رواية خطايا واجتثات الفصل السادس والأربعون 46 بقلم نور علي البصري
ماذا لو جاء النور متأخرا ورفضناه
لأن جزت نفسنه وجيتك عبرت
وهاي الروح طابت قنعت وصبرت
شصخم باليجي من خلصن الصعبات
تنزل قيمته وحتى الثقه انكسرت
الما هزه دمعنا بوكت ذاك الخوف
گلوله المسافه البينا كبرت ــــــــــــــــــــــــــــــــــــــــــــــــــــــــــ
شــــــــــــــــــــــــــــيلان
رجعت لبيت أهلي وسديت وراي باب الكوخ.. الكوخ اللي شهد على أجمل قصة حب عشتها وأنتهت بأكبر خذلان.
مرت علية شهور الحمل صعبة جنت أشوف حلالنا و أملاكنا تضيع وتلوح نحو الهلاك كوله بسبب إدارة آدم..
و النقص الكبير بالواردات حتى بابا تمرض كد ما يضم بگلبه ويكتم ما تحمل لمن ما بيوم تعارك وي آدم..
ـــ هاي الحقيقة بـروان.. ما باكنا وآني بيدي اللي سلمته للشرطة و الحرامي طلع أنت إبن أخوي وسفة خوية هو هذا اللي حاربتك لأجله و وگفت ضدك و عاديتك علموده طلعت أنت تفتهم وما ترضى تنطيه إدارة الأملاك شوف يا آدم.. تطلعنا من هاي الأزمة ولك راح نبيع كل أملاكنا و إراضينا.
دنك آدم.. وهو من فترة مبين عليه التعب والضغوط والديانة تركض وراه تطالب بفلوسها.. تاليها أنفضح طلع مو بس مصفرنا طلع متداين بالفايز ويقامر.
حسيت بـروان.. ما كذب عرفت نفسي ظلمته بهاي السالفة بس ما أكدر أنسى خيانته اللي كسرتني و كرهتني بكل إلزلم أختفى بـروان.. من بعد ما تنازلنا عن محاكمته بتهمة السرقة مقابل طلاقي و التنازل التام عن الطفل.. و گعدت عشايرنا وفرضت عليه أبد ما يجي يشوفني ولا إله أي حق بطفلي رغم أعتراضه بس عشيرته رادوا بس يلمون الموضوع و طلعوا منا بكلمة.
ـــ أول وتالي مرجع الولد لأهل أبوه من يكبر و إحنا نرجع ناخذه.
جريت حسرة وآني أراقب عركة أبوي ويه أبن عمي اللي أجه يطالبنا نعرض بيتنا للبيع أبوي رفض و كله.
ـــ أبيع بيتي حتى أسدد قمارك؟ ولك شگد عليك ديون وربا؟ لدرجة عرضت البيوت و الأراضي للبيع ولك هنه بس ذن البقن إلنا خسرنا و فلسنا بسبب قمارك و طيشك الله يذكرك بالخير يا بـروان.. جنت خوش بـروان..
هنا ما أتحملت صحت بي:
ـــ خوش بـروان.. اللي تزوج علية ومخلف وآني ما أدري.
رد علية بقسوة:
ـــ ما أرتكب حرام رجال ومن حقه يريد خلفة وإذا تزوج مبيها شي الله محلله بس المصيبة الأملاك راح تضيع من إيدينا هاي شيرجعها النوب خربت وياه لو هو جان موجود هسة جان لـگه حل بالگعدة إجه أبوه وعمامه وعشيرته كولها ترى الولد إحنا نعرفه مو مگطم زلمة أبن عشاير معروفة من صوب خواله الأكراد و عمامه العرب أيضاً إلهم مكانة تاريخية بالماضي والحاضر عشيرتهم بوسط الوطن من الأغنياء وأملاكهم بقريتهم المنكوبة چانت الدولة مستولية عليها وحاجزتها من سنين لهذا السبب چان الولد عايش بينا على كد حاله لأن أبوه چان أصله من وسط البلد بس تزوج أمه وسكن وياها بقريتها وعاشوا هناك بعد ما الحلال كله تـصادر وحالياً الدولة فكت الحجوزات ورجعت إلهم حلالهم بس أخ يا بـروان.. غلطت بالحكم عليك و ظلمتك.
ظل بابا يلوم ويصفگ إيد بأيد بقلة حيلة دار وجهه علية وگال:
ـــ شـيلان.. بنتي ما إلج إلا ترجعين إله تواصلي وياه هو يحبج يتسامح وياج ترى وضعنا كولش.. تعبان وما يتحمل نتكفل طفل و مصاريف وإذا تزوج ما بيها شي الشرع حلله أرجعي إله بمهر جديد ومهرج ننقذ بي حلالنا وأملاكنا.
باوعت لبابا وآني مصدومة عجيب أمرك يا بشر گلتله بغصة:
ـــ تبيع وتشتري بية يا بابا ؟!
ظليت أبجي:
ـــ وكرامتي كرهته جرحني هنا بأعماق روحي لا واللّه.. ما أتصل يولي عشتو أذل نفسي وأرجعله؟
سألني وعينه على بطني:
ـــ و نفقة للطفل شلون ؟
ـــ أبد إذا متعاجزين من طفلي وهو بعده بطني آني أشتغل وأتكفل بكل مصاريفه ولا أمد إيدي لواحد خاني.
مرت الأيام وآدم يركض بكل كتر يريد فلوس يسد بيها الفايز والديون وطرق كل الأبواب والديانة يطالبوه بفلوسهم و يهددوه بالسجن إحساسه بالفشل و الكسرة خلاه بحالة نفسية صعبة الضغوطات زادت خلت الدنيا تسود بعينه خصوصاً من مرته أخذت جهالها و شردت بيهم تواصل وي أهلها بس طلعوا حتى هم ما عدهم عنها خبر والإشاعات ما ترحم شاعت بالمنطقة هربت وي صاحبها لخارج الوطن و طلعت بايگة ذهب أمه و الفلوس اللي بقت عنده بالخزنة..
هاي المصيبة الأولى.. خسرنا كولشي
وأحتمال تنعرض بيوتنا وأراضينا وكل ما تبقى من حلالنا بالمزاد العلني حتى تتسدد الديون و المشكلة البيوت كولها تابعة للأراضي و أكو شراكة قانونية بين أبوي و آدم.. هاي الشراكة اللي بينهم تحمل أبوي المسؤولية أيضاً وصار خطر السجن يهدد الاثنين سوية آدم.. جان يوقع كمبيالات و وصولات بإسم الشركة المشتركة و ياخذ بيهن قروض من المصارف بحجة تنمية المشاريع الزراعية لذا كولشي جان مشترك و أبوي هم بخطر السجن.
بيوم دخل علية أبوي گعد يمي وگال:
ـــ تطقستلج وسألت عن رجلج بـروان.. مرته توفت بولادة طفلها الثاني وهسة الرجال أرمل يعني السالفة تسهلت الج بعد ماكو زوجة تنافسج مو جان همج تزوج عليج هسة فضت مرته و ماتت.
ـــ بابا ليش ما تفهم علية أنتهيت آني و بـروان.. السالفة مو سالفة مرة ثانية وماتت السالفة خذلان و جرح بالعمق شون تريدني أتناسى الرجال أستغفلني و راح بطريقة فدوة بابا.. لا تلح علية رجاءًا المكسور بگلبي ما يجبره طمع الدنيا كولها.
ـــ أتصلوا بيه الديانة رافعين قضية علينا راح ننسجن.
دنگت راسي أبوي ما ديحس بية رفعت عيني وگلتله:
ـــ خلاص نتنازل عن كل الملك ونعيش ببيت زغير عيب؟ لا مو عيب أهم شي الكرامة تظل سددوا الديون بالملك ولا تلح بموضوع بـروان.. لأن گعدة عشاير صار بينا وهسة لنفرض سمعت كلامك وأرجع الوصال بينا تظن بـروان.. يقبل هنته وطردته و سلمته للشرطة.
سكت بابا متحسر كاعد ومحتار وما يعرف شيسوي ومرت الأيام وإجه يوم ولادة بنتي ولدتها الفجر و برجعتنا من المستشفى لكينا أبوي و آدم.. واكفين بالشارع يتعاركون بباب البيت دخلتني أمي للبيت وهي ساندتني:
ـــ مالج علاقة بيهم هذا بهذلنا وضيعنا من وراه راح ينباع كل خيرنا واحد فاشل ااخ الله يذكرك بالخير يا بـروان گلتها آدم.. مو أمين يبوك بالوارد من وراكم وتالي آني اللي أبتلي دوم جان يذكرنا بس إحنا تجاهلناه واتهمناه ظلم أوف هو بس غلطته زواجه وإلا هو خوش زلمة يمة.
سكتت لأن أعرفها تمهد حتى أتواصل وأرجعله بس صعب كرامتي وعنفواني ما يتقبلون الإهانة و زاد علينا الضغط و آدم.. ساءت أحواله بالزايد ووصلت بي المواصيل يشرب علني بيومها إجه لبيتنا جنت گاعدة أُرضع ببنتي والباب مردود ممقفول فجأة دفع الباب و فات علية فزيت بساع تسترت جان سكران ويترنح بمشيته.
ـــ تطلعون من البيت ههههه طلع كلام رجلج صح جوانا.. خاينة و تلعب من وراي.. ولج باگت فلوسي و جهالي خسرتني كولشي.
شمر روحه بالكاع ويحجي بثگل:
ـــ ما أريد أنسجن و أعيش بسجن أموت تسمعيني شيلان.. والله أقتل روحي أحسلي.
خليت بنتي النايمة بفراشها و عيني ضلت عليه بحذر خفت أرادده ويتعدى علية السكران.. فاقد ماله أمان شوي
و إجت أمي وصاحت بي:
ـــ آدم.. شسوي هنا ولك سكران وطاب على بيتي.
خابرت أبوي.. اللي إجه شافه بهالحالة وگع بي بوكسيات وسحله من ملابسه وشمره برى البيت.
ـــ روح حل المطب اللي خليتنا بيه بدل ما تگضيها فشل وشرب يا فاشل اليوم التقيت بالمحامي و قدم طلب لتأجيل المزاد إلى ثلاث أشهر لازم نلكه حل بهاي المدة مو گاعد تسكر ولك كل هاي الأراضي راح تنعرض بالمزاد و أكو خبر إنو شركات مقاولة و أستثمار دتتحرك حتى تستولي على الملك كوله و تأخذه راح تعب السنين وأنت گاعد تسكر وتولول وتبچي أنت فاشل تسمع ولك فاشل.
ومر ذاك اليوم إلى أن أجت المصيبة الثانية فزينا الصبح على صوت صريخ و عياط وضوضاء گعدت مخترعة ما لگيت لا أمي ولا أبوي بالبيت بدلت و بأيد ترجف شلت بنتي و طلعت لگيت العالم تركض بإتجاه البيت الكبير وأصوات سيارات الإسعاف و النجدة الشرطة وصلت أمشي وآني حاضنة طفلتي بكل قوتي گلبي يدك سريع وخايفة من الخبر اللي حسمعه.
و الصدمة أنتحار آدم.. إي أنتحر بعد ما خسر كولشي حتى مرته وأطفاله.. عافنا وراه غركانين بالديون مفلسين مهددين بالطرد حتى من بيتنا و الخبر ما تحمله أبوي وكع بأزمة قلبية ويه صوت البجي والعويل فزعوا إلزلم شالوا للمستشفى و أمي راحت وياه تبجي بقيت مصفنة أباوع على اللي صار ما مصدگة آدم.. أنتحر شنو حياتك هيچ رخيصة ولك السجن أرحم ولا نهاية تغضب الله أمسح بدموعي بإيد و بالإيد الثانية حاضنة بنتي لصدري من شالوا الشرطة الجثة عمتي أنهارت و ظلت تزحف وراهم بالگاع وتصرخ بصوت يشلع الگلب.
ـــ بس أودعه يمة وليدي وحيدي.
نزلت دموعي بخوف شريط الذكريات مر ببالي أمس چنا جهال نلعب بهالبيت الكبير ونضحك واليوم هاي نهايته ما مستوعبة اللي صار ولا مصدگة عقلي شديشوف ظليت بقلق وخوف على أبوي ورى ساعات گالوا فات بغيبوبة من الصدمة وما صحى منها توفى بابا ولحك آدم.. وحملني هم الديون من أنباعت الأملاك بالمزاد و مرت عمي قررت تترك قريتنا و تعيش بقرية أهلها على أمل بيوم.. عينها تتكحل بشوفة جهال آدم.. قبل لا تموت.
و بدأ مشواري صرت أدور شغل لأن أنطونا مهلة بعد سنة لازم نخلي البيت
بنتي أبقيها يم أمي و أشتغلت بمطاعم و بكافيهات بكل مكان يومين و أنطرد أو بالأكثر شهر وفكرت أذب الحجاب اللي لبسته بعد زواجي حتى أحصل فرص عمل بمجالات عديدة أشتغل مودل أو عارضة أزياء بدور الأزياء و محلات ملابس بس مگدرت أغضب ربي خفت من الله يعاقبني ببنتي و هم تعودت صعب أتركه لأن أقتنعت بي واجب وفرض علية لازم أحترمه رجعت بيوم من الشغل تعبانة باقي على أنتهاء مدة الإخلاء يومين وآني ما حصلت بيت گعدت گبال أمي اللي حزنها على موت أبوي خلاها دوم مريضة.
ـــ ماما اليوم قبضت راتب أسبوعي.
ـــ بس لا طردوج.
ـــ لحد الآن لا بس طلبت من مدير الشغل ينطيني أجرتي أسبوعيًا.
هزت أمي راسها بقهر وجرت حسرة وگالت بصوت يرجف:
ـــ اليوم مريت بالبساتين يا يمة والله متت قهر من شفت الحلال و الأرض الزراعية دتتحول لشاليهات سياحية ديخلون أساس لشغلهم راحت ذيج الأيام يا شـيلان..
لزمت أيدها : هاي الدنيا يمة يوم ألك ويوم عليك الحمد لله على كل حال و هاي بنتي لـين.. مصخنة.
ـــ دتطلع الها رحي لا تخافين.
أجت لـين.. تخطي بخطوات مرتبكة عمرها سنة ونص و تأخرت بالرحي أباوعلها بيها ملامح أبوها واضحة نزلت راسي بسرعة و دمعتي بطرف عيني خاف عوزي قهر كلما تكبر بنتي تشبه أبوها.. أكثر خليتلها حمالة تهدأ عنها سخونة الأسنان كعدت وي أمي أشرب قهوة و أفكر وين نروح باجر تخلص المهلة حاولت أتواصل وي بيت خالتي بس معندي أرقام موبايلاتهم و الأرضي القديم جنت حافظته الظاهر تاركيه.
ـــ ماما إذا تأزمت الأمور نروح للجنوب نكعد يم بيت خالتي لمن أشوف شغل هناك ونأجر.
ـــ مـريم.. العوبة طردتني شلون آروح يمة لا مالي نفس أروح بس أريد أطمن على خيتي ورى هاي السنين شنو حالها ميتة عايشة.
ـــ خلي نشوف شلون تصفى بينا و أشوف بلكت أحصلهم ونشوف شنو أخبارهم.
كمت وأريد اطلع:
ـــ وين رايحة توج أجيتي.
ـــ أتمشى.
طلعت و أتجهت للبيت الكبير أريد أسأل عن المستثمر شلون أتواصل وياه بلكي يأجل موضوع إخلاء البيت لأن كدرت أرتب وضعي حتى لو أضطر أبجي شوي تمشيت ويه كل خطوة أخطيها جانت أكو ذكرى وصلت لگيت الحارس وسألته:
ـــ أريد أقابل المستثمر أو إي شخص مسؤول هنا ضروري.
ـــ وكيلة راح يستكشف الأراضي لأجل قطع بعض أشجار.
ـــ هو ليش تلاعبتوا بالبيعة الأرض هاي لأجيال زراعية و تربية مواشي وصناعة البان ومنتجات البان.
هز راسه ومجاوب أحس بحركة بعيني درت أمشي بس صوت سيارة وتوقفت من كال الحارس:
ـــ هـذا هو.
نزل رجال و أقتربت و سلمت عليه:
ـــ السلام عليكم.
ـــ وعليكم السلام
حاجيته عن وضعي وفهمته إن المهلة راح تنقضي أعتذر مني بحجة البيت حيتفلش لأن حاسبيه ضمن المخطط وراح يبنون بمكانه حدائق للشاليه اللي ديبنوه حيل أنقهرت و باوعت للبيت الكبير:
ـــ حتى هذا البيت راح تفلشوه
ـــ لا المستثمر.. ما بلغنا و أكد الحفاظ عليه هو والكوخ.
ـــ تـمام.
مشيت مبتعدة رجعت لبيتنا بلغت أمي ترزم أغراضنا و نروح لقرية الراحتلها مرت عمي عسى ولعل نشوف حل
بس شوي وأندك الباب فتحته جان الوكيل:
ـــ ست إتصلت بالأستاذ و بلغته وطلب مني اسألج عن تخصصج ممكن تقيمي بإراضيه كموظفة الأستاذ قلبه رحيم و ساعد هواي شباب في شمالنا لأجل العمل.
ـــ مهندسة زراعة
ـــ تفيدينا يريد مهندس يدير الحدائق و المنتزه الديبنيه و المشتل بس راح نغير مكان أقامتج للبيت الكبير لأن بيتكم هذا عليه كص تفليش.
ـــ موافقة والله محتاجة للشغل مشكور أستاذ.
ـــ من باجر تنتقلين للبيت الكبير كموظفة.
و بهيج صرت مهندسة.. بتخصصي و ببيت عائلتنا تعاملت ويه الشغل كأنما بيتي وبدء المشتل يزدهر دوامي هناك چان ينتهي الساعة بـ 2 الظهر.. وآني بعد هذا الدوام أبقى حرة لذا بقيت بشغلي العصر لحد الساعة 9 بالليل
وكالعادة فترة وأنطرد من شغلي بأتفه سبب كان.
بذاك الوقت صار شي جديد وغريب بحياتي.. بدت توصلني قصاصات رسائل صغيرة تجي بظرف معطر وبيها مبلغ مالي بكل فترة هالظرف ينشمر من تحت باب بيتنا وبأوقات آني مموجودة بيها بالبيت حيرني صاحب الرسائل المجهولة منو هذا و شيريد و قصاصاته جانت مطبوعة مو بخط إيد
بيوم دخلت لمحل شغلي الكوفي جان أكو شلة مراهقين دوم يگعدون هناك على تخم القنفات چانوا مؤذين بس چنت مجبورة أتحمل صفاقتهم كالعادة العروض اللي تجيني مصيرها رفض أعرف مكان شغلي مو لائق ببنت مثلي بس العوز يجبر النظرات جانت مباحة حتى الأيادي تعرضت للتحرش عروض مغرية أجتني ورفضت تعرضت لأنواع المتاعب أحاول أحصل شغل أفضل من هنا حتى أبطل بس ماكو مدأحصل
إجت عيني بعين شخص من أيام وآني ألاحظه يجي يگعد منعزل وحده بآخر الكوفي حدة نركيلة و كوب قهوة إسبرسو.. وبس يكمل يدفع الفاتورة
كلما تجي عينه بعيني يدنك على نقاله و هو بعالم بعيد أذكر بيوم التعرضت بيه للتحرش وضربت المراهق الما أستحى وآني أكبر منه وقتها فار دمي وعفت الكوفي وطلعت بدون إذن من الإدارة ولا همني الشغل تبعتني نظرات الرجال المنعزل اللي جنت أعتبره هو بذاك المكان الغلط المكان هذا ميلائمه.
إلى متى أظل وياج يا حياة مناطح
يومها لعبت روحي أتذكر ذاك المراهق الصفيق وگـرصني من إيدي وآني أقدم إله النركيلة حسيت بإهانة و مذلة ما شايفتها بعمري بيومها الليل كوله عيوني ما غفت و ضليت گاعدة للفجر أدعي على اللي ببالي كوله منك لو ما أنت متزوج جان ما شهدت ضدك و أتهمتك ولا عفت الأملاك بيد آدم.. لو ما كل هذا على الأقل إسمي عندي رجال يحميني ويهتم بيه ولا هاي الشحططة والمذلة الي ضگتها من بعد ما تدمرت صحت وآني أضرب فراشي بإيديه بنص ظلام الليل اللي يغطي عشاق بأمان ويغطي مهمومين أمثالي بنفس الوقت جبـــــــــــان لو ما جبـــــــــان مو هذا حالي.
عاد ثاني يوم آني شفتي العصر دوامي رحت للشغل بلكت الله يفرجها أحصل شغل مابي مضايقات أستدعاني المدير حضرت شكد أعذار لأن عفت الكوفي وطلعت أمس بوقت ساعات الدوام بس دخلت رفع ظرف و مده الي.
ـــ راتبج كامل و مكافأة بسيطة نهاية خدمتج ويانا ما أقتطعت الإسبوع الباقي مراح تداوميه كفينا شرج من وراج أمس الشرطة أجت وقفوني اليوم الصبح طلعت بس كتبت تعهد ما أعرف منو مبلغ الكوفي مشبوه لدعارة و مخدرات كل هذا بسبب الشوشرة اللي سويتيها أنتِ أمس خليتي العين علينا هاي سمعة كوفينا ما متوازي أخسرها بسببج لذا أعتبري خدماتج أنتهت أصلاً آني ما أوضف محجبات بس ترأفت بيج من شرحتي ظروفج بس بعد الصار أعتذر.
أخذت الراتب و طلعت دون إي نقاش تعبت من الذلة و التوسل والله كل مرة أتعرض للذل أنعل سلفة سلفاك و إدعي عليك أنت دماري أبد ما أسامحك أمشي بلايه وعي و دموعي مغوشة نظري و مغرگة رموشي وحاضنة جنطتي.
نزلت رجلي من الرصيف أريد أعبر الشارع ما حسيت إلا بسيارة رمادية بطئت السير يمي و بطنشت بالتاير شهگت برعب من كمية الطين والمي الوسخ الطار وغطاني من حجابي لحد أقدامي والسيارة ما توقفت أختفت تسابق الريح عافتني و شهگت وآني أصيح:
ـــ عوع.. سيان وطين أشتعلوا كل أهلك يا سا..قط ظليت متجمدة.
رفعت إيدي بحركة تعني أنعل أبوك 👌🏻وآني أشتم السيارة اللي أختفت أصلاً مالها وجود بس أشارتي للسراب شوي و نظرات مقززة صوبي جان رجال جبير إنتبه لشتايمي وحركتي الصبيانية وفوكها حالتي التبجي الصخر.
مرت بية السنين كبرت بنتي وأستمرت تزور أبوها بالعطل والمناسبات وجانت كولش متعلقة بي لو غيري و مرت بالضيم المريت بي جان منعتها من ضناه بس آني ما ردت بيوم أخلق بين البنت وأبوها شرخ ودوم بنتي تلمحلي أرجع وهواي أمور ماما.. بابا مشتاقلج وبابا لحد هسة ظال وحده وبدون مرة
ليش مترجعون بس أغلق الموضو
تركت الشغل بالمطاعم و هاي الأمور بعد نهاية دوامي خاصة بعد ما بنتي دخلت بسن المراهقة و أخاف أعوفها ساعات طويلة وحدها بالبيت.
هسة تكولون لعد وأمج يا حبايب أمي توفت من شهرين وقتها رحنا للجنوب و هناك أنصدمنا بهواي أمور صارت وأمي أنقهرت كولش على أختها وبنت أختها و رجعنا للشمال و أسبوع بس تبجي قهر لمن غدرها الضغط وأرتفع بصورة مفاجأة و سبب أنفجار بالدماغ وماتت بلحظتها.
و خلال هالشهرين المرت تركت الشغل
خارج نطاق المشتل أخاف على بنتي وحدها و عمال يجون خليت الغدة بالمايكرويف أحرره هسة تجي شو تأخرت بعد كبرت عمرها 11 سنة أجرتلها خط بس حيل متعبنا يوم عطل يوم يعتذر وآني أوصلها وأرجعها
فهاي مصاريف جديدة.
ولو أبوها كم مرة دز نفقة أرجعهن إله فصار من تروحله يرجعها الي محملة هداية و حتى لوازم مدرسية والله ما جنت أقبل ياخذها لا يخربون تربية بنتي بس دزولي ناس و كلام مبطن ممكن يرفع قضية ضدي هنا خلاني الين مو خوفًا أخسر القضية لا خوفًا على مشاعر بنتي و صحتها النفسية لا تتأثر وهو هم ما يوم أجه أخذها يدز مرت أبوه تأخذها حتى ما أطلعلها قبل يتصلون بأمي ويتفقون يجون عالبنت
هسة ما أعرف شلون تدبر.
وبدت بنتي تلح وتلمح تريد جهاز نقال خاص بيها وما قبلت أبداً:
ـــ شحدج وفنج بعدج گد البذور وتريدين نقال.
برطمت شفتها وزعلت وگالت:
ـــ بس بابا وعدني بي يعني من جابلي تاب أنتِ ضميتي ليش ماما؟
ـــ هذا للمدرسة وعود بالعطل تاخذين التاب و تلعبين بي أما نقال ماكو.
ـــ بس بابا گال نزلي برنامج نتراسل بي ونتخابر و نفتح كامرة ويشوفني وأشوفه والله ماما حيل أحبه لبابا لو شايفته من أروح يمه وي إخواني والله أحسدهم لأن دوم وياه.
ـــ هو ما تزوج ورى وفاة مرته أمهم؟
ـــ لا ما تزوج.. هو مطلقها وهي حامل
و ماتت بولادة أبنها الثاني من رحت إلهم أخوية الكبير سولفلي يكول كل اللي صار من ورى أمج طلك أمي وهي بعمر زغير كولش.. لأن إجت وخربت بينه وبينج.. هيچ گال.
ـــ وهو لو ما سامع من التحف العايش وياهم ما يعاير بيج.
ـــ لا ماما والله أخوية علاوي حيل حباب.
جريت حسرة وغصة وگـفت ببلعومي:
ـــ احححححححح.
ما حجيت يومها حسرة أحجي على بـروان.. تهد كون هم هيج تدافع علية مو بس عليه باوعت من الشباك دخلت بنتي للبوابة حركة بنتي وهي تدخل البيت و أشرتلي علامة السلام وكالت:
ـــ هااااي.
هسة بنت شابة مراهقة:
ـــ وعليكم السلام و رحمة الله وبركاته مو جنج تأخرتي.
ـــ إي ماما رحت للمكتبة أريد أكتب تقرير عن التكاثر وأنواعه عند النباتات.
ـــ لو كايلتلي آني إفيدج نسيتي آني زراعة.
ـــ لا ما أريد لأن لازم أكتب المصادر صاحب الخط اليوم ما إجه ماما لو تبدليه كم مرة يسويها بحجة عاطل و ميتصل بيج حتى تجين علية و أظل مشتولة شكد عيب اليوم وصلني أخو صاحبتي.
نفس الموقف يا الله شلون أريد أنساه و شلون تجي المواقف غصب تذكرني بي وقتها جنت طالبة متوسطة.
همست بألم : روحي ماما بدلي حتى تتغدين
ـــ ما أشتهي راح أنام صدوك من فترة ماكو رسائل من العاشق المجهول.
وظلت تتغامز خزرتها:
ـــ ولج يا عاشق.. تلكي واحد يريد يكسب ثواب بينا وحيدات والدنيا تناطح بينا نمشي على مبدأ أخفي ما تنفقه يمينك كي لا تعرفه شمالك.
ضحكت بنتي:
ـــ مممممم إي فاعل خير شيخ جامع تلكيه يوزع فلوس للأجر و الثواب و بقصاصات مقواة يكتبلج سطر سطرين مطبوعة بالفصحى ومعطرة أغلى العطور.
رديت بسلاسة:
ـــ لا مكام يطبع فصحى من كم سنة حول عامي شنو نسيتي.
ـــ ها إي هم صدوك وأنتِ ليش هيج تحجيها بأسلوب المهتم ليش مو أنتِ ممهتمة بالعاشق المجهول أول مرة أشوف فاعل خير يكتب كوني كعطري هذا حين تستنشقي حروفي و كلماتي بس صدوك عطر الرسائل مميز مدري وين شامته.
كمتلها جريت شعرها :
ـــ عزا بعينج شنو مهتمة ولج ما نعرفه رجال لو مرة كبير زغير شايب شاب إذا مهتمة بس للفضول منو هو شمعنى أختارنا يتكفلنا براتب وإذا كتب عبارات يجوز شاعر و حب يشعرلنا عاد الزلم هم شمحصلين منهم بس مجرد كلام منمق.
ـــ معجب بيج بس يخاف يصارحج تلكي مهندس من مهندسيج اليشتغلون جوة إيدج و يخاف يظهر نفسه الج لا مصيرة إستغناء عن الخدمات أو يجوز واحد من ماضيج.
ـــ شو من كبرتي هواي تلمحين لماضي هذا طاح حظج.
لطفت الجو لان زعلت مني بنتي
ـــ سوالفج التركية تركيها أرجوج شنو آني بع بع الزلم و أخوف ما أعتقد من العطر هذا غالي جدآ و إحنا المهندسين ناس كد الحال.
خلت وراحت تضحك شلون فورت دمي صحت:
ـــ ممنوع بعد تجين وي أخو صاحبتج حتى لو صاحبتج موجودة.. تعتذري وآني مخلية رقمي يمج تنطيه للإدارة يتصلون بية أكيد واكفة تتمضحكين وياهم من نزلتي من السيارة و العمال تشوف والي مأجرين الشاليهات خاصة إمام البيت يشوفون وراحت سمعتنا.
سكتت عزا هاي آني شدأحجي مدت بنتي راسها وهي مستغربة شحجيت بس آني كررت نفس كلامه اللي بذاك الوقت كررت كلامه لبنتي.
بيومها ما أجاني التكسي اللي أجره بابا خط يوديني و يجيبني أقترحت عليه صاحبتي توصلني هي وأخوها يوديها ويجيبها وافقت جان شاب مرح مكدر ما أضحك وياه هو وأخته من نزلت يم البوابة الكبيرة لبيتنا جان هو يرش الأرض بباب البيت بعد ما نظف المكان رجعت ألتفتت لصاحبتي و دنكت أنحنيت على جامتها وآني أتهامس وياها عنه و نضحك و أخوها هنا صاح.
ـــ ضحكنا وياجن شنو أسرار عدجن.
وضحك باوعتله و ضحكت:
ـــ إي سر مهم شنو هذا فضول منك إلا تعرف.
وضحكت ورى مراحوا وكفت لحظات وآني اراقب السيارة الي أختفت رديت أتلفتت عليه وأبتسمت مثل يومية من أرجع من الدوام :
ـــ شبيك معصب وتخوزر شصاير المفروض تتلكاني بإبتسامة حلوة و....
ملحكت أكمل الا وجه هوز المي علية من فوك لجوة شهكت عزاا شششش ححححححح:
ـــ ولك لا برد بللتني يا الله صاروخ أمريكي ينزل بالغلط على راسك عابت.
و بجيت.
ـــ أدب سز فوتي.. جوة يلة ممنوع بعد تجين وي إخوان صديقاتچ حتى لو صديقاتچ موجودات واللّه ثم باللّه
لدفنج هنا ممنوع تتمضحكين هم آني مانعج شلون واگفة وتتبسمين وي الشاب مو آني هنا الثور المخليتلة گرن ليش ما أجيتي وي الخط الأجرناه إلج.
ذبيت حسرة آني شجاني اليوم أتذكره خلي يولي المنافق أبو نسوان فتت يم غرفة بنتي بايكة التاب وأسمع صوتها وي أبوها إي صوته مبين.
ـــ لينا الحلوة مشتاقلج باباتي أحتمال إجي للشمال و أمر أشوفج.
ـــ آني اكثر بابا وينك الحك عيني ترى ماما عدها معجبين و مهندسين وشكد تنخطب.
صوته الحزين والعبرة بينت بي:
ـــ الله يوفقها.
ـــ أكولك بابا أكو معجب سري يدزلنا فلوس ورسائل من وعيت للدنيا وفطنت هذا مستمر شو أشك بي أنت.
ردها بسرعة:
ـــ أبد وهيج فارغ وأتغزل و بمنو بأمج البينا أنتهى أصلاً من يوم اللي تهمتني بكتهم و بلغت علية إنتهينا.
ـــ والله فرحت كلت أنت لعد هذا منو؟
عصبت وردت أفوت وأرزله بس درت ظهري ورجعت للمطبخ.
ومرت إيام لمن شفت أسوء كوابيسي كدامي سافرت حمائم الحزن وغربان الفراق بعيوني من بعد ذاك الماضي الأليم للحاضر هسة إي ردت أفشخة و أفوخ گلبي بس يعرف يراوغني.
سمعت أبوه
_ ولا أدري حفيدتي هنا تعيش والمهندسة هي أمها.
وصوت بنتي
ـــ جدو ضجت شبيهم هيج بابا ظال بدون مرة وهي ظاله وحدها خليهم يرجعون.
وبعد مسمعت الجواب لأن ركضت للبيت لكيت تلفوني يدك :
ـــ ها سـؤدد.. مشغوله هسة مـاجدة؟ شنو؟ سافرت رجعت للوطن يااا وما رجعت أدري ولج آني بالشمال وين أعرف شبيها ولج شروح للجنوب تحجين صدوك لا تخافين هسة أحنا بقلق وتلكيها بشهر عسل وي مـاجد..
ورى ما شمرت الحجارة:
خلص الماضي وهسة أرجع بيكم للحاضر يوم رجع و أنصدمت هو رب العمل وهو المجهول برساله.
عــــــــــــــــــــــــــــــــون
ركضت دفرت الباب بركبتي ودخلت لكيت مرت أبوي لافة وجدان.. ببطانية ووجدان شايغة روحها وتصرخ صريخ يملخ الگلب التنور مكلوب المنظر يخرع قنينة الغاز مشمورة على صفحة و مريم خاتلة بزاوية ورى برميل النفط الفارغ خانسة و تباوع بعيون مليانة خوف وتبجي بسكوت.
صاحت مرت أبوي وهي مخبوصة:
ـــ يمة للمستشفى بساع شعرها وجهها و إيديها أحتركن لحكت عليها و لفيتها لا جسمها كله يشتعل.
شلناها وركضنا بيها والجوارين ألتمت تطفي بالنار اللي كبت من التنور جلبت بحبل ملابس و عبرت على برج الحمام اللي جبته للجهال يتونسون بي همة و أمهم لهبة النار صعدت لفوك السياج ودخان أسود يعمي العين ترس الجو للناظر عبالك البيت كوله أحترك طلعت شايل وجدان.. وركظت للسيارة وهنا تلاكيت ويه إخوانها و أهلها اللي أجوا فزعانين على الصياح والدخان التفتت على مرت أبوي وصحت بيها بصوت عالي:
ـــ يمة أبقي يم مـريم.. والجهال خوما كلكم تفزعون وأنتِ خالة أم سلمان.. تعاي وياي بساع!
(وأم سلمان تصير مرت أبوها الوجدان الجبيرة من نسوان خالي).
صعدنا بالسيارة وأم سلمان.. لافتها بحضنها تبچي و تدعي وآني أسوق ما أشوف الدرب من الخوف والقهر وآني أسمع أنين وجدان.. اللي يكسر الصخر جانت بس تهمس بأسم الجهال وتغيب عن الوعي وترجع تفتح عيونها وصلنا للمستشفى شلتها وأركض بيها بممرات الطوارئ أصيح:
ـــ دكتور وينكم.. لحكونا البنت احترگت!
إجوا الممرضين والأطباء يركضون أخذوها مني ودخلوها لغرفة الطوارئ وقفلوا الباب وگـفت برى بالممر متوتر و تعبان هدومي كولها ريحة دخان صياح الجوارين بعده يرن بإذني إلتفتت لگيت إخوان وجدان.. وأهلها تارسين الممر عيونهم تجدح نار تقرب علية أخوها و عيونه بگصته ولزمني من ياختي وهو يصيح:
ـــ عـووون! أختنا شجرالها؟ شسويت بيها هاي مرتك المسودنة حركت بتنا مليون مرة كنالك اعزل أختنا عن خبلتك.
باوعتله صفح ونترت إيده عن ياختي وگلتله:
ـــ أختك ما تفارك الجهال أعزل مـريم وجهالها وياها خوما فرهود تاخذون الجهال لأختك ومـريم.. تنطرد بعدين أرجوك ولو الوقت أبد مو مناسب بس ثقف لسانك وأعرف شدتحجي شنو خبلة ومسودنة عيب بابا عيب زوجتي ما بيها شي مجرد إضطراب عقلي وتطيب.
دفعني وراح لزم باب الطوارئ هو يدردم :
ـــ شوف هذا إحنا بيا حال و يتفلسف براسي واللّه صوج أبوي أنطاك مرة وجدان.. خوية ولج خوية گلبي نار عليج خوية شلون بينا ولكم خيتنا الزغيرة راحت من إيدينا.
كتله : ماتت شنو؟! بيش طالبها وتفاول عليها أنتم صوجكم مليون مرة گايلكم تنور بالبيت ما أريد.. و تروح بإيدك تجيبه واللّه أختي علمتها مرتي تخبز هي من صغرها نويدرة عالشغل معدلة ولكم آني لحد هسة أعتبرها صغيرة لأن طفكة و الطبخ إذا مو آني واگف يمها أو مرت أبوي.. فلا أقبل تطبخ النوب تخبز حذرتها من التنور ومرت أبوي تبرعت هي تخبز و وجدان تعجن بس أكيد غافلتنا وشعلته تنور جديد أكيد بي خلل و هنا أنت لازم تحاسب روحك أنت َ الجبته وفطنتها عليه أحملك مسؤولية أي شي يصير على مرتي.
هد عليه و ظل يضربني بوكسيات
خالي وكف بينا وضرب أبنه:
ـــ تضرب عون؟
بغصة خنكته وكال لأبنه :
ـــ كافي.. ولا كلمة السالفة قضاء وقدر التنور كب عليها هسة عوفوا الحجي وحمدوا اللّه ما كب كل جسمها أدعولها بالسلامة هسة بدل هالمناگر.
هنا حاجيت خالي:
ـــ خالي لو ما لطف اللّه ومرت أبوي
شافت البطانية المشرورة على الحايط مكبعتها كبت كلها و الظاهر من جاي تشعله بي خلل و كب إحنا منبهيها لا توصله شوداها ناخيها تشوي سمج بي آخذ السمج للشوي بإيدي و أجيبه شحلاته بس بعد قضاء وقدر أدعولها هسة بالسلامة بدل ما تدورون طلايب بعد وياي الحچي مو هسة عگب ما نطمئن عليها شي صار قضاء وقدر.
وگفنا كولنا ننتظر الفرج والوقت يمر عبالك سنة عيونا على باب الطوارئ ننتظر الدكتور يطلع يبشرنا ولد خوالي عيونهم اللي تآكل بية أكل نظراتهم بكوم و خوفي على وجدان لا تطلع حالتها سيئة الممر صار خنگة ريحة المعقمات ويه ريحة الدخان اللي بهدومي سوت غشاوة على عيوني.
أم سلمان جانت كاعدة تلطم على ركبها وتبجي بصوت ناصي:
ـــ سودة بوجي يا وجدان.. ربي لطفك باليتيمة ربي لاتفجعنا بيها.
أخوها الثاني تقرب جان أوكح من الكبير دفعني بكتفي وهو يكز على سنونه:
ـــ قضاء وقدر شنو إحنا مأمنين أختنا عندك تالي نركض وراها بالمستشفيات جان عرفت شلون تحافظ عليها.
دمي فار والوجع اللي بگلبي تحول لشرار بعيوني ولزمت إيده اللي دفعني بيها وعصرتها حيل:
ـــ السانك لا تتعدى الحدود لا أتصرف تصرف ما يعجبك أختكم مرتي اللي يوجعها يوجعني بدل ما واكف تتهجم و تحاسبني وتصيح بالمستشفى أدعي الله يكومها بالسلامة.
خالي حجز بيناتنا وصاح بينا:
ـــ بسكم عاد إحنا بيا حال خل نشوف البنية شصار بيها و تالي لكل حادث حديث.
بهاللحظة أنفتح باب الطوارئ طلع الدكتور وهو ينزع بجفوفه والتعب مبين على وجهه ركضنا عليه كلنا فرد ركضة صرنا حلقة داير مدايره.
— بشر دكتور.. فدوة لعينك كول يالله!
صحت بيه وروحي معلكة بكلمة منه
الدكتور باوع بوجهنا تنهد وهز رأسه:
ـــ الحمد لله لحگتوا عليها ولفيتوها بالبطانية هذا التصرف قلل من عمق الحروق بجسمها الحروق من الدرجة الثانية صايرة بوجهها وإيدها وصدرها وچتافاتها و حتى الهدوم لازكه عليها گوة گدرنا نصلخ الجلد وننظف المكان حالياً بفضل الله عدينا مرحلة الخطر بس لازم تبقى تحت المراقبة والعلاج علمود الالتهابات ونمنع التشوهات.
أم سلمان فزت وهي تبجي:
ـــ ويلاه يوجهج يا وجدان.. يمة بنيتي راحت!
الدكتور التفت عليها وكال بنبرة حازمة:
ـــ خالة كولي الحمد لله على سلامتها المهم الرئة مالتها نظيفة ما أستنشقت دخان هواي هسة راح ننقلها لردهة الحروق و واحد بس يبقى وياها.
التفتت على إخوانها جانت عيونهم مكسورة والشرار الي بيهم طفى كبال حجي الدكتور باوعت للجبير وكلتله:
ـــ أم سلمان.. تبقى وياها هسة وآني وأنت نرجع للبيت نشوف الجهال والضيم اللي عفته وراي ونفهم شلون كب التنور.
أخوها الجبير باوعلي وهز رأسه بالموافقة جان مبين عليه التعب والكسرة بعد حجي الدكتور عفنا أم سلمان يم وجدان.. والطريق كله سكتة بس صوت المكينة وصوت أنفاسنا الثكيلة آني بالي مو يم الدرب بالي يم مـريم الخانسة ورى البرميل مـريم الي شافت كولشي وعيونها جانت تحجي حجي ما كدرت تنطقه وصلنا للمنطقة ريحة الحريق بعد هي تارسة الصوبين الجوارين جانوا بعدهم واكفين بالباب والزلم دتلملم بالهوسة نزلت ونزلوا أخوان وجدان.. وأبوها وراي دخلنا للحوش المنظر جان يوجع الصدر حبل الملابس محترك ومكطع وبرج الحمام صاير فحم والطيور خطية ميتة بي المنظر يقهر مرت أبوي جانت كاعدة بالطرمة حاطة مـريم بحضنها وتلولي للجهال اللي ناموا من التعب والخوف من شافتني فزت:
ـــ ها يمة عـون.. بشرني فدوة لعينك أخابر عليك ما ترد وظال بالي وجدان شصار عليها؟
ـــ الحمد لله خالة ربج لطف حروقها قوية بس عدت مرحلة الخطر وهسة بالردهة.
جاوبتها وآني عيني تدور مـريم.. أخو وجدان مشى للتنور المكلوب كعد على ركبه يباوع للقنينة المشمورة وصاح بصوت بيه رنة شك:
ـــ عـون تعال باوعلي هنا التنور شلون يكلب بهالطريقة والقنينة منو الشمرها هنا وهي مفتوحة؟
تقربت منه عيوني صارن على صوندة الغاز الصوندة مجرورة جر كأنما أحد ساحبها بحيل صدر التفتت على مرت أبوي وسألتها بصوت ناصي بس حاد:
ـــ يمة مـريم.. وين جانت من كبت النار وأنتِ وين جنتِ؟
مرت أبوي أرتبكت فركت إيد بإيد وكالت:
ـــ يمة آني جنت جوة بالصالة أرتب بغراض الجهال وما حسيت إلا على الصريخ و هوسة طلعت أركض لكيت النار گابة ومـريم.. خاتلة ورى البرميل.
مشيت بإتجاه مـريم.. كعدت بمستواها لزمت إيديناتها جانت ترجف باوعت بعيونها حاجيتها بهدوء:
ـــ وجدان.. راحت للمستشفى وهسة تصير زينة بس كوليلي أنتِ جنتي يمها بالحوش شفتي التنور شلون وِجت بيه النار.
باوعت لأمها بنظرة كولها خوف ونزلت رأسها وبدت تبجي وتناشغ و جتفت إيديناتها لركبها ما رضت تحجي هنا گلبي لغفني السالفة مو مجرد قضاء وقدر أكو حلقة مفقودة الخنسة مالتها ورى البرميل جانت صدمة وخوف من شي هي سوته أو إتسببت بي بدون وعي عفتهم واكفين يتفحصون التنور وريحة الحريق بهدومي صارت عبالك طوق وخانك ركبتي شلون راحت من بالي مـريم.
ظليت بشك بمريم هي مو بإدراكها هذا الاضطراب الخبيث اللي من يركبها يضيع وعيها و يخليها تسوي أمور وترجع تخنس مثل الطير المذبوح الخوف الشفته بعيونها ورى البرميل ما جان خوف ضرة شمتانة أو وحدة قاسية جان خوف طفلة ضاعت بوسط عاصفة هي شعلتها و متدري شلون
شوي وراحوا ولد خالي بعد ما مرت أبوي تلاحكت شكوكهم.
ـــ من طلعت و شفت النار خفت لا تنفجر القنينة صحت مـريم.. تطفي القنينة وتبعدها عن الحريق لا ننفجر وآني إلتهيت بوجدان وأنتوا مـريم.. تعرفون وضعها جرت القنينة هي والصوندة بيها شمرتها لبعيد بنتي مصدومة و خايفة لذا ختلت ورى درام النفط.
ما حجوا بس كلمتين : يصير خير.
فهمت يردون ياخذون موقف ورى ما راحوا كامت مرت أبوي متوترة غسلت المكان ونظفت الصخام أخذت الجهال جوة منعسين كد ما باجين متعلقين كولش بوجدان.. شوي طلعت ما أعرف شحجي و شكول مرت أبوي كالت لمريم :
ـــ مرايم يمة فوتي جوة بنيتي بس أكمل أسبحج كلج صخام.
ـــ آني أتكفل يمة أنتِ كملي و أرتاحي.
تقربت من مـريم لأن ظلت تنود داخلة نوبة مرة تبجي و مرة تضحك شعرها خلال هاي السنين طول و هسة متناثر لخصرها مبعثر بأهمال لامة رجليناتها لصدرها و تناشغ أباوع الصخام مالي وجهها تقربت منها هي فزت ورجعت ليورى لحد ما طخ ظهرها بالحايط
تقربت وكعدت كبالها مكرفص مديت إيدي ومسحت على شعرها بهدوء ردت أطمنها أعرف الصار يزيد حالتها سوء رغم داخلي عتب وغضب منها مكدر أعبر سنين معاشرها وتصدف أمور تسويها تغضبني أكتم الغضب أعرف الصراخ والعصبية توتر وتزيد وضعها للأسوء.
ـــ حياتي يا وصال الروح أنتِ شو باوعي بوجهي.
كلتلها بصوت ناصي ودافي خالي من إي عتب رفعت رأسها وعيونها جانت غرگانة دموع بياض العين صاير أحمر تحسس ومتفوخة من الدخان شفايفها جانت ترجف وهي تحجي بصوت متكطع:
ـــ عـون.. والله ما ردت.. النار.. النار كبت بسرعة.. آني ردت بس.. بس هي.. هي ضوجتني عـون .. عقلي وكف ما حسيت بروحي إلا وآني أجر الصوندة.. و عشوش راس وجدان أحتركن و وجدان الغول نزع جلدها وطلع وجهها الحقيقي غول وجه ما بيه جلد. راح أحرك عش راسي و أخلي عصافيري تطير يم الله.
وغمضت عيوني بوجع السالفة طلعت مثل ما توقعت نوبة ثانية من نوباتها التدمر كولشي بلحظة غضب وضياع لزمت إيديناتها الي ترجف وحضنتهم بين إيديه:
ـــ اششش.. أسم الله عليج أهدئي يمعودة أهدئي لا يسمعج أحد بلي كلتيه زين.
ـــ بس هي وجدان.. ضربتني فدفعتها هي والتنور وسحلت الصوندة.
كل شوي تحجي قصة وضاع علية شنو السوته لوجدان وكفت على حيلي باوعتلها وكلتلها بحزم:
ـــ مـريم أي واحد يسألج أنتِ حركتي وجدان كولي التنور كب عليها وخفت وختلت ورى براميل وآني بس وجدان توعى أحاجيها بس كون ما حجت لمرت أبوها والله مبية طلايب شوداج للتنور وشعليج بوجدان.
صفنت بوجهي ونططت عيونها وكفت كبالي وهي تتقرب من وجهي عود عصبت علية لأن لمتها.
ـــ وجدان مرت الغول أنت غول ما أحبك أنت مو بزون شوارع أنت غول غابات أنت حمار أنت أذبحك بس تنام لازم الغول يموت.
ظلت تهوس عبالك بمظاهرات وتهتف بوجهي.
ـــ فالتحترق الغيلان فالتسقط الغيلان عون مو بزون عون طلع غول متخفي ببزون عيون عون الخضر طلعن مو عيون بزونية طلعن عيون غول صابغهن اخضر.
أيدي على خصري أراقبها تكمز وتهتف وتألف من يمها قصص علية:
ـــ ها عون ها أنت حركت مرتك الغول و راح تموتنا كولنا أنت وحش جريذي منهولة روح مزاعلتك.
أباوعلها معصبه وأمها أجت تريد تسحلها للبيت.
ـــ تعاي شلعتي گلبنا ولج تعبتينا شنو الحل وياج يمة عـون علاجها الأخير هذا كولش خلاها عدوانية النوب لا تبيس بالجهال وتموتهم.
_ بعد لا تنطيها منه أكو طبيب جان بالخارج راح أخذها إله بلكت على إيده الشفاء.
_ يارب أشفيها لو الثمن عمري آني مرة كبرت وأنتهى مشواري بس هي لخاطر بيتها ورجلها وجهالها.
ظلت تفتر بيني وبين مرت أبوي لو تدور داير ما دايرنا و عيونها منططة مو طبيعية كولش نظرة شر آني من هيج توصل نوبتها لا تكولون عفاا عالزلم والله أتخيل بيها جني لابسها وأخاف هسة عيونها تجدح بنظرة غريبة نظرة مو مالت عاقل نظرة جنية مو بشر من شافتني خفت ورجعت ورى كلت لمرت أبوي :
ـــ يمة آني راح أفوت للجهال أنتِ يمها بعد.
همست : ولك وين شارد.
ـــ ممتوازي هاي محيرتني السادة يگولون متعارضة من الصدمة دايسة والأطباء يگولون هذا إضطراب.
ولج يمة صرخت من ظلت بأضافيرها تخرمش الهوه وتبتسم بضحكة خفيفة تخرع و تأشر بإيدها بالهوه عبالك دتطير طير تنشه من كدامها وكالت بصوت يرجف وناصي:
ـــ عون.. عون لا تخاف ما أعضك عضة النمر بس دشوف.. الطيور طارت البرج صار أحمر.. حلو الأحمر عون دشوف روح الطيور تفتر علية وتريد عش راسي تحركه كلهن نار ؟ وجدان جانت تشوي أختي السمكة كم مرة أكللكم السمك أخواني مو مال شوي وجدان غول.. كتلت أختي السمكة بس التنور راد يلعب وياها.. راد يحضنها و القنينة ظلت تركص و الصوندة تردح السمكة عروس مو مال تنشوي إي كوله من وجدان ما ركصت بعرس السمكة فأحتركت
كلام تمسلت وهذا العلاج يسوي هلوسات أريد أخذها للطبيب يبدله لزمت إيديناتها ترجف مثل السعفة وكلتلها وگلبي ينعصر قهر:
ـــ مـريم.. أهدئي همزين مو جني بيج جان شردت أهدئي فدوة لطولج.
دارت وجهها بسرعة و عيونها وسعت صارت تباوع مشتتة وتهز برأسها حيل وتصيح بنبرة مخنوكة وبيها جنون:
ـــ النار جانت تضحك وجدان صاحت.. كالتلي.
ـــ مـريم عاونيني وآني كلت لصوندة الغاز روحي يمها.. روحي شمي ريحة السمك آني ما جريتها عون.. هي مشت وحدها مثل الحية الحية تلدغ وجدان تلدغها.. علمود لا تاخذك مني! هههههه.. هسة.. وجدان صارت سودة ما تحب السواد.. أنت صح.
بلعت ريكي و غصة خنكتني كلامها خبلني كل شوي قصة شكل مـريم.. ضايعة بغير عالم لزمت كتافها وهزيتها خفيف ردت أصحيها:
ـــ وصال اششش أنتبهي اشش بعد لا تأذين أحد الشرطة تبوكج ويخلونج بقفص.
رددت : قفص لا أختنك.
حطت إيدها على حلگها وبدت تبجي فجأة و تلطم على راسها الأشقر وتصيح بصوت هيمانة:
ـــ لا.. لا عون.. لا تعوفني للشرطة همة يريدون يحطوني بقفص مثل الطيور! آني مو مجنونة عـون.. آني بس ردت التنور يطفي.. بس هو وج.. وج.. وصار شكبره.. أكل شعرها.. وجدان.. أكل إيديناتها! مو آني الطيور حركت الغول وجدان.
أخذتها بحضني بالقوة وهي ترافس و تناشغ نزلت دموعي على شعرها المليان رماد السالفة هسة قفلت مـريم هي اللي حركت البنت بدون ما تميز الجريمة من اللعب مسحت وجهها وكلتلها وآني أصد بعيونها المجحظتهن وتفر بالقزحية بنظرات مموزونة:
ـــ وصال أسمعيني زين تصيرين عاقلة هسة تغسلين وجهج و تنامين إذا أحد سألج لا تجيبين طاري الصوندة ولا الحية.. أفتهمتي؟
هزت رأسها وهي تبتسم بكسرة رجعت خليت ذيل گلبيتها بحلكها وظلت تكمز وطربك وتصيح
ـــ دييي دييخ يا عون الحمار ديييخ يلة آني أركب الحصان وأصيح ديخ وأنت حمار يحلم يتحول حصان.
ـــ يمة هذا العلاج أمس جبته أريد أتعارك وي الدكتور اللي كتبه البنت من أمس لليوم تهلوس و مو طبيعية.
وصيت مرت أبوي تنتبه لمـريم متبقي الجهال يمها إلى أن يزول مفعول الحبوب وطلعت لسيارتي كعدت وخليت راسي على الستيرن دقايق وراها يا الله رحت للمستشفى لكيت وجدان.. واعية يمها أهلها و إخوانها توترت بس لا حجتلهم بس شافتني كالت بصوت متألم :
ـــ لو ما مـريم جان متت والنار أكلتني بس مـريم نقذتني و خالة أم مـريم طفتني كبل لا النار تحرك كل جسمي.
تباوعلي و تتألم و تون كلام إخوانها خلاني أعرف ليش ما أعترفت ضد مـريم.
ـــ جاي نطالبك تعزل المسودنة عن اختنا بس بعد أنقذت اختنا لو ما هي جان ماتت وجدان العزيزة.
بقت يومين لمن تحسن وضعها طلعتها وجهها وإيديناتها مصلوخات و صدرها هم بقيت أعالج أثنين وحدة شوهتها الحروق وحتى من طابت بقى أثار مكرمش بواحد من خدودها و إيديها تكرمشن إما الباقي طاب مترك أثر
غيرت علاج مـريم و شوي هدأت على العلاج الجديد بس هذا أعراضة يخليها دوم نايمة وخاملة و إذا كعدت روحها بية وتريد عصفور خامس و اللي أنولد أخوانه الكبير عمره عشرة والوراه تسعة والوسط ثمانية والرابع سبعة هسة هذا شرف وقتها مـريم.. تجيها كوابيس ما بين وعي وبين إضطراب أوقات تصفن وتحجي أمور صارت ماضي بس متذكر شنو وليش متعرف عالحدث مثلاً اجت:
ـــ عون وينه هذا نصير الشعره خفيف
زين الحجي الكبير شفته شلون مات بالمستشفى و هاي أم جنات خطية هي وجنات والله يكسرن الخاطر.
سألتها : تذكرتيهم تعرفيهم؟
_ لا بس يمكن ذول كائنات غريبة محتلة وراح يحتلونك.
سكتت بدة عقلها يذكر على علاج أخر طبيب بس بعده ما يميز الحدث اللي تذكره ولا الأشخاص طبعا ما كتلكم العصفور الخامس أصرت تسميه ياسر
وفعلاً جان نسخة عن ياسر.. خلاها تتعلق بيه لدرجة بطلت تعارك وجدان على الجهال التهت بياسر..بيوم أجتني ترجف وتأشر على غرفة مرت أبوي.
ـــ الكرعة صارت ثلج غيمة مثلجة لزمت أيدها حيل نايمة ما تكعد بجيت كعدتها متقبل وهي تطلع طيور ذهبية و فضية من صدرها و صعدن للسكف ردت إلزم الطيور تعال نصيدهن.
فزيت مستغرب من كلام مـريم.. جانت كولش متوترة خلت و رجعت لغرفة أمها تمددت بصفها مثل ماتعلمت على حضن أمها بالليالي اللي آني يم وجدان
باوعت لوجهها شاحب عيون مسدودة وشفايف مبتسمة لو ما أخلي إصابيعي على ركبتها نبض الحياة لكلت نايمة ونوم العوافي يمة.
أي نعم مثل ما عرفتوا توفت بصمت وهدوء ودون عذاب الروح طلعت دون حتى إحتضار من سنة فرحنا خلصت من المرض بس الظاهر مشيئة الله تنتقل روحها بكل هدوء نزلت على ركبي بالگاع وصرخت بصدمة:
أمي الولدتني چنت طفل من توفت وما تأثرت عليها مثل ما تأثرت على أم مـريم لهذا يومنا لو أذكرها أحس موتها جرح دموعي نزلت و تهسترت وگمت أصيح:
ـــ يمة يحبيبة جان يحرمني أصيحج يمة جنت أخاف بس آخر السنين مكدر يمنعني يمة بعدني ما شابع من كلمة يمة هواي أستعجلتي الرحيل ليش هيج تعوفيني
ظليت أنحب و مـريم.. كعدت كابلتني تبجي ومتعرف ليش.
ـــ لا تبجي ترى أبجي وياك الكرعة نموعها أجيب جداحة نشعلها تموع وترجع تكعد.
جريتها لحضني حيل وآني أبجي وهي تريد توخرني
ـــ بس شوي أتنفس ولك أختنكت.
بساع فزيت مستغرب حجي مريم الي مبينة متوترة كلش خلت و رجعت لأمها.
تمددت صفها مثل ما تعلمت حظن أمها بالليالي الي آني يم وجدان.
وجه شاحب عيون مسدودة وشفايف مبتسمة.
لو ما أخلي صابيعي على ركبتها نبض الحياة لكلت نايمة ونوم العوافي يمة.
أي نعم أكيد عرفتم توفت بصمت وهدوء ودون عذاب الروح طلعت دون حتى إحتضار.
من سنة فرحنا خلصت من المرض بس الظاهر مشيئة الله تنتقل روحها بكل هدوء
كعدت على ركبي بالكاع والألم بداخلي قوي.
أمي جنت طفل من توفت ما تأثرت عليها مثل أم مريم ليومنا لو اذكرها أحس بداخلي موتها جرح.
_ يمة يا حبيبة جان يحرمني اصيحج يمة وجنت أخاف بس آخر السنين مكدر يمنعني يمة بعدني ما شابع من كلمة يمة هواي أستعجلتي الرحيل.
ليش هيج تعوفيني
ظليت انحب و مريم كعدت تكابلني تبجي ومتعرف ليش
_ لا تبجي ترى أبجي وياك الكرعة نموعها أجيب جداحة نشعلها تموع وترجع تكعد.
جريت مريم لحضني حيل واني أنحب وهي تريد توخرني
_ بس شوي أتنفس ولك أختنكت هي ناخذها نخليها بفرن الطباخ بس ما يكفي.
شوف الكرعة ام شعر الطويل مثلجة باردة.
_ من يمتى هيج باردة
_ من رحت أطير للثلاجة و زين ما أنكسر الجناج واشرب ماي هي ثلج بس دكيت باب غرفتك يم الغول أم وجه المكرمش ما فتحت.
_ أستغفر الله أكيد من الليل وفايت ساعات أنا لله وأنا اليه راجعون.
شلت الجثة للمستشفى على مود شهادة الوفاة.
وصيت نسوان أخوان و نسوان أبو وجدان على مريم.
أنترس البيت بخوالي ولدهم نسوانهم بناتهم شالولي الفاتحة.
وأني وأبن خالي أجة وياي نكمل إجراءات شهادة الوفاة و فحص الجثة و تسليمها النا وراها للتغسيل تكفلت تغسلها مرة بخيته من المنطقة.
الغصة داخلي وعيوني تصب دمع بس عنوانه دم.
النفس الأجرة مجمر لبست جفية جنوبية و تنقبت بيها.
ورى التشيع التابوت على متوني وياي ولد خوالي وشباب من المنطقة.
مرة غريبة وحتى مو عربية بس فزعت المنطقة لفاتحتها.
فاتحتها صارت جبيرة كد ما بهاي السنين بنت علاقات طيبة وي الناس.
كاعد واعزب بالفاتحة و مريم بعقلي وبالي يمها ما شفتها من وقت الي أخذت الجثة للمستشفى وهسة ليل ودنصب عشا للعالم.
قبل الفاتحة ثلاث أيام جانت..
ورى ما كفت العالم واسوني أصدقائي وولد خوالي وخوالي تدرون الناس الغرب أعتقادهم هي أمي الولدتني.
حتى يكولون عيونك وعيونها بيهم تشابه.
حاجاني خالي
_ صير قوي لا تنهار يا أبن أختي المرة تعبت من المرض و هذا حدها وصل بس كول الحمد لله ماتت دون عذاب ولا ألم ولا جيب وودي مستشفيات.
رديته _ أي والله طول عمرها خفيفة عالعالم ومو مؤذية عاشت غريبة مطرودة من أهلها وماتت غريبة.
شهكت أبجي
_ آني مقهور بنتها مو بوعي تتكفل تغسل أمها وتكفنها يا خال كفننها الغرب لا أخت بجت ولا بنت واعية الحال. ولا ولد شال حمول تابوتها والله ظلم.
_ أذكر الله وأستغفره لعد أنت شنو مو أبنها؟ الأم الربت يا عون لا والله وحدة منا صارت بهاي السنين تسولف وجدان ما تقبلك أبد لو علت ببتنا توكفلها الحق ينكال صارت منا وبينا ولا تكول ماتت غريبة.
ترخصت أروح اشوف مريم وضعها أكيد مو زين
وهذا ياسر أبني الخامس بعده زغير
تحمحمت وطبيت لكيت مريم بزوية تباوع للعالم وللعزاء بعيون مستغربة وخايفة وخانسة
ظليت بالباب دزيت وجدان تجيبها الي.
أجت بلهفة تعترض
_ دوخني بس يبوووي ويبوووي و الله حتى عصافير راسي طيرنها.
راح أتخبل من وراهن صدعني النوب أكلهن بس بدل ما تبجن ركصن أركص هذيج أم العيون العمص دشوفها.
مدنك ما أرفع راسي بالطارمة واكف وهي تشتكي
_ من ركصت حتى لا يبجن تنكبت ضحكت علي.
خذيتها بحضني: حبيبة البقاء لله و لا تركصين عيب.
_ مو هن يبجن وما أحب بجي هنا راسي يظل يفور نار و ينحمس باجة.
_ أستغفر الله من فترة جنت ِ هادئة وحجيج زين وكلنا بوادر تطيبين شجاج اليوم.
_ أريد الكرعة مالتي أم شعر شو ماهية وينها ما تعوفني وتتأخر هيج.
شهكت أبجي.
_ طارت للسما هناك راحت
_ يعني بعد ماكو كرعة بيتنا أم شعر الذهب طارت يم ياسر ذاك مو ياسر هذا العدنا.
هي تحجي وتهذي بهذيانها المرضي بس لاحظت أكو بكلامها أسترسال مو تقطع ولا كله مبهم.
لزمت ياسر الزغير و شالته تبوس بي هي أكثر واحد متعلقة بي من أولادها ياسر أبني.
مرت الثلاث سنين ومريم أكو تقدم بوضعها قليل تهذي أو تحجي أضطراب نفسي
بس كذاكرة بقت مطفية
لمن ما بيوم الوضع بالبلد رجع توتر مرة ثانية ومزامير الطائفية بدت تنفخ وتبث الفتن.
غير العصابات خطف الأطفال.
جيراني خطفوا طفلته عمرها خمس سنين من باب البيت ولكوها ميته بعدين بالبساتين اليمنا.
فجنت مانع الجهال يطلعون.
بهاي السنة أبوي هرب لجهة مجهولة مسوي شراكه وي شخص و خسرانين مدري أبوي بايك شريكه وهارب بالفلوس وعايف مرته وجهالة من مرته ذيج
الي أجت شمرت علي ثلاث أخوة وبنت.
كل ثنين جانوا توأم.
كبرت مسؤوليتك يا عون..
عافتهم بالباب يصارخون وراها وهي
_ أبوك النصاب باك ذهبي وشرد وغير جنط فلوس حملهن وراح ورها بيومين أجتني ورقة طلاق شوف عيني أكو ناس حاجين بية بس أكمل العدة وما يقبل بجهال أزلمة غيره ذول أخوانك وأنت تبتلي بيهم.
ظليت مصفن ولا حجيت ذبت كلامها وراحت.
دخلت الجهال وصحت لوجدان
_ أم البيت تعاي زاد الحمل بوية أجوج أربع جهال.
وجدان كولش تحب الجهال حتى أريد أعاقب جهالي تكول أضربني بدالهم ممنوع تضربهم هواي دللتهم.
زادت المسؤوليه هنا بعد شغلي كسائق تكسي ميكفي أني معلم و قررت أفتح صف ببيتي دروس خصوصية
سعر الحقائب يمنا الصفوف الأولية ب 50 أما الخامس والسادس أبتدائي ذول خليت سعرهم مو حقائب كل مادتين ب 25 تساهلت شوي لأن الخصوصي أغلى من الي دا آخذه.
خلصت من تعب السيارة بعت التكسي وكدرت آخذ كية لأن جبيرة تشيل عائلتي.
هيج وضع أفضل حتى يقل غيابي عن البيت بس فترة الدوام بمدرستي لو أتسوك أو أمور مهمة.
حتى أتابع بيتي والجهال أحسن من فرة الشوارع
بديت أسوي لافتات أدكهن و بنيت بالحديقة صف كبير يتحمل أكثر من 50 طالب.
و باشرت بمشروعي والحمد لله أحوالي تتحس على عين جهالي وأخواني.
لمن ما بيوم غفلت والتهيت أمتحانات وادرس الطلاب فطالعه مريم وكالعادة مرافكها ياسر الصغير.
صرخة مريم بالشارع حيل خلتني أتوتر صرخة أنسان يخاف يخسر أكثر.
_ لاااااا أبني ياااااسر لا.......