رواية آلة الشر الجزء الثالث من كيان والشيطان الفصل الرابع 4 بقلم محمد منصور
بسم الله توكلت على الله، وهو رب العرش العظيم.
★
ولقى إسلام إن إسحاق دخل ورا المدرب الحمام، فالمدرب بصله باستغراب وقال:
ـ إيه يا إسحاق؟ جاي ورايا ليه؟ عايز إيه؟
إسحاق رد ببرود مرعب:
ـ جاي أكسر رقمك... وأبقى الأفضل.
المدرب حس بخوف غريب وقال:
ـ تقصد إيه بكلامك ده؟
لكن إسحاق ما ردش...
وفجأة، وبحركة احترافية سريعة، مسك رقبة المدرب وضغط على الشريان اللي بيوصل الدم للمخ.
ثواني قليلة جدًا... والمدرب وقع على الأرض جثة هامدة، كأنه مات بسكتة دماغية طبيعية!
إسلام اتجمد مكانه من الرعب...
وكان مستخبي يراقب اللي حصل، ولما حاول يخرج بهدوء، رجله خبطت في سلة الزبالة.
الصوت خلا إسحاق يلف بسرعة ناحية الباب.
إسلام قلبه كان هيقف، لكنه جرى بسرعة وخرج من الحمام قبل ما إسحاق يمسكه.
ووسط زحمة أعضاء النادي، بدأ يندس بينهم، بينما إسحاق واقف يبص في الوجوه بعينين مرعبتين... كأنه جهاز بيعمل مسح للبشر!
إسلام رجع قعد على الترابيزة وهو بيحاول يبان طبيعي، لكن التوتر كان باين عليه جدًا.
وفجأة...
إسحاق وقف مكانه.
الذكاء الاصطناعي اللي مزروع جوه خلايا مخه قدر يحدد إن فيه شخص قريب جسمه بيفرز كمية أدرينالين عالية جدًا...
وهي المادة اللي جسم الإنسان بيفرزها وقت الخوف.
وببطء مخيف...
بدأ إسحاق يتحرك ناحية إسلام.
إسلام حس إن نهايته قربت، ونظرة إسحاق كانت كفاية تخليه يتأكد إنه اتكشف فعلًا.
ولسه هيقوم يجري...
سمع صوت واحد من أعضاء النادي بيصرخ:
ـ الحقونااا! الكابتن فادي مدرب السباحة ميت جوه الحمام!
في لحظة، النادي كله اتقلب فوضى.
الناس جريت ناحية الحمام، والصريخ ملأ المكان.
إسلام استغل الزحمة...
وجرى، لكن مش ناحية الحمام...
ناحية بوابة النادي مباشرة.
وفي ثواني، اختفى من قدام عيون إسحاق... ونجح يهرب.
،،،،،،،،،،،،،،،،
قدام النادي، كان إسلام قاعد جوه تاكسي، مستني خروج إسحاق.
وبمجرد ما إسحاق خرج، وقفت قدامه عربية مرسيدس موديل السنة.
نزل السواق بسرعة وفتح له الباب الخلفي باحترام غريب.
ركب إسحاق... وتحركت العربية.
إسلام قال بسرعة لسواق التاكسي:
ـ ورا المرسيدس دي.
وفعلًا، بدأ التاكسي يطاردها من شارع لشارع، ومن منطقة لمنطقة.
وفجأة...
المرسيدس ركنت جنب الرصيف قدام مول صغير.
إسلام قال للسواق:
ـ اركن على جنب بسرعة.
نزل من التاكسي، وحاسب السواق، وأول ما لف...
اتصدم.
لقى إسحاق واقف وراه مباشرة، بيبصله بعينين باردتين ويقول:
ـ ريحة الأدرينالين بتاعتك... لسه شاممها.
إسلام بلع ريقه وقال بتوتر:
ـ أنا مش فاهم إنت بتتكلم عن إيه.
إسحاق قرب منه وقال:
ـ أنا عمري عشر سنين... لكن بعقلية تتفوق على آخر جيل تكنولوجيا.
إنت مين؟ وعايز مني إيه؟
إسلام حاول يتكلم، لكن فجأة...
إسحاق داس على رجله بكل قوته!
صوت تكسير صوابعه خلا العرق يتصبب من جسمه، وكاد يصرخ، لكن إسحاق قرب من ودنه وقال ببرود قاتل:
ـ لو صرخت... أو لفت الأنظار لينا، هكسر عضم رجلك كلها.
إسلام اضطر يكتم صرخته بالعافية.
وإسحاق بيبص جواه مباشرة قال:
ـ ممنوع أعمل أي حاجة خارقة تلفت الانتباه.
ماحدش لازم يعرف إني روبوت... علشان كده تجاوب بهدوء.
وبدأ يضغط أكتر على رجله وهو يقول:
ـ قولي... إنت مين؟
إسلام فكر بسرعة، وبعد لحظات قال بصعوبة:
ـ أنا مندوب من المركز الإيطالي اللي تم تصنيعك فيه.
إسحاق سكت للحظة... ورفع رجله من فوق قدمه.
إسلام بدأ ياخد نفسه بالعافية، وقال:
ـ جاي من طرف الدكتور روبرت... الأب الروحي ليكم.
إسحاق بدأ يبحث داخل ذاكرته الاصطناعية...
وبالفعل ظهر قدامه ملف لدكتور اسمه "روبرت" كان شغال في مركز الأبحاث الإيطالي.
فقال إسحاق:
ـ آسف على الطريقة اللي اتعاملت بيها معاك... لكن التواصل بينا بيكون عن طريق "العميلة صفر".
وهي الوحيدة اللي معاها شفرة الالتقاء وقت الخطر.
إسلام قال بسرعة:
ـ أنا ماعرفش حاجة عن العميلة صفر.
كل اللي أعرفه إن فيه روبوت انشق عنكم، وطلب مني أتخلص منك... وهو نفسه اللي قتل الدكتور روبرت بعد ما طلب مني أحذرك منها.
إسحاق قال بتركيز:
ـ منها؟ مين؟
إسلام همس:
ـ واحدة اسمها... عفاف.
بدأ إسحاق يفتش في كل السجلات الداخلية...
لكن الاسم ماكانش موجود.
رفع عينه باستغراب وقال:
ـ مافيش أي روبوت بالاسم ده.
إسلام قال:
ـ غريبة...
إسحاق رد:
ـ راجعت كل البيانات. الاسم غير موجود.
إسلام سأله:
ـ طب ليه عايزة تخلص منك؟
إسحاق قال ببرود:
ـ إجابة السؤال ده عندها هي وبس.
وشكرًا على التحذير... وأتمنى اللي شوفته في حمام النادي يفضل سر.
إسلام هز راسه وقال:
ـ طب... وعفاف؟
إسحاق لف ضهره وهو بيقول:
ـ ماعرفهاش...
لكن أعرف إني أقدر أحمي نفسي منها.
ومشي إسحاق، وساب إسلام واقف مكانه بيقول لنفسه:
ـ حاولت أستخدم إسحاق علشان يخلصني من عفاف... وأخلي الشر يواجه الشر، زي ما كيان بتعمل.
لكن فشلت...
ودلوقتي لازم أروح العنوان التاني.
وبص في موبايله على صورة روبوت تالت دخل مصر، وكان واقف وسط عيلة كاملة.
"عادل الدولة"...
اسم غريب...
لكن صاحبه أغرب بكتير.
،،،،،،،،،،،،،،،،
وفي نفس الوقت...
كانت كيان قاعدة في مطبخ قصر مليكة، وزينب بتحطلها الأكل وهي بتقول:
ـ إنتِ ربنا كتبلك عمر جديد.
مليكة هانم كانت هتخلص عليكي فعلًا لو طلعتي كدابة.
كيان قالت وهي بتاكل:
ـ بس واضح أوي إن مليكة مهووسة بالتكنولوجيا.
زينب ضحكت وهي بتحط آخر طبق قدامها:
ـ مهووسة؟! دي تعشقها عشق.
أي اختراع جديد ينزل أمريكا أو أوروبا تشتريه فورًا، حتى لو بملايين.
وبعدين قربت منها وقالت بصوت واطي:
ـ بس الشهادة لله... قلبها طيب جدًا.
إنما ساعات تحسي إنها مجنونة شوية.
كيان رفعت عينها باهتمام وقالت:
ـ مجنونة إزاي؟
زينب قعدت قدامها وقالت:
ـ هحكيلك... أصل أنا ارتحتلك.
كيان ضحكت وقالت:
ـ ارتحتِ لي بعد ما بلغتي الحرس إني كدابة؟!
زينب ردت بسرعة:
ـ أومال كنتِ عايزاني أدخل واحدة معرفهاش القصر؟
افرضي كنتِ حرامية!
كيان ابتسمت وقالت:
ـ لا، واضح إنك ناصحة وعارفة كل حاجة بتحصل هنا.
احكي بقى.
زينب أخدت نفس عميق وقالت:
ـ مليكة هانم ماكنش بيجيلها أطفال رغم جوازها من أربع سنين...
لحد ما في يوم، دخلت عليها صاحبتها "هايدي" وقالتلها...
،،،،،،،،،،،،،،،،
ونرجع بالأحداث كام شهر لورا...
كانت هايدي قاعدة قدام مليكة وهي بتقول بابتسامة:
ـ الطفل اللي طلبتيه... هيوصل من إيطاليا بعد يومين.
مليكة قامت من مكانها بفرحة هستيرية:
ـ بجد؟!
هايدي ضحكت:
ـ أومال بهزر؟
أول طفل روبوت من نوعه يدخل الشرق الأوسط... نتيجة أبحاث مركز إيطالي ضخم.
مليكة قالت بلهفة:
ـ المهم يطلع شبه الصورة اللي شوفتها.
هايدي:
ـ نسخة طبق الأصل.
وهتحسي إنه إنسان طبيعي جدًا... حب بلا حدود.
مليكة قالت وعينيها بتلمع:
ـ أنا مش مصدقة إن هيبقى عندي طفل بذكاء اصطناعي!
هايدي ابتسمت بخبث وقالت:
ـ حضري باقي الفلوس أول ما يوصل ميناء القاهرة.
،،،،،،،،،،،،،،،،
ونرجع تاني للحاضر...
كيان بصت لزينب وقالت:
ـ والطفل ده هو فؤاد؟
زينب هزت راسها:
ـ أيوه... وسمته فؤاد على اسم أول حب في حياتها.
كيان سألت:
ـ وقدر يملّي حياتها؟
زينب تنهدت وقالت:
ـ في الأول كان كل حياتها...
لحد ما حملت، ومن وقتها بدأت تهمله.
وفؤاد اتغير.
كيان قالت بتركيز:
ـ اتغير إزاي؟
زينب بلعت ريقها وقالت بخوف:
ـ بقي دايمًا حزين... وعنيف.
وفي مرة دخلت أوضته وشفت حاجة عمري ما هنساها...
،،،،،،،،،،،،،،،،
رجعنا بالأحداث كام شهر لورا...
زينب فتحت باب أوضة فؤاد وهي بتقول:
ـ فؤاد بيه...
لكن صوتها وقف فجأة.
لأنها شافته قاعد قدام عروسة شبه مليكة بالظبط...
وكان فاتح بطنها بإيده، وبيخرج منها طفل مشوه من غير رأس!
إيده كانت متلطخة بدم صناعي مرعب.
وفؤاد بصلها بنظرة باردة تخوف وقال:
ـ كنتِ عايزة إيه يا زينب؟
زينب حاولت تتمالك نفسها وقالت برعب:
ـ مليكة هانم عايزاك تحت.
فؤاد رد بجمود مرعب:
ـ قوليلها مش فاضي...
بتدرب على يوم الولادة.
،،،،،،،،،،،،،،،،
رجعنا للحاضر...
كيان قالت بصدمة:
ـ يعني فؤاد ناوي يأذي مليكة والطفل اللي في بطنها؟
زينب قالت وهي مرعوبة:
ـ الله أعلم... بس أنا خوفت جدًا وقتها.
كيان سألت:
ـ ومليكة عرفت؟
زينب ضحكت بسخرية وقالت:
ـ لما حكيتلها... ضحكت وقالتلي:
"الروبوتات مايعرفوش يقتلوا. أكيد شاف مشهد في فيلم وبيقلده."
وقالتلي كمان:
"فؤاد متبرمج على الحب وبس."
وفجأة...
دخلت مليكة المطبخ.
زينب وكيان وقفوا بسرعة، لكن مليكة قالت بابتسامة:
ـ اقعدي كملي أكلك يا كيان.
كيان ابتسمت:
ـ شبعت الحمد لله.
مليكة بصت لزينب وقالت بهزار:
ـ الأكل كان مالح النهارده؟
زينب ضحكت:
ـ بقيت أظبط الملح والله.
الكل ضحك، وبعد شوية طلعت مليكة فلوس وادتها لكيان وهي بتقول:
ـ خدي... تستري بيهم حالك.
كيان اتكسفت، لكن زينب قالت:
ـ خدي من مليكة هانم، ماتكسفيش.
أخدت كيان الفلوس وقالت:
ـ ربنا يسترها معاكي.
مليكة قالت لزينب:
ـ حطي لها شوية أكل في شنطة كبيرة تاخده معاها.
وبعدين بصت لكيان وقالت:
ـ أي حاجة تحتاجيها... القصر مفتوح ليكي.
خرجت مليكة من المطبخ...
وخرجت كيان من القصر.
لكن...
أول ما كيان اختفت من قدام الباب، طلعت زينب موبايلها واتصلت بحد وقالت بصوت مختلف تمامًا:
ـ خليتها تصدق إن فؤاد روبوت وعايز يقتل مليكة، زي ما طلبتي.
أنا نفذت المطلوب... المهم رضا "العميلة صفر".
اللي هتهدّ مستقبل ابن مليكة الرضيع.
وقفلت المكالمة...
وبصت من شباك المطبخ على كيان وهي ماشية.
وفجأة...
عيون زينب اتحولت للون النحاس اللامع.
واتكشف السر المرعب...
زينب هي كمان روبوت!!!
،،،،،،،،،،،،،،،،
مش هقول غير حاجة واحدة...
واضح إن الحرب بين البشر والروبوتات لسه ما بدأتش أصلًا! 😈🔥
الجزء الاول من كيان والشيطان من هنا
الجزء الثاني من كيان والشيطان من هنا