رواية من انا الفصل الثاني عشر 12 بقلم مروة الصافي
جيت راجعة البيت لقيت خالتو نسيبة سلمت عليها وقعدت حكيت ليها بي كل الحصل زعلت زعل قالت لي البت دي بعد دا لازم تقيف في حدها وانا عندي كلام تاني مع عمها قلت ليها لا عليك الله ماتسألي اي زول ولا تشتغلي بيها انا اتحسبنت عليها وربنا مابضيع حق زول
داخل علينا رمضان والمشاكل ماحبابها قالت لي بس ماحتسيبك في حالك قلت ليها ي خالتي هي تاني ماعندها حاجة في يدها مشت لي ام حيدر وكلمت ناس دفعتي وهم عرفو غلطهم واسه هي مكسورة بسبب. العملتو انقلب عليها
قالت لي خلاص المرة دي وبس لكن لو تاني عملت حاجة حتلقاني انا في وشها
قالت لي الليلة عمك بمناسبة بكرة رمضان عازمنا عشاء برا قلت ليها ياسلام طوالي الواحد مع الاحداث دي نفسو طلعة يغير فيها جو يلا حامشي غرفتي اجهز ملابسي الحأطلع بيها ان شاءالله
دخلت غرفتي وغيرت حيدر اتصل علي اها ست البنات وصلت ☺️ قلت ليه ايوا الحمد لله قال لي حمدلله على السلامة اهم شي تكوني رايقة وماتشيلي في بالك اي حاجة
قلت ليه طول ما انت وخالتو نسيبة في ضهري انا عمري مابنكسر المهم اتونسنا مسافة وقفلت منو
#في بيت حيدر
امو جات داخلة لقتو بتكلم معاي قالت ليه اوعك تقول لي بتتكلم مع الماتتسمى دي قال ليها اولا اسمها حياة قالت ليه حياة ممات ماشغلتي بس كل البهمني البت دي تبعد منها نهائي ولا بعد دا بكلم ابوك
قال ليها ي امي انا ماعايز اعمل حاجة غصبا عنكم بس كل البتمناه انكم ترضو عن البت دي والله بت ناس وعندها اهل قالت ليه عندها اهل كيف وهي عاشت في ملجأ
قال ليها البت دي ناس الملجأ كلموها انو جابتها مرة منقبة سلمتها ليهم وفاتت
قالت ليه دا ما دليل انه عندها اهل هو في اهل بجدعو جناهم ياولدي بالله ماتعمل لي مرض انا البت دي لو بقت اخر وحدة في الدنيا مارضيانة وكان عايز تعرسها من غير رضاي امشي
قال ليها انا كلمتك من غير رضاك ما بعمل حاجة
قالت ليه اعمل حسابك خالتك جايبة ليك عروس شوفها يمكن تطلع دي من دماغك قال ليها انا عروس غير حياة ما داير وماتجيبو لي اي وحدة اشوفها عشان ما احرجكم
امو زهجت منو وطلعت
#في البيت عندنا
عمو علي جاء شايل اكياس كتيرة قالو دي حاجات رمضان طبعا انا دي اول مرة اشوف حاجة اسمها حاجات رمضان نحن بجيبو لينا بلح عدسية وعصير من البجيبو ناس البر والاحسان وعصيدة بي ملاح
ماشاء الله عمو علي جا شايل فراخ لحوم بي انواعها منقة فروالة المهم ماشاء الله ماخلى حاجة شلت منو الحاجات ودخلتها الفريزر
وعملت الغداء اتغدينا وبعده رتبت المكان ومشيت غرفتي رسلت رسالة لي حيدر اننا طالعين المساء
رد لي وين قلت ليه عمو علي عازمنا عشاء برا عشان بكرة رمضان قال لي كويس بختكم استمتعوا
مسكت دفتري وقريت مسافة عشان لي يومين مع الحاصل دا ماقريت اي حاجة
المساء جاء اتجهزنا وطلعنا مشينا نفس مجلعم المرة الفاتت وقعدنا في تربيزة بس المرة دي حاجزين تربيزة كبيرة وعليها ثلاثة كراسي زيادة استغربت لي شنو الكراسي ديل
اخدنا عشرة دقايق بنتونس فجأة اشوف ريم وامها وابوها جايين انا في اللحظة دي كرهت الطلعة شديد وقلت ياريت لو ما جيت خالتو نسيبة قالت لي خليك عادية والله انا ماعارفة عمك عازمهم معانا بس ماتشتغلي بيها انا بتصدر ليها وبعرف اوقفها في حدها لو اتجاوزت معاك
جو سلمو علينا وقعدو وهي مدت لي طرف يدها وانا رديت عليها بنفس الطريقة مديت ليها اصابعي بس
شوية وجاتنا الطلبات وانا باكل براحة براحة خالتو نسيبة قالت لي حيوتة حبيبتي اكلي مالك اكلك براحة كدا قلت ليها باكل
ريم قالت ليها بتكون اول مرة تشوف الحاجات دي غريبة عليها خالتو نسيبة طوالي ادتها في راسها قالت ليها بتاكل براحة عشان بت خجولة وعينها ملانة مافارغة عمو علي قال ليها دا كلام شنو يا ريم عيب عليك
سكتت طوالي وعرفت انو وراي ضهر جامد والله اتبسطت بسطة ويداااااب الطلعة بقت ظابطة وزولتكم تشيل وتحمر لي وانا زي الماشايفاها ولا شغالة بيها الشغلة
رسلت لي حيدر قلت ليه اتخيل معانا منو في الطلعة دي قال لي منو قلت ريم واهلها
قال ريييييم قلت ليه ايوا قال لي ماتكون ضايقتك قلت ليه كانت عايزة تضايقني بس لقت خالتو نسيبة في وشها وعمو علي زاتو ماقصر معاها قفلت التلفون وختيتو في الشنطة وشايفة فلانة تعاين لي والمغصة حتشقها
المهم انتهى اليوم بي خيرو وشرو ورجعنا البيت قبت ليهم تصبحو على خير نعسانة الحق انوم شوية قبل السحور يجي
دخلت الغرفة اتصلت لي حيدر اتونسنا شوية قال لي ماتنسي تصحيني زمن السحور قلت ليه طيب
المهم عدت الأيام سريعة وخلاص بقينا بكرة على السفر خلاص
حيدر جا بيت ناس عمو وقال لي لازم بعد التراويح الاقيك اودعك قلت ليه كدا حتعمل لي مشكلة قال لي ان شاء الله لو من بعيد ساي بس لازم اشوفك قبل تسافري قلت ليه طيب
#في بيت عم حيدر
قاعدين بتونسو وحيدر قال يحكي لي عمو ومرتو بي موضوعنا عشان يقيفو معاه المهم هو حكى قصتي كلها واول ماجاب سيرة دلاية السلسل خالتو امنة وقفت وقالت ليه البت دي وين وديني ليها اسه قال ليها في شنو ي خالتي قالت ليه بس وديني ليها وحتعرف
قال ليها البت دي ساكنة جنبكم هنا قالت ليه وين قال ليها بتعرفي حياة القاعدة مع ناس حاج علي قالت ليه بعرفها قال ليها بس ياها
فتحت الباب بسرعة وحيدر وراجلها وراها
ونحن قاعدين سمعنا الباب بدق بي شدة اتخلعنا كلنا عمو علي مشى سريع فتح الباب لقاها خالتو امنة قالت ليه وين حياة
قال ليها في شنو وحياة عملت شمو قالت ليه عايزاها ضرووووووري اول ما دخلت قالت لي حياة الدلاية حقت السلسل لسه معاك انا اتهجمت وانا برجف من الخوف قلت ليها دلاية شنو قالت لي اللقوك شايلاها في الملجأ
قلت ليها ايوا معاي بس عايزة بيها شنو قالت لي جيبيها اشوفها وبوريك الحاصل
دقايق بس جيتها وجيت اول ماشافتها مسكتني وقعدت تبكي بي كل قوتها وانا مخلوعة في شنو وخالتو نسيبة بتتكلم معاها وهي ماراضية تفكني
بعد مسافة قالت لي انتي امنية بتي اللي سنين بفتش فيها انا من شفتك مش قلت ليك حاسة اني بعرفك انتي بتي وقعدت تبكي وانا في اللحظة دي بقيت واقفة واحسة نفسي حاقع من طولي
قعدت تحكي قالت انا فقدت الدلاية دي نفس اليوم الفقدت فيه بتي وعشان اثبت ليكم انها بتي عندها شامة كبيرة نهاية راسها بالجهة الشمال وفعلا طلع كلامها صح
انا وقعت من طولي شالوني شيل رقدوني في السرير مسافة حتى قدرت افتح
فتحت وانا حاسة بي الدنيا لافة حواليني وكلهم واقفين جنبي حتى حيدر معاهم في اللحظة دي انا بكيت بكى عمري مابكيتو اول مرة اعرف امي وابوي اعرف انو عندي اسرة زي وزي اي زول
مسكتهم وقعدت ابكي فرحة على حزن في اللحظة دي البيت كلو انقلب بكاء حتى حيدر لقيتو بعاين لي وببكي خالتو نسيبة قلبت الجو دا بي زغروتة عالية
حيدر قال لينا والله كلمة قلتها لي حياة من اول يوم شفتها اني زي البعرفك او في حاجة بتربطنا بي بعض وفي النهاية تطلع بت عمي سبحان الله وخالتو نسيبة قالت ليه انا كم مرة لاحظت الشبه البين امنة وحياة
و قالت لينا يلا ماعايزين بكاء نحن في لحظات فرح مانقلبها حزن
عمو علي قال ليهم انا ماشي اجيب خروف نض@بحو كرامة