رواية خطايا واجتثات الفصل الخامس والاربعون 45 بقلم نور علي البصري
فتحت الباب
طلع أبو صالح أبن شيخ جواد.. شيخ عشيرتنا رحبت بي:
ـــ هلا خوية هلا تفضل زارتنا البركة.
ـــ أحم.. أحم يا الله.
دخلت الشيخ للديوانية (غرفة جلوس) وسديت الباب الداخلي لا تجفت مـريم.
ـــ يا هلا ومرحبا شيخنا.
ضحك:
ـــ إحنا رفايج ما بينا ألقاب يا صديق.
أبتسمت و تحاضنا و خليته كاعد :
ـــ شوي و أجي.
ـــ أكعد ولك ما جاي أجرب ضيافتك جايك بشغلة
ـــ صالح لحظات و أرجع.
رحت لوجدان كاعدة يم مرت أبوي بالمطبخ :
ـــ وجدان.. حضري الضيافة هذا أبن شيخ عشيرتي و صديق عمري من الطفولة حتى معهد المعلمين كملناه سوى و هاي مـريم.. أنتبهن إلها زين لا تطلع يمنا و تبهذلنا.
رجعت للشيخ من باب الديوانية البراني طبيت همست :
ـــ أحم إي رفيج زارتنا البركة شعجب اليوم تذكرتني و تذكرت أيام الكهاوي والطاولات و...
رد صالح وهو يبتسم:
ـــ أش يمعود كبرنا بعد وتبنا يا عـون.. قابل نبقى نسخت للأبد.
دنكت :
_ آني هم تركت من زمان والله منكم تعلمت الشرب و الجكاير أنتم جنتوا إلي بوكتها أصدقاء سوء هههههه.
ضحك وياي :
ـــ بعد ماضينا الأسود بيضناه وعرسنا من كم سنة وخلفنا.
ـــ آني هم تزوجت أكيد وصلك ولو زعلان عليك ما أجيت بعرسي بس الخلفة بعدني.
شوي و صوت مـريم.. برعصة وتصرخ :
ـــ أم كرعة ألمن حابستني عوفيني أروح أوكع عكال شيخ أسم الله ألبسه لبزون شوارع.
كمت ردت أروح أخوفها:
ـــ أعذرني خوية هاي بنت مرت أبوي أنصدمت و هذا حالها لا تواخذنا يا صالح.
طلعت من باب الداخلي للديوانية أسهلي:
ـــ مـريم.. سكتي وأنتِ وين الضيافة.
أنطتني صينية وآني أخوزر مـريم.. حتى تسكت وتنجب :
ـــ هش ولا صوت.
ردت : آني ذبانة وتصيح هش هسة أطكك شلون عيون بزونية.
ضحكت وطلعت وآني أردد:
ـــ أحمدك و أشكرك ربي.
خليت الصينية كدامة على الطاولة مد أيده أخذ شرب بس المي ما تقرب للجاي وهو يحاجيني.
ـــ عـون.. ندخل بالموضوع خوية آني جايلك و زعلان عليك يعني أنتم ولد عم
و مدخلين محاكم بينكم؟ علمود مرة تتخارب العمام وولد العمام البنت بنتهم ولحمهم و أنت أخذتها منهم و مستقوي عليهم بالوصاية اللي بيد أمها عيب بحقنا هالسوالف يا خوي.
ـــ أكيد ندخل محاكم بيني و بين عمامي و ولدهم وأنت شيخ و تعرف الحظ والبخت خوية أنت تدري شسووا.
دنك و كال : بس الدم ما يصير ماي.
ـــ خوية يصير يصير وي هاي الناس الطماعة ليش ما يصير لا والله يصير
وسبق صار مي لو نسيت شسووا بية.
سكت شوي وراها كال بنبرته حزم:
ـــ عـون.. أنت مثلهم؟ جاوبني شو سكتت؟! لا تصير مثلهم خوية قنع زوجة أبوك تتنازل عن القضية هذا أحسن حل.
شوي صفن بسبحته وكمل:
ـــ أنت شتريد كول آني أكفل الجماعة إذا هم ظلموا أنت لا تلوث نفسك بالظلم لأن عدهم عوائل ترى سألت محامي أقل حكم ياخذوه خمس سنوات هواي ذني يا خوي وعدهم عوائل و جهال.
ـــ تكفلهم ما يجون بعد ولا يضايقون أم مـريم.. شكلك ذول ما يتوبون يعني مزينيها صفر و كاتليها بصوندات مدري شنو ترضاها يا صالح بس كلي ترضاها على خواتك لو باجر بنتك هيج تجيك ترضاها؟ يا ناس يا عالم اليرضى على بنته لو أخته يجي يكلي قنع مرت أبوك تتنازل!
ـــ زين الحل شنو؟ هذا مو حل جهالهم شنو ذنبهم يا عـون؟
ـــ ذنبهم أهلهم عارات مو هذا آني كدامك أبوي عار المفشلني بكل مكان و دربونة أصلاً ممعتبرة موجود معتمد على حالي وجهالهم راح يتعلمون الحياة لا تخاف عليهم.
ـــ أرجع أكلك صح القانون وياكم بس البنت بنتهم.
ـــ أنت رافكتني من الطفولة وشاهد علية ربيتها.. آني طفل و أربي طفلة كبرت بين إيدي تكفلتها محد سأل ولا تكفل ولا حتى جاب أبسط أحتياجاها مالهم حق بيها ولو ما هي وافقت على أبنهم و تكترت آني والا فنهم يتدنون إلها ربيت مـريم.. بماي عيني تريد بسهولة أتقبل الصار بيها؟ أنت صاحبي و جنت أحجيلك همي وتعرف شنو قصتي وي مـريم.. هي كل أهلي وآني كل أهلها.
دنك براسه وكال:
ـــ بس ترى البنت بنتهم و يكدرون يشهدون هي ببيتك وأنت مستغل مختلة عقليًا.. يتهموك مستكعدها لغايات عندك.
وكفت بعصبية:
ـــ يخسون اليجيب شرف مـريم والله أسويها دم للركب وأنت صالح رجاءً! لا تكول مختلة عقلياً مـريم مو مختلة هنا ما أقبل الإهانات والله كلمتك سهم زرفت نص گلبي دتهيني هنا.
ـــ ممممم فهمت كل هذا الاهتمام بعدك تحبها لا والله ميت بيها إذا هيج متولع بيها أخذها و فك النزاع وأخصمها ورى ما تعرس عليها أتنازل عن القضية قبل لا تصعد للقاضي وينحكمون و خلي العالم تطلع عيب تورجون العالم عليكم وأنتم ولد عم.
هزيت راسي بس ما سهلت الأمر يمه:
ـــ خوية اللي تريده يصير لو بيدي بس الأم معاندة و بنتها أجتها مشربيها نوع من أنواع الحبوب المركزة (بادول) و هذا قوي لو ميتة؟ البنت غير الضرب والزيان والتعنيف.
همهمات جوة وصوت كتل و بجي بساع أترخصت و دخلت جوه يمهن:
ـــ خوية.. بس لحظة وأرجع.
ـــ أخذ راحتك.
لكيت أم مـريم.. مگبعة مـريم بالعباية وتدك عليها وهي مفرفحة بجي.
ـــ الله لا ينطيج يا مـريم.. ولا ينطيني تردين تفضحيني.
ـــ خالة.. يمة.. عوفيها دخيل الله اللي يضرب مـريم.. أحس نار تشب بية لا تخليني أهج بيها منا وما تندلون دربنا.
وخرتها وكعدت الأم تحضن بمـريم..
و تبجي:
ـــ هي تخبلت يمة ليش نجمل الواقع نزعت و تريد تفوت للزلمة يمة.. چا تخزيت وهذا لبلبان لأهله وعمامكم.
تناشغ و عيونها الحلوة تشتكيلي كسرت خاطري.
ـــ يمة ذمة مذممج لا تضربيها دشوفي بس نظرة عينها شلون تكسر الخاطر.
ـــ عـون.. ما شفتها !
ـــ خرب حظي الـ.....
ظليت أفشر على روحي :
ـــ تسمعيني ممنوع أحد يضرب مـريم البيها مكفيها.
و مـريم.. تشتم بأمها:
ـــ أنعل أبوج أم گرعة.
أبتسمت و كمبصت يمها :
ـــ عيب تشتمين أمج وينها گرعة طلعلها شعر أحسن منج أنتِ أم گرعة.
خلت إيدها على راسها وعصبت:
ـــ أكرعك أنت وأبوك.
ضحكت و وكفت أجت عيني بعين وجدان.. الغيرة بعيونها قاتلة تلطفت:
ـــ أم البيت المعدلة.
ـــ تهج و تاخذها مو؟!
ـــ هو أهج بيجن أقصد و أعوف مرت أبوي وحدها بالبيت تغني ظل البيت للأم طيرة.
فرحت وجدان :
ـــ كول والله تريد نهج آني وياك بس هاي نعوفها يم أمها.
كوتلها : صار.
رجعت للشيخ بداخلي أدردم إذا أعوف مـريم.. ألمن هاج بس كعدت يم صالح سألني وأنحرجت:
ـــ أكيد هاي مـريم.. بنوبة؟ عـون أنت تحبها يخوي وآني رفيجك من الطفولة و أعرف مشاعرك الأفضل تتزوجها وتفض الموضوع هذا أحسن حل للكل لأن بصفتك شنو مكعدها يمك؟
دنكت : بصفتها خطيبتي وآني فكرت بالموضوع وماكو حل الا الزواج قدمنا طلب للقاضي بتزويجها و دأنتظر الموافقة حتى أهتم بيها أما توسطك للربع يم أمها عود أردلك خبر.
أبتسم : أنت ما تردلي طلب بس لوتي ترى.. دكمل العقد و ذول بالسجن حتى ما يتعرضون إلك أو يمنعون الزواج.
ثلاث أيام وأخذنا موافقة القاضي و تم العقدين و بنفس اليوم تنازلت مرت أبوي عن قصي و عم مـريم مع تعهد عدم التعرض حالياً مالي رغبة بيها طبعاً جذب لا تصدكوني ههههههه متلهف بس خايف أضرها ما أعرف رد فعلها أفكر أتدرج وياها بالموضوع وهنا لا تعتبروني مستغل لمريضة نفسياً لأني أساساً أحلم بغرفة تجمعنا من يوم دك گلبي إلها بس هي عافتني والحلم وقتها ما تحقق.
ـــ يمة دوم لبسيها ستريجات ثخان جوه گلبياتها هاي كل شوي ترفع ذيال ملابسها.
ـــ خيطتلها أوفرات داخلية يمة أستر لمثل وضعها.
ـــ إي عفية عاشت إيدج.
مـريم.. رغم مرضها لاحظت بعقلها الباطني شغال مرة من أخذتها للسوك جانت أختياراتها لسة ذواقة أشتريتلها باروكة نفس لون شعرها حتى تلبسها بين ما يطول شعرها شوي.
ـــ وصال.. تردين شعر؟
بجت وبهلوسة:
ـــ هذا أبو صنديحة الجايف هو و أم خشم الخشة شالوا العش حتى تطير عصافيري منا!
أشرت لراسها المغطى بحجاب:
ـــ تدللين تعاي أختاري أو هذا حلو بلون شعرج.
بس هي جلبت :
ـــ أريد كل العشاشيش أربي طيور.
ـــ لا مو كولهن.. هاي كافي بلا دلع حياتي.. شعرج فترة و يرجع وما تحتاجين باروكة.
ـــ إي و أصير غيمة وأنت مطر.
ـــ هههههه والله أنتِ تونسين.
أشترينالها أحتياجاتها وعيني عليها ولازم إيدها حيل وبإيد أكلب بالغراض وأختار وهم أشتريت لوجدان بعد لازم ما أفرق حتى لا تصير طلايب نفتر وعينها على لعابة جرتها من البائع حيل
ـــ جيب لعابتي بواك أنت غول كبير جدًا.
رجع البائع ورى خايف.
ـــ بيش هاي
ـــ هاي بالات أخذها ب 10 آلاف
موديلها قديم تشبه لعابة مـريم وهنا هم ملاحظ عقلها الباطن يذكر بعض الأمور.
أمها أجت ويانا بالسيارة برجعتنا فاتحتني.
ـــ أكولك يمة عـون.. آني خوما أظل هنا الزلمة أبوك عفته وسمعت تزوج وحدة كد بناته.
باوعتلها ومدري أضحك عليها مدري أخجل منه:
ـــ يمة.. تدرين هذا شيسموه متصابي و هسة أنتِ مقهورة خلي يولي بلكت يكف منج و من مـريم.. خاف تحبينه ههههههه والله يا الله نوري.. و ينحب شجاجن أنتِ وأمي و تزوجتنه بس هي حظوظ وين الإنسان الحقير النسوان تحبه وآني أوف حجيت و باوعت لمريم وصال الروح.
مرت الأيام و دخل زواجنا الغير متمم لشهر و كلما أكول اليوم أبدي حياة زوجية وي مـريم.. أأجل مدري ليش ممتقبل و أعتبره أستغل عدم وعيها
أما مريم اليوم هادئة كولش كون تبقى هيج بيدها جدر وبسكت وتفتفت بيه
ـــ عـون.. جيب ماي يلا بساع!
ضحكت : ولج شجاي تسوين؟
ـــ أطبخ.. ياسر جوعان.
جريت نفس:
ـــ أستغفرك يارب عوفي اللعب بالنعمة.
صاحت علية:
ـــ ترى أغلط عليك أبن الغول!
ضحكت : ما كذبتي هو نوري غول.
عصبت وأجت بيدها بسكتة إلا تخليها بحلكي:
ـــ أنت مو عـون.. طلعت غول بواك جهال طلع أبني!
شلون طلابة هاي ياربي جانت أمها متنگبة وتضحك كتلها...
ـــ إيييه أضحكي تعاي قنعيها هسة تتركني راح تلزكلي غول..
كامت أمها وهي تضحك:
ـــ صوجك عجوزي غير تجيب إلها ماي تطبخلنا مرك بسكت هههههه.
ـــ ماكو شي يضحك ترى هذا الهدوء وهمي هسة تحطنا وتكتلنا هاي القزمة تعاي ولج جوعان وكليني بسكت من إيدج.
ميلت الجدر وراها وآني ميت ضحك تصرف طفلة والنبي.
ـــ مااااا.. ميل غاد تاكل أكل أبني.
أنطتها أمها كلاص ماي نكعت البسكت وظلت تعجن بي بيديها دخلت وجدان إلي من يوم اللي عقدت عقدين على مـريم.. وهي تتزعل وكل شوي تسأل تحبني أكثر لو تحبها يمكن تحب تملكني طبعاً سلاحي وي وجدان أبجل بيها حتى تسكت.
صاحت وجدان:
ـــ أكول وين الجدر التيفال يااا صخام الصخمج شتلعوسين عوع مسودنة؟
وكفت مـريم.. وأيدها لعاويس بسكت:
ـــ شعليج ها شعليج عـون.. هاي غول تريد تبوك جهالي.
ردت وجدان بحدة:
ـــ هم وينهم جهالج شفناهم؟! تونا يا الله صدوك عـون.. يمتى تخلف منها؟ صح تحبني وتعشقني وآني أم البيت والروح و ريتك بس يا حبيبي أتحمل الغيرة شسوي كوله على مود الجهال شو لسة ما رحتلها؟
دنكت و ضام ضحكتي وآني أشك هاي وجدان.. يمكن بيها خيط خبال وخالي مشاها علية.
ـــ أم البيت أنتِ حياتي شلون أفاركج؟
ـــ ميخالف خلي تخلفلنا واحد أثنين عشرة عشرين.
ضحكت لا هاي هي رسمي ترللي أفتح مستشفى أمراض عقلية تاليتي هم أشخط وياهن.
ـــ عشـرين؟! مو تكولين واحد وهاي هي و بعد متوصلها و عود تغارين؟
دارت وجهها وهي بزعل تحجي وتبجي:
ـــ أبوي كال صيري سنعة مثل نسواني وأنتِ هنا الجبيرة صح أصغر عمر من المسودنة مالتك بس جبيرة بأفعالي أبوي يكول أنتِ الزينة والمعدلة أنتِ بنت أبوها خيرة بنت خير.
ضحكت خالي اللوتي هم يبجل
و يساير الأمور مثلي.
ـــ وجدانتي مو هسة أنتِ لا تلحين و تدخلين أم البيت ما تلح وتدخل تخلي رجلها هو إلي يتصرف.
مرت أبوي سكتت منتبه عليها ما تدخل بنقاشاتي آني ووجدان حتى لو على مـريم.. تسكت ظلت وجدان تلملم بالمواعين وغدرتها مـريم بضربة طاوة أجت أسفل ظهرها على مقعدها وكعت على وجهها!
ـــ حتى تتوبين شلون غول هاي تبوك جهالي!
رحت تقربت من مـريم:
ـــ ذول مواعين مو جهال.
ـــ لا أبد ذول جهال بزون الشوارع والغيمة.
أجت أمها : خلي المرة تطبخ هم بيتها وهم تكتلينها نزل ويدبج عالسطح يمة عـون.. هذا ما يصرف هيج ترى كل شوي تدك على وجدان.. و بيت المرة تبهذل أحنا بعد نرد بيتنا.
رفضت : مكانكم هنا هي مرتي وأنتِ خوما تعيشين وحدج خاف حنينا لأبو الفواين.
ـــ يا.. النوب دار علية ولك شوف أذت البنية.
راحت كومت وجدان.. التبجي وتشكيلي:
وجدان : مو حال هذا إلزم خبلتك.
ـــ هاي عود أنتِ الزينة والصبورة أنتِ ردتيها و تردين أعزلها عنج مو ردتي جهال أكيد يم أمهم يبقون.
ـــ ها.. أتحمل بقيها بقيها.
مــــــــــــــــ♡ــــــــــــــــريم
الغول باكت ياسر وهم جهالي رحت أريد آخذ منها الجهال وهي تصيح:
ـــ هاي طاسة مو ياسر وهذا جدر النوب تضم الجهال بالمطبخ هاي مخبلة عضيتها وأخذت ياسر منها بزون الشوارع عـون.. وكف يوخرها عني و يخزرني شلون عيون تجدح بعد بزون شوارع الأدب سز.
كتله : ولك بزون شارع باكت ياسر وجهالي!
ـــ كافي مـريم..
شوف الحظ المجير بزون شوارع عون يغلط علية يكولي مـريم.. اليوم أطلع غيوم الدنيا من عيونك جلبت بي وآني أعض بزندة لازمني من خصري يكولي:
ـــ أهدئي أكولج يمة علاجها شاربته.
ـــ إي بس أوقات ما ينفع تظل تهلوس.
شيحجون ذولي غيوم الموت حسيت شوي راسي يوجعني كعدت ساكتة آني.. الغيمة الممطرة خلوني أبجي
و القنفة أنفتحت نصين وطلع منها الوحش أبو صنديحة وكفت بساع خايفة وحضنت دفعت الحضنتها لا هاي غول تاكلني و تمصمص الغيمة التايهة آني هذا عـون.. بزونة الشارع دائماً يحميني وما يخلي أحد يضرب الغيمة وصال حضنته وضميت وجهي بصدره بس شو صدره غطس وباك راسي ردت أوخر بس هو حاوطني ويمسح على زغب فرخ الدجاج إلي بدأ يطلع براسي.
عــــــــــ♡ـــــــــون
ـــ إشش هدوء.
رجعت لوجدان :
ـــ وجدان.. يلة أخذي المواعين و لا تباوعيلي هيج ها غرنا هاي أنتِ عود الزينة بنت الزين.
ـــ هههههه... إي إي رايحة بس بطل محاضن.
أما مـريم تعاتبني وداخلي سؤال هاي دتغار علي؟ عقلها باطن يوحيلها لو آني متوهم.
ـــ ليش عـون.. مو أنت خوش بزون راسك بزون شارع و جسمك غيمة طويلة أحبك وهيج تخليها تبوكني؟
ـــ أجيبلج غيرهم والله عوفي المرة تاخذ مواعينها.
أخذتها أمها.
ـــ تعاي انومج على ما يكمل الغدة
أخذتنها تنومها وآني رحت ورى وجدان.. للمطبخ.
ـــ إلمن عرستلك آني غير حتى تجيبلي جاهل يملي علية البيت؟
أخذت كلاص غسلته وصبيت مي وآني أجاوبها :
— إي وجدان.. هو أنتِ العرستيلي لو ما أنتِ جان فلا أعرس أصلاً.
ـــ شسوي يا روحي محكوم علية بلا خلفة وأول وتالي أبوك يقرالك وتمشي بشوره.. النوب تجيبلي ضرة صداگية عاد على مـريم.. أهون مجرد رحم يخلف إلنا أطلع غداها عندي إلها تمن بايت ومركة.
ضغطت على الكلاص الفافون عوجته وعيوني موسعة بغضب هي آنتبهتلي ولزمت الكلاص من إيدي:
ـــ هاي شنو؟! شحجينا النوب حسرة علينا الكلمة... ترى هذا الواقع لو ما الأطفال فلا أقبل.
ـــ شنو تمشين عليها البايت عصبتيني أكثر من كلامج القبله رغم أيضا ماتقبلته.
ـــ ترى تلعوس بالأكل و تلعب روحي خلي أغديها كلة نعمة الله الا تاكل ويانه مرق سمج أغديها تنام.
بقهر : خوش حجي لعد حرري البايت وماعونا واحد آني وياها بعد.
ـــ يا شنو تاكل بايت.
ـــ فنج توكلين مـريم قبلنا وآني أكول ليش متاكل و أمها تكول أكلت قبلنا ثاريج عازلتها تنطيها بايت شحدج الا إموتج.
حاولت ما تصير طلابة بس الطلابة اليوم مقسومة تصير.
رحت كعدت يم مرت ابوي حاجتني:
ـــ أكولك يمة ترى مـريم.. عدها مراجعة للطبيب و لازم أقدم فواتير حتى يرجعولي صرفيات.
ـــ لا أبد بعد لا تاخذين من فلوسها أعالجها على أمكانيتي تعرفين مـريم.. شنكة بس تطيب باجر و تعال عـون.. بكتني أنتِ درجيلي شكو صرفيات من يوم مرضها أسدد و أرجعهن بحسابها.
دمعت عينها وهي تهمس:
ـــ الله يرحم البطن اللي حملت بيك و اللي سمتك عـون.. أنت صدك عـون..
باوعتلها بالأول ترددت بس لازم أحاجيها بهذا الموضوع:
ـــ أااا... أكول يمة.
ـــ كول يا بعد عيوني أنت.
ترددت فبديت أتحجج بالجهال.
ـــ تدرين وجدان ما تخلف نهائياً وآني يعني فكرت خوما أجيب ثالثة حتى أخلف منها و مـريم.. موجودة يعني تزوجتها حتى أحميها فيعني أقصد أستغفر الله أقصد والله ما أعرف أوصل الفكرة.
ـــ هذا حقك يمة و إذا تحميها هم هي بعد مريتك وآني مو غشيمة وما أعرف بعدك تحبها و ربك يجوز صار الصار حتى يرجع الحق لأصحابه.
ـــ يمة مشتاقلها بس خاف إنسانياً أستغلال لوضعها.
شجعتني و حقها تريد تثبت بنتها بحياتي قبل لا تغادر الحياة تريد تطمئن مـريم.. أم جهالي وهنا مكانتها تكون أكبر.
ـــ روح بزودك يمة خليني أجهزها إلك لليل و أخذ حقوقك وأن شاء الله تخلفلك الذرية الصالحة.
حسيت شي على ضهري وجسمي تمدد أبتسمت هاي سوتني جرباية ونامت علية أمها تنهرها:
ـــ ولج راح تكطعين نفس الولد كومي.
ـــ بزون شوارع بواك أنتِ كرعة مالتي وهذا باكج مني.
ـــ يا ولك عـون.. تغار على حضني منك هههههه.
ـــ تعلمت تنوميها بحضنج وما تقبل أحد ينام مكانها خليها دتلعب.
ـــ يمة... خاف النوب تتعلق بيك وما تخليك تروح لذيج شلون تتصرف.
أبتسمت ووجهي بعده بحضنها ملت راسي صفح أتنفس لأن هاي على ضهري.
ـــ أعرف أتصرف و وجدان.. ما تنظلم فهمتيني يمة.
طبعا بسمرتها لا عبالها لأن أحب مـريم و أهمل ذيج لازم أخلي حد.. مثل ما مـريم ما أقبل أحد يأذيها وجدان.. هم ما أحب واحد يجيب سيرتها شوي ومـريم.. وكفت على ضهري تدبج.
ـــ بزون تلعب كميزة.
ـــ ااأخ.. ولج لا هسة تسويلي أنزلاق دبة حميسة صايرة.
أمها : شلون راح تطفرلة خيارة الظهر و تشنط الولد ولج هيدي هاي صدوك دتسمن أريد اسأل الطبيبة العلاجات اللي دتكتبها خاف السبب.
همست متحمل التدبج:
ـــ إي يمة علاجاتها أعتقد تسمن شوي خلنها تتحرك لا تخمل.
ـــ عاد مقصرة هي تفتر و نفتر وراها حتى بطفولتها ما جانت حركة هيج ولج يمة الولد ضهره نزلي.
ـــ عوفيها هسة تمل وتروح.
و صدوك وخرت و جلبت بوجدان إلي بس دخلت سكتنا وهي تفرش السفرة وتخلي مواعين الأكل بالهول عالسفرة.
شوي كالت:
ـــ كوموا تغدوا.
صاحت مـريم:
ـــ جوعانة والغولة باكت غدانة.
شوي كمزت مريم بنص السفرة لزمتها وجدان وخرتها بعيد درت بجسمي وساند روحي على عكسي و أضحك على مـريم.. تشاكس وجدان.. إلي قلة صبر عدها كلت خلني ألطف الجو وي وجدان.. لأن مساع تأزم.
ـــ وجدان.. حياتي أنتِ لا تضوجين منها تلعب وياج لو منج أتونس على السوالف الحلوة إلمن مبوزة دخيلك ربي.
تقربت مـريم.. من وجدان:
ـــ أنتٍ الغول بنت الغيلان.
ودفعت وجدان.. وكعت خطية على الأكل وكفت وجدان.. هنا معصبة:
ـــ لهنا وكافي شو شادة وياي لا حبوبة سوالف غيرة الضراير مو من حقج هو رجلي وآني اللي زوجته إلج تنجبين وظيفتج بس تخلفين تمام وبعد إذا كتيلي بنت غيلان أموتج كولشي ولا أهلي.
صحت بيها :
ـــ وجدان!!! حالج حالها أنتِ بكامل وعيج و عقلج تحاجين بنت بحالة أضطراب.
ـــ كافي فلسفة كافي لا تدلع المرض شنو مضطربة هي مخبلة أصلًا ترللي.
ـــ دكلي تبن ولمي اللعوسة.
ـــ خلي أمها تلملم ورى بتها الترللي شنو مبقيني بس أخدم.
باوعت لمرت أبوي و هي تلم النعمة و دموعها تصب من تجاوز وجدان.. ما تسكت صابر عليها وما ردت أمد إيدي أعرف مرت أبوي هي الشايلة البيت ومعاونتها وتخيط إلها حتى دشاديش.
ـــ وجدان.. لا تتعلمين على الضرب ما عندي مانع أحطج و أدوفج ترى مـريم مريضة و على نيتها ولازم تكبرين عقلج وياها لو جانت بصحتها وسوت هيج جان حاسبتها بس بنت عالنية جان كبرتي عقلج.
ـــ أي دافع دافع وسودنها علينا فوك ما مسودنة.
راحت وجابت المرك وذبته على مـريم.
ـــ يلة مثل ما زفرتيني يا زفرة بنت الزفرة يا بنت الكلب بس بعد تغلطين علية أذبحج بالسكين.
هي كالت أذبحج بالسكين.. وراحت للمطبخ جابت سكين تخوف بمريم.. كدامي و مـريم.. صرخت.
ـــ دم دم ياسر.. دم.
وظلت ترافس وتزاكط خوف ونوبة قوية لزمت وجدان.. من شعرها وأدفع بيها للمطبخ سديت الباب وغسلتها بكتله تتجاوز عالمرة.
ـــ تضرب لأن غلطت مو.. شو هي غلطت ما ضربتها.
ـــ ساعة السودة عرفتج بيها خالي ورطني بيج شكد أتمصلحلج تمصلح يا أم البيت أنتِ الروح والرية و الظاهر ميفيد وياج بس النعل هي مصدومة و أبنها أنذبح تخوفيها بالسكين وتغلطين على أمها؟ مخلية عقلج ويه مريضة يالعاقلة يالواعية مخلية عقلج وي مـريم.
فورت دمي مو هي شجعت أتزوج وهسة طلعت خبالها.
ـــ أي مخبلة لأن تعبت أنظف وراها زوجتك تخلف إلي طفل مو كاعد تدلع بيها و تنام على ظهرك هاي مو خبلة عمي آني الخبلة هاي جاي تتقصد تسوي إغراء حتى تاخذها لأن راكنها وحتى تغثني.
حتى إيدي وجعتني كد ما ضربتها وما فاد بيها رجعت لهدوئي وكتلها:
ـــ لمي هدومج يلة ترحين لأهلج لمن تهدئين وكلامي ويه أبوج ما أستحيتي تكوليلها بنت الزفرة و أمها ما ردتج تهينين مرة جبيرة ببيتج إذا ما أخليج تحمضين يم أهلج تأديب فلا أطلع عـون.
ـــ لعد أروح هيج خلي يشوفون حالي حال الظيم من طبتلي هاي الخبلة وأمها.
لبست عبايتها وآني مصفن:
ـــ ترحين بالزفر؟
ـــ إي أثبت عليك ظليمتي.
ـــ ظليمتج يا وجدان؟! ليش آني بشنو ظالمج دروحي سبحي يلة وتعطري تزفرين سيارتي.
ـــ ها ها أي لو ما أبوي ما صارلك بيت وسيارة و مكانة جان تركع بطالة بطل بذيل بطل.
خليت أيدي ورى ضهري ما أضربها شبعت دك ولسان ولا يسكت ورطة هاي طلعت:
ـــ عدلي وضعج و تسنعي وعديني تكبرين عقلج وآني ما أوديج لأهلج ترى أن وديتج ما ترجعين ألا آني أجي عليج.
ـــ ها خفت لا يفشلوك شو تراجعت لا ما دام طكيتني ألا أروح لأهلي.
جاوبتها ببرود:
ـــ براحتح أنتظرج بالصالة.
رحت لكيت مرت أبوي وجهها أحمر من البجي و مـريم.. نايمة بالصالة و وجهها مزورك من الضرب مسبحتها من الزفر و نايمة و تشهك من كثر الوجع عبالك طفل مكتول و نايم.
ـــ هاي شنو كاتلتها صدك كذب مو كتلج اليضرب مـريم.. يضربني بگلبي وروحي ليش أنفجرت بوجدان.. لأن ما كبرت عقلها وطكت المسكينة النوب أجي الكاج ضاربتها.
ـــ عون والله متفشلة منك يمة مشاكل سوتلك وي مرتك و خليني أحاجيها لوجدان ألمن الزعل وتعوف بيتها يمة عـون كفيت وفيت بنيتي أخذها لبيتنا وأنت تريدها تجيها بيتها.
ـــ ألا أكولج هيج بيتها اللي هو بالأصل بيت نصير.. و عاشت سنين بي وياه بحياة زوجية تقبليها إلي يمة.
ـــ والحل؟! هنا صعب بعد.
ـــ أدبرها بس شوي صبر و هالخبلة تريد تزعل تولي خلي أهلها يربوها على لسانها كل حجيها راح أوصله لأبوها و أشوف يرضى بهالإهانة؟
طلعت تسحل بجنطتها وتخزر بمريم.. النايمة ومرت أبوي دنكت خجلانة وحاجت وجدان :
ـــ يمة وجدان.. وين عايفة بيتج هاي أنتِ الزينة والعاقلة حالج حال بنتي إلي بلا عقل.
صحت بعلو صوتي:
ـــ يمة شنو هالكلام دخيل ربج وأنتِ يلة ولج آني بعد الما رايدج تبقين ألا ينكص لسانج.
وصلتها لأهلها ولزمت أبوها وإخوانها وحجيت كولشي إلهم وطلعت بقت وجدان زعلانة شهرين خلالهن تممت زواجي بمريم صح أول لكيت صعوبة بس سايرت عقلها آني بزون و هي غيمة و باجر نخلف المطر و تسطرهن علية الليل كوله و صابر ومتحمل.
غيرت دكتورتها لأن ماكو نتيجة على ذيج وتبدل العلاج هذا يخليها هادئة و تتجاوب بسهولة بس بقت مـريم عقلها قافل عن الوعي وعن ذاكرة ممحية الا إشارات عقل باطني بأمور معينة.
يعني حتى علاقة زوجية متجاوبة جدًا و هذا خلاني أعتبر داخلها بالعقل الباطني عـون.. موجود و ليلة زواجنا جانت مميزة عن باقي البشر جانت ليلة أسطورية مهدت لليلة من منطوق عقلها صرت أحجي لغتها هي خالية من تعقل.
الغرفة جانت هادئة بس صوت مـريم.. وهي تدندن كلمات ما مفهومة و تلعب بطرف الستارة جانت أمها مهيئتها لابسة ثوب نوم وردي ناعم و محتشم من ستن والباروكة لايگتلها تقربت منها بحذر ما ردت أفززها مـريم.. بلمحة تصير نمرة وتخرمش. و بلمحة تصير نسمة وتذوب.
حاجيتها أستميلها بمنطوقها :
ـــ مريمتي ليش واكفة يم الشباك؟ البرد يأذي العصافير.
التفتت علية عيونها جانت وساع وناشفة :
ـــ عـون.. الغيمة البيضاء كالتلي لا تنامين البزون يريد ياكل ريشج أنت بزون حرامي عـون؟
هنا هم رغم كلامها إلي ما معقول بس حسيت العقل باطني يميز شنو أريد منها كعدت على طرف الجرباية وفتحت إيدي إلها مثل اللي يستقبل طفل خايف:
ـــ آني بزونج الأليف يا مـريم.. ما آكل عصافير آني لميت ريشج وحطيته بگلبي تعالي أريد أحجيلج سر الغيمة.
تقربت مني بخطوات مترددة تمشي على أطراف أصابعها.. كعدت بالكاع كبالي وحطت راسها على ركبتي بدأت تشم بريحة دشداشتي.
مريم : عـون.. ريحتك هيل أنت راح تذبحني مثل ما ذبحوا العصفور الصغير بذاك البيت؟
نزلت لمستواها و لزمت وجهها بين كفوف إيدي جانت ترجف مثل السعفة
عون : وحك عيونج اللي هي دنيتي ما يمسج ضر وآني أشم الهوا.
ضحكت ضحكة قصيرة وفجأة لزمت أذني جرتها:
ـــ ههههه أنت مطر يعني نغرق ونصير سمك عـون.. أريد أصير سمكة ذهبية ببطنك حتى ما أحد يصيدني.
أبتسمت رغم الوجع بأذني.
ـــ صيري كولشي تريدينه مـريم..
والليلة لازم نصير قريبين حتى العصافير الصغيرة اللي نتمناها تجي.
سكتت و باوعت لعيوني بعمق عبالك عقلها رجع لثواني لزمت إيدي وحطتها على گلبها اللي جان يدك سريع بديت أفتح الدكم اللي بياختي وهي تراقبني بفضول طفولي فجأة جرتني من دشداشتي وصارت قريبة كولش من وجهي وضحكت ضحكة غريبة للحظة خفت كلما أشوفها بهيج حال أكول بيها جني هاي حطيتها على الجرباية و بديت أقرأ آيات بگلبي حتى الله يبارك بهاي اللحظة ويشافيها.
باوعت للسقف وكالت :
ـــ عـون.. نعست.
أسبوع ورجعت وجدان بشروط ومبين خوش ضابيها ضبة لأن حسيتها تتجنب المشاكل وي مـريم.. وكافية خيرها شرها ما تدخل بأحد راضيتها و أطلعها أونسها فبالنهاية من حقها تغار وماكو وحدة تتقبل ضرة بس الظروف حكمتنا أثنينا هي عذرها الخلفة وآني عذري مـريم.. وأستمرت الحياة بغيرتها ومشاكلها وردت أعزل مريم بمشتمل ابني فوك بس وجدان.. رفضت.
وجدان : والجهال هنا وي أمهم شلون راح أربيهم و أشبع من ريحتهم بقيها متحملتها لخاطر الجهال.. ما حجيت شي حتى لا أزم الأمور.
حبلت مـريم و جان حملها متعب جداً للمثل وضعها كلنا هسة يموت الطفل كد ما تتحرك و تكمز وتلعب بس الحمد لله ولدت بسلامة و طلعنا بعد الولادة من مستشفى للبيت تلكتنا وجدان بالهلاهل و تطش الجكليت فرحت بـ بـاهر.. اللي نور دنيتنا و جان خليط مني ومن أمه أخذ العيون والشعر مني وباقي ملامحه يشبه أمه.
دخلت مـريم.. الهادئة بعد تعب الولادة نتأمل خير بهذا الهدوء بلكت وراه ترجع طبيعية ظليت أراقب صفناتها الهادئة بعد مولدت طفل بلكت تطيب حيل متأملين بقت تباوع لأبنها بنظرة غريبة عبالك جاي تستكشف كائن فضائي
ووجدان گمطته وتهلهل و خلته بحضن مـريم.
ـــ عـون.. خلي ترضعه أمه
أجت أم مـريم.. طلعت صدر مـريم حتى تخليها ترضع أبنها:
ـــ يلة يمة وين مصفنة بنيتي.. هذا وليدج رضعيه فدوة لله و لعطيته شمحلاته خطية جوعان.
بس مـريم.. فجأة لزمت خد الطفل وبدأت تمط بيه وهي تضحك:
ـــ عون.. هذا ليش ناعم؟ ليش ما عنده شوارب مثلك عـون.. هذا أكيد عصفور اللي تحجيلي عنه بالليل من نلعب آني وياك لعبة العش والعصافير حتى يجي العصفور الصغير شوفه أجه بس ما عنده ريش واكع بقوطية حليب صاير أبيض!
كعدت بصفها عالجرباية لزمت إيدها وإيد الطفل وكتلها بصوت يرجف من الفرحة:
ـــ هذا أبنج يا مـريمة.. هذا بـاهر.. اللي الله رزقنا بي.
فجأة طفرت عين مـريم.. على وجدان اللي جانت واكفة بالزاوية ومنزلة راسها تبجي أنقهرت عليها حيل.
ـــ غول تعالي لا تبجين الغيمة أنطتني هدية وآني راح أنطيج نصها تعالي شوفي السمكة مالتنا بس ديري بالج تعضيه بأسنانج الكبار!
فرحت وجـدان.. و ومسحت دموعها مدت إيدها ورجفتها واضحة لزمت إيد الطفل الصغير الطلعها من گماطة وباسته بلهفة الأم اللي أنحرمت:
ـــ يمة فدوة لهل وجه يتربى بعزك يا عـون.. فدوة خلوني أربيه وياكم.
ـــ هو أمه أنتِ اللي تربيه ومـريم تعرفين حالها مو مؤهلة تربي وتهتم بس ترى الخلفة تبقى إلها يا وجدان.. ومسجلة بأسمها وأنتِ وهي لو رجعت مـريم.. لطبيعتها تتشاركن بتربية الولد.
الهدوء صار نادر ببيتي وجدان.. أوقات تسكت عن أذية مـريم.. اللي صارت يومية تريدني يمها و نسولف سوالفنا المعتادة عن غيمة وبزون ويخلفون عصفور وصارلها فترة تريد عصفور جديد حياتي بين الضراير صايرة صراع بين عقل يحترق و جنون يداوي و غيرة تموت وتحيا بنفس اللحظة خلال هاي السنوات صار عندي من مـريم.. أربعة عصافير ذكور أقصد أولاد هههه ومـريم إتنقل بيها بين الأطباء و أمها طلعت تاخذها من وراي لعرافين ذول يكولون تلبس أو سحر جنون بس منو يسحرها و هي أصلاً أنصدمت الأطباء يكولون هذيان و بقت مـريم يم الله.
لحد ما فد يوم.. جنت برى أتسوك من ستوتة و الجهال يلعبون يمي فجأة صريخ من بيتي والدخان مالي المكان ركضت والعالم تركض وياي للبيت اللي طلع الدخان من حديقته.
شـــــــ♡ـــــــيـلان
أباوع لأدم.. وهو لازم المسدس بوجه بـروان.
ـــ أنت كذاب لأن مرتي بنت أصول وكشفتك لشيلان تريد تسقط بسمعتها أنت كذاب و هسة جايني شنو دليلك مرتي.. تصاحب زلم من وراي عندك دليل؟!
ـــ شايفها بعيني حتى راجعة تلتقي وي رجلها الأول.. وكم مرة لمحتلك عينك على بيتك يا أخوي.
ـــ أنت كذاب ما أثق بحرامي بواك كم مرة تبوك.. من واردات المحاصيل و نسكت لخاطر أبوية الله يرحمه يحبك و لخاطر هاي المسكينة ولك أقتلك إذا تطعن بشرفي.
صاح بـروان:
ـــ أقتلني.. يلة إذا يريحك أقتل بس تتندم والله أبد ما مديت إيدي وأنت أكثر واحد يعرف بهذا الشي.
هنا جوانا.. حجت وهي تضرب ببروان.
ـــ لأن تريد تخون أخوك وطلبت مني علاقة ورفضت.. و جاي هسة تطعن بشرفي شيلان.. هذا حقيقته خاين
و حرامي وصولي.
شوي دخل بابا.. وهد على بـروان.
ـــ من أنكشفت أوراقك مصفر الخزنة طلع الفلوس اللي عندك يا بـروان ولك اليوم أسلمك للشرطة بايك فلوس الخزنة كلها مصفرة.
باوعلي بـروان.. بعيون مدمعة
ـــ شيلان.. آني مو حرامي ما ابوك ولا أخون أخوي بمرته آني نبهته أكثر من مرة وما يسمع مني والله اليوم شفتها بسيارة مارسيدس وي رجلها الأول والله شيلان.. كل ذول ما يهموني بس أنتِ صدكيني ما أخون آبد إذا على بنت عمي أنحرجت وما عرفت أتصرف وخلفت منها إي أشوف ربعي خلفوا وآني أتحسر.. ثقي بالله يومها جنت متعارك وياج و الصار لأن البنت أشتكت لأهلها ما جايسها هم أعتبروا أهانة و شنو سبب بنت عمك شبيها و نافرها ولج ضغوطات والله ضغوطات وما عرفت أتصرف شيلان.. أول مرة يتهموني و توكفين متفرجة آني مو حرامي.. زين تردين تعتبري زواجي خيانة قابل و أتحمل لأن فعلاً خذلتج بس غصبًا علية بس الأ التحرش بمرت أخوي والسرقة ما سويتهن.
من يوم اللي أنخذلت بي عرفت ماكو شي إسمه حب بهاي الدنيا كله كذب نضحك على عقولنا بمسميات الحب و ماكو رجال يستحق گلبي ومن وقتها كرهت كل الزلم بسببه من يومها غلفني برود غريب صار گلبي مثل ثلوج أعالي جبالنا قاسي و ميصفي لأحد باوعت بعينه وهمست بكل كبرياء وقسوة:
ـــ والله إذا ما ترجع الفلوس هالمرة نسجنك مفهوم؟!
باوعلي بصدمة :
ـــ تعرفين كولش زين آني ما ابوك.
ـــ أنت حرامي و متحارش مكانك السجن.
ـــ شـيلان.. تعرفين شنو دتحجين أنتِ دتكسرين داخلي شي دتخذليني تدرين آني ما ابوك ولا أخون.
أعرف جوانا لفقت وأعرف ميبوك بس بيومها تبنيت خطيئة أتهامه كرهته ردت أأذيه مثل ما أذاني وعاش حياته خلف وآني المحرومة الغيرة يومها تحولت كره مدمر.
ـــ هسة شنو تسلموني للشرطة بس آني بريء.
قسيت گلبي وبابا يتصل بالشرطة هو كعد منهار و دموعه تصب ويمسحهن بعكسه.
ـــ لا تشوهين سمعتي آني ما أتحارش بمرت أخوي ولا أبوك.
ـــ تستاهل السجن آني إلك.
شوي و أجتي الشرطة و أخذوه كدام عيني وبذيج اللحظة قررت أمحيه من حياتي نهائياً و رفعت قضية طلاق الغريب إنو ما عاند ولا جادل بعد فترة سمعت من أبوية إن أبو بـروان.. أجا وجايب وياه كل المبلغ النقص بالخزنة و طلب تسوية مقابل التنازل عن القضية.
هذا اللي صار فعلاً بس بابا خله شرط إنو بـروان.. ما ينشاف بالشمال أبد ولا يجينا ولا نلمحه و تعهد ألاب بكل شي والتقى بأبوية بمكتب محامي وخلصوا كل الإجراءات أبد ما شفته ولا شافني وصار بـروان.. مجرد صفحة و أنطوت من الماضي.
بس الصدمة جانت أكبر من كل شي اكتشفت نفسي حامل تسترت على الحمل بالبداية وكعدت أبجي بعديش يا ربي بعد ما ضاع رجلي من إيدي وشاف غيري بعد ما أتهامات وسجن وطلاق هسة يله أطلع حامل؟!
أمي گالت طلاقج باطل ولازم الأب يعرف دزينا خبر وهو دز ورقة طلاقي فوراً بدون أي اعتراض هنا عرفت آني أنتهيت عنده مثل ما هو أنتهى عندي وما سأل لا علية ولا على الطفلة اللي ولدتها.
وبيوم ولادة بنتي صبحنا على مصيبتين الأولى أنتهينا و أفلسنا ماديًا لسوء إدارة آدم.. والمصيبة الثانية هي...