رواية اللون السابع للحب الفصل التاسع عشر 19 والعشرون 20 بقلم شذى عبد المكرم
19
محمد: عفراء دي منو يا عمار . وهنا حصلت لحظة صمت عمار عاين لي بنظرة كدا ما قدرت افسرها هل نظرة زعل ولا خيبة امل ندمت انو قولت كدا كسرت عيني منو رجع عاين لابوهو
عمار: عفراء دي البت الكلمتك عنها صاحبة العربية
محمد: ايواااا واها وصلتو لشنو
عمار: تمينا الموضوع كلو والليلة خلاص استلمتو ووثقنا الاوراق
محمد: وهسي العربية وين
عمار: في الصيانة في حاجات داير اعدلها
محمد: ايوااا كويس ولازم تعمل ليها كرامة
عمار: ايي الجمعة بضبح وبكلم الاسرة كلها
محمد: تمام خير ما فعلت وتتهنى بيها يا رب
عمار: ان شاءلله يا رب تسلم يا حاج . وسكتو وانا رأسي اتشوش كيف يعني ما فاهمة حاجة انا
محمد: اها يا بتي موضوعك شنو
همس: لا ماف حاجه بس ياهو انو دايرة امشي لعمو صابر
محمد: خلاص خليهو بعد كرامة عربية عمار
همس: تمام . وقومت طالعة بس وقفت برا منتظرة عمار يطلع اتأخر عشرة دقايق كدا شكلو بتناقش مع ابوهو وانا هنا متوترة لمن طلعت
__ عمار . عاين لي قوي كدا
_ شكرا يا همس
__ عمار ما قصدي اعمل كدا بس انت ما كنت واضح معاي
_ لا قولتي اختو قدام ابوهو عشان يتكلم صح؟
__ عمار معليش والله
_ شافع انا؟
__ لالا
_ يبقى اختفي من قدامي عشان ما حيحصل خير . هزيت ليهو رأسي بمعنى لالا
__ كيف يعني عفراء طلعت البت الاشتريت منها عربية وليه انا ما عارفة
_ لانو رسمتي سيناريو من رأسك ولصقتيها فيني وانا تميت ليكي الناقص اما بخصوص انو ما وريتك كنت داير اعمل ليكي مفاجأة بس ما بتستاهلي
__ عمار ما تقول كدا
_ همس طيري من وشي ولسانك ما يخاطب لساني لمن نحل موضوع الزواج الزفت من اولو دا
__ كيف يعني ما اتكلم معاك؟
_ على ما افترض كلامي واضح
__ عمار . صرخ فيني
_ بلا عمار بلا زفت زحي من وشي . ومشى خلاني رجعت ابكي بالعادة البتعملو بأيدك بغلب اجاويدك
وسام: انتي يا بت ما بتفتري من البكي
صفا: والله كلام عجيب
وسام: حصل شنو
همس: ماف حاجه
وسام: دايما دي اجابتك مشيتي نخستي عمار صح؟ . هزيت رأسي بمعنى ايي قامو ضحكو
صفا: متوقعة اصلا
وسام: هو حيدخل الجنة بسببك
همس: انا الحأدخل بسببو
وسام: زمان زمن كنتو اب وبتو حياتكم كانت حلوة شديد ما برضى انو زول يزعلك ولا بتبكي كتير كدا
همس: عشان كدا بقول ليكي زواجنا فاشل
صفا: انتي لو بتعرفي عمار دا بحبك قدر شنو ما كنتي بتنكدي عليهو كدا
همس: بحبني ذي بتو بس
صفا: لا والله عمار بحبك عديل كدا واكتر من روحو . سرحت مسافة عمار بحبني عديل كدا بس كمان عندو زولة في حياتو
همس: منو قال ليكي كدا
صفا: يا زولة ما هي واضحة بس انتي العميانة . بقيت افكر في كلامها ورأسي يودي ويجيب لازم اتأكد عشان اكون مطمنة اخر الليل بقيت اتقلب ما قدرت انوم انسحبت براحة مشيت بيت ناس عمار ما كان في زول برا والكل نايم فتحت غرفة عمار لقيتو نايم عاينت ليهو مسافة بعداك قربت منو وبقيت اناديهو بهمس كدا
__ عمار عمار . وبقيت اهز فيهو براحة صحى بتعب عاين لي مسافة بعدها قام مخلوع
_ همس!!! بتعملي هنا شنو والساعة كم مالك عيانة ولا موجوعة؟ . كان بتكلم بلهفة وانا بعاين بس
_ اتكلمي ما تخوفيني عليكي فيكي حاجه؟
__ لالا
_ وجاية بالليل كدا في شنو
__ دايرة اتكلم معاك . عاين لي بصدمة ومسك تلفونو عاين للزمن
_ بتهظري صح؟
__ لالا جادة
_ في شنو
__ عفراء . هنا عصب شديد
_ والله يا همس تاني تفتحي لي السيرة الزفت دا بضربك والله بضربك . مسكتو من ايدو
__ عمار بس اسمعني وريحني وريح قلبي معاك
_ ما بسمعك واطلعي من هنا
__ عمار عليك الله . وقربت ابكي قام سكت وطبعا ماف ضوء كتير في الغرفة قام من السرير فتح النور ورجع قعد
_ سامع
__ عفراء دي البت الاشتريت منها العربية؟
_ ايي
__ وهي نفسها حبيبتك؟
_ لالا
__ خلاص دي منو الاخترتها عشان ارتاح
_ انتي
__ عمار ياااخ بتكلم جد . عاين لي من دون ريأكشن
__ وانا بتكلم جد
_ كيف يعني انا
__ يعني البت البحبها واخترتها انو اكفي حياتي معاها انتي . سكتا بحاول استوعب طوالي غطيت وشي وبقيت ابكي
_ هسي بتبكي معاك
__ ما تتكلم معاي ما عافيتو ليك نهائي
_ هسي انا عملت شنو يعني عشان اعترفت يلا ما تخافي لسع عند كلامي ما بجبرك تكفي معاي وقاعد افتش لي في شريكة حياة وياهو ظهرت عفراء اشوفها لو بتوافق بي
__ والله بقتلك وبقتلها
_ ليه
__ لانو انت حقي انا . سكت مسافة
_ المعنى؟
__ ما عارفة . قومت حضنتو وخلعتو
__ ارجع نوم . ودايرة اقوم مسكني
_ انتي خليتي فيها نوم دقيقه قاصدة شنو بكلامك دا
__ عمار فكني خليني ارجع هسي لو جا زول . قام ضحك
_ ما اتوقعتك متهورة كدا جاياني في غرفتي الساعة دي
__ يااااخ كلو بسببك
_ للدرجة دي انا بهمك والموضوع مهم كدا؟
__ عمار انت عارف انو ما بحب اشاركك مع زول عشان كدا ما قدرت اقعد والله . عاين لي بحب
_ ما تخافي ماف زول حيشاركني فيكي
__ ولا حتى عفراء الهبلة ديك؟ . قام ضحك
_ولا حتى عفراء الهبلة ديك اها لسع مصرة على الطلاق؟
__ لو اطلقنا عمو تاني بعقد لينا؟
_ لالا . قولت ليهو بزعل كدا
__ بس انا دايرة اجرب أحساس العقد . عاين لي بحب وبأبتسامة
_بس ممكن نجدد عقدنا . عاينت ليهو بفرحة
__ خلاص موافقة
_ اتخيلي بنعترف بحبنا الساعة 2 صباحا . قومت ضحكت
__ حلوة صح؟
_ شديد تعالي . سلم علي في رأسي
__ يلا انا برجع بعد دا نوم العوافي
_ خليكي شوية
__ لالا احتمال يجي زول
_ انتي مرتي
__ برضو حتكون فضيحة وانا ذاتي ما عارفة الخلاني اجيك الزمن دا شنو . قام ضحك
_ لقيت غيرتك كعبة
__ كلو بسببك من اهتمامك الكتير خليتني احس بالتملك دا
_ ولسع حأهتم اكتر
__ انت خاربني كدا معناهو حتخربني اكتر
_ بتي يا زولة بهتم بيها على كيفي . عاينت ليهو بحب
__ اممممم عمار يلا انا بمشي
_ ورح
__ وين
_ اقدمك
__ بتهظر صح
_ لالا
__ لالا تقدمني وين ياهو البيت
_ انتي مالك تعالي بس . مسكني من يدي وبقينا ماشيين وانا مبسوطة شديد وقفنا في حوشنا
_ على ما افترض انا اعترفت بالمعنى الصريح انو بحبك بس انتي لالا . قومت ضحكت
__ بتفرقك معاك اعترافي؟
_ شديد
__ ما ظنيت . وفكيت ايدي وجريت منو وقف بعاين لي بصدمة ضحكت ولوحت ليهو بأيدي ودخلت البيت وانا طايرة من الفرحة وبعد تعب حتى نومت.......
___________
من جانب فردوس
سفيان: عندها شنو يا دكتور
الدكتور: المدام حامل . اتفاجأنا كلنا
سفيان: بس يا دكتور المرا الحامل بتأكل كتير بس فردوس مابية الاكل نهائي
الدكتور: بتحصل عادي في الشهور الاولى من الحمل بس لازم تتغدا لانو حيكون خطر على الاتنين لانو كدا حتدخل في سكري الحمل لازم تأكلوها حتى لو ترجع
سفيان: تمام
الدكتور: بكتب ليها بعض الادوية يثبت ليها الحمل
سفيان: شكرا دكتور . وطلعنا كنت لسع متفاجئة اني حامل
امي: الف مبروك يا بتي
فردوس: الله يباركي فيكي
امي: بعد دا انتي ما براكي لازم تهتمي بروحك
فردوس: ان شاءلله
امي: الف مبروك يا ولدي يجي بالسلامه كدا
سفيان: ان شاءلله يا رب . عاين لي داير يتكلم بس ما قادر هز لي رأسو ابتسمت ليهو عرفت عندو كلام كتير بس امي واقفة طلعنا شال لي الادوية ومشينا بيتنا يعني البيت الكبير ونزلوني
سفيان: اها يجيبو ليكي شنو تأكلي
فردوس: ولا حاجه انتو ما بتفهمو علي والله ما نفسي في حاجه لمن احس اني دايرة حاجه بكلمكم هسي خلوني ادخل الغرفة . دخلوني غرفة البنات لقيتهم قاعدين سألوني قولت ليهم حامل كلهم صرخو وانبسطو لي وكبسوني
سفيان: بالراحة هي لسع تعبانة
همس: يعني حيكون عندنا نونو صغير كدا . ضحكت
فردوس: ايي
همس: ان شاءلله ما يكون سفيان صغير عشان حيكون مكشر فينا طول الوقت . ضحكنا كلنا
فردوس: حيكون كارثة صح؟
همس: مبالغة
سفيان: شكرا ليكم . ضحكنا
همس: خلي يطلع ذي امو حيكون فرفوش
سفيان: بس حيكون مصيبة متحركة
فردوس: سفيان انا مصيبة؟
سفيان: انا قولت انتي مصيبة؟
فردوس: كلامك بقول كدا
سفيان: همس سبب البلاوي دي كلها . كلهم ضحكو
همس: خلينا نخليها ترتاح . رقدت وكلهم طلعو فضل سفيان بس جا قعد نفسي طوالي قومت قام حضني شديد وسلم علي في رأسي
سفيان: الف مبروك
فردوس: الله يبارك فيك
سفيان: ربنا يقومك بالسلامة
فردوس: ان شاءلله يارب
سفيان: بس لازم تساعدينا كمان
فردوس: بحاول ان شاءلله . رقدت وختيت رأسي في رجولو
__ سفيان
_ همممم
__ حاسة انو ما حأكمل معاكم . اتخلع
_ ليه بتقولي كدا
__ ما عارفة والله
_ لالا حتكملي شعورك دا بسبب لخبتة في الهرمونات بسبب الحمل
__ اممممم هسي انا جواي في روح؟
_ ايي روح بتربطنا
__ حاسة انو بحبك اكتر حاليا . سلم علي في رأسي
_ انا اكتر والله . وسكتنا امي جات داخلة فجأة خجلت لاني راقدة في رجل سفيان طوالي قومت وادتني عصير
امي: اشربي . حاولت شربت نص
فردوس: خلاص
امي: لالا تمي
فردوس: كفاية ياااخ
سفيان: فردوس خلي الدلع يلا اشربي . وحمر لي خوفت وشربتو كلو ورقدت
سفيان: انا ماشي بس بجي بعدين
فردوس: تمام
عدا علي يومين وانا في البيت الكبير وللان ما بأكل وناس البيت تعبانين معاي مرات بجبروني برجعو ليهم عايشة على العصاير بس لمن في يوم سفيان جا داخل
سفيان: اكلت شنو
صفا: ولا حاجه حاولنا معاها بس رافضة
سفيان: خلوني معاها . كلها طلعو برا الغرفه جا قعد جنبي
__ انتي ليه مصرة تعذبي قلبي معاكي
_ والله ما بيدي يا سفيان
__ انا بسببك بقيت ما قادر اركز نهائي
_ ما تعمل كدا
__ انتي ما تعملي كدا هسي انا من الصباح ما دخلت حاجة في خشمي
_ ليه بس
__ انتي ما اكلتي انا يجيني نفس من وين
__ والله يا سفيان ما قادرة . وقومت ابكي
_ عشاني طيب
__ حأرجع
_ ما مشكله ما حيرجع كلو مشتهية شنو
__ولا حاجه
_ ليه ما عندك وحم ذي باقي الحوامل حملك غريب
__ روحي دي طلعت
_ قربنا خلاص . قومت ضحكت
__ قربنا وين يا سفيان دي يداب البداية
_ ننزلو؟ . اتخلعت
__ تنزل شنو؟
_ الجنين دا
__ انت جنيت
_ يجوز في حالة انو بأذي الام وهسي انتي دايرة تموتي بسببو كدا بتخليني اكره جناي اللسع ما جا دا
__ ما تقول كدا ياااخ
_ خلاص ساعدينا انتي
__ اممممم دايرة زبادي كابو وبطاطس شبيس . كأنو ما صدق انو طلبت حاجة
_ هسي بجيكي . وقام لهفة وطلعت اتنهدت بتعب لانو سفيان تعبان معاي لازم احاول عشانو
بعد نص ساعه كدا جاب لي الطلبتهم
همس: اجيبي ليكي حاجه تانية؟
فردوس: لالا
همس: سفيان انا برا لو احتجتو حاجة
سفيان: شكرا . هزت رأسها وطلعت جاب الصينية ختاها في السرير
سفيان: يلا . عاينت ليهو نظام ما دايرة هز لي رأسو بمعنى ماف طريقة دخلت ايدي وبدينا نأكل وكل مرة بدخل لي قطعة شبيس في خشمي
فردوس: ما خلاص؟
سفيان: لسع
فردوس: حأرجع
سفيان: ما مشكله . وملاني شديد لمن قولت كفى
سفيان: كدا خلاص يلا اشربي موية وابلعي الدوا . اداني ليهو بلعتو
سفيان: ارتاحي بعد دا ولو حسيتي نفسك مشتهية حاجه كلميني
فردوس: تاني اسبوع لقدام ما حأشتهي
سفيان: خلاص انا بتصرف بعد دا . وطلع خلاني اليوم التاني تعبت وطلعو بي المستشفى قالو لي ملاريا ركبو لي درب وخلاص الخوف زاد عليهم اكتر بالاخص سفيان
سفيان: نمش بيتنا ولا تمشي مع امك
فردوس: بمشي بيتنا الكبير عشان هناك كلهم قاعدين بس في البيت حأتعبك معاي شديد
سفيان: ما مشكله بتعب عشانك بس اكيد محتاجة امك الفترة دي
فردوس: ايي . رجعنا البيت الكبير انا حاسة روحي دا انتهت وكنت كرهانة اي حاجه بس ما دايرة ابين ليهم الفيهم مكفيهم
جا يوم الجمعه وكان الكرامة حق عربية عمار والاسرة كلها حتجتمع جاني سفيان الصباح عشان يصبح علي
سفيان: كيفك الليلة
فردوس: احسن
سفيان: الحمدلله شربتي اللبن؟
فردوس: سفيان عليك الله ما تجيب لي سيرة اللبن براها بطني بتقلب
سفيان: بس ما ممكن كدا يا جنة
فردوس: جيب لي بسكويت وموية بااااردة مشتهياها .
سفيان: احلفي . قومت ضحكت لانو ما مصدق
فردوس: والله
سفيان: وتاني؟
فردوس: ايي شوف دايرة تجيب قشطة وتكب فيهو مربى وحبة عسل ومعاهو رغيفة بس تكون توست المهم اتصرف دايرة ديل
سفيان: بس ديل كلهم سكريات
فردوس: نفسي فيهم
سفيان: جدا ما عندك اي مشكله طوالي بجيبهم ليكي بس هسي عاوزة البسكويت صح
فردوس: ايي . وطلع قومت استحميت عشان افك من نفسي جهزو لي الحمام دخلت ولقيت سفيان جابهم لي قعدت وبقيت اغمس البسكويت في الموية بأكل
فردوس: الله يداب حاسة بطعم الاكل يلا شوف يا سفيان
سفيان: اهااا
فردوس: في بسكويت بتاعت شاي سكرها خفيف كدا
سفيان: ما بعرفها
فردوس: اسأل أي بقالة كبيرة هي بسكويت شاي بتحسها فلين كدا
سفيان: تمام اها وتاني
فردوس: خلاص كفاية
سفيان: كنا ماشيين كويس
فردوس: حاليا ديل وبعدها بشوف
سفيان: بس اوع توقفي من الطلبات
فردوس: تمام . بقيت اكل من البسكويت فضلتو معاي رفض
فردوس: هسي بحردها . قام ضحك
سفيان: جنة لا اله الا الله؟
فردوس: محمد رسول الله يلا هاك افتح خشمك . ضحك وفتح خشمو اكلتو وواصلت وكل مرة بمد ليهو ولو رفض بقول ليهو هسي بحردها فبأكل يحليلو حنين علي وخاف من انو ما اكل فكان فشاطرني والنهار لمن جاب لي القشطة والمربى حردها قولت ليهم نفسي طلعت منها
سفيان: انا لميتهم وحدة وحدة من اخر الدنيا هسي تقولي نفسي طلعت منها؟
فردوس: الله ما دايراها
امي: جنة خلي الدلع والله سفيان دا تعبان معاكي ياااخ على الاقل راعي انو جابهم ليكي بتعب مالك يا بتي . عاينت ليهو ومديت ايدي ادتني ليهو
فردوس: لو رجعت انتو السبب
سفيان: ما مشكله المهم تأكلي منها بس . مجرد ما اكلت لقمة وحدة عجبني شديد
فردوس: امي موش الباقي قاعد؟
امي: ايي
فردوس: خلاص ارفعيهم لي ما تخلي زول يهبشهم . ضحكو فيني
امي: كويس . وبقيت اكل بتلزز كدا وانا مبسوطة
20
صباح الجمعة كنا مشغولين شديد لانو الليلة الكرامة حقت عمار تبع العربية كنت قاطعة كدا عمار ناداني مشيت ليهو
__ صباح الخير
_ صباح النور
__ شربت الشاي؟
_ ماف زول اشتغل بي حتى امي قالت لي امشي اشرب في البيت الكبير . قومت ضحكت
__ حرم هسي احلى كباية شاي حأعملها ليك اي حاجه ولا عمار حقي انا . جر لي التوب صلحو لي وابتسم
_ لو بتعرفي انا بريدك قدر شنو . نزلت رأسي بخجل
__ امممم
_ اها ناقص حاجه للكرامة الليلة؟
__ للان كل الامور تمام . جا قاطع سفيان صبح علينا ومشى عشان يشوف مرتو ويصبح عليها لانها تعبانة مع الحمل فبجي بجاي بشوفها كل يوم حتى بطلع الشغل بس الليلة الجمعة جا برضو الصباح
_ همس
__ نعم
_ هسي الكلام دا بجي؟
__ بالنسبة؟
_ سفيان دا عقد بعدي وتم عرسو وحاليا هو ومرتو منتظرين بيبي وانا لسع يد مرتي ما قادر امسكها هل بجي؟ . قومت ضحكت
_ ما تضحكي لي
__ اها اعمل شنو
_ طفح الكيل بعد دا انا داير استقر يا زولة
__ المعنى؟
_ بتكلم مع اعمامك بعدين بقول ليهم انا داير مرتي
__ عمار انت مشتري العربية حقك قريب دا كدا الصرف كتير عليك
_ انا لو ابيع دم قلبي تاني اكتر من شهر ما حتقعدي هنا
__ حنسكن برا البيت ؟
_ عشان الاتنين نكون مرتاحين
__ بس كدا صعبة عليك
_ من ياتو ناحية؟
__ عندك بيت؟
_ عندي وتكاليف العرس جاهزة اها في شنو تاني
__ ولا حاجه
_ جاهزة؟ ما داير آخد خطوة بدونك . ابتسمت ليهو بحب
__ لو ما جاهزة بجهز عشانك . عاين لي بحب
_ خلاص جهزي نفسك عشان نبدأ حياتنا الجديدة . هزيت ليهو رأسي بتمام وانا مبتسمة
__ خليني امشي اعمل ليك الشاي . هز لي رأسو ومشيت اعملتها ليهو وانا مبسوطة وفرحانة انو حأعمل عرسي انا وعمار بعد خلصت الشاي وديتها ليهو ومشيت وديت لسفيان برضو كان قاعد مع فردوس وهي بتأكل بسكويت كانو حلوين خلاص
لمن جا زمن الصلاة كنت في بيت عمتي حنان عشان اشيل كبابي من مطبخ جيت طالعة لقيت عمار طالع للصلاة لابس جلالبية وطاقية
__ الحليوة دي راجلي؟ . قام ضحك
_ بطة انا طالع الصلاة ما تخليني اقطع الوضوء حقي . فهمت قصدو قومت ضحكت
__ امشي امشي حصنتك من كل خفيفة لفيفة . ضحك شديد
_ اتهور؟ . ضحكت ومسكت الكبابي قوي
__ لالا ما تتهور يا شيخ . قومت مشيت سريع من قدامو وخليتو بضحك وانا كنت بضحك
بعد الصلاة حصل الصدمة الماف زول متوقعها كنا قاعدين جوا الغرفة مع فردوس بنفرق عنها سمعنا جوطة ونسوان تزغرد برا وصوت رصاص
همس: الصوت دا في بيتنا
وسام: عقد منو يا الله ما يكون عمار دبل فيكي . قومت ضحكت
همس: بموت ليكم هنا والله . كلهم ضحكو
صفا: احتمال عقدو لي انا
همس: كدا اسكتي يا بايرة
فردوس: خلو الكلام واجرو اسمعو الشمار وتعالو لي . قبل ما نلبس تيابنا عمتي سلوى جات داخلة وهي بتبكي وقفنا كلنا حتى فردوس وقفت من الصدمة
همس: عمتي في شنو . مشت لوسام حضنتها ونحنا كلنا مخلوعين
عمتو سلوى: الف مبروك يا بتي . زحت منها
وسام: في شنو
عمتو سلوى: عقدو ليكي هسي . مع الجملة دي كلنا انصدمنا ووسام ررب جات واقعة اغمى عليها صرخنا كلنا
سلوى: جيبو ريحة
همس: عمتي كيف يعني عقدو لوسام وبدون علمها
عمتو سلوى: والله دا الحاصل حتى انا ما كنت عارفة
همس: والله حرام ياااخ . صحيناها وقامت تبكي من الصدمة ونحنا بنبكي معاها وما عارفين نهديها .
قومت لبست توبي وطلعت برا بفتش في عمار وانا ببكي امي وقفتني
امي: مالك بتبكي
همس: امي عمار وين
امي: الحاصل شنو
همس: كيف يعقدو لوسام بدون علمها هسي لمن اغمى عليها من الخبر
امي: ابوها عقد ليها نحنا نقول شنو
همس: ابوها وين اصلا ووكل منو
امي: ما عارفة دا الحصل
همس: وين عمار افهم منو
امي: هسي جا مع الرجال باركو وطلعو
همس: كدا تلفونك . شيلت تلفونها اتصلت ليهو وقولت ليهو يلاقيني في شجرة الليمون قام اتحجج قولت ليهو الموضوع ضروري وقفلت مشيت انتظرتو هناك وانا متوترة وببكي جا لقاني اتخلع
_ مالك بتبكي
__ انتو كيف تعملو كدا
_ عملنت شنو
__ كيف تعقدو لوسام كدا
_ والله انا اتكلمت انو ما ينفع كدا بس ماف زول اشتغل بكلامي
__ هسي عاقبتوها عشان الغلطة ديك هي اعتذرت منك صح ليه تعملو كدا
_ اول حاجه المشكله الحصلت ديك ماف زول عارف غيرنا نحنا التلاتة وانا عملت اللازم بخصوص الموضوع دا وانتهى على كدا يعني العقد دا انا ما عندي يد فيهو ابوها وعقد ليها انا اعترضت بس انا منو قدام اعمامها
__ يعني انت ما كلمت ابوها؟
_ انتي هبلة مستحيل اعمل كدا لانو بعرف عمي التجاني " راجل عمتهم سلوى " صعب وانا عاقبتكم الاتنين لو متذكرة وانتهى على كدا وهي وعدتني انو ما تعمل كدا ليه اخزلها؟
__ ياااخ هسي من الصدمة لمن اغمى عليها . وقومت ابكي شديد
_ بطة ما تبكي
__ لو شوفت حالتها والله بتحنن
_ اقيفو جنبها بس وانتي وقفي بكي ياااخ . كنت لسع ببكي
__ عمار . مسح لي دموعي وحضني
_ ما تبكي خلاص كلها لخير ابوها ما برضى ليها الشين صح؟
__ صح بس هي ما متقبلة
_ حتتقبل ان شاءلله
__ ذي جنة صح؟
_ جنة ما كانت موافقة على سفيان؟ . زحيت منو
__ ايييك كانت بتخاف منو موت لانو مفكرة سفيان بكرهها . قام ضحك
_ والله سفيان بحبها شديد بس بطريقة مختلفة
__ كيف يعني
_ يعني هو كان ببين عكس شعورو بس بعد اتزوجها شوفتي الاختلاف؟
__ هسي هي متعلقة بيهو بطريقة مبالغة
_ دا نوع مختلف من الوان الحب ممكن تقولي عليها اللون السابع للحب . قومت ضحكت
__ كيف يعني اللون السابع للحب يعني الحب عندو الوان كمان؟
_ ايي اي واحد بحب بطريقتو الخاصة
__ واللون السابع للحب دا اي حب
_ يعني الحب الما ممكن تشوفيهو بالعين بس بتحسي بيهو في القلب ذي حب سفيان لجنة او ممكن الحب الروحي المن دون مقابل ولا شروط ذي حبي ليكي . عاينت ليهو بحب
__ او ممكن حب فطري ذي حبي ليك اتولدت بيهو واتعلقت بيك بس بدون ما اعرف انو بحبك للدرجة دي . حضني شديد
_ والله يا بطة انتي قطعة من روحي بدونك ما عارف حيحصل لي شنو . شديت عليهو
__ انا معاك لحدي ما ربنا يستلم اماناتو
_ ان شاءلله . زح مني
__ خليني امشي عشان وسام اكيد محتاجاني جنبها
_ بس اوع تبكي تمام . هزيت ليهو رأسي بمعنى تمام ورجعت الغرفة لقيت وسام بحاولو يصبرو فيها البنات قعدت جنبها
همس: خلاص حبيبتي كلو لخير
وسام: لشنو عمار عمل كدا
همس: عمار ما عندو دخل في الموضوع
وسام: اكيد عشان راجلك بتدافعي ليهو . صدمتني طبعا
همس: معليش ما بدافع ليهو عشان راجلي
وسام: ما هو لو ما اتكلم ما كان حصل فيني دا كلو هو بس السبب عشان بكرهني بس وعشان بسببي كنتو حتطلقو عشان داير يعاقبني عمل كدا عمري ما بعافي ليهو دمرني
همس: عمار ما عندو اي دخل والموضوع الحصل داك هو عاقبنا في وقتها وقفل الموضوع
وسام: اصلا حتدافعي ليهو اتوقع منك شنو اصلا . عاينت ليها بخيبة امل ومستغربة فيها
همس: ما حأعقب على كلامك بس عمار هسي انا جاية منو وقال لي هو ما قال حاجة لزول وحتى اعترض بس ابوكي كان مصر وعقدو تمام؟
فردوس: وسام انتي ما بتقدري تظلمي زول ما لم تعرفي الحقيقة والعقد خلاص حصل وكلها لخير . قامت ضحكت
وسام: شايفين الموضوع ايزي عشان كلكم متزوجين حبايبكم بس .
همس: هل وحدة فينا كانت موافقة على زواجها انتي كنتي شاهدة يوم طلبو فردوس وقدر شنو كانت بتبكي وخايفة وكانت بتكره سفيان ونحنا كنا بنصبرها انو ما حيعاملها بكره هل كنا متوقعين انو سفيان بحبها طبعا لا وانا هل لمن عمار عقد لي كنت صاحية هل استشاروني؟ . قامت ضحكت
وسام: انتي دايرة تضحكي علي على اساس ما حتوافقي كدا
همس: انتي اكتر وحدة كنتي شايفة وعارفة اني طلبت الطلاق منو لانو ما كنت شايفة حياتنا غير اب وبتو بس الظروف جبرتنا انو نتزوج .
وسام: ظروف شنو الجبركم عليك الله ما تضحكي على روحك الدنيا كلها عارفه انو انتو بتحبو بعضكم وهسي اكيد شمتانة فيني وبتدافعي لراجلك لانو هو السبب وجاية تقولي لي انا وجنة ما موافقين على زواجنا
همس: والله انتي مريضة
صفا: همس خلاص
همس: ما خلاص ولا اي حاجه هي بتلمونا انو عشان ازواجنا بحبونا انو نحنا بنشتم فيها هل لو كان عاجبنا الحصل فيكي ما كان بكينا لبكيكي ولا كان مشيت شاكلت عمار ولومتو عشانك
فردوس: همس معاها حق وسام انا سفيان كنت راضية بيهو؟ . سكتت
فردوس: بس طلع حنين هل دا ذنبي لا عمار عقد لهمس وهي في غيبوبة وما استشارها وفي النهاية طلع بحبها هل ذنبها لا خلاص مدام العقد عليكي دا اكيد اختارك لانو بحبك ما اختارك عن عبس
همس: واخر مرة بقولا ليكي ما بتقدري تلومي عمار على الحصل ابدا لو كان فعلا اتكلم كان ما بسألك بس هو ما عندو دخل في الموضوع ولا بسمح ليكي تلومي ابدا . وقومت طلعت من الغرفة زهجانة منها جات لاحقاني برا والبنات وراها
وسام: هو انتي كل البهمك عمار بس ولا بتشوفي غيرو لو قتل بتقولي ما قتل عشان كدا واقفة في صفو . التفت ليها
همس: انتي مشكلتك شنو مع عمار ايي عمار بس الشايفة وما حأشوف غيرو عندك مشكله؟
وسام: قولي كدا من البداية اصلا حتفضلي علينا ليه ما تفضلي وهو حبيبك فماف داعي تعملي انك زعلانة علي
همس: لو ناسية بذكرك عمار الشين البتتكلمي عنو دا هو نفسو عمار الكسرت ليهو كلمة وانا عمري كلو ما كسرت ليهو كلمة وطلعت معاكم وضربتني عربية ودخلت غيبوبة خمس شهور تتذكري؟ هو ذاتو عمار الفضلتكم عليهو بس يا خسارة ولو ناسية بذكرك كمان بسببك عمار رفع ايدو علي وهو عمرو كلو ما عملها وانا سكتا عشان ما تتلامي براكي واتعاقبت نفس عقابك وانحرمت من الطلعة ومن التلفون ذيك وبرضو بسببك وما فتحت خشمي قولت انا ما عندي ذنب وكنت حأطلق برضو عشان شنو دا كلو عشانك بس ولمن عمار الشين دا جا قال منو كسر طبلة المخزن قولت انا عشانك انتي وعشان عارفة عمار ممكن يعمل شنو بس ختيت الحق علي عشان العقاب يجي خفيف وياما شيلت عنكم حاجات هسي جاية تقولي لي بفضل عمار عليكم . والتفت لصفا
همس: صفا يوم اتشاغلنا في السوق المخلوقة دي كانت معانا بس الاتهان والاتزلى منو همس وفردوس هل في زول لامها ليه ما سألوها؟
وسام: هسي جاية تزليني بسبب الحاجات دي يعني
همس: ازلك ليه بس؟ انتي شايفة انو ما بهمني زول بس جرائمكم البتحصل دي كلها لمن عمار يعرف بيها بترموها في همس عشان شنو عشان عمار مهما همس عملت ما بفرض فيها بس لمن يجي الدور علي هل في زول يوم وقف بيني وبين عمار بتقولو عمار ما بحب زول يدخل بينو وبينك دا حجتكم دايما
صفا: همس خلاص
همس: ما خلاص سكتا كتير ما بسكت تاني وعمار دا الشايفة السبب في عقدك بحب اقول ليكي اي حاجه ولا عمار سامعاني ما برضى بيهو عشان راجلي موش دا كلامك ايي ما برضى بيهو . وجوطنا وعمار سفيان وعزيز جو على صوتنا وامهاتنا
عمار: مالكم بتجوطو؟ . التفت حمرت ليها
همس: عمار انت العقد لوسام منو
عمار: ابوها ليه؟
همس: هل انت ليك يد في الموضوع؟
عمار: قبيل قولت ليك انا ما عارف مشينا بس صلينا وقالو يعقدو وانا اعترضت بس ابوها القرر ودي بتو
همس: سمعتي ولا يعيدو ليكي؟ . سكتت وقامت تبكي وجرت جوا
سفيان: في شنو
همس: ماف حاجه سفيان كدا شوف جنة رجعها جوا عشان ما تهبط . من قولت كدا مشى سريع ليها
عمار: مالكم . بقيت اتنفس بصعوبة وحاسة بخنقة كدا
همس: ما قادرة اتنفس
عمار: تعالي . مسكني من كتفي وطلعني برا وامي بتسأل من الحاصل
همس: امي ما تسأليني
عمار: خليها تهدأ بالاول . سكتت ومشينا بيتهم بهناك لانو ماف زول كلهم في البيت الكبير عشان الكرامة قعدنا في المظلة
__ احكي لي الحاصل . طوالي نزلت رأسي في رجولي و بقيت ابكي هو ما سألني بقى يمسح لي في ضهري لمن هديت شوية
__ امشي اغسلي وشك وتعالي . قومت غسلت وشي وجيت قعدت
__ يلا احكي لي . وقربت منو ورقدت في كتفو
_ اتناقشت مع وسام
__ عارف بس السبب شنو
_ قالت انت السبب في العقد حقها وانا قولت ليها اوعك تلومي عمار وقالت الا انا بدافع ليك عشان راجلي وكدا
__ والله ما بهمني تفكيرها عني قدر ما هاميني زعلك من الموضوع دا
_ ما بسمح ليها تتكلم عنك . قام ضحك
__ محامي الدفاع حقي يا ناس . قومت ضحكت
_ ايي بدافع عنك
__ بس اول مره اشوف لي محامي دفاع بدافع وببكي . قومت ضحكت وقولت ليهو بدلع
_ عمااار ياااخ
__ يلا ما تزعلي اكيد قالت كدا من زعلها بس
_ تغلط فيني ما عندي مشكله بس فيك انت لا .
__ عندي احلى مرا في الدنيا يا ناس
_ امممممم . وبقيت قاعدة معاهو وراقدة في كتفو ذي خمسة دقايق
_ عمار
__ عيون عمار
_ خليني امشي بهناك عشان احتمال محتاجين لي
__ خليكي شويه
_ ما بقدر خليني امشي
__ خلاص تمام بس ما تزعلي نفسك
_ حاضر . وقومت رجعت بهناك والجو كان مكهرب شديد ما رجعت الغرفة الا بالليل عشان ما اتطاقش معاها ودخلت عشان ادي الشوربة لفردوس مديتو ليها ووسام كانت راقدة في سريرها وانا واقفة بس
فردوس: بطة ووسام العنو الشيطان الدخل بينكم
همس: الحمدلله انا قلبي صافي اتجاها بس شكلو هي القلبها مليان اتجاهي وخليها تلعن الشيطان . وطلعت من الغرفة......
____________
من جانب فردوس
عقد وسام البقى فجأة دا عمل مشكلة كبيرة بينها وبين همس بس همس ما سكتت ليها لانها ختت اللوم على عمار وهمس دافعت عن عمار وحصل نقاش كبير وكنا واقفين بنحاول نهدي المشكله لمن انفصلو وجاني سفيان
__ المطلعك برا شنو
_ ما شايف الحاصل دا
__ حتى ولو ما تطلعي ياااخ انتي لسع عليكي خطر والجنين ما ثبت وما ينفع التوتر عليكي
_ يعني يا سفيان اشوف في البحصل دا واسكت؟
__ ايي تسكتي
_ انت بتقدر تعملها بس انا لالا
__ياااخ انا بتكلم عشان صحتك دايرة تموتي؟
_ ما موتا لكن . مسح وشو وما داير يعصب فيني لاني حقارة شديد
__ فردوس الله كم؟
_ واحد
__ ارجعي جوا عشان ما تشوفي وشي التاني انتي طولتي منو شكلك . طوالي خوفت لانو بعرف وشو التاني وطوالي رخيت قولت ليهو بدلع كدا
_ رجعني انت . رفع لي حاجبو من التغير الحصل فجأة دا
__ فردوس الله كم؟ . قومت ضحكت
_ خلاص خلاص ياااخ ما تربط وشك دا راجعة جوا وجيب لي معاك زبادي مشتياهو شديد . ما مشتياهو ولا اي حاجة بس عشان اخليهو يرخي شوية
__ تمام بجيها ليكي بس ارجعي جوا
_ حاضر . ودخلت جوا شوية وجابها لي اكلتها بس شوية وبالليل همس جابت لي شوربة وقولت ليها تلعن الشيطان بس قالت قلبها صافي وبالجد همس قلبها صافي والكلام القالتو قبيل كلو صح للحظة حنيت عليها وبالجد لمن تحصل اي مشكله بنختها قدام المدفع عشان عمار ما بسألها دي كانت حجتنا وحتى لو زول تاني برضو بتخت اللوم عليها لانو عمار ما بسمح زول يسألها يعني لو حصل اي تصرف بشتكوها لعمار وما بنعرف القاعد تسمعو من عمار ياما شالت عننا كتير وما حصل زول وقف معاها لمن هي التعمل المشكله برضو حجتنا انو عمار ما بسألها.......