رواية اللون السابع للحب الفصل الثالث عشر 13 والرابع عشر 14 بقلم شذى عبد المكرم
حنة فردوس مرت على اكمل وجه وكانت جميلة وروحها حلوة وانبسطنا فيها وجا اليوم التاني وكان حنة سفيان عمار اتصل لي
_ خليكم اجهزو بعد شوية نتحرك عشان نوصل بدري
__ تمام
_ اوكي
__ عمار
_ نعم
__ ممكن اعمل روج
_ نهائي
__ عمار خفيف كدا بس
_ نهائي
__ عليك الله
_ لو لقيتو ظاهر برجعك خليكي عارفة
__ تمام . قفلت منو وكلمت الناس انو يجهزو بعد دا واتجهزنا كلنا ومكيجتني وسام بس خفيف رسمت لي حواجبي والايلاينر وروج بس خفيف خوفت عمار يعلق عليهو
همس: جنة ما تقيل صح؟
فردوس: والله ما تقيل بس عمار بتاعك دا اي حاجة بشوفها تقيلة
همس: الله يستر ما يرجعوني اقعد معاكي . قامت ضحكت
فردوس: لكن طالعة حلوة والله
رماح: الناس عملت الميكب حلو الا انتي ليه ما عاملة
همس: اكتر من دا
رماح: ما شايفة حاجة
وسام: ما بتشوفي انتي يلا همس بدون ميكب حلوة وهسي بالبسيط دا زادت حلا . رسلت ليها بوسة في الهوا . قعدنا لمن عمار ضرب لي
همس: اطلعو عمار وصل . وطلعو انا كنت اخر وحدة لاني بطيئة شوية لمن وصلت لقيت عمار واقف برا ورماح راكبة قدام
عمار: همس . عرفت داير يعلق على الميكب
همس: عمار ما تقول حاجه والله ما تقيل
عمار: يعني عارفة دايرة اقول شنو
همس: عارفة والله
عمار: انتي عارفه حاجة؟
همس: شنو
عمار: طالعة حلوة شديد . خجلت
همس: جد؟
عمار: والله واخر مرة تمام
همس: تمام . وجيت اركب بس المخلوقة ديك كانت قدام
وسام: رماح خلي همس تركب عشان تأخد راحتها وانتي تعالي معانا ورا
رماح: عادي يعني ورا ولا قدام
وسام: ما عادي عشان ما نعصرها ونعورها زيادة يعني للضمان . اتففت ونزلت ركبت ورا والله حبيت وسام حب وركبت قدام ووسام شالت لي العصاية حقي معاها ورا واتحركنا وناس امي كانو بعربية عمو صابر
همس: عمار موش دي عربية سفيان
عمار: ايي بس عشان هو العريس ما حيتحرك بيها
همس: ايواااا . وصلنا وديلاك نزلو فضلنا انا وعمار ورا نزلت وماشيين على راحتنا
همس: عمار بعدين تحننك وحدة من عماتك اوع تقعد لبت من البنات
عمار: ليه
همس: انا قولت كدا بس
عمار: ولو بت جات تحنني اكسفها؟
همس: والله بجي بلطخ ليك حنتك في وشك
عمار: والله؟؟
همس: وبعدها تعصب وتزعل وبجي براضيك بصحن رز باللبن . قام ضحك شديد
عمار: والله؟
همس: والله . كنت جادة طبعا ودخلنا والحنة حلوة وسفيان حلف انو ما يتحنن امو حلفت انو تحننو لمن وصلو لحل متوسط انو يحنن اياديهو بس وبالفعل حننوهو واصحابو اي واحد حنن ايدو وعمار حننتو امي لاني حزرتو وخلصنا الحفلة ورجعنا البيت حكينا لفردوس وكانت عارفة شاكلناها انو بتقول سفيان بكرهها بس كلمها بالحاصل ابينا نسمعها ونومنا
بعد يومين كان الفطور والعقد كان الصباح عقدو وضربو رصاص والناس بتبارك وتبكي وبكينا معاها لانو بقت في زمة راجل تاني وانا ما عرفت العروس بتحس بشنو لانو لقيت نفسي زوجة عمار بين يوم وليلة ما عيشت لحظة العقد دي
واتجهزنا للفطور وانا طبعا ما شغالة مع الناس لاني معذورة فقاعدة مع فردوس بس
همس: احساسك كيف
فردوس: حاسة بحاجة غريبة يعني هسي انا مرت سفيان
همس: اي بقيتي مرت سفيان
فردوس: ان شاءلله يراعي فيني اني مرتو ويعاملني حلو
همس: حيخاف ربنا فيكي بس انتي ما تعاديني تمام
فردوس: هنا ممكن اتحامى بأي زول بس هناك وين الا امسك ادبي . قومت ضحكت فيها
همس: ايي امسكي ادبك وكل الامور حتكون تمام
فردوس: ان شاءلله يارب
همس: المفروض نمش الكوفير بعد دا لانك ما رسمت لسع ووراكي ميكب وحاجات كتيرة
فردوس: صح والله اتصلي لعمار . اتصلنا ليهو وجا ودانا مشيت معاها انا ورماح طبعا مستحيل تفوتنا ومعانا صفا اما وسام وريان قالو حيلحقونا بعدين .......
__________
من جانب سفيان
كان مبسوط انو حيتزوج فردوس حب حياتو او بمعنى تاني بلوة حياتو كان بحاول انو يخلي مناسبة زواجو ذكرى حلوة ولمن جا الحنة بتاعت فردوس كان بفكر طالعة كيف وهل هي مبسوطة ولالا واتمنى انو يشوف الصور بس ما بقدر يطلبا منها لانو ماف تواصل بينهم بس رغم دا كلو ما نسى انو يحذرها انو ما ترفع صورها في الاستوري لانو بغار عليها شديد ولمن عاندت لقى انها فرصة واتكلم معاها وكان مبسوط بس ما ببين الحاجة دي لمن قفل واليوم التاني كان حنتو رسل ليها الصور عشان يشاركها تفاصيلو وهي اتجاوبت معاهو وكان مبسوط شديد
لمن جا يوم العقد كان متوتر من الصباح وداخل وطالع واصحابو جنبو بس ما مركز معاهم لمن جات لحظة العقد وهو شايف ابوهو وابوها برددو ورا المأذون في تراتيل عقدو على محبوبة قلبو كان متوتر بس ما بين لمن المأذون اعلن الزواج وبدا ضرب النار للاشهار قلبو كان بضرب ما مصدق انها بقت مرتو كان ناوي يتصل ليها يقول ليها بقيت حلالي بس مسك نفسو لحدي بعدين لمن يسوقها فرحتو لو وزعوها على العالم لزادت ..........
____________
من جانب فردوس
تم عقدي على سفيان في جانب مني كان مبسوط شديد ليه ما عارفة وجانب رافض وخايف من انو حيحصل لي شنو لقدام بس دا الواقع وانا بقيت مرتو والناس باركت لي ومبسوطين وانا مبسوطة معاهم بس للاسف سفيان ما اتصل عشان يبارك لي ودا كان بيثبت لي اني بالجد اختيار ابوهو ما اختيارو وبعدها مشينا مع البنات الكوفير ورسمو لي وبدينا الميكب وجابو لي الغدا من التوتر ما اكلت ذي الناس حاجه بس عشان ما اتعب في الحفلة وبعدها لبست الفستان وطبعا محجب عشان اتفادى المشاكل مع سفيان وبقينا منتظرين العريس وكنت متوترة شديد ما عارفة ليه ويداب عرفت ليه العروس بتكون متوترة كدا ولمن همس قالت انو جايين علينا اتوترت اكتر
همس: جنة اهدي شويه
فردوس: ما قادرة والله الميكب حلو؟
همس: رهيب والله
فردوس: امممممم
وسام: بنوت فستاني كيف ظابط؟
صفا: حلوو والله
وسام: بس القصة حق بطة حلو عجبني شديد
همس: تسلمي حبيبتي اختيار عمتو حنان
وسام: حلو والله
صفا: اي حلو شديد
همس: تسلمو . فجأة سمعنا اصوات العربات وبعد شوية شغالين ابشر يا عريس ووقفت فوق منتظرة يجي داخل كنت مادياهو ضهري عرفتو دخل من البنات زغردو وبقيت ماسكة في ايادي بتوتر جا قرب عرفت من ريحتو ما اتحركت جاني بقدام عاين مسافة وحضني وحضنتو وسلم على في رأسي
سفيان: مبروك يا السمحة
فردوس: الله يبارك فيك
سفيان: ربنا يقدرني اسعدك وما احوجك لحاجة ان شاءلله
فردوس: امين يارب . ميلت عليهو شوية كدا وقولت ليهو بهمس
فردوس: سيفان انا متوترة . ابتسم لي ومدا لي ايدو مسكتو
سفيان: لانك العروس بس هسي حتدخلي في الجو وحتنسي التوتر
فردوس: قولت كدا
سفيان: او ممكن تتشاكلي معاي في حاجه او تعانديني بتنسي طوالي . قومت ضحكت كأنو حافظني كدا والبنات زغردو قايلين انو قاعد يتغزل فيني فجأة بدون مقدمات ختا ايدو في رأسي وقام يحصن فيني لمن خلص مدا لي ايدو نظام امسكو مسكة العرسان ديك ومسكتو وطلعنا وركبنا العربية
سفيان: حنمش للتصوير اوكي
فردوس: تمام
سفيان: في الحفلة الرقص ممنوع
فردوس: سيف جادي؟ . اداني نظرة كدا
سفيان: لا ما جادي
فردوس: اممممم تمام . ما اتفاجأت طبعا لانها حركة متوقعة منو طبعا وصلنا محل التصوير واتصورنا واتحركنا على الحفلة وكانت حلو شديد ولمن جينا داخلين كان شغال اغنية العرسان اتوقعت انو نمش طوالي على كراسي العرسان لانو سفيان قال ماف رقص بس وقفنا في نص الساحة ورقصنا
فردوس: سفيان انت ليه ما مفهوم كدا
سفيان: كيف
فردوس: ما عارفة كل ما احاول افهمك بتوه اكتر . ابتسم لي
سفيان: ما حتتوهي وانتي معاي
فردوس: حاليا تايهة وانا معاك
سفيان: في اخر النفق حتلقيني متأكد انا
فردوس: بتمنى والله . فاصلنا خلص ورجعنا الكراسي وبعدها تاني الاغاني اشتغلت متأكدة انو البنات حيجو يسوقوني بس حأحرجهم وعشان اتفادى الحاجة دي لازم اقنع سفيان بالاول
فردوس: بقدر اقوم
سفيان: ممكن . ابتسمت ليهو والبنات لمن جوني قومت معاهم وهو اصحابو ساقوهو والحفلة كانت حلوة ولمن خلصت مشينا عشان نغير للجرتق اتفاجأت انو سفيان رفض جاتني عمتو ام سفيان
ام سفيان: سفيان رافض
فردوس: كيف يعني وانا لابسه ليه من البداية ما اتكلم
ام سفيان: كلمني انا بس ما اشتغلت بكلامو كتير قايلة بهظر بس
فردوس: عمتو انتي عارفه انو سفيان ما بهظر ابدا
ام سفيان: افتكرت انو لمن اكلمو حيرضى
فردوس: هسي البحصل شنو
صفا: اتكلمي معاهو انتي يا جنة
فردوس: من عمتي ما اقتنع يقتنع مني انا؟
وسام: حاولي بس . لمن خلاص دموعي نزلو ليه دا يحصل معاي انا وليه سفيان دا كدا حتى في اليوم الحلو دا عاوز يبوظو لي ادوني التلفون مشيت بعيد واتصلت ليه رد
__ سفيان
_ نعم
__ ليه رافض الجرتق هسي
_ انا رفضت من بدري
__ وانا لابسة يا سفيان
_ وانا ليه ما عندي خبر
__ انا ما كنت عارفه انك رافض والله
_ هسي عرفتي يبقى تغيري ملابسك بس
__ سفيان ما تكون كدا والله منظري حيبقى شين قدامهم
_ ودا ما ذنبي انا
__ ولا حتى ذنبي انا
_ يا جنة انتي عارفاني ما بحب العادات دي ابدا وكلمت امي
__ قالت لي كلمتك بس انا عرفت هسي
_ البحصل شنو
__ خلينا نعملها
_ انتي مصرة تعمليها؟
__ شديد والله ومن بين كل مراسم الزواج منتظرة الجرتق دا بس
_ الفائدة منو شنو
__ نتناقش فيهو في بيتنا بعدين بس هسي قولت شنو
_ امري لله ما داير ازعلك في يوم ذي دا
__ تسلم لي
_ بس نخلص سريع مفهوم؟
__ مفهوم خلاص تعال عشان تجهز
_ خمسة دقايق بكون عندك . وقفلت منو واتنفست براحة انو وافق رجعت ليهم مبسوطة
صفا: وافق؟
فردوس: ايي
ام سفيان: قولتي ليهو شنو اقتنع
فردوس: قولت ليهو انا جاهزة وما كنت عارفة انو هو رافض وحاولت معاهو قال لي ما داير ازعلك في يوم ذي دا
ام سفيان: الحمدلله . وقعدت اتصور مع البنات وانا مبسوطة انو حأعمل الجرتق لمن سفيان جا واتجهز وطلعنا وقعدنا في سرير الجرتق
_ هسي في داعي لدا كلو
__ عليك الله انبسط عشاني بس
_ عشانك بس يا جنة . انبسطت بكلامو دا وعملنا الجرتق و اتفاعل معانا عشاني بس وعمري ما بنساها ليهو ولمن جا رش اللبن
وسام: رشيهو
صفا: ايي رشيهو . عاينت ليهو بخوف نظام ارش؟ هز لي رأسو بأيي بس قلبي ما سمح لي اوسخو بلعتو
وسام: ليه ياااخ . ابتسمت بس وجا دورو شربو وتاني شربني معاهو وديل يزغردو بس وانا كنت مبسوطة انو الجرتق مر بطريقة حلوة حتى انو سفيان كدا مبسوط بتفاصيلها يعني ما اتزهج ولا عصب نهائي ودا كلو عشاني.......
___________
من جانب همس
اتجهزنا للزفة طبعا والعربات وصلو وسفيان استلم مرتو وانا بحاول اعاين من بين الخلق ديل على عمار ما كان باين نهائي افتكرت انو ما جا مع اصحاب العريس والعرسان طلعو
وسام: نمش؟
همس: عمار ما جا
وسام: ما مشكله حنلقى في الصالة
همس: ونمش مع منو
وسام: في كمية عربات برا
همس: تمام . وكنا اخر اتنين طلعنا في كمية عربات كانو برا ماشيين كدا ظهر عمار كان وافق فرحت انو جا وقفت جا علي كان لابس بدلة نفس لون فستاني وبنطلون اسود يعني مطقمين ما عارفة صدفة ولا مقصودة
__ افتكرت انك ما جيت
_ كان جاتني مكالمة ما دخلت مع سفيان
__ ايواااا
_ انا المطقم معاكي ولا انتي المطقمة معاي
__ اشك انك المطقم معاي . قام ضحك
_ ايي
__ عرفت كيف لون فستاني
_ عندي طرقي الخاصة . قومت ضحكت
__ بس انا طالعة احلى منك
_ دي ما داير ليها اتنين تلاتة دايما كنتي حلوة . ابتسمت بحب وخجل واتحركنا ووسام من زمن عمار جاي علينا انسحبت وصلت عربيتو
__ ما معانا زول
_ احسن حاجه
__ امممممم . ركبنا واتحركنا العرسان مشو للتصوير ونحنا واصلنا لمن وصلنا الصالة
__ خلي العصاية في العربية
_ وادخل كيف
__ انا بساعدك
_ عمار لالا
__ همس
_ بس الناس
__ هسي بعد الطقم دا كلو ياااخ ما بتدخلي معاي . قومت ضحكت واتوكلت ونزلت وهو ساعدني كان سند بالنسبة لي كنت ماسكة فيهو وجينا داخلين والانظار كلها كانت علينا لمن وصلنا محل ناس امي وقعدت جنبها
امي: وين العصاية حقك
همس: عمار قال لي اخليها في العربية وهو بدخلني ودخلنا
امي: احسن حاجه كنتو حلوين والله
همس: الله ما ضراكي امي
امي: امين يارب كان تتحصنو لانو ممكن يدوكم عين وبالاخص مطقمين كدا
همس: امممممم
العرسان وصلو والحفلة كانت حلوة وانا متابعة من موقعي لمن جاني عمار
عمار: قومي
همس: لالا مستحيل
عمار: قومي يااااخ ارقصي شوية وارجعي
همس: احتمال اقع
عمار: طول ما انا قاعد ما حتقعي . ومدا لي يدو مسكتو وقومت معاهو دخلني الساحة ورقصت شوية وهو جنبي وماسكة فيهو طول الوقت ماف زول حيقدر يقول حاجة لانو عندي علة بتخليهو ما يفارقني رقصت مع فردوس شوية ورجعني محلي كنت مبسوطة منو شديد وقدر شنو خلاني ما احس بالنقص ابدا لمن الحفلة انتهت وجا وقت الجرتق كنت مع جنة لمن قالو لينا الخبر المحزن انو سفيان رافض الجرتق وحالة فردوس كانت بتحنن لانها لابسة بس اتصلت ليهو واقنعتو وعملو الجرتق وودعناهم وبكينا معاها وانا اكتر وحدة فرقت معاي لانها اكتر وحدة مقربة لي....... ....
14
ومن هنا تبدأ رحلتي الزوجية بعد الجرتق مشينا بيتنا مباشرة اول مرة اشوف بيتي كان بسيط وظريف كدا واصلا البنات جو رتبو لي من بدري وصورو لي بس يداب شوفتو على ارض الواقع
__البيت حلو
_عجبك؟
__ ايي
_الحمدلله بعد دا بقى بيتك تغيري فيهو على كيفك
__ اممممم كلمة بيتك دي كبيرة شديد
_ هي كبيرة بالجد بس متأكد حتصوني كل حرف منو
__ حأصون ولا حنصون . ابتسم لي
_ حنصون ان شاءلله
__ ان شاءلله
_ يلا ارتاحي . هزيت رأسي وغيرت وجاب العشا اكلنا وبدأنا حياتنا الزوجية صحيت الصباح كنت تعبانة شديد براهو تفاصيل العرس متعب صحيت متأخرة لقيت سفيان ماف في الغرفة اتذكرت انو سفيان بحب يشرب الشاي بدري قومت سريع سريع فتشت الحمام بوين لقيتو دخلت وطلعت بقيت اجفف في شعري وانا ماشة سريع للمطبخ اطاقشت مع سفيان
__ يا ساتر . رجعت ورا
_ معليش
__ مالك مستعجلة كدا . عاين لي وانا بنشف في شعري بالبشكير وهو طاير قام ضحك في منظري
__ مالك عاملة كدا ومستعجلة لشنو
_ عارفة انك بتشرب الشاي بدري هسي حأعملو ليك
__ مالك خايفة كدا
_ خايفة تعصب
__ انا الله ابتلاني بمرا نومانة اعمل شنو بنتظر بس
_ حتنتظر؟
__ ايي هسي ارجعي الغرفة رتبي حالك بالراحة وبعدها اعملي الشاي . قولت ليهو بفرحة
_ شكرا شكرا شكرا . ومشيت سريع قام ضحك رجعت الغرفة وقعدت في التسريحة ونشفت شعري وسرحتو بمزاج واتمسحت واتعطرت يداب حسيت روحي عروس ودا كلو سفيان قاعد في الغرفة وبعاين فيني قومت من التسريحة
_ تحب تشرب الشاي بشنو . ما رد لي
_ سفيااان . خلعتو
__ هاااا
_ قولت ليك تحب تشرب الشاي بشنو
__ والله حرام بشكلك دا اخليكي تدخلي المطبخ . خجلت من كلامو شديد لمن غطيت وشي بأيادي وحسيت سفيان دا واحد مختلف من الخجل طوالي طلعت من الغرفة مشيت المطبخ عملت الشاي وناديتو شربنا الشاي وقعدنا بس ماف موضوع
__ جنة
_ نعم
__ قربي . قربت منو فتح لي ايدو استغربت بس ختيت ايدي فوق ايدو
_ انتي حاليا مرتي عارفة يعني شنو . هزيت رأسي بمعنى لالا
_ انتي بتعرفي عني شنو
__ بعرف انك صعب شديد
_ وتاني
__ وانو كلمتك وحدة
_ وتاني
__ وانو عصبي وما بتحب العناد والمحاقرة
_ وتاني
__ اممممم بتحب النظام وما بتحب التأخير على اي حاجة و لمن يتأخر بتحردو
_ وتاني
__ دا الانا عارفاهو
_ يبقى كدا حافظة نص شخصيتي
__ عندك نص تاني؟
_ جنة
__ نعم
_ نحنا ورانا عمر كامل وعشان نعشها بسلام في حاجات لازم تعرفيها وتمشي عليها
__ تمام
_ اول حاجه ما بحب الصوت العالي وتاني حاجة لمن اقول الحاجة ما بحب اكررها مرتين وتالت حاجة المكياج الاوفر ممنوع برا البيت في البيت دي دائرتك تعملي البريحك فيها بس برا البيت لا رابع حاجة اي حركة دايرة تعمليها لازم يكون عندي علم فيها خروج بدون اذني ممنوع يعني لو الدكان كلمتيني بيهو يبقى ما قصرتي وخامس حاجة التصوير للذكرى ما عندي مرا بترفع استوري واخيرا انا ما بدعي المثالية بس ما بحب تجاوز الحدود الانا راسمها . كنت بسمع ليهو بتركيز عشان احفظو وما اعمل عكسو ابدا بالجد سفيان صعب ولمن يتكلم بهدوء كدا بخاف اكتر
_ فهمتي كلامي؟ . هزيت رأسي بمعنى ايي . طوالي قام من جنبي والتفت لي
_ اجيب شنو للفطور
__ التلاجة مليانة بعمل الموجود
_ تمام خلاص نتغدا برا . فجأة وقفت فوق لمن خلعتو
__ حنطلع؟
_ ما عاوزة تطلعي؟
__ لالا دايرة
_ خلاص تمام . ودخل الغرفة بقيت براي في الصالة والبيت هادئ ما عرفت اعمل شنو فتحت التليفزيون ما لقيت حاجه حلوة قفلتو ولفيت في البيت شوية عشان اعرف بيتي ولمن مليت ورجعت الغرفة لقيتو شغال بتلفونو مشيت على دولابو فتحتو هو استغرب انا بعمل شنو في دولابو
_ دايرة حاجه
__ لالا
_ بتعملي في شنو
__ مليت وما عندي حاجه اعملا دايرة اشوف دولابك
_ تمام . بقيت اشوف في حاجاتو عندو كمية ساعات بقيت اعاين فيهم وحدة وحدة بتركيز في وحدة جذبتني تشكيلتها غربية وما مفهومة بس حلوة شيلتها ومشيت قعدت جنبو
__ سفيان
_ نعم
__ الساعة دي نوعها شنو وليه غربية كدا
_ دي ساعة لوركس ايطالية
__ اشتريتها من هنا؟
_ لالا وصيتها وجابو ليها لي
__ حلوة شديد بتقراها كيف . بقى يوصف لي التصميم تحفة لمن خلص رجعتها محلها وواصلت اشوف في محتوى الدولاب لمن خلصت جيت قعدت بدون موضوع
_ خلصتي؟ . ضحكت
__ ايي
_ شايفة الرف الاول موش في كرتونة
__ ايي
_ جيبيها . مشيت جيبتها قبيل شوفتها والشمار حرقني بس ما هبشتها
__ فيها شنو
_ ساعة
__ بتحب الساعات للدرجة دي؟
_ ايي وما بحب زول يهبشهم ابدا
__ وهسي انا هبشتهم ليه ما حذرتني
_ ما عارف ليه ما حذرتك يمكن لانك تاني حتشاركيني تفاصيلي
__ بوعدك حأهتم بيهم معاك . قام ضحك
_ تمام . فتح الكرتونة كانت ساعة مزدوجة يعني وحدة راجلية ووحدة نسائية
__ واااااو رهيييب طبعا . طلع النسائية اداني ليها وشال الرجالية جربتها حاجة كدا هيبة وهو جرب حقو قربت ايدي من ايدو طقم رهيب
__ سفيان خلينا نصورها وعارفة انو ما حنرفعها استوري . هز لي رأسو وصورنا بتلفونو واتصورنا كم صورة مع بعض كنت مبسوطة وشيلت الساعات ختيتهم مع الساعات التانيات اصلا الساعات قاعدات في اول ضلفة في صندوق خشبي فيه فواصل اي ساعة معلقة فيها وفي ناخات فاضيات ختيتهم فيها بأهتمام
__ خلي حقي معاك لمن اكون لي مجموعة ذي حقك دي . قام ضحك
_ كويس
المسا طلعنا واتغدينا برا صح كان هادئ كالعادة ما بتكلم كتير بس كنت مبسوطة معاهو وما مصدقة انو طلعنا مع بعض وطبعا اقعد ساي لا اتصورنا للذكرى وكدا ولمن خلصنا
_ نآخد ايسكريم ونمش تأكليها في....... . كنت مصدومة فيهو
__ اي اي . كنت فرحانة ومشينا اخد لي ايسكريم ومشينا المحل الحددو وقعدنا في النجيلة واتربعنا وانا ما مصدقة انو بعمل كدا مع سفيان الكان بحرمني الطلعات دايما بقيت اكل وهو شغال بتلفونو كالعادة ما عارفة هو عندو شنو في التلفون
__ سفيان بسألك
_ اسألي
__ انت عندك شنو في التلفون
_ كيف
__ دايما ماسكو وشغال بيهو كدا اشوفو
_ ما فيهو حاجة
__ متأكد؟
_ قصدك شنو
__ ما قصدي حاجة بس ياااخ انا قدامك وانت شغال بتلفونك . قفل تلفونو وبقى يعاين فيني جهجهني طوالي
__ لالا ارجع اشتغل بتلفونك . ضحك خفيف
_ ما فضلتيني معاكي
__ انت ما بتأكل
_ عرفتي كيف
__ سفيان انت ود عمي يعني ما شخصية يداب بتعرف عليها
_ بس ما بتعرفي اي حاجة عني
__ انت ما اديتني مجال بسبب الرعب الكنت عاملو لي
_ انا عامل ليكي رعب؟
__ انا كنت لمن اسمع اسم سفيان بكل شعرة في جسمي بتقيف . سكتا وعاين لي ومستني اكمل بس سكتا وبقيت اكل في الايسكريم فجأة وقف ومشى جاب لي غزل البنات من راجل كان عابر كل مرة بفاجأني بحاجة جديدة ما بتكون متوقعة ابدا وانا مبسوطة شديد وبقيت اكل في الاتنين والايسكريم اتكبى لي في الفستان
__ اووف ياااخ دا شنو هسي
_ ماف زول وسخك براكي . وبقيت احاول انضفو وانا بتأفف والفستان لون فاتح رفعت رأسي لقيت بصور فيني طوالي نزل التلفون
__ بتصور فيني؟
_ يمكن
__ ليه ياااخ للزلة صح . قام ضحك
_ يمكن برضو
__ سفيان يااخ عاين الفستان بقى كيف
_ عادي حنرجع بالعربية ولو في الغسيل ما طلع نجيب غيرو
__ انت سفيان مشى وين
_ كيف يعني
__ انت ما سفيان الانا بعرفو نهائي . قام ضحك وقام وقف ومدا لي ايدو عشان يرفعني وبالفعل رفعني وبقيت نتمشى بس وقضيت معاهو يوم حلو . اليوم دا سفيان شخصية تانية خالص غير الشخصية العشت معاها سنين وغير في ساعات بس الشخصية الكنت خاتو ليهو في رأسي.......
____________
من جانب همس
فردوس مشت بيتها وخلت لينا البيت شين فقدتها شديد وبقى ما عندي موضوع مواصلة في التمارين الفيزيائية وبقيت اتحرك من دون عصاية بس لسع بعرج شوية بس احسن بكتير وبنات خالتها لفردوس رجعو الامارات ارتحت منهم بالاخص رماح كانت عاملة لي حساسية
كنت قاعدة في امان الله لمن ضربت وسام انو اجيها قبل البيت بشارعين استغربت فيها وسألتها ما فسرت لي لبست عبايتي ومشيت ما شوفت حاجه اتصلت ليها قالت لي قربت فجأة في عربية حلوة سودة وقفت جنبي استغربت الشباك نزل اتفاجأ ليك بوسام راكبة قدام مع واحد اتخلعت
همس: وسام!!!!
وسام: علاء بتصل عليك بعدين
علاء: تمام . ومدت لي اكياس بالشباك مسكتهم منها وفتحت الباب نزلت قبل ما تقفلو نشوف ليك عمار في وشنا انا رجولي بقو ما شايليني ومقلعة عيوني بعاين بس
عمار: البيت قدامي . والتفت لبتاع العربية وقفل الباب بتاع العربية وقال ليهو بالشباك
عمار: انت لو راجل بس انتظرني هنا . انا هنا قلبي عمل شححح والتفت لينا
عمار: قدامي
وسام: عمار دقيقه
عمار: عشان ما ادفنكم في الشارع هنا هووس وقدامي . انا دي برجف بس ومشينا قدامو بنطاقش دخلنا كدا وقفنا في الحوش وانا الاكياس في ايدي وقف قدام وسام وانا كنت بشمالو
عمار: جايين من وين
وسام: ع ع عماار دقيقه افهمك . بتتكلم وهي بترجف صرخ فيها
عمار: يا حيوانة جايين من وين وابن الح...... دا منو . هي خافت اكتر وانا اكتر منها لانو بتكلم بالجمع مفكر انا كنت معاها
وسام: دا علاء صحبي . مع كلمة صحبي قطع فيها كف انا اتخلعت وقلبي عمل شح فتحت خشمي ويا ريت ما فتحتو
همس: عمار ما كدا . مع جملتي دي ضربني كف بشمالو ودي اول مره عمار يرفع ايدو علي من قوتها انا وقعت........