رواية من انا الفصل الحادي عشر 11 بقلم مروة الصافي
ونحن قاعدين جا عمو علي قال لينا خلاص دخلت الجوازات السفارة وقالو ثلاثة ايام كدا التأشيرات بتطلع ماتتخيلو فرحت كيف . وطبعا خلاص رمضان فضل ليه يومين يعني كمان اسبوعين وحنأجز ان شاء الله وطبعا الفترة دي حتكون تجهيزات لي العمرة ان شاءالله
المهم عملنا الغداء وبعدو الشاي واتونسنا مسافة لحد المغرب جا قمنا صلينا ومشيت غرفتي لقيت حيدر مرسل لي
حبيبتي وينك مالك طولتي مني
رديت ليه معليش بس زي ما وريتك برامجي كتيرة ياهو بعد خلصت رجعت ليك
اتصل علي دردشنا مسافة كدا العشاء اذن استأذنتو اصلي وارجع مشيت صليت وجيت رجعت ليه ما رد راسي بقى يودي ويجيب مارد علي مالو ياربي حصل نقاش تاني ولا مالو ماقاعد يتجاهلني كدا
شوية كدا ورجع لي قال اسف حبيبتي كنت في الجامع ياداب كدا ارتحت وراسي هدا قلت ليها حرما قال لي جمعا قلت ليه على فكرة نحن كمان اسبوعين كدا مسافرين
اتخلع مسافرين وين وفجأة كدا قررتو
قلت ليه تتذكر لمن سألتك في رمضان حنشتغل لي يوم كم قال لي ايوا قلت ليه يلا ناس عمو علي ماشين عمرة رمضان وقالو لي لازم تمشي معانا حتى عملو لي كل الاجراءات
قال لي بالرغم اني حاشتاق ليك بس دي احلى سفرة ربنا يتقبل منك وماتنسيني من الدعوات
اتكلمنا شوية كدا وقفلت
نمت صحيت الصباح اتجهزت ومشيت الجامعة شايفة ناس دفعتنا ديل كلهم بعاينو لي بي طريقة غريبة وفي البقى يضحك من شافني وفي الاتلمو كل كم واحد يتكلمو ويعاينو لي
انا هنا اتأكدت انو ريم عملت الفي راسها والانا كنت خايفة منو . جات علا سلمت علي وحضنتني وبكت قلت ليها في شنو قالت لي ريم ماخلت انسان ماحكت ليه بيك وطبعا انتي عارفة مجتمعنا دا فيه الناس الكعبين هم ماعارفين انتي شنو ولا جوهرك شنو
قلت ليها المهم انتي شايفاني كيف قالت لي شايفاك زي ماكنت شايفاك اختي بس انتي ذنبك شنو في الحاصل دا انتي احسن وحدة في الجامعة دي ادب واخلاق وذكاء انتي تشرفي اي زول يعرفك
ماتتخيلو كلامها ريحني كيف
اتصلت لي حيدر قلت ليه انت وين قال لي جنب الجامعة بس صوتك مالو حكيت ليه الحاصل قفل الخط ثواني وجاء زعلان زعل لقانا انا وعلا واقفين سلم علينا وبقى يهدئ فيني واتوعد انو مايسيب ريم في حالها
طيعا محاضرتنا كانت معاه المرة دي ما ادانا اي محاضرة في مادة من موادو
المرة دي ادانا محاضرة في الاخلاق
قال لينا
( كل انسان بتولد مابختار امو وابوهو مابختار يتولد وين ومتين ولاحتى يعيش حياتو وين ومع منو دي كلها اقدار ربنا والايمان بالقضاء والقدر من اركان الايمان
منو نحن عشان نحكم على انسان كل ذنبو انو اتربى في ملجأ ياما ناس اتربو في الملاجئ وكانو احسن مننا اخلاق وذكاء
اختكم حياة دي من يوم جات الجامعة في زول شاف منها سلوك غلط في زول شافها لابسة كعب اتكلمت بي طريقة ملفتة للنظر
حياة احسن من ناس كتار هنا حكمو عليها حتى من غير مايعرفوها ويعرفو اخلاقها عن قرب
طبعا الجابت الكلام دا كل مشكلتها في الدنياة دي انو حياة احسن منها احسن منها في ادبها وذوقها وفي علاقتها مع الكل ومع ربنا
اختكم حياة عاشت حياة غصبا عنها هي مااختارتها وممكن عادي كنتو حتكونو محلها اها حكمكم على روحكم حيكون زي دا ولا حتراعو لي نفسكم
مشكلتنا في الدنيا دي عايشين في مجتمع نظرتو لي فاقدين السند انهم عيب وعار مهما كانت اخلاقهم شنو )
ماتتخيلو انا في اللحظة دي حسيت بي فخر كيف ورفعت راسي فوق (زي ما وعدني انو هو سند لي فعلا بقى سند ) اتلفت لقيت كل الفي القاعة مدنقرين خجلانين من العملوهو استأذنتو اني اتكلم قال لي اتفضلي
قلت ليهم بتمنى ترفعو رؤوسكم كلهم بدو يعتذرو لي وحيو بي غلطهم قلت ليهم ياريت تكونو عاديين انا بالنسبة لي الموضوع دا متوقع ايوا هو صعب علي بس متوقعاه
نعم انا اتربيت في ملجأ وانا عندي اهل ومتأكدة اني في يوم حالقاهم بس طبعا دا ماتبرير نحن اتربينا كلنا في الملجأ اخوان
ماعارفين لينا اهل بناكل ونشرب وننوم ماعشنا حياتنا زي باقي الاطفال وكبرنا وكلنا عزيمة اننا لازم نتعلم ونكون حاجة كبيرة في المجتمع وعلى فكرة الملجأ دا طلع منو دكاترة ومهندسين ومحاميين
نحن فقدنا الاهل بس مافقدنا الامل اننا نكون زي مابنتمنى وانا ما حزينة اني عشت حياتي هناك بالعكس فخورة من نفسي اني من غير اهل قدرت اقرأ وانجح واكون معاكم هنا في الجامعة
فجأة كل الفي القاعة صفقوا فرحت شديد وكان نفسي اجيب رسم في اللحظة دي عشان اوريها الهي عملتو انقلب عليها اكيد كل الفي القاعة حيكونو كرهوها نفسي تشوف انتصاري عليها
حيدر بعد خلصنا طلع ورسل لي رسالة كاتب لي انا فخور بيك شديد عايزك تكوني قوية طوالي اما ريم فحسابي معاها جاء وقتو خلاص
اتصلت عليه حلفتو ما عندك بيها شغلة انساها كفاية عليها نظرت الناس