*ندى قاعدة فى اوضتها وتبدأ تفتكر ايام الدراسة وهى كانت ف &اولى حاسبات ومعلومات&صحيت ندى من النوم وغيرت هدومها وخرجت عشان تفطر*
ندى:صباح الخير
ناهد:صباح النور
ندى:هو فين بابا
ناهد:فطر ونزل من بدرى
ندى:طيب انا كمان هنزل بقى عشان الحق اول محاضرة
ناهد:مش هتفطرى
ندى:لا مش عايزة هشرب النسكافيه بتاعى وخلاص
ناهد:طيب ,بقولك ايه
ندى:ايه ياماما
ناهد:هو انتى ملكيش زمايل ولاد
ندى*بستغراب*:عندى طبعا
ناهد:اومال مش بتحكيلى حاجة يعنى
ندى:حاجة زى ايه
ناهد:اى حاجة
ندى*مش فاهمة قصد مامتها*:ايه يا ماما احنا مجرد زمايل وبنتكلم فى الكلية ويعنى مفيش اى حاجة تتحكى
ناهد:يعنى مفيش حد كدا ولا كدا معجب بيكى
ندى*بصدمة*:معجب بيا!
ناهد:مالك اتخضيتى كدا ليه
ندى:اصل سؤال غريب ,عموما مفيش ولو فيه انا اصلا مش بفكر فى الارتباط دلوقتى
ناهد:ليه بقى
ندى:عشان لسه بدرس مش وقته خالص الارتباط ده وكمان انا لسه قدامى الوقت كبيـــــــــر مش معقولة هوافق على اى حد يتقدملى دلوقتى
ناهد*بحنية*:ياحبيتى انا نفسى افرح بيكى واشيل عيالك
ندى:يـــــــــــــاه يا ماما لسه بدرى اوى
ناهد*بعصبية*:متقوليش لسه بدرى انا اصلا متجوزة وانا فى سنك كدا
ندى:انتى بقى يا ماما لكن انا لا
ناهد:يعنى ايه ال بتقوليه ده
ندى:ماما انا هنزل عشان متأخرش سلام
ناهد:ماشى يا ندى سلام
*ونزلت بسرعة وكانت مستغربة من كلام مامتها خصوصا انها اول مرة تقولها كدا واتصلت ندى بصاحبتها منى*
ندى:الو يا منى انتى فين
منى:انا نازلة على السلم اهوه ,انتى ال فين
ندى:انا واقفة على اول شارعك
منى:ثوانى وهكون قدامك
ندى:اوكى ,سلام
*وشوية وجت منى وراحوا الكلية سوى وبعد ما حضره المحاضرة قاعده مع بعض وكانت ندى سرحانة وبتفكر فى كلام مامتها*
منى:ايه يابنتى ساكتة ليه
ندى:بفكر فى كلام ماما
منى:كلام ايه
ندى*حكتلها على المامتها قالته*:مش عارفة بقى قصدها ايه
منى:عادى شايفاكى كبرتى ونفسها تفرح بيكى
ندى:بس مش بالطريقة دى انا مستغربة جدا بكلمها ده خصوصا انها كانت بتكلم جد جدا
منى:صدقينى كل الامهات كدا متحطيش فى دماغك
ندى:انا اصلا الموضوع مش فى دماغى بس الظاهر انه فى دمغها هى
منى:يابنتى ده نصيب ولو مكتوبلك تتجوزى دلوقتى هتتجوزى
ندى:بس انا مش بفكر فى الجواز دلوقتى ومش عايزة
منى:خلاص مامتك اكيد هتفهم ده
ندى:تفتكرى
منى:اكيد اومال يعنى هتجوزك غصبن عنك ,كبرى مخك بقى
ندى:اوكى
*وفضلوا قاعدين سوى وبعد ساعات روحوا كل واحدة على بيتها*
ندى*اول ما فتحت باب الشقة*:يا ماما مـــــــــــــامـــــــــــــا مــــــــامـــــــــــا
ناهد*خارجة من اوضة الصالون*:ايه ايه ايه ,انتى بتنادى على حد تايه
ندى:الله بلاش انده عليكى
ناهد:اندهى بس بصوت واطى
ندى*بهزاروبتقول بصوت واطى*:ياماما ماما ماما
ناهد:كتك مو ,يعنى انا عمالة اقول ان صوتك مش بيطلع وانك هادية وانتى تعملى كدا
ندى:بتقولى لمين
ناهد:تعالى معايا وانتى تعرفى
ندى:اجى فين
ناهد*خدتها من ايديها ودخلت اوضة الصالون*:هى دى ندى بنتى يا سهير
سهير*قامت وقفت وسلمت عليها وحضنتها*:دى كبرت ماشاء الله
ناهد:اة وبقت فى حاسبات ومعلومات
سهير*بصت لندى*:انتى فى حاسبات
ندى*بألش*:لا حاسب خد
سهير*بصتلها بستغراب وسكتت*
ناهد*قرصتها فى دراعها*:بطلى هزار يابت وردى على طنط عدل
ندى*مسكت دراعها*:اة دراعى ,اة ياطنط انا فى حاسبات
سهير:ماشى,انا هروح بقى وهنجلكوا بكرة انا وابنى وليد
ناهد:تأنسوا وتنوروا ,هنستناكوا*وتخرج ناهد توصل سهير وندى تفضل واقفة ومش فاهمة حاجة وتيجى وتكلم ندى*:ينفع ال قولتيه ده
ندى:ماهى ست غريبة ما انتى قولتلها انى فى حاسبات بتسأل تانى ليه
ناهد:عايزة تسمع صوتك
ندى:ليه حد قالها انى مغنية
ناهد:يالهوى ده انتى فظيعة,الله يكون فى عونها ,عيزاكى بكرة تعملى حماتك كويس
ندى*بستغراب*:حماتى مين؟
ناهد:سهير ام وليد هتبقى حماتك ان شاء الله بس قولى يارب
ندى*بصلها ومش فاهمة حاجة*:ماما ايه البتقوليه ده ,وليد مين وحماه مين فى ايه بالظبط
ناهد:دى طنطك سهير شافتك وبدور على عروسة لآبنها فجت عشان تشوفك وتخطبك لآبنها
ندى*مصدومة*:انتى اكيد بتهزرى
ناهد:لا بتكلم بجد ,جهزى نفسك بكرة
ندى:انا مش هتجوز بالطريقة دى ياماما
ناهد:شوفى العريس الاول وبعدين ابقى اتكلمى
ندى:مش هشوف حد عشان انا اصلا مش موافقة
ناهد*بجدية*:هتشوفى العريس ياندى ورجلك فوق راقبتك حضرى نفسك بكرة*وسابتها ومشيت*
ندى:وانا مستحيل اتجوز بالطريقة دى وهطفش العريس ده بأى طريقة وهتشوفى يا ماما
*وتانى يوم صحيت ندى عشان تروح كليتها*
ناهد:انتى راحة فين
ندى:راحة الكلية يا ماما
ناهد:لا مش هتروحى النهاردة
ندى:ليه بقى ان شاء الله
ناهد:عشان وليد ومامته جايين النهاردة ولزما تجهزى نفسك
ندى:انتى مصممة ولا ايه يا ماما انا بحسبك بتهزرى
ناهد:هو ايه بتهزرى دى!هى دى حاجة فيها هزار
ندى*بصت لباباها*:بابا انت موافق على الماما بتقولوا ده
عاصم*كان معترض بس فيه سبب كان مخليه ساكت ومتكلمش*:مامتك عايزة مصلحتك ياندى
ندى*بحزن*:انت كمان يابابا انت شايف ان دى مصلحتى
ناهد:انتى شايفة مصلحتك فى حاجة غير كدا
ندى*بعصبية*ماما انا مش بفكر فى الجواز دلوقتى ولسه بدرس وغير كدا انا مش موافقة على طريقة الجواز دى مستحيل اتجوز جواز صالونات ده
ناهد:جواز صالونات جوازانتريهات انتى كبرتى ومبقتيش صغيرة والطبيعى ان يتقدملك عرسان
ندى:ده لو هم المتقدمين مش مامته
ناهد:ايه المشكلة يعنى
ندى:انا مش هتجوز يعنى مش هتجوز
ناهد:بتقولى ايه يابت
ندى:بقول مش هتجوز دلوقتى
ناهد:انا قولت للناس خلاص والموضوع منتهى ويلا عشان ننضف الشقة
ندى:انا عندى محاضرة مهمة
ناهد:مش مهم
ندى:يا ماما ارجوكى
ناهد:ندى ماتتعبنيش بقى ,مش كفاية عليا اختك ال فى بطنى
ندى:اوكى
*ندى كانت خايفة على مامتها عشان كانت حامل فمرضيتش تتكلم كتير وتعترض ودخلت وغيرت هدومها وخرجت تعمل الشقة وبعد كدا دخلت على اوضتها ولبست الجيبة والقميص وحجابها عشان تستقبل الضيوف وعرسها وبعد شوية جت سهير وابنها ورحبت ناهد بيهم ودخلوا قاعدوا فى الصالون وشوية وباباه ندى دخل وقعد معاهم*
ناهد*قبل ما تدخل ليهم كلمت ندى*:تاخدى الصنية دى وتقدمى العصير ليهم وبعد كدا تقعدى معانا ومتكلميش خالص لحد ما اقولك
ندى*بحزن*:حاضر ياماما
ناهد:يارب يجعله من حظك ومن نصيبك*ودخلت ناهد تسلم على سهيروابنها العريس*وبعد شوية جت ندى وقدمت العصير وبعد كدا قعدت وبصت لوليد وكان شكله عادى بس ندى كانت حاسة انا مخنوقة اوى ومش قادرة تتكلم*
ندى*لنفسها:يارب مايكنش من نصيبى يــــــــــارب*
ناهد*ابتسمت*:ادخلى يا ندى اقفى فى البلكونة مع عريسك اتعرفوا على بعض
ندى*بحزن*:حاضر *وابتسمت ابتسامة صفرا*ودخلت وقفت فى البلكونة مع وليد وفضل ساكت*وقالت لنفسها:هو طلع اخرس ولا ايه يالهوى*وشوية ووليد بدأ يتكلم*
وليد*بصلها*:انتى اسمك ندى
ندى *لنفسها*:دى عيلة هبله*:والله ماما عمالة تقول ندى يا ندى يبقى اكيد اسمى فوزية
وليد*بصلها*:والله
ندى*برخامة*:والله انت شايف ايه ,اة اسمى ندى
وليد:اة تمام وفى كلية حاسبات ومعلومات
ندى:اة فعلا
وليد:طيب بصى بقى
ندى:بصيت
وليد:انا اسمى وليد وانا وحيد *ولسه هيكمل*
ندى*بألش*:وحيد ولا وليد
وليد*بصلها ورفع حاجبه*:ممكن متقاطعنيش فى الكلام
ندى:طيب ,كمل
وليد:شغال مهندس وحيد ماما ولما نتجوز هنعيش معاها فى نفس البيت عشان مش هقدر اسيبها لو حدها ولزما تخلى بالك منها واوعى فى يوم تزعليها او تخليها مضايقة واى حاجة تطلبها تنفذيها بالحرف الواحد من غير اى نقاش ولو فى يوم حصل اى خلاف ما بينكوا انتى الهتصلحيها طبعا عشان ماما عمرها مابتغلط ابدا ولواعترضى يبقى تروحى على بيت اهلك فورا انا معنديش اغلى من ماما ومش هسمح لآى حد انه يزعلها والبيت طبعا هيكون بيتها انتى مجرد ضيفة بس مش معنى كدا انك هتقعدى ومش هتعملى حاجة هتعملى انتى كل حاجة والاكل البتحبه ماما هو ال احنا هناكله وبس احنا ممكن نجيب شغالة تساعدك لسه هتكلم فى الموضوع ده مع ماما انا بقولك الكلام ده عشان نبقى على نور من اولها
ندى:نور! دى ضلمة
وليد:بتقولى ايه
ندى*بتبتسم*:لا كمل سمعاك
وليد:وطبعا انا والدتى ست طيبة جدا زى ما انتى شايفة وهتعتبرك زى بنتها بالظبط وانتى حاولى تكسبيها بقى طول ما انتى بتسمعى كلامها وماشية على مزجها هتحبك لكن لو فكرتى تنشفى دماغك بقى يبقى انتى حرة
ندى*بتريقة*:بصراحة باين عليها طيبة اوى اوى
وليد:طبعا انا ماما اطيب واحدة شوفتها فى حياتى وهتفضل هى حبيبتى وبس
ندى:تمام ,كمل
وليد:خلاص مفيش انا خلصت كلامى
ندى*ابتسمت ابتسامة لحد ودانها*:بجد ,يعنى ده كلامك
وليد:اة هو ده الكلام
ندى:طب اتفضل ادخل عشان اقولك كلامى
*وخرجوا من البلكونة*
ناهد*ابتسمت*:انا شايفة بشرة خير يا ندى
ندى*ابتسمت*:اوى يا ماما
عاصم:يعنى نقرأ الفاتحة
ندى:ثانية واحدة بس هقوله كلمتين محشوريين فى زورى
ناهد:كلمتين ايه؟
ندى:بص يا اسمك ايه؟ اة افتكرت وليد اول حاجة انت قولت اننا هنعيش فى بيت مامتك ده انت حتى مفكرتش تاخد رأيى
وليد:ليه انتى عندك اعتراض
ندى*بصتله ورفعت حاجبها*:ممكن متقاطعنيش فى الكلام,وبعدين اقولك على حاجة ان الواحد يحب والدته دى حاجة اكيدة ويحترمها ويفضلها عن اى حد مفيهاش اى اعتراض لكن تجبرنى انى اعيش معاها وكمان انى اعمل كل حاجة على مزاجها وكمان مزعلهاش ابدا ولو حصل اى خلاف اجى على كرامتى عشان خاطرها حتى لو كانت هى الغلطانة وانها مبتغلطش ابدا ليه احنا بشر وكلنا بنغلط وانى رغم انى ضيفة هكنس وامسح واغسل وتشوف شغالة كمان لو تساعدنى ده على اساس انى الشغالة الاولى انا اى نعم معنديش اعتراض انى اساعد والدتك بس يكون بمزاجى واكون انا العايزة اساعدها مش انت التقولى وبالنسبة لوالدتك الطيبة الله اعلم الحموات ملهمش امان خصوصا انك ابنها الوحيد ودى حاجة انا واثقة انها هتكون صعبة عليها وعلى الهتجوزك واخر الكلام انا مش موافقة خلى مامتك تروح تنقيلك واحدة تانية عشان انا غالية اوى وكرامتى اغلى بكتير*وسكتوا كلهم وبصولها وقامت ندى وقفت*:شرفتونا
سهير:يلا يا ابنى ده انا بكرة اجوزك ست ستها عملالى محاضرة ومش عجبها كلامك
ناهد:استنى بس يا سهير
سهير:انا مش هستنى ولا دقيقة واحدة يلا يا وليد
*وخدت سهير وليد ومشيوا وناهد فضلت تعتذرلهم على الندى قالته وكانت ندى فرحانة اوى انه مشى وكأنه هم وانزاح ودخلت اوضتها وهى مبسوطة وشوية وجت ناهد*
ناهد*بعصبية:ايه ال انتى هببتيه ده
ندى:هببت ايه ده المفروض يحصل انا مش موافقة عليه وعلى اى كلمة قالها
ناهد:ليه ان شاء الله وفيها ايه لما تعيشى مع امه فى بيت واحد
ندى:لا طبعا انا لزما يكون ليا بيتى الخاص بيا عملاه بزوقى احس ان انه ملكى مش افضل طول عمرى عايشة ضيفة وياعالم الست دى ممكن تعمل معايا ايه والمعاملة ال ممكن تعملنى بيها هتكون ازاى,انا مستحيل اوافق على كدا
ناهد:ليه ان شاء الله ما فى بنات كتير عايشة مع حمواتها
ندى:اة فى عمارة واحدة لكن مش فى بيت واحد تفرق وحتى لو فيه حد يوافق على كدا انا بقى لا مش موافقة
ناهد:عموما ماشى ده لسه اول عريس
ندى:يعنى ايه بقى انا مش عايزاكى تجيبى عرسان تانى كفاية اوى كدا ,ماما انا كل الهمامنى دراستى وبس وكمان انتى قولتى شوفيه الاول وبعدين اتكلمى وانا معجبنيش وموافقتش عليه
ناهد:كنتى ممكن تقولى كلامك بأسلوب احسن من كدا ,لكن انتى عايزة تطفشيه بتعندينى صح
ندى:لا مش صح ,بس انا مش عايزة اتجوز
ناهد:هتتجوزى ياندى وهتوافقى على العريس التانى وحسك عينك تعملى زى ما عملتى النهاردة مفهوم
*وخرجت ناهد وقفلت الباب ,ونامت ندى على سريرها زعلانة وفضلت تعيط وماكنتش فاهمة ليه مامتها بتعمل كدا وليه مصممة تجوزها بالسرعة دى وخافت اوى لما لقت ان مامتها هتجيبلها عريس تانى وماكنتش عارفة هتعمل ايه وهتعترض عليه ازاى وفضلت طول الليل تفكر هتعمل ايه مع مامتها والعريس التانى ده؟
ياهل ايه رأيكوا فى الكلام القالته ندى للعريس الاول وياترى هتعمل ايه مع العريس التانى؟