رواية شلة بنات الفصل الواحد والعشرون 21 والثاني والعشرون 22 بقلم شذى عبدالمكرم
يوم الاحد مشيت الجامعة وحضرنا المحاضرة عادية وقعدنا ريان كانت جنبي ميلت عليها
روز: ريان انتي ريان وين
ريان: قاعد
روز: ما قاعدين تتلاقو . هزت لي رأسها بمعنى لا وكانت زعلانة
روز: ليه الحصل شنو بينكم . قامت حكت لي موقف الخطوبة
روز: وانتي ما رجعتي نفيتي الموضوع؟
ريان: ابدا لانو ما سألني تاني او ممكن نقول تواصلنا انقطع اصلا عرفت انو ما عندو لي حاجة
روز: او ممكن تقولي انتي دمرتي الحاجة دي بالخطوبة المزيفة
ريان: دا حتى ما قال حاجة غير الف مبروك اتخيلي ياااخ دا ولا بحبني ولا حتى واحد في المية وانا ما بقدر واهو من بعدها انسحب والحمدلله عرفت مشاعرو اتجاهي شنو عشان ما اتعلق اكتر مع انو اتعلقت بس حأتجاوزو
روز: حتلقي الاحسن منو ان شاءلله
ريان: ان شاءلله
اتصل لي سام
__ فاضية؟
_ ايي في شنو
__ ماشي جامعة....... فيكي تمشي معاي ومنها اشوفك بالمرة
_ جدا
__ نتلاقى عند البوابة . استأذنت من البنات وطلعت ليهو طبعا لمن يجي الجامعة بحضر محاضراتو وبكون اليوم كلو جوا المرسم بس ما قاعدة القاهو بس اهو فرصة طلعت للبوابة لقيتو واقف لي وركبنا
__ تصدقي اشتقت ليكي بس ذي ما عارفة معمار وضغطو الكتير دا
_ عارفة والله لمن بقيت ضعيف
__ يعني بالجد بقيت ضعيف؟ حتى امي قالت لي نفس الكلام
_ كلامها صح والله ما قاعد تأكل ولا شنو
__ والله يا رزة لو قولت ليك زمن للنفس ذاتو ما عندي خلي الاكل
_ كدا ما صح حتخصم من صحتك لازم تأكل عشان ما تقع
__ ان شاءلله
_ سام
__والله حأكل خلاص
_ تمام
__ انتي كيف مع محاضراتك
_ ماشي حالها الحمدلله
__ متين بس السمستر دا يخلص
_ كلها شهر بس وحتخلص
__ المشكله وما بعد السمستر
_ البحث و دا روحك حتطلع فيهو
__ ان شاءلله يعدي
_ انت عارف انا من ناحيتك ما خايفة نهائي وعارفة انك حتقدر ليها
__ ان شاءلله بس ومع دعمك دا متأكد حأجتازو بأذن الله
_ ان شاءلله . وصلنا الجامعة ودخلنا واتصل للزول وجا واخد الحاجات الهو عاوزهم كانت عبارة عن ادوات واوراق وحاجات بتعلق بالمعمار وطلعنا في الطريق
__ عاوزة حاجة؟
_ حاجة ذي شنو مثلا
__ ما عارف اي حاجة
_ لا ما عاوزة حاجة
__ اشيل ليكي ايسكريم في طريقنا؟
_ لا خلينا نرجع عشان تلحق تواصل الخليتو
__ ما بنتأخر نشيلا سفري
_ ممكن خلاص . في اقرب محل ايسكريم وقف ودخل شال لي سفري وجا
_ وانت حقك وين
__ انا ما عاوز حاسي بمبادئ لوز كدا
_ من بتين
__ من امس
_ نومت في السخانة؟
__ ايي
_ خلاص دا السبب استعمل مضاد حيوي
__ان شاءلله
_ سام عليك الله اهتم بروحك عشان ما ازعل منك والله
__ حاضر من عيوني
_ ما يبقى كلام ساي
__ لا حأهتم والله
_ لا انت ما بتعمل حاجة بعد دا انا بتصرف . قام ضحك
__ حتتصرفي كيف
_ انت ما عليك انا بعرف
__ خلاص تمام . وبقيت اكل في ايسكريمي و رجعنا جامعتنا هو مشى على المرسم وانا رجعت للبنات
روز: بنات في وحدة معاها مضاد حيوي
قمر: انا معاي
روز: اديني ليهو . ادتني
روز: هديل ورح معاي . قامت معاي مشينا كلية معمار ووصلنا المرسم اتصلت لسام طلع لينا برا سلم على هديل
روز: هاك . مديت ليهو موية والمضاد قام ضحك
سام: شكرا
روز: ابلعها قدامي
سام: ما واثقة فيني ولا شنو
روز: لو واثقة فيك ما كان جيت لحدي هنا . ضحك تاني وقام بلع الحبوب
روز: يلا ارجع
سام: حاضر . ورجع وانا وهديل رجعنا
هديل: انتو حلوين ياااخ
روز: ما احلى منكم انتي وحمزة
هديل: تسلمي حبيبتي
روز: انا جيبتك معاي عشان اعرف عملتي شنو . وقامت حكت لي الحاصل
هديل : وهسي ما عارفة اعمل شنو
روز: حيا دي عوجة والله
هديل: هو مهموم ومضغوط من كل الاتجاهات بس ما عاوز يقول لي
روز: لانو وعدك
هديل: لي يومين بفكر اعمل شنو
روز: قلبك بقول ليكي شنو
هديل: روز انا لو تميت العرس في الاجازة الجاية دي هل حأقدر اكمل الجامعة
روز: دفعتنا فيها كم وحدة متزوجة؟
هديل: نصهم بس انا خايفة ياااخ ونفس الوقت ما عاوزة حمزة يكون مضغوط كدا
روز: هو بحبك شديد عشان كدا مخليكي على راحتك
هديل: عشان بحبني عاوزة اتنازل بس هل حأندم
روز: هي كلها سنة بس
هديل: صح كلامك ويمكن في السنة دي نقة اهلو تزيد عليهو احسن نعمل العرس بس استشير امي لو موافقة
روز: حلو . ورجعنا للبنات وانا قلبي مع سام وانو هو مهمل لصحتو وفي نفس الوقت بضغط على نفسو شديد
__________
من جانب هديل
الكلام مع روز ريحني شوية فقررت احكي مع امي بخصوص العرس واشوف رأيها شنو لمن رجعت البيت ولقيت فرصة معاها
هديل: امي دايرة استشيرك في حاجة
امي: في شنو . حكيت ليها بالراحة الحاصل ما حبيت انو اخبي عنها حاجة حكيت ليها بالتفاصيل الحاصل كلو
امي: والله يا بتي صح كلامهم ما تخلو العقد يطول كنت دايرة اسألك بس قولت انتي متفقة مع راجلك ما حبيت ادخل بينكم
هديل: هو ما قال لي عشان نحنا اتفقنا على العرس بعد تخريجي
امي: ايوااا فهمت عليكي لكن هل هو جاهز؟
هديل: حمزة ما عندو مشكله حتى انو البيت خلص وبدأ في الكهربة
امي: كويس والله وانتي مشكلتك شنو
هديل: امي هل بقدر على البيت مع الجامعة
امي: انا لمن اتزوجت كنت في الجامعة قريت تلاتة سنة وانا متزوجة
هديل: بس انتو جيلكم ما ذي جيلنا امي
امي: انتو طايشين شوية عيال الجيل دا بس لو حريفة بتقدري على تلاتة بيوت مع الجامعة
هديل: شايفة كدا؟
امي: والله يا بتي تمي عرسك سنة بعيدة
هديل: خلاص تمام بكلم حمزة ونتفق بعدها هو بكلم ابوي
امي: تمام
بالليل اتصلت لحمزة وسلمت عليهو
_ حمزة فاضي عشان عاوزة احكي معاي في موضوع ضروري
__ دايما فاضي ليكي
_ حمزة انت جاهز؟
__ من ياتو ناحية
_ انو نتم عرسنا
__ بس عرسنا لسع قدامو سنة وحاجة
_ لو جاهز نعملو في اجازة سمستر الجاي دا
__ كيف يعني
_ حمزة انا عارفة انو اهلك ضاغطين عليك في موضوع العرس وانا شايفة انو معاهم حق ما نخلي فترة العقد طويلة خلينا نتم عرسنا
__ هديل موضوع انو العرس بعد تخريجك دا موضوع وانتهى
_ لا خلينا نعملو في اجازة سمستري الجاي دا لو جاهز
__ حاجة انتي ما رضيانة عنها ما بعملا
_ والله رضيانة وحتى كلمت امي وهي موافقة قالت لو حمزة جاهز بس
__ انتي بتعملي كدا عشاني صح
_ عشانا الاتنين وعارفة انتي متحمل عشان ما تزعلني بس وانا خايفه انو ما اقدر اوفق بعد الجامعة والبيت بس انت معاي ودا مطمني
__ والله ديما حأكون معاكي
_ خلاص خلينا نعمل عرسنا
__ انتي متأكدة ما زعلانة؟
_ نهائي وكونو اتلمى معاك في بيت واحد دا عندي ليهو بالدنيا
__ والله بوعدك حأسعدك دايما
_ دي حاجة انا واثقة فيها
__ والله انا بحبك شديد يا هديل وان شاءلله حأعمل ليكي العرس ذي البتحلمي بيهو ان شاءلله
_ ربنا يخليك لي . وقعدنا نخطط حنعمل شنو وتجهيز البيت وكدا وهو كمان مبسوط كأنو حمل وانزاح عنو وانا كنت مبسوطة لانبساطو حمزة يستاهل انو اتنازل عن الجامعة عشانو .......
22
هديل قررت تعمل عرسها بعد السمستر دا ونحنا وقفنا جنبها وانو قرارها صح عشان ما تزعل وكنا مضغوطين مع الجامعة شديد لانو امتحاناتنا قربت خلاص وسام مضغوط كنت بتصل ليهو في مواعيد الاكل وبجربو يخلي الفي يدو ويمشي يأكل ويرجع يواصل كنت بتعب معاهو لانو عنيد في النهاية بسمع كلامي لاني بهددو بالخصام
في يوم رجعت بدري من الجامعة وقاعدة اقرا اتصل لي رامي
رامي: روز انتي مع نوسة في يوم كنتي بتكلمو عن حاجة نوسة كانت عاوزة تشتريها لميدو
روز: ما فاهمة عليك
رامي: كنتو في المطبخ يوم البسبوبة جيت ماري بس ما سمعت كلو في حاجة عاوزة تشتريها لميدو كأنو لعبة ولا حاجة بالشكل دا
روز: هاااا اتذكرت بلاستيشن 4
رامي: تمام
روز: عاوز تشتريهو
رامي: ايي انا في محل الكترونيات واتذكرت
روز: اقسم بالله يا رامي انا بحبك ياااخ ميدو حيفرح شديد
رامي: تمام نمشي مع بعض نوديهو بعدين
روز: تمام . قفلت منو وكنت مبسوطة شديد لانو ميدو حيفرح ياااخ وتلقائيا نوسة حتفرح بقيت منتظرة رامي بفارق الصبر جا البيت العصر ومعاهو البلاستيشن وجاب لريل ورايس العاب كدا عشان ما يقولو نساهم وجاني جوا
رامي: الشهر الجاي لمن اصرف حأغير ليكي تلفونك
روز: احلف
رامي: والله . انبسطت شديد بالخبر دا يعني حانزل الجامعة بتلفون جديد
المغرب كدا اتجهزنا انا وريل ورايس ورامي ومشينا عليهم فضلونا وقعدنا والكيس كان جنب رامي وفيهو كرتونة كبيرة
رامي: ميدو تعال جنبي هنا . جا قعد جنبو
رامي: جيبت ليك هدية حلوة حنفتحها هسي تشوفها بس تلعب بيها في الاجازة تمام
ميدو: تمام . طلع الكرتونة من الكيس وختاها في رجل ميدو
ميدو: دا بلاستيشن 4؟ . رامي هز ليهو راسو بمعنى ايي ميدو ختاها بالجنبة وحضن رامي شديد لمن ببكى
ميدو: شكرا شكرا شديد . والفرحة ما كانت ساعياهو عاينت اتجاه نوسة كانت بتبكي
عمتو: رامي تعبت نفسك يا ولدي
رامي: ماف اي تعب وميدو دا عندي ذي التوأم
عمتو: شكرا ربنا يحفظك يا ولدي
رامي: امين يارب
ميدو: افتحها؟
رامي: طوالي حتى خلينا نجربها عمتو في تلفيزيون قاعد ساي
عمتو: ايي ميدو في غرفتو عندو وحدة للبلاستيشن
رامي: ورح نجربها . ومشينا كلنا وميدو دا داير يطير من الفرح فتحو الكرتونة وبقو يركبو فيها طبعا المضارب تحكم عن بعد
نوسة: انتي كلمتي رامي؟
روز: لالا والله اتصل لي وقال سمعنا لمن كنا بنتكلم في المطبخ وسألني عن الحاجة كانت شنو قولت ليهو ما كنت عارفة انو حيجيبها
نوسة: عايني لميدو فرحان كيف
روز: ان شاءلله ديمة فرحان كدا
نوسة: لو قعدت اشكر في رامي لبكرة ما بوفيهو حقو
روز: انتي هبلة عادي وحتى قال ليكي ما بفرزو من التوأم لانو اشترى للتوأم العاب ودا نصيب ميدو . رامي وميدو وصلو البلاستيشن وشغلوهو ورامي طلع فلاش
رامي: ميدو دا فيهو كم لعبة من اختياري بعدين انت لو عاوز تزيد على كيفك او تكلمني بالعاوزهم وانا بجيبهم ليك اوكي
ميدو: اوكي
رامي: قيم واحد كرة كيف
ميدو: يس حأغلبك فيهو
رامي: انا حأغلبك
روز: انا الحكم
رامي: مع انو عندنا حكم جاهز بس واحد زيادة ما بضر . ضحكنا وبدو المحاضرة انا بشجع ميدو ومعاي التوأم ونوسة بتشجع رامي في النهاية طلع تعادل
رامي: المرة الجاية بغلبك
ميدو: انا حنيت على حالك قدام البنات . قومنا ضحكنا
رامي: شوفو الفصعون دا بقول في شنو . قفلو البلاستيشن لانو كان تجربة بس وطلعنا برا لقينا عمتو جهزت لينا اللبن شربنا معاهم وابو نوسة جا من برا وسلم علينا وعرف انو رامي جاب اللعبة لميدو شكرو كتير بعدها قررنا نرجع البيت ميدو تاني مشى حضن رامي شديد
ميدو: رامي شكرا شديد والله
رامي: العفو حبيبي لو عاوز تكفيني لازم تجتهد في دراستك وتجي الاول دايما
ميدو: بوعدك حأجتهد اكتر وعاوز اكون دكتور ذيك كدا
رامي: ان شاءلله حتكون وكل ما تجتهد اكتر انا حأجيب ليك لعبة احلى المرة الجاية حأجيب ليك بلاستيشن 5 . فرح اكتر
ميدو: موافق . ودعناهم وطلعنا رجعنا البيت
روز: شوف ميدو انبسط كيف
رامي: لو عارف كدا كان جيبتو ليهو من بدري لانو هو تعبان مع القلب دا وما عندو غير الالعاب دي
روز: اي والله مسكين . ودخلت غرفتي ورجعت اواصل في قرايتي
___________
من جانب نوسة
ميدو كان مبسوط شديد وكل دقيقتين بقول لي
ميدو: نوسة بعدين ننزل العاب كتيرة
نوسة: طوالي
ميدو: في العاب لقيتهم في النت حانزلهم ان شاءلله
نوسة: مبسوط؟
ميدو: شديد شديد بكرة بمشي المدرسة بكلم منصور " صحبو " بقول ليهو جابو لي بلاستيشن 4 ذي حقك لانو كان بجاكرني بحقو وانو مضاربو عن بعد وانا حقي عادي وانو عندو العاب كمية ما بتنزل في حقي بس خلاص بعد دا بقى عندي ذيو . كنت فرحانة وانا بسمع فيهو وهو بحكي بكل فرح لمن مشى نام
دخلت غرفتي واتصلت لرامي
_ رامي
__ عيونو
_ بالجد ما عارفة اشكرك كيف
__ ماف داعي للشكر وقبل ما تكوني خطيبتي ميدو دا كان صحبي و اي حاجة بتبسطو انا بحاول بقدر الامكان اوفرها ليهو
نوسة: لو شوفتو من الفرحة لمن نام منتظر بكرة بفارق الصبر عشان يوري اصحابو باللعبة دي
رامي: ميدو يستحق انو يفرح لانو انحرم من حاجات كتيرة . طوالي بكيت لانو ميدو دا ما عاش طفولة ذي باقي الاولاد وانو يجري وينطط ويقع ويتجرح ويقوم لا حياتو كانت كلها حذر حتى انحرم من انو يلعب كرة قدم او اي لعبة بس محبوس جوا البيت بلعب بالتلفون والبلاستيشن
رامي: ما تبكي عارف بتفكري في شنو بس ان شاءلله ميدو حيبقى كويس ولمن يصل عمر مناسب حيلقى قلب مناسب ان شاءلله
نوسة: ان شاءلله يا رب
رامي: انتي مبسوطة؟
نوسة: شديد يا رامي . سكتا شوية
نوسة: رامي
رامي: عيونو احكي سامعك . اخدت نفس طويل وسكت مسافة
نوسة: انا بحبك . هو سكت ما قال حاجة كنت قايلة الخط فصل عاينت لقيت المكالمة شغالة همست بالراحة
نوسة: رامي
رامي: السمعتو دا صح؟
نوسة: اممممم
رامي: والله فرحتي بالكلمة دي اكتر من فرحة ميدو الليلة ياااخ انا بحبك والله ربنا ما يحرمني منك
نوسة: ولا منك يارب . وبقيت اتكلم معاهو لمن نعست ودعتو ومشيت نومت.......
___________
من جانب روز
الايام مرت وجات فترة الامتحانات وطبعا ممتحنين مع ناس سام سوا كالعادة هو الفترة الصباحية ونحنا بعد الفطور اتصلت ليهو ودعتو ولمن مشيت جا يقدمني بس المرة دا جا معاهو مراد
مراد: روز وين نبأ
روز: دقيقه اتصل ليها . اتصلت ليها وصفت ليها مكاني جاتنا
مراد: جاهزة؟
نبأ: جاهزة . طلع ليها شوكولاتات كدا ومعاهم قلم حبر شكلو حلو كدا كانت مبسوطة
مراد: بالتوفيق
نبأ: تسلم . وانا سام اداني شوكولاتات ومناديل
سام: يلا بالتوفيق
روز: ان شاءلله . لوحت ليهو ومشيت مع نبأ كانت بتتبسم ساي ضربتها في كتفها
روز: قدموكي
نبأ: ما مصدقة للان
روز: ياااخ تستاهلي والله
نبأ: شكرا حبيبتي . ومشينا دخلنا الامتحان وطلعنا وقعدنا انا اتصلت لسام طمنتو ونبأ اتصلت لمراد
روز: طبعا نبأ الليلة قدموها
قمر: منو
روز: مراد طبعا
قمر: ما جادة طبعا
روز: اسألوها
نبأ: اي قدمني ياااخ مراد دا عسل
روز: كان عيني عليهو
نبأ: انتي خليكي مع سام دا خلي لي مراد دا . ضحكت
روز: خلاص تمام بس حافظي عليهو
نبأ: ما بتوصيني . قومنا ضحكنا عليها ما مصدقين انو نبأ ممكن تحب في يوم حسب شخصيتها الهادئة دي
خلصنا امتحانات بحمدالله
هديل: بعد دا جهزو لعرسي
روز: اخيرا عندنا عروس
قمر: اخيراا شباين
هديل: احلى شباين
انسحبت منهم واتصلت لسام عشان اكلمو اني خلصت وهو ما رد لي وحتى قبل الامتحان اتصلت عشان اشوفو امتحن كيف ما رد استغربت واهو بعد الامتحان قولت اتصل تاني عشان اطمنو اني خلصت بس ما رد برضو رجعت للشلة
روز: نبأ انتي مراد اتصل ليكي . سكتت حسيتها اتوترت شوية
نبأ: ااا اي اتصل
روز: غريبة بتصل على سام ما برد لي
نبأ: يمكن ما منتبه على التلفون
روز: كدا اتصلي اديني مراد . سكتت مسافة
نبأ: ما معاي رصيد
روز: اديني الرقم انا بتصل
نبأ: روز اكيد حيرجع ليكي مالك مستعجلة كدا
روز: ما من عوايدو حاسة في حاجة . ما ردت لي اتأكدت انو في حاجة
روز: نبأ في حاجة حصلت وانتي ما عاوزة تكلميني صح
نبأ: والله يا روز في حاجة بس
روز: الحاصل شنو وريني
نبأ: مراد قال لي سام دا تعب في نهاية الامتحان وطلعوهو برا وتعب وهسي ودوهو المستشفى.........