رواية شلة بنات الفصل التاسع عشر 19 والعشرون 20 بقلم شذى عبدالمكرم
مشيت الجامعة وحضرنا المحاضرة الاولى وطلعنا نفطر بعد خلصنا طبعا ملاحظة هديل زهجانة وزعلانة من الصباح حسيت انو في حاجة
روز: هولة في شنو
هديل: ماف حاجة
روز: كأنو ما بعرفك كدا ورح معاي
روز: بنات ماشيين الكافتيريا مع هديل عاوزين حاجة
قمر: لبان من عمو عيسى
روز: تمام . مشينا قعدنا في حتة هادئة كدا
روز: سامعة
هديل: اتشاكلت مع حمزة . وقامت لي المشكله وانا سمعتها للاخير
روز: انتي قولتي هيام قالت ليكي بس ما جات من حمزة شخصيا معناهو ما موافق
هديل: ما فكرت فيها
روز: لانك كنت زعلانة من الموضوع وكلامك دا زعل حمزة ولانو كلامك بوحي انك ما عاوزاهو ودا بجرحو
هديل: هسي اعمل شنو
روز: راضيهو وبعدها اسمعي منو الحكاية كاملة وما تنسي حمزة وعدنا وعد رجال مستحيل يكسر كلمتو صح؟
هديل: صح كلامك ما عارفة لولاكي كنت لسع زعلانة وما عارفة اعمل شنو
روز: حبيبي انا دايما موجوده هسي اتصلي ليهو انا برجع للبنات
هديل: تمام . ومشيت خليها شيلت لبان من عمو عيسى وراجعة شايفة سام واقف مشيت وراهو
روز: بحححح . التفت وقام ضحك
سام: يعني هسي المفروض اتخلع
روز: المفروض كدا بس انت ما بتحس
سام: لاني حسيت بيكي قبل ما تجي
روز: لالا ياااخ
سام: حصل كذبت عليكي؟
روز: كتير بس بالنية . قام ضحك
سام: ما حصل ياااخ
روز: لالا حلو يلا باي
سام : شنو سريع كدا
روز: انا اصلا جيت مارة وشوفتك قولت اخلعك بس فشلت
سام: تعالي هنا . مشيت خليتو ولوحت بأيدي بمعنى باي...
__________
من هديل
بعد كلام روز لقيت انو المفروض اعتذر من حمزة لاني دخلت ليهو بطريقة ما حلوة وبديت اجوط لمن حسى اني ما عاوزاهو قت مسكت تلفوني ورسلت ليهو رساله " ما رأيك أن نلتقي و نجعلُ القهوة عذرًا للقاء " وانتظرت دقيقتين كدا رد لي " شوية وحأكون عندك " قربت انط من الفرحة والله حمزة دا ما بستاهل انو ازعلو نهائي رجعت للبنات
روز: اها . وغمزت لي
هديل: ياااخ انا بحبك . ورسلت ليها بوسة جوية ردتها لي
قمر: في شنو
هديل: حب في الله بس . وقعدت بعد نص ساعة اتصل انو وصل
هديل: يلا بنات حمزة برا
روز: والمحاضرة
هديل: حمزة اهم . ضحكو فيني شيلت شنطتي وطلعت ليهو وركبت
هديل: كيفك
حمزة: تمام . وسكت وتاني ماف زول فتح خشمو لمن وصلنا كافي ظريف ونزلنا وطلب لينا قهوة وبقينا منتظرين
هديل: حمزة
حمزة: نعم
هديل: ما عاوز تحكي معاي
حمزة: منتظر قرارك . قومت من الكرسي مشيت قعدت في الكرسي الجنبو
هديل: عاوز تخليني؟
حمزة: انتي العاوزة ما انا . مسكت يدو براحة بتحت
هديل: والله عاوزاك يا حمزة . ما رد سكت ساي
هديل: حمزة بتكلم معاك
حمزة: نعم . شوفتو بارد كدا زعلت فكيت يدو وجيت اقوم من جنبو ارجع مكاني القبيل لمن وقفت فوق مسكني رجعني قعدت
حمزة: هديل انا موش وعدتك انو نتم زواجنا بعد التخرج بتاعك
هديل: ايي
حمزة: تاني الكلام شنو
هديل: اسفة
حمزة: ما عاوزك تعتذري بس عاوز منك شوية تمسك وثقة
هديل: والله يا حمزة واثقة فيك ومتمسكة بيك حتى لو قولت كان ما نعقد عشان ما تقول لي نتم العرس عشان الجامعة بس لو في الخيار حأختارك انت اصلا في النهاية والله
حمزة: خلاص الخيار عندك حاليا انو نتم العرس هسي او تتخرجي و اي واحد يشوف اتجاه . عاينت ليهو بزعل
هديل: مهما كانت الظروف حأختارك انت اصلا . سكت مسك يدي وسلم عليها
حمزة: هديل انتي عارفه انو انا بحبك صح؟
هديل: عارفة
حمزة: يبقى كمان عارفة انو مستحيل ازعلك صح؟
هديل: عارفة
حمزة: بس خلاص انا ما فتحت ليكي الموضوع لاني قفلتو مع ابوي صح اتناقشنا فيهو وقال ما صح فترة العقد تطول بس فهمتو بطريقتي الخاصة وقفلنا السيرة على كدا بس اكيد هيام وصلت ليكي الكلام اصلا دي امور بنات بس . قومت ضحكت
هديل: انت عارف انك احلى راجل في الدنيا
حمزة: وتاني
هديل: واحن والطف راجل انا قابلتو
حمزة: وتاني
هديل: وتاني انا بحبك
حمزة: ما اكتر مني . قعدنا شوية
حمزة: ليه يااخ هي قهوة ولا شنو لمن تتأخر كدا
هديل: كدة ناديهو . ناداهو واعتذر انو نسى فقولنا ليهو عادي وجابو لينا قهوة مسكت ايد حمزة وصورتها مع ايدي هووي راجلي ما تنسو وبعدها شربنا القهوة بمزاج.......
__________
من جانب ريان
كنت ما عارفة نوع علاقتي بريان دي نهائي لانو غامض ما عرفت مشاعرو اتجاهي شنو قولت اغيب يومين عشان يفقدني او اشوف مدى تأثيري عليهو عدت تلاتة ايام لمن فقدت امل بس اتصل لي
_ شنو يا توأمي وين مختفية . جات فكرة في بالي
__ قاعدة بس كنت بستخير
_ بتستخيري لشنو
__ جاني عريس وكدا
_ جد كدا
__ ايي
_ ايوااا ما شاءلله الف مبروك مقدما . خزلني بردو دا
__ دا كلامك؟
_ ليه كلامي فيهو حاجة؟
__ لالا ما فيهو الله يبارك فيك وعقبالك
_ امين يارب
__ ريان بستأذن منك امي بتناديني
_آخدي راحتك
__ شكرا . وقفلت منو كسرني كلامو دا وهنا عرفت انو ما عندو لي حاجه وانا من البداية عارفة بس بقنع في روحي العكس بس خلاص عرفت بقيت ابكي على روحي
___________
من جانب روز
في يوم قاعدين الشلة كلنا وجانا سام ومراد قعدو معانا وبقينا نتونس
مراد: نبأ في معرض للكتاب في...... رأيك شنو تمشي معاي . نبأ ما باقي ليها الا تطير من الفرحة
نبأ: تمام بس متين
مراد: نهاية الاسبوع دا
نبأ: تمام
سام: انتو الاتنين ديل لو عصروكم بطلعو كتب . ضحكنا كلنا
قمر: والله صح
روز: دي اسمها ثقافة
نبأ: كلميهم
مراد: خليهم ديل ما بفهمو في الحاجات دي عشان كدا كلمت نبأ بس
سام: فولة وانقسمت . سام بجدع في الكلام بس
نوسة: رينو انتي ريان وين خليهو يجي
ريان: ما عارفة وين . كانت زعلانة استغربنا فيها
نوسة: ما متواصلة معاهو؟
ريان: لا . فجأة تلفوني رن بالتذكير السنوي
روز: الليلة يوم كم
قمر: يوم •••••••
روز: اووو يعني تلفوني ما كذاب نسيت المفروض اقابل الدكتور
سام: عيانة؟
روز: عندي فحوصات سنوية لازم اعملا
سام: ليه
قمر: لانو روز مناعتها ضعيفة حتى لو ما حاسة بحاجة بتفحص كل سنة وبتجي لينا بمرض جديد . قومت ضحكت
روز: ما هو احسن اعرف المرض قبل ما يقتلني ويحيركم بعدين
نبأ: لا ان شاءلله تكوني سليمة المرة دي
سام: لا دقيقه كدا خلوني افهم ليه ما حصل حكيتي لي بالموضوع دا
روز: لاني بنسى لو ما كدا ما بعمل التذكير السنوي
سام: ولمن تفحصي بظهر ليكي امراض؟
روز: مرات
سام: قومي خليني اوصلك المستشفى
روز: ماف داعي بمشي براي وبعدين رامي برجعني نوسة تمشي معاي؟ ومنها تشوفي رامي
نوسة: تمام
سام: خلاص بوصلكم ماف اعتراض . لمن شوفتو مصر وافقت
روز: تمام خلاص . قعدنا شوية واستأذنا وطلعنا ونحنا في العربية
سام: هسي حاسة بشنو . قومت ضحكت
روز: سام انا نصيحة ما فيني حاجة بس الفحوصات دي روتين ثابت
سام: تمام . وصلنا المستشفى
سام: ادخل معاكم؟
روز: لالا رامي حيكون موجود
سام: تمام بس لازم لمن تخلصي تضربي لي
روز: حاضر يلا باي . ودعناهم ودخلنا المستشفى سألنا من الاستقبال من دكتور رامي قالت موجود طوالي مشينا مكتبو البت البدخل الناس ليهو
البت: دكتور مشغول حاليا مع مريض
روز: حيخلص متين
البت: عندكم مقابلة؟
روز: لا
البت: يبقى تحددو موعد وتجو فيهو لانو دوامو قرب يخلص خلاص
روز: نحنا ما جينا عشان مقابلة
البت: وخلاص ليه
روز: لمن يطلع المريض دا نحنا حندخل
البت: ما ممكن
روز: ما تخافي ما حنفضل كتير دقيقتين بس وطالعين
البت: للاسف ما ممكن
روز: تمام . قعدنا في الكراسي الجنب الباب وبقيت احمر للبت
روز: تقول امشي اكلها بأسناني
نوسة: هسي البحصل شنو
روز: يطلع المريض الجوا طوالي ندخل بس
نوسة: تمام . انتظرنا المريض طلع بس قومنا دخلنا
رامي: نوسة وروز . طوالي البت جات داخلة ورانا
البت: دكتور رامي كلمتهم ما يدخلو بس غفلوني ودخلو . قومت ضحكت
روز: يا بتي اختو ومرتو عاوزين يشوفو خمسة دقايق فيها حاجة
رامي: عرفان تمام الموضوع عندي انا
البت: معليش ما كنت عارفه . وطلعت
روز: بت غبية خلاص
رامي: دي شنو المفاجأة الحلوة دي
نوسة: بس خربتها عرفان وخرفان دي ما عارفة . قومنا ضحكنا
رامي: اقعدو . وقعدنا
روز: شايفينك مشغول شديد
رامي: يعني بس الليلة خفيف شوية وحأطلع
روز: ايواااا حلو وانا جيت عشان الفحوصات السنوية
رامي: اي صح دي مواعيدها
روز: اي
رامي: خلاص قومي ورح معاي
نوسة: انا حأنتظرك هنا مصدعة شوية . رامي مشى هبش جينيها
رامي: ماف حرارة انتي كويسة؟
نوسة: كويسة بس شوية صداع . طلع ليها بندول من الدرج حقو واداها موية من الكولر جوا المكتب بلعتهم ونحنا طلعنا مشيت عملت جميع الفحوصات وعشان رامي معاي ما وقفت في الصف اخدنا ذي نص ساعة عشان كم فحص هم حتى رجعنا لقينا نوسة متكية رأسها وفي الكرسي القاعدةة فيهو ونايمة رامي مشى عليها تاني هبش جينيها
رامي: هي ما عيانة صح؟
روز: لالا
رامي: الحمدلله . مشيت بالراحة صحيتها خجلت من رامي هو ابتسم ليها
رامي: كيف من الصداع
نوسة: راح الحمدلله
روز: رامي انت خليك مع المرضى بتاعينك شغلناك منهم نحنا بستأذن
رامي: باقي لي تلاتة بس تقدرو تنتظروني انا برجعكم . عاينت لنوسة هزت لي راسها
روز: تمام . طلع معانا برا
رامي: عرفان وديهم ميز الدكاترة
عرفان: حاضر . وصلتنا الميز غرفة حلوة قعدنا نتونس فيها لمن رامي خلص وجانا وطلعنا اتغدينا برا ورجعنا البيت اتصلت لسام طمنتو سألني من التقارير كلمتو انو رامي بكرة حيستلمهم وعلى كدا انتهى اليوم ..........
20
مرت الايام بخيرها وشرها والشلة ذي ما هي ماف جديد ابدا بس سام كان مضغوط شديد لانو اخر سمستر ليهو وعندو كمية تصاميم كان لازم ينجزها كنت بحاول اطمنو واقيف جنبو في يوم الجمعة قولت لنوسة تجيني وبالفعل جات مع امها ومعاهم الفطور بتاعهم وخلو ميدو مع ابوهو وفطرو معانا وعملنا الشاي وخلينا امي وامها بتونسو دخلنا غرفة البنات
روز: دايرة اعمل لسام بسبوسة تساعديني فيهو لانك بتعرفي ليها
نوسة: جدا حبيبتي بعد شوية نمش السوبر ماركت نجيب الحاجات المحتاجين ليها
روز: شكرا حبيبتي
نوسة: انتي هبلة
نوسة: طبعا دكتور رامي نايم كالعادة
روز: بتعرفي راجلك بصحى قريب للصلاة
نوسة: بعرف . قعدنا شوية استأذننا من امي وامها وطلعنا السوبر ماركت وجيبنا الحاجات المحتاجين ليها ورجعنا ودخلنا المطبخ وبدينا فيها وهي قاعدة تعلمني بعملوها كيف عشان المرة الجاية اعملها براي جا رامي المطبخ كالعادة عشان ارص ليهو الفطور
رامي: روز الفطور
روز: صحا النوم
نوسة: اهل الكهف صحو اخيرا
رامي: نوسة انتي هنا
نوسة: ممكن تقول اي
رامي: قاعدة تعملي شنو هنا . كان ما مجمع
نوسة: انت بتطردني من بيتكم ولا شنو . مسح وشو
رامي: لا ما كدا بس مستغرب
نوسة: لا انت طردني روز مع السلامة بينا تلفونات . وقامت مشت اتجاه الباب محل هو واقف وهو اعترض طريقها
رامي: لا والله ما كنت قاصد كدا انتي فهمتيني غلط . طبعا انا فاهماها انو حركات منها بقيت اضحك بس
نوسة: روز موش طردني
روز: ايي رامي انت كيف تقول ليها بتعملي هنا شنو دا سؤال ليك
رامي: يداب صاحي ما مجمع
نوسة: انت ما عارف مرات الزول لمن يقول كلام وهو ما مجمع ممكن يجرح الزول التاني بدون قصد . وعملت فيها زعلانة وانا دايرة اضحك بس مسكتها
رامي: خلاص بعتذر على الحصل بس ما تمشي . قومنا فكينا الضحكة
روز: نوسة لعبتيها صح . وضحكنا تاني وجات ضربنا ايادينا ببعض وهو مستغرب
روز: دي حركة منها بس ومشت عليك معليش يا رامي . عاين اتجاه نوسة كانت بتضحك
رامي: يعني مشت علي؟ . نوسة هزت رأسها بمعنى ايي
رامي: تمام . وقام طالع من المطبخ
نوسة: دا زعل بالجد
روز: احيا انا
نوسة: البحصل شنو هسي
روز: برضى براهو
نوسة: لالا يا روز ياااخ . وكانت متوترة وخايفة على زعلو
روز: ورح نراضيهو
نوسة: ورح . مشينا غرفتو واعتذرنا ليهو بس خشمو ما فتحو معانا حنسناهو كدا برضو ما نفع نوسة ما باقي ليها الا تبكي بس
روز: رامي نحنا ما عملنا حاجة قدر داك لمن تزعل كدا وانتي التانية كمان ما تبكي ما بستاهل اصلا . لمن قولت ما تبكي هو عاين اتجاها شافها بالجد قربت تبكي
رامي: هو انا اصلا ما زعلت بس حبيت اكفي حقي بس ما عرفت انو حتبكي . وقام ضحك هي طوالي فكت البكية كأنو قاعدة على الهبشة كمان بقينا نراضي فيها نحنا الاتنين
روز: انتو الاتنين عولاق ساي ماشة اشوف محل بسبوستي بوين اقعدو راضو في بعضكم . ضحكو فيني طلعت خليتهم
__________
من جانب نوسة
روز قنعت مننا وطلعت خلتنا
رامي: انتي ليه دموعك قريبة كدا
نوسة: ما عارفة ما بحب زول يزعل مني
رامي: حساسة شديد ومن هسي حاولي امسكي دموعك كويس لانو حتتعبي معاي لو كدا
نوسة: دا تهديد ولا شنو
رامي: هو في زول بهدد روحو؟ . طوالي فصلت قام ضحك ضربتو
نوسة: ما تضحك
رامي: خلاص ما بضحك
نوسة: خليني اشوف روز
رامي: وخليها ترص لي الفطور والله ميت جوع شوية ويغمى علي .قومت ضحكت
نوسة: ما بغمى عليك ولا اي حاجة
رامي: انتي ما بتعرفي بس . اتحركت من جنبو اطلع من الغرفة بس فجأة وقع في السرير على ضهرو نظام اغمى عليهو . ضحكت شديد على استهبالو وطلعت مشيت لروز
نوسة: رصي لرامي الفطور وانا بشوف البسبوسة
روز: تمام ......
___________
من جانب هديل
بعد المشكلة الحصلت لي مع حمزة الوضع بيناتنا اتصلح شديد ونسيت الموضوع بس قبل يومين حاسة بحمزة ما تمام حاولت معاهو ما كلمني ابدا بقول لي مشاكل في الشغل بس حاولت اصدق ما قدرت لانو الشغل ما بعمل كدا وطبعا خلص البيت
حمزة: ضرب لي المهندس انو البيت خلص خلاص
هديل: الحمدلله
حمزة: حأضرب للكهربجي انو يوصل الكهربة
هديل: ما بدري شوية على الكهربة
حمزة: ما مشكله خليهو يوصلو عشان الطلاء وكدا لازم الاسلاك تدفن جوا الاسمنت
هديل: ايوااا لو كدا تمام انت كيفك وان شاءلله حليت مشاكل الشغل
حمزة: الحمدلله
هديل: بس حاسة بيك ما تمام ليه
حمزة: انت تمام بس متين تخلصي الجامعة دي
هديل: باقي لي سنة بس
حمزة: تمام هدولة عاوز انوم بتصل عليكي بعدين تمام
هديل: تمام . وقفلنا بقيت افكر وانا متأكدة انو في حاجة حاصلة بس اعرف كيف يا الله ما عرفت شوفت احسن حل اتصل لروز اكيد بلقى الاجابة منها بالفعل اتصلت عليها وسلمت عليها
هديل : روز لو فاضية دايرة اتكلم معاكي
روز: فاضية حبيبتي احكي
هديل: بخصوص حمزة
روز: مالو حمزة
هديل: حاسة انو حاصل معاهو حاجة بس ما عاوز يكلمني بقول لي مشاكل في الشغل بس انا متاكدة انو في حاجة
روز: ويمكن بالجد مشاكل في الشغل
هديل: بس ما بخليهو كدا ما اول زول تحصل ليهو مشاكل في الشغل
روز: اسأل هيام احتمال في مشاكل في البيت
هديل: ما فكرت فيها شكرا حبيبتي
روز: العفو اسأليها ووريني الحصل معاكي
هديل: تمام . قفلت منها انا ليه ما فكرت في هيام يمكن عشان كنت مشوشة شويه قعدت جمعت كدا واتصلت لهيام وسلمت عليها وسألتها من ناس البيت وكدا بعدها دخلت ليها في الموضوع
هديل: هيام حابة اسألك
هيام: اتفضلي
هديل: معليش لو سؤال فيهو شوية فضول بس حاصلة عندكم مشكلة في البيت؟
هيام: كيف يعني
هديل: لا بس لانو حمزة دا حاساهو ما طبيعي
هيام: ما بقول مافي بس المرة الفاتت بسببي حصلت بيناكم مشكلة
هديل: بالجد اسفة عشان المرة الفاتت
هيام: انا البعتذر لاني اتسرعت
هديل: لالا عادي هسي الحاصل شنو
هيام: والله يا هديل حمزة دا اتناقش مع ابوي كم مرة بسبب عرسكم دا وابوي بقول ليهو لازم تتم عرسك ما صح يطول العقد كدا وبعدها حمزة اقنعو انو دايرك تتمي الجامعة واهو بعدها امي كمان اتدخلت وانو عادي تتمها في بيتها مدام انت جاهز وهو مزعوج من الحتة دي وهم ضاغطين عليهو
هديل: ايوااا حبيبتي فهمت عليكي
هيام: بس حمزة ما عاوزك تعرفي
هديل: ما حيعرف انو انا عرفت عشان ما اعمل ليكي مشكلة حبيبتي
هيام: شكرا حبيبتي
هيام: اها كيف لقيتي حياة الجامعة. طبعا يداب برلومة واتكلمت معاها وحكت لي بجامعتهم وبعدها قفلنا.
يعني دا سبب زعلو ياااخ ليه هم يتدخلو في حياتنا نتم عرسنا وقت عاوزين الحاجة دي نقررها نحنا الاتنين وحمزة ما كلمني لانو هو وعدني وهو هموم الدنيا دي كلها عليهو ما عارفة اخفف عنو كيف بس........
_________
من جانب روز
خلصنا البسبوسة بمزاج وطلعت حلوة شديد وزيناها وطبعا عملت صينيتين وحدة لسام والتانية لناس البيت ودينا لناس امي وحق سام رصيتها في علبة واتصلت ليهو
_ سيمو
__ عيوني
_ جمعة مباركة
__ علينا وعليكي تتبارك ايامك يا رب
_ وايامك يا رب اها قاعد تعمل في شنو
__ برسم بس كالعادة وقايم اجهز للصلاة
_ يحليلك حبيبي
__ تحلا ليكي العافية
_ بعد تمشي الجامع بعد شوية ضروري تجيني بجاي عاوزة اشوفك
__ ضروري ضروري ما فينا نأجلها لبكرة
_ لالا ما فينا وضروري بعد الصلاة اوكي
__ اوكي . وقفلت منو وقعدت اكل البسبوسة مع نوسة ونتونس وبعد الصلاة سام اتصل لي انو قرب علينا لبست توبي وطلعت وخليت نوسة تغطي لي انو مشيت الدكان اجيب قهوة وبالفعل طلعت الزلط لقيتو واقف لي نزل سلم علي
__ اول مرة اشوفك بتوب
_ و اخر مرة
__ في بيتنا حتلبسي تياب . سكتا ساي من الخجل
_ امسك . ومديت ليهو العلبة
__ دي شنو
_ بسبوسة عشان تديك طاقة للرسم
__ ياااخ انتي ذاتك بسبوسة . ابتسمت بخجل كدا
_ يلا انا بمشي
__ ليه سريع كدا اركبي خلينا نلف شوية
_ نلف شنو هووي يا سام بدربك دا للبيت وراك رسم وهسي انا اخدت من زمنك
__ والله لو تأخدي زمني كلو ما عندي مشكله
_ لمن تخلص اخر سمستر دا حأخد زمنك كلو بس هسي لا
__ خمسة دقايق بس عليك الله
_ سام لا
__ رزة نآخد لفة بس وبرجعك
_ لفة بس؟
__ لفة بس . ركبت معاهو ولفينا كدا تلت ساعة وانا بقول لفة بس
_ سام يلا رجعني
__ تمام . بالفعل رجعني جنب السوبر ماركت ودعتو ودخلت شيلت بن ورجعت البيت وانا ببتسم ساي
نوسة: بديهو البسبوسة بس وبرجع . قومت ضحكت
روز: ما هو اديتو البسبوسة بس ورجعت
نوسة: متأكدة اديتيهو البسبوسة بس ورجعتي؟ . قومت ضحكت وقرصتها
روز: تافهة . وضحكنا وقليت البن وهي دقتو
نوسة: انتي عارفة حاجة
روز: شنو
نوسة: عاوزة الم قروش اشتري لميدو دا بلاستشن 4 نفسو فيها بس ابوي ما عاوز يشتريها ليهو بحجة بشغلو عن القراية مع انو ميدو ما بهظر في قرايتو وهو اصلا مع قلبو دا ما بلعب مع الاولاد
روز: حيا قلبي انا يا ناس
نوسة: مقررة اجمع من مصروفي اشتريها ليهو ان شاءلله عشان افرحو
روز: حأساعدك انا
نوسة: لالا حأشتريها انا براي
روز: يا هبلة انا وانتي واحد
نوسة: عارفة بس خليهو . سكتا لانها عنيدة
بالليل اتصلت لي هديل بتستشيرني في موضوع عن حمزة اديتها حل وقولت ليها تكلمني بالحصل بعد قفلت منها سام اتصل لي شكرني للبسبوسة وانها عجبتو وعدتو انو كل فترة اعملها ليهو ..............
__________
من جانب نبأ
مراد دي كانت الشخصيه الانا ببحث عنها والشخصية البتشبهني شديد والفضل في تعرفي عليهو هي روز ما قصرت خلقت لي كم موقف معاهو واتقربنا من بعض وحتى عزمني ومشينا حضرنا معرض الكتاب كنت مبسوطة شديد وطبعا تواصلنا ما شديد بالاخص في الفترة الاخيرة دي لانو خريج والضغط بقى كتير عليهو بس كنت بحاول انو اهتم بيهو بسأل من تفاصيلو وبسألو من قرايتو وكدا عشان كنت خايفه من حتة انو ينساني بحاول انو القى مساحة في حياتو بس كان شوية صعب علي لاني شخصية بتحب الهدوء وحتى مراد كذلك بس عشان مراد كنت بحاول اكتر وبتمنى انو يلاحظ الانا بعملو عشانو.........