رواية بين الضياع واللقاء الفصل الثامن والعشرون 28 والتاسع والعشرون 29 بقلم شذى عبدالمكرم
بعد طلعنا من الدكتور وطبعا مثبتة في محمد شال لي الادوية وركبنا عربيتنا
__ انتي كيف ما تحكي لي انو جاكي نقص سكر قبل كدا
_ مرض ذي باقي الامراض يعني هسي اقعد احكي ليك جاني كم مرة ملاريا في حياتي؟ .
__ فالحة للفلسفة بس . قومت ضحكت
_ الله . حمر لي
__ مالك ما بتأكلي
_ انت شخصية بتسد النفس الصراحة . قام ضحك
__ والله؟
_ عبدالله . ضحك
__ هبلة . غمزت ليهو قام ضحك شديد
_ محمد خلينا نرجع دايرة انوم ياااخ
__ انتي يومك كلو نايمة ما فترتي؟
_ محمد دا ما مني دا بسبب المرض دا وجسمي كلو حاساهو برجف الا ارقد
__ جسمك واجعك؟
_ حاسة انو مكسر من الفتر والارهاق ولفة الرأس
__ انتي لمن تزعل ما تحاسبي نفسك معاها والله ربنا بسألك منها
_ والله انا كدا لمن ازعل بحرد الاكل
__ ما صح . هزيت ليهو رأسي وميلت رأسي بالجنبة اتجاهو وغمضت عيوني وانا مطمئنة انو محمد رضيان عني شوية حسيت انو الكرسي بينزل ابتسمت تلقائيا بدون ما افتح عيوني يداب صلحت رقدتي وما عارفه وصلنا بتين صحيت بمحمد بحاول يصحيني
__ نينا انزلي وصلنا
_ دقيقه بس . قام ضحك
__ دقيقه شنو قومي يا بت . جراني نزلني قربت اقع الا ثبتني وانا نعسانة دخلنا كدا لقينا عمتي منتظرانا
عمتو: اها عندها شنو
محمد: نقص سكر
عمتو: قولت ليك مرتك عيانة . هز رأسو ووصلني سريري قلعت العباية ونومت خمسة دقايق ما تمت
__ نينا قومي
_ محمد خليني ياااخ
__ هاكي اشربي ونومي . قومني غصب شربني عصير سكرو كتير في الاول رفضت لاني ما بحب السكر بس شربني غصب بعد نزاع معاهو واداني الحبوب بلعتو ونومت الصباح صحيت بكسل كدا قعدت في طرف السرير بحاول اجمع عشان ما تجيني لفة رأس واقوم اجهز لمحمد كاكي الشغل وحسيت باصابعي نملو بقيت احرك فيهم محمد جا داخل الغرفة وهو لابس جاهز
_ صباح الخير . وكنت بفتح في ايدي واقفلها
__ صباح النور . وجا قعد جنبي ومسك ايادي الاتنين وبقى يدلك لي فيها وانا ببتسم بس
__ حاسة كيف
_ احسن
__ كذابة . قومت ضحكت
_ ما دايرة ادلع فيك واقول ليك لسه تعبانة عشان ما تحرد الشغل . قام ضحك
__ قولي وحأحرد
_ احلف . ضحك وما رد طوالي وقعت بجسمي في السرير ورا
_ محمد انا تعبانة ما قادرة اتنفس وحاسة اني اتشيلت قضي معاي اليوم دا احتمال ترجع ما تلقاني وتندم . قام ضحك شديد وجراني قعدت نفس قعدتي القبيل
__ مدام دا كلامك عندي شغل بسيط بخلصو وبرجع
_ احلف
__والله الفطور حأفطر معاكم
_ احلى خبر خلاص منتظرينك بس وانت راجع جيب لي معاك سمك
__ موش كنا حردانين الاكل . ضحكت
_ دا اثناء الخصام بس وبزول بزوال المؤثر . ضحك
__ خلاص تمام حاضر عيوني ليكي حاجة تانية؟
_ سلامتك بس حبيبي انا . كلامنا دا كلو وهو بدلك لي في ايادي
_ شربت الشاي؟
__ ايي امي عملتو
_ الحمدلله يلا عشان ما تتأخر على شغلك
__ حاضر بس عندك ادوية تآخديها بس بعد تشربي اللبن وماف اعتراض مفهوم؟
_ مفهوم يا جنابو
__ فالحة يا عيون جنابو . ضحكت بفرحة وودعتو وطلع اتنفست بفرحة وانا مبسوطة شديد انو علاقتي بمحمد رجعت ذي زمان
قومت غسلت وشي وطلعت لعمتو شربتني اللبن شكلو محمد موصيها وقعدت معاها بس راقدة في سراير الصالة لمن محمد جا بالفعل وجاب لي معاهو السمك ودخل طلع قميصو بس وجا بالبنطلون والبوت عرفتو انو طالع تاني
_ راجع تاني؟ . سكت مسافة
__مضطر ارجع
_ تمام
__ عارف انو وعدتك انو افضي اليوم معاكي
_ لالا عادي عارفة انك مشغول وهسي كونو ترجع بس عشان تفطر معانا ذي ما وعدتني دي عندي ليها بالدنيا
__ دايما بتفهميني وبتلقي لي اعذار لتقصيري
_ عشان حياتنا تمشي . ابتسم لي عمتو جات وجابت الفطور
عمتو: مالك ما غيرت
محمد: راجع والله
عمتو: ايوااااا . وقعدنا فطرنا بمزاج وكان كل ما اقول شبعت يقول لي اقعدي ارجع اقعد ذي الشافعة وعمتي تضحك بس لمن شبعت وهو مصمم يأكلني زيادة
نعيمة: محمد والله شوية والاكل يطلع لي بأنفي واذنيني . عمتو تضحك بس
عمتو: خليها تقوم خلاص
نعيمة: ايي يا امي اتكلمي معاهو
محمد: خلاص قومي
نعيمة: اخيرا فكو أسري . قامو ضحكو فيني بعد خلصنا هو شرب الشاي ورجع شغلو وامي جاتنا لقتني راقدة في الصالة
امي: عيانة انتي؟
عمتو: عندها نقص سكر . وقامت تضيفها يا ريت لو رديت انا كنت كذبت ليها اي كذبة تانيه
امي: نقص سكر ليه ما بتأكلي مالك دايرة تموتي انتي وبراكي عارفة يعني مرض ما جديد عليكي البخليكي تحردي الاكل شنو زعلانة من زول ولا الحاصل شنو . طبعا قلب الام طوالي عرفت مالي
نعيمة: امي ما كدا
امي: اها مالك ما تخليني اتصل لراجلك اسألو هو مزعلك صح هسي بكلم ابوكي يجي يرجعك
نعيمة: امي بالراحة عمتي ما تسمعك
امي: اسكت ليه دايرة لمن اجي القاكي جنازة ولا شنو وانتي لو ما زعلتي شديد ما بتحردي الاكل كدا لمن يجيكي نقص سكر . بقيت احاول اسكت في امي عشان عمتي ما تسمع وتزعل
نعيمة: امي ماف زول زعلني بس كنت مهمومة بسبب الخلفة بس دا الخلاني ما اكل بس عمتي اتكلمت معاي وخلاص الهم زال
امي: وراجلك دا ما لاحظ ليكي انك ما بتأكلي لمن يجيكي نقص سكر اصلا ما ركب لي في رأسي كلامك دا
نعيمة: امي خلاص . عمتي جابت ليها عصير وادتني انا زاتي وبقيت ادعي انو عمتي تكون ما سمعت وامي قيلت معانا لمن العصر محمد جا راجع سلم وطلع قعدنا معانا فجأة امي بدون مقدمات
امي: محمد نعيمة دي جاها نقص سكر ليه لانو ما بجيها الا تزعل شديد وتأبى الاكل . عاينت لامي بصدمة انو قالت ليهو كدا هو ما عرف يقول ليها شنو
محمد: كانت مشكلة صغيرة واتحلت
امي: مشكلة شنو صغيرة لمن تتعب كدا وانت وين كنت ما ملاحظ ليها انها ما بتأكل
نعيمة: امي خلاص قبيل وريتك السبب
امي: انتي اسكتي ما سألتك اها يا محمد بتي لو ما قادر تحافظ عليها رجعها لينا
نعيمة: امي!!!
امي: اخر مرة مشت بيت عمها وزعلوها وابت تتكلم وما بتأكل وجاها نقص سكر دخلت في كومة اسبوعين عارف الحاجة دي ومن يومها انا مقيلة ساي ما بخليها تقيل معاهم عارف يعني شنو الحاجة دي
محمد: ما عارف اعتذر اقول ليكي شنو هي قدامي وتعبت كدا وفشلت اني احافظ عليها وخجلان منك
امي: ما بقول انو ماف مشاكل بتحصل في اي بيت بس لدرجة انو تهملها كدا بتي حساسة بطبعها وحتى لمن قالت حأزوج ضابط قلبي كان في ايدي وانا بسلمها ليك بس قولت دي قسمتها ومحمد حيحافظ عليها وكل ما تقول لي محمد سافر مأمورية بقلق انو تحرد الاكل ويرجع ليها نقص السكر وتدخل لي في كومة واخسرها فبقول ليها تعالي قيلي معاي عشان اغير ليها جوها واما لمن مريم تكون قاعدة بكون مطمنة عليها انو في زول يونسها وتتماشى عارف عشان شنو راشد كان رافض زواجكم
محمد: قالها لي نعيمة حساسة ما بتتحمل
امي: والله ما تشوفها بتضحك كدا نعيمة حساسة شديد وانفعالية بس بتجي على نفسها عشان غيرها
محمد: خجلان اقول ليكي شنو يا عمتي بس والله ما حتحصل حاجة ذي دي تاني لو حصلت مني انا بذات نفسي برجعها لابوها ودا اعتبري وعد رجال مني ليكي
امي: وانا انتظر لمن تحصل ليها حاجة تاني؟
محمد: ما حيحصل ان شاء الله
امي: ما قادر تحافظ عليها او تنتبه عليها هسي بتصل لابوها يجي ونرجعها معانا من دون مشاكل وبالمرة ترتاح من همها
محمد: لا مرتي ما مستغني عنها
امي: لو ما مستغني عنها ما كان وصلت للمرحلة دي
محمد: حقك علي والله غلطان عارف نفسي وبعتذر ليكي وبعتذر ليها . وقام جا سلم علي في رأسي قدامهم
محمد: حقك علي ما حيحصل تصرف ذي دا تاني مني . وانا ببكي بس انو محمد بعتذر لي على غلطتي انا وكمان سمع كلام بسببي
محمد: ليكي العتبة حتى ترضي
نعيمة: رضيانة انا
امي: اخدت منك وعد ما تنسى
محمد: ما بخزلك ان شاء الله
امي: بثق فيكي انا . طبعا انا كنت ببكي بس وانا بسمع في امي وخوفها علي وزعلانة في نفس الوقت على محمد والكلام السمعتو ليهو امي لاني انا السبب في المشكلة الحصلت وانا السبب في مرضي بعدها امي اخدت قعدتها ومحمد قدمها للبيت ورجع وانا قومت دخلت الغرفة الزمن داك جا داخل كنت خجلانة منو بعد الحصل دا لبس ليهو حاجة مريحة وجاني
__ بلعتي ادويتك؟
_ بلعتهم
__ حلو . وطلع برا وجا داخل الغرفة بكيس فيهو كرتونة شكلو جابو مع الحاجات القبيل رجع بيهم ختاهو في الدولاب وكان بفتح فيهو انتظرتو خلص جا مدا لي قطعة شوكولاتة
__ لازم تعوضي السكر دا
_ محمد اقعد . قعد جنبي مديت ليهو ايدي نظام يدلكها لي وهو فهمني وبالفعل بدا يدلكهم لي
_ قبيل امي سمعتك كلام بسببي وخلتك تعتذر
__ بس كل حرف قالتو صح انا ما قدرت احافظ عليكي وانتي قدامي
_ بس المشكله الحصلت كلها بسببي انا
__ بس انا اهملتك ودي كانت النتيجة
_ امممممم
__ انتي ليه حساسة كدا
_ انا ما حساسة انا حساسة شديد . قام ضحك
__ حتتعبي معاي
_ اكتر من كدا؟
__ دي كانت غلطة ما بتتكرر تاني لو اتزاعلنا وان شاء الله ما تحصل حأقول ليكي هاكي اكلي وما تتكلمي معاي . قومت ضحكت
_ حلوة دي
__ ذيك كدا . عاينت ليهو مسافة
_ لسع شايفني حلوة؟
__ هو انا ياتو يوم ما شوفتك حلوة . نزلت رأسي بخجل يلا فتح لي الشوكلاته واكلتها وواصلنا ونسة شوية بعدها نومت
عد كم يوم وشوية شوية صحتي بدت ترجع ولفت الرأس خلتني والرجفان وقف شوية ومحمد يومي بدلكهم لي لمن نكون نتونس يعني فجأة بلقى نفسي مديتهم ليهو ويومي بديني قطعة شوكولاتة لمن في يوم قولت ليهو
_ محمد انا حيجيني سكري بسببك
__ هو وينو السكر الفي جسمك
_ قل هو الله أحد . قام ضحك
__ هو الناس بتسحر بالفي ولا المافي . ضحكني ضحك
بعد اسبوعين حددو العرس بتاع اهل محمد سافرت مع عمتي مريم بعد ما نزلت دخان ورسمت بمزاج وقشرت وشي وشيلنا الحواجب والجسم عشان ما يقولو مرت محمد غبشة حضرنا العرس بمزاج ورجعنا ........
29
بعد شهرين من الاحداث دي جا شهر رمضان شهر الفضل والقرآن بدينا تجهيز مع عمتي وعوسنا الابري مع ناس امي يعني بيتين وبدا الشهر كنا انا ومحمد بنطلع بعد الافطار بنصلي التواريح ومن هناك بنطلع نلف شوية وبنرجع ومرات بنطلع بالعربية في يوم كنت تعبانة ما قدرت امشي التروايح فصليت العشا في البيت وكنت قاعده في المصلاية محمد جا راجع من التروايح لقاني في مصلايتي وبسبح بأيدي
__ تقبل الله
_ مني ومنك . بعد خلصت كنت لسع قاعدة في المصلاية وبفكر وهو كان شغال بتلفونو
_ محمد
__ نعم
_ انت ليه يوم ما فتحت لي موضوع الخلفة الاتأخرت دي . كنت مدياهو ضهري يعني ما شوفت ريأكشاناتو فجأة لقيتو في وشو وقعد في الارض جنبي وحكر جنبي وفتح لي يدو نظام جيبي ايدك وبدا يدلك لي فيهو ذي كل مرة بنعمل
__ ليه عاوزاني افتح الموضوع دا
_ انت ما عايز اطفال مني
__ في زول بيأبى الاطفال وكمان من حبيبتو ؟
_ خلاص ليه ما قولت لي
__ عشان ما تزعلي ودي حاجة كاتبها لينا ربنا ما في ايدينا حاجة
_ احتمال انا ما بنجب
__ واحتمال انا
_ اممممم
__ والله ننتظر قسمتنا بس لو ربنا كاتب لينا الخلفة بنخلف صح؟
_ يعني ما زعلان
__ انتي عارفة حأزعل متين؟
_ متين
__ لمن انتي تزعلي وانا بعرف انت بتفكري في شنو عشان كدا ما حصل جيبت ليكي السيرة وتاني حاجة نحنا لسع في بداية حياتنا وانا لسع ما شبعت منك . وغمز لي ضحكت بخجل وضربتو في كتفو
_ محمد!!!
__ الله قولت حاجة غلط انا لسع عريس ما تميت سنتين هو انا معاي طفلة ناقص طفلة تانية؟ . عارفة بقول كدا علشان يخفف عني وانا بعاين ليهو بحب وهو بتكلم لمن اخر حاجه قام فوق وجراني وقفني
__ البسي عبايتك سريع عندي مهمة سايقك معاي
_ انا تاني ما طالعة معاك مهمة كافية المرة الفاتت . قام ضحك
__ قوي قلبك ياااخ انتي مرت ضابط
_ مرت ضابط ما قولنا حاجة بس ابوي ما قنعان مني
__ والله انا ذاتي ما قنعان . قولت ليهو بدراما
_ احيا انا يا نعيمة في نفرين ما قنعانين منك . قام ضحك ولبست عبايتي وطلعنا مشوار ورجعنا
بعد يومين ظهر ليهو مأمورية
_ في رمضان كمان ناسكم دا مالهم ياااخ
__ الواجب ينادي
_ واجبكم الما بنتهي دا . قام ضحك ومسح وشو في خدي
__ وين وطنيتك
_ اكلتها . قام ضحك شديد
__ بمناسبة الاكل ختي لي بسكويت . عاينت ليهو بسخرية كدا ضحك
__ والله جادي بحتاج ليهو
_ بسكويتة وحدة ما عندي ليك موش دا البسكويت الخلاك تخدر بي وانا نايمة . ضحك لمن مسك بطنو
__ والله اسفين ياااخ
_ المهم ماف بسكويت
__ لو راجلك جاهو هبوط انتي السبب
_ قدر حالك دا تقول هبوط ما بتخجل دقيقة محمد انت المأمورية حتآخد كم
__ ستة سبعة شهور كدا . لزيتو ووقفت في نص السرير وختيت ايادي في خصري
_ كمممممم
__ بسم الله مالك مسكونة انتي؟
_ اسمعني من هسي تلقى ليك مرا تنتظرك الفترة دي كلها
__ فيحاء قاعدة بنتظرني . خلاص هنا جن جنوني والغيرة شعلت فيني لانو ماف مرا بتقبل انو يجيب سيرة مرتو القديمة رجعت قعدت في السرير وفتحت ليك بيت البكاء
_ خلي فيحاء تنفع . اتخلع لمن شافني ببكي
__ حي بسم الله نينا كنت بهظر معاكي
_ مدام جيبت اسمها معناهو ما نسيتها ولسع عندك ليها حاجة وداير ترجعها بس ما قادر تقول لي . ما عرف يعمل شنو قام ضحك
__ لا بتهظري انتي صح؟
_ ما عارفة ما تتكلم معاي وخلي فيحاء تضوي ليك . مسحت دموعي وحمرت ليهو وقومت طالعة قام ينادي فيني ما رديت طلعت جا وراي لقينا عمتو في الصالة قاعدة ما قدر يعمل حاجة
عمتو: مالك بتبكي محمد عملت ليها شنو . سكت
عمتو: ستفي ملابسك ورح بيت ابوكي ولدي دا ما نافع اصلو . عاين لامو بصدمة
محمد: امي!!!! . انا ضحكت
نعيمة: كويس هسي بستف وانتي ذاتك ورح معاي نخلي ليهو البيت دا
عمتو: كويس ورح
محمد: انتو جادين؟
عمتو: ما تتكلم انت مالك يا بتي محمد عمل ليكي شنو زعلك
نعيمة: ببكي لانو طالع المأمورية بكرة وما معيد معانا دا السبب
عمتو: الحمدلله كنت قايلة انو زعلك هو ربنا يرجعك بالسلامة يا ولدي
محمد: امين يا رب . انا رجعت الغرفة طوالي وبقيت قاعدة بس جا قعد جنبي
__ نينا والله ما عارف انو حزعلي والله . كنت بعاين ليهو سرحانة بعيد واتذكرت انو ما حيعيد معانا
__ بتكلم معاكي
_ دقيقة ما حتعيد معانا صح؟
__ ما بيدي
_ خلاص زعلانة ما رضيانة ابدا وخلي فيحاء تنفعك
__ حتخليني امشي وانا زعلان منك؟ . قومت ضحكت
_ هسي الزعلان منو فينا
__ انا موش مرة قولت ليكي انا بزعل لمن انتي تزعلي؟ بس يلا دا هو
_ دا كلام جرائد بس . وضحكنا وقومت ستفت ليهو وما نسيت البسكويت والمرة دي جيبت استيكرات ملونة وكتبت ليهو ولصقت في البسكويت الصباح بدري ودعناهو وسافر وبعدها عدا ايام مشينا فطرنا مع ناس امي كم مرة ومشينا فطرنا مع زهراء خطيبة علي لاني صاحبتها وعزمت صحباتي لو متذكرينهم لمن رمضان لمن في اخر ايامو بدينا مع عمتي تجهيزات العيد وكنا فاقدين محمد وخبزنا بمزاج ولمن جيت اغسل الملابس لقيت جلابية محمد الكان مجهزها للعيد بس للاسف سافر خلاها قومت غسلتها مع الملابس مع انو عمتي قالت اخليها بس اصريت وخلاص بكرة العيد
___________
من جانب محمد
طلع المأمورية كالعادة وكان فاقد نعيمة وهظار وضحكتها بس مع الشغل بحاول يتناسى ولاحظ في نفسو انو شخصيتو اتغيرت 360 درجة بسببها وشخصية البرود ديك اختفت ودا كلو عشان خايف يخسرها و بتمنى انو ربنا يزرقو منها الاولاد عشان يكون في رابط قوي بينهم
بعد الافطار جا فتح شنطتو شال بسكويتة لقى فيها استيكر مكتوب فيهو " لو انت جنابو محمد انا مرتو" قام ضحك وقال هبلة بس بحبها ياااخ
واليوم التاني لمن شال وحدة لقى برضو استكير مكتوب فيها " اعشقيهو جنابو السايق البرادو بس انت سايق دبل قمين بس نصيبي اعمل شنو " كتاباتها دي كانت احلى ليهو من كلام الحب لانو دي بتمثل شخصيتها البحبها هو
واليوم التالت " برديسي انت بقيت ما بتحبني عارف ليه؟ لانو ما اخر مرة قولت لي بحبك في شهر العسل اصلا اتوقع من ضابط شنو وكمان ما اي ضابط " قال في سرو عمري كلو ما بكفي عشان احبك وحمد ربو انها في حياتو يعني بعد يوم متعب بجي يشيل استيكر ويقراهو مزاجو كلو بتعدل والتعب كلو بزول
اليوم الرابع " " سمحة الهيبة فوق جنابو شاكي الكاكي وخاتي كابو *** محدر الشال والطاقية الاسمر الختموهو ليا ***وفي كتوفو صقور ونجمة مجنونة فوق ضابط الحربية " قام ضحك وحسا كأنها جنبو كدا من كتاباتها بتحسسو كأنها حداهو
اخر وحدة مكتوب فيها " في سر كان لازم تعرفو وانت بعيد فنيلتك بتاعت الجيش انا شيلتها بالمكواة بدون قصد وختيتها تحت المرتبة والاتنين بقينا نفتش فيها وفي نهاية طلعتك انك بكون نسيتها في آخر مأمورية صفي قلبك اتجاهي لحدي ما ترجع بحبك " وجنبها رسمت ايموجي ببكي في الاول فتح عيونو من الصدمة وبعدها قام يضحك شديد لمن الضابط المعاهو عاينو ليو بأستغراب بعد قراها طبقها وختاها في جيب الشنطة ولمن طلع برا زميلو شافو لمن ختاها فضول منو جا شالها وقراها وضحك ولقى كم استكير قراهم وضحك وقال يا بختو جنابو محمد بيها ورجعهم مكانهم
محمد كان مبسوط انو حيرجع يوم الوقفة وحيعيد مع اهل بيتو كان منتظر عشان يشوف ردة فعل نعيمة رجع صباحية العيد مع آذان الصبح دخل براحة كانو نايمين ما صحاهم صلى الفجر وقال ما ينوم تاني انتظرهم عشان يصحو ......
__________
من جانب نعيمة
صحيت يوم العيد ولسع مغمضة عشان اجمع قعدت في طرف السرير وبهز في رأسي رفعت رأسي لقيت محمد قاعد في الجلسة وبعاين فيني فتحت خشمي بصدمة وفجأة صرخت لمن هو اتخلع ما اتوقع ردت فعلي كدا من الخلعة وقف فوق قومت جارية ليهو واتعلقت في رقبتو قام يضحك شديد زحيت عشان اتأكد منو
نعيمة: محمد انت حقيقة؟ . لسع بضحك
محمد: لالا خيال انتي هسي متعلقة في رقبتي كيف . تاني اتعلقت في رقبتو
نعيمة: وااااي ما مصدقة جيت متين . سمعت صوت عمتي بتنادي زحيت من محمد جات داخلة الغرفة وهي بتقول
عمتو: مالك يا بت الحصل ليكي شنو . اتخلعت لمن لقت محمد قاعد حضنتو
عمتو: جيت متين يا ولدي
محمد: جيت مع آذان الصبح قولت لعمتي بفرحة
نعيمة: امي مريم محمد حيعيد معانا . قام ضحك
محمد: ايي حأعيد معاكم ان شاء الله غسلتو لي جلابيتي . عاينت لعمتو وضحكنا الاتنين
عمتي: سبحان الله نينا غسلتها مع الملابس قولت ليها خليهو قالت لي ما مشكله لمن يرجع يلقاها نضيفة
نعيمة: باقي المكواة بس وبكويها ليك هسي . عمتي طلعت وانا كنت مبسوطة شديد برجعت محمد لانو العيد بلاهو شين قومت غسلت وشي وصليت وكويت لمحمد جلابية العيد وقومت فرشت البيت وبخرتو ومحمد لبس للصلاة وشيلت المبخر وجيت بخرتو وحصنتو
نعيمة: الجلابية يخلوها ليك انت بس والله
محمد: تسلمي لي حأمشي واجي اعيد ليكي
نعيمة: وانا منتظراك . وطلع للصلاة وانا استحميت ولبست جلبابي بتاعت الاستقبال المخصصاهو للعيد واتمكيجت بمزاج ومع الرسم واصلا ظبطت اللون دا بمزاج لانو اخوي عبدالله عرسو في العيد دا محمد رجع من الجامع ومشى عيد لامو وجاني حضني شديد وسلم لي في رأسي
محمد: كل سنة وانتي عيدي
نعيمة: كل سنة وانا معاك وحداك
محمد: ربنا يحقق جميع امانيكي يا رب
نعيمة: جمعا يا رب ويزرقني منك الذرية الصالحة
محمد: ان شاء الله يا رب
محمد: ايه الحلاوة دي كلها . مسكت اطراف الطرحة وبقيت بميل وانا بضحك
نعيمة: ايش رأيك . ورفعت ليهو حواجبي
محمد: الحلو دا كلو حقي انا . ضحكت بخجل
محمد: تعالي نتصور سيلفي العيد
نعيمة: طبعا للان ما وصلني سيلفي الجلابية اتخيل بس . قام ضحك
محمد: ولا حتى انا ما وصلني سيلفي التوب
نعيمة: حرم الا يوصلك والله . ضحك واتصورنا ومشيت لبست لي توب وتاني اتصورت معاهو بالتوب والعيد كان حلو معاهو
محمد: دي عيدية العيد . واداني قروش بتاعت العيدية
محمد: وهدية العيد في الدولاب
نعيمة: جيبتو متين وانت جيب قبيل بس
محمد: عندي اساليبي الخاصة . وغمز لي قومت ضحكت يعني ما نساني نهائي
محمد: نينا داير انوم ممكن
نعيمة: ممكن وبشدة . يحليلو راجع مع آذان الصبح لمن جا زمن الفطور ما صحيتو عشان يآخد كفايتو من النوم فطرنا انا وعمتي بس قومتو زمن الضهر عشان الصلاة وفطرتو وصلى واستأذننا انا وعمتو عشان امي عزمتنا جبنة العيد عندها مشينا عيدنا ليهم وشربنا معاها القهوة وقيلنا ومحمد جانا هناك واتغدينا معاهم بعد اصرار من امي وابوي ورجعنا بعد المغرب لمن غيرنا
__ ليه بقيتي حلوة كدا
_ يعني انا زمان شينة؟
__ لا بس حاسس انو بقيتي حلوة زيادة وفي حاجة متغيرة فيكي . قومت ضحكت لانو لاحظ التغييرات الحاصلة فيني
_ لازم لانو عرس اخوي عبدالله خامس يوم في العيد لازم اتظبط
__ وليه ما بتظبطي لي كدا طول السنة قاعد مع هارون . ضحكت شديد
_ لانو الما دايرك اغبش ما تتمسح ليهو . قام ضحك
__ اقتنعت
_ الحمدلله .
اليوم التاني طلعنا انا وهو عمتو زرنا الاهل وعيدنا ليهم وقاعدين بعد العشا فجأة بدون مقدمات محمد قام ودخل الغرفة وجا راجع وهو رافع الفنيلة بتاعت الجيش الشيلتو بالمكواة فتحت عيوني بصدمة.........