رواية اللون السابع للحب الفصل السابع 7 والثامن 8 بقلم شذى عبد المكرم
رجعو البيت واجتمعو كلهم في البيت عشان يعرفو الحيحصل بالضبط شنو في موضوع همس
عمو خليفة: الدكتور قال لازم يرافقها مرافق واحد بس
ام همس: انا بمشي مع بتي
عمو: خليفة: مها ما بتقدري انتي ومع الاجراءات والجرجرة ما ممكن
محمد: بسافر معاها انا
سلوى: بس براك ما صعبة ليك؟
محمد: لازم زول واحد بقدر ليها ان شاء الله ومعاي الدكاترة
خليفة: خلاص تمام . وعمار كان ساكت لمن خلصو
محمد: اها يا عمار المطلوب مني شنو
عمار: ابوي ماف زول حيمشي مع همس غيري
محمد: ماف كلام ذي دا
عمار: كيف ماف كلام ذي دا البمنعني شنو
محمد: انت ما من محارمها ما ممكن
مصطفى: ابوك معاهو حق يا عمار
عمار: والله انا ماف حاجة بتهمني بس همس ما بخليها براها
محمد: كيف حتكون براها انا معاها
عمار: ابوي افهمني
محمد: عارفين انك خايف عليها بس كلنا خايفين عليها ذيك ودي بت المرحوم يعني غالية علينا
مصطفى: مستحيل نفرط فيها
عمار: والله فاهم وعارف بس لا انا البمشي
ابوهو: انت يا ولد اهبل بقول ليك انت ما محرم يعني لو محتاجة رفع ولا محتاجة غيار اها البحصل شنو
عمار: قول لي بس كيف ابقى من محارمها ويكون لي الحق
مصطفى: دا في حالة كنت زوجها بس
عمار: بعقد عليها هسي
محمد: عمار انت جنيت صح؟ . مسح وشو بأياديهو
عمار: يااااا الله
خليفة: عمار كدا استهدى بالله
عمار: موش انتو اعمامها يعني وكلائها وانت يا ابوي وكيلي ونعقد بس وبسافر معاها
محمد: انت مجنون البت في غيبوبة تعقد عليها كيف
عمار: عادي يعني ممكن عمها يعقد ليها بدون اذنها واصلا ما ظنيت همس ترفض
محمد: عمار اطلع برا
عمار: ابوي اسمعني
محمد: قولت ليك اطلع برا . قام وطلع برا بعد ما كهرب الجو وسفيان وعمر تبعوهو وقعدو تحت الشجرة
عمار: ليه ما دايرين يفهموني
عمر: المواضيع ما بتمشي كدا يا عمار
عمار: اها بتمشي كيف
عمر: افترض لو صحت اها تفسر ليها الموضوع كيف
عمار: ما بهمني اهم حاجه عندي صحتها بس اها اتخيل لو صحت ولقتني ما جنبها اقول ليها شنو بس
سفيان: كلام عمر منطق يا عمار
عمار: انا ما بهمني المنطق وعادي لو ما اتقبلت الموضوع بطلقها بس تبقى كويسة لكن يمين بالله ماف زول حيسافر معاها غيري وافضل انو يفهمو سريع ونعقد عشان ماف زمن
وقام طلع بعربيتو ومشى وداها معرض السيارات عشان يفكها لانو محتاج مصاريف كتيرة شديد وشاف رصيدو البنكي وبعدها رجع ومشى لابوهو
عمار: ابوي انا لو قعدت الهم بقتلني والله شايف بعينك حالتي كيف وانا جنبها فما بالك اخليها تسافر بعيد وما اشوفها اتخيل ماتت بدون ما اودعها والله ما حأتحمل بتمنى انك تفهمني
محمد: فاهم احساسك يا ولدي
عمار: خلاص البمنع شنو والله مجرد ما تتعالج دا لو ربنا أراد طوالي بطلقها لو هي ما اتقبلت الفكرة بس اهم حاجه صحتها عليك الله افهمني وفهم اعمامي ديل
محمد: كدا بكرة نشوف الموضوع دا
عمار: تمام انا راجع المستشفى
محمد: الليلة بيت هنا في البيت
عمار: همس براها هناك . ابوهو حنا على حالتو وفكر بالجد انو عمار هو اللازم يمشي معاها بعد تعبو دا كلو مع انها في غيبوبة بس لا ما بات يوم في البيت ساي
عمار: عرضت عربيتي للبيع عشان تكاليف العلاج
محمد: كلنا حندعمك
عمار: عارف والله بس التكاليف كتيرة كدا بتكفيني بس احتمال احتاج اكتر فشنو بخلي ليك اوراق الارض الكان اشتريتو لو احتجت قروش تفكو وترسل لي
محمد: يعني مصر انك تسافر معاها
عمار: بشدة كمان يلا مع السلامة . وطلع رجع المستشفى ومشى للدكتور وكلمو بالحصل والدكتور اكد ليهو لازم يتسرع في الداير يعملو لمصلحتها
ابوهو اليوم التاني اجتمع مع اخوانو بخصوص سفرة عمار مع همس واتناقشو كتير بس في النهاية وصلو لحل وسط وعمار الزمن داك كان في المستشفى قبل اذان الضهر بساعة اتصلو ليهو
محمد: عمار تعال راجع
عمار: في شنو
محمد: تعال عشان تسمع قرارنا
عمار: تمام . ورجع البيت وهو بدعي انو يوافقو
عمار: نعم يا ابوي
محمد: صلاة الضهر حنعقد ليك على همس ان شاء الله . اتمنى اللحظة دي كانت تكون وهمس صاحية وراضية بس دا القدر ودي لعبتو هز رأسو بس وطلع المستندات ولمن الضهر اذن طلعو على الجامع وصلو وبعدها كلمو المؤذون عشان يعقد ليهم ابوهو كان وكيلو ومصطفى كان وكيل همس وتم العقد وعمار دا بكى بكي
محمد: بتقوم ان شاء الله
عمار: ان شاء الله . جاهو سفيان ربت على ضهرو
سفيان: متأكد انو لو كانت همس صاحية كانت فرحت شديد . عمار هز رأسو بس وطلعو رجعو البيت كلمو ناس البيت ما كان في فرحة ذي فرحة العقد المعروفة بسبب الوضع الحالي
سلوى: ربنا يقومها ليك بالسلامة يارب
عمار: ان شاء الله يا رب تسلمي عمتي
ام همس: كدا انت المسؤول من بتي رسمي وقانوني؟
عمار: والله بشيلها في عيوني
ام همس: متأكدة انا والله وبتي لو رجعت متأكدة عشانك انت بس
عمار: حترجع عشانا كلنا ان شاء الله
ام همس: ان شاء الله
مشى استلم قروش العربية واعمامو واولاد اعمامو كلهم دعموهو ماليا ووثق القسيمة ورسل اوراقو لسويسرا وللسفارة والفيزا طلعت سريع لانها حالة طارئة واتجهزو وجا الاسعاف عشان يشيلوها وركبوها والبيت كلو كان في المستشفى ببكي بس
ام همس: ربنا يستركم
عمار: ان شاء الله ادعو لينا بس
سلوى: دعواتنا دايما معاكم
محمد: انتبه ليها
عمار: كأنك بتوصيني على روحي
محمد: ما تخاف نحنا وراك . حضن ابوهو شديد
عمار: تسلم ابوي . ومشى ودعهم كلهم الا فردوس كانت ورا شديد خجلانة انو تعاين ليهو وكانت بتبكي بشدة ولمن سفيان جا يودعو همس ليهو
سفيان: فردوس هناك ودعها ما تشيل في قلبك . رفع عينو شافها بعيدة وبتبكي مشى عليها هي اتوترت ونزلت ليها
عمار: ما حتودعينا . بكت زيادة
فردوس: ربنا يستركم وترجعو الاتنين سالمين
عمار: ان شاء الله يا رب . ومشى خلاها وطلع في الاسعاف ومشو المطار وتم الاجراءات هناك وطوالي سافرو سوسيرا ..........
____________
من جانب فردوس
لمن عمار كلمنا بخصوص سويسرا فرحنا انو في بصيص امل شوية وجا اجتماع تقرير السفر وهنا كانت الجوطة والصدمة لمن قال لينا عمار انو داير يعقد على همس كلنا كنا حنفرح لو كانت همس صاحية وادت الموافقة وحصل جوطة كبيرة بس في النهاية اقتنعو وعقدو ليهم ومشينا نودعهم كنت بعيدة خجلانة من عمار بسبب كلامو داك وانو لساني ما يخاطب لسانو فكنت بعيدة وشايفة فيهو بودع الكل لمن سفيان قال ليهو حاجه في اذنو عاين لي وجا اتجاهي خوفت الصراحة انو يسمعني كلام بس فاجأني لمن قال لي ما حتودعينا دعيت ليهو ومشى قلبي شوية ارتاح وعاينت لسفيان وهزيت ليهو رأسي بمعنى شكرا وهو هز لي رأسو بمعنى عفوا ورجعنا البيت وكلنا بندعي ليهم رحلتهم استغرقت تقريبا يوم كامل حتى سفيان جا بشرنا انو وصلو بخير وطلعو للمستشفى طوالي وانو الاتنين بخير اخيرا ارتحنا وبدوا ليها اجراءات العلاج وبدت رحلة طويلة
في يوم قولت ماشة السوق لانو محتاجين حاجات للبيت ومشيت براي بس في حرامي مسك شنطتي وبقيت اتشاكل معاهو والغربية ماف زول جا يساعدني بعاينو ساي وانا ببكي و بصرخ لمن طلع سكينة صغيرة ضربني بيها في ايدي فكيتها وجرا بيها وانا بقيت ببكي في اللحظة ديك ما فكرت في زول غير سفيان بس اوصل ليهو كيف بس مشيت لاقرب مرا وانا ماسكة ايدي
فردوس: خالتو ممكن تلفونك اعمل مكالمة
المرا: كويس بس ايدك بتنزف
فردوس: انتي اتصلي بس . طلعت تلفونها
المرا: الرقم كم . الرقم طار من رأسي ونسيتو
فردوس: نسيتو
المرا: براحة براحة انتي خايفة . بالفعل كنت خايفة وبرجف حاولت اجمع
فردوس: كدا اكتبي..... . مليتها الرقم واتصلت طلعت مرا والرقم غلط اعتذرت منها وقفلت
فردوس: كدا اكتبي ....... . مليتها بعد عكست الارقام واتصلت واخيرا طلع سفيان ذاتو
_ سفيان
__ ايي منو معاي
_ انا فردوس
__ مالك بتبكي
_ تعال لي سريع
__ انتي وين
_ انا في السوق
__ بتعملي شنو في السوق موش قولت ليكي ما تطلعي من البيت الليلة بقتلك . بقيت ابكي زيادة انا خايفة ومجروحة وهو بهدد فيني ندمت انو اتصلت ليهو عمرو ما بتغير
_ ما تجي خلاص
__ وين محلك بالضبط ودا رقم منو ومالك الحاصل شنو
_ سفيان انا خايفة
__ اهدي اديني سيد التلفون . مديت التلفون للمرا
فردوس: داير يتكلم معاكي . اديتها واتكلمت معاها ووصفت ليهو الموقع
المرا: تمام ما بخليها براها . وقفلت
المرا: قال جاي
فردوس: كويس
المرا: خليني اوديكي اقرب مستشفى يضمدو ليكي
فردوس: لالا بنتظر سفيان بس
المرا: اخوكي ولا راجلك
فردوس: ود عمي
المرا: ود العم سند
فردوس: اممممم . المرا ما قصرت معاي انتظرت معاي لمن سفيان جا كان متلهف
سفيان: مالك الحاصل ليكي شنو . رجعت بكيت عشان ما يجوط
فردوس: في في في حرامي سرق شنطتي
سفيان: انتي ذاتك موش محزرك من الطلوع
فردوس: ناس البيت كانو محتاجين حاجات للبيت . قام يجوط
سفيان: ما كان ممكن تتصلو تكلموني وانا بجيبهم في داعي هسي
المرا: يا ولدي كدا اهدأ ووديها المستشفى . اتخلع
سفيان: مالها المستشفى لشنو فردوس مالك
المرا: الحرامي طعنها في ايدها . مسك ايدي سريع لقاها بتنزف قبيل مع الجوطة ما اتنبه ليهو
سفيان: من قبيل قاعده بيها كدا
المرا: قولت ليها اوديها اقرب مستشفى بس قالت لالا بنتظر سفيان
سفيان: شكرا يا خالتي ما قصرتي معاها
المرا: العفو يا ولدي والله اعتبرتها بتي وكانت خايفة وانت ما تجوط عارفة انك خايف عليها بس عاين ليها بترجف كيف . عاين اتجاهي كنت برجف طوالي رخى ودعناها وشكرناها وطلع بي المستشفى
سفيان: انتي كويسة؟ . هزيت رأسي بمعنى ايي وصلنا ونضفو لي ما كان كبير شديد ما احتاج خياطة كتيرة بس غرزة وحدة بس ولفوهو لي وكتبو لي مضادات حيوية وطلعنا
سفيان: انتي ليه عنيدة كدا
فردوس: انت ليه ما بعجبك اي حاجه انا بعملها
سفيان: لانك يوم ما عملتي حاجه ممكن الواحد يقول عليهو ما شاء الله تبارك الله دايما حاشرة نفسك في المشاكل . زعلت من كلامو وسكتا خليتو لمن وصلني وناس البيت كفرو لي وانو جات سليمة
اكتر حاجه كنت زعلانة عليها تلفوني الاتسرق دا بقيت قاعدة ساي بدون تلفون وما بقدر اطلب من ابوي لانو رسل مصاريف لعمار عشان همس ما عاوزة ازود عليهو بقيت محتارة بس لمن جا الغيار الاول جا سفيان يوديني ما كنت عارفة وهو الزمن داك مع عمو محمد بتكلمو بخصوص التطورات تبع همس وانا اصلا كنت متفقة امشي مع صفا
صفا: كلمتي سفيان؟
فردوس: اكلمو لشنو
صفا: والله يا جنة انتي حتموتي على يد سفيان دا بس صدقيني
فردوس: والله عارفة الحاجة دي بس ارح . طلعنا كدا في الحوش بس اشوف ليك سفيان في وشي قلبي عمل شح جا علينا
سفيان: والله؟؟؟ . بقيت اتمتم
فردوس: دقيقه قبل ما تجوط يا سفيان كنت عارفة انك جيت وقولت انتظرك في العربية موش يا صفا؟ . هي ما قدرت تكتم الضحكة فضحكت التفت ليها وعملت ليها اصبري لي والتفت لسفيان قام ضحك فتحت خشمي بخلعة انو سفيان بضحك
سفيان: اطلعي اطلعي يا جنة بس حالفة انو اكسر ليكي رجولك دي موش
فردوس: بري والله ما قنعانة من رجولي . وطلعنا مشينا الغيار وخلصنا وطلعنا عشان يرجعنا
سفيان: كنت ناوي اعوضك التلفون بس انا وحدة ما بتسمع كلامي اخسر فيها قروشي ليه
فردوس: لا وحاتك لا والله خسارة القروش فيني حلوة جرب ما حتندم
سفيان: شكرا
فردوس: سفيان بسمع كلامك تاني وياها صفا شاهدة موش بتشهدي
صفا: بري انتي ماف زول بقدر ليكي
فردوس: والله قطاعة ارزاق بشكل ما طبيعي . ضحكو الاتنين وزعلت ومليت وشي من الزعل لمن وقف محل تلفونات
سفيان: انزلي . نزلت بفرحة كدا ودخلنا شال لي تلفون حسب اختياري واشترى لي ملحقاتو ورجعنا مبسوطة شديد وشكرتو كتير على التلفون ...........
8
الدكاترة بدو في رحلة العلاج تبع همس وكانت رحلة مكثفة وطويلة وشاقة استمرت لمدة تلاتة اشهر وبعدها عملت عملية وكان لازمها عملية تانية بس جسمها ما كان مستحمل فكان لازم ينتظرو تلاتة اسابيع وبالفعل عملت العملية التانية ودي كانت نقطة التحول بالنسبة لحالتها
الدكتور: ببشرك انو العملية نجحت والمؤاشرات رجعت لطبيعتها . عمار لمن سمع الكلام دا قام بكى شديد انو اخيرا حيرجع يشوف عيونها وحيسمع صوتها الدكتور خلاهو هدا وطبعا الدكتور اجنبي بتتكلم بالانجليزي وعمار برد ليهو بالانجليزي
عمار: حتصحى متين
الدكتور: نسبة لانها عندها خمسة شهور في الغيبوبة لازم ننتظر شوية ما حنفوقها حاليا
عمار: متين يعني
الدكتور: ننتظر اربعة يوم كدا حتى كل حاجة تكون طبيعية ونبضات القلب تنتظم
عمار: تمام شكرا يا دكتور
الدكتور: دا واجبي . بعد خلص من الدكتور اتصل لناس البيت بشرهم بالخبر دا وقامو يبكو معاهو
محمد: ربنا ما بخيب ظن العبد بيهو
عمار: اصلا أملي كان في ربي كبير
محمد: اها لو صحت تكلمها بالراحة بالحاصل كلو؟
عمار: بسأل الدكتور بالاول بعدها بشوف البحصل شنو
محمد: اها انت كويس
عمار: لو قولت ليك كويس يا ابوي بكون كذبت عليك
محمد: لكن هانت يا ولدي خلاص
عمار: الحمدلله بس لو ما شوفتها بعيني بتتكلم ما برتاح
محمد: حتشوفها ان شاء الله يلا خلي بالك من نفسك ومنها
عمار: ان شاء الله . وقفل من ابوهو وجات الممرضة قالت ليهو الدكتور طالب حضورو مشى
الدكتور: في حاجه مهمة لازم تعرفها
عمار: اتفضل
الدكتور: هي طولت في غيبوبة وتاني حاجة ضربة السيارة كانت قوية عليها فدا اثر على اعصابها
عمار: اها
الدكتور: يعني لمن ما تصحى ونعمل تجربة الاعصاب ونشوف احتمال يكون حصل شلل نصفي او شلل في احد الاطراف
عمار: المهم هي تكون بخير الباقي ربنا كريم
الدكتور: عاجبني صبرك دا
عمار: انا متعذب خمسة شهور بسبب حالتها دي بس داير منها ترجع تتكلم معاي لو اتشلت والله مستعد عمري كلو ارفعها بس هي ترجع
الدكتور: ربنا يخليكم لبعض
عمار: امين يارب . وطلع منو هو ما هاميهو غير انها تطلع من الغيبوبة دي بس
عدا اربعة ايام ذي النار عليهو كان بعد الساعات ساعة ساعة بلهفة ومنتظر تصحى ويشوفها بتتكلم معاهو
عمار: دكتور اها تصحوها متين
الدكتور: حنصحيها الليلة بس ما نصدمها عشان عقلها ما مستوعب
عمار: كيف يعني
الدكتور: يعني ظبط نفسك عشان ما تلاحظ التغيير الحاصل فيك وتاني حاجة لمن تصحى ما تعرف انها كانت في غيبوبة فترة طويلة تكلمها بعد مرور 24 ساعة ومرحلة مرحلة عشان تستوعب
عمار: تمام . عمار طلع سريع ومشى حلق شعرو ولحيتو الكان اهملها وجا راجع عمار القديم بس ضعف شديد في الفترة دي بس احسن كدا والدكتور اداها ادوية في الدرب
الدكتور: خليك جنبها ساعة وحتصحى تدريجيا
عمار: تمام . الدكتور طلع وعمار قعد في كرسي جنبها مسك ايدها
عمار: ما مصدق انو حتصحي بعد فقدنا الامل بس انا لا ما يئست ابدا اخيرا حأشوف عيونك الحلوة دي نومتي كتير ياااخ بس هانت حبيبتي . قعد يعاين ليها ويتكلم معاها لمن حسا انو حركت ايدها وقف فوق كانت بتحاول تفتح عيونها دقيقة كاملة حتى فتحت هو ما صدق ابدا بقى يعاين ليها بس
عمار: بطة . ما ردت لانو لسع بتحاول تجمع ردت غمضت عيونها
عمار: لالا ما تغمضي افتحي عيونك . تاني حاولت شكلو بسبب الاضاءة وهي طولت قافلة عيونها هو كأنو حسا بيها مشا قفل نور الغرفة الرئيسي وخلي الباب فاتح يعني الضوء بقى خفيف وجا وقف فوق رأسها كانت فتحت عيونها احسن
عمار: انتي كويسة؟ . فتحت عيونها وقفلتهم نظام انا تمام قام بكى وهي لمن شافتو كدا دمومها نزلو بس ما قادرة تتكلم قرب منها ومسح ليها دموعها
عمار: ما تبكي دقيقه انادي الدكتور . وطلع .....
____________
من جانب همس
من بعد الحادث يداب صحيت بس حاسة نفسي كأني كنت نايمة قرن كامل من وجع الجسم وحاسة رأسي تقيلة ما مستوعبة حاجة ولساني تقيل وضوء الغرفة كان شديد رجعت غمضت عيوني وعمار كأنو فهمني اصلا ما جديدة عليهو بفهمني من دون ما اتكلم قام قفل النور بعدها فتحت عيوني وهو قام يبكي طوالي بكيت معاهو لانو اكيد خايف علي وانا ندمت انو كسرت كلمتو وطلعت مع البنات وهسي ببكي بسببي بقيت احاول اتكلم ما قدرت قال لي ماشي ينادي الدكتور وطلع دقيقتين جا راجع مع الدكتور بس استغربت انو الدكتور اجنبي وطبعا ما فاهمة حاجة من البقولو الا عمار بترجم لي وانا بستوعب كلامو
الدكتور: سامعني؟ . غمضت عيوني وقفلتهم بمعنى ايي
الدكتور: كدا حركي اصابعك بالراحة . حاولت بس حركتهم خفيف
الدكتور: تمام ورجولك . ما قدرت بس اليمين اتحرك خفيف بس الشمال ما قدرت
الدكتور: حأضغطك في رجلك الشمال بالقلم لو حسيتي بيهو غمضي عيونك . بالفعل ضغطني ما حسيت بيهو
الدكتور: كدا تاني . المرة دي زاد الضغطة حسيت بيها غمضت عيوني
الدكتور: تمام
عمار: يعني كويسة
الدكتور: نتكلم في مكتبي
عمار: تمام ومالا ما بتتكلم
الدكتور: حتتكلم بس تأخد وقتها خليك معاها نتكلم لمن تخلص
عمار: تمام تسلم شديد يا دكتور
دكتور: دا واجبي . الدكتور طلع وانا طبعا ما فاهمة حاجة من الكلامو البقولو فيهو خلصو والدكتور طلع وهو قرب مني
عمار: قطعتي قلبي معاك يا همس . اتمنيت اقدر اتكلم معاهو واعتذر ليهو بس ما كنت قادرة وركزت معاهو كان ضعيف دا يومين بس بقى كدا اكيد عانى ولا انا بتخيل لي قام مسك ايدي شديت عليهو وحاولت حاولت شديد انو اتكلم بس ما قدرت وبعدها فكرت ليه امي ما جات تشوفني وليه عمار براهو بس المعاي والدكتور دا شنو رأسي وجعني من التفكير لمن دمعتي نزلت
عمار: مالك متألمة؟ . هزيت ليهو رأسي بمعنى ايي
عمار: حتبقي كويسة ما تخافي . عملت ليهو حركة بمعنى ايي بعد ساعة حتى قدرت اتكلم
همس: عماار . هو ما صدق انو اتكلمت
عمار: والله عيونو وروحو ونفسو لعمار اتكلمي
همس: انت كويس؟
عمار: والله بعد سمعت صوتك يداب بقيت كويس
همس: اسفة والله
عمار: لشنو . استغربت انو ما عارف انا بعتذر على شنو
همس: انو طلعت بدون ما اسمع لكلامك والله ما كنت دايرة اكسر كلمتك
عمار: والله عارف يا روحي ما تزعلي خلاص
همس: ما زعلان مني؟
عمار: لو حتبقي كويسة بسرعة وحترجعي بتي البعرفها ما حأزعل منك
همس: والله برجع بس انت ما تزعل مني
عمار: اتفقنا
همس: عمار وين امي ما جات تشوفني . مسح وشو وسكت مسافة
عمار: امك في البيت رجعت قبيل كانت دايما جنبك وحتى ناس البيت بس رجعتهم لانو نحنا في الليل حيجو الصباح ان شاء الله
همس: ايواااا وليه الدكتور اجنبي
عمار: دي مستشفى جديدة والطاقم اجانب عشان كدا حتى ما شايفة الغرفة شكلها كيف . عاينت في الغرفة
همس: بالجد لكن الغرفة حلوة شديد
عمار: زيك كدا . خجلت
عمار: نومي شوية كدا وانا بتصل لناس البيت وبديكي تتكلمي معاهم
همس: تمام . ونومت........
_____________
من جانب عمار
بعد همس نامت ما كان مصدق انو صحت وبقت كويسة شاف انو الحاصل حلم بس مسح على رأسها وطلع للدكتور
عمار: اها يا دكتور
الدكتور: حسب الفحص اعصاب رجلها الشمال ضعيفة شديد واحتمال ما تقدر تحركها وحتمشي بالعصا بس مع التمارين الفيزيائية المكثفة حترجع ان شاء الله
عمار: ان شاء الله وهسي اكلمها بالحاصل كيف
الدكتور: ممكن نخليها يوم كامل لمن نتأكد بالاول
عمار: تمام . ورجع ليها كانت نايمة بآمان عاين ليها مسافة وقام طلع اتصل لناس البيت وكلمهم انو همس صحت والبيت كلو قام يبكي
ام همس: عليك الله يا عمار بتي صحت؟ ما بتكذب صح؟
عمار: والله صحت بس نايمة هسي شوية كدا بتصل ليكم فيديو كول عشان تسلمو عليها
ام همس: ايي عليك الله والله مشتاقة ليها ما عارفة اتحملت الخمسة شهور دي كيف
عمار: بس هي حاليا ما عارفة حاجه يعني قايلة عندها يومين بس وحتى ما عارفة انو سافرنا واول حاجه لمن صحت سألت منك . لمن عمار قال ليها كدا بكت زيادة
عمار: عمتي انا قولت ليها انتو رجعتو البيت لانو الزمن اتأخر بس حتجو الصباح يعني اتكلمو معاها على هذا الاساس لمن الدكتور يقول انو خلاص ممكن تتقبل الصدمات بكلمها بالحاصل كلو تمام؟
ام همس: بس اول ما تصحى كلمني عليك الله
عمار: عارف انك ما بتقدري تنتظري ادخلي في الغرفة عشان يكون ذي الليل وانا بصحيها ليكي
ام همس: ايي عليك الله والله نفسي اشوفها واسمع صوتها عشان قلبي يرتاح . ومشت الغرفة وهو فتح الفيديو ودخل بالراحة وهبشها برقة
عمار: همس همس
همس: هممممم
عمار: عايني منو اتصل اخر الليل عشان يشوفك وما قدر ينتظر للصباح عشان يجيكي . فتحت عيونها ولمن شافت امها في التلفون مسكت التلفون سريع و الاتنين بكو وامها اكتر
ام همس: كيفك بتي والله قطعتي قلبي يا قلب امك انتي
همس: امي ما تبكي خلاص انا كويسة الحمدلله
ام همس: الحمدلله
همس: عمار قال لي رجعتو قبيل لانو الزمن اتأخر
ام همس: ايي بس اول ما الشمس تطلع تلقيني قدامك
ام همس: كويس هسي ارجعي نومي
ام همس: وانتي ارتاحي . ودعت امها وقفلت
همس: شكرا
عمار: عفوااا ومعليش قطعت ليكي نومك
همس: والله اي حاجة فدا امي وفداك انت مقبولة . جا سلم عليها في رأسها استغربت شديد انو اول يعملها.......
___________
من جانب همس
كنت نايمة في امان الله لمن صحاني عمار انو في زول دايرني لقيتها امي ما صدقت بكيت معاها وعدتني انو حتجي بكرة وقفلت منها وشكرتو وجا سلم علي في رأسي استغربت اول مره يعملها خجلت وسكتا ساي وبقى ماسك ايدي وانا مستغربة فيهو بس ساكتة ورجعت نومت تاني
جا اليوم التاني وعمار قال نومت كتير ومنتظرة امي بس ما جات لسع كل مرة بقول لعمار كلمها تجي بقول لي كلمتها جاية واتأخرت شديد وتاني سألتو قال الضيوف بجو يكفرو ليها عشان انا صحيت وكم حجة كدا قالها لي لمن الدكتور جا مرا علي وفحصني واتكلم مع عمار شوية وطلع
__ عمار رجلي الشمال دي ما حاسة بيها شديد وما قادرة احركها
_ عارف
__ الحاصل عليها شنو . جا علي وقال لي زحي شوية سحبت لبهو وقعد جنبي وتكلني في صدرو يعني انا قدام وهو وراي وضاميني عليهو اتخلعت من حركتو دي
__ عمار هسي لو جا زول
_ ماف زول حيجي
__ ما صح ياااخ
_ ما تتحركي خليني احكي ليكي الحاصل وبراكي تحددي لو صح ولالا . استكنت ورقيت جسمي
__ امممم احكي
_ اخر حاجه متذكراها شنو
__ انو طلعنا الجناين وضربتني عربية
_ تمام يلا دايرك تسمعيني براحة ممكن
__ سامعة
_ اول حاجه نحنا ما في السودان . دي كانت الصدمة الاول . دايرة ازح عشان اعاين ليهو جراني عليهو رجعنب
_ ما تتحركي عشان لو عاينت في عيونك بسرح وبنسى الكلام . ضحكت
__اها خلاص نحنا وين
_ في سوسيرا
__احلف
_ والله
__ وااااو للدرجة دي كنت تعبانة
_ شديد علاجك احتاج انو نسفرك سوسيرا
__ وتاني
_ كنتي في غيبوبة فترة
__ كم يعني
_ خمسة شهور . فتحت خشمي بخلعة
__ كممممم احلف
_ والله . دي كانت الصدمة التانية بعد بلعت الصدمة
__ عشان كدا لمن صحيت حسيت اني كنت في ثبات شتوي . وضحكت وهو ضحك
__ عليك الله ما اشتقو لي؟ . لمن قولت كدا شد من ضمو لي
_ انا خمسة شهور ما فاهم حاجه جسد من دون روح والله ما بتكلم مع زول ولو اتكلمت بجوط عرفت بالجد غلاوتك بالنسبة لي . حسيت بيهو من طريقة كلامو مسكت ايدو وشددت عليها
__ بس حاليا انا كويسة عمورة
_ الحمدلله تصدقي اني اشتقت انو اسمع منك كلمة عمورة دي
__ تاني حتسمعها مني كتير اها وامي ليه ما جات معاك وجيت مع منو او بصيغة تانية الجا معانا منو تاني
_ ولا زول . وتتوالى الصدمات
__ ولا زول كيف دا وماف زول زول اعترض؟
_ عشان ما محارمك صح؟
__ ايي
_ يلا هنا اخر صدمة بالنسبة ليكي
__ اصدمني انو سوقتني بدون علم زول يعني هربت بي . هنا زحيت منو وعاينت ليهو ومنتظرة اخر صدمة انو يقول لي هرب بي عشان اتصدم اكتر قام ضحك على منظري
_ لالا ما هربت بيكي اطمني
__ اها
_ عقدت عليكي بس . قومت ضحكت
__ حلوة دي والله . ولسع بضحك بس هو كان بعاين لي بس بدون تعابير منتظرني استوعب الصدمة او بمعنى اصح ابلع الصدمة هزيت ليهو رأسي بمعنى لالا بتهظر هز لي رأسو بمعنى ايي بقيت ارمش بس كيف يعني عقد علي يعني انا هسي مرتو
__ يعني هسي انا مرتك؟ . هز لي رأسو بمعنى ايي التفت منو ورجعت لنفس وضعيتنا القبيل وهو ضاميني
_ همس
__ امممممم
_انتي تمام؟
__ لالا
_ والله كنت مضطر وما كنت حأسمح لزول غيري يجي معاكي لو انطبق السماء للارض ودي كان الحل الوحيد عشان اعمامك يقبلو انو اسافر معاكي وانتي في غيبوبة ما قدرنا نستشيرك
__ عارفة بس بحاول استوعب الحصل دا كلو ويداب عرفت ليه ماسكني كدا بدون خوف
_ بس نرجع اي حاجة دايراها انتي حتحصل
__ في زول بعرف مصلحتي اكتر منك؟
_ لالا
__ بس خلاص هسي خليني قاعدة كدا عشان بعد شويه حأنحرم منو لمن تتذكر اني كسرت كلمتك . قام ضحك وضماني اكتر وانا ضحكت وكنت حاسة بالامان شديد ومن جواي طايرة من الفرحة يعني هسي انا زوجة عمار شايفة انها حلم حلم حتى نسيت الغيبوبة الخمسة شهور ونسيت اني في سويسرا وبقينا نحكي ونحنا بنفس الوضع وحكى لي الحصل كلو ومعاناتو هو وامي وانا بكيت شديد انو وصلتهم للمرحلة دي
عمار: خلاص كفاية نكمل بكرة
همس: امممم عمار انا اسفة شديد والله . مسح لي دموعي وسلم علي في رأسي
عمار: خلاص دا قضاء و قدر وكان امتحان بس اتجاوزناهو الحمدلله
همس: تاني ما بخالف ليك رأي نهائي
عمار: نهائي نهائي؟
همس: نهائي
عمار: اااه دا كلام جرائد بس عارف انا وحافظك ذي جوع بطني . قومت ضحكت شديد وحضنتو شديد ياااخ انا محظوظة بيهو شديد........
"لا أريد أن أعيش أيامًا لست بها، إنه لمن المُحزن أن أكون بعيدًا عنك رغم فرط الحب الذي أعيشه لك لا أريد أن تخلو حياتي مِنك حتى و إن كان كل شيء بيننا مُمتلئ بالعوائق، أريدك رغم كل الظروف و التعب."