رواية بين الضياع واللقاء الفصل السادس والعشرون 26 والسابع والعشرون 27 بقلم شذى عبدالمكرم
بعد المكالمة مع محمد بقيت ماشة وجاية وانا ببكي وبقول انا محمد قصرت معاهو في شنو عشان يخوني بقيت احاول اكضب الموضوع انو محمد مستحيل يخوني وبقيت ابكي وانا منتظراهو اتأخر المرة دي وعمتي لاحظت لي ما على طبيعتي
عمتو: مالك يا بتي
نعيمة: ماف حاجه تعبانة بس
عمتو: عيونك واقعة ذي الزول البكيان . قومت ضحكت
نعيمة: لالا ماف حاجة ذي دي وخليني ارص الغدا محمد شكلو حيتأخر
عمتو: كويس يا بتي . وقومت دخلت المطبخ وبديت اقطع في السلطة وسرحت قومت قطعت صباعي خلاص فاض بي براي فايتة لي بكية فقومت بكيت مسافة وغسلت وشي في المغسلة بتاعت العدة وواصلت ورصيت الاكل
عمتو: والله انا نهائي ما عاجبني حالك دا يا بتي انتي عيانة؟
نعيمة: لالا
عمتو: مالك خلاص احكي لي انا ذي امك
نعيمة: والله بعتبرك ذي امي
عمتو: مالك خلاص
نعيمة: قلقانة من موضوع الخلفة الاتأخرت دي خايفة اكون انا عندي مرض
عمتو: والله الخلفة دي من ربنا ما تشيلي هم لسع ربنا ما كتب ليكم الخلفة ما تستعجلي دي اول سنة ليكم لسع قدامكم عمر طوالي . ابتسمت ليها
نعيمة: نعم بالله
عمتو: ما تقلقي روحك بالموضوع دا
نعيمة: كويس . واكلنا ورفعت الصينية وعملت ليها كباية شاي ومشيت غرفتي منتظرة حضرت جنابو يجي ولمن رجع كان قبل المغرب بنص ساعة جا داخل وانا سامعة لمن قفل الباب بقيت قاعدة ومنزلة راسي اصلا كنت ببكي
__ مساء الخير . ما رديت عليهو مشا على الدولاب طلع ليهو غيار
__ نينا مالك بتكلم معاكي . جيت وقفت قدامي وانا عيوني محمرة ومنفخة من البكي اتخلع في منظري
__ مالك الحاصل شنو
_ محمد انا قصرت معاك في شنو
__ كيف يعني الحاصل شنو
_ بس وريني قصرت معاك في شنو عشان تخوني اتحملت معاك كل ظروفك بس في الاخر اتجازى منك كدا
__ خيانة شنو
_ ما تحاول تكذب علي لاني ما حأصدقك طلعت واحد خاين وجبان . هنا عصبو كلامي
__ انتبهي لكلامك انتي بتخرفي بتقولي في شنو
_ ما بنتبه هو انت انتبهت لمن خونتني
__ انتي مجنونة في رأسك
_ ايي مجنونة لاني كنت معمي علي الفترة دي كلها وانت بتخوني وانا ما حاسة
__ نعيمة ما ناقص هرمونات تمام
_ ايي قول كدا من الاول انك قنعت مني ومن هرموناتي عشان كدا بقيت تفتش برا اصلا اي راجل عينو زايغة
__ اقسم بالله يا نعيمة ما تلمي لسانك عليكي حيحصل حاجة ما تعجبك
_ هي فضلت فيها حاجه وانا اقول ليك حاجه ماشة اخليك ليك البيت تجيبها هنا براحتك بدل انت تمشي معاها بيتهم . ومشيت اشيل توبي
__ اقسم بالله يا نعيمة تخطي خطوة وحدة برا الباب واحد مننا حيطلع جنازة بلاش كلام فارغ معاكي . هنا بكيت شديد
_ وانت البتعمل فيهو دا ما كلام فارغ
__ كدا وريني خونتك متين ووين
_ قبيل لمن كنت معاها وانا اتصلت وكنتو طالعين على البيت ولا ناكر؟ . سكت مسافة
__ لا بزمتك انتي جادة في الكلام البتقولي فيهو دا ولا في البتفكري فيهو
_ كلامي غلط؟ تقدر تنكر انك خونتني؟
__ مدام شايفة اني خونتك ايي خونتك وبرجع بخونك تاني نسوان بتجيبو الهم والخم .
_ بقيت بجيب الهم والخم قول كدا من البداية بس ماف داعي للحركة الجبانة دي
__والله يا نعيمة اديكي كف اجيب اجلك حيوانة انتي ولا شنو . دايرة ارد عمتو مريم جات ضربت لينا باب الغرفة
محمد: اتفضلي امي . انا عملت فيها بفرش في السرير
امو: مالكم يا اولادي اصواتكم عالية كدا انعلو الشيطان
محمد: كنا بنتغالط في حاجة بس وانفعلنا
امو: حي لكن يا اولادي تتغالطو بصوت عالي ذي دا
محمد: معليش عملنا ليكي ازعاج . وانا قولت بدون ما ارفع رأسي عشان ما تعاين لدموعي ووشي المنفخ دا
نعيمة: معليش امي
امو: لا بس خوفت عليكم تكونو اتشاكلتو واتزاعلتو
محمد: الله لا جاب الزعل
امو: ان شاء الله يارب تصبحو على خير
محمد: وانتي منو اهلو . وطلعت وهو شال ملابسو ودخل الحمام وخلاني انا انفقعت بالبكي لمن صدعت جا لقاني منزلة رأسي تحت ولسع ببكي ما اشتغل بي
__ لو عايزة تبكي امشي ابكي في غرفة الضيوف هناك ما ناقص وجع رأس انا . بنفس الاسلوب دا رفعت رأسي عاينت ليهو بكسرة وشيلت توبي ومشيت غرفة الضيوف تميت البكي حقي هناك ونومت هناك الصباح قررت ما امشي الشغل لازم احل المشكلة دي صحيت بدري قبل امي مريم عشان ما تحس اني نومت برا غرفتنا وتعمل لي محاضرة وتحقيق لمن مشيت الغرفة لقيتو ماف معناهو طلع الشغل بدري عرفتو داير يتهرب مني قولت ما مشكله حتهرب مني وين طلعت عملت الشاي وناديت عمتي
عمتو: ان شاء الله امس حليتو مشكلتكم
نعيمة: هي كانت نقاش صغير بس اتفقنا في النهاية
عمتو: الحمدلله كنت هامة انو النقاش يكبر
نعيمة: لالا الحمدلله
عمتو: اصلا النقاشات ي بتحصل بين الازواج عادي . هزيت ليها رأسي وابتسمت ليها وشربنا الشاي بعد الفطور ضربو ليها انو اخوها في البلد تعب
مريم: لازم اسافر اشوفو
نعيمة: بمشي معاكي
مريم: بمشي براي عادي
نعيمة: براكي ما حتمشي
مريم: محمد براهو
نعيمة: بدبر نفسو
مريم: كويس اتصلي ليهو . قربت اقول ليها ما حأتصل ليهو مشيت الغرفة رسلت ليهو رسالة مضمونها " انا وامي مريم ماشيين البلد اخوها تعب " دا بس كل الرسالة طوالي رجع لي رديت
__ مسافرين متين
_ هسي
__ حترجعو بتين . بآخر نفس رديت ليهو
_ ما بعرف
__ اتكلمي عديل
_ عاجبك ما عاجبك دا اسلوبي . وقفلت فيهو الخط رجع لي ما رديت ليهو مشيت لبست وستفت لي غيار ووعمتو جهزت نفسها وسافرنا البلد اصلا ما بعيدة 45 دقيقه وصلنا لقيناهو تعبان شديد قعدنا معاهم ومحمد يشيل ويتصل ما برد ليهو اتصل لامي عرف انو نحنا وصلنا قعدنا اليوم الاول بقى كويس شوية اليوم البعدو
مريم: يا بتي انتي ارجعي لانك شغالة
نعيمة: ما بخليكي براكي
مريم: انا ما براي هنا انا وسط اهلي انتي ارجعي لشغلك ومحمد محتاجك . شوفتها احسن ارجع براي عشان احسم الفارغة الحاصلة دي قبل عمتي ما ترجع
نعيمة: كويس بس خلي بالك من نفسك تمام
مريم: تمام . جهزت نفسي وودعتهم وسافرت رجعت البيت بدون ما اكلم محمد وهو لمن رجع من الشغل المغرب اتفاجأ بي
__ انتي فاكرة نفسك منو ودي شنو الحركات البتعملي فيها دا . لمن فاضي بي وقفت قدامو
_ محمد طلقني . رفع حاجبو
__ انتي عارفة نفسك بتقولي في شنو
_ عارفة وعارفة بعمل في شنو وبعدها اسرح وامرح ذي ما عاوز ولو داير تتزوج ذاتو اتزوج . مسح وشو بأياديهو
__ هو انا وحدة قادر اتحملها؟ لمن اتزوج تاني . عاينت ليهو بكسرة
_ بقيت حمل تقيل عليك يبقى اتخلص مني
__ انتي عارفة لو كان سألتيني براحة كان لقيتي جواب لكل اسئلتك دي
_ ما دايرة اعرف حاجه طلقني بس . زحاني بأيدو ودخل الحمام عصبني زيادة اثناء ما هو في الحمام تلفونو رن لمن فصل تاني رن شيطاني وسوس لي مشيت لقيتو رقم غريب رديت
البت: الو . كان صوت بت اخدت نفس
نعيمة: اهلين
البت: محمد موجود
نعيمة: ايي موجود انتي منو ومحمد ببقى ليكي شنو . ما ردت لي محمد جا طالع من الحمام وشاف تلفونو في ايدي شالو مني و رد وهو بعاين فيني
محمد: ايي يا زهراء تمام جاي عليكي مسافة الطريق بس . دخل تلفونو في جيبو وقام طالع قلبي وجعني لحقتو لحدي الباب
_ محمد والله العظيم لو طلعت مشيت ليها حترجع تلقاني ماف وعمرك ما حتشوفني . وقف ومسح وشو بعصبية كدا
__ انتي مشكلتك شنو يا بت الناس
_ انت المشكله بحد ذاتها قولت ليك طلقني عشان تحفظ شوية الاحترام الفضل ليك عندي دا . قام ضحك
__ احترام قولتي لي تمام يا نعيمة البسي عبايتك ارح معاي نشوف القاعد اخونك معاها دا
_ ما ماشة معاك محل
__ والله ووعد مني بعد نرجع الانتي عايزة بحصل موش طلاق بطلقك ومن هناك برجعك بيت ابوكي وعد مني . عاينت ليهو مسافة وما رديت
_ البسي عبايتك سريع ماف زمن زهراء منتظرانا . حمرت ليهو بكل وقاحة قال زهراء منتظرانا كرفست وشي وقولت ليهو بسخرية وصوت خشن
__ زهراء منتظرانا . قام ضحك دخلت لبست عبايتي وجيت طالعة معاهو وانا وهو طول الطريق ساكتين لمن وصلنا بيت كدا نزلنا وضرب الباب فتحت لينا بت كدا
البت: اهلين اتفضلو . دخلنا وفضلتنا
محمد: كيفك زهراء
زهراء: تمام الحمدلله وانت
محمد: تمام اعرفك دي مرتي نعيمة
زهراء: اهلين نعيمة سمعت عنك كتير من علي وكنت متحمسة اتعرف عليكي قال لي حتحبيها لو لقيتيها
نعيمة: جنابو علي؟
محمد: دي خطيبة علي
نعيمة: عليك الله اتشرفنا
زهراء: اي ما كنتي عارفة؟
نعيمة: محمد قال لي ورح اعرفك على زولة وخليها مفاجأة . قامت ضحكت
زهراء: ايوااا والمرة الفاتت جنابو محمد كان عايز يحكي لي عنك بس الزمن اتأخر
نعيمة: ايواااا هسي اتعرفنا . محمد تلفونو رن وطلع برا وجات امها سلمت علي حلو ومشت وزهراء جات قعدت جنبي واتكلمنا مع بعض وهي ظريفة
زهراء: حياتك كيف مع جنابو محمد هل صح انو العيشة مع ضابط صعبة . قومت ضحكت
نعيمة: حتكتشفي بنفسك
زهراء: عليك احكي لي
نعيمة: والله ما اكذب عليكي ما سهلة بس مدام بحبتيهو لازم تحملتي انتي عارفه انو محمد خلاني قبل العرس بأسبوع وطلع مأمورية . فتحت خشمها بصدمة
زهراء: جادة؟
نعيمة: والله العظيم
زهراء: والحصل شنو
نعيمة: انتظرتو بس رجع وعملنا العرس بس في النهاية عمل لي عرس عمري ما حلمت بيهو
زهراء: يا بختك مبسوطة معاهو؟
نعيمة: اكتر مهما تتخيلي
زهراء: ربنا يخليكم لبعض
زهراء: اللهم آمين يارب . وبقينا نتونس لمن محمد رجع
محمد: علي شوية وحيكون هنا . هزينا رأسنا وقعد بعيد وشغال بتلفونو عاينت ليهو بندم كدا بس هو ما فسر لي بس انا كمان ما اديتو مجال بقيت اعاين ليهو الا زهراء نادتني ركزت معاها وبقينا نتونس وامها جات قعدت معانا وابوها رجع من الجامع وقعد وعلي وصل وتم العدد
محمد: ذي ما عارف يا عمي محجوب علي يتيم الاب بس انا حأسد الخانة دي في الوقت الحالي
محجوب: جدا
محمد: علي حابي انو يتم عرسو بس عندو طلب
محجوب: سامع
محمد: اتكلم يا علي
علي: ذي ما قال جنابو محمد انا يتيم الاب بس كمان عندي تلاتة اخوات انا الربيتهم اتنين متزوجات الحمدلله ضمنت مستقبلهم وباقي لي وحدة لازم اضمن انو اسلمها لراجلها عشان ارتاح فحاليا ما بقدر اتم العرس الا ازوج اختي فلو زهراء بتستناني بس اختي تتم عرسها بعدها نحنا نتم عرسنا بكون ممنون ليها
محجوب: كونو بتفكر في مستقبل اخواتك وانو تضمن ليهم مستقبلهم دا خلاك تكبر في نظري انا ما عندي مشكله القرار لزهراء لو بتنتظرك مية سنة انا ما عندي مشكله . الانظار اتجهت على زهراء بقت متوترة ضغطت على ايدها
زهراء: ما عندي مشكله . وانتهى النقاش بالتراضي العرفتو من زهراء بعد داك انهم كانو متفقين بس خايفين من ردت فعل ابوها ودا الخلاهم يجتمعو في المطعم وانا السمعت كلام رفيدة ودايرة اخرب بيتي لمن اللمة انتهت طلعنا مع محمد وركبنا عربيتنا في الطريق كان الهدوء سيد الموقف حبيت اكسر الهدوء دا
نعيمة: محمد
محمد: خشمك ما تفتحي لي لمن اوصلك بيت ابوكي ......
27
في الطريق كان الهدوء سيد الموقف حبيت اكسر الهدوء دا
_ محمد
__ خشمك ما تفتحي لي لمن اوصلك بيت ابوكي . عاينت ليهو بصدمة
_ محمد انت جادي؟
__ قولت ليكي حسك ما داير اسمعو موش قولتي دايرة تمشي بيت ابوكي ودايرة الطلاق جدا حأوصلك . سكتا ما اعرفت اقول شنو طبعا محمد في المواقف الذي دي حازم شديد نزلت رأسي في رجولي في بقيت ابكي لمن حسيت العربيه وقفت
_ انزلي . رفعت رأسي لقيت انو وقفنا قدام باب بيتنا عاينت ليهو
_ انزلي سريع انا مستعجل . بقيت اعاين ليهو بس وهو كان جادي شديد رجعت نزلت رأسي في رجولي ورجعت ابكي
_ بتكلم معاكي موش انا جبان وخونتك ودايرة ترجعي لاهلك ياهو جيبتك لاهلك انزلي يلا . ما رديت ليهو
_ بتكلم معاكي انا ماف زمن يااخي
__ ما نازلة . سكت دقيقتين ودور العربية وواصلنا بيتنا نزلنا ودخلنا ما عرفت اقول شنو غير وصلى ورقد جيت جنبو
_ محمد
__ خليكي بعيدة ولو نومتي في غرفة الضيوف بكون احسن . قال لي كدا وهو بعاين في تلفونو حسيت بكسرة ورجعت خطوة ورا
__ ما عايز تتكلم معاي؟
_ هو انتي خليتي فيها كلام بعد الزمن دا كلو القضينا مع بعض طلعت واحد خاين وجبان وعيني زايغة وبمشي مع البنات بيوتهم والله طلعت ما بعرفك نهائي
__ محمد ما كدا . صرخ فيني لمن رجعت خطوة ورا
_ كدا قولي لي كيف . خوفت من منظرو وهو قام وجا وقف قدامي
__ انا لمن سألتك كذبت علي وسمعت صوت بت معاك
_ ودا خلاص يخليكي تشكي فيني واني خاين صح وانتي الوحيدة البتعرفيني انو انا ما بتعامل مع بنات ياااخ انا فيحاء كنت عاقد عليها ما كنت بتعامل معاها جاية هسي عشان سمعتي صوت بت تطلعيني خاين وبتاع بنات
__ محمد معليش ما قصدي . قام ضحك
_ فاكرة كدا بتحلي الموضوع غلطانة والله وانا وحدة ما بتثق فيني ما بتلزمني نهائي مدام شكيتي هسي حتشكي دايما وانا ما ناقص قرف ونكد في حياتي وذي ما طلبتي الطلاق بنفذو ليكي . وقام طلع من الغرفة قعدت في السرير وبقيت ابكي خلاص دمرت بيتي بنفسي ما رجع الغرفة تاني نام في غرفة الضيوف وانا الليل كلو شيلتو بكي
الصباح قومت بدري جهزت ليهو الكاكي حقو وجهزت ليهو الشاي رجع الغرفة لبس كنت في المطبخ فجأة جيت طالعة لقيتو متجه على برا
نعيمة: محمد الشاي . عاين فيني وبس وسفهني وجعني حركتو دي حتى انا حردت الشاي وقيلت براي حتى فطور ما فطرت من الزعل وكويس انو اليوم كان اربعاء لاني ما بشتغل اربعاء ولا خميس عملت الغدا بس رجع متأخر ما سلم علي حتى
نعيمة:محمد ارص ليك الغدا؟
محمد: اكلت برا
نعيمة: من متين بتأكل برا
محمد: ما تعملي فيها متهمة من اليوم ما عندك دخل بي
نعيمة: كيف يعني ما عندي دخل انا مرتك لو ناسي . قام ضحك
محمد: مرتي؟ موش امس القريبة دي كنتي طالبة الطلاق؟ . انفعلت فيهو
نعيمة: ما ضروري تذكرني كل مرة عارفة اني غلطت خلاص يااااخ
محمد: غلطتي قولتي لي بس دا غلط نهايتو طلاق
نعيمة: قول عايز تطلقني بس ووصلت لهدفك خلاص ودي سبلة منك بس . هز رأسو بخيبة امل
محمد: والله بقيت بتوقع منك اي حاجه . صرخت بأنهيار وبكي
نعيمة: محمد خلاص ياااخ كفاية والله تعبت ياااخ انت داير مني شنو والله لانو بقيت ما قادرة اتحمل الوضع دا
محمد: خليكي بعيدة مني لمن افضى واتكلم مع ابوكي
نعيمة: ماف داعي تتكلم مع ابوي مدام قنعان مني خلاص وما بلزمك تاني بكرة برجع بيت ابوي ويا دار ما دخلك شر . عاين فيني وسكت وقام طلع من الغرفة تبعتو كان طالع برا البيت
_ محمد ماشي وين
__ خليكي جوا
_ حتخليني براي بالليل دا . ما رد وطلع الدنيا كانت ليل واتأخر شديد وانا من الخوف بقيت اسمع اصوات غريبة لاني براي بقيت خايفة وببكي لبست توبي وكنت حأمشي بيت ابوي بالليل دا لانو كنت خايفة من الاصوات المخيلتي رسمتها لي طلعت بالراحة وبقيت ماشة براحة براحة عشان ماف زول يلقاني واخاف زيادة بس شوفت محمد جاي استغرب لمن شافني جا سريع وقال لي بعصبية
__ ماشة وين الزمن دا
_ ما عارفة . وبقيت ابكي
__ بتكلم معاكي يا زفت ماشة وين
_ ما تتزهج فيني فاهم . مسح وشو ومسكني من معصمي وقام جاريني فكيت ايدي منو
__ فكيني ما ماشة معاك ماشة بيتنا
_ بيتكم الزمن دا؟
__ ايي موش خليتني براي وكنت خايفة وما راعيت اني براي فبيت ابوي امان لي
_ امشي قدامي
__ محمد ما ماشة معاك وموش قولت عايز ترجعني لاهلي رجعني هسي دا احسن ذاتو تتخلص من الهم العليك دا
_ هسي دا مكان ولا زمان نتناقش فيهو؟
__ انت الجبرتني
_ عندنا بيت بلمنا امشي . عاينت ليهو مسافة واتحركت رجعنا البيت وطوالي مشيت غرفة الضيوف نومت فيها
عدا يومين ونحنا لا بينا سلام ولا كلام وهو لسع عند موقفو وما فتحت ليهو موضوع انو ارجع بيتنا تاني لانو اصلا ما بنتكلم لو سلمت عليهو ما برد علي حسيت انو ما دايرني خلاص بس انا دايرة في اليومين ديل اهملت صحتي شديد بقيت ما بأكل لمن ضربت لي عمتي انها خلاص راجعة رسلت ليهو رسالة لانو عارفة لو اتصلت ما حيرد وعلى كدا خلصنا وقومت جهزت الغدا عمتي وصلت مع العصر كدا جا استقبلها محمد من المحطة ورجعو سوا استقبلتها عاينت لي
عمتو: مالك عاملة كدا عيانة انتي؟ . عاينت لمحمد هو كان بعاين في محل تاني
نعيمة: ما عيانة دا بكون ارهاق الشغل
عمتو: حي لكن يا بتي تتعبي روحك للدرجة دي؟
نعيمة: مفكرة آخد اجازة فترة كدا
عمتو: احسن حاجة على الاقل تهتمي بنفسك شوية عشان محمد ما يمشي يعرس وحدة تانية . وقامت تضحك ضحكت معاها انا مجاملة وهو كأنو ما سامعنا
نعيمة: كويس يا عمتو
عمتو: ناس امك كيفهم
نعيمة: كويسين الحمدلله لي زمن ما مشيت ليهم
عمتو: نمش معاكي يوم نقيل معاهم
نعيمة: تمام . وقضيت اليوم مع عمتي وحكت لي انو اخوها بقى كويس بس اجلو العرس شهر قدام
نعيمة: احسن عشان نجهز ليهو بمزاج
عمتو: ايي صح
لمن قومت جهزت الغدا قعدنا كلنا بس اي واحد ماسك خشمو انا بتكلم مع عمتو بس وهو خشمو ما فتحو انا بهبش في الاكل بس ما بأكل عشان عمتو ما تحس
عدا يومين كدا عمتي حست انو في حاجه جات سألتني بعد الفطور لمن جيبت ليها الشاي
__ يا بتي انتي حاصلة ليكي حاجة مع راجلك؟
_ لالا
__ والله في مشكلة بينكم ملاحظة فيكم سلام ما بتسلمو على بعض انتو زمان لمن بتهظرو قدامي مستحيل يكون دا طبيعي احكي لي انا امك . طوالي بكيت ليها وانا قعدت جنبها
_ امي محمد زعلان مني
__ محمد زعلو كعب بس حيرضى ما تبكي انتي . طبطبت على ضهري
_ والله ما كنت قاصدة ازعلو
__ عارفة انك ما قاصدة تزعلي وهو ذاتو المفروض يتحمل ما يزعل الفترة دي كلها . رفعت رأسي وعاينت ليها
_ حيرضى؟
__ ولدي وبعرفو زمان لمن يزعل بآخد فترة بس برجع طبيعي . هزيت ليها رأسي بمعنى تمام وحسيت انو ايادي اتنملت كنت بحس فترة لفترة انها بترجف بقيت اهز فيها
__ مالا ايدك
_ما فيها حاجه . وجيت اقوم كدا رأسي لفا بس ثبتا سريع ورجعت محلي لانو قربت اقع والدنيا بقت لي ضلام عشرة ثواني حتى الرؤية اتضحت لي
__ مالك يا بتي
_ ماف حاجه رأسي لفاني بس
__ عيانة؟
_ لالا لانو قعدت كتير
__ هسي متين قعدتي ومالك معرقة كدا . قومت ضحكت ليها
_ يعني من الصباح وكدا والعرق لاني بكيت بس شكلي سخنت
__ امشي افحصي
_ لالا انا كويسة والله . وقومت تاني رأسي كان لافي بس ما بينت ليها سريع سريع دخلت الغرفة ووقعت في سريري وانا حاسة بسخانة عجيبة ومعرقة رغم انو المروحة شغالة شبه عرفت مرضي وبقيت اعاين لايدي رفعتها في الهواء كانت بترجف لميت جسمي علي ونومت لاني حاسة بأرهاق شديد
لمن محمد جا من الشغل مشيت اجيب ليهو الموية بس لمن قربت على باب الغرفة رأسي لفاني واتعترت والموية اتكشحت هو عاين فيني بس ما قال حاجة مشيت جيبت المساحة وجيت مسحت الموية وما جيبت ليهو موية تانية قعدت في حافة السرير ومنزلة رأسي وبرجف خفيف كدا وهو كان بغير ما قال لي عينك في رأسك ما انتبه لي اصلا متوقعة منو اصلا رجعت نومت عمتو جهزت الغدا ونادتنا انا كنت نايمة وعمتو كلمتو يصحيني جاني ناداني
__ نعيمة . فتحت عيني نصة
_ اممممم
__ تعالي الغدا
_ ما دايرة اكل . وطوالي طلع وانا نومت شوية وقومت بعد هو رجع قعد شوية عمتو جات ضربت لينا باب الغرفة
محمد: اتفضلي امي
عمتو: تعال يا محمد دايرة اتكلم معاك
___________
من جانب محمد
كان قاعد مع نعيمة في الغرفة جات امو ضربت الباب
محمد: اتفضلي امي
امو: تعال يا محمد دايرة اتكلم معاك . طلع ومشى مع امو دخلو غرفتها هي قعدت في السرير واشرت ليهو
_ تعال اقعد جنبي . جا قعد جنبها
__ احكي يا امي سامعك
_ ليه مزعلها لمرتك عارفة انها غلطت بس وزعلتك بس هسي قلبك بسمح ليك تخاصمها للدرجة دي ياااخ انت شيلتها من اهلها عشان تزعلها على الاقل راعي انها صبرت الفترة دي كلها معاك وشالتني انا في عيونها انت كمان لازم تجي على نفسك شوية عشانها انا ما عارفة هي زعلتك في شنو بس ندمانة ياااخ والله اكل ذي الناس ما بتاكل
__ شنو
_ والله العظيم ما بتأكل لانك زعلان ما ملاحظ ليها اعتبرها ذي بتك وغلطت هل في اب ما بسامح جناو؟
__ لالا
_ بس خلاص والله انا وابوك زمان بنتناقش كتير بس لو ما صبر ابوك علي ما كان عيشت معاهو سنة ولا كان جيتو انتو هل البت ذي الولد في التصرفات؟
__ لالا
_ عشان كدا الرسول وصى عليهم
__ عارف اني زعلتها شديد
_ مرتك عيانة . عاين ليها بأستفهام كدا
__ كيف يعني
_ كيف يعني كيف يعني بقول ليك مرتك عيانة
__ بس هسي خليتها كويسة
_ نعيمة ما كويسة والله بتتعرق كتير وكل ما قعدت وقامت رأسها بلفها وقبيل كنت بترجف لمن سالتها نفت الموضوع كدا ركز معاها والله قلبي حاسي انها عيانة حتى لونها متغير . اتفاجأ من كلام امو واتذكر لمن كشحت الموية
__ بمشي بشوفها . وطلع من امو وهو بقول ان شاءلله كلام امي يكون توهمات بس لانو حيكون هو السبب دخل الغرفة لقاها قاعدة في حافة السرير وتغمض اياديها وتفتحهم ذي الزول العندو تشنج وعرقانة شوية مع انو الجو طبيعي .......
____________
من جانب نعيمة
محمد جا راجع الغرفة وقرب مني وهبش جيبني رفعت رأسي باستغراب بعاين فيهو
__ نينا
_ اممممم
__ كويسة انتي؟ . استغربت سؤالو لانو ليهو زمن ما شغال بي عاينت ليهو بأستغراب
_ ليه بتسأل
__ حاسة بشنو حاليا
_ انت الحاسي بشنو
__ كيف يعني
_ انا ما بهمك ليه بتسألني من حالي
__كدا قومي فوق
_ ما دايرة اقوم
__ عشاني قومي فوق . عاينت فيهو باستغراب متفاجاة من التغيير الحاصل شنو اقول يا ربي محمد مالو يمكن عمتي حكت معاهو
_ محمد ما قادرة اقوم . جا مسكني من ايدي وقومني حسيت راسي تقيل ولفاني ثبتا فيهو عشان ما اقع وهو بدورو ثبتني قوي ورجعني للسرير
__ من بتين بتجيكي لفة الراس دي
_ ليه يومين كدا
__ ليه انا ما لاحظت . عاينت ليهو بكسرة
_ انت ما كنت شايفني اصلا وامس قدامك رأسي لفا لمن كنت جايبة ليك الموية واتكشحت عاينت لي بس ولا حتى جيت جنبي عشان كدا ما رجعت جيبت ليك موية تاني
__ ما كان قايل رأسك لفا مفتكر اتعترتي بس
_ واتعترت ما بتجي تشوفني مالي . ما رد لي
__ قومي نمشي نفحص
_ ماف داعي انا كويسة ما تشغل بالك بي
__ كيف ما اشغل بالي بيكي وانا بالي كلو حيكون معاكي . فرحت من كلامو لانو واضح انو لسع بهمو امري
_ من زمان ولا هسي بس
__ هي شنو المن زمان ولا هسي
_ ولا حاجه
__ قومي البسي نمش فحص
_ الزمن اتاخر
__ ما بقدر اخليكي كدا للصباح بنلقى مركز فاتح
_ ما ماشة بكرة ببقى كويسة
__ كدا ما حأكون مطمن قومي
_ محمد شايفني ما قادرة والله
__ انا بساعدك . فجاة اصابعي قامو يرجفو
_ محمد عاين . رفعت ايدي وكانت بترجف بطريقة مبالغة اتصدم و جا مسك ايدي ودعكها لي لمن وقعت من الرجفان
__ نينا قومي ياااخ
_ محمد والله جسمي تقيل علي
__ اشيلك؟
_ تشيلني شنو هوي يا راجل . قام ضحك
__ عادي جدا والله
_ انت قايل نفسك في رواية ولا شنو كدا جيب لي عبايتي من الدولاب . قام جابها لي وساعدني لبستها
_ كدا امسكني اقوم ولمن الدوخة تروح الباقي عادي . بالفعل قومني وثبتني لمن حسيت انو جمعت حتى فكيتو
_ بمشي براي بعد دا
__ ثبتي فيني ما ضامن انا . ضحكت وحضنت يدو وطلعنا لفينا كدا حتى لقينا مستوصف خاص فاتح قال ما امشي المستشفى التعليمي لانو ما واثق بالفعل دخلنا المستوصف كانو ربع ساعه وحيقفلو لقينا الدكتور وصفت ليهو اعراضي وطلب لي كم فحص ومشينا عملناهو والنتيجة طلعت رجعنا للدكتور
الدكتور: عندها نقص حاد في السكر
نعيمة: جاتني قبل كدا
الدكتور: يعني عارفة السبب
نعيمة: من الاكل حصلت معاي مرتين
الدكتور: ياهو عارفة ليه خلاص ما بتاكلي . ما رديت
الدكتور: لازم تتغذي كويس لانو تكرار المرض دا حيكون خطير عليكي في المستقبل
محمد: حأنتبه على اكلها تاني
الدكتور: لازم وضروري كمان وانا بكتب ليكم شوية ادوية لازم توبظ عليها ونظام غذائي معين وتجي تاني تفحص
محمد: تمام يا دكتور . وطلعنا .........