رواية من انا الفصل الثالث عشر 13 بقلم مروة الصافي
فعلا جابو الخروف ووزعوهو كرامة حيدر قال استأذن بعد دا الحجاج بكونو منتظريني عمو علي اصر عليه يتعشى بس رفض لانو هو البجيب العشاء لي ناس امو
خالتو نسيبة شيلتو لحمة قالت ليه لازم تضوقو كرامة بتنا شالها وودعنا وفات
ونحن هنا اتعشينا وامي تأكل فيني زي الطفلة وكأنها بتعوض سنين الحرمان وانا مستمتعة شديد ياما حلمت بي اليوم دا بعد اتعشينا ابوي قال لي ناس عمو علي بعد كدا ي جماعة حياة تمشي معانا وانتو والله جميلكم فوق راسنا عمو علي قال لي ماف اي جميل ويشهد ربنا من يوم ماجات بيتنا ونحن ماشايفنها غير بتنا
قلت ليهم والله ربنا عوضني سنين الحرمان دي بي اتنين ام واتنين ابو انا سعيدة شديد وربنا اداني احلى اخت ربنا مايحرمني منكم كلكم
بس ي ابوي استأذنك نحن صباح بكرة مسافرين العمرة عمو علي قدم لي لي عمرة معاهم وانا نفسي امشي ماصدقت ربنا سهلها لي
امي ف
قالت لي بالرغم من اني حا اتحرم منك كم يوم بس مامشكلة اتحمل سنين ربنا يقدرني اتحمل كم يوم كمان ماعايزة احرمك من العمرة حرام علي زاتي لو قلت ليك ماتمشي حضنتها وبوستها في خدها وكان طول عمري بحلم اني احضن امي
قالت لي طيارتكم الساعة كم عشان نوصلكم المطار قلت ليها مفروض أربعة صباحا الحضور والاقلاع سبعة قالت لي خلاص تعالي نومي معاي والصباح نوصلكم المطار استاذنت عمو علي قلت ليه ثلاثة ونص بكون جاهزة قال لي خلاص ي بتي ربنا يسهل امورك امشي نومي مع امك طبعا هي مستنية اليوم طول عمرها مانحرمها
شلت ملابسي المسافرة بيها وخليت شنطتي الصباح لمن نجي نرفعها معانا في العربية . طلعنا مشينا بيتنا ياسلااااااام اول مرة اقول كلمة بيتنا واشوف بيتنا والاحساس الجميل وانا بخطو فيه اول خطوة سعادة ماعادية
امي قالت لي تعالي اوريك غرفتك انا عملتها ليك من اتولدتي وكنت متأكدة انك حترجعي تعيشي فيها كنت يوميا بنضفها وافرشها وابخرها زي الانتي فيها وبشغل فيها قران على طول ماعايزة اخليها مففولة نهائي الوك كان بضحك علي وكنت بقول ليه امنية حترجع لي ولي غرفتها
قلت ليها اسه ي امي انا اسمي امنية يعني قالت لي ايوا انا كان جبت الاولاد قبلك وكنت بتمنى تجيني بت لمن جيتي قلت اسنيك امنية لانك امنيتي
قلت ليها واسم حياة دا حيحصل عليه شنو قالت لي انتي لازم كل اوراقك تتغير عشان يتخت اسم ابوك واسمي فيها شهادة ميلادك للان قاعدة ماراحت بعد تسافري وتجي ابوك يسوقك المحكمة ويكتبك بي اسمو
قلت ليها ان شاء الله يعني اخيرا حيكون اسم ابوي حقيقي طول عمري مديني اسم اب نهائي ماكنت مقتنعة بيه بس اعمل شنو كان لازم يعملو كدا عشان اجراءات الاوراق الرسمية للقراية
قالت لي خلاص كلو ماضي وانتهى انتي امشي العمرة وتعالي واي شي برجع محلو
سألتني من حيدر رأيي فيه شنو خجلت وماعرفت ارد عليها قالت لي حيدر ولد تمام مابتلقي زيو مسؤول وخولصل رحمو قلت ليها بس تفتكري اهلو حيقبلو قالت لي هم لاقنك وين وبعدين ي بت انتي بت عمو ماغريبة عليه
قلت ليها بس نظرة الناس ما زي نظرتكم يمكن يرفضو حتة اني كنت عايشة في ملجأ
قالت لي في النهاية انتي بت عمو وديك كانت ظروف وراحت لي حالها قلت ليها كدي نشوف بعد أسافر واجي مانسبق الحوادث
قالت لي خلاص يلا نومي عشان كلها ساعتين ولا ثلاثة وزمنك حيجي قلت ليها خلينا نتونس الزمن دا بنوم في الطيارة قالت لي كويس اخدنا الوقت داك كلو ونسة وتحكي لي واحكي ليها
وحيدر يشيل ويرسل وانا ولا شغالة بي التلفون امي قالت لي ود عمك دا بجن بعد دا يا بت ردي شوفي مالو
مسكت التلفون لقيتو مرسل كتير واخر شي بسألني حتسافري ولا الحيحصل شنو قلت ليها ايوا مسافرة ان شاء الله قال لي طيب حا اجيكم امشي معاكم المطار قلت ليه ماتتعب روحك ناس امي حيوصلونا قال لي طيب كدا العربية ماحتشيل خلاص بجي اودعك بتطلعو كم قلت ليه كمان ساعة كدا مفروض اربعة نكون في المطار
قلت ليه ماتجي الزمن متأخر والشارع مامعروف كلها كم يوم وبجي راجعة ان شاء الله
قال لي كويس خير ان شاء الله قلت ليه يلا عشان حا البس بعد دا قال لي كويس يا بت عمي وقعدنا نضحك
لبست ومشينا بيت ناس عمو علي لقيناهم جاهزين رفعنا الشنط وشلنا اوراقنا واتحركنا على المطار
كنت فرحانة فرحتين اخيرا لقيت اهلي واخيرا ربنا استجاب دعواتي وحازور بيتو واشوف الروضة الشريفة كان حلمي والحمد لله حيتحقق
وصلنا المطار وخلاص حندخل للاجراءات ودعنا ناس امي وامي دي كملت البكاء وانا كمان بكيت معاها ودعناهم ودخلنا عملنا الاجراءات ومشينا صالة الانظار لحد ما ندهو الرحلة حلتنا ومشينا على البص ومنها على الطيارة
انا كنت في رهبة ماعادية اول مرة في حياتي اشوف طيارة من قريب كدا
وصراحة ما ادس عليكم كنت خايفة شديد تجربة جديدة علي بس كنت بقوي قلبي وبقرأ ولحظة الاقلاع دي كانت بالنسبة لي صعبة شديد خفت خوف وكل ما الطيارة تطلع لي فوق انا بخاف زيادة لحد ما استقرت حتى الخوف قل
قبل نتم الساعتين الطيارة كان وصلت جدة وكمان الهبوط دا كوم تاااااني انا زاتي هبطت معاه اظني
الحمدلله هبطنا بي سلام
وخلاص مراسم العمرة بدت احرمنا وعملنا طواف القدوم وعمرنا الحمد لله
انا وقفت جنب الكعبة ولمستها ودعيت وبكيت بي كل قوتي
مهما قريت عن الاحساس دا ماكنت بتخيلو كدا ربنا يوعد كل مشتاق الكعبة دي في جمال ماطبيعي ومستحيل تقيف قدامها ودموعك ما تجري
عدت ايام مكة وخلاص ركبنا ومشينا المدينة وكانت جميلة جمال ماعادي الحرم المدني والروضة الشريفة انا كنت مبهورة من الجمال والراحة العشتهم
طبعا كنت كل يوم بتكلم مع امي وبصور ليها فيديو من كل مكان مشيناه خلاص عدت ايام العمرة وبقينا راجعين السودان
عمو علي قال لينا يلا نمشي السوق كل زول يشوف الهدايا العايز يشيلها للناس
مشينا السوق واشتريت هدايا لي ناس امي وطبعا مانسيت حيدر ولمن جيت احاسب عمو علي قال لي عيب عليك كيف تدفعي وانا واقف
قلت ليه انا معاي قروش اداني ليها ابوي ولحد الان انت ماخليتني اصرف منهم ولا حاجة قال لي ي بتي قروشك دي اوديك من هنا محل الدهب امشي اشتري ليك بيها حاجة
بس انا عمرتك دي متكفل بيها لحد ما ارجعك لي اهلك بالسلامة
قلت ليه تسلم يارب وانتو كمان اهلي انا عمري ما انسى العملتو عشاني واحتواءكم لي انا ماحصل حسيت اني غريبة م
نكم والحمد لله مامشيت منكم بعيد ...