رواية شلة بنات الفصل الخامس 5 والسادس 6 بقلم شذى عبدالمكرم
كل يوم سام بثبت لي نفسو بأهتمامو لمن خلاني اتعود عليهو وبقى جزء من يومي وبلقاهو في الجامعة وتعاملنا في حدود الجامعة بس
هديل: هوي حمزة حيجيب اهلو بكرة تعارف
روز: اخيرا عندنا عروس في الشلة
هديل: عروس شنو خطوبة بس والعرس بعد اخلص
روز: المهم بس احساس في وحدة مخطوبة وكدا
قمر: بايرات جد كدا . ضحكنا
روز: احتمال هديل تفك لينا البورة دي
ريان: ان شاءلله تكون فاتحة خير بس . قعدنا نخطط لبكرة وكدا لمن خلصنا كلهم طلعو فصلنا انا ونوسة بس
نوسة: ما نطلع؟
روز: دايرة اشوف سام الليلة ما لقيتو ولا حتى رسل لي من الصباح
نوسة: من بتين الحنية دي كلها
روز: والله اتعودت عليهو
نوسة: اتصلي ليهو
روز: قولتي كدا؟
نوسة: انتي هبلة هو الدايما الببادر المرة دي انتي بادري عشان يحس انو مهم ولو شوية
روز: تمام . اتصلت ليهو لقيت تلفونو مغلق
روز: مغلق
نوسة: احتمال حاصلة ليهو حاجة
روز: اممممم احتمال . ما عارفة جاني شوية قلق لانو ما حصل قفل تلفونو
نوسة: لو قلقانة خلينا نشوف واحد من اصحابو موش بتعرفيهم
روز: يعني يعني شوفت كم واحد كدا معاهو بس صحبو المقرب مراد
نوسة: ورح . مشينا اتجاه قاعتهم لقيت واحد من اصحابو كان مرة شوفتو معاهو مشينا ليهو
روز: السلام عليكم
الشاب: وعليكم السلام
روز: دايرة اسألك من سام دفعتكم بتعرفو؟
الشاب: ايي بعرفو
روز: جا الليلة
الشاب: ايي بس حاليا في السجن . قلعت عيوني من الخلعة
روز: شنووو كيف يعني
الشاب: ما ذي الفهمتي حصلت شكلة الصباح بين صحبو مراد وواحد كدا والزول قام طعن سام لمن كان بحجز
روز: وهسي سام كيف وتلفونو قافل . من شافني خايفة
الشاب: تلفونو اتكسر مع الجوطة ديك وتقريبا ودوهو المستشفى ومن هناك قسم الشرطة
روز: واقدر اوصل ليهو كيف؟
الشاب: ما عارف والله
روز: اديني رقم مراد لو عندك
الشاب: دقيقه . ملاني رقم مراد وشكرناهو ومشينا مع نوسة
نوسة: واااي طعنو عديل كدا ان شاءلله يكون كويس
روز: ان شاءلله يا رب . اتصلت في تلفون مراد رد لي
روز: الو
مراد: اهلين
روز: معاي مراد؟
مراد: ايوااا بس منو معاي
روز: معاك روز
مراد: اهلين روز كيفك
روز: انا كويسة الحمدلله دايرة اسألك من سام كيفو
مراد: سام كويس الحمدلله
روز: جنبك؟
مراد: لالا بعيد شوية
روز: عليك الله بتقدر تفتشو وتديني ليهو دايرة اتطمن عليهو عرفت الحصل معاكم هو كويس صح الطعنة ما خطيرة
مراد: لالا جرح سطحي هسي قاعدين يستجوبينو دقيقه اهو طلع . مدا ليهو التلفون
سام: روز
روز بلهفة: سام انت كويس
سام: انا كويس بس عرفتي من وين
روز: لمن ما رسلت لي من الصباح عرفت بكون حاصلة ليك حاجة سألت منك واحد من دفعتك حكى لي الحصل واداني رقم مراد
سام: ايواااا
روز: متأكد انك كويس
سام: والله كويس ما تقلقي والجرح بسيط خلصنا حنطلع هسي بس تلفوني كسر
روز: عارفة
سام: احتمال ما اتكلم معاكي الليلة بس حألقى طريقة
روز: لالا بس خلي بالك من نفسك
سام: تمام طلعتي من الجامعة
روز: لسع بس هسي حنطلع
سام: تمام انتهبي لنفسك
روز: تمام . قفلت منو يداب اطمنت
نوسة: اها هو كويس
روز: كويس
نوسة: كدا قلبك ارتاح؟ . هزيت ليها رأسي ورجعنا البيت
بالليل اتصل لي من تلفون اخوهو اتكلمنا خمسة دقايق وقفلنا اتطمنت عليهو ونومت اليوم التاني كان الجمعة والليلة تعارف هديل قومت عملت الشاي اول زول طلع ابوي صبح لي وقعدنا نشرب وبسألني من حالي والجامعة شوية طلعت امي والتوأم
روز: ابوي عشان اذكرك الليلة التعارف تبع صحبتي هديل ابوي: اي صح حتمشي براكي؟
روز: حأمشي مع نوسة
ابوي: تمام خلو رامي يوصلكم
روز: ابوي الا تكلمو انت عارف انو الليلة يوم اجازتو وحيرفض
ابوي: خلي انا بكلمو
روز: تمام
امي: هو للان ما صحا
روز: انتي عارفة انو يوم الجمعه بعد يصلي الصبح ما بصحى الا قريب لصلاة الضهر
امي: شغل المستشفى دا مرهق لكن
روز: شديد مرات يومين ما بنشوفو
امي: بالجد والله
بعد الفطور جاتني نوسة عشان نخطط للطلعة وكدا
روز: طبعا حيوصلنا رامي
نوسة: راجلي حيوصلنا
روز: والله دا حسب كلام ابوي قال هو حيوصلنا
نوسة: احيا انا ان شاءلله يوصلنا بعد الصلاة عشان اشوفو بالجلابية واتكسر للمرة الالف . ضحكت على انبراشها
روز: لو كنتي مرتو كنتي حتسوي شنو
نوسة: بحبسو ليكم جوا الدولاب ما بخليهو يطلع . ضحكت
روز: لو كدا شوفي ليكي راجل تاني
نوسة: لالا اخوكي دا بس
روز: كدا نشوف . وبقيت اعمل في كيك عشان نشيلو معانا فجأة رامي جا داخل المطبخ بفنيلة داخلية وشورت بس طويل وهو بحك في رأسو
رامي: روز كدا رصي لي الفطور
روز: كدا صبح بالاول . يداب انتبه على نوسة
رامي: ايناس كيفك
نوسة: كويسة الحمدلله وانت
رامي: انا تمام . وقام طالع دقيقتين بس جا راجع لابس تيشيرت و وقف في باب المطبخ ونوسة كانت مدياهو ضهرها خوفت انها تنبرش فيهو وطبعا هو بعاين فيني ما قدرت انبهها او كدا
نوسة: طبعا يا روز عندي مباراة بالليل لو ما اتأخرنا في الرجعة
روز: مباراة شنو
نوسة: مع ميدو اخوي والمرة دي لو غلبتو حيديني تيشيرت البرشلونة حقو ولو غلبني حيشيل تيشيرت ريال مدريد حقي
روز: هو حيغلبك كالعادة
نوسة: لالا المرة دي مصممة اغلبو عشان هو شال مني تيشيرتات كتيرة خلاص . ضحكت
روز: انتي وميدو مشكلة هسي هو كيف
نوسة: الدكتور قال كويس بس طبعا الحركة الكتيرة ما بتنفع معاهو عشان كدا دايما بنلعب بيلاستيشن بس ومرات كرة قدم بس بسيطة اخوي واحد بس خايفة اخسرو . وقامت تبكي اخوها ميدو صغير في الاساس بس عندو قلب بتعب دايما ما عندو اصحاب كمية عشان ما بخلوهو يطلع الشارع كتير الا المدرسة بس عشان كدا هي كل اصحابو بتحبو اكتر من روحها مشيت عليها طبطبت عليها
روز: حبيبتي ما تبكي حيكون كويس ان شاءلله
نوسة: ان شاءلله . دا اخوها البقول انا مكرشة عليهو الصغير دا ذاتو لمن القاهو بقول ليهو راجلي هو بضحك بس رفعت راسي عاينت لقيت رامي بعاين لينا قرب علينا
رامي: ميدو قوي وانا عارفو
نوسة: هو ما قوي بس ما داير نبكي عليهو بس اكيد بتألم مرات كم مرة قلبو بوجعو بس ما بشكي الا انا اسألو متوجع حتى بقول مرة سألتو قال عشان ما ابكي . رجعت تبكي تاني حننتنا انا ورامي
روز: خلاص نوسة . ومسحت على ضهرها
رامي: دا كلها حسنات في صفحتو واذا احب الله عبدا ابتلاهو صح
نوسة: صح
رامي: كل مرة حاولي فرحيهو ولو مكتوب ليهو طويل حيعيشو لانو ماف زول بموت ناقص عمر صح
نوسة: صح
رامي: بس خلاص عيشو اللحظة باللحظة لانو احتمال بكرة انتي تموتي قبليهو عشان كدا بدل تبكي عليهو اضحكي معاهو واصنعو زكريات حلوة عشان بكرة ما تندمي على الزمن الضيعتيهو في البكي والزعل على حالتو
نوسة: صح كلامك والله شكرا كلامك ريحني شديد
رامي: العفو .
رامي: روز انا في غرفتي جيبي لي الفطور هناك
روز: حاضر . هو طلع من المطبخ
نوسة: اخوكي دا حنين
روز: قبيل موش كان راجلك هسي بقى اخوي؟ . قامت تضحك
روز: ايي اضحكي كدا ما متعودة عليكي زعلانة . تاني ضحكت قومت مشيت رصيت الفطور لرامي ووديتو ليهو ورجعت طلعت الكيك من الفرن وخليتو يبرد
نوسة: انا بمشي بجهز بعد دا
روز: تمام وانا بديكي تلفون
نوسة: تمام . طلعت ومشيت لرامي عشان ااكد عليهو قال حيودينا بعد الصلاة اتصلت لنوسة كلمتها
بعد الصلاة اتجهزنا رامي رجع من الجامع ونوسة اصلا كانت معاي ركبنا وهو وصلنا
رامي: اتصلو لي بعدين برجعكم
روز: تمام . ومشى
نوسة: واااي الجلابية خورافية فيهو احيا انا راجلي دا سمح لكن . ضحكت فيها
روز: خشي خشي فضحتينا . ودخلنا لقينا كل البنات معاها نحنا اخر اتنين بدينا في تجهيز البيت وترتيبو ساعدنا خالتو وحتى عملنا الغدا نحنا بعد الغدا بدينا ترتيب البيت وفرشنا وجهزنا العيدية والشايلات والعصاير وجهزنا اي حاجة حتى مشينا اتجهزنا وبقينا منتظرين بعد المغرب اهل حمزة وصلنا واستقبلناهم وحصل التعارف وقالو الخطوبة بعد اسبوعين لمن خلص اليوم وطبعا ما خلا من قلقي على حمزة لانو من امس ما عرفت الحاصل عليهو شنو اتصلت لرامي رجعنا البيت اخر الليل اتصل لي سام بنفس رقم اخوهو
سام: رزتي
روز: يعني متذكرها
سام: كيف الكلام دا انتي عارفة انو تلفوني اتكسر
روز: اممممم
سام: يعني هسي زعلانة
روز: امممم
سام: اي حاجة ولا زعلك بكرة من الصباح حأمشي اشتري لي واحد جديد عشان خاطرك
روز: لالا ماف داعي . قام ضحك
سام: هو كدا كدا حأحتاج لتلفون . ضحكت لمن استوعبت
سام: ايي اضحكي كدا يا السمحة واسف انو ما اتصلت ليكي من الصباح
روز: لالا عادي انت كيفك وكيف حرجك
سام: نحنا الاتنين كويسين . ضحكت لانو قالها بطريقة حلوة
روز: لالا تمام مدام انتو الاتنين كويسين
سام: اها يومك كان كيف
روز: كان حلو كان التعارف تبع هديل وخطوبتها بعد اسبوعين
سام: ايوااا حلو عقبالنا يا رب
روز براحة: امين يارب اها انت يومك كيف
سام: عادي جدا الحجة ما خلتني اطلع عشان قال عيان وكدا
روز: احسن حاجة عملتها . قام ضحك
سام: انتي معاها
روز: طبعا
سام: لالا تمام وكمان سليمان طلع من الصباح جا المغرب عشان كدا ما اتصلت ليكي
روز: ايوااا هسي رجع ليهو تلفونو عشان ما يجوط فيك
سام: لالا عادي ياما اتكلم بتلفوني
روز: امممم لا يعني تلفونك فيهو ارقام بنات كمية تبع سليمان . قاصدة دايرة اقيس نبضو
سام: لالا والله ما ارقام بنات
روز: هسي قولت بلسانك ياما اتكلم بتلفوني افهم شنو واحتمال قاعد يخليك تتكلم معاهم
سام: والله يا رزة انتي فاهمة غلط دقيقه اشرح ليكي عشان ما تفهمي غلط بتكلم مع اصحابو بس . قومت فكيت الضحكة هو سكت شويه تقريبا مستغرب ليه بضحك
روز: كنت دايرة اقيس نبضك بس . وواصلت ضحك
سام: مالك ياااخ قربت افوت فيها ما باقي لي الا اعملا في روحي . هنا فكيت الضحكة والله لو ما كذبت بكون ناس امي سمعوني فجأة استوعبت اني بضحك بصوت كتمت الضحكة
سام: انتي عارفة ضحكتك حلوة . خجلت
روز: شكرا . اتكلمنا شوية حتى نومت وكنت مبسوطة .........
6
بعد مرور اسبوع كنت في الجامعة وخلصت محاضرات اتصلت لسام قولت اشوفو شوية حتى اطلع
روز: سام وين انت
سام: مع اصحابي
روز: ايوااا تمام لاني طالعة كنت دايرة اشوفك قبل ما اطلع بس ماف مشكله
سام: طلعت لي حاجة مهمة حأرجع البيت هسي بس وين انتي
روز: خليك مع اصحابك نتلاقى بكرة بس
سام: خلاص تمام . قفلت منو قولت ماف مشكله مدام عندو حاجة مهمة
روز: نوسة نمشي؟
نوسة: ما دايرة تشوفي سام؟
روز: لالا طلعت ليهو حاجة مهمة ورح . وطلعنا جنب بوابة الجامعة جنب كراش العربات
نوسة: روز دقيقه نسيت بطاقتي في بينش القاعة تقريبا
روز: ما جادة نسيتي كيف
نوسة: قبيل كنت بشوف فيهو ولمن الدكتور نبهني دخلتو تحت الدرج خمسة دقائق وبرجع
روز: بنتظرك في الضل هنا . بقيت منتظراها عشرة دقائق ما رجعت لمن جيت ارجع اشوفها بس شوفت سام طالع مع بت وهم بتضحكو وقفت اعاين ليهو الغيرة قامت علي شايفة فيها بتضربو في كتفو وبضحكو وركبو عربية سام مسكت تلفوني رسل لسام
_ سام . رد لي طوالي
__ عيونو
_ اسمعني اوعاك تتصل لي خلي المعاك دي تنفعك اصلا شبهك بس اياك ترجع لي . ما تم دقيقه اتصل فصلت فيهو وقومت اتحركت من مكاني واتجهت على البوابة بسرعة وطلعت برا الجامعة سمعت بوري وراي عرفتو هو ما وقفت وقف عربيتو ونزل جاني سريع وقفني
__ روز اقيفي . وقفت عشان نحنا في الشارع
_ ارجع من محل جيت . جيت امشي
__ انتي ليه دايما ترمي الكلام وبتهربي
_ اهرب ليه بس ما بهرب بس الوقوف معاك بقرف بالله ارجع ما تخلي السنيورة دي تنتظرك اكتر
__ امممم الوقوف معاي بقرف؟ لالا تمام بس المعاي دي مروة بت خالتي واختي في الرضاعة لو ما عارفة واتصلت لي انو ماشة بيتنا لامي عزمتها غدا عندنا وجامعتها قريبة هنا جاتني عشان نرجع مع بعض بس لا انتي بتحكمي على كيفك بس كان ممكن تسأليني وانا اوضح ليكي بس لا واضح جدا انك ما شايفة نفسك في العلاقة دي عشان كدا واقفة على هبشة . قال كلامو دا ومشى ركب عربيتو ومشى خلاني واقفة كنت مقهورة بقيت اضرب رجلي في الارض بزعل دايرة ابكي بس لا ما قادرة دايما غبية بتسرع في كلامي طلعت اختو في الرضاعة بس لا انا بحكم بعيوني بس كلامو الاخير معناهو انتهينا خلاص اتصلت لي نوسة رديت بأخر نفس
نوسة: وين انتي
روز: برا قدام البوابة . جات لقتني في حالتي ديك سألتني حكيت ليها
نوسة: والله بالغتي يا روز كيف تقولي ليهو كدا
روز: ما عارفة والله كنت زعلانة
نوسة: بس كان تسألي بالاول بس ما تهجمي كدا هو المتمسك بالعلاقة دي بس انتي لا لو خلاكي بكون معاهو حق
روز: والله ما كدا بس حسيت بالغيرة
نوسة: حتى لو هسي حاولي صالحيهو وما تخلي يحصل فجوة كبيرة بينكم
روز: هسي اقول ليهو شنو بس وانا خربت الدنيا
نوسة: هسي خلينا نرجع واتصلي ليهو طوالي
روز: تمام
رجعنا البيت فتحتو بالمفاتيح لقيت ماف زول استغربت اتصلت على امي
روز: امي وين انتو
امي: في المستشفى رايس دي وقعت فتحت رأسها . اتخلعت
روز: متين الكلام دا
امي: قبل شوية
روز: انتو في اي مستشفى
امي: المستوصف القريب لينا دا بس خلصنا راجعين خلاص
روز: وريل وين
امي: معاي طلعنا
روز: تمام . انتظرتهم عشرة دقائق رجعو لمن شوفت رايس رأسها ملفى بالشاش حتى عينها قلبي وجعني قومت ابكي جريت ليها رفعت فوق
روز: كيفك
رايس: تمام . بقيت ماشة بيها وقعدت في السرير وهي في رجلي مسحت دموعي
روز: بوجعك؟ . هز رأسها بمعنى لالا
روز: وقعتي كيف
رايس: كنت بطارد مع ريل وحجر عترني وضرب رأسي في حافة الباب . رجعت ابكي تاني
روز: امي عملتو ليها صورة اشعة
امي: لالا بس الدكتور قال مدام ضربتو في الباب معناهو خفيف حتى الفتحة ما كبيرة اخد خذرتين
روز: وليه عينها مغطى
امي: لانو من الحاجب وفوق
روز: ايواااا . رقدتها في السرير وريل جات قعدت في رجلي ضميتها قامت تبكي
ريل: وقعت بسببي لانو انا طردتها . مسحت ليها دموعها
روز: ما كنتي عارفة انها حتقع ما تبكي حتبقى كويسة
رايس: ريلة انا كويسة
روز: شوفتي قالت هي كويسة
رايس: من قبيل تبكي تعالي ارقدي جنبي . رقدتها جنبها وبقيت اشوف فيهم حلوين مع بعض ما بتفرقو نهائي توأم متطابق في ناس كتيرة بتلخبط بينهم هسي نوسة مرات بتلخبط طبطبت عليهم نامو ومشيت اساعد امي في الغدا اتصلت لي نوسة تشوف عملت شنو مع سام ياااخ طلع لي من رأسي كلمتها الحصل مع رايس قالت حتجي تكفر ليها بعد الغدا
بالفعل جاتني مع امها واخوها ميدو
روز: راجلي . قام ضحك
ميدو: هووي انتي كبيرة شديد . كلهم ضحكو
رامي: شوفو الخالة دي بالله . ضحكنا انا ونوسة
نوسة: روز خليهم وانت يا ميدو ما حتلقى احسن من روز دي
ميدو: بلقى
روز: دا شكلو جاهز يا خالتو انتبهي شكلو مجهز مرتو من هسي . كلهم ضحكو قعدو معانا شوية وطلعو
بالليل البنج فكا من رايس تعالو شوفو البكي هي تبكي وريل تبكي وانا خاتها في رجلي عشان تسكت بس كانت متألمة شديد لمن بكتني معاها وانا اصلا فايتة على بكية بسبب الحصل لي مع سام وهسي رايس اديتها مسكن بعد ربع ساعه من البكي حتى سكتت ووبقيت اهز فيها لمن نامت بعد تعب ورقدتها في سريري عشان لو رقدت مع ريل احتمال تدقشها وريل نامت في سريرهم مسكت التلفون اتصلت لسام رد بس ما اتكلم وانا كنت ساكتة لمن مر دقيقه كاملة قومت ابكي في البداية ما اتكلم ولا قال لي بتبكي مالك حرقني الحركة دي زدت البكي لمن بتنهد دايرة اقفل اتكلم هو
__ روز خلاص ما تبكي
_ ليه ما ابكي بس
__ هسي بتبكي عشان شنو
_ بسبب رايس من قبيل بتبكي لانها فتحت رأسها وبسببك انت
__ كفارة ليها هسي هي كيف ان شاءلله الفتحة ما كبيرة
_ كفر الله سيئاتك لالا الفتحة ما كبيرة شديد بس البنج فكا منها ومن قبيل بتبكي هسي نامت
__ وانتي بدل تسكتيها بقيتي تبكي معاها . تاني بكيت
_ انت ما شايف منظرها وهي متألمة وبتبكي بكتنا معاها انا وريل . قام ضحك
__ شافعة بس والله
_ سام ما تقول لي شافعة
__ خلاص ما شافعة واها هسي بتبكي تاني ليه
_ بسببك انت
__ انا عملت شنو لمن تبكي
_ انت زعلان مني لانو قولت ليك كلام بجرح ومن قبيل خجلانة اتصل ليك يعني اتصل اقول شنو مثلا اقول انو انا اسفة لانو جرحتك بالكلام ولا اقول انا اسفة لانو المفروض كان اسألك حتى احكم ولا اقول انا اسفة لانو حسستك انو ما متمسكة بالعلاقة دي محتارة من قبيل
__ لا هسي انتي بتعتذري ولا بتشتكي
_ ما حاعتذر لانو انت خليتني ابكي بسببك . قام ضحك
__ يقولو ليكي شافعة تزعلي يعني هسي بدل انتي تراضيني بسبب كلامك القبيل المفروض انا اراضيكي بسبب انو خليتك تبكي لانو زعلان منك
_ بس الله ينور عليك . قام ضحك شديد
__ روز هسي انتي جادة؟
_ شايف لسع زعلان
__عرفتي كيف
_ لانو لو ما زعلان كنت بتقول لي رزة او رزتي . قام ضحك تاني
__ كويس انك عارفة كدا انو انا كدا زعلان
_ انا ما قاصدة انو ازعلك
__ وخلاص ليه قولتي لي الوقوف معاك بقرف . زعلت من نفسي شديد لانها كلمة كعبة . قولت ليهو بالراحة
_ لانو كنت غيرانة عليك
__ قولتي شنو ما سمعت
_ سام انت سمعت ياااخ
__ امممم وماف غيرة من دون حب معناهو بديتي تحبيني
_ لا لسع
__ يعني ماف بصيص امل
_ ما عارفة
__ عارف انو بديتي تحبيني بس ما دايرة تعترفي بس يا ستي بينا الايام ونشوف واحتمال لو لقيتيني مع وحدة من صحباتي تعترفي . حسيت بالغيرة من كلامو
_ سام ما تخليني ادخل ليك بالسماعة دي هسي . قام يضحك
__ هسي م قولنا ما بنغير
_ سام خلاص يااخ
__ تمام اها ما راضيتيني لسع
_ وحتى انت ما راضيتني وكدا اتعادلنا
__ خوفتيني عديل . ضحكت
_ لازم تخاف . اتكلمنا شوية وفي النهاية هو الراضاني ........
___________
من جانب ريان
في يوم كنت بتصفح في الميديا لقيت ريان عاملة لي فلو في الانستا دخلت حسابو لقيت ليهو كمية صور شوفت كم صورة كدا قولت ما شاء الله نضيف لكن طوالي رديت ليهو الفلو شكلو كان اون لاين رسل لي طوالي
_ توأمي
__ راجل منى . رسل لي ايموجي ضحك
_ كان يوم اسود يوم ساعدتيني
__ اعيش واساعدك في التطفيش
_ لا في الحاجة ديك تنفعي عديل كدا
__ بس تاني بقروش
_ ماف مشكله بس كيف تطفش
__ اعتبرها عندي
_ اتقفنا
__ دايرة اسألك
_ اسألي
__ اسمها اتفضلي بس على كلا انت الاسماء دي كلها انتهت؟
_ كيف ما فهمت عليكي
__ ليه بس اهلك يسموك ريان
_ ما هو انا ممكن اسألك نفس السؤال
__ منطق . قام يضحك
_ يااخ انتي عسل
__ من دون تكبر عارفة . ومعاهو ايموجي الافتراء داك قام ضحك وبقيت اتونس معاهو وبنضحك
__ ريان انت شكلك ما شغال جامعة بكرة
_ شغال والله
__ خلاص شكلك من الناس البتساهر
_ ممكن تقولي كدا
__ ايوااا بس انا ما منهم وحأنوم بعد دا
_ اوكي بس بالجد الونسة معاكي حلوة
__ تسلم
_ يلا تصبحي على خير
__ وانت من اهل الخير . وطلعت من الانستا وبقيت ابتسم ساي حتى مشيت جهزت لبسة بكرة ونومت.......