت إيدها مرفوعة هاي شبيها عبالك دمية شلون ما أحركها تتحرك و جمود ملامحها قلقني هنا لازم أثبت عليهم شوف شمنطينها گلت للضابط:
ـــ سيدي أريد تعهد تتحول للمستشفى و أريد أرفع قضية تعنيف وخطف بنت فاقدة الأهلية ومضطربة نفسياً إريد تحويل للمستشفى وترفع على أثرها القضية لقاضي الأحوال الشخصية.
جريت نفس وآني عندي معلومات لأن إحنا بسنة وضع و كتابة الدستور الجديد فالقرارات بمثل هيح أمور جانت بيد قاضي أحوال الشخصية
التابع لقانون رقم 188 لسنة 1959
(و تعديلاته ) التعهد عليهم و أخذناه بس هم اللواته بلغوا المركز قايمين هم أصلاً عدهم دعوة مرفوعة للقاضي من أيام لتحويل القيمومة لعم مـريم.. لأن الأم مريضة مرض يمنعها من الأهتمام ببنته قصي.. باوعلي بتحدي وگال للضابط وهم يسمعني:
— سيدي مثل ما بلغتك بينا وبين أم البنت قضية نقض وصايتها على بنت غير مؤهلة.. لأنها بمرض يمنع تهتم ببنت مسودنة و يا سيدي الضابط راح أضيف طلب تزويج مـريم.. إلية لأن آني أولى بيها من عـون.. لأن أمها تريد تزوجها لأبن رجلها حتى يبوكون ورثها و أصلًا الورث ملك أخوي فآني أولى أستر مرت أخوي.. سيدي وهذا عـون.. عرفت نيته طماع هو وأبوه لذلك أن شاء الله ماكو خطف لأن أخذنا مـريم.. اللي بوضع سيء حماية من أطماعهم.
رديت عليه بقهر:
— حمايتها؟! قصي أروح وياك للأخير ألتفتت مرة ثانية للضابط:
ـــ سيدي إذا كلامه صح لعد ليش شبيها البنت طلعوها من بيتهم بس النفس عبالك تمثال شمنطينها؟!
ألتفتت على قصي و كملت:
— سوالفك ما تعبر علية لا عبالك أسكت سيدي هو الطماع بورث بنت عمه.
عاركني كدام الضابط و ما أحترم القانون و طرده الضابط برى ينتظر.
— أحترم القانون شنو هنا جايين شقاوات أقسم بالله إذا تاكلون تبن وتحترمون أحبسكم يلة أنت أنتظر برى لمن آخذ أفادة هذا.
من طلعوا هنا ثبتنا الدعوة بصورة رسمية وطلبت من المركز يحول مـريم لفحص حتى يثبت تعرضها للتعنيف بيت عمها وحماها طبعاً خليت مرت أبوي تقدم شكوة وبلاغ هنا يعني ذول حبس إلى أن يطلع تقرير مـريم.. آني الكم تتحدوني؟ سهلة ما أطلع عـون.. ما خليتكم تحلمون بـمريم.. عاد من طلعت من الضابط وهم برى.
أبتسمت : الكتلة لازم ما كفتكم ههههه.
تذكرت الجم اللي دخلته بالبلد اللي أشتغلت بي منسيت شلون داروا علية من عرست مـريم.. ظلت بالي من كسروني وأذوني استغلوا كثرتهم وآني جنت وحيد بلا سند ولا أخوه و قصي أكثر واحد أذاني وكسر رجلي اللي أنكسرت بس أرجعها الك بس خلي أرتب شغلة مـريم.. وأبعدها عن طمعكم رجلي الكسرتها إلي مرجوعة ألك قبل سنين من سافرت لغير بلد هناك هواي يهتمون بالرياضة فقررت أقوي جسمي بالمعقول فبهاي السنين جنت أهتم برياضة القوة عضلاتي مو أوفر لأن ما آخذ هرمونات ولا إبر نفخ عضلات أعتمد تغذيتي الصحيحة و ممارسة رياضات القتال بأنواعها.
حولنا المركز للطب العدلي لأن إحنا بهاي السنة منتصف أول عشرة سنين من الألفينات وضع البلد توة بدء إعاد تشكيل الدوائر فجان أمور التعنيف تبدأ بشكوى لأي مركز عادي وهو يحول للطبابة العدلية ظليت برى وأم مـريم.. أخذت مـريم.. جوة يم الطبيبة العدلية حتى نثبت جنائياً تعرضها للتعنيف و نثبت شروع بالقتل لإستيلاء على ورثها خاصة منطينها مدري شنو كل هذا لصالحنا الأغبياء.
طلعت مرت أبوي تبجي و تمسح بعيونها و مـريم.. اليوم هادئة بجمود عكس كل الأيام.
— يلة للمختبر يريدون تحاليل دم الطبيبة شاكة منطينها نوع من المخدر تگول عدها خمول غريب و وضعها مريب يـمة بنيتي.. شو حتى مشي ما تمشي إلا ألزمها وآني أمشيها وساندتها ولك عـون.. عبالك لعابة إلا بيدي أحركها! مالها ردة فعل الطبيبة گرصتها تشوف ردة فعلها وهي ولا يمها بس النفس و عيون مفتوحة عبالك تمثال مو بشر شسووا بنيتي اللي ميخافون من الله ولك من نزعتها حتى نثبت آثار كدمات ضرب زرق صورتهن وفتحت ملف إلها ولك عـون.. هاي مـريم أم شعر الذهب الشلال للخصر مزينيها صفر يمة عـون.. كابلني و شوف همي فوك مرضها بنيتي بس تجر النفس.
رحنا للمختبر.. سحبوا دم منها وهي ماكو رد فعل هاي مـريم.. أذكر بمراحل حياتها من تلقيحات إلى علاجات إبر تخاف تبجي وتنز بمكانها من النيدل هسة أبد.
طلعنا وما خليتها مثل لعابة نسحل بيها شلتها بين إيدي.. بست گصتها و الحجاب أنزاح شوي طلع مقدمة زيان صفر المفروض هنا گذلتها طلعنا بالإنتظار برى كعدتها على كرسي وكل شوي أباوع إلها بين حسرة و ألم للحال الوصلتله.
جذبني توسع عينها الغير طبيعي بس برز جمال عيونها رغم النظرة مو طبيعية مدري كثر ما أحبها أشوفها حلوة حتى وهي كتمثال جامد حتى وهي كمضطربة نفسيًا.
رجعت أباوع لعيونها وساع ومفتوحة على الحايط بس فارغة لا ترمش ولا تحرك جفن صحت بأسمها هزيت كتفها ولا كأنو جانت مثل التمثال و تحف السيراميك الجميلة جداً إللي نشتريهن للجمالية بغرفنا وطاولات غرف الضيافة جان عقلها مسافر لغير دنيا ساعتين وصاحوا إسمها كمت أستلم التحليل باوعلي المحلل بشك.
— شصير للمريضة؟
أحتاريت شجاوبه بصفتي شنو و أرد هنا أنتحلت شخصية:
— زوجـها.
النوب عصب علية:
— أخذ التحليل للدكتور و يلة روح.
أستغربت يا ستار شبيه هذا يزمخ؟
طلعت وباوعت لمريم همهمة ضبابية من حلكها مو مسموعة ورجعت جماد
شلتها و وراي أم مـريم.. وهاي المرة
دخلنا للطبيبة قرت النتائج وصدمتنا:
— منطينها (هالدول) بين بالتحليل الخاص السويناه مال سموم لا حول ولا قوة إلا بالله هذا لو تذبحها ما تطلع صوت صارت كأنما جثة وعيونها مفتوحة أنتم مقدمين شكوى و هذه التقارير و الصور و التحاليل تخلوها بملف شفاف وتسلموها ترفع للقاضي والله يلعن كلمن يأذي إنسان بلا حول وقوة ثبتت حالة الجمود التمر بيها المريضة بتقرير ومستحيل المريضة تاخذ هيج جرعة وحدها.
أخذنا مـريم.. و طلعنا باوعت لمرت أبوي بمراية السيارة كعدت ورى منومه بتها وراسها بحضنها.
— تنزلن خطار ببيتي لحد ما تخلص القضية ما آمن عليكم وحدكم وذولة وحوش.
بس وصلت خابرت وجدان:
— افتحي الباب أدخل السيارة للحديقة وياي خطار.
— منو هلا بيهم أطبخ؟
ما حجيت سديته عرب وين وطنبورة وين هاي بس أرد عليها.. ما تسكت وبدل ما تطلعلي برى أدخل السيارة للكراج لازم تعرف و هي بالتلفون شنو وشكو؟ فتحت الكراج و دخلت كرجت السيارة مـريم.. بحضن أمها كاعدات بالكراسي الورى نزلت شلت مـريم..
وجدان تخوصرت:
— مكرمة وشايلها؟ لا ما أقبل!
خزرتها وآني اهلي بضيوفي
ـــ تفضلي تفضلي يمة يا هلا ومرحبا البيت بيتكم.
أخوزر وجدان البوزت و عيونها غيرانة لعد شلون تردين آخذها وأخلف جهال وأنتِ من شلتها غرتي؟
ظليت مطلعت لرزقي بسيارتي الأجرة كابلتهن نومت مـريم.. بغرفة الجهال الممقسومين النا وجدان.. كالت هاي للجهال بس الله بعد ما قسمهم النا غطيتها وهي على حالها وجه مشدود وجسم جامد تمثال بيني وبينكم وجدان طفگة مضامنها تروح تعارك مرت أبوي وتفشلني لذا كابلت البيت وأنجبيت مر هذا اليوم وكل شوي أمر لغرفة مـريم.. أشوفها أنتبهت لا أوسوس بس لا تبقى هيج جمود مميت و يقهر والله قابل بخرط جنونها و فرط حركتها بس هيج لا آني راضي بكل حالاتها اللي أسمع حسها بي بجمود لا يا ربي.
ثاني يوم الفجر گعدت للصلاة وجدان سبقتني و ململمة البيت وكاعدة تكوي ملابسي وتعلك بالكنتور صحت عليها
ـــ صباح الخير يا حلوة يا أم البيت يا أم الكرم الما تفشلني وي خطاري المعزبة بنت المعازيب.
ردت : صباح النور حياتي.
أشرتلها تجيني:
ـــ تعالي بحضني يا أم البيت. بعد الروح والرية وكل الناس عارية وكل بوسة من يمنا تساوي الاف والمية
ظلت تتمضحك وهي فرحانة ورفعت خشمها بتباهي وآني أدغدغ و أشاقي و أتمصلح بوس و سوالف متزوجين.
شسوي لازم أطلع للشغل ولازم أصبغها وأبجلها حتى تركد وما تتمشكل وي العالم.
وهم درست موضوع زواجي بمـريم.. طبعاً حتى أحميها وأكفلها وأصير عـون إلها بزمنا الأغبر وهنا بعد لازم أتعلم لواكة وصبغ بنتلايت وصبغ إبوكسي وكل أنواع التمصلح والتلوك حتى تمشي السفن ووجدان ما تأذي مـريم لأن لمست غيرتها مؤذية.
هي من ترفع خشمها لفوك ووجها يتهلهل فرح أكول الأمور تمشي بطيب استمريت أمدح:
— يا أم گلب الطيب أريد تبيضين وجهي وي الضيوف وأنتِ عاد ما تتوصين والنعم منج.
أجتني تحضني وهي تدلع:
— بوسني هنانة اووووي عـون.. بعد بوسني والله يا عـون لو تقبل أعرسلك ولك هاي مسودنة تخلفلنا فروخ جهال صكوك أتباهى بيهم يم نسوان أخوتي شوفوا جهالنا أحلى من ملحانكم!
ضحكت : مممم والغيرة؟ ولج هو بس شلتها غرتي.
ظلت تفر بوجهها:
— نتحمل شنسوي كله لأجل الجهال وهم ينكتبلك ثواب تتكفل هاي المخبلة.
طلعت صوت من حنجرتي يدل على الرفض:
— مو كلنا نسمي مرضها أضطراب نفسي؟
هزت إيدها:
— شنو المخابيل صاروا يدلعوه ولك بدل ما كلمات شطولهن مخبلة والسلام ترى مو ناس فصحى أحنا يلة يروحي كوم أسبح وتوضأ وصلي ترى مرت أبوك كاعدة كتلها تتريك ما قبلت تكول بعد وقت ومبينة مريضة مدري شبيها تتقيأ خاف النوب حبلة وتعال يا عـون تكفل النوب أخوك الجاي بالطريق مو بس أمه وأخته!
هزيت إيدي:
— أنتِ شبيج بلا عقل وبعدين شعليج أتكفل مـريم.. لو أمها؟ كاعدات بخيرج ماكلات من تعبج شنو؟ شو هنه أهلي ترى من قبل لا أعرفج لذا تنجبين تاكلين تبن زين وتداريهن غصب عليج لأنهن خطارج ذني وعيب عليج تهينين مـريم..وها بطلي ملحة وصفاقة دخيل ربج أنتِ مليقة كولش.
جنت معصب وطلعت عصبيتي بيها برطمت وبلواتة حضنتني:
— غرت عليك من مـريم.. ولك تخبل بيضة قطن بس معليك بغيرتي توكل بالله وأخذها بلكت تجيب بنية ووليد حلوين مثلك وبيضان شكران مثلها بس عيون خضر عليك وأصير أم الولد مو أم غايب..
هزيت إيدي وطلعت ما تصيرلها جارة سبحت وتوضيت وصليت ورحت دكيت باب غرفتهن صوت مرت أبوي:
— ادخل.
دخلت وآني بلهفة مضيع سنينه أدور بعيوني مرايم أباوعلها مبتسم أبتسامة ذاك المراهق المتلهف بدت مـريم تفتح وتغمض لسانها جان يابس مثل الخشبة وأمها جانت كاعدة يم رأسها ميتة من القلق.
همست مريم و بصوت مخنوك:
— مرورة بلعومي يحركني حجارة بيضة خلاها بحلگي مدري غيمة أكلت نزلت من السما وأكلت غيمة وهاي أم خشم مفروش أم خشة مدري منو تكله المخبلة تشلع گلبي أكتمها بعد أنطيها غيمة والله يا الله يردوني آكل كل الحجار والغيوم شكد مخابيل.
حجيها خريط ممتوازن بسبب مرضها بس دتقصد الحباية المشربيها إلها حضنتها أمها:
— يا روح أمج يخسون كولهم مريمتي يمة.
مـريم.. دارت وجهها للحايط وبدأت تضحك ضحكة تقهر:
— هذا أبو صنديحة شكبرها جابلي الغيمة البيضة كال أكليها وتطيرين بس مخبل هو عـون.. هم مخبل أكلك أنت عـون لو مـريم لو قصي آ ي، آخ راسي غركت بالظلمة.
باوعتلي أمها مقهورة طمنتها:
— آثار الحباية وهسة هي عدها هذيان صدمي دتخلط بين الواقع والحلم.
داخلي فرحان لأن صارت تميز أسمي كمبصت كبالها ولزمت إيديها بستهن أمها تحمحمت.. وآني بلحظة ضعف مشاعري طغت.
— يمة أنت تصلي حرام يمة خوب أعقد ووراها ألزم أيدها وبلي يعجبك.
أستحيت ووخرت وكعدت على كرسي وآني أسأل مـريم:
— مـريم.. منو آني هم تذكرتيني؟! أويلي ولج مشتاق لمريمتي.
كعدت خزرتني منططة عيونها علية وتمد بأصابيعها صوبي وتقلد القطط بيديها تخرمش بالهوى صفنت بيني وبينكم خفت شنو هاي جني تلبسها النوب فوك ضيم الصدمة جني :
— أنجب لا تكول مريمتي.. آني وصال أم الصرصار وأنت أبو عيون البزون أنت بزون الشوارع بز بز بشت بشت بزون أطلع برة يم ذيج الغول بزون تعال يمي
بخوف وتوتر بكولشي شجاع بس بتلبس الجن لا هنا جبان.
همست : سلام قول من رب رحيم شتردين مني ولج يمة هاي شلون تباوع وتنطط عيونها علية خاف تلبست جن وتعارضت.
كامت مرت أبوي.:
ـــ أذكر الله ما عايزين.
وكفت وآني أسمي وهي نظرة مو مريحة إلي و تحرك إيديها عبالك قط يخرمش هوا وتصيحني
_ ألا تجي يمي بزون شوارع أبو عيون.
تجرأت وعلى كيف تقربت منها.
_ دنك حذاي.
_ ها.
_ دنك دنك دنك دنك لا أكلك هم.
_ ها.
كالت مرت أبوي:
_ يمة دنك لا ترعص هي يمكن تلعب وياك مبيها شي منين أجاها جني يمعود
_ على مسؤوليتج
دنكت جرتني من إذني
_ أنت شسمك؟
_ أكيد عون ولج أذني يمة أضافيرها طوال بعد تكصيهم.
بس مريم صاحت.:
_ إش البزازين الضبابية ما تحجي هواي بس تكول ميوووو مياووو حريق دخان.
_ها.
_ أنت بزون شوارع الي راسك بزوني وعيونك بزونية ذات اللهيب الأخضر وجسمك من ضباب بلون دخاني وذيلك من نار يحرق أبو صنديحه قصي ونوري الوحش.
شوي أجاني طراك بعلباتي:
_ روح بزون شوارع مخبل هذا دواك وعند الله شفاك
عدلت قامتي متفاجأ شبيها هاي ساءت حالتها معقولة بتأثير البادول بعد ميفكها الجمود تهلوس ظلت تأشر عالحايط أستغفرت الله وكمت أنتبهت لأمها كوة لازمة الضحكة هزيت إيدي:
— وأنتِ فرحانة أوي؟! كل هاي الرجولة بنتج تسميني بزون شوارع! النوب جسمي ضباب دخاني وذيلي أسود أدري جني آني وما أعرف
مدري ليش أبتسمت رغم الوضع جان كولش مو مال ضحك لأن مقهورين على مـريم.. واللي وصلتله بس أحنا بشر وتصير مواقف نصير بيها تافهين ونضحك كامت مرت أبوي وخلت شال على راس مـريم.. وهي تشاقي بتها:
— كد ما تصيحيني أم كرعة صرنا متساوين بس أسم الله يمة على شبابج من المرض إلي بية.
التفتت علية وگالت:
— وأنت يا عتوينا ما تحن وتغير رأيك وقرارك هاي بزيزينتك شوف شحلاتها تونسك والله حتى لو مو واعية سوالفها تخبل.
أبتسمت : يا عتوي سوتني بنتج بزون نثية وبزون عجيب غريب من عالم مجهول بعقل بنتج.
—ههههه لا والله عتوي وسيد العتاوي وغصب عليها ههههه.
ضحكت : ههههه والله جني راح آخذ بزيزينتج منج وأخلي وجهج فاهي والله يعين عـون على بزازينه وطلايب الغيرة مال بزونتي ذيج.
— الله يهديك يمة ويهدي وجدان على بنيتي هي بلا عقل ما تشكل خطر على أحد وآني هسة من أموت أموت مطمنة وأغمض عيني مأمنة على بنيتي.
— إلج طول العمر يا أمي ما أنسى رباج ولا من يعاقبني أبوي بسكتة تجيبين اللفات والمي وتوكليني شما أسوي ولا أردلج الجميل.
— ولك آني ربيتك أنت أبني ومن أطلب وأستنجد بيك مو لأنك أبن رجلي لا لأنك رباي و أطلب حك رباي بيك.
— أبشري يا أمي.. تدرين من جنت أصيح خالة لو عمة لأن أبوي بصغري بس أكلج يمة يكتلني يكول أمك ماتت وغارت لجهنم أحس بغصة لأن يطعن بأمي ولأن يمنعني أكولج يمة.
أيام مرت و تحول الموظوع لصالحنا و الضغوطات زادت والواسطات حتى نتنازل عن قضية الاختطاف وقضية الحباية المخدر اللي شربوها لمـريم. بهاي الفترة الأوظاع جانت مو تمام و القوانين على الذمة والضمير.
دكات على الباب رحت فتحته وجان يطلع....
شــــــــــــــــــــــــــــيلان.
وكفت مصدومة بلي سمعته
جوانا : هاي مرتك و أبنك جبتهم إلك تريد أكول لشيلان ههههههه تريد تتبلى علية مو! أتغدى بيك قبل لا تتعشى عيوني.
ـــ أنتِ فد سكط حتى يخلالج الجو مو؟! تردين تخربين حياتي.
رجعت ألتفتت على حنين رزلتها تبقى دومها ضعيفة شخصية تقشمر بيها جوانا بأسم الصداقة والحرص.
ـــ وأنتِ شلون جاية وحدج بهذا وضعج وأنتِ حامل
ـــ والله خابرتني صاحبتي جوانا.. وكالت تعاي زوجج يخونج بالملاهي شلون ما أجي بروان انت تمثل يمر التزام ديني عشتوو.
ـــ وصدكتي حجي هاي الكذابة و أبوي شلون عافج تجين
ـــ تعاركت وي زوجته و تعرف آني يتيمة وين أروح عمامي لو بيهم خير جان ما تعاجزوا مني و زوجوني حتى يخلصون
ـــ راح تسويلي طلابة تعرفين وضعي و كوتلج ما أكدر أجيبج هنا النوب جايبة وياها الطفل
هنا صرخت وهديت أضرب بي وهو تفاجأ بوجودي و صار أصفر :
ـــ تسوي روحك تتحسر على طفل كوله تمثيل حتى ما أشك بيك ولك أكلك أفحص الخلل بيك تكولي مبيه شي أي متأكد لأن متزوج علية.
ضليت أشهك : ليش هيج لو كايلي وما مستغفلني ما أستاهل والله ولك آني خطية.
أشهك و أبجي واضرب بروحي ما مستوعبة بروان معقولة بروان.. لعد وين الحب والعشك وصراعي وي أهلي حتى آخذه كل هذا طلع هيج مو بعينه وجاب إلي ضرة ليش ولك علمود طفل الله ما قسمه شبيدي بس مو مال هيج تصدمني لو مهدلي لو كايل العالم تظل عشر سنين و 15 وتالي ينقسم إلهم ما صبرت ليش
أباوع لجوانا.. تضحك علية:
ـــ أجت عدلة هذا زوجج أبو الملاهي متزوج ومخلف وأنت المسكينة ذايبة بيه ومسلميه أدارة الأملاك يبوكم ينهب بيكم.
صاح بروان : كذابة أنتِ كل همج تدمريني لأن من أروح لعمامي حاولتي تراوديني كم مرة بس ما منطيج وجه وظليتي تلحكيني للشمال رتبتي وضعج و تزوجتي آدم.. وأستمريتي تراوديني وتغوين وأرفضج أنتِ وحدة أدبسز وأعرف سوالفج القديمة بس آدم ما صدكني للأسف انت سويتي هذا تنتقمي مني لأن ممخليج تلعبين وأنت بذمة آدم.. سلاحج هو توزين آدم..وتتآمرين حتى أسقط من عين شيلان.. وهسة دازة على حنين.. تهدديني بيها ولج حنين كم مرة مانعج من هاي مو كتلج صديقة سوء تبتعدي عنها.
وكفت وآني منهارة ممستوعبة أباوع للطفل الشايلته أمه وهو يريد يذب روحه على أبوه.
ـــ بابا..
وبطنها الحامل مبينة حامل مو كرش يمكن خمس أشهر ستة هيج شي.
حنين : خابرتني جوانا.. وكالت لازم أجي ساكن حضرتك الملاهي لازم أجي أتفاهم وياك وأنصحك فكرنا التلفون ميفيد ما خابرت هي كالت لازم تجين فورا لا يورطنك عارات الملاهي وهم تترك الشرب
ـــ صدكتيها يا ثولة.
ـــ أذا ما أجي تبلغ أهلها جيرانة وذول إخوانها يوصلون لعمامنا وعمي أبوك وتصيرلك طلايب خفت عليك والله.
شيلان : جان بروان.. يحاجيها و عينه علية وهو لزمتني الدوخة و لعبت روحي منه ومن اللي شفتة لزمت بطني أتقيأ متزوج من يمتى سنتين ثلاثة من ورى السقوط يمكن لا وفوكها مخلف وحامل.
ويجيني عود بحجة الشقى يمهد شيلان ترى أتزوج أذا متخلفين طلع كذاب وخاين وطلع يمهد مدري شنو بعقله وقتها من حسسني بذنب ما عنده جهال ويحجي بثقة هو مبي شي طبعاً يثق بروحه متأكد هو يخلف والدليل كدامي.
لزمني سندني يتوسل ويراضيني يبوس كصتي يهدأني.
ـــ جري نفس وخلي نتفاهم لا ياخذج الغضب.
رجعت نوبة التقيأ و تعمدت ألا أخليها عليه درت صوبة وتقيأت بحضنه فز مصدوم وهمست
ـــ خاين هذا مستواك أطلع برى عن حياتي
ـــ أنتِ شتحجين أصلاً بعد ما عرفتي آني متزوج أخذج يم أهلي هناك بعد ببيتي تعيشين قبل شايل هم شلون أصارحج وبقائي هنا جان لأجل عمر ليزعل وعمي مات أنت مكانج وياي وين ما أروح ترحين.
ـــ تحجي بثقة مو؟
صوت حنين: ويع لعبان نفس وين تقيأت
كوة وكفت لازمة بطني ومعدتي بعدها تلع.
ـــ أنتِ تسكتين لا..
ما كملت شكمل آني مصدومة و ما أعرف شلون أنطي رد فعل درت ظهري و مشيت وأني أبجي هو ذب قميصة التقيأت عليه وتبعني.
ـــ شيلان حبيبتي سمعيني أعرف شما أكول مراح أبرر سوايتي وهاي كدامها أحجي لا عبالج زواج لأجل الأطفال الله يشهد أنحطيت بموقف محرج وأنجبرت أتزوج حنين حنين أحجي ليش تزوجتج.؟
سكتت و ظلت تناشغ وبعدين حجت وهي تبجي:
ـــ أبوي على فراش الموت.. و جبره وحرجه وكال لبروان هاي بنتي أمانة عندك وتزوجها بس بروان رفض.
أبوي وإنسان مريض ويلح تتوقعي الواحد يكسر بمريض دز أبوي على شيخ و وحرجه وخلاه أمام الأمر الواقع عقدنا ومات أبوي وراها بأسبوع
همست مستهزئة
ـــ أنجبي أنتِ مالي حجي وياج أما أنت يا بروان.. شيلان.. وما خلفت كدامك ست الحسن فتممت حتى تخلف طفل مو؟ وآني طز بية يعني أنت لازم تتمم بس ما فكرت بمشاعري ولك ليش ليش تخذلني.
ظليت أضرب بي وردت أضرب مرته ببطنها هيج نار بگلبي واجة بس أجت الضربة بالولد الفرفح بجي باوعت لأيدي وهي رجعت لورى مصدومه مو بس هي حتى آني أنصدمت من قسوتي على الطفل ماله ذنب حتى هاي حنين مالها ذنب الذنب ذنب زوجي الخاين.
ظليت ابجي وأعتب على روحي ليش آني ما خلفت ليش بس تزوج حنين خلف وآني لا ظليت أناشغ وهو ماكو رد فعل بس أخذ أبنه يسكته
ـــ أشش ماكو شي بابا.
مشيت وحيدة هم عائلة وآني دخيلة أسمعه يحاجي جوانا:
ـــ مثل ما جبتيها تبقيها يمج زين وأنت ولج حنين حسابج بعدين تولين يم هاي لمن أرجع الله ينتقم عليجن فرفحت شيلان دخلي يصيرلها شي وآني الجن.
وركض يحضني ما مهتم لوجود مرته ومشاعرها .
ـــ جان زواج ورقي والله أتفقت وياها بس الصار من مرة تعاركنا و أنهانيت وقتها معصب و رحت لعمامي وتممت أنتِ الدفعتيني دوم تحسسيني آني مني الصوج ما أخلف بس طلع مبية شي
ـــ روح لمرتك وطلقني أنتهينا هاي هي أنت عجبك تثبتلي مو منك الصوج وهاي هي شفت بعيني فعلا مبيك صوج الصوج بية رقم تقاريري سالمة كالت الطبيبة مشكلة بسيطة
وسونارات وصرف كومة فلوس بس حتى افرحك بطفل غير أبر تفجير البويضة( hCG) الي كم مرة تفشل كل هذا راح هيج أنت مخلف بعد آني مالي لزوم.
ـــ شنو هالكلام أنت الحب والعشق فمو بكيفج تنهين حبنا وآني نفذت وصية لو ما أتخليت بأمر واقع وأحراج فلا أخطي هاي الخطوة أبد بس محضر إلي شهود و شيخ و كدام أهلي العالم صعب موقفي جان وماكو مجال للتفكير ولا للهروب من الوضع مقسوم وقدر مكتوب يا شيلان.. وما أرتبكت حرام وغصب أبقى بحياتج مو بكيفج واضح
ظليت ما أحجي وياه ولا كلت لأهلي لأن اللوم علية ويصير الحجي هذا أختيارج ولازم تتحملين وفعلا تحملت الليل كلة أبجي وهو يهدأ بية ويحلف آني العشق بس بقت بخاطري انكسار وخذلان.
من الفجر سافر هو يرجع مرته ما مهتم وصل لأهلي الموضوع من مرت عمي لأن مرته يمهم بقاها هو ما مهتم بنظره ممرتكب حرام بس وكرامتي من شفت نظرة أستهزاء آدم وابوي
لأن بروان.. جان أختياري المرفوض منهم وهنا نظرات الشماتة زادت همي. أما آني أدري بروحي ضعيفة كدامه وهو أستغل هذا الشي لأن أعشقة مو بس حب عادي ظل يلح أنتقل وياه لوسط البلد وآني رفضت وكتله أنتهينا بس بقى ما عافني رجع مرته ورجع يراضي وما أقبل لمن مابيوم أسمع هوسة و صياح ركضت أشوف شكو آدم.. بيده مسدس .