رواية قلبان علي حافتي الحلم الفصل الثاني 2 بقلم شذى عبد المكرم
مر اسبوع على اخر احداث حصلت ونزلت الشغل عشان اواصل حياتي العملية طبعا شغالة في صيدلية وهي صيدليتي الخاصة وبأسمي لمن سافرت سلمتها لصحبتي ومتواصلة معاها ومراقبة بس من بعيد لكن خلاص رجعت بس المرة دي غير رجعت بأفكار جديدة ومعلومات جديدة في عالم صناعة الادوية واخدت خبرة من ألمانيا السافرت ليها وعملت فيها الماجستير طبعا ماف داعي اقول الفرق من ناحية الخبرات
اسراء: اخيرا رجعتي
شيذو: اخيرا والله
اسراء: اشتقنا ليكي والصيدلية اشتاقت ليكي
شيذو: انا ذاتي اشتقت ليكم والله
اسراء: هناك الجو كيف
شيذو: ما بقدر احكي ليكي عن رهابة مدينة برلين وتجربة كانت حلوة شديد استفدت منها
اسراء: والله كويس وعملتي جولة حول العالم اريتو حالي . قومت ضحكت
شيذو: ان شاءلله في يوم حتسافري
اسراء: ان شاءلله . واخدنا اطراف الحديث ووريتها التحديثات الحنعملها والفرع الجديد من الصيدلية الحأفتحو وانتهى اليوم ورجعت لقيت صوفيا رجعت من الجامعة يداب في سنتها التانية المفروض تكون سنير في سنتها التالتة بس بسبب وفاتها امها وقفت سنة في مرحلة الاساس وبسبب جوطة الاهل هي حتمشي مع منو لانو اهل ابوها كانو عاوزين يودوها معاهم البلد بس امي رفضت وبعد جوديات كتيرة ادوها لامي تربيها معانا انا واخوي شادي نحنا اتنين بس وخلاص بقت لي اخت وصحبتها وبئر اسرار
كالعادة جيت ليها عشان احكي ليها بالافكار الفي رأسي
__ صوفيا دايرة اغير عربيتي
_ خلاص جنك قام ليكي
__ ممكن تقولي كدا
_ متين وصلتي السودان لمن تغيري عربيتك
__ دايرة بداية جديدة مع كل شي جديد . قامت ضحكت
_ غيتو الحمدلله بس
__ المهم انا قررت حأغيرها
_ خلاص غيريها
__ بتكلم مع ابوي بعدين
_ تمام
زمن الغدا فتحت لابوي الموضوع
شاهيناز: ابوي دايرة اغير عربيتي
ابوي: فجأة كدا؟
شاهيناز: ايي
ابوي: تمام بس حاليا انا ما فاضي عشان امشي معاكي تقدري تنتظريني اسبوع او عشرة ايام بكون فاضي انو اكلم ليكي عمران يمشي معاكي انتي عاوزة شنو؟ . دي فرصة ما بتتفوت نهائي
شاهيناز: خلاص كلم لي عمران واكيد بفهم في العربات اكتر
ابوي: خلاص بدي تلفون وبوريكي البحصل شنو . قومت من الغدا فرحانة حتى ما اكلت كويس فرحة بس وصوفيا تضحك بس وابوي اتصل لعمران وكلمو وهو وافق اصلا ما قاعد يرفض لابوي طلب عشان كدا كنت متأكدة مية في المية انو حأمشي معاهو وفعلا اليوم التاني جا بيتنا بعد العصر قعد خمسة دقايق وطلعت معاهو بعربيتو
_ عاوزة تغيري بشنو
__ ما عارفة والله ما حددت . سكت ما اتكلمنا تاني نفسي كان نحكي طول الطريق وصلنا معرض العربات والمسؤول من العربات جا وبقى يشوف فينا العربات ويكلمنا بخصائصها ومميزات كل عربية لمن خلصنا
عمران: اخترتي؟ . عاينت ليهو برجاء كدا
شاهيناز: عمران ساعدني ما بقدر براي . ابتسم لي حسيت كأنو قال لي بحبك
عمران: تمام . ورجعنا تاني نتفرج على العربات وبنختار مع بعض لمن بقيت على وحدة حمرة كدا
شاهيناز: عمران لو بقت سودة ما بتكون حلوة؟ . قام ضحك
عمران: اول مرة القى بت بتفضل العربية السودة على الحمرة . ضحكت ورفعت ليهو اكتافي
شاهيناز: والله بحب الاسود اعمل شنو
عمران: خلاص نشيل اسود ومالو؟ . قالها بطريقة حلوة رفرف معاها قلبي بعدها مشينا للمسؤول وقال اسود موجود بس في المعرض التاني وركب معانا خلى المعرض لصاحبو ومشينا واتفقنا على كل شئ واتصلت لابوي كلمتو وانتهى اي شي بكرة بستلم لمن الاوراق تجهز واجربها بعدها رجعنا
شاهيناز: شكرا بالجد يا عمران
عمران: العفو ما عملت شئ . ونزلت من العربية وهو ما نزل
شاهيناز: انزل اتغدا حتى امشي
عمران: مرة تانية
شاهيناز: انزل ياااخ والله ابوي حيزعل وانا ذاتي حأزعل منك انزل ياااخ
عمران: والله خليها مرة تانية شاهيناز . دي اول شاهيناز يقولا لي بعد سنتين اخليهو يمشي؟ مستحيل طبعا
شاهيناز: حرم تنزل . قام ضحك حنستو كدا نزل وابوي شكرو تاني وجهزنا الغدا اتغدا معانا وشرب الشاي حتى رجع بيتهم......
____________
في يوم قاعد في الدوام ابوها اتصل علي انو عاوزة تغير عربيتها وعاوزني انو امشي معاها ما بقدر ارفض ليهو طلب لانو افضالو علي كتيرة عمي محمد وكانت فرصة عشان اشوفها بس فرصة خليتني اعيد حساباتي واعاين للفرق بيناتنا انو هي اسهل حاجة انها ممكن تغير عربيتها خمسمية مرة في السنة بالموديل الهي عاوزاهو يلا انا ما بقدر اعيشها الحياة دي ولا نصها فمستحيل ترضى بزول اقل منها ماديا وعلميا فكل مرة بتحصل حاجة بتخليني اشوف الفرق بيناتنا واصرف نظر عينها مع انو قلبي كان متعلق بيها كأنها امتحان من ربنا اتنهدت وواصلت شغلي وانا منتظر اشوف القدر مخبئ لي شنو
مشينا المعرض وكانت محتارة تختار اي موديل وخلتني اختار معاها ما اتغيرت نهائي ذي ما هي كانت بريئة وطفولية في تصرفاتها وخلصنا ورجعتها وكانت بتحاول تخليني انزل بطريقة مضحكة لمن غلبتني في النهاية او ممكن اقول انا كنت داير اتغلب قدامها وبعدها رجعت البيت وانا مبسوط بالكم الساعة القضيتو معاها دا واتمنيت انها ما تنتهي .........
لأول مرة
أرغب بالأبدية مع شخصٍ ما😴❤
_____________
استلمت العربية وخلصت اجراءاتها وخلاص بقيت امشي بيها الشغل فيوم بعد الغدا كدا سمعت ابوي بتكلم مع عمران وانو حيجيب ليهو اوراق مهمة الصباح قبل ما يمشي الشغل وجات فكرة جهنمية في رأسي جريت لصوفيا في غرفتها
__ صوفي بكرة قوميني بدري اوكي
_ عندك شنو
__ يا زولة قوميني بس
_ تمام . ومشيت غرفتي وانا قافلة على صوفي بس السجم نستني قومت مخلوعة لقيت الزمن فات قولت يا رب ما يكون جا ومشى جريت لابوي في غرفتو لقيتو براجع في اوراق قولت بس خلاص دي الاوراق ذاتها
شاهيناز: صباح الخير
ابوي: صباح النور ما شغالة الليلة؟
شاهيناز: شغالة بس طالعة بعد شوية
ابوي: تمام
شاهيناز: دي الاوراق الجابها عمران؟
ابوي: لالا بس هسي حيجي اتأخر قال حصلت ليهو حاجة . قولت في سري الحمدلله
شاهيناز: ايواااا . وجريت لصوفي جريت منها البطانية وضربتهت قامت مخلوعة
صوفيا: مالك
شاهيناز: ملة التأخدك يا بعيدة انا ذاتي غلطانة البعتمد عليكي . عاينت لي ببرود ورجعت اتغطت
صوفيا: جري معاكي الباب . والله غاظتني شديد قفلت ليها المكيف وفتحت النور وخليت الباب فاتح سمعتها بتصرخ بأسمي يلا كدا كفيت حقي ودخلت سريع سريع اتجهزت وحتى ميكب ما عملتو لانو سمعت صوت امي بتسلم على زول عرفت قال عمران سريع سريع لبست الاسبورت وشيلت شنطتي وطلعت مستعجلة
امي: اشربي الشاي
شاهيناز: ما بقدر اتأخرت شديد
امي: عاينو قال اتأخرت كم ما الصيدلية حقك يقصر . قومت ضحكت وطلعت لقيتو ركب عربيتو داير يتحرك لمن شافني نزل الشباك وسلم علي بهدوء كعادتو سكتا خمسة ثواني
شاهيناز: عمران بتوصلني في طريقتك ان شاءلله الاستوب الجاي؟ . عاين لي بأستغراب
عمران: وعربيتك وين . يلا نسيت موضوع العربية والكذبة الكان أالفها قبل ما اسألو
شاهيناز: عطلانة . عاين لي بنظرة ما مصدقك كدا
عمران: عطلانة!!! امممم
شاهيناز: حتوصلني ولالا؟
عمران: لالا . قلعت عيوني بصدمة ما اتوقعت يرفض ضحك على الريأكشن حقي
عمران: اركبي . وقفت بعاين ليهو بغيظ كدا وبحمر ليهو وهو يضحك
عمران: حتركبي ولالا؟
شاهيناز: ما عندك النية توصلني فما حأزعجك
عمران: ماف اي ازعاج والله وكنت بهظر معاكي بس اركبي بوصلك . فرحت وركبت معاهو واتحركنا يداب حسيت بالجوع واتذكرت اني ما شربت لبن الصباح المتعودة عليهو فقولت كدا اشغلها ليهو لو حيشتغل بي
__ والله جوعانة جوع
_ ما شربتي الشاي؟
__ لالا لاني اتأخرت
_ ما شاءلله من كترت الاجتماعات . قالها بأستفزاز وسخرية والله عمران مستفز بشكل ما طبيعي وحسيت انو بدا يتجاوب معاي حتى لو بستفزني ودا الكان مفرحني
__ ها ها ها ها ظريف شديد . قام ضحك
_ هسي يلقو ليكي مطعم فاتح من وين؟
__ ليه مطعم؟
_ قولتي جوعانة
__ عادي اقرب بقالة شيل لي طعمية تكون حارة وكاتشب وجنبة رودس واااااي المنظر براهو خلاني اجوع اكتر . وحركت جسمي ذي الزول العندو قشعريرة قام ضحك
_ جادة عاوزة طعمية؟
__ ايي لي ما اكون جادة؟
_ والله مفتكر انو ليكي سنتين برا إحتمال الحاجات دي تقلب ليكي معدتك
__ ها ها ها ها ظريف
_ لا جادي والله
__ عمران انت ما جادي ولا شنو والله بالعكس لو قعدت مية سنة برا السودان ما حتتغير فيني حاجة لا في عاداتي ولا شخصيتي وهسي شوف لي طعمية بس تكون حااااااارة . قومت جريتها شديد قام ضحك
__ تمام . مشينا شوية في بقالة معاها فوالة برا والراجل برمي في طعمية شال لي وشال لي الرغيف والجبنة والكاتشب واداني ليها
__اتفضلي
_ وااااي بالجد شكرا . طوالي فتحت الكيس وبديت احشي طبعا ما خجلت منو ولا راعيتو لبرستيجي قدامو وهو بعاين لي وببتسم حشيت العيش وبديت اكل بتلزز لانو بالجد كانت حاجة روعة
شاهيناز: احشي ليك معاي؟
عمران: لالا بالهنا
شاهيناز: معليش وسخت ليك العربية
عمران: العربية هينة عايني الاسكريت حقك . عاينت كان كلو دقيق بتاع الرغيف جيت انضفو وسختو زيادة بأيدي عمران قام ضحك فيني والله خجلت من روحي.
عمران: خليهو تمي اكلك بعدين نضفي
شاهيناز: بس ما تضحك
عمران: حاضر . واصلت اكل لمن خلصت الحشوة
شاهيناز: انت عارف نفسي في بوش يكون ظابط كدا . عمران ضحك شديد
عمران: يعني لو ما اشتريت ليكي الطعمية كان شوية وحتأكليني . قومت ضحكت
شاهيناز: عمران لو ملاحظ من قبيل بتتنمر فيني
عمران: حاشا يااخ
شاهيناز: وبالنسبة للبوش ما كنت قاصدة هسي يعني بس كنفسية لكن بسببك حردتو خلاص
عمران: معقولة
شاهيناز: امممممم
عمران: بهظر معاكي بس
شاهيناز: كويس يا ود محمود . وسكتنا لحدي ما وصلني الصيدلية
_ شكرا على المشوار وشكرا على الطعمية
__ العفو ياااخ . ومشى وانا دخلت الصيدلية مبسوطة وبلعب بكيس الرغيف واسراء عاينت لي باستغرب
اسراء: اول حاجة صباح الخير وتاني حاجة دا منو الوصلك دا وتالت حاجة دا شنو كيس الرغيف دا ورابع حاجة ليه حالتك كدا واخيرا وين عربيتك . اتنهدت بفرحة وحب وهي تضحك
شاهيناز: اول حاجة صباح الورد تاني حاجة دا حبيبي تالت حاجة الرغيف دا هدية من حبيبي ورابع حاجة حالتي كدا من الحب وخامس حاجة عربيتي ما جيت بيها لانو حبيبي وصلني . البت فطست من الضحك لمن دمعت وانا ضحكت معاها لاني ركزت في الكلام القولتو جات مسكتني وقعدتني في اقرب كرسي وهبشت رأسي
اسراء: الحمدلله ماف حرارة كدا احكي لي الحاصل معاكي . قومت ضحكت تاني
شاهيناز: بهظر كنت
اسراء: عارفة اها احكي.
شاهيناز: والله دا ود عمي كان في بيتنا ووصلني وكنت جوعانة اشترى لي طعمية واكلتو في العربية عشان كدا حالتي بالشكل دا . قامت ضحكت شديد
اسراء: انتي بلوة والله وعربيتك مالا
شاهيناز: والله سليمة بس كنت كسلانة اسوقها فطلبت منو يوصلني
اسراء: خلي كسلك دا بعدين يرجعك البيت . يداب استوعبت الانا عملتو بس كلو فدا عمران
شاهيناز: والله دي مصيبة بس ما مشكلة بلقى حل اها الجديد شنو
اسراء: الليلة المفروض نقابل المستورد عشان الادوية الجديدة
شاهيناز: صح صح . بقيت افتش في تلفوني ما لقيتو فتشت الشنطة كلها ما لقيتو
شاهيناز: وااااي يا اسراء تلفوني.......