رواية اللون السابع للحب الفصل الواحد والعشرون 21 والثاني والعشرون 22 بقلم شذى عبد المكرم
حصل توتر في البيت بسبب العقد حق وسام وبسبب شكلتي مع وسام صباح السبت كنت مع امي في المطبخ بنعمل في الشاي
امي: ما صح تتشاكلي مع بت عمتك امشي اعتذري ليها
همس: امي انا ما غلطانة نهائي
امي: هي زعلانة بسبب العقد الحصل فجأة دا اعذريها
همس: وذنبي انا شنو عشان تسمعني فارغ وذنب عمار شنو لمن تحملو المسوؤلية
امي: ما مشكله ما تشيلي وش القباحة
همس: خشمي ما حأفتحو معاها ولو اتكلمت معاي بسمعها فارغ كفاية سكتا كتير
امي: خلاص يا همس
همس: هسي خليكي من الموضوع دا عندي معاكي موضوع تاني
امي: في شنو
همس: عمار قال داير يتم العرس احسن ذاتو عشان اقطع وشي من البيت دا واريحهم
امي: دقيقه ما حتسكنو هنا؟
همس: لالا دا حسب كلام عمار قال عندو بيت
امي: حتخليني براي
همس: ما بقدر افوتك بس قولي همس حتلقيني جنبك طوالي
امي: ربنا يسعدك في حياتك يارب . حضنتها شديد
همس: آمين يارب
آمي: اها متين حتعملو العرس
همس: بعد دا علي انا خلينا نقعد ونحدد زمن مناسب وهو حيكلم اعمامي ونشوف البحصل
امي: ربنا يتم ليكم على خير
همس: ان شاءلله يارب . قطع حديثنا دخول عمار
عمار: كيف اصبحتو
امي: كويسين الحمدلله
عمار: عمتي داير اتكلم معاكي في موضوع ضروري
امي: اتفضل يا ولدي خلينا نتكلم في المظلة همس تمي الشاي دا
همس: كويس . وطلعو وانا عملت الشاي ووديتو ليهم كانو لسع بتكلمو وشيلت باقي الشاي وديتو للبنات جوا واديت فردوس لبن
فردوس: لالا زحي مني بعيد
همس: والله اتصل لسفيان اكلمو
فردوس: بتهدديني
همس: ايي بهددك كلام فارغ ما ينفع . قامت ضحكت
فردوس: انتي مالك من الصباح
همس: بعد دا هظار ما بنفع بحسم الفارغة بس سكتا كتير . قامت تضحك كتير لمن رقدت في السرير قومت اضحك
فردوس: عسل والله
همس: هاكي يلا اشربي . مسكتو وشربت حبة رجعت تضحك وانا ضحكت تاني وقعدت اشرب معاها اللبن
همس: جنة
فردوس: هاااا . اتذكرت ما صح اتكلم فردوس دون البنات
همس: بنوت دايرة اكلمكم بحاجة عشان ما تسمعو من غيري وتقولو خسيسة
فردوس: انتي الليلة الحاصل ليكي شنو . قومت ضحكت
همس: والله انا ذاتي ما عارفة
صفا: انتي ما براكي الليلة نهائي
فردوس: احكي
همس: عمار قال نتم عرسنا بعد دا . فرحو لي الاتنين عدا ديك ما ادت اي ردة فعل وصفا جات حضنتني
صفا: ربنا يتم ليكم على خير
همس: اللهم آمين يارب تسلمي حبيبتي والعقبال عندك
صفا: ان شاءلله يارب واخيرا عندنا عروس في بيتنا . ضحكت
همس: هجاج شديد
صفا: شديد بعد دا نفتش في قصات الفساتين
فردوس: انا اقص ولا البس توب؟
همس: انا لو محلك بلبس توب وارسم واجدع بالدهب . قامو ضحكو
فردوس: خلاص اعتمدت بلبس توب وبقينا نخطط ووسام بتسمع بس
المغرب عمي محمد وصى لي انو دايرني مشيت ليهو كان معاهو اعمامي وعمار قاعد سلمت عليهم وقعدت وكنت متوترة كأني في محكمة
محمد: اها يا بت الغالي . ابتسمت ليهو
محمد: انتي عارفة انو انتي الوحيدة الاستشاروها في زواجها صح؟ . هزيت رأسي بمعنى ايي لانو كان عندي حق الاستمرار او لا عكس وسام وفردوس
محمد: عارفة ليه؟ . هزيت رأسي بمعنى لالا
محمد: لانك بت الغالي وبت ابوي التاني ووصيتو علي . قصدو ابوي الله يرحمو قومت ابكي وهو قام يبكي لانو اتذكرناهو
محمد: شوفتي مننا حاجة كعبة؟ . هزيت رأسي بمعنى لالا من ابوي اتوفى ما لقيت منهم حاجه كعبة وحتى عمار ما كان برضى فيني نهائي لقيت كل الحب بينهم ما قصرو فيني
محمد: هسي جا عمار ولدي وانا بفضلك عليهو وقال دايرك وانا قدامهم كلهم بسألك دايرة عمار ولالا لو دايرة بتم ليكم عرسكم ولو لالا هسي يطلقك هنا وانا بسلمك للبستاهلك لانك غالية علي ذي الغالي ابوكي . كنت ببكي بس
محمد: ما تبكي خلاص وارفعي رأسك وشوفي دا . مسحت دموعي وهو اشر لي على عمار
محمد: دا عمار ابوكي التاني صح؟ . هزيت ليهو رأسي بمعنى ايي
محمد: ما تتكلمي ابدا بالعاطفة لانو دا عمر كامل ودا قرار مصيري . كنت بعاين لعمار وانا بقول في سري لو عندي تلاتة اعمار مستعدة اعيشها معاهو
محمد: اها
همس: موافقة . كنت بعاين في تعابير وش عمار عمل حركة يس كدا ووشو انشرح كأنو نجح في افضل انجاز ليهو في حياتو مستحيل انسى تعبيرو في اللحظة دي واعمامي قامو فوق اتحاضتو وباركو لبعض وباركو لي
محمد: ربنا يتم ليكم على خير
همس: امين ياارب . وبراحة استأذنت منهم وطلعت ورا البيت بقيت ابكي على حب عمار لي وعلى حب اعمامي لي قعدت مسافة حسيت في زول في رأسي رفعتو لقيت عمار طوالي وقفت فوق وحضنتو شديد وبقيت ابكي وهو بكى معاي
عمار: والله بوعدك انو اسعدك وما اقصر منك
همس: انت عمرك كلو ما قصرت معاي ما عارفة اجازيك كيف
عمار: كل مرة بقول ليك انتي قطعة مني
همس: عمار انا بحبك شديد . زاد من ضمو لي
عمار: بس ما اكتر مني والله . هديت شوية وزحيت منو ومسحت دموعي
همس: حنسكن بعيد من البيت؟
عمار: ما عايزة نسكن بعيد؟
همس: والله كل العايزة اكون معاك بس . مسك ايادي وسلم عليهم
عمار: خلاص نجهز بعد دا عشان نمش بيتنا ونبدأ حياتنا الخاصة . هزيت ليهو رأسي بتمام قعدنا خمسة دقايق ورجعت جوا للبنات كلمتهم فرحو لي شديد
عد اسبوع من الكلام دا ولسع كان في جفا بيني وبين وسام وعمتي حنان عندها حاجات كدا المفروض نسلمها لمرا بس بيتها بعيد شويه من الحي وهي حاجات كتيرة شوية الا نمش انا وصفا ووسام
فردوس: ماشة معاكم
همس: لالا البيت بعيد حتتعبي
فردوس: ياااخ ما بتعب واصلا مليت من قعاد البيت والرياضة مفيدة للحامل
همس: جنة ما بنتحمل مسوؤليتك
فردوس: بتحملها براي
صفا: والله انا ما قنعانة من روحي سفيان راجلك صعب
فردوس: انا قررت ماشة بس
همس: المفروض نتوب من الحادث حقي داك طلعت من دون اذن عمار وحصل الحصل تاني نكرر نفس الغلطة؟
صفا: كلام همس صح والله حاسة انو حيحصل حاجة دايما لمن نركب رأس بتحصل مصيبة
فردوس: ما بتحصل وبنرجع سريع قبل سفيان ما يرجع من الشغل . قومت ضحكت
همس: نفس الاحداث بتتكرر
فردوس: ورحكم ما حيحصل حاجة
همس: والله لو سفيان سأل انا بدون ما اتردد بقول ليهو مرتك اصرت تكسر كلمتك
صفا: حتى انا
فردوس: ايي يا وسخات ارمو فيني بس ذي دا ماشة بس . رضينا بالامر الواقع لانها عنيدة شديد لبسنا عبايتنا وشيلنا الحاجات
عمتو حنان: وانتي يا جنة ماشة وين
فردوس: عمتي دايرة اغير جو شوية يااخ
عمتو حنان: تمام بس ما تتأخرو عشان سفيان ما يجوط . قومنا طلعنا طبعا البيت كلو عارف طبع سفيان يعني عمار مثلا ممكن يجوط ويهرج بس سفيان لا في البداية بكون هادئ بس لو اتقلب البيت كلو بترعب وبالاخص حالاتو دي كلها كانت في فردوس بس لمن عمل ليها فوبيا زمان وطلعنا البيت كان بعيد شوية بس مع الونسة حصلنا وقعدنا شوية وسلمناهم الحاجات وطلعنا راجعين فجأة وسام ما كانت منتبهة ضربت ليها في بت وكانت شايلة حاجة اتكشحت والبت كان معاها بت تانية
البت: انتي عميانة ما بتشوفي
وسام: معليش ما انتبهت ليكي
البت: وانا اعمل ليكي شنو بمعليش حقك دا . ومسحت يدها في وش وسام طبعا حركة مستفزة شديد لو ما كان عملت الحركة دي كان اعتذرنا وخلاص بس لا في دي ما بنسامح جيت جريت وسام وراي ووقفت قدام البت
همس: مالك مشكلتك شنو موش اعتذرت ليكي
البت: وانتي مالك سألتك انا
همس: لمن تسأليها كأنو سألتيني انا . وجريت وسام وقفتها جنبي
همس: ياها قدامك تمي مرا كرري الحركة العملها دي تاني والله ان ما مسحت بيكي الارض يبقى ابوي الله يرحمو ما جابني .
البت: انتي يا توتو والله وشك السمح دا بخلي يبقى ذي عبايتي . طبعا ماف داعي اوصف ليكم عبايتها قومت ضحكت ليها
صفا: وش منو يا ماما تعملي ذي عبايتك والله بتلعبي بالنار
همس: خليها شكلها قنعانة من روحها
فردوس: شديد كمان
البت: قايلين كدا بتخوفوني
همس: ما قايلين متأكدين العبي بعيد ماما ورحكم . ومسكت وسام من ايدها اتحركنا خليناها مشينا مسافة منهم فكيت ايدها
وسام: همس . وقفت وهي نزلت رأسها
وسام: انا اسفة على اي حاجه بدر مني وحتى بعد الكلام الفارغ السمعتو ليكي وقفتي جنبي هسي
همس: حاجة وحدة خليها في بالك انا ممكن اتشاكل معاكي وممكن اقتلك عديل بس ما بسمح لزول يشاكلك لانو انتي ما صحبتي انتي اختي الاخوات ممكن يتضاربو بس ما برضو ببعض صح؟ . هز رأسها بمعنى ايي وبكت جيت حضنتها
همس: خلاص ما تبكي
وسام: والله معليش واسفة على الكلام القولتو في راجلك . قومت ضحكت وقرصتها في ضهرها
همس: دا عشان الكلام القولتي في راجلي . كلهم ضحكو
وسام: اسفين
همس: نرجع البيت ونتفاهم . وبقينا ماشيين فجأة فردوس تعبت لينا.......
___________
من فردوس
الحمدلله مشكلة همس ووسام اتحلت لانو كانت عاملة لينا شرخ في المجموعة وراجعين في الشارع حسيت بمغز خفيفة كدا في بطني
فردوس: انا خلاص انتهيت بطني بتوجعني
همس: كلمناكي يا سجم بس رأسك قوي
فردوس: رجعوني بيتنا
صفا: بيتنا يا جن . وبقينا ماشيين براحة عشاني فجأة وقفت لينا عربية ونزلت القزاز وطلع سفيان قلبي عمل شح عاين لي مسافة قربت من العربية
سفيان: جايين من وين؟
فردوس: دددقيقة افهمك
سفيان: جايين من وين ؟
فردوس: بيت قريب هنا
سفيان: وانا قولت شنو
فردوس: والله تعبت من القعدة قولت اغير جو . التفت لناس همس
سفيان: عارف انو جنة ما بتسمع الكلام انتو مالكم . سكتو
فردوس: والله كلموني بس انا اصريت عليهم
سفيان: تمام يا فردوس . حاولت افتح الباب شكلو مأمن من جوا
فردوس: كدا افتح الباب انا تعبانة بعد نرجع نتفاهم
سفيان: ذي ما طلعتي بدون اذني بتعرفي ترجعي
فردوس: سفيان ياااخ بطني وجعاني افتح الباب
سفيان: على ما افترض كلامي واضح وزحي من الشباك . بقيت اعاين بصدمة وكان هادئ جدا لمن بقيت اعاين ليهو حمر لي زحيت شوية من الشباك وطوالي اتحرك ومشى خلاني بقيت اعاين بصدمة للعربية وهو ماشة
همس: مشى جادي
فردوس: والله الليلة قتلني قتلني
صفا: انتي ذاتك رأسك قوي خلاص . فجأة حسيت بالمغز شد علي
فردوس: واااااي . ومسكت في همس
همس: تعالي اقعدي في المصطبة ديك. . كان في مصطبة حق بيت قريب مننا ساقوني وقعدوني فيهو
همس: بطنك واجعك شديد؟ . غمضت عيوني من الالم وهزيت ليها رأسي بمعنى ايي
وسام: نعمل شنو هسي
همس: دقيقه اتصل لسفيان يجينا . فتحت عيوني
فردوس: لالا ما تتصلي ليهو حيقتلني والله
صفا: انتي هبلة ولو حصل ليكي حاجه
فردوس: لالا سفيان لالا براهو زعلان مني ولو عرف انو حصلت لي حاجه ما حيسامحني وما بعيد يقتلني
همس: احسن من انو تحصل ليكي حاجه انتي وجناكي .
فردوس: كلمي عمار ارحم
همس: عمار بعيد بس سفيان قريب من هنا . سكتا و كنت خايفة من ردت فعل سفيان بعدين بس كمان خايفة على جناي لاني لسع تعبانة والبيبي ما ثبت........
____________
من جانب همس
اتصلت لسفيان عشان فردوس تعبت لينا رد لي بعد زمن
__ سفيان تعالنا راجع عليك الله
_ ليه بس
__ عشان ترجع جنة
_ ذي ما هي كسرت كلمتي وطلعت بتعرف ترجع كيف
__ دا ما وقت زعلك يا سفيان وجنة تعبت لينا في الشارع
_ همس موش سوقوها رجعوها
__ سفيان الموضوع حرج لانو جنة تعبانة شديد
_ الحاصل ليها شنو
__ حاسة بمغز شديد وما قادرة تتنفس تعال عليك الله وبعدين جوط براحتك وشاكلنا كلنا بس تعال
_ وين انتو حاليا
__ في نفس المحل الخليتنا فيهو
_ تمام جاي . وقفلت منو ورجعت للبنات
فردوس: شاكل صح
همس: ايي بس جاي
فردوس: انا انتهيت خلاص.....
____________
من جانب فردوس
همس قالت انو سفيان جاي قربت اهبط من الخوف وبقيت ابكي من الخوف والالم لاني اكتر وحدة بعرف شخصية سفيان صح من اتزوجنا ما شوفني وشو التاني الزمان بس اكيد هسي جاب اخرو مني ولو حصل حاجة للبيبي ما حيرحمني نهائي بقينا منتظرين خمسة دقايق وجانا نزل من العربية مسكت في يد همس وضغطت عليها من الخوف جا قرب مننا
سفيان: قومي . قومت براحة المصطبة كانت دم
همس: جنة بتنزف . عاينا للمصطبة بخلعة كلنا ورجعت عاينت لسفيان برعب وطوالي اغمى علي........
228
سفيان وصل محل كنا قاعدين وفردوس ضغطت على ايدي من الخوف
سفيان: قومي . قامت من المصطبة وكانت كلها دم انا اتخلعت
همس: جنة بتنزف . كلهم عاينو للمصطبة واتخلعو وطوالي من الخلعة فردوس اغمى عليها بس سفيان سريع ثبتها وشالها جرا بيها العربية وكلنا قومنا جاريين ركبنا العربية وسفيان جرا بينا المستشفى حق الدكتور المتابع معاها ودخلوها و عملو ليها اللازم وسيفان متوتر شديد لانو دخلوها جوا ونحنا برا منتظرين اتصل لي عمار زحيت بعيد منهم
__ وين انتو ومالكم اتأخرتو كدا امك قالت امي رسلتكم بس اتأخرتو مالكم
_ نحنا في المستشفى
__ مالكم الحاصل شنو
_ جنة تعبت وقامت تنزف جينا بيها
__ ياااخ انتو مصائب عديل كدا موش عارفين انها لسه تعبانة البخليكم تسوقوها معاكم شنو
_ والله يا عمار كلمناها بس كانت مصرة تجي
__ حتى ولو ما تسوقوها نهائي انتو لو ما وحدة فيكم ماتت ما بترتاحو والليلة سفيان حيزفتكم كلكم . عمار خوفني شديد بكلامو دا
__ كلمتو سفيان؟
_ اتصلت ليهو وهو الجابنا المستشفى
__ تمام جاي عليكم انتو في اي مستشفى . قومت وصفت ليهو وقفلت منو ورجعت للبنات منتظرين شوية الدكتور طلع
سفيان: هي كيف يا دكتور
الدكتور: ما بقدر اقول كويسة لانك عارف جسمها تعبان شديد ليه تعبتوها . سفيان عاين اتجاهنا بتوعد كدا كلنا بقينا نرجف
سفيان: ما كنت عارف وهي طلعت لانها ملت من جو البيت
الدكتور: هسي الجنين ما نزل بس دا ما بدل انو ثبت وكدا نسبة الخطورة زادت اكتر لازم تأخد الراحة الكافية لمن تدخل الشهر الخامس بعدها الخطر حيمشي بس لو اتهورت تاني ممكن تخسرهم الاتنين مع بعض
سفيان: حأنتبه اكتر المرة دي بس يا دكتور لو في خطر عليها شديد نزل الجنين ما بقدر اخاطر بحياتها
الدكتور: ما يحتاج بس كثفو ليها العناية والتغذية وانا لو شوفت انو في خطورة بنزلو ما تخاف
سفيان: شكرا دكتور
الدكتور: دا واجبي هسي مركب ليها درب ممكن تدخلو ليها شوية وحتصحى وحاولو تخلوها في جو ما فيهو توتر نهائي
سفيان: والادوية؟
الدكتور: ما بغيرو ليها واصلو ليها فيهو
سفيان: تمام . ومشى وسفيان دخل الغرفة
همس: ما داخلين؟
صفا: صراحة ما اكذب انا خايفة من سفيان
وسام: حتى انا والله
همس: عمار جاي في الشارع ننتظرو وندخل معاهو
صفا: احسن حل . قعدنا شوية عمار اتصل وصفت ليهو محلو جانا
عمار: وين هم
همس: جوا الغرفة دي
عمار: جنة كويسة؟
همس: كويسة الحمدلله
عمار: مالكم واقفين برا خلاص
همس: والله الصراحة خايفين من سفيان
عمار: بتعرفو الخوف بس ما بتعرفو الادب . ضحكنا
وسام: والله منعناها بس كانت مصرة
عمار: خافو مني انا اكتر من سفيان لمن نرجع البيت . انا كنت مطمنة من ناحية عمار ودخلنا الغرفة سفيان رفع رأسو عاين لينا انا طوالي مسكت في عمار قوي من الخوف وبقيت لاصقة فيهو بس هو اتقدم وانا ماسكة في كم ايدو من ورا
عمار: سلامتها
سفيان: تسلم
عمار: هي كيف هسي والدكتور قال شنو
سفيان: هي كويسة والدكتور قال محتاجة عناية اكتر
عمار: حتكون كويسة ان شاءلله
سفيان: ان شاءلله . وانا لسع ماسكة في عمار التفت لي وهمس لي
عمار: ما تخافي وامشي اقعدي جنبها . هزيت رأسي بمعنى تمام وزحيت منو وقعدت جنبها وسفيان ما قال حاجه قولت اكيد عشان عمار واقف وانا لمن عمار يكون موجود ما بخاف من حاجه بقيت امسح ليها في يدها بالراحة وسفيان قام طلع من الغرفة وعمار طلع وراهو طوالي البنات قربو مننا
وسام: يا كلبة تتحامي براجلك . قومت ضحكت
همس: لازم استقل المواقف الذي دي
صفا: محظوظة كيف سفيان ما بقدر يسألك في وجود عمار
همس: ولا حتى في غيابو وما تنسو بعدين حنآخد زلة من الجهتين عمار ما حيمشيها لينا
صفا: ربنا يجيب العواقب سليمة
همس: ان شاءلله يارب المهم انو جنة والبيبي الاتنين كويسين
وسام: دا المهم . قعدنا دقيقتين فردوس بدت تصحصح شوية شوية.........
___________
من جانب فردوس
بديت اصحى بعد استوعبت اول حاجه ختيت يدي في بطني
فردوس: البيبي ما نزل صح
همس: لالا . غمضت عيوني بحمد ربي انو طفلي بخير
فردوس: الحمدلله . عاينت كدا كانو البنات بس قولت ما يكون من الزعل مشى خلاني وداير يطلقني جات في بالي حاجات كتيرة
فردوس: وين سفيان
همس: برا مع عمار دقيقه اكلمو انك صحيتي . للحظة خوفت بس محتاجة انو اشوفو
فردوس: تمام . وقامت طلعت
وسام: هسي حاسة كيف
فردوس: بطني بتوجعني شوية بس الحمدلله احسن من قبيل
وسام: الدكتور قال محتاجة راحة شديد
صفا: الف سلامه عليكي
فردوس: الله يسلمك حبيبتي . جا سفيان داخل مع عمار وهمس كنت خايفه من ردت فعلو بس عارفة مستحيل يأذيني قرب مني
سفيان: كيفك هسي
فردوس: احسن الحمدلله . طوالي طلع عرفت انو زعلان مني
عمار: الف سلامه عليكي
فردوس: الله يسلمك . وطلع وراهو طوالي دموعي نزلو
همس: مالك حاسة بألم؟
فردوس: سفيان زعلان مني
همس: ليهو حق يزعل بس حيهدأ وحيلين
فردوس: انتي ما بتعرفي سفيان كويس هسي عشان عيانة بس والخوف يطلقني عشان ما بسمع الكلام وهو محذرني
همس: ما تبالغي انتي مستحيل يطلقك عشان سبب ذي دا
فردوس: والله اهون يطلقني من يعاملني ببرود كدا
همس: هسي ما تزعلي كل حاجه بتتحلا بس الدكتور قال ممنوع جو التوتر ليكي يلا ما تزعلي نفسك عشان ما يحصل ليكي حاجه والموضوع يتأزم اكتر . خوفت من كلامها وقولت ما اتوتر عشان ما اجهض وبالمرة سفيان يطلقني واموت ليهم بقينا قاعدين لمن الدرب خلص وهمس طلعت تجيب ممرضة عشان يفكو لي الدرب وبالفعل جات وفكت لي الدرب وسفيان جا راجع
سفيان: نطلع بعد دا . البنات ساعدوني ومشينا العربية ركبت قدام ونزل لي الكرسي وركبو ورا وسام وصفا اما همس كانت مع عمار وسفيان كان هادئ طول الطريق لمن وصلنا ونزلوني ودخلوني الغرفة يداب ناس البيت عرفو الحصل
امي: احيا انا يا بتي ناوية تموتي
فردوس: امي والله براي تعبانة ما تزودوها علي
امي: كدا ارتاحي النجيب ليكي عصير
فردوس: كويس . ورقدت
فردوس: همس نادي لي سفيان
همس: كويس . ومشت تنادي وجاتني معاهو وبعدها كلهم انسحبو خلوني معاهو
__ دايرة حاجة؟
_ انت قرب بس . وقف مسافة بعدها قرب اشرت ليهو انو يقعد مجرد ما قعد رقدت في رجلو وهو ما مسح على شعري عرفتو زعلان شديد
_ سفيان
__ فردوس انا مشغول بجيكي بعدين . وزح رأسي من رجلو براحة هو ما داير يزعلني عشان الدكتور قال ما اتوتر بس كدا هو بتعبني اكتر ببرودو دا قبل ما يمشي مسكتو من ايدو
_ والله احسن تقتلني عديل من انو تعاملني بالطريقة دي
__ انا من اول يوم زواجنا وريتك بشروطي صح؟
_ صح
__ قولت ليكي ما تكسري لي كلمة وطلوع من دون علمي ممنوع حتى لو الدكان صح ولالا
_ صح
__ يبقى ما عندي كلام تاني اقولو ليكي وبالاخص انتي في الحالة دي
_ يعني كدا خلاص عشان غلطة وحدة قنعت مني
__ انتي شايفاها مجرد غلطة بس انا شايفو عدم احترام وعدم تقدير لي وفوق من دا الدكتور محذرك خليكي مني انا السفيه ما تسمعي كلامي بس على الاقل راعي انو عندك طفل ما ذنبو يعاقب بسبب تمردك دا . كان بتكلم بهدوء وانا قلبي متقطع من جوا بقيت ابكي بس بعدها رفعت رأسي
_ سفيان اخر كلامك شنو . عاين لي وطلع يداب فتحت بيت البكا كويس عدا دقيقه بس وانا ببكي جا راجع الغرفة قعد جنبي في السرير وجراني عليها حضنتو من خصرو وبقيت ابكي بصوت
__ اعمل ليكي شنو بس يا جنة
_ والله معليش يا سفيان
__ ليه متعباني معاكي كدا
_ والله معليش
__ ياااخ راعي لي على الاقل
_ والله معليش
__ ليه ما قادر ازعل منك
_ والله معليش . وانا بشد عليهو اكتر وببكي
__ والله نفسي بس اضربك عشان رأسك يفتح بس ما بقدر
_ اضربني بس عشان قلبك يرتاح
__ لو قلبي برتاح كدا كنت عملتها زمان . زحيت منو ومسحت دموعي
_ اها قلبك برتاح كيف وانا بعملو . جراني تاني عليهو ومسكت فيهو
__ انو تتحملي الفترة دي بس لمن تدخلي الخامس والحمل يثبت لانو انا في الشغل قلبي دايما معاكي ما مرتاح بكون خايف تحت اي لحظة ممكن يضربو لي يقولو لي جنة تعبت
_ تاني ما بتحصل مني تصرف يزعجك
__ بتمنى والله
_ وعد مني ولحدي ما ادخل الخامس ما بتحرك الا للحمام والصلاة
__ اشيلها وعد منك انو ما حتطلعي برا البيت تاني؟
_ ايي وعد
__ تمام
_ ما زعلان؟
__ زعلان لسع بس حيزول مع الوقت
_ بنسيك ليها
__ نتمنى . الباب ضرب زحيت منو
سفيان: اتفضل . جات داخلة امي بالعصير ادتني ليهو
سفيان: انا برا لو احتجتو حاجة . هزيت ليهو رأسي بمعنى تمام وطلع
امي: اشربي وتاني باب البيت ما حتعتبيها
فردوس : تاني توبة والله . شربت العصير ورقدت نومت من التعب......
___________
من جانب همس
بعد رجعنا ودخلنا فردوس غرفتنا جا امر استدعاء لينا من قبل عمار وكان في مظلة البيت الكبير مشينا كان قاعد قعدنا التلاتة في السرير المقابل ليهو منتظرين الحكم
عمار: انتو قصة حياتكم شنو . قومنا ضحكنا حمر لينا
عمار: انا ما بهظر هنا . طوالي سكتنا وخوفنا من نظرتو
عمار: هسي عاجبكم الحصل دا
همس: ابوي والله ما قاصدين لو عارفين انو حيحصل كدا ما كان سوقناها
عمار: عارفينها عيانة ولالا؟ . سكتنا
عمار: انتو لو اجتمعتو مصيبة بعد دا تتفرقو بس همس تشوفي بيتك بوين وانتي يا وسام تسافري لراجلك وانتي يا صفا ما عارف تقعدي لمن نصيبك يجي
صفا: ما قصرت معاي والله . قومنا ضحكنا وحتى عمار ضحك معانا طبعا راجل وسام ود عمها وهو برا السودان كان دايرها من زمان والبيت كلو عارف بس كانت لسع صغيرة شوية وهي لمن عقدو ليها ما كانت عارفة العريس منو وحتى لمن عرفت ما متقبلة بس خلاص بقى راجلها
عمار: لازم تتعاقبو
همس: جاهزين
عمار: لالا حيعاقبكم سفيان
همس: ابوي لا والله البيت كلو يعاقبنا بس سفيان لا
وسام: ايي يا عمار سفيان لا
صفا: انتو لو بتكرهونا ما بتخلو سفيان يعاقبنا
همس: ابوي سفيان لا . فجأة سفيان جا داخل المظلة ووقف عاين لينا طبعا نظرتو عادية بس نحنا بنشوفها مرعبة وحالتنا بقت كأنو كبو فينا موية باردة . عمار قام فوق ورفع اياديهو
عمار: المرة دي انا ما بتدخل ابدا شوف المناسب واعملو . عمار باعنا بالساهل كدا وسفيان بعاين فينا ونحنا خايفين انا قربت ابكي وسفيان رجع عاين لعمار كأنو بقول ليهو ما حتدافع لهمس؟ لانو عمار عاين لي
عمار: ابدا بيها هي ذاتها . عاينت لعمار بصدمة
همس: قول والله . قام ضحك
عمار: سفيان ما حابي اتدخل والله لانو من حقك بس هم حسو بحجم الغلط العملوهو وندمانين
سفيان: لمن همس عملت الحادث انت معاقب فردوس شهور ليه ما قولت هي كانت حاسة بحجم الغلط
عمار: انت قاصد انو انا بدافع لهمس لو ملاحظ انا جمعت قولت هم ندمانين وفي اول كلامي قولت ليك انا ما بتدخل ابدا وابدأ بيها لو عاوز لانو من حقك لو شايف اني ظالم . وقام رجع ورا
سفيان: يعني ما حتتدخل؟
عمار: صح ما قاعد اسمح لزول يحاسب همس لاني بحاسبها بنفسي لمن تكون الغلطة فردية بس كلهم واحد في اللحظة دي بالنسبة لي بس فردوس انا عاقبتها المرة الفاتت لاني انا امنتها على همس وخزلتني وكان ممكن تكون وسام في محلها كانت حتلقى نفس المعاملة
سفيان: بس هنا بتفرق لانها مرتك حاليا
عمار: ووسام كمان مرت راجل لو اتدخلت ظلم للباقيات بس في النهاية كلهم بنات عمك مهما كان عاقبتهم انا ما بتدخل والله . سامعين نقاشهم دا كلو ونحنا منتظرين محاكمتنا وعرفت انو عمار ما حيتدخل ويدافع لي ابدا ولو حصل كان حيكون ظلم للباقيات وانا ما بسمح بكدا بعد خلصو كلامهم سفيان رجع عاين لينا يداب خوفنا
سفيان: انا ما بسألكم لاني عارف انو فردوس عنيدة واكيد اصرت عليكم بس رجاءا تاني ما تتطلعوها معاكم مهما كان الامر
همس: كانت غلطة وما بتتكرر ابدا والله بنوعدك
وسام: بنوعدك والله
صفا: وعد ان شاءلله
سفيان: هسي هي محتاجاكم جنبها فرقو ليها وابعدوها من التوتر و اي حاجة محتاجاها كلموني تمام
همس: تمام . وقام طلع ما اتوقعنا الموضوع دا يمر بالساهل كدا وبهدوء بس سفيان كان حكيم في الموقف دا ووسام وصفا طلعو فضلنا انا وعمار بس جا قعد جنبي
__ عارف انو زعلتي لمن قولت ابدأ بيها
_ ما زعلت والله بس خلعتني لكن تصرفك صح في الموقف دا وكبرت في نظري بس كيف تقول ليهو ابدأ بيها انت عارف الببدو بيهو العقاب بجيهو حار . قام ضحك
__ ما كان عارف
_ يرضيك اتألم؟
__ ما برضيني والله وقلبي بقول لي اوع تخلي سفيان يجوط فيها ساي بس عقلي كان سيد الموقف
_ عقلك دا شاميني شكلو . ضحكنا
__ والله كلي على بعضي بنحبك
_ وانا بحبكم كلكم . وضحكنا
__ اسمعي حددنا العرس بعد شهر
_ الف مبروك ربنا يتم ليك على خير
__ امين يارب بس يتم لينا
_ بري شكلو دا حقك براك
__ كيف
_بتحدد على كيفك ولا شنو
__ ياهو بكلمك
_ ما قصرت والله بس لو ناسي بذكرك ياما جريت بوراي كتير . ضحكنا لانو خليت الكلام وتميت الغنية
_ معليش اتحمست مع الغنية يااخ لو ناسي بذكرك انو انا العروس
__ معليش نسيت يااخ تعيشي وتذكريني
_ عمار طلقني
__ كويس ما عندك اي مشكله م هو انا لقيتك بالساهل طبعا . هنا فصلت
_ عشان كلامك السمح دا كويس خلاص موافقة على الشهر يا سيد الناس . قام ضحك ومسك لي وشي
__ همس قومي من هنا عشان ما اتهور . ضحكت وقومت طلعت....