رواية قلبان علي حافتي الحلم الفصل الاول 1 بقلم شذى عبد المكرم
بين قلبين مرتبطين، يفصل بينهما عالمان مختلفان…
إشتِياقي لـ وجهك ولِـ تفاصيلك لـ لون عينيّك لـ رِقة ولكن شئ فيك
جيت نازلة السودان بعد سنتين غياب وانا حاملة معاي كل انجازاتي وشهادة الماجستير الانا سافرت عشانها وحاملة تفاصيل ألمانيا الدولة الانا كنت بحلم بيها وجاتني الفرصة اني ازورها واعمل فيها الماجستير وحاملة معاي شوقي وحنيني لوطني ولناس بيتنا وللشخص الآسر قلبي وانا بدعي في سري انو يكون متذكرني وما نساني مع انو كشخصية مستحيل ينساني بسبب الرابط الأسري بس وجودي في حياتو ما متأكدة وصلت بيتنا وانا بتأمل شكل البيت ما اتغير ابدا وانا مبسوطة برجعتي ليهو اتنهدت بفرحة ودخلت وكان الجو مبهج برجعتي وانا مبسوطة وسطهم وبحكي ليهم بمغامراتي ورحلتي العلمية الخوضتها لحدي اللحظة
اخر الليل انفردت مع اختي صوفيا كالعادة " هي في الاصل بت خالتي بس مربياها امي بعد خالتي اتوفت وهي اصغر مني بتلاتة سنين بس صحبتي اكتر مما تكون اختي " نكتفي بهذا حنعرفها لقدام
__ صوفيا
_ نعم
__ والله اشتقت للونسة معاكي
_ انا اكتر والله
__ اها الجامعة وياكي
_ ماشي حالها
__ دي تاني سنة ليكي اجتهدي فيها لانها مهمة عشان بعدين لمن تتخرجي حتشتغلي معاي
_ متشوقة والله . أبتسمت ليها وبعدها اخدت نفس تقيل وغمضت عيوني وسألتها
__ عمران قاعد يجيكم؟ . كنت مستنية اجابتها وانا مغمضة
_ والله قاعد يجي بس فترات متباعدة شديد لمن ابوي محمد يحتاجو وبجي في الاعياد
__ حصل مرة سأل مني؟
_ والله ما سمعت ولا مرة احتمال سأل امي وانا مافي . حسيت بخبية امل رهيبة اكيد نساني واكيد عندو زولة في حياتو وما فاضي يسأل مني انا المتأملة على الفاضي احتمال نسى زكرياتنا كلنا تبع الطفولة ولهفتي لمن يجينا وامد ليهو ايدي لانو دايما بجيب لي معاهو شوكولا او مصاصة وهو عودني على العادة دي لمن امي كانت بتشاكلني بس هو بضحك وبقول ليها خليها عمتو ويديني امانتي وبجري جوا لحدي ما كبرنا وكان العادة لسع ملازماني رغم انو ماف تواصل واضح بس كان بجي الجمعة وبجيب لي شوكولا بشيلا بفرحة وبشكرو دا كل البحصل بس مع العادة دي وسفرتي بنيت آمال ومشاعر ومستقبل وكنت متلهفة متين ارجع عشان اشوفو واكلمو برحلتي في المانيا واحكي ليهو عن انجازاتي واشوف نظرة الفخر في عيونو وبفكر انو لمن يجي بيتنا زيادة يتذكرني ويسأل مني بس خاب ظني
كنت منتظرة بفارغ الصبر لمن عمي محمود يجي مع اسرتو يحمدو لي السلامة حيجي معاهم وحأشوفو بعد سنتين وانتظاري يخلص
بالفعل اليوم التاني مع العصر كدا جا عمي محمود ومرتو وبناتو الاتنين بس عمران ما جا معاهم زعلت شديد بس اتشجعت وسألت عمي محمود منو
شاهيناز: عمي محمود وين عمران
محمود: والله يا بتي عمران شغال ومضغوط شديد اليومين ديل بس قال حيجي يوم تاني يحمد ليكي السلامة . هزيت ليهو رأسي بمعنى تمام ومن جوا قلبي اتكسر يعني شغلو اهم مني اكيد طبعا اهم مني انا منو في حياتو كنت مجرد ذكرى وانتهت
قعدو معانا واصرينا عليهم انو يشربو شاي المغرب معانا وبالفعل قعدو معانا شوية سمعنا جرس الباب ضرب مشيت افتحو وقفت جنب الباب وبصلح في طرحتي وانا بقول "دقيقة بس" حجبت الطرحة وفتحت الباب ويا ترى مين كان خلف الباب كان عمران وقفنا عشرة ثواني بنتأمل في بعض او ممكن نقول انا سرحت فيهو وما اتوقعت ابدا انو يكون هو خلف الباب على حسب كلام عمي محمود
__ السلام عليكم . يداب انتبهت ليهو اتلبكت شوية ورديت
_ وعليكم السلام اتفضل . دخل البيت
__ حمدلله على السلامة . ابتسمت ليهو
_ الله يقبل حمدك . ودا بس كان كل كلامنا ودخلنا مع بعض وبدا موال السلام
امي: كيفك مع الشغل
عمران: والله الحمدلله
ابوي: محمود قال انك مضغوط شديد اليومين ديل
عمران: ايي والله
ابوي: ربنا يعينك
عمران: امين يا رب . وطبعا انا بعاين فيهو بس اتغير بس بحاول احدد التغيير وين ما قادرة لحدي ما صوفيا نكزتني وانتبهت وقومت معاها دخلنا المطبخ عشان شاي المغرب
شاهيناز: واااي يا صوفيا جا . قامت ضحكت على لهفتي
صوفيا: والله انتي مفضوحة
شاهيناز: بس سلم علي ببرود . قولتها بيأس كدا قامت ضحكت
صوفيا: لا دايرة يسلم عليكي بالاحضان مثلا . قومت ضحكت وضربتها وشيلنا الصينية والصبارة وطلعنا وهي كبت اللبن وانا وزعتو ليهم لمن جيت اديهو اتوترت لمن الكباية رجفت حسيت كأنو حسا بتوتري بس ما ادى اي ردت فعل وشال الكباية ودارت الونسة لحدي ما طلعو ومشو ومشى معاهم قلبي ........
فِي بَحرِ عَينيكَ هَامت كلُ أشواقِي
يَاسَيدَ الحُسنِ هَل تَنوي إغرَاقي؟.😴
____________
اول ما سمع انو شاهيناز نزلت السودان كل الموازيين اتقبلت رأس على عقد وكل افكارو اتشتت من اول وجديد ورجعت ليهو كل زكرياتهم القديمة الكان مفتكر انو هو متذكرهم لحالو واتذكر عادة الشوكولا والمصاصة وحماسها لمن تستلم منو الشوكولا ودافعو عنها لمن امها توبخها على العادة دي وكان منتظر متين يمشي يحمد ليها السلامة ويشوفها بعد المدة دي كلها وهل اتغيرت ولالا بس الواجع قلبو فرق الطبقات بينهم وانو مستحيل تعاين ليهو غير كأبن عم واخ هي سافرت حضرت الماجستير برا السودان وكل اجازاتها برا السودان يعني ماف علاقة بين طبقتها وطبقتو الاجتماعية بس كان متلهف انو يشوفها وفي نفس اليوم المفروض يمشي مع اسرتو يحمدو ليها السلامة ما عارف الحصل شنو لمن قال لابوهو هو مشغول حيمشي يوم تاني ولمن وصل الشغل وكل تفكيرو معاها وهل شخصيتها اتغيرت بعد السنتين ديل وهو حتتعامل معاهو بنفس المعاملة ولا حتكون متكبرة وشايفة نفسها بعد الدرجة العلمية النالتها دي بعد خلص دوامو ما قدر يقعد فركب عربيتو واتجاه لبيت عمو ووصل وضرب الجرس وضحك داخليا يعني هي عايشة بيت يعتبر فيلا وهم بيتهم يعتبر عادي بمقارنة بالبيت دا بس طرد الافكار دي وانتظر يفتحو ليهو الباب ومن حسن حظو شاهيناز هي الفتحت الباب عاين ليها مسافة حتى سلم وكل الكلام طار من رأسو بس اكتفى بأنو يقول ليها حمد لله على السلامة ودخل معاها ولمن قدمت ليهو كباية اللبن حسا برجفة ايدها بس ما فكر ليه هي بترجف واخدو القعدة ورجع بيتهم وهو مشتت وما عارف القدر كاتب ليهو شنو وليه يعلقو بحاجة مستحيلة.........
وإني مُنتظر للقاء اضع فيه راسي على كتفك واتحدّث عن شوق يسكنُ ايسري.
____________
بقيت افكر هل عمران حيعاين لي في يوم من الايام ياااخ شخصية عمران هي الرجولة الحقيقية ودا السبب البخليني اعشق كل تفاصيلو وما عاوزة زول غيرو بس معقولة يكون في بت في حياتو؟ يلا ختيت سبعين في المية انو يكون عندو بت في حياتو واحتمال خاطب واحتمال عاقد وانا ما عارفة لاني غايبة سنتين مع الافكار دي صرخت لمن خلعت صوفيا
_ بسم الله مالك
__ انتي عمران دا خاطب؟ . عاينت لي بغيظ شديد وشالت مخدتها وضربتني بيها شديد
_ قومي اطلعي من غرفتي
__ صوفي انا جادة . واتنهدت بزعل
_ ولو خاطب البحصل شنو
__ يعني يخطب كيف وانا منتظراهو السنين دي كلها . ختيت ايادي في وشي وبكيت هي اتخلعت
_ انتي بتبكي؟
__ انتي ما عارفة انا بحبو قدر كيف
_ ودي يحلوها كيف
__ تجيبي لي عمران دا بس . قامت ضحكت
_ في شيخ في الحي هنا قالو بجيب رأس اي زول
__ورح هسي دا ليهو . ضحكت شديد
_ لالا انتي بعيدة شديد
__ اها اعمل شنو
_ والله يا اختي عمران دا من شخصيتو كدا تحسي شخصية نرجسية كدا ولا هو اصلا كدا ما عارفة
__ يااخ معاينة ساي ما بعاين
_ ودا تجيبي كيف
__ اول حاجة هو خاطب؟
_ والله لو خاطب كان سمعنا صح في النهاية هو ود عمك او ود عمنا ذي ما بقولو . قومنا ضحكنا
__ الحمدلله
_ بس يا شاهيناز انتي وعمران شخصيتين بعيدة وطبقاتكم مختلفة
__ والله انا عاوزاهو كشخصية انو هو عمران وانو هو راجل بحق ما عشان طبقتو الاجتماعية وحتى ما شايفة الفرق الكبير داك
_ والله كونو شخصية كدا ما قال كلام حتى ابوكي بريدو ريدة دايما عمران عمران ودايما بعتمد عليهو في اي حاجة وبعتبرو ولدو
__ ما تقولي ولدو عشان ما يبقى اخوي . قامت ضربتني ضرب بالمخدة وطردتني من غرفتها شيلت باقي كرامتي ومشيت غرفتي ونومت
في عُمق البعد تحتضنك دعواتي ❤️