رواية اللون السابع للحب الفصل الثالث 3 والرابع 4 بقلم شذى عبد المكرم
بعد الحصل دا كنت خايفة اطلع برا الغرفة لسببين الاول انو خايفة من عمار والتاني انو زعلانة منو شديد بس الخوف كان طاغي على الزعل من بيتنا ما طلعت على البيت الكبير لا انا ولا فردوس حتى انو اتغدينا برانا جوا
__ جنة
_نعم
__ عمار زعلان مني وفي نفس الوقت انا زعلانة منو اعمل شنو
_ عمار زعلان من خوفو عليكي ومتأكدة ما بقدر بدونك لمن يهدأ براهو بفتشك عشان يراضيكي وانتي اعتذري واموركم بتتصلح بس انا الشغال بي منو؟ . قالتها بزعل وعبرة
__ ما تقولي كدا
_ ما شايفة كلهم واقفين مع سفيان ماف زول نفسيتو اتدمرت غيري ولسع حتتدمر اكتر بعد الكلام القولتو ليهو حيشيلا معاي اكتر
__ لالا ما حيسألك . ضحكت لي بكسرة كدا المشكله ما قادرة اصبرها واقول ليها سفيان حنين لانو سفيان كتلة بتاعت عصبية وكلنا عارفين وشايفين ما بقدر اضحك عليها لانو تصرفاتو معاها واضحة بس ليه ما عارفين عكس عمار ما بزعلني دايما ولو زعلني براضيني سريع لمن يهدأ وما بخلي زول يسألني بقينا ساكتين بس
اليوم التاني اتقابلت مع عمار لمن هو رجع من المكتب شافني وداير يتخطاني استغربت اول مره ما يواجهني زعلت شديد مشيت وراهو سريع
_ عمار!!! . ما وقف وانا بنادي فيهو وماشة وراهو لمن وصلنا حوش بيتهم
__ عمار انا ما بتكلم معاك؟ . ابى يرد عمي جا قاطع ناديتو قدامو عشان ما حيقدر حيتجاهلني قدام ابوه بس ما رد
ابوه: عمار همس دي ما بتناديك؟
عمار: همس؟ . التفت كأنو يداب شافني
عمار: ما كنت مركز عاوزة حاجة يا همس . عاينت ليهو بكسرة
همس: لالا دايرة اسلم عليك بس شكلك مشغول عمو مع السلامه
محمد: مع السلامة بتي . وطلعت من بيتهم رجعت بيتنا دخلت الغرفة بقيت ابكي بس
صفا: مالك يا بطة
همس: عمار بقى يكرهني . قامت ضحكت
صفا: يلا دي حاجة في قاموس المستحيلات ما حتحصل
همس: بس هسي حصلت
صفا: الحصل شنو
همس: لقيتو في حوش البيت الكبير ناديتو ما عبرني ومشى . قامت ضحكت تاني
صفا: يا هبلة زعلان من الحصل امس وانتي عارفة عمار اخر زول ممكن يزعل فترة طويلة منك
همس: اممممممم
صفا: الجو اصلا مكهرب من امس بس فترة وبتعدي
همس: ان شاء الله . قعدت محتارة اعمل شنو ما قادرة استقر محل وعمار زعلان مني
بعد المغرب مشيت المطبخ عملت رز باللبن عمار بحبها عشان اصالحو لاني ما قادرة على زعلو عملتها ورشيت فيها مكسرات وزبيب وشيلتها مشيت برا لعمتو حنان ام عمار
همس: عمتو
عمتو: نعم يا بتي
همس: انتي عارفة انو عمار زعلان مني صح . قامت ضحكت
عمتو: من امس رابط فينا وشو ذي اخر الشهر . قومت ضحكت
همس: وما داير يتكلم معاي
عمتو: يلا دي مشكلة اب وبتو انا ما تدخلوني بيناتكم عارفة عمار انتي
همس: عارفة يا عمتو وما دايرة تدخلي بيناتنا بس قولي ليهو في صحبك دايرك جنب شجرة الليمونة عملت ليهو رز باللبن عشان اعتذر منو لو قولتي ليهو همس ما حيجي لانو ما بتكلم معاي
عمتو: مدام كدا هينة امشي انتي وانا هسي بكلمو
همس: شكرا عمتو
عمتو: والله يا بتي كنت بساعدك لو ما عمار ما بحب زول يتدخل بينك وبينو . ابتسمت ليها
همس: عارفة . وطلعت منها ومشيت شيلت الرز باللبن ومشيت جنب شجرة الليمونة تاني فكرت اتدسيت وراها شوية كدا هو جا وبقى يتلف طلعت ليهو والصحن ورا ضهري عاين لي بأستغراب بعدها قال لي
__ امشي جوا . فهمت انو قايل حيلقى صحبو
_ ماف زول
__ بطة امشي جوا ما اكرر كلامي
_ انا صحبك المنتظرو . عاين لي بأستغراب
__ كيف يعني
_ انا الكلمت عمتو تقول ليك كدا . قال لي بكل برود الدنيا
__ والسبب ؟
_ عمار للدرجة دي بقيت تكرهني عشان الحصل امس دا؟ ولا في سبب تاني لاني والله ما متحملة انك تكون زعلان مني كلهم قالو انو انتي مستحيل تهوني على عمار بس الواضح انو هونت عليك وهسي جيت عشان اصالحك مع انو زعلانة منك بس ما هونت علي ذي ما انا هونت عليك وعملت ليك رز باللبن البتحبو عشان اصالحك وبعتذر ليك على الحصل مع انو ما لي دخل في الموضوع وما عندي ذنب راجعة البيت واحد شاغلني ابقى انا الغلطانة؟ بس برضو اسفة هاك . مديت ليهو الصحن شالو وكنت ماشة
__ اقيفي . وقفت فتح الصحن
_ نعم
__ ما عاملة فيهو جوز هند ليه . طوالي بكيت لانو لان اتجاهي قرب مني مسح لي دموعي
__ ما تبكي عارف انو زعلتك امس شديد بس والله كنت خايف عليكي لمن سمعتك بتحكي عشان كدا عصبت وزعلت انو طلعتي بدون ما تكلميني واول مرة تحصل منك مع انو حتى لو عرفت ما حيغير حاجة كنتو حتتعرضو للموقف دا بس الفكرة ذاتها مجنناني انتي عارفة انك خط احمر بالنسبة لي صح وكون زول يتعرض ليكي دا المخليني زعلان من نفسي ما منك انتي لانو انتي بتي صح؟ . كنت ببكي وبهز ليهو في رأسي
_ عارفة
__ والله عمرك ما هونتي علي ولا حتهوني علي اوع تفكري كدا تاني فاهمة؟ . هزيت رأسي بمعنى ايي
__ عاملة لي رز باللبن للصلح بس دا بعتبرو صلح ناقص لانو ما فيهو جوز هند . قومت ضحكت
_ كتر خيري عملتو اها انت ما جيبت معاك حاجه للصلح
__ بقسمو معاكي كدا قصرت . ضحكت
_ لالا
__ ورح المطبخ نتقاسمو . مشينا المطبخ وجيبنا الكراسي والتربيزة وقعدنا وختيناهو وبدينا نأكل كدا جات وسام
وسام: الاب وبتو ما حتفضلونا معاكم . هو ما رد اصلا ومواصل اكل كأنو ما بتتكلم معانا
همس: في الحلة موجود شيلي
وسام: بس انا دايرة من المشكل دا . خجلت اقول شنو ما دايرة زول يشاركنا فيهو لانها مناسبة خاصة بس ما بقدر اكسفها
عمار: همس وصفي ليها محل المكسرات . واضح انو ما دايرينكم تأكلي معانا بس بطريقة ظريفة هي شبه اتحسست بس سكتت قومت انا كبيت ليها رز ورشيت فيهو مكسرات واديتو ليهو شالتو وطلعت وانا رجعت قعدت
همس: عاد يا عمار بالغت كسفت البت
عمار: هي عارفة اني ما بحب زول تالت بيناتنا الفلسفة والظرافة ليها شنو . قومت ضحكت لانو عمار يضرب ولا يبالي اكلت وانا ساكته عشان ما اخد حقي
_________
من جانب اخر
سفيان عبارة عن كتلة متحركة من الغصب والعصبية وعصبيتو بتجي على هيئة فردوس لانو لمن تكون قدامو ما بشوف زول تاني علشان كدا دايما النصيب الاكبر من العصبية من نصيبها هو مفتكر انو كدا بعبر عن خوفو بس لا فردوس شخصية حساسة ينفع معاها اللين لا العصبية عشان كدا بتعمل عكس البقولو ليها دايما وهو ما عارف انو هو مصدر خوف ورعب ليها والمفروض كان يكون مصدر آمان بس حصل العكس ولمن حصل موقف السوق وسمع مع عمار هو كان جواهو بركان بس مسك نفسو قدامهم عكس عمار انفجر طوالي وهو لمن اختفى من الانظار انفجر فيها ودخلها في حالة بس هو من عصبيتو ما شايف الرعب الفي عيونها ولمن حرمها من الطلعة قايل كدا بحميها من وسخ الدنيا بس ما عارف انو كدا بزيد من كرهها اتجاهو بس عرف لمن قالت ليهو في وشو انو هو مصدر رعب بالنسبة ليها ودعت عليهو هنا في حاجه اتحركت جواهو وعرف هي بتفكر اتجاهو كيف ومشى وراها وسمعها بتتكلم مع روحها انو ليه بكرهها كدا هو عمرو ما كرهها رغم المخالفات البتحصل منها بس بالعكس هو بحبها بطريقة ماف زول بتخيلها بس حبو بتجي على هيئة عصبية كان بعاين ليها من بعيد وهي بتطلع الجواها لكن مستحيل يقرب عشان يعتذر لانو ما حصل ولا حيحصل عاين فيها وطلع مشا بيتهم واختفى اسبوع من الانظار
هو عندو هوس اسمو فردوس وحبو ليها عبارة عن لون مختلف من انواع الحب وهذا هو اللون السابع للحب .......
___________
من جانب فردوس
بعد موقف السوق همس عملت كل البتقدر عليهو عشان عمار يرضى عنها مع انو نحنا عارفين انو من دون ما تعمل حاجه عمار حيرضى لانو ما بقدر بدونا مهما عملت كتير من المرات بحسدها على عمار دا وكنت بتمنى انو سفيان يكون حنين علي ذي دا لمن افكر كدا بقعد بضحك لمن ادمع لانو في المستحيلات تحصل بستغفر وبفكر في حاجه تانية عدا اسبوع انا الشارع ما بشوفو بعيني طبعا اوامر السيد سفيان لمن فجأة يوم
همس: رأيكم شنو نمش نأكل ايسكريم
صفا: بتهظري صح
همس: كيف ياااخ نغير جو من القفلة دي
وسام: انتي اقنعي عمار حقك دا الباقي هين
همس: انتو خلو علي بقدر عليهو . ضحكنا فيها
فردوس: بتقدري ليهو؟ دا عمار لو ناسية
همس: ياااخ بقلب ليهو عيوني ذي الكديسة ما برفض . ضحكنا لانو بتعرف نقطة ضعفو
فردوس: كويس بس طبعا انا برا منكم لاني ممنوعة من الطلعة
همس: بنلقى طريقة
فردوس: ما تعملي فيها غبية انتي عارفة سفيان وتاني حاجة هو ماف طول ما جا هنا يعني الموضوع بايظ
همس: خلي امشي لعمار اقنعو وانا بخلي يكلم سفيان يقنعو
فردوس: انتي عارفة ماف واحد منهم بتدخل في كلام التاني . ما سمعت كلامي ومشت ليهو عشان تتكلم معاهو ......
____________
من جانب همس
طلعت مشيت عشان اكلم عمار لقيتو تحت شجرة الليمونة بتكلم بالتلفون ولمن شافني من بعيد ختا ايدو التانية ورا ضهرو ما ركزت مع الموضوع انتظرتو لمن خلص
__ عمورة
_ همممم . كان سرحان
__ دايرة اتكلم معاك
_ همممم . هزيتو
__ عمار مالك
_ ماف حاجة عاوزة شنو
__ دايرين نطلع مع البنات نأكل ايسكريم . عاين لي مسافة حسيتو حيرفض
__ والله ما بنتأخر
_ لالا خليكم وانا بجيبو ليكم
__ والله ملينا من قعاد البيت وهو قريب من البيت انت عارف
_ خلاص تمام بس ما تتأخرو . استغربت انو ما اتجادل معاي
__ عمار انت كويس؟
_ ليه
__ اول مره توافق بالسرعة دي
_ خلاص ما تمشي
__ لالا خلاص
_ ما رفضت لانو عارف انكم ليكم زمن محبوسين بس ساعة بس ترجعو
__ حاضر بس عندي طلب تاني
_ في شنو
__ سفيان مانع فردوس من الطلعة
_ يبقى الموضوع منتهي انتي عارفة
__ ياااخ اتكلم معاهو حيسمع منك
_ما تدخليني بينو وبين فردوس لانو لو واحد قال كلام يبقى انتهى
__ عليك الله عشاني خلاص اتصل ليهو يجي وفردوس تتكلم معاهو لانو ما بنقدر نطلع بدونا . عصرت عليهو اتصل وسلم عليهو
عمار: سفيان البنات ديل عاوزين يطلعو وقالو انت حارم جنة من الطلعة
سفيان: .........
عمار: تمام . وقفل
همس: اها
عمار: قال هو قريب من البيت
همس: تمام شكرا
عمار: عادي حبيبتي يلا اتجهزو انا بتكلم معاهو بس خلي فردوس تجي تأخد الاذن عشان تكون ادتو مكانتو
همس: حاضر دقيقه عمار ليه ايدك من جيت ورا ضهرك
عمار: ماف حاجة . جريتها منو لقيت المعصم ملف بشاش اتخلعت
همس: عمار مالا ايدك
عمار: اتفصلت قبيل بس هسي كويسة
همس: ليه ما كلمتني
عمار: عشان ما اشوف نظرة الخوف الشايفها دي
همس: حتى لو كان المفروض اعرف متأكد انها كويسة؟
عمار: متأكد ما تشيلي هم اجري اجهزي عشان تطلعو بدري وترجعو بدري . رجعت للبنات وانا هامة لايدو
صفا: اها قال شنو
همس: وافق
فردوس: قادرة والله . ضحكت
وسام: اها وسفيان
همس: ضرب ليهو قال جاي هسي
فردوس: خلاص كتمت والله
همس: ماف حاجة خلي يجي وانتي امشي اخدي الاذن
فردوس: منو والله بتهظرو انا اسمو ساي بخليني ارجف لمن امشي ليهو برجولي شكلكم ما دايريني وانتي عارفة يا همس انا اخر مرة قولت ليه شنو
همس: جربي بس . حاولنا معاها شديد لمن اقتنعت
____________
من جانب فردوس
همس جات رجعت وقالت سفيان حيجي قلبي عمل شح والخبر الاكبر قال امشي ليهو اقنعوني لمن وافقت بقيت قاعدة على اعصابي لمن همس قالت عمار قال ليها سفيان جا جات كلمتني قربت ابكي
فردوس: ما ماشة والله
همس: قومي يا هبلة وشيلي معاكي موية وكل حاجه حتكون كويسة . اخدت نفس ومشيت شيلت موية ومشيت لقيتو مع عمار وعمر سلمت و اديتهم الموية ووقفت وبفرك في ايدي
فردوس: سفيان ممكن دقيقه . هز رأسو وجا طلع معاي قدام باب الصالون نزلت رأسي تحت ما بقدر اعاين في عيونو
__ نعم
_ ال ال البنات قالو طالعين
__ وين
_ يأكلو ايسكريم
__ اها
_ وقالو امشي معاهم
__ وانتي حابة تمشي؟
_ ايي بس انت قولت ما اطلع من البيت
__ عايني لي . رفعت عيني لانو كنت متوقعة يقول لي ماف مشي ذي كل مرة
__ اوع تتأخرو فاهمة . هزيت رأسي بمعنى تمام ما صدقت طبعا بالسهولة دي
__ وتاني حاجة روج ممنوع . برضو هزيت رأسي
__ فيكي تمشي معاهم
_ شكرا . هز رأسو وداير يدخل جوا ناديتو
_ سفيان
__ نعم
_ اسفة على الحصل اخر مرة واسفة على الكلام القولتو ليك . هز لي رأسو بمعنى تمام حصل خير ودخل الصالون وانا من الفرحة قربت ابكي جريت رجعت للبنات
صفا: اها . ختيت ايدي في قلبي بحاول استوعب واحاول اصدق الحصل انو قدرت اتكلم مع سفيان كلمتين بهدوء
فردوس: سفيان قال امشي كلهم قامو ينططو وانا مصدومة لسع
همس: قولت ليكي حتنجحي
فردوس: ما قادرة اصدق اتخيلو ما جاط فيني قال لي حابة تمشي قولت ايي طوالي وافق قادرين تصدقو
وسام: احلفي
فردوس: والله . وجرينا لبسنا عباياتنا وطلعنا اكلنا ايسكريم بمزاج واليوم كان ظابط شديد واتصورنا ورجعنا بعد يوم حلو ما اتأخرنا عشان ما نتهزأ من عمار وسفيان
لمن جا اليوم القلب الموازيين كلها........
ثُمّ قال:
بُلِيتُ بِها فَقِيهةً ذاتَ جدال تُجادِلُ بِالدّليلِ والدّلال.
........
4
بنات حينا سجلو لينا زيارة وكلمونا انو مشو الجناين شالو قهوتهم ومشو هناك قالو الجو ظريف مع الطبيعة حمسونا بيها ودخلو لينا الفكرة في رأسنا بعد هم طلعو اجتمعنا نحنا البنات
صفا: كيف وكيف
فردوس: بالنسبة
صفا: الجناين
همس: فكرة جهنمية بس ما حيخلونا
وسام: اي وحدة تقنع ابوها بأي طريقة
فردوس: نحاول ما خسرانين حاجه
همس: مع انو شايفة انو عمار يوافق دا من سابع المستحيلات بس بجرب كلو فدا الرحلة
صفا: مكنة جربي وما تنسي انو تقلبي ليهو عيونك . ضحكنا كلنا واتفرقنا و اي وحدة مشت تشيل الاذن من ولي امرها وانا مشيت لعمار لقيتو مشغول بتلفونو قولت دي فرصتي قعدت جنبو
__ عمار
_ نعم
__ دايرة اطلب منك حاجه
_ شنو
__ دايرين نمشي الجناين رحلة خفيفة كدا
_ لا
__ عمار عليك الله ياااخ
_ ولا تحاولي اصلا ممكن الجمعة او السبت بوديكي انا
__ لالا ياااخ دايرة امشي بكرة مع البنات
_ ماف وحدة فيكم حتمشي
__ اخدو موافقتهم من ابهاتهم
_ مدام ابهاتهم موافقين انا ما بقدر اتدخل بس انتي ما حتمشي
__ ليه بس
_ انتو جناين شنو ليكم دا منو الجاب ليكم الفكرة دي
__ كلنا اتفقنا
_ ماف مشي كلمتي وحدة خليهم يمشو هم بس انتي لا
__ ليه تحرمني انا بس . عاين لي ورفع حاجبو
_ والله؟
__ ايي انت ما داير تشوفني مبسوطة
_ والله يا همس لو قعدتي معاي تحاولي لبكرة كلمتي وحدة . اتففت عرفت ماف نفع رجعت للبنات وانا زعلانة شديد لقيتهم مبسوطات
صفا: والله تعبت تعب عشان اقنع ابوي
فردوس: انا لمن عرف انو المحل ما بعيد وكلنا ماشيين وافق
وسام: وانتي يا همس
همس: عمار ما وافق
صفا: ليه ياااخ ما حنستي كويس
همس: والله حاولت كدا بس رفض
فردوس: ما بنقدر نمشي بدونك
صفا: نمشي بعد الفطور سريع ونرجع قبل ما يرجع من الشغل
همس: ما بقدر اعمل حاجه ذي دي
وسام: بنغطي عليكي حتى لو عرف بعد نرجع حيزعل يوم بس لانو انتي بتو ما بقدر بلاكي
همس: لالا مدام قال ما امشي ما بقدر اكسر كلمتو وانتو عارفين صعب كيف
فردوس: بكرة الصباح قبل ما يطلع الشغل كلنا بنتكلم معاهو ما تقلقي حيوافق . هزيت ليها راسي شيلت هم لبكرة
اليوم التاني الصباح بدري عملنا الشاي وقعدنا منتظرين عمار يجي من بيتهم بجاي عشان يصبح لينا ونتكلم معاهو لمن جا
فردوس: عمار دايرين نمشي الجناين خلي همس تمشي معانا
صفا: ايي يااخ يا عمار
عمار: لالا ممنوع همس تمشي
وسام: السبب شنو
عمار: همس روشة وانا بعرفها وهناك ما معروف البحصل شنو
همس: الله يسامحك يا ابوي . قام ضحك
صفا: نحنا حنهتم بيها
عمار: لالا
فردوس: عمار ما بنقدر نمش بدونا
عمار: اسف والله بس همس ما حتمشي سامعين
صفا: تمام . وكان طالع تاني رجع
عمار: فردوس
فردوس: نعم
عمار: همس أمانة عندك اوع تسوقوها لمن ارجع بسألك منها . قامت ضحك وهو ضحك وطلع
فردوس: وفشلنا
صفا: عنيد خلاص
همس: كلمتكم
صفا: نمش بس ونجي قبل ما هو يرجع
فردوس: هوي انا مسكوني ليها امانة
وسام: هوووي عان دي لمن صدقت . قومنا ضحكنا وحاولو يقنعوني بالفكرة وانا كنت رافضة ما بقدر اطلع بدون موافقة عمار بس عصرو علي شديد انو حنرجع قبل ما عمار يرجع من الشغل وانو كلنا نمثل اننا زعلانين عشان رفض لي المشي وكنت حيقتنع في النهاية وافقت فرحو شديد مشيت لامي
همس: امي بعدين تغطي لي
امي: والله نهائي ما بقدر ادخل بينك وبين عمار
همس: ياااخ عشاني هو ما حيعرف اني مشيت حأمثل اني زعلانة عشان ما مشيت
امي: دي مخاطرة ما تمشي
همس: ما بنتأخر
امي: تمام ربنا يجيب العواقب سليمة . سلمت عليها في رأسها من الفرحة ورجعت للبنات وفطرنا بدري اتجهزنا وعملنا قهوتنا وكل حاجاتها ومشينا كان جواي في خوف من الراجيني بس اتوكلت بس طول القعدة سرحانة ووخايفة لمن دخلت في الجو والمنظر كان حلو شديد
فردوس: هوي نرجع بعد دا
همس: ايي خلونا نرجع الليلة عمار لو عرف
وسام: ما حيعرف
همس: ان شاء الله يا رب
صفا: كنتي حتفوتي القعدة دي
همس: بالجد والله . ستفنا حاجاتنا وطلعنا في الطريق وقفت لانو في شوكة دخلت لي شبشبي طلعتها البنات كان مشو وقطعو الزلط
همس: هوي انتظروني . وقفو قومت جارية عليهم وجيت قاطعة الزلط بس عربية جات ذي القدر وانا ما انتبهت ليها دخلت فيني طرت فوق ووقعت في قزاز العربية ما سمعت حاجه غير صرخة البنات وتاني خلاص.......
__________
من جانب فردوس
قررنا نمش الجناين بس طبعا عمار عارض انو همس ما تمشي كأنو حاسي كدا بس كسرنا كلمتو ومشينا ولمن راجعين ما انتبهنا انو همس فضلت ورا الا لمن نادتنا التفتنا كانت جارية ضربها عربية طارت فوق من الخلعة صرخنا كلنا ودخل فينا خلعة انا لمن حيلي برد وبحاول استوعب الحصل صفا بركت في الارض وانا لمن رجولي ما شالوني وقعت وصرخت بأسمها عاينت اتجاهها كنت شايفة دمها بس قومنا بتعب جرينا ليها كانت غرقانة بدمها سيد العربية نزل وهو مخلوع
سيد العربية: ما شوفتها والله
وسام: خلينا نوديها المستشفى
فردوس: ما تحركوها
صفا: انتي هبلة ونخليها تموت . طوالي شيلناها وركبنا العربية كنت خاتة راسها في رجولي وببكي بحرقة شديد والبنات كلهم ببكو وصلنا المستشفى كيف ما عارفة دخلونا الاسعاف
الدكتور: اهلها وين . اتذكرنا ضربنا لناس البيت خمسة دقايق جو واعمامي جو وفي عمي اصر علينا نحنا البنات نرجع بسبب الخلعة الدخلت فينا رجعنا عمي خليفة البيت بقينا نبكي بس بعد ساعة كدا عمار جا داخل انخلعنا مدام رجع معناهو ما عارف كان معاهو سفيان استغربو ليه نحنا بنبكي
عمار: مالكم . يداب الخوف دخل فينا اكتر سكتنا و اي وحدة بتعاين تاني عاين كدا فينا
عمار: بطة وين . ماف وحدة ردت دخل الشك في قلبو
عمار: بتكلم معاكم وين همس
صفا: ه ه ه همس في المستشفى . اتخلع طبعا
عمار: كيف يعني في المستشفى ليه الحصل شنو . قامت بكت شديد
صفا: مشينا الجناين وفي.. . قام قاطعها
عمار: مشيتو وين؟ . هنا هي خافت او بالاحرى كلنا خوفنا
صفا: اااااالجناين . غمض عيونو شديد
عمار: وكسرتو كلمتي وسوقتوها صح؟ . ما ردت
عمار: اها والحصل
صفا: ضربها عربية في الزلط . رجع خطوة ورا وقام جاري سفيان قام ماشي وراهو وانا قومت جريت وراهم ثبتو
سفيان: دقيقه بمشي معاك اوع تتحرك ان شاء الله بتكون ضربة سطحية . دموعي زادت وقولت في سري يا ريت لو سطحية
عمار: خلينا نمشي سريع . وطلع الشارع وسفيان كان وراهو ناديتو جاني
سفيان: في اي مستشفى
فردوس: مستشفى...... سفيان خليني امشي معاكم
سفيان: ارجعي جوا . مسكتو من ايدو
فردوس: الله يرضى عليك خليني امشي لو ما مشيت ما حأكون مرتاحة بس خليني امشي . حنستو شديد وانا لسع ماسكة ايدو غمض عيونو شديد وفتحهم
سفيان: ورح . طلعت معاهو وجينا عربية عمار قام سفيان نزلو
سفيان: انا بسوق انت حالتك ما بتسمح ليك . عمار نزل وشافني وعصب
عمار: سفيان مالك جايب معاك الحيوانة دي . قومت بكيت
سفيان: دا ما زمنك اركبو . ركبو قدام وانا ورا وماشين في الطريق وانا ببكي بدون صوت وعمار بهز في رجولو من الخوف والتوتر واول مرة اشوفو بالحالة دي فجأة قال لي
عمار: فردوس دي الامانة المسكتك ليها؟ . قلبي وجعني
عمار: والله يا فردوس همس يحصل ليها حاجة حتكوني انتي السبب وما مسامحك لا دنيا ولا اخره وحتشوفي وشي التاني . قلبي عمل شح من جملتو دي وبقيت ارجف وابكي بصوت
سفيان: عمار دي كانت حادث ودا قدرها
عمار: انا محزرهم انو ما يسوقوها لاني مربي همس وبعرفها وبالاخص الحيوانة دي اعتمدت عليها انو ما تخليها تمشي . هنا بكيت صوت
سفيان: هسي خلونا نشوف همس كيف بعدها عاتب وانتي ما تبكي خلاص . بعدها ماف زول فتح خشمو لمن وصلنا انا لمن ما قدرت انزل من الهبوط الا سفيان جاني استغرب اني ما نزلت وعمار جرا خلانا
سفيان: مالك
فردوس: عندي هبوط
سفيان: وجاية مالك يااخ تعالي . مسكني نزلني بالراحة وبقى ماسكني وماشيين وصلنا محل اعمامي وعمار كان هايج وبسأل من حالها قالو لنا جوا العملية
سفيان: تعالي اقعدي . عمتو ام همس بتبكي بس داير يقعدني جنبها الدكتور جا طالع لينا ثبتا في سفيان كويس عشان اسمع كلام الدكتور وكيف حالتها واصلا انا مهبطة
عمار: اها يا دكتور بقت كيف
الدكتور: للاسف مريضتكم دخلت في غيبوبة . سمعت صرخة عمتو وانا طوالي وقعت في سفيان واغمى علي .........