رواية اللون السابع للحب الفصل الخامس 5 والسادس 6 بقلم شذى عبد المكرم
الدنيا كلها عارفة همس هي شنو بالنسبة لعمار عشان كدا ماف زول بتدخل بحاجة بتخصها حتى امها لو عمار قال كلمة يبقى الموضوع انتهى همس كانت بتو واختو وصديقتو وحبيبتو وبلوتو وكل حاجه لعمار هو المربيها وبعرفها اكتر من نفسها عشان كدا كان رافض انها تمشي معاهم الجناين لانو ماف زول حينتبه ليها لانها ما بتركز وهنا هو ما قاصد انو البنات ما مسوؤلات بس هو ما بثق في زول لحمايتها لانو ممكن ينشغلو عنها بس هو دايما نظرو عليها
بس البنات كسرو كلمتو وهو مستغرب انو ليه همس كسرت كلمتو مع انو اول مرة تحصل وكان نتيجة عدم سماعها لكلمتو الحادث
لمن رجع عمار البيت ما كان عارف لانو الكل كان خايف لردة فعلو دخل البيت مع سفيان لقى البنات ببكو قلبو اكلو سألهم ماف وحدة ردت عاين ليهم همس ما كانت معاهم الشك دخل قلبو ولمن قالو ليهو همس في المستشفى ضربتها عربية الدم وقف في جسمي وقام جاري حتى ما سأل من اسم المستشفى لو ما سفيان وقفو كان حيمشي محل هو ذاتو ما عارف لانو ما مركز كان عاوز يبكي بس ماسك روحو وبستغفر طول الطريق لمن وصلو ما استناهم ودخل قالو ليه همس جوا العمليات كان بهرج الدكتور طلع قال ليهم مريضتكم دخلت في غيبوبة . الجملة كانت بالنسبة ليهو ذي الخنجر في ضهرو بحاول يستوعبها والكل كان جاري على فردوس المجرد ما سمعت الجملة اغمى عليها دخل فيهو برد ما كان قادر يقيف وسامع صوت بكاء امها لهمس التقول قالو ليها بتك ماتت هي اصلا فاضل ليها شنو من الموت الفاصل بينها وبين الموت روحها بس
قعد في اقرب كرسي لانو حسا انو ضهرو انكسر وقام يبكي بحرقة جاهو ابوهو وختا يدو في كتفو
ابوه: استغفر يا ولد وخليك قوي
عمار: اكون قوي كيف وبتي ما فاضل ليها حاجه من الموت
ابوه: بس ما ماتت
عمار: والله حاسي ضهري انكسر
ابوه: دي امتحانات من ربنا استغفر وخليك قوي
عمار: ما قادر والله
ابوه: البكي ما بفيدها بشي الا ندعي ليها بس
عمار: حتقوم منها ان شاء الله
ابوه: همس قوية
عمار: والله ما قوية يا ابوي همس ما بتتحمل . رجع بكى
ابوه: انا متأكد انها حتتخطى المرحلة دي
عمار: ان شاء الله . التفت شاف عمتو ام همس عمتو سلوى بتصبر فيها مشى عليها وقعد تحت قامت حضنتو وقامت تبكي زيادة
ام همس: عمار همس دايرة تمشي تخلينا
عمار: همس ما بتمشي تخلينا
ام همس: وااااي انا من وحيدتي
عمار: عمتي ما تبكي همس حتكون كويسة متأكد انا . بحاول يكون صابر عشان ما يبكي قدامها فكتو
ام همس: بتك وضهرك يا عمار . هنا ما اتحمل ختا ايدو في وشو وبكى تاني ضمتو عليها وبكت معاهو
عمار: عمتي ليه سمحتي ليها تطلع معاهم
ام همس: والله هي أصرت تمشي وحنستني قولت ليها عمار ما راضي قالت لي برجع قبل ما هو يرجع من الشغل وتاني ما رجعت . وقامت تبكي زيادة كلامها هز حاجة جواهو وكسر جواهو حاجات
عمتو سلوى: خلاص يا مها ما تبكي حتكون كويسة وانت يا عمار اصبر دا امتحان من ربنا حنتجاوزو ان شاء الله انتو ما مؤمنين؟ . مسح دموعو وقام فوق واخد نفس
عمار: نعم بالله
اليوم كلو قاعد بعيد من الناس وسرحان وبحس كأنو همس هسي حتجي تقول ليهو عمورة وهو سرحان يقول ليها همممم تقول ليهو مالك سرحان بس ما حصل جاهو سفيان
سفيان: عمار قول وراح نصلي المغرب وندعي ليها . ما رد ليهو نهائي بس قام معاهو اتوضو وصلو وبقى يدعي ليها وهو بقول ما تمتحني فيها يا الله لمن دمعتو نزلت سفيان ختا ايدو في ضهرو
سفيان: حتكون كويسة متأكد انا . هز رأسو بس وسفيان كان بفكر في فردوس القبيل وقعت لانو ما اتحملت وهي اصلا كانت مهبطة بفكر لو اكلت حاجه ولالا بس ما قادر يسأل منها لانو همس اهم بس عقلو كان مع همس وقلبو مع فردوس........
____________
من جانب فردوس
خبر انو همس دخلت في غيبوبة ما قدرت اتحملو ووقعت في سفيان الكان ماسكني وتاني ما وعيت صحيت لقيت انو مركبين لي درب يداب اتذكرت همس قومت ابكي الا امي مسكتني
امي: خلاص يا جنة
فردوس: امي همس في غيبوبة جد؟ عليك الله قولي لي انو الدكتور كذاب
امي: ادعو ليها بس . بكيت بحرقة واتذكرت عمار وحالتو حتكون كيف وهو اكيد ما حيسامحني وبراي خاتة اللوم على نفسي بقيت ابكي بس امي جابت لي موية رفضت عديل
امي: انتي مهبطة اشربي
فردوس: امي ما دايرة
امي: انادي ليكي سفيان؟ والله بناديهو . وهي عارفه انو سفيان نقطة ضعفي طوالي شربت شوية بس وبقيت راقدة ببكي بس براحة بدون صوت يوم بدايتو كانت جميلة بس نهايتو مأساوية بقيت افكر يعني همس حتطلع منها ولالا
بالليل ابوي رجعني البيت ما عارفة نومت كيف وجو البيت دا متوتر ماف زول بتكلم مع التاني والبيت كلو زعلان مننا نحنا البنات بسبب الحصل دا
اليوم التاني زمن الفطور جهزنا حاجات الفطور لناس المستشفى وكان دايرة امشي بس ابوي قال ماف بت تطلع من البيت وانو سفيان حيجي يشيل الفطور طلعت من المطبخ كدا اتقابلت مع عمار كان ماشي سريع ناديتو وقف كنت ماشة عليهو عشان اسألو من حالو ومن حال همس بس وقفني
عمار: اياكي تقربي فاهمة . وقفت مكاني
عمار: ولسانك ما يخاطب لساني والحصل كلو بسببك دايرة تسألي منها صح؟ همس قتلتيها انتي دي بس يا ريت ما تخليني المحك عشان المرة الجاية ما عارف حأعمل ليكي شنو . ومشى خلاني بس شال روحي معاهو بسبب كلامو دا قومت جارية وانا ببكي ما قدرت اتحمل لبست توبي ودايرة اطلع من البيت بس امشي وين طالعة كدا اتقابلت مع سفيان في الباب وانا ببكي
سفيان: ماشة وين
فردوس: ما عارفة خليني . جيت اطلع ثبتني
سفيان: قولت ليك ماشة وين ما تعصبيني اقوم اضربك هنا
فردوس: هي فضل فيها شنو واحد بضربني بالكلام وواحد بأيدو نفس الشي . لزيتو دايرة اطلع رجعني ورا وضربني كف قومت ابكي بصوت
سفيان: خلي جنونك دا وادخلي جوا سريع والله اسمع انك طلعتي برا البيت اقتلك فاهمة . صرخ فيني كرهتو شديد في اللحظة ديك
فردوس: سفيان على قدر كرهك لي دا خليني اطلع وبعدها اقتلني والله رضيانة . عاين لي مستغرب قال البت دي جنت عديل كدا
سفيان: فردوس دا ما وقت جنونك عليك الله يااخ نلقاها من همس الراقدة ما عارفينها ميتة ولا حية ولا نلقاها منك انتي ما تبقي علي اتنين . شوفت انو البيت كلو الفيهو مكفيهو ما ابقى عليهم اتنين طوالي رجعت الغرفة وتميت البكي حقي هناك
مر اسبوع على دخول همس في غيبوبة وانا نفسيتي مدمرة نهائي ما بأكل ولا بتكلم مع زول الا امي بسألها من همس بتقول ماف تطورات وما عاوزين يخلوني امشي المستشفى اشوفها ابدا وعمار رحل في المستشفى عديل بجي بستحمى بس وبرجع ما بتكلم مع زول بقى جسد من دون روح لانو روحو همس وهي ما معاهو اكتر اتنين اتأثرنا لانو انا حاسة بالذنب وفوق دا عمار محملني المسؤولية كاملة ودا المخلي روحي تعبانة
جا سفيان يشيل الغدا وقفتو
__ سفيان . عاين لي كدا احتار في شكلي الاتغير في غضون اسبوع بس
_ نعم
__ دايرة امشي معاك المستشفى عليك الله وافق والله ما بعارضك في حاجه تانية بس دايرة اشوفها . بقيت ابكي
_ لالا ما ممكن خليكي قاعده
__ الله يرضى عليك الله والله بشوفها بس وبرجع ما يبقى قلبك قاسي كدا عارفة انك بتكرهني بس خت الكره جنب والله خمسة دقايق بس . غمض عيونو شديد
_البسي عبايتك سريع ماف زمن
__ أمشي معاك؟
_ خلي الكلام وامشي . ما صدقت فرحت شديد وجريت لبست عبايتي
صفا: ماشة وين
فردوس: ماشة المستشفى مع سفيان
صفا: وافق ليكي؟
فردوس: ايي
صفا: طمنينا معاكي
فردوس: كويس . طلعت سريع عشان سفيان ما يعصب ورجعنا عربيتو فجاة بدون مقدمات قال لي
_ القال ليكي انا بكرهك منو . يداب اتذكرت كلامي قولت ليه يا فردوس انتي يوم بسبب لسانك دا حيقتلوكي خوفت ارد ليهو هو سكت ما اتكلم معاي تاني لمن وصلنا عمار ما رفع عينو شافني ساي ولا انا قدرت اعاين ليهو بسبب كلامو اخر مرة بقيت قاعدة مع عماتي بس وساكتة
عمتو سلوى: حالتك دي ما عاجباني
فردوس: انا كويسة
عمتو سلوى: هسي بنعرف . قامت نادت سفيان
سفيان: نعم
عمتو سلوى: ودي فردوس دي تفحص
فردوس: والله انا كويسة
سفيان: قومي
فردوس: عمتو والله انا كويسة ماف داعي
عمتو سلوى: يا بت قومي . لزتني قومت فوق و رو جيت واقعة مغمية علي لمن فتحت كالعادة درب
عمتو سلوى: بتقولي انك كويسة . سكتا
عمتو سلوى: حيااا انا يا بناتي والله دي عين الا اجيب شيخ يقرأ ليكم كلكم
امي: مالك ما بتأكلي دايرة تخوفي الناس عليكي هسي خجلتيني جسمك ما فيهو ولا فيتامين ولا سكر ولا دم دايرة تموتي يعني؟ . سكتا وغمضت عيوني بس
امي: هاكي . فتحت لقيت سفيان واقف وامي ادتني عصير شكلو من بوفيه من شكلو معناهو هو الجابو
عمتو سلوى: تعبتي الولد معاكي كل مرة تقعي وهو شيل فيكي . خجلت من كلامها معناهو المرتين الوقعت فيهم سفيان هو الشالني هو طوالي طلع لمن الدرب خلص تاني ركبو لي واحد ابوي جاني
ابوي: ترجعي البيت بعد دا؟ . ما كنت ناوية ارجع
فردوس: ما قادرة وعندي درب تاني بالليل
ابوي: خلاص بيتي هنا انا برجع الباقيين
فردوس: القاعد منو
ابوي: عمار وسفيان وعمتك مها
فردوس: كان تسوق عمتي مها تنوم في البيت وترجع الصباح لانك تعبانة مبالغة
ابوي: كلمناها بس رافضة
فردوس: حاولو تاني معاها
ابوي: كويس وانتي دايرة حاجه بكرة نجيبها ليكي معانا
فردوس: قول لصفا تستف ليك غيار بس
ابوي: سفيان هسي حيجي يوديكي غرفتكم الخاصة
فردوس: كويس . جاتني امي ودعتني ومشت وعمتي رفضت المشية جا سفيان
سفيان: بتقدري تمشي ولا يجيبو ليكي كرسي متحرك
فردوس: بقدر . قعدت في السرير هو مدا لي ايدو عشان يقومني وبالفعل ساعدني وصلني الغرفة ورقدت والسرير التاني كان عمتي نايمة فيها بالليل الممرضة جات ركبت لي الدرب تاني وسفيان جاب لي عصير ما عرفت من وين والدنيا ليل كدا ما سألتو شربت ورجعت نومت
___________
من جانب سفيان
لمن عرف مع عمار بالحادث مشى لحقو لانو عارف انو متهور وقفتو فردوس وقالت انو ماشة معاهم رفض لانو شايف انها خايفة بس لمن مسكت ايدو واترجتو ضعف قدامها ووافق ولمن كانو في العربية وعمار سمعها كلام قاسي وبكت بصوت كان عاوز يشاكل عمار انو هي ما ذنبها ودا قضاء وقدر لانو ما قادر يتحمل دموعها بس ما بقدر يلوم عمار لانو دي همس ما اي زول ووصلو اول حاجه عاين ليها ما نزلت خاف مشى عليها قالت عندها هبوط طبعا خوفو كلو بكون على شكل غضب عليها مسكها ودخلو بس من سمعت الخبر اغمى عليها وهو هنا خاف شديد شالها وداها الاسعاف وكان متقلق شديد لمن صحت ورجعوها البيت ما عارف كيف يوصل ليها وكيف بقت واليوم التاني ماشي يشيل حاجات لناس البيت اتقابل معاها في الباب وكانت ما على طبيعتها اتناقش معاها وضربها كف ندم انو مدا ايدو عليها بس كان لازم عشان ترجع لعقلها شكلها استوعبت ورجعت كان بمشي بشيل الغدا عشان يشوفها ويلمحها بس ما حصل لمحها الا بعد اسبوع لمن رجع يشيل الغدا اتلاقى معاها في الحوش فرح شديد بس ما بين ولمن ركز شكلها كان يحنن الواحد زعل عليها ومن الحالة الوصلت ليها كان ناوي يحضنها ويقول ليها ما تعملي في روحك كدا بس قالت ماشة معاهو رفض في الاول لانو واضح انها تعبانة بس قالت ليهو انو هو بكرهها ودي المرة التالتة تقولها ليهو وهي ما عارفة انو هو بحبها حب مبالغة بس ما بقدر يعبر لانو ما حاول ولا حيحاول وفكل مرة بتقول ليهو الجملة دي بسكت بس بتألم من جواهو لمن سألها لمن كانو في العربية بس ما جاوبت ولمن قامت معاهو عشان تفحص اغمى عليها للمرة التانية وقلبو طار في اللحظة ديك وتاني شالها وجرا بيها ولمن الدكتور كلمهم بحالتها وانها عاوزة توصل لمرحلة الاكتئاب خاف شديد وبالليل كان كل خمسة دقايق يجي يعاين ليها نايمة ويرجع لعمار السرحان الوقت كلو لمن جا زمن الدرب حقها نادى الممرضة ادتها وجاب ليها عصير ورجعت نامت بس هو ما نام ولا عينو شافت النوم نهائي .......
6
اليوم التاني صحيت متأخرة لقيت عمتي صاحية وبتسبح
فردوس: عمتي صباح الخير
عمتو مها: صباح النور كيف اصبحتي
فردوس: احسن الحمدلله
عمتو مها: هاكي سفيان جابو ليكي . قومت شيلت الكيس كان فيهو صابون وفرشاة ومعجون وبسكويت بالجد كنت محتاجاهم غسلت وشي وصليت وقعدت مع عمتي في الغرفة لمن زمن الفطور امي جات مع الفطور بعد فطرنا
امي: ارجعي البيت بعد دا عشان ترتاحي
فردوس: ما دايرة ارجع يا امي
امي: جنة ما تعاندي ياااخ خلي ابوكي او سفيان يرجعك
فردوس: ما راجعة ياااخ
امي: يا بت انتي عيانة وهنا اي زول الفيهو مكفيهو في البيت في صفا ووسام حيراعوكي
فردوس: امي انا ما ماشة البيت
امي: والله ماف زول بقدر ليكي غير سفيان خلي يجي يتفاهم معاكي . وطلعت يلا خوفت لاني بخاف منو وما قدر اعارضو جات راجعة معاهو
امي: ياااخ جنة دي عنيدة قولت ليها ترجع البيت عشان ترتاح بس ابت وماف زول بقدر ليها غيرك . عاين لي هزيت ليهو رأسي بمعنى عليك الله لالا ما دايرة امشي وقربت ابكي
سفيان: خليها مدام ما دايرة ترجع بس ما اشوفك حايمة برا الغرفة دي فاهمة . هزيت رأسي سريع
فردوس: ما بطلع والله . وقام طلع ما صدقت طبعا فرحت شديد قولت سفيان دا اتغير ولا انا بتخيل لي بس كونو ما جبرني على حاجه ما عاوزاها كان عندي ليها بالدنيا
امي: خلاص ارقدي . طوالي رقدت ونومت شوية وصحوني علشان الادوية كنت دايرة امشي ICU " الانعاش " عشان اشوف همس بس خايفة من سفيان يلقاني برا يرجعني البيت بالمرة خمسة دقايق جا هو ذاتو داخل الغرفة
سفيان: قومي ورح . استغربت طبعا
فردوس: وين
سفيان: تشوفي همس . فتحت عيوني بخلعة وفرحة
فردوس: احلف؟ . اداني تحميرة خفيفة كدا واداني ضهرو طالع لبست شبشبي سريع ولحقتو
_ عرفت كيف انو دايرة اشوف همس . ما رد لي
_ سفيان ليه بتتجاهلني كدا . فجأة وقف والتفت لي كنت وراهو فدخلت فيهو اتخلعت الا رجعت ورا خطوة
_ اسفة
__ فردوس
_ والله اسفة تاني ما بفتح خشمي . وبعدها سكتا بالمرة لمن وصلنا الانعاش وشوفت جسمها الموصل بأجهزة كلو وسفيان مشى للدكتور واتكلم معاهو انو يدخلني وبالفعل مشيت غرفة التعقيم واتعقمت ودخلت دمعتي نزلت قربت منها وبقيت اتكلم بقولو المريض لمن يكون في غيبوبة بسمع الكلام الحوليني بس عقلو رافض انو يستجيب
فردوس: همس ما كفاية خلاص قطعتي قلوبنا عليكي والله تعبانين بدونك لو ما عشانا تعالي راجعة عشان عمار ما شوفتي حالتو بقت كيف بدونك ابدا ما عمار البنعرفو ومحملني الذنب انو انا السبب في الانتي فيهو عارفة اني غلطانة وندمانة انو ما سمعت كلامو بس والله ما كنت عارفة انو حيحصل ليكي كدا تعالي فهمي اني ما قاصدة والله لانو في عيني ما قاعد يعاين لي انا اشتقت ليكي تعال عشان اشكي ليكي من سفيان ومعاملتو لي وقدر شنو انا بكرهو تعالي نواسي بعض ما ترقدي كدا كفاية نوم نومتي كتير ياااخ . وبقيت ابكي ما اتحملت وطلعت برا وقفت جنب الباب وبكيت جاني سفيان
__ ما تبكي خلاص
_ سفيان هي هنا بسببي
__ كيف يعني
_ عمار قال لي وامني عليها انو ما اسوقها وانا وعدتو بس خلفت الوعد
__اااخ منك يا فردوس ليه دايما عنيدة كدا
_ والله ما كنت عارفة انو حيحصل كدا
__ عارف والله عارف بس عمار حاليا زعلان بسبب الحصل بس خليها تعدي المرحلة دي وهو حيسامحك
_ متأكد؟
__ والله متأكد هو حاليا ما شايف ولا عارف حاجه لانو دي همس ونحنا كلنا عارفين يعني شنو همس بالنسبة لعمار بس تطلع منها كل الامور حترجع لطبيعتها . هزيت رأسي واخيرا اطمنت من زمان عاوزة لي زول يطمني بالطريقة دي بس ما لقيت بس سفيان رغم كل الحصل كان الامان بالنسبة لي هديت ومسحت دموعي ومشيت معاهو رجعني الغرفة
المغرب كدا سامعة جوطة برا طلعنا انا وعمتي سريع لقينا عمار بقول حركت ايدها حركت ايدها قومنا نبكي بفرحة جا الدكتور علينا
الدكتور: دا كان انزار خاطئ
عمار: كيف يعني خاطئ والممرضة قالت انو حركت ايدها
الدكتور: عادي بتحصل بس ماف اي تغير في المؤشرات الحيوية
عمار: ما ممكن يحصل كدا . وقام يجوط وسفيان مسكو جات الممرضة جارية
الممرضة: دكتور المريضة ما بتتنفس . الدكتور قام جاري ونحنا جرينا وراهو دخل الانعاش ونحنا برا وعمار يلا يلا واقف
سفيان: عمار اقعد تحت
عمار: ما بقدر . بقى ماشي وجاي وهو متوتر وبمسح في وشو ربع ساعه الدكتور جا طالع لينا جرينا عليهو وشو ما كان بتفسر عرفنا انو خبر ما كويس
الدكتور: خليكم مؤمنين بالله ماتت سريريا . انا ما اتحملت وقعت بس ما اغمى علي . رجولي بس ما شالوني وكلهم قامو يبكو حتى اعمامي وعمار لسع ما استوعب
عمار: كيف كيف كيف يعني ماتت سريريا وهسي حركت ايدها
الدكتور: دا الحصل للاسف ربنا يصبركم . ومشى خلانا عمار بقى واقف بس ونحنا بنبكي بصوت كلنا قام طلع من المحل النحنا فيهو تبعو سفيان وانا بقيت قاعدة في محلي وببكي بحرقة يعني كدا خلاص همس ماتت عارفة انو ماتت سريريا بس بمعنى قلبها بس بنبض بس تاني ما حتقوم منها........
__________
من جانب عمار
ما عارف كيف العشرة ايام دي مرت عليهو حسا كأنها قرن عديل بس كان متأمل في ربنا انو ما حيخزلو ما كان واعي للحولو نهائي تفكيرو كلو معاها بس لمن جات الممرضة جارية وقالت انو المريضة حركت ايدها حسا بفرحة كأنو روحو ردت ليهو بس الدكتور قتل الامل الجواهو دا لمن قال انذار خاطئ واثناء ما هو بهرج جات الممرضة قالت المريضة ما بتتنفس في اللحظة ديك هو الما كان قادر يتنفس وجا الخبر الاعظم انو المريضة ماتت سريريا حسا انو ضهرو انكسر وقلبو اتشقى نصين قام طلع وهو بقول ماتت ماتت ماتت سفيان لحقو ومسكو
سفيان: عمار ماشي وين؟
عمار: ماتت ماتت
سفيان: عمار
عمار: ماتت . طوالي سفيان ضربو كف عشان يستعدل وقام يبكي بحرقة سفيان حضنو عليهو وعمار يبكي بكل صوتو
عمار: مشت يا سفيان مشت خلتني بتي ماتت يا سفيان . ولي اول مرة من حادثة همس سفيان يبكي منظر عمار خلى اي زول ماري يشوفو يبكي معاهو وسفيان حاسي بألمو لانو فردوس بس اغمى عليها بين ايدو خاف فما بال انو همس ماتت سريريا يعني خلاص وسفيان ما لاقي كلمة يصبر بيها عمار جا عمر اخو عمار مسكو مع سفيان وقعدوهو في اخر بينشات المستشفى
عمر: عمار البتعمل فيهو دا ما صح . وهو كان في عالم تاني ما سامع حاجه ولا فاهم حاجه
عدا تلاتة ايام وهمس في الانعاش ذي ما كانت لمن الدكتور استعدى اولياء امورها ومشو ليهو
الدكتور: يا جماعة البتعملو فيهو دا ما صح كدا بتعزبوها . عمار كأنو فهم بس عمل فيها غبي
عمار: المعنى؟
الدكتور: المريضة اجهزتها ما شغالة وكدا ضياع للوقت لازم يفكو ليها الاجهزة دي راحة ليها وليكم
عمار: قصدك نقتلها يعني
الدكتور: هي اصلا ميتة سريريا
عمار: مستحيل همس ما ماتت لسع قلبها بنبص ومدام لسع بنبص لسع في امل وانا واثق في ربنا ما تفكر في حاجه ذي دي حتقعد كدا لمن ربنا يستلم اماناتو بعدها ما حيكون عندي اعتراض ولو على تكاليف المستشفى على ما افترض قاعدين ندفع . وقام طلع خلاهم وابوهو واعمامو كانو مع الدكتور والدكتور فهمهم الوضع وانو لازم يفهمو عمار
لمن جو لعمار رفض انو يسمع ليهم
عمار: انتو كيف تقبلو بحاجة ذي دي
ابوهو: همس حاليا متعذبة بالاجهزة دي خليها ترتاح يا عمار
عمار: يعني انا ما مريحها ابوي هو الله ما قتلها ليه نحنا نقتلها ماف زول يفتح معاي الموضوع دا تاني وانا لو تطلب الامر بسفرها برا السودان دا. . وطلع خلاهم عرفو انو مستحيل يقبل بحاجة ذي دي استسلمو وقالو ينتظرو بس و الله كاتبو بحصل
عمار رجع للدكتور تاني
عمار: دكتور ماف حل نهائي؟
الدكتور: لو في انا ما بقصر والله
عمار: ما ممكن تعرض حالتها لدكتور برا السودان هناك الطب متطور ممكن يلقو حل
الدكتور: والله ما عارف اقول ليك شنو
عمار: عليك الله حاول اي دكتور بتعرفو رسل ليهو التقارير ان شاءالله في امريكا
الدكتور: كويس
عمار: تسلم يا دكتور . طلع منو وهو متأكد انو ربنا كريم بعبادو وعارف قدر شنو هو حاليا متألم وناس البيت ماف زول فتح ليهو الموضوع ابدا لمن عدا اسبوع وهو يومي مع الدكتور بفتشو في دكاترة لحالة همس لمن الدكتور كلمو انو يجيهو قام سريع مشى ليهو وهو متأمل
عمار: اها يا دكتور في تطورات؟
الدكتور: رسلت لكم دكتور اجنبي بس رفضو واخر واحد يااهو في سويسرا
عمار: اها وقال شنو
الدكتور: رسلت ليهو التقارير كلها حيدرس الحالة وبرد خلال الاسبوع
عمار: تمام تسلم ما قصرت
رجع البيت كلم ناس البيت كلهم وبالفعل اسبوع والدكتور رد ليهو وقال انو الدكتور السويسري ادى الموافقة انو يستلم الحالة بس لازم يجي يوريهم بالتفاصيل والاجراءات
مشى مع عمو خليفة وسفيان عشان يعرف كلام الدكتور
الدكتور: انا حأنقلكم لدكتور في سويسرا
عمار: تمام
الدكتور: بس اي حاجة ممكن تحصل لانو حالتها كلكم عارفينها بس انتو مصرين
عمار: بتحمل النتائج كلها
الدكتور: تمام في اجراءات لازم تعملها ولازم تكونو جاهزين ماديا
عمار: حنجهز ان شاء الله
الدكتور: حيكون معاها مرافق واحد بس حسب الاجراءات يعني تقررو منو حيمشي معاها وتديني التفاصيل كلها عشان ارسل اوراق للمستشفى هناك وللمطار ذي ما عارفين
عمار: شكرا دكتور ما قصرت معانا
الدكتور: دا واجبي وبتمنى تجيب نتيجة
عمار: ان شاء الله
رجعو البيت واجتمعو كلهم في البيت عشان يعرفو الحيحصل بالضبط شنو
عمو خليفة: الدكتور قال لازم يرافقها مرافق واحد بس
ام همس: انا بمشي مع بتي
عمو خليفة: مها ما بتقدري انتي ومع الاجراءات والجرجرة ما ممكن
عمو محمد: بسافر معاها انا ........