رواية اللون السابع للحب الفصل الحادي عشر 11 والثاني عشر 12 بقلم شذى عبد المكرم
11
بدا تفاصيل عرس سفيان وفردوس ونزلوها الدخان وانا مواصلة مع الدكتورة الفيزيائية كانت بتجيني تلاتة مرات في الاسبوع وعمار نهائي ما رضا انو استخدم العصا الا اتم شهر كان خايف علي وانا سمعت كلامو ما اعترضت كان باقي لي اسبوع واتم الشهر عشان استعمل العصا وطبعا البيت ضيوف بجو بباركو لفردوس وكدا وعندها اهل امها جو من برا السودان عشان يحضرو العرس وصدف ليهم انهم جايين اجازة اصلا وصلو كانو بنتين وولدين واحد كبير والتاني صغير شديد والبنتين ريان ورماح ما ردتهم تحسهم شايفات نفسهم كدا
الصباح كنا كلنا بشرب في الشاي جا عمار
عمار: السلام عليكم
كلنا: وعليكم السلام . قام طوالي رماح الخفيفة مشت وقفت قدامو
رماح: انا رماح بت خالة فردوس . ومدت ايدها رفع حاجبو بأستغراب وانا دخلت النار وطلعت
عمار: عفوا؟؟
رماح: انا رماح بت خالة فردوس وصلنا امس من الامارات
عمار: تمام . واتجاوزها حتى ما صافحها
عمار: همس بلعتي ادويتك
همس: لسع
عمار: ليه
صفا: قاعدة اعمل ليها في حاجه خفيفة تأكلها وبعدها حأخليها تبلعها
عمار: تمام وصفا عليك الله اتأكدي انها شربت اللبن
صفا: حاضر
عمار: عاوزين حاجة وانا راجع
صفا: سلامتك بس
عمار: بطة عاوزة حاجة؟
همس: قشطة مشهياها
رماح: حتى انا والله . التقول اضربها كف البت دي مجنونة ولا شنو ماف زول فتح عشان ضيفة وكدا وطبعا هو سافهها ودا المبرد قلبي
عمار: عاوزة حاجة تانية
همس: لالا سلامتك
عمار: صفا خلي بالك منها
صفا: ما بتوصيني
عمار: يلا في امان الله . عمار عمرو ما خجل انو يهتم او يبين اهتمام قدام اي زول والكل اتعود عليهو كدا وبقى عادي انو يوصي علي زول لمن اكون عيانة مع انو مستحيل يخلوني بس عشان يكون مطمن بعمل كدا
لمن عمار رجع من الشغل جاب لي القشطة بس علشان كنت جوا الغرفة وفي بنات كتار اداهو لصفا لقاها في المطبخ وهي كبتو لي في الصحن وجابتو لي
رماح: وانا عمار ما جاب لي؟
صفا: تلقي في المطبخ
رماح: يعني ما نساني؟ . وسام كانت جنبي قولت ليها براحة
همس: وسام امسكيني عشان ما اكفي الصحن دا في وشها . وسام قامت تضحك وثبتتني
وسام: همس لا استهدي
همس: دي خاتا عينها في راجلي . وسام فكت الضحك لمن كلهم عاينو ليها وهمست لي
وسام: والله راجلي دي حلوة . قومت ضحكت معاها
همس: موش
وسام: شديد وانتي ما تزعلي نفسك اصلا عمار ما بعاين ليها ذاتو
همس: ودا المبرد قلبي
وسام: لفيفة وخفيفة خلاص . وبقيت اكل وعزمت معاي وسام وبقينا نأكل اما التانية ريان ديك في عالم تاني شغالة بتلفونها بس ذي المجنونة
قريب للمغرب كدا عمار رسل لي امشي جنب الليمونة مشيت بالكرسي حقي لقيتو قاعد وشغال بتلفون
__ مشتاقين وكدا
_ ما مشتاقة ليك نهائي
__ واضحة اصلا بس ما ضروري المهم انا مشتاق ليكي . قومت ضحكت
_ اها يومك عدا كيف
__ والله متعب ياااخ
_ ليك زمن من الشغل وكونو ترجع تتعود ذي زمان حيأخد زمن بس حتتعود
__ ان شاء الله اها امسيتي كيف
_ والله الحمدلله
__ اها اكلتي القشطة
_ ايي شكرا
__ عفوا حبيبي انا . وبقينا نتأمل لمن قطع تأملنا دا المحنونة الاسم رماح
رماح: هااي . زول بقول هاي ولا السلام عليكم
همس: اهلين . وطبعا من هي جات عمار انشغل بتلفونو بقت تتكلم وهي عينها عليهو وانا التقول اقد ليها عيونها دا
رماح: انتو اخوان؟ بتتشابهو كدا . صح في ملامح بيني وبين عمار لاننا اولاد اعمام
همس: لالا حبيبتي دا راجلي . اتخلعت طبعا
رماح: راجلك؟
همس: ايي حبيبي وراجلي . قاصدة احرق ليها روحها عشان تلم عيونها عليها الشلابة
رماح: كنت فاكراهو اخوك
همس: بس للاسف طلع راجلي ما اخوي
رماح: ايواااا . مشت وهي مصدومة وانا قلبي برد والتفت لعمار
_ البت دي اقتلها ولا اعمل ليها شنو . قام ضحك
__ ليه يااخ ظريفة . رفع لي ضغطي خمشتو من قميصو
_ عمار ما تفور لي دمي براهو فاير . عاين لايدي
__ ايدك لو سمحتي . انتبهت لنفسي ونزلت ايدي
_ معليش
__ بهظر معاكي بس يااخ ما تشغلي بالك بيها
_ ما شايفها بتعاين ليك كيف . قام ضحك
__ فيها شنو احتمال معجبة . زعلت منو ضربني خفيف من رأسي
__ يا هبلة هسي دي وحدة تغيري منها
_ ما غيرانة يااخ
__ واضح جدا كدا عايني لي . عاينت ليهو وملامحي ملامح زول زعلان وهو بعاين لي جوا عيوني
__ ما مهم هي بتعاين وين المهم انا بعاين وين . ابتسمت بالراحة
_ وانت بتعاين وين
__ في تلفوني طبعا . طوالي كشرت وهو ضحك لاني متوقعة يقول بعاين فيكي انتي وهو قاصد عمل كدا التفت منو طوالي
__ بتزعلي سريع خلاص
_ ما تتكلم معاي
__ بتتحملي ؟
_ عمار انت حقار
__ خلاص معليش يا ست البنات
_ ما رضيانة
__ بترضى كيف
_ كدا تلفونك الايفون
__ دايرة بيهو شنو
_ما تخاف ما حأشوف مصايبك بس على الاقل راعي اني حاليا مرتك لمن تطلقني اعمل البريحك
__ هسي انا سألت عادي بس انتو البنات بتحبو تألفو سناريو من رأسكم والله بنات حواء حيروتنا معاكم
_ عمار هسي رماح دي حلوة؟
__ رماح دي منو
_ كيف منو البت اللاصقة فيك دي
__ اسمها رماح يعني؟
_ قبيل الصباح ما عرفتك بنفسها
__ انتي عارفاني لمن اجي بهناك ما بكون مركز مع زول غيرك صح؟ . قلبي برد
_ صح
__خلاص ليه السؤال واريح بالك حتى لو داير اعاين لبت مستحيل اعملها قدامك
_ يعني حتعملها بوراي
__ هسي يعني دا فهمتي من المغزى بتاع كلامي؟ همس اطلعي منها اصلا براكي مقنعاني من جنس جواء ديل كلمهم . قومت ضحكت
_ احسن ذاتو .......
__________
من جانب فردوس
كنت بقدر الامكان بحاول انو استمتع بتفاصيل عرسي بعيدا عن الراجيني بعدين وبنات خالتي نزلو السودان عشان يحضرو عرسي كنت محبوسة والبنات حولي والجو حلو ونزلت الدخان وطبعا ماف تواصل بيني وبين سفيان ما سأل مني من اخر مرة لمن طلبت منو الحاجات اصلا متوقع منو شخصية كدا غامضة ودا اثبت لي انا اختيار ابوهو ما اختيارو لانو سفيان لو مغمض ما حيختارني
في يوم كنا في الغرفة جات رماح مصدومة كدا
رماح: المشلولة ديك مرت عمار
فردوس: حسني الفاظك منو مشلولة
رماح: قولت حاجه غلط؟ موش مشلولة؟
فردوس: همس ما مشلولة بس حصل ليها حادث وحتبقى كويسة
رماح: انا لو محل عمار اعمل بيها شنو احتمال ما ترجع تمشي
وسام: شايفة المشلولة البتقولي عنها دي لو ما بتحرك حتى اصبع ساي عمار ما حيعاين لوحدة تانية
رماح: ليه اصلا
فردوس: خلي يعاين لوحدة موش نحنا كلنا قاعدين كدا والله موية ما يطلبها مننا . ريان كانت متابعة الحدث بصمت واخيرا اتكلمت
ريان: للدرجة دي بحبها
فردوس: ما بحبها دا بتنفسها عديل
وسام: ماف زول بدخل بينهم حتى امها ما بتتدخل
ريان: للدرجة دي
فردوس: واكتر
رماح: موش اتشلت ااه بكرة بقنع منها . عاينا لبعضنا انا ووسام وصفا وضحكنا شديد
رماح: مالكم
فردوس: رموحة لمصلحتك خليكي بعيدة من عمار دا
رماح: هسي انا عملت شنو
فردوس: عشان سلامتك وسلامتنا حاجات اتنين ما تعمليها اول حاجه ما تعايني لعمار نهائي كأنك بتعايني في النار وتاني اوعك تضايقي همس لانو وقتها عمار ما بشوف نهائي وممكن يطربظها في رأسنا كلنا هو ممكن يقتلنا عديل بس ماف زول يهبشها او يمسها فاهمة
رماح: ليه اصلا
وسام: انتي اعملي بالكلام القالتو فردوسك لسلامتك وسلامتنا على قول فردوس
صفا: اللهم ان فردوس بلغت . وضحكنا....
طبعا رماح رأسها قوي ختت الموضوع في رأسها انو تخلي عمار يركز معاها عشان تثبت لينا العكس وهي ما عارفة انو جنت على نفسها بتصرفها دا
بالليل كنت بتونس مع همس وهي راقدة في رجلي
_ مالك بطة
__ ماف حاجة
_ رماح صح؟
__ امممممم
_ معليش بس عرسي يخلص حتمشي
__ عارفة
_ خايفة عمار يعاين ليها؟
__ ما خايفة من اتجاه عمار لانو عارفة انو مستحيل يعاين ليها
_ ومالك خلاص
__ حركاتها قدامو وخفافتها ما عاجباني بس
_ انتي مغرزيها المشكله وين
__ كيف
_ لمن عمار يجي يشوفك اعمليها واضحة قدامها عشان تعرف انو عمار حقك . قومت ضحكت
__ اعملها؟
_ موش راجلك
__ ايي
_ بس خلاص . ابسطت بكلامي وبالفعل نفذت كلامي الصباح ........
____________
من جانب همس
بالليل فردوس دخلت لي فكرة في رأسي انتظرت عمار لمن جا يصبح علي ويسألني من صحتي بعد سلم علينا
عمار: همس كيف الليلة
همس: عمار رجلي من الصباح بتوجعني . طوالي قرب علي وقعد جنبي في السرير وهبش رجلي حتى ما هماهو كل القاعدين ديل
عمار: بوجعك شديد نمشي الدكتور؟ . للحظة ندمت انو قولت ليهو كدا وشوفت الخوف في عيونو
همس: لالا ماف داعي للدكتور
عمار: لالا خلينا نطمن احسن
همس: ماف داعي بس لو حسيت انها شدت اكتر بكلمك
عمار: متأكدة؟
همس: متأكدة
عمار: صفا لو حسيتي انها متألمة اتصلي لي عليك الله وما تسمعي كلامها
صفا: كويس . ومشا وصفا قربت مني
صفا: بالجد متألمة؟
همس: لالا بس دايرة اجاكر رماح
صفا: حرام عليكي خوفتي المسكين عليكي
همس: والله ما قاصدة اخوفو
صفا: الغيرة بتعمل اكتر من كدا بس احسن حاجه التقول تأكلك بس
همس: لسع بمغرزها اكتر . فجأة عمار جا راجع
عمار: صفا ساعديها تلبس وانتي البسي حتجي معانا
صفا: المستشفى؟
عمار: ايي
همس: عمار ماف داعي
عمار: لا في داعي وبالمرة تعملي فحوصات كاملة نطمن عليكي . صفا قربت نظام تساعدني
صفا: التعملو بأيدك بغلب اجاويدك خلي يطعنوك كم حقنة كدا عشان تتأدبي . ضحكت
رماح: خلوني امشي معاكم
عمار: ماشيين المستشفى ما ماشيين نتفسح . سكتت طوالي عجبني ليها صفا ساعدتني وفردوس سألتنا كلمناها ماتت من الضحك
همس: انا تاني اسمع كلامك يا جنة؟
فردوس: معليش تكبري تنسي . لبسنا وطلعنا برا
عمار:، ضربت لسفيان جاي علينا
همس: عربيتك وين انت
عمار: بعتها . وطلع عشان يعمل مكالمة
همس: صفا عمار باع عربيتو متين
صفا: لمن قررو ليكم السفر والتكاليف كانت كتيرة شديد فباع عربيتو
همس: للدرجة دي التكاليف كانت كتيرة؟
صفا: ايي . قعدت افكر للدرجة دي عمار خسر فيني ولسع قاعد يخسر بالتمارين كل اسبوع والادوية والفحوصات دي لمن قررت انو ما اعملها عشان ما اكتر عليهو
همس: صفا امشي نادي عمار
صفا: لشنو
همس: انتي امشي بس . مشت وجات معاهو
همس: عمار ما ماشة المستشفى
عمار: ما على كيفك
همس: قولت ليك ما ماشة غصب هو
عمار: همس خلي يومنا يعدي على خير
همس: عمار . تلفونو رن
عمار: ورحكم
همس: خليهو ياااخ ما ماشة
عمار: دا ما زمن دلعك ياااخ خلينا نمش انا وراي حاجات كتيرة الليلة
همس: والله ماف داعي شوف شغلك
عمار: انتي اهم لو خليتك كدا وانتي متألمة ما حأركز من التفكير فيكي فشنو الله يرضى عليكي يا همس خلصينا وخلينا نمش
همس: امممم تمام . ما حبيت ازيد عليهو ومشينا المستشفى وعملنا الفحوصات وكانت كلها طبيعية والدكتور قال ممكن استخدم العصا بس يساعدوني لمن اتعود عليها وبعدها رجعنا البيت
عمار: لمن اخلص بعدين بجيب معاي العصا ونجي نتدرب اوكي
همس: اوكي . وطلع لشغلو قعدت زعلانة امي جاتني
امي: مالك يا بتي
همس: امي عمار دا خسر فيني كتير للان
امي: بالجد والله وما عارفة اجازيهو كيف
همس: ولسع قاعد يصرف
امي: حاليا انتي مرتو ومسؤوليتو لو حسستي انك متحسسة من ناحية القروش حيزعل اوع تبيني ليهو
همس: اممممم تمام
المغرب جاب معاهو العصا ومشينا ورا البيت جنب شجرة الليمونة عشان يساعدني وكان معانا وسام وصفا هو كان بجهة ووسام عشان شوية طويلة بجهة التانيه وبمشوني برجلي وحدة بس اليمين عشان اقدر اسند عليها بعدين في الاول ما كنت متحملة لمن ببكي
همس: عمار خلاص ياااخ ما قادرة
عمار: شوية بس حبيبي انا . حاولنا تاني وبحاول عشانو هو بس عشان ما يزعل
عمار: بس كفاية اليوم . ختوني كدا فتحت في البكي اتخلعو فيني
عمار: بطة معليش ما قاصد اتعبك
همس: انا المتعباك معاي في الغيبوبة تعبت ماديا ومعنويا وحاليا بعد صحيت ما ريحتك . صفا ووسام لمن عرفو اني ما تعبانة جسديا طوالي انسحبو خلونا برانا
عمار: انتي بكلامك دا بتعبيني اكتر ما اتوقعتها منك ابدا والله . مسكتو من ايدو
همس: انت بعت عربيتك عشاني وخسرت كتير
عمار: والله لو ابيع كليتي عشانك عربية يعني شنو بكرة بجيب ذيها عشرة بس هل بقدر اشتري روحك؟ . سكتت وانا بعاين ليهو
عمار: هل بقدر؟ . هزيت رأسي بمعنى لالا
عمار: انا لو كنت محتاجك ما بتساعديني؟
همس: والله بدفيك بروحي
عمار: وليه ما ينطبق علي
همس: امممممم
عمار: عمرك ما تخلي القروش تدخل في علاقتنا لانو المرة الجاية ما حأتكلم معاكي جد والله
همس: عمار دايرة لي ايسكريم . ابتسم بحب
عمار: طوالي يكون عندك
همس: خلاص خلينا نتدرب شوية تاني
عمار: بتقدري؟
همس: نحاول لو تعبت بقول ليك خلاص
عمار: تمام . المرة دي كان براهو ساندني واتمشينا شوية كنت بتألم بس متحملة عشانو بس لمن تعبت ووقفنا ورجعني الغرفة وجاب لي ايسكريم كنت بشكر ربي على وجود عمار في حياتي........
أخبروا عمار بأنه أبي الثاني، وأنه سندي في هذه الدنيا، وأنه عوني من بعد الله، وأني أحبه جداً.♥️
...12
كنت مواصلة في التمارين بمساعدة عمار والبنات لمن قدرت استعمل العصاية وبقدر احرك رجلي الشمال شوية يعني مع مساعدة العصاية بقدر امشي عادي بس شوية تقيلة بس في الوقفة بسند على اليمين اكتر
جات خلاص مناسبة فردوس وكان بعد اسبوع الحنة الجبشية حقها جاتني عمتي حنان ام عمار
حنان: اها يا بتي جهزتي شنو للعرس
همس: ذي ما شايفة يا عمتو انا مشي يلا يلا فحأكون ضيفة خفيفة في العرس
حنان: بتبالغي يا بطة دي بت عمك لازم تعزيها
همس: المفروض والله
حنان: ناقصك شنو وين فساتينك وين قصاتك . ابتسمت ليها
همس: اممممم ما قصيت
حنان: خلاص جيب لي فستان من فساتينك القديمة عشان المقاس وكدا وانا حأقص ليكي بتاعت العرس
همس: ماف داعي عمتي
حنان: لا في داعي قومي بالراحة جيبيهو
همس: حتى لو ما حيطلع سريع العرس بعد اسبوع بس
حنان: انتي خلي علي الموضوع دا
همس: شكرا عمتو
حنان: ماف داعي تشكريني انتي بتي ومرت الغالي . ابتسمت ليها بحب وقومت مشيت دولابي جيبت ليها وحدة من فساتيني الكان قصيتهم لعرس وئام وعمر وجيبتو ليها
حنان: انا ماشة السوق اجيب ليكي شنو
همس: سلامتك بس عمتو . ومشت مع امي السوق واشترو القماش وانا ما عارفة حتى لونو شنو ما سألت عاوزة اعرف لمن يجهز ناداني عمار مشيت ليهو
عمار: اها تجهيزاتك للعرس شنو
همس: جاهزة الليلة
عمار: همس انتي دايراني اختلف معاكي ولا شنو
همس: الله لا جاب الخلاف
عمار: اها محتاجة شنو
همس: ولا حاجه . طوالي زعل ومشى خلاني انا ما دايرة اتقل عليهو لاني عارفة عرس سفيان برضو حيصرف كتير وكدا كدا انا بالعصاية حقي دا ما حأكون ظاهرة مالني ومال التجهيز الكتير بلبس اي حاجه بس لكن عمار زعل ياااخ وانا ما بتحمل زعلو مشيت المطبخ
همس: وسام ممكن تجيبي لي الكانون برا هنا
وسام: دايرة تعملي شنو انا بعملو ليكي
همس: دايرة اعمل رز باللبن لعمار
وسام: زعلتي صح؟ . لمن اعمل ليهو رز باللبن طوالي ناس البيت بعرفو انو متشاكلين
همس: يعني يعني
وسام: يعني يعني يا سجمانة . قومت ضحكت
وسام: خلي انا بسوي ليكي
همس: لالا بعملو انا بس قربي لي الحاجات وختى لي موية في السخان . جابت لي الحاجات وولعت لي النار جاهز وعملتو بمزاج وكبيتو في صحن مقفول كدا
همس: اديني المكسرات . جابتو لي وكبيتو
وسام: بتقدري تشيلي ولا اساعدك؟
همس: ساعديني احتمال ما اتوازن . وشالتو لي مشينا شجرة الليمونة ووقفت وهي مشت جابت لي كرسيين وتربيزة
وسام: تجيبي عمار كيف
همس: انتي حتجيبي
وسام: مستحيل ما قنعانة من روحي
همس: امشي قولي ليهو همس في شجرة الليمونة ورجلها واجعها ورافضة تدخل جوا تعال اتكلم معاها وبس
وسام: انتي ما دايراني صح؟ . قومت ضحكت
همس: ما حيحصل حاجه ليكي وانتي مجرد ما ترمي القنبلة اهربي وانفدي بجلدك
وسام: بشكتيكي يوم القيامة يوم لا ينفع مالا ولا بنون . ضحكت فيها ومشت قالت ليهو كدا وهو دقيقتين وجاني سريع بس عاين لي مسافة لمن لقاني قاعدة وقدامي صحن
__ قولي والله يا همس .
_والله . طوالي قام راجع
_ عمار لو بتعز النبي تعال راجع انا ما عندي رجلين الحقك . مجرد ما قولت كدا فوق بس ما التفت لي
_ عمار تعال ياااخ . جا راجع بس كان واقف
__اها
_ اقعد ياااخ
__يا بت الناس دايرة شنو
_ بت الناس!!! . غمض عيونو شديد
__ همس في شنو . ما رديت بعاين ليهو بكسرة بس من كلامو وتعاملو دا ما قدر يعاين لي خمسة ثواني في عيوني قام طوالي قعد
__ انتي لشنو بتدخلي القروش في علاقتنا
_ انا ما بدخل القروش
__ بتدخلي يا همس وكدا بتعملي حواجز بيناتنا نحنا من بتين كان بينا حواجز
_ ماف حواجز يا عمار ولا عمرو حيكون في حواجز
__ لو كدا ليه لمن سألتك محتاجة شنو للعرس قولي ولا حاجه
_ لاني بالجد ما عاوزة حاجة
__ البنات يومي طالعات على السوق ولسع ناقصهم حاجات انتي فرق منهم في شنو
__ فرق في انو ديل حيظهرو في العرس بس انا لا
_ والسبب . رفعت ليهو العصاية
__ دا ما سبب يخليكي ما تظهري هي علتك دي منك؟
_ لالا
__ وثم ثانيا انتي بتمشي بعصاية ما كرسي متحرك وثانيا لمن نجي داخلين ما حتدخلي معاي؟
_ حأدخل معاك؟
__ موش الراجل بجي داخل مع مرتو؟
_ ايي
__ وانتي ما مرتي؟
_ مرتك
__ بس خلاص
_ عمار معليش لو حسستك بحاجة
__ لو دايراني ما ازعل اها وريني عاوزة للعرس شنو .
_ اممممم كدا افكر او خليني بعدين بوريك لمن اجمع
__ متأكدة ولا بتمشيني ساي
_ معقولة يا عمورة
__ والله ماف زول متعب عمورة غيرك . قومت ضحكت
_ هسي تعال عملت رز باللبن للصلح وكدا
__ وكالعادة ما عاملة فيهو جوز هند
_ اوع تقول صلح ناقص بس
__ اصلا ناقص . وبدينا نأكل ونحنا بنتونس ونضحك وعمار خلاص لان والزعل راح وتاني سألني عاوزة شنو ما عرفت اطلب شنو واخلي شنو ووصلنا لحل انو اتكلم مع امي وعمتو حنان وهو اقتنع وخلاص
بعد اربع يوم عمتو حنان جاتني وجات لي الفستان كان تحفة والقصة رهيبة ودا الرئيسي تبع الزفة وقصت لي واحد تاني تبع حنة سفيان وبرضو عجبني القصة وواحد ابيض جاهز للحنة الجبشية تبع حنة جنة واي واحد بالشبط الزاحف تبعو واتنين جلباب استقبال وكم بجامة جديدة ولوشنات وارياح اتفاجأت بكمية الحاجات دي
همس: عمتو ليه الحاجات دي كلها
حنان: دي بسيطة بس بتمشيكي للعرس صح؟
همس: عمتو بتهظري صح دي كلها وبتقولي بسيطة . قامت ضحكت
حنان: عمار عارف انو ما حتطلبي فأنا قومت بالمهمة نيابة عنو
همس: ما كان تتعبي نفسك كدا
حنان: عادي حبيبتي هسي ابدي بالمرطبات دي لانو العرس قرب رطبي تقيل انتي اصلا حلوة ولونك حلو . كنت فرحانة شديد
همس: شكرا عمتو . وحضنتها ومشت بعدها مشيت لامي حضنتها شديد
همس: شكرا امي
امي: اشكري عمار لانو هو الدفع للحاجات دي كلها ربنا يخليهو ليكي ما قصر ابدا
همس: امين يارب وانتي برضو ما قصرتي كونو اخترتي لي
امي: ما عندي حاجة اقدمها ليكي
همس: بالعكس والله انا ما محتاجة حاجة بس تكوني جنبي وانتي ابدا ما قصرتي من ناحيتي . وقعدنا نشوف في الحاجات كانو عاجبيني شديد وشيلت تلفوني واتصلت لعمار طبعا شغالة بحقو القديم
همس: عمار بالجد شكرا على الحاجات دي كلها
عمار: عفوا حبيبي انا . قفلت وانا بحمد ربي على وجودو وبكدا كنت جاهزة للعرس بأكمل وجه
لمن بدا تفاصيل العرس وكان الحنة بكرة امي قالت لي عمي محمد بناديني في صالونو مشيت ليهو لقيتو معاهو عمي صابر وعمار
محمد: تعالي يا بتي جنبي . مشيت بالراحة قعدت جنبو
محمد: من جيتي من العلاج ما اتناقشنا في موضوع عقدك الحصل وانتي غيبوبة . قلبي عمل شح كنت خايفة انو يقول لي دايرين نطلقك من عمار كنت حأنجلط ليهم في محلي
همس: اممممم
محمد: عارفين انو الموضوع حصل من دون رضاكي وبدون استشارتك لانو كنتي في حالة ما بتسمح انو نأخد رأيك فرأيك شنو في الموضوع
همس: عمار حكى لي وشرح لي الوضع
محمد: تمام هسي عرس اولاد عمكم بديكم انتو وعمار شهرين اتفقتو اهلا وسهلا ما اتفقتو اي واحد بطريقو واصلا علاقتكم ما حتتأثر عارف انو متفقين بس كأب وبتو بس هسي علاقتكم فرق زوج وزوجة وانا اتكلمت مع عمار شهرين ونشوف البحصل تمام
همس: تمام
محمد: وبما انك زوجتو حاليا لازم يكون عندك دبلة
همس: اممممم
محمد: عمار تعال لبسها دبلتها . جا وطلع دبلة ومحبس ولبسني ليها ومد لي محبسو عشان البسو حمرت ليهو نظام البسو براك نظام عيب قدام عمك وابوك بس عمار والخجل خطان متوازيان كان مادي لي الخاتم وبعاين فيني ببلاهة شيلت الخاتم ولبستو
صابر: كدا احسن عشان الناس تعرف انك زوجتو لمن ربنا يكتب الفي الخير
همس: ان شاءلله يا رب
محمد: ممكن ترجعي بعد دا . هزيت رأسي بالراحة وقومت رجعت البيت بهناك وانا سرحانة وبعاين في خاتمي والدنيا ليل واقفة في نص الحوش وبعاين في المحبس والدبلة يعني دا بثبت حاليا اني مرت عمار بس شهرين وحنطلق وكنت سرحانة فجأة زول قال ووواااح اتخلعت لمن صرخت شديد وهو مات ضحك التفت كان عمار
__ عمار ما ممكن ياااخ
_ والله ما اتوقعت تتخلعي كدا
__ وقفت لي قلبي ياااخ
_ واقفة بتعملي في شنو
__ بتأمل في خاتمي
_ مالو
__ بتأكد منو دهب حقيقي ولا فاصو . قام يضحك شديد
_ احب اطمنك فاصو حبيبتي انا . قومت ضحكت
__ طمنتني الله يطمنك . وضحكنا
__ تعال اسألك
_ اسألي
__ انت ما بتخجل؟
_ كيف
__ ياااخ ليه تخليني البسك الخاتم قادم عمك وابوك كان تلبسو براك
_ يا بتي انا موش لبستك؟ يبقى لازم تكفيني حقي
__ عيب استحي صح الاستحو ماتو . قام حضني من ورا شديد وانا اتخلعت لاننا في نص الحوش
__ عمار فكني هسي بجي زول
_ م يجي موش قولتي انا ما بخجل خليني اثبت ليكي
__ عمار فكني ياااخ
_ ما بفكك
__ نحنا في نص الحوش منظرنا بيش ياااخ . حلف ما يفكني وانا دايرة ابكي من الاحراج وبعرض فيهو وهو حلف ما يفكني
__ والله ابكي ليك . حتى فكاني
_ عشان تاني تعلقي على حاجة انا عملتها
__ صحي ما بتستحي
_ قدر كلامك دا؟
__ لا والله بهظررررر . قام ضحك ومشى وانا ضحكت ودخلت جوا
____________
من جانب فردوس
مراسم عرسي بدا وجابو لي الشيلة وكان فيها تلفون جديد ما اتوقعت لانو سفيان قبل فترة بس مشتري لي واحد زمن قصة الحرامي بس تاني جاب لي واحد والشيلة كانت من اختياري بس بمساعدة عماتي
اليوم اول فعالية من زواجي وهي الحنة الحبشية اتجهزت ليها وانا مبسوطة ومعاي اخواتي حولي وكنت لابسة اللبسة المخصصة ليها والشباين ابيض والجو كان ظريف واغاني الحبش اشتغلت جاتني همس وكانت بالعصاية تبعها وكانت لابسة ابيض وقعدت جنبي
همس: لو ما رجلي وحدة كانت رقصت ليكي حبش . قومت ضحكت
فردوس: عشان عمار يكسر ليكي الوحدة دي ذاتها . قامت ضحكت
همس: عمار وين هنا بس . انتبهت لاصبعها كانت لابسه دبلة ومحبس
فردوس: بطة ديل جيبيتهم من وين
همس: حيكون من وين اكيد من راجلي . قومت ضحكت لانو بتقول راجلي بطريقة حلوة خلاص
فردوس: متين الكلام دا
همس: امس . وحكت لي مضمون الحصل امس
فردوس: اها وبعد شهرين
همس: والله ما عارفة نشوف لو عمار ما عندو زولة في حياتو وناوي يتزوجها الموازيين بتختلف هنا
فردوس: بطة قولي كلام منطقي بالله عمار شنو البكون عندو زولة
همس: حتى لو ما عندو احتمال ما كان خاتيني مكانة مرتو ودا يعتبر انو الظروف جبرتو وغيرت ليهو خططتو
فردوس: من قومنا للدنيا دي عارفين همس لعمار وعمار لهمس صح ما كان بعاين انو اذا حتكونو زوج و زوجة ذي ما كنتو اب وبنتو بس عندكم كيمياء غربية بينكم مستحيل تعيشو بدون بعض فما تحاولو ابدا وانتي ليه ما تتمسكي بيهو البت التانية الحتكون زوجتو دي احسن منك في شنو . سرحت بعيد
همس: اممممم قولتي كدا؟
فردوس: قولت كدا شنو يا بت هل بتقدري تشوفي وحدة غيرك مع عمار لو بتقدري دي حاجة تانية
همس: بموت والله يا جنة انا رماح ساي عاملة لي حمى مع انو عمار ما شغال بيها اصلا
فردوس: يلا نهائي ما تخلي لوحدة عمار حقك انتي بس
همس: اي حقي انا بس . وقعدنا وبعدها بدا مراسم الحنة وعملت القهوة ووزعتها على الضيوف ورقصنا بس همس ما قدرت شاركتنا وهي في محلها بس كنت بمشي برقص حبة وبجي برقص معاها في محلها حبة عشان ما تحس بالنقص بسبب رجلها لمن خلصنا وخليت البنات بلمو المحل كنت تعبانة شديد انجدعت في السرير مسكت تلفوني لقيت رسالة من سفيان مضمونة " الليلة الحنة حقتك ممنوع رفع الاستورهات مفهوم؟ " ياااااخ المخلوق دا انا ما عارفة مالو حتى اخباري ما سألني منها ولي زمن ما لقيتو بس متوقعة منو قومت سريع جريت للبنات برا
فردوس: بناااااات . انتبهو معاي
فردوس: ممنوع وحدة ترفع استوري مفهوم والرفعتو تمسحو
وسام: ليه بس
فردوس: دي رغبتي كدا . ما حبيت اقول ليهم سفيان منع اتفهمو الموضوع وانتهى على كدا ورجعت رديت ليهو " بس رفعتهم زمان " عارفة براي بفتش للمشاكل طوالي اتصل لي اتخلعت ما عرفت اعمل شنو رديت قبل ما يسلم علي حتى قال
_ الاستورهات دي تتمسح سريع
__ بهظر ما رفعت استوري وحتى كلمت البنات
_ تمام
__ اي اوامر تانية؟
_ حنتك كانت كيف . سؤال غير متوقع منو
__ اممممم كانت حلوة شديد
_ لالا تمام
__ وانت بكرة حنتك
_ ايي
__ جاهز ليها؟
_ في حاجات ناقصة بس حأعملها . حبيت اكسر حاجز
__ الناقص شنو مثلا
_ بعض الحاجات بس . عارفة داير يختصر بس ما حأخليهو
__ حلقت للحنة؟
_ لسع بكرة ان شاءلله
__ جهزت جلابيتك؟
_ دي جاهزة
__ خلاص الناقص شنو
_ ما داير اتحنن
__ ليه
_ ما بحبها
__ عمتو ما حتخليك
_ دي المشكله . قومت ضحكت
__ما مشكلة اعمل اياديك بس خلي الارجل
_ باطن رجلي ما حيشوفوها اصلا . قومت ضحكت
__ انت سفيان صعب خلاص
_ ما صعب بس في بعض حاجات بتعصبني
__ انت ما بعض الحاجات بتعصبك انت كل الحاجات بتعصبك وبالاخص حاجة اسمها فردوس شوفتها ساي بتعصبك
_ ما كدا
__ اها كيف . سكت ما رد
_ خلي الكلام وامشي ارتاحي من التعب
__ بالجد تعبانة والله تصبح على خير
_ وانتي من اهل الخير . وقفلت منو دي اول مكالمة هادئة بينا واطول محادثة بينا من دون تعصيب ولا صراخ اتنفست براحة ومشيت نومت الا وسام جات صحتني عشان اغسل وشي غسلت ورجعت نومت
اليوم التاني كان حنة سفيان البنات كلهم مشو الا انا بس قعدت مع حبوبة في البيت ماف زول كان عاوز يتضامن معاي وما عرفت اعمل شنو لمن ديل رجعو
وسام: الحفلة كانت حلوة والله
همس: شديد بالجد العز اهل واصحاب
وسام: ما اتوقعت سفيان اصحابو كتار كدا
صفا: البشوف شخصيتو دي بقول ما حيكون عندو اصحاب كتار
فردوس: شخصيتو دي معاي انا بس . ضحكو
صفا: والله مخوفنا كلنا بس النصيب الاكبر ليكي
فردوس: وهسي حأشيلو وحأريحكم وانفرد بكل النصيب لي . ضحكو
صفا: معليش يااخ نصيبك . ضحكت
فردوس: ما حكيتو لي راجلي طلع كيف . ضحكو فيني
وسام: راجلي لكن
فردوس: ايي راجلي
صفا: والله حلاتو وهو صاري
فردوس: ما هو طبيعي صاري
وسام: لمن يحيرك
همس: بس وتعالي شوفي حلف ما يحننو ليهو رجلو . قومت ضحكت
فردوس: هو حنة اليد كان عندو فيها رأي
همس: عرفتي كيف
فردوس: كلمني امس . اتفاجأو
وسام: الكلمك منو
فردوس: سفيان . فتحو خشمهم بصدمة
صفا: اتكلم معاكي لمن حكا ليكي امور حساسة ذي دي . قومت ضحكت
فردوس: راجلي يا حجة نفسية . وقعو فيني خبط
همس: وتقولي لينا سفيان صعب معاي
وسام: عاينو الخسيسة الواطية
صفا: يا جبانة . وانا اضحك
فردوس: ما كدا ياااخ والله . رفضو يسمعو مني وانا بضحك وقامو مني وانا مسكت تلفوني لقيت سفيان مرسل لي صور الحنة كانت مفاجأة بالنسبة لي فرحت شديد وفتحت الصور وبقيت اتأمل فيهو طبعا التصوير انضف من ضميري علقت ليهو فيهو قولت ليهو " الليلة حنتك ممنوع رفع الاستورهات مفهوم " قام اتصل لي
__ رفعتهم زمان
_ لا حلال ليك وحرام لي
__ ايي
_ ما عدل نهائي هسي برفع
__ تعرفي البحصل شنو لمن تخالفي كلامي
_ سأخبر الله بكل شي
__ جدا
_ اها الحنة كانت كيف
__ الحمدلله
_ مالك مسيخ كدا . قام ضحك
__ كيف
_ يعني كان ممكن تقول حلوة او ما حلوة بس انت سفيان اتوقع منك شنو
__ خلاص حلوة
_ بعد شنو
__ جنة
_ خلاص سكتا يلا اخليك ترتاح تصبح على خير
__ وانتي من اهل الخير . وانتهى على كدا........