رواية قلبان علي حافتي الحلم الفصل الخامس 5 بقلم شذى عبد المكرم
كل ما تمر الايام علاقتي بعمران كانت بتقوى كنا بنتواصل واتس ومكالمات عادية وعلاقتنا حلوة شديد وكنت بستشيرو في بعض الأحيان عشان اشاركو في حياتي ودا كلو خلال فترة قصيرة وكنت مبسوطة بالتطور دا لحدي يوم الجمعة كنا بتكلم واتس
__ بكرة برنامجك كيف
_ اممممم والله طالعين انا وصوفيا البحر من جيت ما مشيت وعندي صحباتي اتنين من الجامعة اتفقنا حنتلاقى هناك
__ ايوااا حلو
_ وانت
__ بكرة ما عاوز اطلع من البيت داير ارتاح لانو ذي ما عارفة اليومين الفات ديل كنت مشغول مع تجهيز البيت لعرس علا وفي نفس الوقت جري الشغل
_ اي والله احسن ارتاح
__ تمام . اتونسنا شوية وقفلنا
اليوم التاني الضهر اتجهزنا مع صوفيا ولبست بنطلون جينز وقميص قصير فوق من الركبة وفكيت الشعر بس خاتة الطرحة في كتفي ولبست نضارة شمسية وصوفيا نفس الشي بس قميصها مع الركبة طبعا انا ما محجبة ومع العيشة سنتين في المانيا اتغيرت شوية في استايلي وطلعنا ومشينا البحر ولقينا صحباتي ريم وهزار والجو كان حلو شديد
هزار: اللوك حلو يا شيذو . رسلت ليها بوسة في الهوا
شاهيناز: حلوات عيونك . نزلت رسالة في تلفوني فتحتو كان من عمران بقيت ابتسم ساي واتفصل وبدردش معاهو قامت ريم من كرسيها وخطفت التلفون
ريم: دا منو الخاطف قلبك دا . اتخلعت وصرخت
شاهيناز: جيبي التلفون يا سجم . قامت جارية وانا جريت وراها وهي بتضحك وبقينا نجارى في الرمل بس وقفني صوت جهور بقول شاهيناااااز قلبي طار من محلو التفت لقيتو عمران.........
____________
تواصلي مع شاهيناز زاد وكنت مبسوط انو بقت تشاركني في تفاصيلها وعرس علا كان باقي ليهو أسبوعين كنت بحاول اجهز ليها بأفضل طريقة وكنت بتكلم مع شاهيناز وقالت برنامجها السبت انها ماشة البحر مع صحباتها
يوم السبت اتصل لي صحبي وقال عازمني قهوة في البحر حاولت ارفض بس اصر علي واتذكرت انو شاهيناز حتكون هناك فوافقت وقال هو حيجي يسوقني من البيت وبالفعل جاني ومشينا والمكان كان مليان بس لقينا مكان وبقينا نشرب في القهوة وانا بتكلم واتس مع شاهيناز وكنت منتظر ترد لي في رسالة بس اتأخرت
خالد: عاين البابور داك
عمران: خالد يا زول هوووي
خالد: انت عاين بس عليك الله . التفت وراي
عمران: قاصد منو
خالد: الجارية ديك ولابسة جينز . لمن ركزت بقيت احاول اكذب عيوني انو ديك ما شاهيناز بس طلعت هي ما قدرت ارد على خالد لانو كانت لابسة ملابس شاذة شديد وكمان بتتجارى قومت معصب وانا ما شايف قدامي
خالد: ماشي وين
عمران: خليك في مكانك . ما اتحرك وانا مشيت ليها وصرخت بأسمها لمن هي اتخلعت وصحبتها اتخلعت معاها ووقفو بعاينو لي
عمران: دا شنو الزفت اللابساهو دا . كانت ساكتة........
___________
عمران صرخ فيني
عمران: دا شنو الزفت اللابساهو دا . بقيت مصدومة اول مرة عمران يصرخ فيني كدا وصحبتي مصدومة اكتر مني صرخ فيني تاني وجات صوفيا جارية لينا ومعاها هزار
عمران: بتكلم معاكي . كنت ساكتة ودموعي كانت قريبة لانو بصرخ فيني قدام صحباتي خجلت شديد والموقف كان بيش
عمران: ختي الزفت دا في رأسك . براحة رفعت الطرحة في رأسي
صوفيا: ريم وهزار خلينا نرجع . ساقتهم ومشت يداب كدا ممكن اتفاهم معاهو لانو قبيل ما حبيت اكسر كلمتو قدام صحباتي واديتو مكانتو بس دا ما بخليهو يهيني قدامهم وقدام الخلق دا كلهم
شاهيناز: ما عندك دخل في ملابسي
عمران: هسي اللابسة دي معتبرة ملابس؟ وكمان بتتجاري بالشكل دا وجسمك كلو برا . دموع نزلت حسيت كلامو فيهو اهانة لي
شاهيناز: ما دخلك وما بسمح ليك تهيني كدا
عمران: شاهيناز بكسر رأسك احسن تتكلم عديل عشان ما حيحصل خير
شاهيناز: ما بتكلم عديل . صرخ فيني
عمران: شاهينااااز
شاهيناز: ما تصرخ فيني فاهم انا برضو بعرف اصرخ وما دخلك بي . ومن الزعل شيلت الطرحة من رأسي ومسكتها في ايدي واتكلمت بزعل وانا ما قاصدة لانو كان بصرخ فيني بس لو كان اتكلم معاي براحة كان اتفاهمنا
شاهيناز: ما عشان خلاص بقينا نتكلم وبشاركك تفاصيلي دا بديك حق تتحكم فيني ما تنسى نفسك فاهم . عاين لي مسافة
عمران: معليش وكويس ذكرتيني انا منو عشان ما انسى نفسي . ومشى خلاني واقفة بقيت ابكي في محلي ورجعت ليهم وطرحتي في ايدي وقعدت في الكرسي وانا ببكي
صوفيا: شاهيناز ما تبكي خلاص
ريم: دا حبيبك؟
صوفيا: لالا ود عمنا
ريم: شكلو صعب شديد . سكتنا وانا خلاص كرهت الطلعة
شاهيناز: راجعة البيت انا . وقومت خليتهم بدون ما استنى ردهم وصوفيا تبعتني وركبنا العربية وكنت زهجانة شديد رجعنا ودخلت غرفتي طوالي وصوفيا مشت معاي غرفتي وقعدنا في السرير
صوفيا: اتناقشتو في شنو . قومت حكيت ليها الحديث الدار بينا
صوفيا: هو صح ما كان يصرخ فيكي بالطريقة دي بس انتي كمان كلامك كان قاسي شوية
شاهيناز: ما كنت عاوزة اقول ليهو كدا بس زعلني لو كان اتكلم معاي بالهداوة كان حلينا الموضوع
صوفيا: هسي البحصل شنو
شاهيناز: ما عارفة والله هو ذاتو اسلوبو ما كان حلو معاي بس شغال دا شنو الزفت وارفعي الزفت
صوفيا: في النهاية ود عمك وانتي عرضو وشكلو دمو حار عشان كدا ومن غيرتو اتصرف كدا لانو بالجد منظركم وانتو بتتجارو كدا كان شاذ شوية
شاهيناز: هسي اعمل شنو
صوفيا: والله اهدي شوية واضربي ليهو بعدين اتفاهمو واعتذري وخليهو يعتذر ليكي
شاهيناز: ما بعتذر انا ما غلطت هو يعتذر
صوفيا: خلاص اتكلمي وريهو وجهة نظرك هو حيعتذر
شاهيناز: ولو ما اعتذر . قامت ضحكت وضربتني في ضهري
صوفيا: حريقة فيكم الاتنين . وقامت مشت قومت ضحكت ورقدت في سريري وانا بتذكر الاحداث الحصلت وقومت فوق مشيت اتجاه الدولاب عندي مرايا طويلة على طول باب الدولاب وقفت اعاين في اللوك حقي هو صح القميص كان قصير انتهدت بتعب وقولت " ياااخ انا حرة في حياتي " وفتحت الدولاب شيلت بجامة ومشيت غيرت وجيت نومت
بالليل ما قدرت اقعد من التفكير في الشرخ الحصل بينا دا قومت شيلت تلفوني و مشيت لصوفيا في غرفتها لقيتها بتقرأ قعدت في سريرها
_ صوفي ما اتصل لي
__ ما حيتصل ليكي نهائي ما بتعرفي عمران ولا شنو
_ اتصل انا؟
__ اتصلي . اتنهدت واتصلت ما رد لي
_ ما رد
__ حاولي تاني . رجعت اتصلت تاني برضو ما رد حاولت المرة التالتة لقيت التلفون مغلق زعلت شديد
_ قفل تلفونو . ودموعي نزلت
__ معناهو زعلان شديد
_ اممممممم . تاني حاولت لقيتو قافل طوالي رقدت في سرير صوفيا وغمضت عيوني ونومت وانا زعلانة شديد ..........
_____________
__مشيت لشاهيناز وانا كلي غضب واتكلمت معاها بنبرة حادة لاني ما شايف قدامي وكلام صحبي بتردد في اذني "عاين البابور دا" جوطت فيها وحصل نقاش بينا وفي اخر الكلام قالت لي كلام هز كياني وكسرني وفسرت كلامها انو ما عشان شاركتني تفاصيلها خلاص انسى نفسي انا منو يعني انا ما من مستواها واصلا من زمان متحسس من النقطة دي وجات ذكرتني مشيت خليتها وصحبي جاني جاري
خالد: ماشي وين يا مان وبتعرف البت ديك من وين . ما رديت ليهو ومشيت واصلا هو الساقتني فرجعت بالموصولات وانا معصب شديد قابلتني امي
امي: مالك يا ود عامل كدا؟
عمران: ماف حاجة زهجان شوية
امي: ربنا يعينك . هزيت رأسي وخليتها ومشيت غرفتي وقعدت بزهج يعني خلاص رجعنا لنقطة الصفر او دون الصفر بعد الكلام القالتو لي دا والبيننا كلو اتهدم في ثواني ولا اصلا انا براي الكنت ببني وهي ما عندها لي حاجة
بالليل اتصلت علي شاهيناز وكنت زعلان منها ما عاوز ارد ليها اتصلت مرتين طوالي طيرت التلفون ونومت
عدا تلاتة يوم وانا بتجاهل مكالماتها ما قاعد ارد ليها لا مكالمات ولا واتس وزعلان من نفسي انو ما قاعد ارد ليها وفي نفس الزمن زعلان منها
___________
في بيت ناس عمران
جات عرفات من الجامعة وقعدت مع امها
__ امي العمادة نزلت لينا انذار انو اخر زمن للدفع اسبوع بس
_ والبحصل شنو ابوكي شغلو واقف وعمران بس الماسكنا وشايفة الدفعو لعرس اختك وياهو صلح البيت
__ لا هسي اعمل شنو انا
_ والله يا بتي جمدي السنة دي ماف طريقة والله . قامت تبكي
__ اجمد السنة كيف يا امي ودا نص السنة
_ ويدفعو ليكي من وين ورسومك لا ألف ولا ألفين وعرس اختك اتحدد يعني ما بتأجل بس انتي ممكن تأجلي . قامت تبكي
__ امي ودا مستقبلي لكن
_ والبحصل شنو يا بتي والله ما في يدي حاجة اعملا لو كان في يدي بعمل
__ حيا امي
__ كفاية عصرنا على اخوكي شديد اليومين ديل ولسع عرس اختك باقي ليهو أسبوعين ومحتاجين قروش عشان نمشي العرس عشان نسابة اختك ما يشيلو حالها . بقت تبكي ماف حل غير انو تجمد
__ يعني اجمد؟ . امها عاينت ليها بكسرة حال
_ شايفة في حل تاني؟ . جا داخل عمران
عمران: مالكم عرفات بتبكي مالك
عرفات: مافي حاجة . هو شكا انو في حاجة
عمران: الحاصل شنو احكي لي
عرفات: كنت بتكلم مع امي بقول ليها دايرة اجمد السنة دي . عاين ليها نظرة قوية شديد
عمران: ما شاء الله وقررتي من عندك؟
عرفات: عمران . صرخ فيها
عمران: البخليكي تفكري كدا شنو . بقت تتمتم وبتقطع في الكلام
عرفات: العمادة نزلت لينا اعلان التسجيل تبع السمستر الجديد
عمران: اها للان ما فاهم سبب قرار التجميد شنو
عرفات: يعني قولت عشان . وسكتت
عمران: واصلي سامع
عرفات: عرس علا قرب ويعني انت صارف كتير ولسع حتصرف فما عاوزة ازيدها ليك
عمران: جيت شكيت ليكي؟
عرفات: لالا
عمران: يبقى ما تتصرفي على كيفك وامي انتي كيف تدعميها في قرار ذي دا
امي: وتجيب ليها قروش الرسوم من وين
عمران: امي قروش رسوم عرفات انا حاسب ليهو حساب وعارف انو زمنو قرب وتاني حاجة عرفات في كلية ما بتستحمل اي تجميد يعني مفروض في أحلام العصر ما تحلم بيهو وانتي يا هبلة انا منتظر متين تتخرجي عشاني تشيلينا كلنا ولا حابة تغنجي بقروشك يا دكتورة . قامت ضحكت ودموعها نازلة
عرفات: والله حأشيلكم كلكم ان شاءلله
عمران: انا واثق وما تخافي وما تشيلي هم بكرة اسحبي الاستمارة وجيبيها لي وشايفك الاسبوع دا ما جيتي شيلتي مصاريفك يلا حنك انو توفري وكدا ما بتمشي معاي وحاجاتك الشخصية تجي تطلبيها مني . جات حضنت اخوها
عرفات: شكرا عمران
عمران: زحي يا شينة توسخي لي قميصك بدموعك دي . زحت منو ومسحت دموعها وهي بتضحك
عرفات: انت لاقي؟ . قام ضحك
عمران: لاقي لاقي واسمعيني؟
عرفات: هاااا
عمران: عندي صحبي عندو تاب استمال خفيف وداير يفكو وانا كلمتو انو حأشتريهو منو بس قال لي داير اسبوع كدا عشان يجيب واحد تاني وينقل بيناتو فيهو وحأجيبو ليكي لانو مع الطب دا محتاجة ليكي تاب . نطت بفرحة
عرفات: احلف؟
امي: يا ولدي دا ما زمن التاب هسي
عمران: والله المفروض من دخلت الجامعة اجيبو ليها بس ما اتوفقت فيهو
امي: بس كدا كتير عليك يا ولدي
عمران: ما كتير ما تشيلي هم وانتي امشي غيري وارتاحي وبكرة الاستمارة تكون عندي فاهمة؟
عرفات: فاهمة وربنا يفتحها عليك وتنبسط اليوم قبل بكرة ذي ما نبسطتني . انبسط بالدعوة شديد
عمران: امين يا رب . وجرت دخلت جوة.......
___________
والله رغم انو طمنت عرفات انو عندي رسوم جامعتها بس انا ما كنت حاسب حاسبو نهائي بس ما بقدر اخليها تجمد هي بتقرأ طب ولو جمدت سنة احتمال تنسى القرتو بنسبة خمسين في المية واحتمال نفسيتها تتأثر انو اتأخرت سنة بس دعت لي دعوة نستني هم رسومها بالمرة وكان في حسابي قروش كنت مفكر انو اركب بيهو الكهربة لبيتي الخاص واصلا ما بلحق لرسومها بس بغطي 80٪ من الرسوم وخاتي قروش لعرس علا للضمان عشان ما تنقص ليهم حاجة ما عاوز اهبشو وفجأة وانا ماشي ضرب لي صحبي في الشغل انو حصلت لي ترقية بقيت مدير القسم الانا شغال فيهو يعني ارتفعت درجة وحدة وطلع لي حافظ طوالي اتذكرت عرفات ودعوتها لي وربنا استجاب ليها لانو من قلبها طوالي أقرب بقالة شيلت ليها شوكولات ورجعت البيت خليت المشوار الكنت ماشي ليهو ورجعت البيت وناديتها جاتني
عمران: هاكي يا السمحة بسبب دعوتك جاني خبر انو جاتني ترقية في الشغل فتستاهلي . بقت تنطط من الفرحة وحضنتني
عرفات: وااااو اللهم بارك الف الف مبروك والله تستاهل حبيبي . ضحكت على هبالتها
عمران: الله يبارك فيكي .
عرفات: ااامي اجري . امي جات سريع
امي: في شنو
عرفات: عمران جاتو ترقية في الشغل . امي قامت تبكي من الفرحة دايما بتبكي مشيت حضنتها
عمران: ما تبكي يا ست الكل
امي: ربنا ما بنسى عبادو وانت بتستاهل . وكانو فرحانين شديد .........
كلمات لطيفة في وقت عشوائي ، ابتسامة في طريق مُزدحم، دعوة في ظهر الغيب، كلها اشياء لا تكلف شيئاً ، لكنها تخلق سعادة عظيمة في القلب ..🤍🤍
يتبع..........