رواية قلبان علي حافتي الحلم الفصل الرابع 4 بقلم شذى عبد المكرم
فتحت قسم كوزمتك في الصيدلية وبقيت اعمل جلسات ليزر بسبب الخبرات الاخدتو من ألمانيا وانشغلت مع الاعلان ونسيت انو الاحد عندي موعد مع عمران المفروض نفطر في بوش بونت وجا الاحد وانا ناسية الموضوع من اصلو وكنت بعمل لبت في جلسة ليرز جاتني اسراء بتلفونها
اسراء: عمران في الخط . استغربت كيف في تلفونها بس سريع ادركت انو المرة الفاتت اتصلنا ليهو بتلفونها واصلا ما حصل اتصلت ليهو بتلفوني وما عندو رقمي
شاهيناز: اديني . قربت مني اشرت ليها تختو لي في كتفي عشان شغالة بأيدي
شاهيناز: الووو
عمران: اهلين شاهيناز
شاهيناز: كيفك ان شاءلله تمام
عمران: تمام الحمدلله وانتي
شاهيناز: بخير الحمدلله
عمران: انا برا . استغربت
شاهيناز: برا الصيدلية؟
عمران: ايي شكلك نسيتي
شاهيناز: نسيت شنو
عمران: الليلة الاحد . يداب جمعت انو موعدنا الليلة غمضت عيوني شديد
عمران: نسيتي؟
شاهيناز: والله معليش ياااخ
عمران: لالا عادي شكلك مشغولة
شاهيناز: والله بعمل في جلسة ليرز لزبونة حاليا
عمران: خلاص تمام نمش يوم تاني بس
شاهيناز: لالا دقيقة
عمران: اها
شاهيناز: بتقدر بنتظرني تلت ساعة؟
عمران: ما تستعجلي انتي مشغولة وانا المفروض كان ازكرك بس ما عندي رقمك
شاهيناز: والله كنت مشغولة مع فرع الكوزمتك دا وطار لي من رأسي بس انتظرني قربت والله ولو مستعجل ما مشكلة
عمران: لا بس ما عاوز اشتتك وتتسرعي في الشغل
شاهيناز: لالا تلت ساعة بس ممكن؟
عمران: تمام . اشرت لاسراء تشيل تلفونها
اسراء: طالعة؟
شاهيناز: ايي المفروض نفطر برا بس نسيت وهو حاليا برا
اسراء: تمام . واصلت الجلسة وخلصت للبت
شاهيناز: استعملي واقي شمس ورطبي كويس وتعالي بعد اسبوع
البت: تمام شكراً . مشيت غسلت وصلحت الميكب مع انو ظابط لانو الدنيا لسع صباح وشيلت شنطتي
شاهيناز: اسراء انا طالعة لو حصلت اي حاجة اديني تلفون ساعة ونص برجع وفي بت حتجي خليها تنتظرني
اسراء: تمام . وطلعت لقيتو واقف برا ركبت
شاهيناز: معليش خليتك تنتظر
عمران: لالا عادي نتحرك؟
شاهيناز: تمام
عمران: قبيل قولتي بتعملي في جلسة ليرز؟
شاهيناز: ايي فتحت فرع جديد بتاع كوزمتك
عمران: ما شاء الله
شاهيناز: تمشي على خير دي من خبرات المانيا طبعا
عمران: والله كويس
شاهيناز: كنت عاوز تضيع علي عزومة مهمة ذي دي؟ . قام ضحك
عمران: انتي الكنتي مشغولة
شاهيناز: كان تذكرني بدري
عمران: i haven't your number
شاهيناز: لو مهتم كان جيبتو ذي ما انا جيبت رقمك . قام ضحك ومدا لي تلفونو فاتح
عمران: سجليهو لي . شيلت التلفون وسجلتو ليهو وبقيت ماسكاهو معاي
شاهيناز: عمران بسألك
عمران: اسألي
شاهيناز: شايفاك جيت بيتنا تلاتة مرات من انا رجعت بس ما جيبت لي معاك حاجة حلوة ذي زمان . التفت لي وابتسم لي ابتسامة حلوة شديد
عمران: ما نسيتي يعني؟
شاهيناز: في حاجات ما بتتنسي
عمران: افتحي الدرج القدامك دا . استغربت وفتحتو لقيت فيهو تلاتة شوكولات على عدد الايام الزارنا فيها كذبت عقلي وقلبي والتفت ليهو سريع لقيتو مبتسم قلعت عيوني بصدمة
شاهيناز: احلف؟ . قام ضحك
عمران: كل مرة بكون ماشي بشيل معاي حاجة حلوة وانتي ما كنتي بتسأليني فبختها هنا عسى ولعل تطلبيها يوم لو اتذكرتي . شيلتهم بفرحة انو عمران ما نسى ولسع متذكر تفاصيلنا دي
شاهيناز: والله كل مرة بعاين ليك بقول عمران نسى لانو ما كان بينا تواصل غير الحاجة الحلوة دي بس بشيلها وبمشي بس المرات التلاتة الجيت فيهم ما كنت بتعاين لي حتى بحسك صنم بس . قام ضحك فضحكت انا ذاتي ودخلت الشوكولات في شنطتي
شاهيناز: متذكر لمن امي كانت بتشاكلني انو بمد ليك يدي عشان اخد حاجاتي وبعد انت تمشي بتجي تجضمني . هو بضحك بس
شاهيناز: بس كنت بكون فرحانة بالشوكولا ولمن كبرت برضو كنت لسع بشيلا منك ما عارفة ليه بس انت عودتني بالعادة دي
عمران: والله ما اتوقعت بعد ترجعي حتتذكري
شاهيناز: والله سبحان الله لمن كنت هناك كل ما امشي سوبر ماركت وامشي قسم الشوكولات بتذكرك وبضحك وبشيل وبمشي . ووصلنا الموقع ونزلنا وهو طلب لينا وبقينا نفطر ومبسوطة شديد وبالاخص لمن عمران طلع منتظر طفولتنا والعادة البتربطنا ببعض واثناء الاكل
عمران: شاهيناز ممكن اطلب منك طلب
شاهيناز: طوالي اتفضل
عمران: انتي عارفة انو علا عرسها خلاص
شاهيناز: اي والله صح ربنا يتم ليها على خير
عمران: اللهم آمين وعقبالك
شاهيناز: آمين يا رب
عمران: عاوزك تمشي مع امي السوق وذي ما عارفة عرفات شغالة جامعة فيعني لو في يوم فاضية بس ممكن تمشي معاها
شاهيناز: والله لو ما فاضية بفضى موش عرس علا دي اقل حاجة ممكن اقدمها ليها
عمران: تسلمي شديد
شاهيناز: ماف بينا شكر علا اختي يلا بس كلم عمتو تحدد اليوم عشان اكنسل اليوم داك
عمران: ممكن تمشو في يوم اجازتك بس
شاهيناز: هي اصلا الصيدلية تابعة لي يعني لو يوم واحد ما مشيت ماف زول بخصم من مرتبي . قام ضحك
عمران: تسلمي
شاهيناز: العفو . واكلنا وخلصنا في جو حلو شديد وهو رجعني الصيدلية ورجع المكتب لقيت البت منتظراني عملت ليها الجلسة بتاعت الشعر ورجعت البيت لقيت امي
شاهيناز: ماما عمران قال امشي السوق مع عمتو احلام دايرة تجهز لعرس علا تمشي معانا؟
امي: والله ما عندي موضوع بمشي
شاهيناز: خلاص تمام عمتو تحدد اليوم ونمش والله يحليلا علا خلاص حتمشي بيتها
امي: اي والله وعقبالك انتي واختك
شاهيناز: اللهم آمين يارب . ودخلت غيرت ملابسي وبقيت افكر هل عمران حيفكر فيني في يوم مم الايام
بالليل اتصل لي عمران وقال عمتو حددت بعد بكرة وقفل على كدا وكلمت امي وجا اليوم كنسلت اليوم قولت لاسراء تشتغل براها ولغيت الجلسات لليوم التاني ومشينا مع امي بيت عمي محمود بعربيتي وسوقنا عمتو احلام ومشينا السوق ولفينا كدا وعزمتهم فطور في مطعم مع انو عمتو رفضت بس اصريت عليها ومشينا واتناقشنا شوية وتاني واصلنا تسوق وشيلنا كمية حاجات ولسع كان في حاجات قولنا يوم تاني فرجعنا بيتهم لقينا عرفات رجعت وعملت لينا القهوة وقعدنا نشرب
شاهيناز: اها حاجات الحبسة كيف وكيف يا علا
علا: والله ياهو شغالة فيهو بس روتين الشعر بس باقي لي
شاهيناز: دا هين رأيك شنو في براند........؟
علا: رهيبة سامعة بيها بس غالية شديد
شاهيناز: خليها علي بطلبها ليكي واعتبريها هدية مني
علا: لالا
شاهيناز: شنو اللالا انتي هبلة يا بت قولنا انا بجيبا وخلاص والله رهيبة عندي منها المجموعة بالاخص الترطيب ما بتحتاجي انو تفردي او تكوي
علا: شايفة والله متابعة صحفاتهم في التيكتوك بس منتجاتهم غالية شديد وماف هنا الا توصيل من برا السودان
شاهيناز: انا قولت ليكي خليها علي . قامت جات حضنتني شديد
علا: شكرا بالجد
شاهيناز: العفو حبيبتي وعندي مجموعة cantu جيبتو معاي من المانيا اصلية حأجيبو ليكي تبدي بيها لمن اطلب ليكي ديك وتصل لانو حيآخد زمن والله cantu برضو رهيبة
علا: لالا ما حأشيلو منك كفاية ديك بس
شاهيناز: انتي هبلة يا بت انتي عروس وماف زمن
علا: دي حاجاتك ومحتاجة ليها وكفاية ديك براها غالية
شاهيناز: شكلو شايفاني غريبة منك
علا: معقولة انتي اختي
شاهيناز: بس خلاص هسي لو عرفات جابتهم ليكي ما حتشيلي؟
عرفات: هو انا فطرت؟ والله لو كان قال اجيبهم ليها المجموعتين ديل الا ابيع كليتي . ضحكتنا كلنا
شاهيناز: خلاص لمن تكوني عروس يا عرفات حأجيبهم ليكي
عرفات: خلاص من هسي انتي وزيرتي . تاني ضحكنا ياااخ عرفات عسل سكر بس وبقينا نتونس واصلا امي كانت مع عمتو بنتاقشو في بعض المواضيع ونحنا البنات مع بعض لمن رجعنا مع امي البيت ...........
_____________
كنت منتظر يوم الاحد بفارق الصبر عشان موعدي مع شاهيناز وجا الاحد ومشيت ليها الصيدلية رغم الشغل المتراكم علي وما كان معاي رقمها اتصلت في تلفون زميلتها وادتني ليها واتكلمت معاها طلعت ناسية فحسيت نفسي ما مهم لانو ما كنت في بالها بس اصرت نمش ومشينا بس في الطريق سألتني من حركة الحاجة الحلوة الكنا متعودين عليها وزمان وطلعت متذكرة ومنتظرة مني اديها حاجاتها في اللحظة ديك حبيتها اكتر وكلمتها طوالي اني ما نسيت وكانت مبسوطة وانا اكتر منها وطلبت منها انو تمشي السوق مع امي لانو امي براها وعرفات مشغولة مع الجامعة وعارف امي ما بتتفق مع اخواتها كتير لانو بتاعين تنظيرات فما حبيت تمشي براها السوق وشاهيناز واقفت ورجعت البيت ويداب افتح ليها الموضوع
__ امي طلبت من شاهيناز تمشي معاكي السوق
_ شنو
__ كلمت شاهيناز حتمشي معاكي السوق لانو مع اخواتك ما حتكوني مرتاحة وانا عارف فهي حتمشي معاكي
_ بس شاهيناز ما بتعرف وما ظنيت يوم دخلت السوق
__ كيف يعني
_ حاجاتهم كلها بتجيهم في محلهم
__ ما تشوفيها كدا شاهيناز متواضعة شديد
_ عارفة وحتى لمن نمشي ليهم بتعاملنا حلو بس قصدي يعني اكيد ما متعودة على جوطة الاسواق الهنا دي . فكرت مسافة شاهيناز من الاسر المرتاحة وامي كلامها صح وانا نسيت النقطة دي
__ والله ما عارف كلمتها وهي وافقت
_ خلاص تمام يا ولدي
__ والله احتمال قاعدة تدخل السوق
_ والله احتمال خلاص قول ليها بعد بكرة
__ تمام . واتصلت لشاهيناز كلمتها وقفلنا على كدا
جا يوم السوق ولغت يومها ومشت مع امي ومعاها امها ولمن رجعت البيت لقيت ناس امي قالو هسي بس طلعو قدامي
__ اها يا امي السوق كيف
_ لالا الحمدلله وكويس انو سوقت معانا شاهيناز وثريا ما قصرو والله مشينا لدكانين معينة وزبائنهم واخدت اجود الحاجات وما قصرو معاي في الاسعار لاني من طرفهم
__ الحمدلله يعني انجزتو؟
_لالا الحمدلله انجزنا اغلب الحاجات والحمدلله كان معانا العربية بتاعت شاهيناز ساعدنا شديد باقي لي شوية حاجات ثريا قالت حتمشي معاي تاني
__ والقروش كفت؟
_ الحمدلله وشاهيناز ما قصرت مع اختك حتجيب ليها حاجات الشعر
__ ليه طلبت منها
_ لالا والله قالت بتناقش معاها وهي قالت تعتبرو هدية منها . سكتا ومشيت سألت علا وقالت لي والمجموعة غالية شديد حسب كلام علا بس ما عارفة كم لانو براند عالمي اتصلت لشاهيناز بعد سلمت عليها
__ المجموعة الطلبتيها لعلا بكم
_ كيف يعني
__ حقت الشعر
_ عمران
__ نعم
_ انت ما تتدخل بيناتنا فاهم
__ لالا ما بخليكي تتحملي سعر ذي دا
_ عشان ما اختلف معاك اطلع منها
__ شاهيناز
_ والله العظيم يا عمران لو اتدخلت بيني وبين علا بقطع علاقتي بيك وبنسى انك ود عمي . هنا سكتا
_ ياااخ علا دي اختي يعني شنو لو اشتريت ليها حاجة داير تعمل لي فيها موضوع
__ ما داير اعمل موضوع
_ خلاص خليك بعيد والله يا عمران لو اتدخلت تاني بجي بحضر العرس كأني ضيفة بس . سكتا لانها كانت زعلانة شديد
__ خلاص ما تزعلي
_ ما ازعل كيف وانت بتحاسبني كدا وعلا اختي ذي ما هي اختك
__ خلاص بعتذر
_ اي كدا . واتكلمنا شوية وقفلنا بقيت افكر فيها هي بريئة شديد بس اسلوب حياتها ما نفس اسلوب حياتي ولا حتى قريب ليها وما بقدر بعدين اوفر ليها البراندات العالمية البستعملها دي اتنهدت بيأس ........
يتبع...........