رواية قلبان علي حافتي الحلم الفصل الحادي عشر 11 والثاني عشر 12 بقلم شذى عبد المكرم
قومت فوق مسكت شنطتي وقومت طالعة قام سريع مسكني من ايدي
__ ناز اقعدي نتفاهم
_ اظن اتفاهمنا ولحدي هنا كفاية
_ انتي قولتي العندك بس ما سمعتي موقفي . عاينت ليهو مسافة سحبت ايدي منو ورجعت قعدت واتنهدت بتعب وختيت ايادي في الطاولة زي قعدتي الاولى
_ سامعة . سكت مسافة كأنو بحاول يجمع
__ عارف انو جيت عليكي وانتي ما عندك ذنب بس المفروض تتفهمي موقفي وانا ابوكي بقول لي تعارف شاهيناز بكرة وانا قدامك حسيت انو ما عندي قيمة عندك فجأة الزولة القريبة لي بقت بعيدة في لحظة فقررت ابعد عشان تعيشي مبسوطة حتى لو على حسابي اسبوع كامل مر علي وانا ما فاهم حاجة وبحاول اعدي اليوم من دون ما اتصل ليكي او ارسل ليكي واتس اسألك من يومك تسأليني من يومي من دون احكي ليكي عن الفراغ الخلتو لي علا وانتي تشاكلني فيني . سكت مسح وشو وواصل
__ ما قادر افسر ليكي ولا قادر اوصل ليكي احساسي والزاد الطين بلا صحبتك بس دا..... . قاطعتو بأستغراب
_ صحبتي منو
__ انسي ما مهم
_ ما بنسى صحبتي منو وعملت شنو . شافني مصرة شديد
__ اسراء . غمضت عيوني شديد
_ والله كنت حاسة في حاجة بينكم من نظراتك قبيل عملت شنو
__ رسلت في الواتس فأنا اس...... . تاني قاطعتو
_ جابت رقمك من وين اول حاجة
__ بداية علاقتنا موش كنا بنتواصل برقمها؟ . اخدت صنة واتذكرت
_ اي صح عملت شنو
__ ياااخ خلاص انسي ما ضروري . عرفت انو ما حيتكلم
_ عمران كدا تلفونك وافتحو لي سريع ومن دون اعتراض عشان تعدي يومك على خير . قام اداني التلفون فاتح دخلت الواتس فتشت لقيت رقمها بس كانت محظورة قلبي برد اول حاجة بعدها قريت المحادثة من اولها لمن وصلت اخر رسالة "" طبعا يومي قاعد يجيها وبطلعو مع بعض "" شياطيني كلها كانت في وشي غمضت عيوني شديد وفتحتهم
_ الليلة لو ما قتلتها اضحك فيني . حسيت الدم وقف في عروقي
__ خلاص حصل خير
_ ماف اي خير حصل وقال شنو ليه ما دخلت تسلم علي ياااخ يدخل فيها قطر الحيوانة البعيدة والله الليلة ما اخليها تسلم عليها بصفتك شنو وتعرفك من وين خلاص عشان جيت الصيدلية كم مرة دايرة تخت عينها عليك . قام ضحك
__ ناز خلاص
_ والله ما اخليها واصلا ملاحظة ليها حركاتها ونظراتها ليك لمن بتجي الصيدلية . الغيرة قامت علي وبقيت اتكلم من رأسي ونسيت الشكلة الاساسية وبقيت في اسراء وعمران بعاين فيني وهو كاتم الضحكة لحدي حسن جاب لينا الطلب
حسن: شايف الطاولة اتقلبت سريع . هنا عمران ضحك يداب ركزت وحمرت ليهم الاتنين تاني ضحكو وحسن مشى
عمران: هسي ود الناس ذنبو شنو تحمري ليهو
شاهيناز: كلكم زي بعض . سكت ما رد لي ورفع ايدو حسن جا راجع
عمران: ممكن علبة الكاتشب
حسن: جدا . حسن جاب الكاتشب وعمران جر الصحن عليهو وبقى يرسم وانا متنرفزة من موضوع اسراء بعد خلص لز لي الصحن كان مكتوب sorry ومعناهو قلب جنبو حاولت احافظ على ثباتي وما اتزعزع بس قدام القلب الاحمر دا رخيت بقيت اعاين مرة في الإعتذار دا ومرة اعاين لعمران وهو مبتسم لي ابتسامة بتخليني انسى الحوليي اخدت نفس عميق
_ عمران محمود
__ عيونو . هنا فصلت وحصوني اتدمرت ودي اول مرة يقولها لي فقولت ليهو بخجل
_ عمران ما ممكن معاك ياااخ . قام يضحك
__ صافية لبن يا قشطة ؟
_ مام . وجريت صحن البوش وبديت اكل هو ضحك وجرا الصحن في النص وبقى يأكل معاي وشبه اتصالحنا بس لسع عاين لتلفونو
__ شت يااه
_ مالك
__ عندي اجتماع بعد شوية باقي ليهو تلت ساعة
_ اتأخرت شديد خلينا نطلع . قومنا مشى حاسب وشال لينا بارد لمن طلعنا برا
_انت امشي وانا برجع براي عشان ما تتأخر
__ لالا انتي ما جيتي بعربيتك
_ عادي برجع بالموصلات
__ ما بقدر اخليكي هنا براكي
_ ما تخاف علي امشي عشان تلحق اجتماعك وما تنسى انك رئيس القسم . سكت مسافة
_ ماف زمن امشي والله بعرف برجع براي
__ بس انتي ما متعودة على المواصلات
_ بآخد ترحال امشي والله حتتأخر . عاين لي مسافة
__ لمن تركبي الترحال اتصلي لي ولمن تصلي برضو اتصلي لي . قومت ضحكت
_ حاضر
__ خلي بالك من نفسك
_ حاضر مع السلامة . ودعتو وركب عربيتو ومشى بقيت اضحك على لهفتو علي وخوفو انا مبسوطة وقفت مسافة كدا وفتحت البارد وبقيت اشرب فيها شوية وصل ترحال وقفتو وركبت واتصلت على عمران انو ركبت وتاني ذكرني انو اتصل عليهو لمن اصل ولمن وصلت اتصلت عليهو وطمنتو اني وصلت وكان داخل على الاجتماع خلاص قفلت منو كدا جات اسراء طالعة من مخزن الادوية اتذكرت الحصل كلو والعملتو
شاهيناز: تعالي يا صحبتي هنا
اسراء: نعم
شاهيناز: عيونك دي بقدها ليكي لو فكرتي تعايني لعمران تاني حاجة ما بتخصك ما تعايني ليها
اسراء: ما حصل والله
شاهيناز: ما حصل شنو يا وسخة انا الشغلتك معاي وعملتك زول في النهاية الطعنة تجي منك انتي
اسراء: والله عمران بتبلى علي
شاهيناز: هو عمران يتبلى عليكي داير منك شنو اصلا
اسراء: كان بعمل لي حركات انو دايرني بس انا ما اديتو اي عين . قومت ضحكت
شاهيناز: عمران في احلام العصر ما حيشوفك خلي في الواقع
اسراء: ما حيشوفني بسببك وانتي مدام مخطوبة تاني دايرة بعمران شنو
شاهيناز: وانتي دخلك شنو؟ وتاني حاجة خفيفة ولفيفة يقع بيكي وين قال بعمل لي حركات اسمعيني هنا وشك تاني ما اشوفو في صيدليتي دي وقروشك حتصلك . بقت تعتذر وتبكي وانو الشيطان لعب بيها كان ممكن اسامحها لو كانت اتبلت علي بس لكن دي ختت عينها في عمران ودا ما بسامح فيهو اديتها حساباتها وطردتها
قولت ما اخرب مزاجي وانا اتصالحت مع عمران فبقيت اشتغل براي وغير كل الايام كان ضاغط شديد والزبائن كتيرة وكان عندي جلسة شعر لزبونة ما عرفت اتصرف كيف جا في بالي صوفيا اتصلت لصوفيا تلحقني الحمدلله لقيتها خلصت محاضراتها
صوفيا: في شنو؟
شاهيناز: بتقدري تجيني عاوزاكي تقعدي لي في الصيدلية لانو عندو جلسة مع زبونة وتاني جاياني وحدة والقسمين في بعض ما بقدر اخلي واحد
صوفيا: وين اسراء
شاهيناز: طردتها
صوفيا: ليه الحصل شنو
شاهيناز: بحكي ليكي براحة هسي تعالي
صوفيا: والله انا لسع يداب حافظة خمسة ستة ادوية بس خلاص بشوف ليث عابر لو بقدر يجي يساعدني
شاهيناز: تمام بس اسرعو . وقولت للزبونة بس ننتظر اختي تصل ونبدأ وافقت وبقيت شغالة في الصيدلية لمن صوفيا وصلت معاها ليث سلمت عليهم
شاهيناز: يلا انا جوا لو حصل اي حاجة
صوفيا: تمام . خليتهم بديت جلسة الشعر وطولت وخلصتها وتاني جاتني بتاعت الليرز وبديت ليها وسامعة اصوات شكلو الصيدلية كانت مليانة شديد عملت ماسك للزبون ولازم يآخد خمسة دقايق قومت طلعت برا لقيتهم يحليلهم مشغولين شديد ليث شغال في الادوية وصوفيا شغالة مع الكوزمتك ولمن ركزت لقيت عمران في الحسابات قومت ضحكت ومشيت عليهو وختيت ايدي في الطاولة وانا مبتسمة وهو كان بحاسب في زبونة لمن جا يرجع الباقي للزبونة لقاني بعاين ليهو بأبتسامة وهو بادلني الابتسامة
شاهيناز: جيت متين؟
عمران: عندي عشرة دقايق وطوالي صوفيا الشريرة دي مسكتني الحسابات . قومت ضحكت
شاهيناز: معليش بعاقبها ليك
عمران: خلصتي؟
شاهيناز: لسه بس جيت اشوف الشباب ديل لاني سامعة اصوات
عمران: شكلو عشان طردتي اسراء الصيدلية بقت زحمة كدا . ضيقت ليهو عيوني
شاهيناز: ارجعها ليك؟
عمران: ممكن
شاهيناز: صوفيا عمران قال انتي شريرة وشينة . خليتو فاتح خشمو ومشيت على ليث
شاهيناز: معليش تعبتك معاي
ليث: بالعكس كدا بتثبت لي المعلومات بالاخص انا على اعقاب التخرج . هزيت ليهو رأسي بأبتسامة ورجعت للبت وتميت ليها الجلسة وخلصت وجيت الصيدلية لقيتهم لسه مشغولين بس أخفّ من قبيل بقيت اساعد ليث في الادوية وصوفيا في قسم الكوزمتك وعمران في الحسابات لمن خلصنا وانا مشيت قعدت في الكراسي الصباح كنا قاعدين فيها انا وعمران وطوالي عمران قام من الحسابات وجا قعد جنبي
عمران: يومك متعب
شاهيناز: شديد . ومسحت وشي بأيدي فجأة لقيت ايدي في ايد عمران
عمران: دا شنو . عاينت محل هو قاصد
شاهيناز: دا قبيل حرقتو بجهاز الليزر كنت ماسكة غلط
عمران: كدا خطر عليكي
شاهيناز: لالا عادي
عمران: خلاص انتبهي تاني
شاهيناز: ان شاءلله . والتفت لصوفيا
شاهيناز: صوفي ما تجيبي لينا حاجة من الكافي الجنبنا دا؟
صوفيا: عاوزة شنو
شاهيناز: انا عن نفسي نسكافيه وعمران قهوة من دون سكر وشوفي انتي وليث عاوزين شنو . هزت ليها رأسها وطلعت مع ليث
عمران: لو ملاحظة انك اختري لي بدون ما تستشيريني
شاهيناز: ما ضروري لاني بعرف . قام ضحك ورجع لورا
عمران: لالا ياااخ اها عرفتي كيف اني حأطلب قهوة من دون سكر
شاهيناز: لانك رايق
عمران: عرفتي كيف اني رايق؟
شاهيناز: ما تكون رايق كيف وانت اتصالحت معاي . هنا ضحك شديد وانا كنت بعاين ليهو بأفتراء زادت ضحكتو
عمران: بس صح كلامك . جات زبونة داخلة الصيدلية مشيتها وصوفيا جابت الطلبات مع ليث وقعدنا الاربعة كلنا مع بعض وبقينا نتونس لمن خلاص قررنا نطلع
شاهيناز: يلا عشان اشتغلتوا اي واحد حأديهو قروش ورديتو
ليث: معقولة ياااخ
صوفيا: والله انا عن نفسي عاوزة قروشي
عمران: وانا عاوز قروشي . ضحكنا كلنا واديت صوفيا قروشها هي وليث وبعد تحنيس حتى شالهم
عمران: انا حقي وين؟ . ابتسمت ليهو ببلاهة وميلت عليهو
شاهيناز: انا ما كفاية عليك؟ . قام ضحك
عمران: ايي اكلي بعقلي حلاوة . قومت ضحكت
شاهيناز: معقولة ياااخ . اتذكرت حاجة رجعت المخزن كان جاتني طلبية ارياح بنات لقسم الكوزمتك شيلت منها اربعة وطلعت جدعت لصوفيا واحد مسكتو فتحت خشمها بصدمة
صوفيا: جات متين؟ لي فترة منتظراها
شاهيناز: امس ونسيتها بسبب اني كنت زعلانة من زول كدا رأسو مربع . قامو ضحكو وجدعت ليهو واحد مسكها
شاهيناز: دا حق عرفات
عمران: شكرا
شاهيناز: في عينك . وجدعت التالتة لليث
شاهيناز: دا لاختك لو عندك ولو لا لماما . قام ضحك
ليث: شكرا
شاهيناز: في عينك انت برضو خلونا نطلع . ضحكوا وطلعنا ركبت عربيتي انا وصوفيا وليث كان مع عمران قال حيوصله ولمن وصلنا البيت حكيت لصوفيا كل الحصل وسبب طرد اسراء قالت ما اديتها حقها كويس
بالليل اتصل لي عمران وبنتكلم عادي قولت اغلغل بيهو شوية
_ ما عاوز تطلع تاني في البرد دا ؟ . قام ضحك
__تصدقي ما كنت حاسي بيهو والله لانو ألمي كان اكبر
_ للدرجة دي؟
__ بقيت اقول خليني اشرب برد واموت عشان السجمانة ديك ترتاح . بقيت اضحك
_ ما بسألك نهائي انا سجمانة؟
__ قولت السجمانة مقضياها طلعات مع السجمان داك وانا شغلي ما قادر اركز فيهو . بقيت اضحك بس
_ وااااي يا عمران خلاص اسكت . وبقى يحكي لي الحصل معاهو بطريقة مضحكة وانا لمن بكيت من الضحك
__ امي قولت ليها ادعي لي ربنا يبرد قلبي قامت تدعي لي وختمتها لي ربنا يديك بت الحلال التصون قلبك وتحافظ عليهو قولت في سري يا امي هي اصلا الخربتو بت تاني تجيبي لي بت ما بالغتي بس قولت امين ومشيت . كنت بضحك شديد ودمعتي نازلة من الضحك
_ عمران خلاص
__ عشان تعرفي ما براكي الكنتي متعذبة
_ والله عرفت خلاص وبعتذر على الحصل ليك بسببي
__ ايي اعتذري لمن اقبل اعتذارك
_ شوفوا السجمان دا
__ ناز . بقيت احب اسم ناز اكتر من اسمي الحقيقي لانها منو هو بس
_ احكي لي
__ اي مشكلة تحصل بينا نجي نتواجه لو مهما كانت المشكلة ان شاءلله نكسر بعض بس نتواجه
_ دا الكلام الكنت عاوزة اسمعه منك
__ بس خلاص . وبكدا قفلنا الصفحة ديك وفتحنا صفحة جديدة كل مرة كنا بنكتشف حاجة جديدة في بعضنا
من بين كل إتجاهات الحياة أنت الإتجاه الشاسع اللي كل ماضعت أتجه له♥️♥️.
قلبان_على_حافتي_الحلم_12
اخيرا الحياة استقرت بينا انا وعمران وماف مشاكل الا لو نقاشاتنا الدايما موجودة ودي بتزيد قوة علاقتنا لانو بتخلينا نفهم بعض اكتر لحدي يوم الجمعة عملنا القهوة انا وصوفيا بمساعدة الحبشية لانو عمتو اخت ابوي اسمها حواء قالت حتجينا تشرب معانا القهوة جهزنا الحاجات واستقبلناها وجيبنا القهوة وبقينا نشرب طبعا عمتو ما بتريد امي شديد ونحنا عارفينها بس بنضحك في وشها وكم مرة اشتبكت معاها عشان امي والليلة بابا قبل ما يطلع للصلاة حذرني منها لانو ما حيكون موجود في البيت لانو معزوم مرطبات وحتى من امس بالليل حذرني وانا بقول ليهو حاضر وبطمنو
اثناء ما بنتونس سامعة تلفوني في غرفتي برن قومت مشيت شيلتو لقيت عمران متصل طبعا من الصباح ما اطاقشنا لا مكالمات ولا واتس رديت عليهو
__ الشاغلك مننا ان شاءلله يتهنى بيكي . قومت ضحكت
_ كيف الكلام دا
__ من الصباح ما شغالة بينا
_ انت عارف انو عمتي جاية الليلة فأنشغلت مع التجهيزات وكدا
__ دا ما بمنعك انو ان شاءلله ترسلي رسالة صباح الخير الوهمية ديك لكن ما مشكلة على العموم اتصلت اقول ليكي رسلت ليكي صورة جلابية الجمعة لو مهتمة بس . وقفل الخط قومت ضحكت شديد ياااخ بموت فيهو فتحت الواتس ولقيت مرسل لي صور الجلابية بقيت اعاين فيها وانا بضحك الصور كان حلوة شديد رسلت ليهو
*انت سكر لكن على شكل بشري* 🤍
رسل لي "مع انها تطبيلة بس عجبتني" رسلت ليهو ايموجي ضحك و جدعت تلفوني في السرير ورجعت الصالة وانا بضحك فجأة عمتي بدون مقدمات
عمتو: هسي يا ثريا محمد دا داير يتزوج تاني بعد العمر دا؟ . هنا حصلت صنة وهدوء في المكان
شاهيناز: محمد منو؟
عمتو: ابوكي . قومت ضحكت
شاهيناز: بابا مستحيل يتزوج على ماما
عمتو: والله دا انا ذاتي استغربت فيهو بس جا مع اخوي محمود وكلمو عيسى راجلي وسمعت انو محمد داير يتزوج لو ما سمعت بأضاني ما كان اتكلمت . وبقت تعاين فينا بشماتة
شاهيناز: عمتو قولي انك بتهظري
عمتو: والله عديل سمعت انو محمد داير يتزوج تاني . بقيت ابكي
صوفيا: بابا محمد ما بعملا . وامي ساكتة بس وانا وصوفيا بقينا ننبكي
عمتو: انتو بتبكو مالكم والله من حقو يتزوج تاني يعني عادي هسي انا الزوجة التانية . مشينا انا وصوفيا قعدنا جنب امي اي وحدة بجهة وهي ساكتة وبتضغط في اياديها كأنو بتحاول تضبط اعصابها ذي ما بيحصل كل مرة لمن يحصل نقاش مع اهل ابوي
شاهيناز: ماما قولي حاجة . اخدت نفس طويل وابتسمت لينا وهي بطبطب على ايدي
امي: عمتك معاها حق لو داير يتزوج خلي يتزوج ما اول راجل حيتزوج على مرتو . انصدمنا فيها انا وصوفيا لانها بتقول كلامها وهي مبتسمة
شاهيناز: دا كلام شنو يا ماما كيف الكلام دا ما من حقو يتزوج فيكي. مسكت ايدها وعصرت عليها عرفتها مصدومة وما قادرة تقول حاجة عشان كدا ردت فعلها كانت كدا
امي: يا حواء محمد كلمني انو داير يتزوج . هي اتخلعت اكتر مننا
عمتو حواء: يعني عارفة ؟. هزت رأسها بمعنى ايي هنا كانت الصدمة لينا انا وصوفيا وبقينا ننبكي
شاهيناز: ماما كيف عارفة وساكتة كدا والله لو اتزوج حنخلي ليهو البيت دا
عمتو حواء: هي يا بت خلي قلة الادب امك لو ما مقصرة في حقو ما كان فكر يتزوج تاني يعني العيب من امك
شاهيناز: من امي كيف يعني؟
امي: شاهيناز هوس . سكتتني وانا مصدومة في برود امي دي
شاهيناز: ما بسكت واكيد انتي المليتي ليهو رأسو بابا مستحيل يفكر يعمل كدا انتي من زمان بتكرهي امي . قامت فوق بقت تردح وانا اردح معاها وجوطناها امي ضربتني في ضهري شديد وصرخت فيني
امي: دي عمتك واكبر منك ما تتكلمي معاها كدا
عمتو حواء: تربيتك اتوقع شنو خلي ابوكم يتزوج وان شاءلله يجيب ليكم مرا صعبة تربيكم من اول وجديد انتو وامكم . و شالت شنطتها وطلعت رجعنا قعدنا وانا ببكي وصوفيا بتبكي وساكتة
شاهيناز: ماما انتي عارفة انو بابا داير يتزوج تاني؟ . اخدت نفس عميق
امي: ما عارفة وقولت كدا علشان ما اشمت عمتك فيني وهي جاتنا الزيارة دي قاصدة ابوكي ما بعملا بعرفو انا
شاهيناز: البخليكي متأكدة شنو؟
امي: انا عايشة مع ابوكي 30 سنة مستحيل يتزوج فيني بعد العمر دا كلو
شاهيناز: ولو طلع صح؟ . سكتت مسافة وانا منتظرة اشوف ردها
امي: متذكرة قصة المرا القطعت راجلها وختتو في التلاجة؟ . فتحت خشمي بصدمة وعاينت لصوفيا حالتها ما كانت اقل مني
شاهيناز: ايي
امي: بطبق العملية في ابوكم . هنا بقينا نضحك بصدمة والمشكلة امي كانت واثقة شديد في ابوي قومت مشيت غرفتي اتصلت لابوي انو يجي ضروري كان في حفلة مرطبات قال جاي وقفلت ورجعت لناس امي وكلمتهم انو ابوي جاي وبقينا منتظرين ابوي وامي بتهز في رجولها بتوتر كدا جا داخل ابوي
ابوي: الحاصل شنو وانتي بتبكي مالك؟ . ما لقى رد
ابوي: ثريا في شنو
امي: اختك حواء كانت هنا . رجع عاين لي وكان معصب
ابوي: اها وكالعادة يا شاهيناز اشتبكتي مع عمتك صح؟ انا موش حذرتك من امس بالليل وحتى قبل ما اطلع حذرتك؟ ليه كسرتي كلمتي هي اكبر منك في النهاية ولو ما احترمتيها كأنو ما احترمتيني هي في النهاية اختي
شاهيناز: بابا انت ما شوفتها قالت شنو
ابوي: مهما قالت تسكتي ما تتلامضي معاها بعدين يقولو محمد ما ربى ليه بتحبي تصغريني قدام اخواني
شاهيناز: بابا انا ما بسألها لو معاي بس لو بتضايق ماما ما بسكت ليها . استغرب
ابوي: مالا مع ثريا
شاهيناز: جات تشمت في ماما انو انت داير تتزوج عليها . قام ضحك
ابوي: شنو شنو
شاهيناز: قالت انت داير تتزوج على ماما وانو عادي وهي ذاتها الزوجة التانية وانو عملت كدا لانو ماما مقصرة في حقك والعيب منها هي . عاين لامي مسافة كانت هادئة وتهز في رجولها وبعاين بعيد قال كلامو وهو عينو على امي
ابوي: والله انا لو فكرت مجرد تفكير ساي انو اتزوج على امكم دي بكون قصرت في حقها . هنا امي يداب بكت كأنو كلامو دا برد حرارة قلبها لانو من قبيل ساكتة وانا لمن شوفتها كدا جريتها علي ودموعي نزلت معاها وجات صوفيا بالجهة التانية ودموعها نازلة
ابوي: امكم دي 30 سنة متحملاني ما كلت ولا ملت ولا حصل قالت لي محمد انت مقصر في حقي وحق اولادك وشغلك كل همك رغم انو اغلب وقتي في الشغل بس ما حصلت شكت لي وكانت بتحل محلي لمن اكون ماف واغلب الوقت كانت امكم وابوكم وما اشتكت نهائي وما حصل طلبت حاجة صعبة دايما مكتفية وعينها مليانة والراجل لمن يفكر يتزوج تاني لمن يلقى تقصير في واجب من واجبات الزوجة بس امكم ما بتديني فرصة حتى اتكلم فيها ودايما بتجي على نفسها عشانا والله لو اتزوجت عليها الا اكون رافس النعمة الاداني ليها ربي . امي بتبكي بس لانو قلبها برد وثقتها قدام بناتها ما اتهزت
شاهيناز: ماما كانت واثقة قالت لي ابوكم ما بعملا
ابوي: وانا ما حصل خونت ثقتها ولا بنخونها ان شاءلله وتاني حاجة انا اخر عمري مالي ومال زواج دي منو الما عندها موضوع بتقبل بي . هنا ضحكنا كلنا بأمي
أمي: لساك شاب
شاهيناز وصوفيا: اووووووو . وامي خجلت وضحكنا كلنا
ابوي: لو شايفة انو لسع فيني حيل خلاص نقدم الحج انا وانتي السنة دي . ابتسامتها بانت واسعة
امي: موافقة
شاهيناز: دا شنو الخيانة دي
ابوي: داير احج مع مرتي عندكم مشكلة؟
شاهيناز: حاشا وكلا . وضحكنا قومت غمزت لصوفيا وقومنا استأذننا منهم ودخلنا غرفة صوفيا خليناهم براحتهم عشان يآخدو راحتهم فجأة اتذكرت حاجة جيت طالعة لقيت ابوي قاعد جنب امي وبحكي معاها كأنو بحكي ليها الحصل
شاهيناز: بابا ليه عمتو قالت سمعت أضانها انو انت وعمو محمود كنتو بتتكلمو مع راجلها انو داير تتزوج
ابوي: عمتك اضانها خفيف دايما تتصنت على الناس بس الداير يتزوج محمد ود عثمان ما انا هي لفحت الكلام وخلاص
شاهيناز: ايوااااا . بقيت اقول عمتي دي قاعدة للقوالة ونقل الكلام ما عندها موضوع واتمنيت اشوف منظرها لمن يصلها الكلام انو ما ابوي الداير يتزوج..
__ عمتك الوشها واحد دا خربت لينا يومنا . صوفيا ضحكت
_ اصلا كنت متوقعة بس ما للدرجة دي
__ بس الحمدلله عدت على خير خلينا شوية كدا ننزل الحاجات تبع القهوة هنا ونستمتع بيها
_ فكرة ظابطة ونشغل اغاني
__ ونرقص؟ . قامت ضحكت
_ ونرقص . وبالفعل طبقنا الكلام القولناهو
بالليل اتصلت لعمران
__ فضيتي لينا خلاص؟
_ امممممم
__ مالك
_ ماف حاجة
_ دي تقولا لزول تاني الحصل شنو الليلة . اتنهدت بصوت مسموع وحكيت ليهو الحصل الليلة
__ والله عمتي حواء عجيبة خلاص
_ جات عشان تخرب لينا الجو بس
__ اها نفسي اعرف انتي عملتي شنو لانو ما حاسي انو سكتي ليها . ضحكت طويل لانو حافظ شخصيتي
_ معقولة ياااخ كنت هادئة انت عارفني
__ م يلا عشان عارفك سألتك . قومت ضحكت
_ خليها كدا بس احسن ما تعرف
__ اكيد طلعتي هارون الجواكي . هنا فكيت الضحكة بعدها ختيت ايدي في خشمي لمن استوعبت ضحكتي لانها فصيحة
__لا انتي بضحكتك دي ما زولة مرقة نهائي . تاني ضحكت
_ عمران خلاص ياااخ ما تضحكني
__ والله بحب اشوفك وانتي بتضحكي وبحب صوت ضحكتك في التلفون اكتر . هنا فصلت صورة و صوت نهائي
__ ناز . ياااخ دا نهائي ما زمنو لاني الفصلة الاولى ما اتجاوزتها
_ همممم . سكت مسافة
__ ليه ساكتة؟ . قولت ليهو بخجل
_ ماف حاجة
__ الواحد ما يشوفك قبل شوية صوت ضحكتك واصل آخر الشارع فجأة اللبوة قلبت كديسة . قومت ضحكت
_ عمران خلاص ياااخ
__ سكتنا خلاص
_ بكرة برامجك شنو
__ للان ما مخطط بس لو عندك لي موضوع كلميني
_ الواحد نهائي ما يسألك
__ تعالي ابرمج بيكي خلاص
_ ما قنعانة من روحي
__ هو انتي لايقة؟
_ اعتبرها غرور؟
__ غرور دا شنو لالا ياااخ دي نرجسية عديل . فكيت الضحكة ياااخ عمران بتكلم بطريقة عجيبة
_ اقطع وشك ماشة انوم
__ لي انا الكلام دا؟ . حسيتو قالها بجدية فرخيت براحة
_ لالا ما قاصدة
__ ايوااا لو كدا تمام يلا اقطعي وشك . وقفل الخط قومت ضحكت يعني محتارة في الشخصية دي بس شخصية بتخليني مرتاحة نفسيا ومشيت نومت.....
يوم السبت مر عادي عملت فيهو بحث عن صيدلانية تساعدني في الصيدلية بعد طردت اسراء ولقيت وحدة وهي زميلتي في الجامعة كانت فخلاص كلمتها تنزل بكرة الاحد ويوم الاحد جاتني في الصيدلية وكانت عندها خبرة اشتغلت في كم صيدلية يعني ما حتعبني وهي مسكينة شديد
شاهيناز: مزونة انا جوا لو حصلت حاجة تعالي لي
مزن: تمام . ودخلت غرفة الجلسات بقيت ارتب في المعدات وفي معدات جاتني جديدة بقيت اشوف كيفية استعمالها واركب فيها والما عرفتو كنت بدخل اليوتيوب نزلت رسالة في تلفوني فتحتها كانت من عمران "" عندي اجتماع الساعة 11 بس احتمال اخلص 1 اوع تفطري حنمش بوش بونت او افطري بس خفيف "" أبتسمت ورسلت ليهو " حاضر " رسل لي " يحضر ليكي السمح" ما عرفت ارد عارفة نفس متبلدة المشاعر بقيت ابتسم بس وواصلت وجات البت وبديت ليها الجلسة لحدي جا زمن الفطور طلبت لينا فطور وعزمنا البت الكنت بعمل ليها الجلسة بس قومت سريع عشان حأمشي اكل مع عمران تاني
مزن: بدري لكن
شاهيناز: بدري من عمرك . وخليتهم يآكلو وبقيت شغالة في الصيدلية لحدي جات الساعة 1 وعمران ما جا فكرت اتصل عليهو بس قولت احتمال ما خلص الاجتماع قولت انتظرو لانو هو وعدني حيجي ما جا لحدي الساعة بقت 2 والدوام انتهى ومزن كانت ماشة
مزن: الوريدية التاني حيشتغل منو؟
شاهيناز: ما قاعدة اشتغل الصباح بس
مزن: لو عملتي الوريدية التانية الصيدلية حتدخل اكتر
شاهيناز: حأفكر فيها ان شاءلله
مزن: ان شاءلله يلا مع السلامة
شاهيناز: مع السلامة . وطلعت وقعدت في الصيدلية براي وخلاص زهجت وانا منتظراهو وابيت اتصل ليهو لحدي الساعة جات اتنين ونص فجأة جا داخل الصيدلية وهو مبتسم وبحك في لحيتو وانا رابطة وشي
عمران: آسفين والله
شاهيناز: ارجع من محل جيت
عمران: الاجتماع جرا شديد
شاهيناز: مخليني جوعانة للساعة اتنين ونص . عاينت ليهو بزعل
عمران: والله انا ذاتي ما فطرت ومجرد ما خلصت الاجتماع جيتك سريع والله ما قاصد
شاهيناز: ماشة بيتنا
عمران: والله ما حترجعي ما لم نمش نفطر
شاهيناز: المرة دي حأمشي بعربيتي لانو الدوام خلص
عمران: لالا حنمشي بعربيتي وبنجي بجاي تسوقي عربيتك
شاهيناز: اممممم بفكر
عمران: ناز خلينا نتحرك ونتفاهم في الطريق . قفلنا الصيدلية وطلعنا
__ فكي وشك خلاص ما متعود عليكي كدا
_ ابيت . فتح الدرج وطلع لي شوكولاتة طوالي ابتسامتي بانت
__ ايي كدا ياااخ خلينا نشوف البسمة دي عشان الدنيا تحلا . ابتسمت بخجل ووصلنا بوش بونت جانا حسن
حسن: الليلة شنو التأخير دا
شاهيناز: أسألو عليك الله
عمران: حسن خليك محضر خير دايما . قام ضحك
حسن: مشيها ليهو المرة دي أكيد لسبب
عمران: عليك الله كلمها . حسن ضحك ومشى وجاب الطلب
عمران: أكلي وحأديكي حاجة حلوة
شاهيناز: حاجة شنو
عمران: خلينا نأكل وبوريكي احتمال يعجبك وبتمنى تعجبك
شاهيناز: مدام منك اكيد حتعجبني . ابتسم لي ابتسامة حسيت الدنيا ابتسمت لي وبقينا نأكل وانا متحمسة اشوف حيديني شنو لمن خلصنا وحسن جاب لي البارد
عمران: حسن جيب لي الامانة . استغربت
حسن: جدا . عاينت ليهو بأستغراب يعني متفق مع حسن يلا جا حسن وهو شايل كرتونة كبيرة شديد لونها وردي فاتح ببيبي بلو وختاها قدامي
عمران: بما انك مسفوهة وكدا وماف زول عبرك قولت اجيب ليكي بوكس الشتاء بما انو الجو شتاء . عاينت ليهو بحب وحسيت روحي حأبكي حتى ما قدرت اتكلم بقيت اعاين ليهو وهو مبتسم
عمران: ما عاوزة تشوفي البوكس فيهو شنو . كنت بس بعاين ليهو بحب
شاهيناز: عمران . ابتسم لي بحب
عمران: عيونو . هنا حسيت روحي حأبكي مسكت الكرتونة كان ببرا فيها سحاب بالابيض حلو كدا فتحت الكرتونة براحة فوق في بلوفر لونو وردي فاتح ببيبي بلو نفس لون البوكس وفي استيكر من فوق مكتوب فيها "" أخاف ليكي من برد من الشتاء "" قومت ضحكت ودمعتي نزلت وانا طايرة من الفرح رفعت رأسي عاينت ليهو كان مبتسم رجعت عاينت للبوكس وطلعت البلوفر وفريتو من قدام كان مكتوب *ناز* بخط عريض وحلو قادرين بالبلوفر شكلها كيف بس حاجة كدا خورافية و تتخيلو فرحتي في اللحظة ديك كنت رافعة البلوفر فوق وانا بعاين في كلمة ناز ختيتها في رجلي ومشيت اصابعي في الاسم ورفعت رأسي عاينت ليهو تاني ودمعتي في عيني من الفرحة
شاهيناز: عمران
عمران: بتبكي مالك هسي
شاهيناز: ما عارفة بس ما حصل زول اهتم بتفاصيل ذي دي في حياتي ودي التفاصيل الانا بحبها ما عارفة اقول شنو ربنا ما يحرمني منك
عمران: آمين يا رب ولا يحرمني منك يلا ما عاوزة تشوفي باقي البوكس
شاهيناز: نسيت والله وانا فرحانة بالبلوفر يااخ الوانو رهيبة والارهب انها معمولة خصيصا بأسمي . حضنتها بفرحة وختيتها بالجنبة وعاينت للبوكس كان في كباية لونها وردي فاتح كباية شكلها غريب بس حلو وايدها شكل قلب ومكتوب فيها *ناز* بالخط العريض في جهة وجنبها صورة ايدي مطبوعة فيها استغربت اخد الصورة دي كيف ووين عرفت انها ايدي من الخواتم الفيها والجهة التانية مكتوب *تحمِل الطف مَلامح طفوليه على وَجهِ الكَوكب* ♥️♥️ وجنبها صورة صغيرة كدا لي مبتسمة بطريقة كيوت وانا مغمضة عيوني بقيت اعاين للكباية بصدمة واقرا الكلام واعاين للصورة والف فيها بصدمة قدر كيف عملها عاينت ليهو
شاهيناز: عمران انت بتهظر صح؟ . قام ضحك
عمران: يمكن . انا تاني البسكتني من البكي منو
عمران: ناز الليلة حنقضيها بكي بس؟
شاهيناز: ما قادرة اصدق التفاصيل دي عملتها كيف ووين
عمران: انا ما حصل اهتميت لتفاصيل زول بس اعرفي انك مهمة عشان كدا مهتم . بقيت اعاين ليهو بحب شديد
شاهيناز: اول مرة اكون مهمة عن شخص كدا والحمدلله مكتفية بالشخص دا . ورجعت عاينت للبوكس كان فيهو شرابات ملونة وردي وبيبي بلو قومت ضحكت وانا شايلاهم حضنتهم بفرحة طفلة صغيرة وختيتهم فوق البلوفر كان البوكس كلها باللونين ديل بس تاني عاينت كان فيهو دبدوب لابوبو لونو بيبي بلو قومت ضحكت حتى عمران ضحك
عمران: بشبهك شبه . ختيتو جنب وشي وانا بضحك وعمران بضحك
عمران: خليكي كدا . طلع تلفونو واخد لي صورة مع الدبوب عاينت لللابوبو في وشو ياااخ وشو مضحك شديد بالاخص السن الطالع ختيتو جنب الحاجات وتاني دخلت ايدي جوا البوكس وطلعت دفتر وردي معاهو قلم وردي ومكتوب فيهو *ناز* بالخط العريض يعني البوكس كان معمول خصيصا لي وكونو عمران تعب عشاني كان بالنسبة لي حاجة كبيرة شديد بقيت ابكي طبعا
عمران: هسي انا اعتبرها انو فرحانة ولا زعلانة لانو انتو البنات هرموناتكم عجيبة . قومت ضحكت وانا بمسح دموعي
شاهيناز: عمران والله غالبني ارد اقول شنو دي احلى هدية جاتني في حياتي صح جاتني هدايا كتيرة في حياتي بس ماف وحدة كانت معبرة ذي دي عشان كدا بكيت كدا والاحلى انو كلها بأسمي وبألواني المفضلة وبالتفاضيل المحببة لقلبي انت كيف حافظني كدا؟ . عاين لي بأبتسامة حلوة
عمران: ممكن احتفظ بالاجابة لنفسي وبكلمك في الوقت المناسب . هزيت ليهو رأسي بحب ورجعت دخلت الحاجات في البوكس وانا طايرة من الفرحة وقعدنا شوية والزمن كان اتأخر رجعنا الصيدلية ركبت عربيتي وودعتو ورجعت البيت وطوالي غرفة صوفيا وختيت البوكس في السرير كانت ماف مشيت غرفتي غيرت وجيت راجعة لقيتها فتحت البوكس وهي بتعاين في الحاجات ومصدومة رفعت رأسها عاينت لي
_ الجابها ليكي منو
__ خمني
_ مستحيل يكون عمران
__ انا لو كان جاتني من مجهول كنت حأستبعد انها تكون من عمران بس منو
_ والله العظيم عمران بحبك
__ واااي ان شاءلله من خشمك للكريم . رجعنا تاني نعاين لمحتويات البوكس
_ لا الكباية دي اوفر شديد
__ انتي ما شوفتي صدمتي فيها لمن شوفتها
_ انتي عارفة هديتك دي افضل من سد دهب عديل والله
__ ماف علاقة اصلا انا بحب الهدية لمن الزول يتعب فيها بتكون قيمتها اكبر عايني . مديت ليها الاستيكر
_ بالجد خاف عليكي من برد الشتا . قومنا ضحكنا
_ كدا قومي جربي البلوفر دا . شيلتو ولبستو كان حلو شديد جريت جيبت تلفوني واتصورت بيهو في مرايا صوفيا وطوالي رسلت الصورة لعمران وكتبت فيها
❤في كل المَرات التي قيل لي فيها راجع
نفسك كُنت أرجع إليك ❤
رسل لي "" و ما حأخليكي ترجعي لزول غيري "" .
مشيت صورت البوكس ورفعتو استوري وكتبت
وأذكر تفاصيل ذاك اللقى وأبتسم ❤️