رواية اللون السابع للحب الفصل الاول 1 والثاني 2 بقلم شذى عبد المكرم
في عالم لا يعترف إلا بالأبيض والأسود كان يحبها بلون لا تملكه العيون ..... لون لا يرى لكنه يسكن كل خلية فيه
بين نظرات لا تقال . وصمت ملئ بالصراخ تبدأ حكايته معها
كنت قاعدة مع البنات بنتونس عادي دخلت المطبخ عشان اجيب سكر لانو القهوة سكرها كان خفيف شوية سامعة البنات بردو السلام برا لزول وفجأة سمعت صوتو البخلي كل همومي تروح في ثواني قطع سرحتي انو بنادي فيني رديت بصوت عالي " انا في المطبخ جااااية دقيقة" شيلت السكر سريع وطلعت لقيتو رجع من صلاة الجمعة وهو لابس جلابية ابتسمت ليهو
همس: تقبل الله
عمار: منا ومنك يا رب
همس: اها يا ابوي داير شنو
عمار: عاوز لي جك موية
صفا: هسي نحنا ديل كلنا كدا كم كان كلمت وحدة فينا ما بنجيبو ليك؟ . ما رد ليها
وسام: صفا بلاش فلسفة انتي عارفة انو عمار لو بطة قاعدة مستحيل يطلب من زول حاجة . فعلا ما بطلب من زول غيري وحتى ما بعاين لوحدة فيهم جيت قريب منو
عمار: همس جك موية عالسريع معاي شباب
همس: حاضر وعاوز قهوة ولا شاي
عمار: والله ما عارف اعملي البريحك
همس: بعمل ليك الاتنين لو خلصت بديك تلفون
عمار: تمام وصلحي توبك دا . ضحكت لانو توبي كان وقع من رأسي
همس: عمورة نحنا بنات بس
عمار: تمام تمام . مشيت سريع جيبت ليهو الموية ومشى وانا رجعت للبنات
صفا: نفسي اعرف انتي عملتي لعمار دا شنو . ضحكت
همس: عملت شنو يعني عمار دا المربيني
صفا: عارفين بس كمان نحنا بنات عمو عادي لو طلب من وحدة فينا حاجة ياااخ دا لو جا وما لقاكي بخلي الحاجة الكان جاي عشانها وبرجع . ابتسمت ودخلت المطبخ عشان اجهز ليهو حاجاتو الكلمني عشانو ومن حظو جات جارتنا معاها زلابية عملتو كرامة ختيتو ليهو واتصلت ليهو تلفون انو جهزت الحاجات ومشيت اتلاقيت معاهو
عمار: الشباب ديل لو طلعو بدري بوديكي تأكلي ايسكريم بس اوع تكلمي زول . ابتسمت بفرحة
همس: جد؟
عمار: حصل يوم كذبت عليكي
همس: ما حصل بس فرحة مني
عمار: اجري جوا يلا . مشيت سريع بفرحة وبوزع بسمات ساي
صفا: مالك بتتبسمي براكي
همس: يعني ما ابتسم براي يعني
روعة: ما هي واضحة مشت لعمار وجات بتضحك
همس: انتي قولتي عمار يعني الموضوع منتهي
صفا: والله البشوفكم بقول راجل ومرتو ما بت وابوها . سرحت في كلمة راجل ومرتو دي
همس: امممممم بس بت وابوها
صفا: يا بختك بيهو بخاف عليكي اكتر من روحو . ابتسمت بخجل وقعدنا نتونس عادي والشباب ما طلعو وزعلت لانو عمار كان حيوديني اكل ايسكريم بس للاسف حتى انهم اتغدو معاهو وطلعو بعد المغرب قاعدة بسمع اغاني بتلفوني فجأة رن وكان عمار رديت
عمار: تعالي الحوش الخلفي . مشيت سريع ليهو كان شايل كيس في ايدو
عمار: معليش ما قدرنا نطلع
همس: لالا عادي لانو الشباب اتأخرو
عمار: هاكي دا الايسكريم . شيلتو بفرحة
همس: جيبتها لي
عمار: بما انو ما قدرنا نأكلها برا جيبتها ليكي
همس: شكرا شكرا ياااخ
عمار: عفوا يلا اجري جوا
همس: شنو كل مرة اجري جوا انا ما شافعة ياااخ . قام ضحك
عمار: والله مهما كبرتي حتفضلي صغيرة في نظري . ضيقت ليهو عيوني ضحك ولزاني من جبيني بخفة كدا
عمار: بطة ما تعملي لي عيونك دي كدا عاملة ذي الكديسة
همس: الله يسامحك يا عمار . ضحك
عمار: اللهم آمين يارب . بعدها اتذكرت حاجه وابتسمت بخباثة
همس: عمورة
عمار: لا
همس: هو شنو لا انا متين قولت حاجه هسي
عمار: برضو لا مهما كان . مسكتو من ايدو فوق وهزيتو وعاينت ليهو بزعل
همس: عمار ياااخ
عمار: برضو لا
همس: والله ازعل منك
عمار: ازعلي بس لا
همس: كويس يا عمار شكرا ليك . وعملت روحي زعلانة واديتو ضهري.
عمار: كدا احكي دايرة شنو
همس: خليتو ذاتو
عمار: انتي عارفاني ما حأحنسك لو ما دايرة تقولي خلاص . التفت سريع عشان ما يغير رأيو
همس: بكرة طالعين مع البنات
عمار: وين
همس: عازميننا قهوة في بيت جارتنا بس بعيدة شوية
عمار: وانتي عارفاني في قصص قعدة جبنة البنات دي صح؟
همس: عارفة بس
عمار: بس شنو
همس: كلنا ماشيين
عمار: انا ما عندي علاقة بالباقيين ديلاك عندهم اولياء امور وما بأخدو اذنهم مني انا
همس: يعني ما امشي
عمار: هي الساعة كم
همس: بعد الضهر
عمار: العصر يلقاكي في البيت ما تقولي لي هم اتأخرو تطلعي قبليهم ان شاء الله تحججي بأي حاجه دي اول حاجه وتاني حاجة القطيعة معاهم ممنوع صح ما حأكون موجود بس متأكد انو ما بتخزليني تالت حاجه والاهم المشي في الشارع ما عاوز ضحك في الشارع وحركات البنات ديك . وتوالت الوصايا كالعادة ذي كل مرة لمن اكون دايرة اطلع
همس: حاضر عيوني ليك تاني في اوامر
عمار: ولا اقول ليك حاجه ماف مشي . قومت ضحكت
همس: والله يا عمار ما عارفه اقول ليك شنو
عمار: اجري جوا يلا واوع تنسي كلامي
همس: من عيوني . وجريت سريع وانا بضحك.....
__________
من جانب اخر
"وراء كل صبر ، أمورًا جميلة ،
فلا نستعجل لعلنا نُرزق بِما نُريد"
همس جات راجعة من عمار مبسوطة وفي بتضحك وفي ايدها كيس جات قعدت جنبي
__ دا شنو دا
_ ايسكريم . عاينت ليها بأستغراب
__ جيبتي من وين
_ جابو لي عمار
__ ليه عمار حقك دا ما عندنا ليهو
_ لاني محظوظة عشان كدا ومحظوظة بيهو انا
__ عوضك عن كل حاجة
_ كان الاب والاخ والصديق بالنسبة لي وعمرو ما حسسني بفقدان ابوي الله يرحمو ودايما جنبي وسند بالنسبة لي
__ دايما بميزك وعمرو ما خجل قدامنا انو يهتم بيكي كأنو ما شايف غيرك نهائي
_ امممممم
__ لو اتزوج حيحصل ليكي شنو
_ والله بموت وبتوه بعدو انا
__ بس دا سنة الحياة وانتي برضو حتتزوجي . سرحت بعيد
_ مصيرنا نفترق يوما ما
__ بس ما ظنيت والله لانو انتي بالنسبة لعمار روحو ونفسو وبتو حتى لو اتزوج ما حيهملك ابدا
_ دا اذا الاتزوجها ما شريرة بس . وضحكنا طبعا همس بت عمي وابوها متوفي بس عمار عوضها عن كل حاجة في حياتها وهي محور حياتو لعمار ما برضى فيها ابدا كلنا بنحسدها عليهو مرات من شدة اهتمامو بيها الوحدة بتتمنى يكون عندها واحد ذي عمار دا بس
اليوم التاني بعد الضهر اتجهزنا عشان قعدة الجبنة ومن سوء حظي انو سفيان قاعد جا الصباح بدري البيت الكبير طبعا سفيان المعنى الحرفي للرعب لبنات الاسرة واما انا الفوبيا حقي واكتر وحدة بكرهني ما عارفة ليه بس كدا لو كل البنات ماشيين يمين لازم يخليني امشي شمال منهم ما عارفة ليه مع اني بقدر الامكان بخليهو ما يعصب بس دايما بعصب فيني لمن عمل لي عقدة وفوبيا مجرد ما اسمع اسمو كل خلية في جسمي بترجف بقيت هامة للطلعة دي لانو ممكن عادي يخليني ما اطلع معاهم من دون سبب اتجهزنا كلنا
صفا: جنة تعالي اعمل ليكي الروج دا
فردوس: بس درجتو ما غامضة شوية؟
صفا: عايني لي ما حلو؟ . عاينت لشفايفها الدرجة حلوة شديد جيت قعدت ليها عملتو لي بمزاج صح شاذ بس حلو شديد وجاي مع لوني بقيت اعاين للمرايا بأعجاب
فردوس: رهيب لكن
صفا: همس تعالي انتي برضو اعملو ليكي . قامت ضحكت
همس: عشان عمار يقطع لي شفايفي صح . كلنا ضحكنا لانو عارفين عمار ومدى صعوبتو مع حاجة بتخص همس صح بشدد ليها على كل حاجة بس من خوفو عليها
وسام: والله عمار دا حارمك من حاجات كتيرة
همس: سأخبر الله بكل شيء . ضحكنا وعملت لنفسها قلوس خفيف وطلعنا بس دايما القدر ليهو كلمة وكانت على هيئة سفيان اتقابلنا معاهو في الباب هو داخل ونحنا طالعين سلم علينا ردينا السلام وبقيت ازحف شوية ورا وسام عشان ما يشوفني بس لو دخلت تحت فستانها بلقاني فجأة حمر لي شديد
سفيان: جنة
فردوس: ننننعم
سفيان: جوا . قربت ابكي من الاحراج يعني من دون سبب حتى
فردوس: ليه؟ . زاد من تحميرتو لي
صفا: يا سفيان ماشيين قعدة قريبة هنا وراجعين ما بنتأخر
سفيان: ما اعيد كلامي وانتو دقايق . كلهم سكتو ووقفو وانا التفت رجعت وانا ما باقي لي الا ابكي لانو دموعي في طرف عيني حاسة انو ماشي وراي
سفيان: اقيفي هنا . وقفت ومسحت دموعي والتفت ليهو كان معصب لمن جبهتو صغرت
سفيان: امسحي الزفت الفي خشمك دا وامشي . اتذكرت الروج
فردوس: الروج؟
سفيان: ايي والله يا جنة القاكي تاني عاملة الا تشوفي حاجة سريع يلا . قالها بعصيبة لمن جريت من قدامو والله جريت وانا برجف عديل كدا وبقيت افتش سريع سريع في فازلين عشان امسحو لقيتو وعملتو وانا ببكي لمن خلاص بقى لين دعكتو بقوية لمن شفايفي اتورمو من الزعل وطلعت للبنات لقيتهم واقفات
فردوس: امشو انا ما ماشة
وسام: ليه يا جنة سفيان قال لينا جنة حتحقكم يعني سمح ليكي . طوالي بكيت لانو دايما مخجلني قدام البنات واما الروج دا ما براي عاملة حتى صفا عاملة ووسام برضو بس عشان فردوس عاملة يبقى المشكله هنا
فردوس: طلعت لي من نفسياتي . جات همس حضنتني طوالي بكيت زيادة
همس: خلاص حبيبتي ما تزعلي نفسك انتي عارفة سفيان وعصيبتو كلنا بنخاف منو
فردوس: كلنا بنخاف منو ما قولنا حاجة بس ليه بكرهني انا اكتر وحدة مع انو والله ما عملت ليهو حاجه
همس: مستحيل يكرهك ياااخ
فردوس: والله بكرهني وكلكم عارفين ماف داعي تقولو حاجه . سكتت لانو عارفة انو معاملة سفيان لي ما ذي معاملة الباقيين
فردوس: امشو انا ما ماشة
وسام: بكلم ليك سفيان . حمرت ليها شديد صح هي قالتو من باب الهظار بس انا حتى الهظار بأسمو بكرهو
وسام: بهظر معاكي بس والله
همس: لو ما مشيتي معانا كلنا ما حنمشي
البنات: ايي كلنا ما حنمش . ضغطو علي شديد لمن وافقت وطلعنا كنت طول الطريق مدبرسة بس مع الونسة فرقت شوية لمن فجأة في نص الونسة همس قامت فوق
همس: واااااي قومو العصر اذن قبيل
صفا: ويعني
همس: ويعني في عينك لو ما رجعنا هسي تاني مستحيل يخلوني اطلع معاكم محل . وقربت تبكي ضحكنا فيها لانو عارفين دي اوامر عمار
فردوس: هووي نحنا ذنبنا شنو انتي المانعينك براك انا عن نفسي ما راجعة بالاخص انو سفيان بكون قاعد
همس: سماح انا بستأذن منك بعد دا يلا جلسة في الحرم . وقامت طالعة كانت جادة قومنا كلنا سريع مسافة نلبس شباشبنا لقيناها مشت نص الشارع ناديناها وقفت لحقناها
همس: انتو ما عارفين مدى جدية الامر
صفا: معليش والله عارفين . ورجعنا لقينا عمار واقف قدام بابهم طوالي ناداها مشت ليهو وهي خايفة ونحنا دخلنا البيت
صفا: حياا ان شاء الله ما يجوط فيها
فردوس: حتى لو جاط من خوفو عليها وحيراضيها في نفس الوقت
وسام: بالجد والله دايما حنين عليها . بقينا نتبسم برانا ذي الهبل .......
__________
من جانب همس
رجعنا وانا خايفه من عمار لانو حذرني لمن وصلنا ناداني خلاص الخوفة دخلت فيني وقفت قدامو وانا ماسكة طرحتي بخوف
__ عمار دقيقه احكي ليك . قام مدا لي حلاوة استغربت طبعا ما اتوقعت مديت يدي شيلتها منو
_ قبيل مشيت عقد صحبي وشيلت ليكي معاي واحد . ابتسمت بفرحة شديد لانو ما نساني ذي كل مرة لمن يطلع محل ويدوهو حلاوة بشيل وحدة زيادة وبقول دي حق بتي و بشيل لي معاهو وحدة
__ كنت مفكرة انو حتجوط فيني
_ ما داير اخرب ليكي مزاجك بعد يومك دا بس بكرة بجوط فيكي . قومت ضحكت شديد
__ موافقة
_ اجري جوا يلا
__ حاضر . ومشيت جوا سريع وانا مبسوطة لقيت البنات
وسام: ما جاط فيكي صح . ضحكت
همس: لالا ما جاط فيني جات سليمة بس اداني حلاوة
صفا: اديني ليها
فردوس: خلي قال تديكي ليها دي قسمة ما حتقسمها معاكي موش من عمار ولا تحلمي حتى . ضحكت
همس: سامعة؟
صفا: خلي ينفعك
همس: والله اي حاجة من عمار بتنفعني . فنتني بالمسند الجنبها ضحكت وفتحت الحلاوة ودخلتها في خشمي كلها واكلتها جات ضربتني ضرب وانا بضحك
همس: والله يا صفا لو عمار عرف الا تشوفي ليكي جحر تدخلي فيها . كلهم ضحكو لانو عارفين كلامي صح وحصل كم مرة فيهم
مشيت مع فردوس عشان نجهز الغدا كان جاهز بس باقي نرصو وبالفعل بدينا فيهو وضربت لعمار يجي يشيلو فجأة القى ليك فردوس نزلت تحت الطربيزة بتاعت البهارات استغربت قبل ما استوعب حاجة جا سفيان داخل المطبخ عرفت ليه عملت كدا قومت ضحكت
همس: عايز حاجة يا سفيان . كان بعاين اتجاه الطربيزة عرفت انو شاف فردوس
سفيان: جيت اشيل صينية الغدا
همس: ايواااا تمام هدا ليها . شال الصينية
سفيان: خلي الدخلت تحت الطربيزة دي تعمل الشاي . انا فكيت الضحكة وفردوس منظرها بقى بيش طلعت بعد هو مشى وانا لسع بضحك
فردوس: انا عمري ما كرهت ولا خوفت من زول قدر المخلوق دا
همس: انتي يا اختي حظك قليل في الدنيا دي
فردوس: سلفيني عمار دا اسبوع بس والله بالجد عاوزة طبطبة . قومت ضحكت
همس: والله لو كان طلبتي اي حاجة تانية غير عمار كان اديتك ليها . شيلنا صينيتنا ومشينا.........
"كأنك مواساة في ظل ركام الهزائم، مددت يدك لي، حين لم يفعل أحد."😴🤍
يتبع........
نقول بسم الله اها رأيكم
#اللون_السابع_للحب_2
#بقلمي_شذى_عبدالمكرم
عمار عظيم بصورة غير محددة بصورة خاصة لا يمكن شرحها بالكلمات
ايام مرت دون احداث تزكر لمن جا يوم حصل توتر عظيم في البيت طبعا طلعنا نحنا البنات للسوق عشان عمتو ام وسام كانت عاوزة حاجات وطبعا لمن يقولو السوق كلنا بنقيف فوق لبسنا عباياتنا انا وفردوس ووسام اما صفا قالت تعبانة ما ماشة وطلعنا لمن خلصنا ونحنا راجعين نزلنا من الموصلات شوية بعيدة من البيت في شباب قامو يشاغلو فينا ما ردينا بقو يقربو شوية شوية لانو الشارع فاضي
الشاب الاول: ست العباية البنية كاسرة ضلعي عديل كدا . قاصدني انا ما اشتغلنا بيهم ولسع مواصلين جا وقف في وشي لمن اتخلعت
همس: انت مجنون يا ود
الشاب الاول: والله جنيت بيكي عليك الله رقمك
همس: زح من وشي قبل ما اضربك كف
فردوس: شكلك ما داير حياتك
الشاب التاني: عندك روج احيا انا منو . طبعا دا نفس الروج الكان سفيان شاكلها فيهو
فردوس: والله اقبل ليك انت التاني الا تطير انت حيوان ولا شنو
الشاب التاني: خليني امسحو ليكي وبعدها لو دايرة تقتليني اقتليني . وجا يمد ايدو لشفايفها طوالي قطعت ليك فيهو كف لمن عيونو طشت كلنا اتخلعنا جا يتهجم عليها انا بحركة سريعة مني لزيتو منها قرب يقع التاني الكان بشاغل فيني مسكني من ايدي شديد لمن حسيتها حتتكسر واضافرو علم في ايدي صرخت وسام قامت لبعتو شديد فاكاني والتفت ليها والاول الفردوس ضربتو كف كان بحاول يستوعب الكف جا عليها انا صرخت شديد في رجال كانو جايين لمن شافونا جو علينا الشابين قامو جاريين انا الخلعة لسع فيني قومت ابكي شديد
فردوس: همس اسكتي خلاص امسحي دموعك لو رجعنا البيت كدا وشافك عمار انتي عارفة البحصل شنو موقف وعدا الحمدلله اتذكرت عمار طوالي مسحت دموعي والرجال جو سألونا من حالنا قولنا اننا كويسين ولملمنا الموضوع ومشينا البيت لقيت امي في وشي حست انو في حاجة حاصلة
امي: مالك
همس: ماف حاجة تعبانة بس والجو حار
امي: ايوااا اغسلي وشك وشوفي عمار وين هسي كان بسأل منك
همس: رجع من الشغل ؟
امي: ايي بس تقريبا طلع هسي بس حيرجع .
همس: قولتي ليهو شنو
امي: حي قولت ليهو مشت السوق . كتمت انا ما كلمتو
همس: وقال شنو
امي: ما قال حاجه . حمدت ربي انو عمار ماف لانو لو شافني حيعرف وما حيخليني وانا عارفة قدامو حأعترف لاني ما بعرف انو اكذب عليهو وفوق دا طلعت بدون اذنو
انا وحيدة امي وابوي بس ابوي عندو اولاد غيري لانو امي المرا التانيه بس ابوي اتوفى وانا عمري عشرة سنين ومرتو الاولى ساقت اولادها وسافرت لاهلها واتزوجت تاني ما بعرف عنهم كتير ما بتواصل معاهم دايما بس عندي اعمام كتار عمي محمد ابو عمار وعزيز وعمي خليفة ابو وئام متزوجة من عمر اخو عمار وعندي عمتي سلوى ام صفا ووسام وفي عمي مصطفى ابو سفيان وعفاف واخر واحد عمي صابر ابو فردوس وفدوى
البيوت كالاتي بيتنا وبيت ناس عمار وبيوت اعمامي الباقين كلهم فاتحين في بعض عبارة عن حوش كبير بس اي بيت براهو بس بيت عمي مصطفى ابو سفيان براهو بعيد مننا بس بجو عندنا دايما واما عمتي سلوى جات زيارة مع بناتها فترة بس حيرجعو بس متين ما معروف وحنعرف كل الشخصيات مع التفاصيل الجاية
مشيت للبنات لقيتهم قاعدات بس طبعا الخوفة ما طلعت مننا
صفا: مالكم لونكم مخطوف كدا
فردوس: خلينا نستوعب الحاصل بالاول ونحكي ليكي . انا سرحانة بس ومسكت ايدي كان واجعني من مسكة الحيوان داك عاينت لقيت اضافرو معلمة فيهو اتففت
صفا: ورحكم برا جهزت القهوة منتظرناكم لمن تستوعبو تحكو لي . ضحكنا وطلعنا عبايتنا ولبسنا تيابنا وقعدنا في نهاية الحوش في طرف الحيطة لانو الضل واقع فيهو لانو كان مع العصريات كدا وطبعا صفا كالعادة معاها مرايتها وروجها
فردوس: والله روجك دا سبب البلاوي كلها . قومنا ضحكنا انا وهي ووسام لانو اتذكرنا الحاصل
صفا: مالو روجي حلو
فردوس: حلو ما قولنا حاجة بس انا دي بالذات يوم حيوديني للكريم نفدت مرتين المرة التالتة ما بتجي بخير
صفا: الله والنبي يا همس خليني اعملو ليكي اصلا قاعدة في البيت يعني ما طالعة بيهو . فكرت كدا واصلا عندي النية فيهو بس عمار ما بخليني فلقيتها فرصة طوالي شيلت كرسيي وقعدت جنبها عملتو ليهو وعاينت للمرايا كان حلو شديد
صفا: على الطلاق احلى وحدة ظبط فيها لانو شفايفك صغيرة
همس: واااي رهيب لكن للاسف ما منو نفع
صفا: ما مشكله ما ضروري تطلعي بيهو واصلا عمار ليهو حق ما يخليكي تعملي روج . ضحكت
صفا: ما حكيتو لي الحصل . كلنا صلحنا قعدتنا بمزاج وكبينا القهوة وبدينا نحكي ونضحك
فردوس: والحيوان اتخيلي مدا ايدو داير يهبش شفايفي قال امسح ليكي الروج قطعت فيهو كف لمن عرف الله
صفا: قادرة
همس: وانا الحيوان مسكني من ايدي لمن اضافرو علمت في ايدي عاينو . ومديت ايدي عشان اشوفهم قبل ما يشوفو جاني صوت عمار
عمار: دا منو الحيوان دا؟ . رفعنا رأسنا بخلعة كلنا وانا دخل فيني برد لقينا عمار وسفيان وعزيز وعمار دا عيونو لمن صغار واما سفيان ماف داعي اقول اصلا فجأة لقيت نفسي واقفة
عمار: مشيتو وين
همس: ع ع ع عمار . صرخ فيني لمن نطيت
عمار: بلا عمار بلا زفت تعالي هنا . رجعت خطوة ورا
عزيز: عمار كدا اهدا نفهم الحصل شنو بالاول
عمار: ماف زول يتدخل سامعين . مسكني من ايدي وبقى جاريني وانا ببكي لمن اختفينا من الانظار
عمار: سريع احكي الحصل شنو . حكيت ليهو بالتفصيل الحصل شنو عصب زيادة
عمار: ولمن طلعتي مالك ما قولتي لي طالعة
همس: لانو انت كنت ماف
عمار: وتلفونك الزفت دا قاعد يعمل شنو
همس: ن ن نسيت
عمار: كويس ما نسيتك اسمك ابقى ما عمار . فجأة ركز في الروج مسكني من خشمي عصرني شديد عليهو
عمار: موش قولت ليكي ما تعملي روج محزرك ولالا . بقيت اهز في رأسي وهو اصلا ماسكني من خشمي وانا ببكي
عمار: دا سبب البلاوي صح؟ . هزيت رأسي سريع بمعنى لالا وبقيت احاول انزل ايدو من وشي لانو واجعني لمن نزلتو
همس: والله والله والله العظيم عملتو هسي بس بعد رجعنا
عمار: همس اقتلك ولا اعمل ليكي شنو . بقيت ابكي بصوت لانو لاول مرة اخاف منو للدرجة دي
همس: ما تتكلم معاي . وكنت ماشة مسكني شديد من ايدي
عمار: لمن اتكلم معاكي يا سجم ما تمشي . خلاص عصب شديد ختيت ايدي في وشي وتوبي وقع وانا برجف شكلو شاف العلامات مسك ايدي انا اتخلعت لمن نطيت قايلة دايرة يضربني هو ذاتو اتخلع من حركتي
عمار: كدا اشوف ايدك . شاف العلامات مسح وشو بعصبية
عمار: ابن ال...... دا لو لقيتو والله ادفنو حي اسمعيني انتو اتلاقيتو معاهم وين
همس: ما عارفة والله
عمار: ما اتكرر كلامي
همس: ع ع عمار انا خايفة منك . بعد جملتي دي اتحول 360 درجة واتكلم بهدوء عكس القبل شوية كان بركان
عمار: همس امشي جوا . ما صدقت التقول سجين وفكو اسرو جريت جوا الغرفة وبقيت ابكي بشدة لمن البيت كلو اتلمى فيني وامي خافت
امي: همس مالك يا بتي احكي لي
وسام: اتناقشت مع عمار عشان كدا . امي من قالت ليها عمار سكتت لانو عارفة ماف زول بتدخل بيني وبين عمار
امي: خلاص ما تبكي ضربك؟ . في عز البكي قولت ليها
همس: انتي عارفة انو عمار عمرو كلو ما رفع ايدو علي ولا حيرفع
امي: خلاص معناهو غلطانة انتي عملتي شنو
همس: امي بحكي ليكي بعدين
امي: خلاص ما تبكي هسي عمار يجي ينفخنا كلنا . قومنا كلنا ضحكنا ومسحت دموعي
____________
من جانب فردوس
بعد اتخلعنا من وجود عمار وسفيان وعزيز وانا دخل فيني رعب لانو سفيان قاعد وملامح وشو ما كانت بتتفسر ابدا عمار صرخ عرفنا بس البركان التاني داك لسع ما انفجر فجأة عمار مسك همس من ايدها وجراها خوفنا عليها بالجد وانا طول الوقفة ديك نظري كان مثبت على سفيان لانو هو عيونو ما نزلها مني فجأة عمل لي حركة بأيدو نظام تعالي عرفت انو انهيت خلاص وقلعت عيوني بخلعة وهو التفت اداني ضهرو وكان لازم الحقو حسيت نفسي ما قادرة اتنفس بقيت ماشة وراهو وانا بدعك في اصابعي مشى ورا البيت لمن وصلت ليهو قبل ما استوعب حاجة لقيت نفسي ملصقة في الحيطة وضربت ضهري من قوة اللزة ووقف قدامي وانا نفسي ذاتو انقطع منو ومن الخلعة
__ انا سفيه صح؟ . ما رديت صرخ فيني
_ ردي سفيه صح؟ . هزيت رأسي بمعنى لالا غمض عيونو
__ انا قولت شنو
_ ق ق قولت ما اعمل روج تاني
__ وافهم شنو هسي
_ والله والله ما كنت داير اعملو
__ والله كلام مضحك ما دايرة تعملي في زول جبرك؟ . هزيت رأسي بمعنى لالا طوالي ضرب ايدو في الحيطة الوراي
__ وعاملة ليه يا حيوانة انتي هسي عرضتي نفسك والبنات للخطر بسبب الزفت دا . انا ساكتة وبرجف ما عارفة ما بكيت ليه شكلو من الخوف وما قادرة استوعب وخايفة يرفع ايدو علي
__ هسي انا لو دفنتك هنا في زول بسألني؟ . سكتا
__ بتكلم معاكي
_ لالالا . وعلقت في كلمة لالا دي وخلاص بقيت يلا ويمين بتنفس
__ فردوس انتي دايراني ارتكب جريمة صح ؟ . سكتا
__ انا لو ما عملت كدا ما حتمشي عديل . بقى يعاين بكل الاتجاهات كأنو بفتش في حاجه خلاص خوفت قولت الا بفتش حاجة عشان يقتلني بيها انا الرعب دخل قلبي بقيت ابكي جات عمتو سلوى وامي عابرين شافونا جونا سريع انا طوالي مسكت في امي قوي وببكي التقول لقيت نجاة لي
امي: في شنو حاصل مالك مع البت يا سفيان
سفيان: عمتي فردوس دي لو لقيتها عتبت باب البيت انا بسألكم انتو فاهمين؟ والله يا فردوس تطلعي برا ما كسرت رجلك ابقى انا ما سفيان وابوي ما جابني . ما جملتو دي قلبي عمل شح
عمتي سلوى: مالك يا ود عملت شنو . امي ضربتني
امي: عملتي شنو يا بت قولي . التفت لسفيان
امي: عملت شنو الحيوانة دي
سفيان: بس كلمتكم ما القاها معتبة باب البيت دا . ومشى وانا دي ببكي بس وطبعا عندنا لو ابن العم قال حاجه فينا ماف زول بعارض لانو يعتبر عرضو وهو بدافع عنو وحتى ابوكي ما بتدخل لو يقتلك عشان كدا سفيان مسيطر علي بالطريقة دي بعد الموقف دا كرهتو كره مبالغة بقيت ببكي بس
امي: عملتي شنو يا بت . خليتها بتتكلم وجريت الغرفة ببكي لقيت عالم في الغرفة
وسام: الضحية التانية جات . وقامو يضحكو وانا عاينت لهمس لقيت دموعها في عيونها عاينا لبعض وضحكنا
همس: ضربوكي؟
فردوس: لالا وانتي
همس: لالا . وتاني ضحكنا ورجعنا نبكي والله رجعت بكيت امي جات داخلة عشان تفهم الحاصل بعد هدينا حكينا ليهم بس ما بنفس التفصيل عشان ما نآخد زلة تانية
امي: انتي محرم عليكي الطلوع تاني
صفا: كيف . اتنهدت
فردوس: سفيان قال ما اعتب باب الشارع
صفا: كيف يعني انتي ذنبك شنو انتي شاغلوكي يعني ما عندك ذنب دا شنو المتخلف دا . هزيت ليها اكتافي بمعنى ما عارفة
فردوس: دا بسبب كرهو لي
عمتو سلوى: سفيان ما بكرهك والله دا من خوفو عليكي . ضحكتني ضحك
فردوس: عمتي نحنا لو طالعين يوقفني انا بس ويرجعني وهسي السوق مشينا التلاتة عرفنا انو همس بتخص عمار اها ليه يسألني انا وما سأل وسام بالمنطق كدا ودايما بفرزني انا منهم ودايما العصبية من نصيب فردوس ودايما الرعب من نصيب فردوس والله فردوس بسببو بقت تتخلع بالليل وياهو هسي حرمان الطلعة من نصيب فردوس كان ممكن يقول ما القى وحدة تعتب باب البيت بس لا فردوس بس ربنا يسامحو . العبرة خنقتني رجعت ابكي
امي: ود عمك ما بدور ليكي الشينة والله
فردوس: كويس . وطلعت خليتهم لانهم كلهم بدافعو ليهو لقيتو في وشي وقفت قدامو وانا ببكي قولت ليهو وانا ما هاميني الحيحصل لي شنو لاني قنعت منو ومن حياتي
فردوس: ان شاء الله تلقى الزول اليعمل ليك رعب في حياتك ذي ما عامل لي رعب في حياتي وما عافية ليك لا دنيا ولا اخرة . وجريت من قدامو بقيت ابكي بصورة مبالغة هو ما صح اقول ليهو كدا بس قلبي كان مليان بقيت اتكلم براي والزمن داك كان وراي بس ما شوفتو
فردوس: سفيان انت بتكرهني للدرجة دي ليه انا عملت ليك شنو بس والله كلمني والله بعتذر ليك لمن تسامحني بس انا ما غلطت في حقك والله بقى عندي فوبيا اسمها سفيان . بكيت لمن هديت ورجعت كنت مصدعة مبالغة لمن استوعبت الكلام القولتو لسفيان مشيت لهمس وانا مرعوبة
فردوس: همس الحقيني واااي
همس: مالك
فردوس: لمن طلعت منكم لقيت سفيان في وشي قولت ليهو ان شاء الله تلقى الزول اليعمل ليك رعب في حياتك ذي ما عامل لي رعب في حياتي ما عافية ليك لا دنيا ولا اخره . هي فتحت خشمها بخلعة
همس: مستحيل طبعا
فردوس: والله العظيم
همس: هسي البحصل شنو
فردوس: بنتظر موتي بس اصلا قنعانة ذاتو من حياتي ......
أبشع ندم، يا ليتني خليت الكلام بقلبي ولا قلته 💔