رواية قلبان علي حافتي الحلم الفصل العاشر 10 بقلم شذى عبد المكرم
بعد يوم طويل واحداث طويلة بدأ بتوفيق ورفضو وانتهى بعمران ووصولو في وقت غلط كنت نايمة في آمان الله تلفوني ضرب قومت بكسل مسكت التلفون لقيت المتصل عمران استغراب واستغرابي زاد لمن عاينت للساعة كانت داخلة على اتنين صباحا من الخلعة لقيت نفسي قعدت في نص السرير لانو عمران ما حيتصل لي الزمن دي الا اذا حصلت حاجة كبيرة رديت بسرعة
__ الوو . ما كان في اي رد نهائي
__ عمران!!! . ما رد لي قلبي أكلني شديد متصل لي الزمن دا وساكت ما من عوايدو نهائي بقيت انادي فيهو ما كان برد لي خلاص خوفت ودموعي اتجمعت في عيوني وقومت من السرير وقفت في نص الغرفة وخاتة ايدي في خصري من التوتر وبهز في رجلي
__ عمران ما تخوفني رد علي بس عشان اعرف انك كويس . بعد مسافة رد
_ ناز . دموعي نزلت لانو عرفت انو كويس بقيت اتكلم وانا صوتي واضح عليهو البكي
__ عمران مالك؟
_ صدري واجعني حاسي روحي ما قادر اتنفس . اتخلعت كان بتكلم وصوتو ما طبيعي
__ كيف يعني ما قادر تتنفس
_ صدري حاسيهو ضيق ما قادر اتنفس مع اني قاعد في الحوش بس ما قادر . هنا خوفت شديد
__ عمو و عمتو وين وعرفات وين
_ نايمين . كان بتكلم براحة شديد وبهدوء مبالغ فيهو ودا المخليني خايفة
__ الواجعك شنو بالضبط
_ انتي . هنا سكتا من الخلعة
__ انا؟؟؟!!!
_ ليه اخترتي تبعدي فجأة كدا مع انو انتي عارفة انك كنتي محور حياتي
__ انا ما اخترت البعد انت البعدت
_ كنتي متوقعة مني شنو وانت جاي عشان اخدك ونطلع بس ابوكي يفاجأني بأنو التعارف حقك بكرة ليه ما كلمتيني من بدري ليه ما ختيتي لي اعتبار ليه بس . كان بعاتب فيني بقيت ابكي
_ لاني ما كنت عارفة عرفت قبلك بيوم بس
__ كان اعرف منك ما من ابوكي يعني لو ما ابوكي كلمني كان ماحتكلميني وحأكون مغفل بس وقاعد
_ والله ما كان حيحصل كدا
__ انتي كنت محور حياتي كل تفاصيلي معاكي وكل مفاتيح حياتي معاكي كنت بأمن ليكي اكتر من ناس بيتنا بس فجأة في يوم وليلة يآخدك زول تاني عاوزاني اتعامل معاكي عادي هل حاسة بي؟
_ انت الما حاسي بي المفروض لو كنت محور حياتك ذي ما بتقول تجي تواجهني تعرف ليه حصل كدا بس ما جيتني اكتفيت بأنك تنسحب بس
__ ما كنت مستوعب الحاصل وللان ما مستوعب الحصل بس خلاص حصل بس هل انتي مبسوطة معاهو؟ . سكتا لانو غلبني ارد لانو المفروض ما يسألني سؤال ذي دا لمن طال سكوتي
__ المفروض ما أسأل سؤال ذي دا لانك اكيد مبسوطة بدلالة طلعاتكم اليومي بتطلعوها انتي عارفة حاليا قاعد في الحوش في البرد بس ما حاسي بيها نهائي والله حاسي صدري مولع نار ما قدرت انوم
_ طلعاتنا؟؟؟ . ما رد لي بس انا كلمة طلعاتكم كانت معلقة في رأسي
_ طلعاتنا انا ومنو
__ انتي وخطيبك
_ يعني عشان لقيتني طالعة معاهو الليلة خلاص عملتها يومي
__ ما قاعدة تطلعي معاهو؟
_ ما حصل والليلة اول مرة اشوفو من التعارف وجا عشان يفهم ليه عملت كدا
__ عملتي شنو؟
_ انو ليه رفضتو
__ رفضتي؟؟؟ . سكتا ما رديت
__ ناز بتكلم معاكي . الليلة جابت ليها دلع ناز بس حلو شديد
_ اها
__ احكي لي الحاصل
_ جاي حاليا تقول لي احكي لي الحاصل ما عندي حاجة احكيها ليك وقوم من مكانك وادخل من البرد دا . وقفلت الخط في وشو رجع لي فصلت فيهو وطيرت التلفون لانو عارفة حيتصل كتير وقعدت اتذكر في نبرة الصوت لمن كان بعاتبني كان مكسور وصوتو كأنو باكي فبقيت ابكي مسافة بعدها استغفرت ورجعت نومت........
البُكاء ، الرحلة الأخيرة للتعب .💔
الصباح بدري كنت طالعة الشغل لقيت صوفيا طالعة الجامعة
_ اركبي اوصلك
__ الليلة جاتك من وين
_ يا زولة اقطعي وشك قولت اعمل فيكي حسنة بس ما بتستاهلي
__ لالا خلاص اختي العسل السكر . عاينت ليها بملل
_ اطلعي . طلعنا وفي الطريق
_ اتخيلي عمران امس متصل لي الساعة 2 صباحا . فتحت خشمها بصدمة
__كذابة
_ والله
__ والحصل شنو . حكيت ليها زعلت علي وعليهو
_ وقفلت الخط ونومت
__ والله يا شيذو عمران ما متعود يتعامل مع الجنس اللطيف وكونو قال انك كنتي محور حياتو يبقى بالجد كنتي محور حياتو واكيد الصدمة بقت ليهو كبيرة يعني فجأة كدا البيست الفريند يخطبوها وتبقى لزول تاني من دون ترتيب ولا مقدمات حارة
__ حتى انا كانت حارة بالنسبة لي
_ بس هو ما حيفكر كدا و اي زول في مكانو ما حيفكر كدا لانك انتي الحتتزوجي ما هو يعني يعتبر الخيانة جات من عندك . سرحت في كلامها بعيد وهي واصلت
__ اتخيلي لو كان جا قال ليكي يا شاهيناز بكرة ماشة اتقدم لفلانة كنتي حتعملي شنو كدا ختي نفسك مكانو . يداب ممكن اقول حسيت بأحساسو واتذكرت امس لمن قال لي صدري واجعني ما قادر اتنفس لمن اتذكرت كلامو وحسيت بأحساسو بكيت و وقفت العربية
_ ما تبكي خلاص ومتأكدة حترجعو احسن من الاول
__ ان شاءلله . دورت العربية وغيرنا الموضوع ووصلت جامعتها ونزلت بقيت شايفاها داخلة من البوابة بس وقفها شاب كدا بقى يسلم عليها ضربت ليها البوري التفت لي والشمار حرقني طوالي نزلت مشيت عليهم
شاهيناز: السلام عليكم
الاتنين: وعليكم السلام
صوفيا: ليث دي اختي شاهيناز دا ليث سنيري . سلمت عليهو وسألتو من اخبارو ومن الجامعة
شاهيناز: انا يعتبر سنيركم الاتنين
ليث: صيدلة؟
صوفيا: لمن عملت الماجستير في المانيا
ليث: ما شاءلله كانت الرحلة كيف
شاهيناز: انت صاحب صوفيا؟
ليث: ايي
شاهيناز: خلاص معناها حنتلاقى تاني وبقعد بحكي ليك بالتفصيل وحتحبها متأكدة
ليث: خلاص تمام
شاهيناز: يلا بستأذن منكم ما ااخركم . وغمزت لصوفيا خجلت ودعتهم وركبت عربيتي كنت رايقة شديد لمن شغلت اغاني وانا بغني معاها لمن وصلت الصيدلية وصبحت على إسراء حسيتها ما على طبيعتها
شاهيناز: حاصلة ليكي حاجة؟
اسراء: لالا كلها تمام . شكيت بس سكتا وباشرت عملي عادي كان عندي كم جلسة ليزر يعني الصيدلية كانت على اسراء بس فجأة وانا في جلسة جاتني داخلة
اسراء: عمران برا . سكتا مسافة
شاهيناز: عارف اني في جلسة؟
اسراء: كلمتو قال حينتظرك بس اديك خبر انو هو برا
شاهيناز: الساعة كم هسي
اسراء: 11
شاهيناز: تمام قولي ليهو جاية . وطلعت مشت يلا دا مواعيد الاستراحة حقتو بتبدأ من 10.30 وكنت متوقعة انو حيجي واصلت في الجلسة وخلصتها وغسلت ايدي وطلعت عاينت شايفاهو قاعد في كراسي قاعدة في ركن الصيدلية للزبائن وشغال بتلفونو وقفت مسافة اعاين ليهو طبعا عندو حركة بعملها لمن يكون شغال بتلفونو بكون ماسك التلفون بأيد واحدة والتانية بلعب بيها في شعرو يعني بفلفل في شعرو رفعت عيني عاينت اتجاه اسراء فجأة عملت روحها مشغولة يعني ذي الزول الملبوش عرفت انها كانت مركزة معاي وانا مركزة مع عمران قومت اتجهت اتجاه عمران براحة وقعدت في الكرسي المقابل ليهو وما قولت حاجة اصلا انتبه لي رفع نظرو عاين لي مسافة وهو قال لي
__ السلام عليكم
_ وعليكم السلام . هز رأسو خفيف بأخر صبر ورجع بجسمو بورا وهو بعاين فيني قلبت ليهو عيوني بملل
__ حتفضلي ساكتة كدا؟
_ على ما افترض انت الجيت لحدي عندي يعني انت العاوز تحكي . مسح وشو بأيدو حينجلط بسببي رفع عينو اتجاه اسراء وعاين ليها قوي انا استغربت طوالي هي مشت غرفة الجلسات بتوتر رجع عاين لي
_ مالك بتعاين ليها كدا؟
__ يمكن معجب . عاينت ليهو بسخرية
_ لو نظرات الاعجاب كانت كدا يا خسارة الاعجاب بس على العموم مالك جيت
__ طارداني يعني؟ . هزيت ليهو رأسي بمعنى ايي عدل في قعدتو
__ وانا ما طالع
_ انت ما عندك شغل؟
__ عندي شغل هنا جاي اخلصو . غمضت عيوني شديد ورجعت فتحتهم وختيت ايادي في ركبي
_ اها شغلك شنو
__ شاهيناز خلينا نتكلم ذي الناس الكبار ونحل المشكلة دي
_ والله دا العندي . هنا عصب
__ ما تخليني اطربز الصيدلية دي فوق رأسك . عرفت خلاص وصل اخرو لو استفزيتو اكتر ما حيشوف قدامو تاني
_ عمران . قام جاط فيني
__ ما تقولي عمران تدخلي حياتي تجوطيها لي ودايرة تنسحبي ما حذرتي والله حترتبي الجوطة العمليها دي . بقيت اعاين ليهو بصدمة كان معصب شديد وهو بتكلم قولت حيقتلني ولا شنو
_براك جوطتها انا ما عندي دخل . ختا اياديهو في وشو واخد صنة ما عرفت الحصل ليهو شنو خوفت الصراحة دقيقتين ما اتحرك فجأة قام من الكرسي وقف فوق
__ شاهيناز حنتفاهم ولا امشي لاني على اخري والله وانتي عارفاني ماف داعي اقول ليكي . اتذكرت كلام صوفي قبيل وعرفت نفسي ضغطت عليهو شديد
_ نمش بوشت بونت ما فطرت
__ طيري شيلي شنطتك . قومت ضحكت وهو بعاين لي بغيظ شيلت شنطتي ودخلت لاسراء في غرفة الجلسات قولت ليها انا طالعة لقيت عمران ركب جيت ركبت واتحركنا كان ساكت وانا كل دقيقة اعاين ليهو بطرف عيني وماف زول فتح خشمو لمن وصلنا واستقبلونا حلو وعمران رابط وشو جا حسن " الويتر الدايما بشيل طلباتنا" اتقابلنا معاهو ونحنا ماشيين على طاولتنا
حسن: مالك مزعلاهو ؟. قومت ضحكت
شاهيناز: براهو زعلان انا ما لي دخل
عمران: مجنون انا؟ . ضحكنا انا وحسن وهو خلانا ومشى قعد في طاولتنا الخاصة
حسن: ربنا يعينك
شاهيناز: عندكم مخرج طوارئ؟ . قام ضحك
حسن: لالا ماف بس براقبكم لو حسيت انو حتولع بجي بنقذك . قومت ضحكت
شاهيناز: اي بس عليك الله . ومشيت قعدت وبقيت اعاين ليهو وهو رابط وشو
_ انت مالك هسي المفروض يزعل منو انا ولا انت؟
__ انتي
_ ومالك خلاص؟
__ جاي عشان اصلح الموضوع بس انتي بتعقدي الموضوع . ختيت ايادي في الطاولة واخدت وضعية الجدية
_ احكي سامعاك . عاين لي لقاني جادة اخد نفس
__ امس قولتي انك رفضتي توفيق
_ حصل
__ ليه؟
_ حأحتفظ بالاجابة لنفسي . حسيت شوية وحيخنقني
__ شاهيناز نعدي يومنا على خير احسن . غمضت عيوني وفتحتهم
_ انا فجأة لقيت ابوي قال لي توفيق ود صحبي جاي يتقدم ليك ما اداني وقت عشان ارد فجأة واصل كلامو وقال لي الجمعة جايين تعارف بس ما فاهمة حاجة كيف ومتين الموضوع قلب جد كدا والجمعة حصل تعارف ذي ما شايف وانا ما كنت عاوزة فكلمت ابوي وهو ما حيجبرني على زول ما عاوزاهو وتوفيق جا يفهم مني سبب الرفض وكلمتو بالواقع وقفلت الصفحة دي . رجع بجسمو لورا ومسح وشو وتاني جا قدام
__ وليه ما اتصلتي قولتي لي من اول يوم . قولت ليهو بآخر نفس
_ انت ليه معلق في النقطة دي يعني كنت حتعمل شنو مثلا؟ . سكت ما رد مسافة
__ حتى لو ما حأعمل حاجة بس كنت اعرف موقفك وانك ما موافقة كان اتفهمت الموضوع
_ خلاص انا ممكن اقلب عليك الطاولة واقول ليك لمن ابوي كلمك كنت قدامي ليه هربت ما واجهتني في نفس اللحظة وانت شايف دمعتي في عيني المفروض تكون فهمت بس لا خليتني في اكتر لحظة كنت محتاجاك جنبي ومشيت وحضرت تعارفي بس برضو ما حاولت تعرف عني حاجة انت ما عارف انا حصل فيني شنو في الأسبوع دا وخوتنا طلعت صحن البوش الحيجيبو حسن بعد شوية وانا خوة ذي دي ما عاوزاها بالهنا عليك . وقومت فوق مسكت شنطتي وقومت طالعة قام سريع مسكني من ايدي
__ ناز اقعدي نتفاهم
_ اظن اتفاهمنا ولحدي هنا كفاية........