رواية شلة بنات الفصل الثالث والثلاثون 33 والرابع والثلاثون 34 بقلم شذى عبدالمكرم
صحيت الصباح حاسة بشوية خمول قعدت في نص السرير التفت سام كان ماف مسكت تلفوني لقيت الزمن فات قولت ما يكون سام طلع للشغل تاني قولت ليه ما كلمني انو ماشي خلاص كشرت وشي وهرمونات الحمل بدت فجأة صرخت بأسمو
روز: ساااااااام . جاني سريع داخل الغرفة لمن اتخلعت
سام: مالك . قومت ضحكت شديد
سام: مالك بتضحكي
روز: انا قايلاك مشيت الشغل وما كلمتني وصرخت اسمك من الزعل . قام ضحك وجاني
سام: انتي هبلة يا بت حتى لو مشيت تصرخي براكي كدا
روز: والله ما عارفة بس بتك قالت لي اصرخي . ضحكنا
سام: ربنا يعيني
روز: والله بالجد ربنا يعينك . قومت ودخلت الحمام وطلعت مشيت عملت الشاي
روز: انت الليلة ما ماشي الشغل؟
سام: انتي طارداني؟
روز: بالعكس والله عاجبني انو قاعد معاي
سام: ما عندي محاضرات الليلة بس عندي اجتماع تسليم مشروع الساعة 1
روز: احلى حاجة
سام: اها انتي كيف ان شاءلله بطنك ما واجعاكي
روز: لالا اطمن الحمدلله
سام: الحمدلله بعد الفطور حنمشي لناس رامي
روز: تمام . فرحت شديد لانو عاوزة امشي بس قولت مدام هو ما شغال اقعد معاهو بس كويس جات منو
سام: لانو لو قعدنا اكيد ما حتركزي معاي . قومت ضحكت
روز: يعني عارفني
سام: عيب في حقي والله . ضحكت
بعد الفطور مشينا لناس نوسة كانت احسن والتوأم حلاتهم ما شاء الله ربنا يحفظهم والشلة كلها جات وقعدنا معاها
ريان: عصفورين بحجر واحد يا نوسة مكنة لكن . ضحكنا
نوسة: انا نوسة ما تنسو
روز: هوووي ما تنسي انو نحنا السبب بسبب رايس وريل يعني الجينات مننا . وعاينت ليها بأفتراء ضحكو فيني
نوسة: انا جيبتهم توأم كدا اشوف حقك دا توأم ولالا
روز: ان شاءلله يطلعو توأم يا رب
نوسة: ان شاءلله يارب
نبأ: انا حاسة بأعراض الحمل بس ما عارفة
ريان: ان شاءلله يكون حمل
روز: حيبقى ان شاءلله
نبأ: ان شاء الله
نوسة: انتو عارفين قبل ما اعرف اني حامل رامي فحصني قال لي انتي حامل قولت ليهو مستحيل انت عرفت كيف . كلهم فكو الضحكة
ريان: قولت لي نسيتي انو راجلك دكتور
نوسة: والله طار لي من رأسي
روز: قمر وانتي واحمد ما عاوزين تعملو عرسكم
قمر: احمد دا صعب شديد عشان كدا انا قاعدة ااجل خايفة شوية ياااخ
روز: لو ما مرتاحة انسحبي بس
نوسة: روز معاها حق
قمر: بس انا بحبو والله
ريان: والله صعب المجازفة
روز: واجهي خلاص
قمر: قولتي كدا؟
روز: ايي حتقعدي معلقة كدا لمتين وذي ما قولت ليكي احمد ابجيقة بحق وحقيقة ختي تحت الامر الواقع بس
قمر: تمام
فجأة هديل جات داخلة مع بتها بقت كبيرة عمرها سنة نزلتها في الارض
روز: سميتي تعالي . فتحت ليها ايادي جاتني براحة رفعتها فوق وبوستها
روز: حبيبي انا . وختيتها في رجلي وبقيت اشاغل فيها وهي تضحك بس
هديل: شابكاني اليوم كلو روس روس "روز" . قومت ضحكت وحضنتها شديد وشيلت حلاوة من الشيالة واديتها ليهو وكدا الشلة اكتملت وبقينا نتونس جا ميدو داخل
نوسة: حبيبي تعال . جا قعد جنب نوسة وهو زعلان هي صلحت قعدتها وضمنتو من كتفو
نوسة: حبيبي انا مالو زعلان
ميدو: انتي نسيتي اخوكي خلاص من اتزوجتي وهسي مع اولادك حتنسيني بالمرة . وقام بكى وهي بكت ونحنا كلنا اتأثرت
نوسة ببكي: معقولة في زول بنسى روحو والله ما نسيتك حبيبي . وباستو في رأسو
ميدو: ما قاعده تسألي مني ابدا
نوسة: قاعدة اسأل والله
روز: خلونا نطلع نخليهم براهم . قومنا طلعنا كلنا خليناها مع ميدو.....
___________
من جانب نوسة
كلام ميدو دا هزاني صح اهملتو والله بس هو قطعة من روحي اخوي واحد بس
نوسة: ميدو ارفع رجلك فوق . طلع جزمتو ودخل رجولو جوا الدفاية معاي حضنتو شديد
نوسة: زعلان من اختك . هز رأسو بمعنى ايي
نوسة: كدا احكي لي الزعلك مني شنو
ميدو: كل حاجة حتى بقيتي ما بتلعبي معاي ذي زمان وتحديات الفنايل ابدا
نوسة: بس بقيت متزوجة انا
ميدو: كان ما تتزوجي ياااخ انا بكره رامي لانو شالك مني . هنا بكيت اكتر ميدو شايل في قلبو شديد هو ما عندو غيري
ميدو: انتي عارفه انا عيان وما بقدر العب ذي باقي الشفع انتي كنتي كل اصحابي بس هسي خلاص خليتيني . ما عرفت اقول ليهو شنو بقيت ابكي بس وهو ببكي
ميدو: بلعب بالبلاستشين براي ماف زول بلعب معاي ارجعي معانا انا ما عندي غيرك . ضماني شديد وانا ضميت وبقى يبكي في حضني وانا ببكي رامي جا داخل الغرفة ونحنا الاتنين بنبكي
رامي: مالك . ميدو ضماني شديد
ميدو: نوسة خلي يطلع برا انا بكرهو . رامي اتخلع
رامي: انا عملت ليك شنو لمن بتكرهني يا ميدو .
ميدو: انت شيلت اختي مني
رامي: بس اهو نوسة جنبك وتقدر تشوفها اي وقت
ميدو: ما صح بقت ما بتلعب معاي ذي زمان وبقت ما بتحبني ذي زمان
نوسة: والله بحبك يا ميدو . همس لي بالراحة
ميدو: نوسة قلبي وجعاني . اتنفضت وزحيت منو ولفتو علي
نوسة: جادي بوجعك؟ . هز رأسو بانو ايي . صرخت
نوسة: رامي تعال شوف ميدو قلبو واجعو . جا جاري عليهو وفحصو وبالفعل اتشنج انا قلبي وقع في يدي بقيت ارجف وانا ماسكاهو
رامي: وين ادويتو
نوسة: اسأل امي . رامي جرا برا جاب الادوية وبلعو والبيت كلو جا الغرفة بعد بلع حبوبو ارتاح شويه حضنتو شديد وانا ببكي كلو سببي ميدو تعب رقد في صدري لمن نام رامي جا يرفعو
نوسة: لالا خليهو جنبي
رامي: عشان انتي ترتاحي شوية
نوسة: انا كدا مرتاحة . اتفهم حالتي كلهم طلعو برا خلوني معاهو ضميتو شديد ونومت لمن صحيت كان لسع نايم خوفت شوفت تنفسو كان بتنفس اطمنت بقيت ارتب في شعرو دا اكتر يوم انكسرت فيهو لمن صحى
نوسة: حبيبي احسن هسي
ميدو: ايي . جوني ريل ورايس
رايس: ميدو تعال العب معانا
نوسة: خلوهو ميدو حيلعب معاي انا صح؟ . عاين لي
ميدو: حتلعبي معاي؟
نوسة: طبعا امشي قول لرامي نوسة دايرة تلفونك
ميدو: ما داير امشي ليهو . ضحكت
نوسة: رامي بحبك شديد حتى اشترى ليكي البلاستيشن نسيت
ميدو: تمام خلاص . مشى جاب التلفون وجا
نوسة: رأيك شنو نكمل النت بتاع رامي بالالعاب . قام ضحك
ميدو: ايي . نزلنا لعبة كدا ظابطة وغالية وبقينا نلعب بالدور لمن جابو لي الاكل اكلت معاهو برانا وجابو لي التوأم
نوسة: عاين حلوين كيف انت خالهم
ميدو: بالجد؟
نوسة: ايي . ميدو طلع برا رضعتهم نامو تاني كلمتهم نادو لي ميدو نزلنا لعبة تانية بتتلعب نفرين بالواي فاي بقينا نلعب بتلفوني وتلفون رامي وميدو كان مبسوط شديد واحلى حاجة انو كلهم اتفهمو الوضع ماف زول ازعجنا الا اذا جابو لي حاجة لمن خلاص جو كلهم ودعوني
ميدو: نوسة حتلعبي معاي تاني صح؟
نوسة: ايي حبيبي حألعب
ميدو: يلا مع السلامة
نوسة: ما حتقعد معاي
ميدو: المدرسة والترحيل بتجيني هناك
نوسة: بعد المدرسة حتجيني؟
ميدو: ايي
نوسة: تعال . جاني بوستو كتير ومشى جاتني امي
امي: ميدو الليلة زعل شديد
نوسة: والله قلبي وجعني
امي: هو اتعود ليكي بس بكرة لمن يكبر حيفهم
نوسة: ان شاءلله
بعد ساعتين جا داخل الغرفة مع رامي فرحت
نوسة: ميدو جيت مع منو
ميدو: مع رامي . عاينت لرامي بفرحة
رامي: ميدو محتاج قربك شديد الفترة دي عشان كدا جيبنا ملابسو حيقعد معاكي ومع امو واما المدرسة انا حأوصلو وحأكلم الترحيل بوصف البيت موش يا صحبي
ميدو: ايي
رامي: بكرة حنمشي نشتري بلاستيشن 5
ميدو: حتشتريهو لي
رامي: موش وعدتك؟
ميدو: ايي
رامي: ايي وحنلعب بيهو وحتى نوسة حتلعب معانا ونرجع لدوري الفنايل . ميدو فرح شديد وتلقائيا قلبي فرح اكتر منو
ميدو: يسسس . وقام يصفق
رامي: هسي اجري لماما تغير ليك ملابسك
ميدو: تمام . ومشى ورامي قرب علي
نوسة: والله يا رامي انا بحبك شديد . لمن عيوني دمعو
رامي: والله اي حاجة ولا زعلك . ومسح لي دموعي وسلم علي في رأسي
نوسة: انا محظوظة بيك شديد
رامي: بالعكس والله انا المحظوظ كونو تخلي قطعة من قلبك وتجي تقعدي معاي دا بالدنيا عندي . رقدت في كتفو
نوسة: هسي ميدو غيران من التوأم لو جيبت غيرهم حيعمل شنو . وضحكت رامي سكت ما علق ابدا استغربت بس مشيت الموضوع
نوسة: ما اخترنا اسماء للتوأم لسع
رامي: لانو ما اتوقعناهم توأم . وضحكنا
رامي: بس اختيار الاسماء عليكي فكري براحتك واديكي رأيي
نوسة: تمام
ميدو غير وجاني راجع ركب معاي في السرير
امي: ميدو انزل تعال نوم معاي اختك عيانة . ميدو عاين لي
ميدو: عيانة؟
نوسة: شوية بس
ميدو: خلاص اخليكي ترتاحي . داير ينزل مسكتو
نوسة: لالا خليك قاعد معاي حتنوم معاي الليلة
امي: دا ممكن يتعبك مع العملية
نوسة: السرير دبل وواسع خلي انا فرحانة بوجودو . لمن شافتني مصرة خلتني وطلعت ورجعنا نلعب بالتلفون وميدو مبسوط رامي جا داخل
رامي: لالا بديت اغير والله . ضحكت
نوسة: لالا خلاص انا بعتك . قام ضحك
رامي: واضح جدا نهائي حتى ما سألتي مني اليوم نهائي
نوسة: لاني بشعر بوجودك حولي دايما وانت هنا . وختيت يدي في قلبي .ابتسم لي ورسل لي بوسة في الجو وطبعا ميدو مشغول بالتلفون ما منتبه عمل لي باي وطلع رجعت العب مع ميدو لمن نومنا
بعد يومين عملنا السماية واخترت الاسماء يمان ويمنى ورامي واقفني الرأي وميدو لسع موجود معانا ودا اكتر حاجة كانت مفرحاني وهو بلعب مع رامي وتلقائيا الكره الاتجاه رامي اتقلب حب
___________
من جانب نبأ
بعد المناقشة مع الشلة بموضوع اني حاسة اني حامل بقيت افكر لو طلعت حامل احساسي حيكون ايه اليوم التاني شيلت فطوري ومشيت افطر مع نسيبتي
ام مراد: صحبتك بقيتي كيف
نبأ: بقت كويسة الحمدلله
ام مراد: الحمدلله السماية حأمشي معاكي
نبأ: طوالي
ام مراد: ليه حاسة انك حامل
نبأ: والله يا عمتي انا ذاتي حاسة كدا
ام مراد: امشي افحصي بعدين مع ميار
نبأ: ان شاءلله
بالفعل مشيت مع ميار وفحصت طلعت حامل في الشهر التاني فرحت شديد رجعنا البيت
ام مراد: بشرو . نزلت رأسي بفرحة وخجل
نبأ: حامل . طوالي عمتي فكت الزغوطة كانت فرحانة لي شديد وحمواتي كلهم طلعو مع الزغوطة ولمن عرفو اي وحدة زغرطت لي والله كنت مبسوطة اني وسطهم اسرة جميلة شديد
ام مراد: ماف وحدة تبارك لمراد خلو مرتو تبشرو بالاول . خجلت من كلامها وحمواتي كلهم ضحكو
بالليل بقيت افكر كيف اقول لمراد انا حامل كيف لمن لقيت طريقة ونفذتها كنت متوترة هو لاحظ لي
مراد: مالك
نبأ: في حاجة عاوزة اقولا
مراد: احكي طوالي ليه الخوف دا كلو
نبأ: ما خايفة
مراد: تعالي . مشيت جنبو وقعدت
نبأ: متذكر الكتاب الجيبتو ليك في يوم المناقشة
مراد: مستحيل انساهو
نبأ: كدا جيبو
مراد: ليه
نبأ: انت جيبو بس . مشى جابو واداني ليهو فتحت اخر ورق كنت كاتبة فيها وبخط حلو
" جاهز انك تتحمل مسوؤليتي يا بابا "
لفتو عليهو وانا بعاين ليهو هو كان بحاول يستوعب فجأة عاين لي وبلمعة في عيونو
مراد: انتي حامل؟ . عاينت ليهو بأبتسامة وهزيت رأسي حضني شديد كان مبسوط
مراد: اخيرا حيكون عندي اسرة ياااخ انا بحبك . عيونو كانو بلمعو مسكني يدو وجراني ما فاهمة حاجة انا
نبأ: مراد موديني وين
مراد: ورح بس . مشينا البيت الكبير وقف قدام امو
مراد: امي انتي حتبقي حبوبة . عمتو تاني فكت الزغوتة وهو مبسوط خجلوني زيادة تاني حمواتي زغرتو ليهو وانا فرحانة وخجلانة كلهم باركو لي من جديد واليوم كان حلو شديد ........
الرابع والثلاثون
في يوم كنت في الشهر الخامس وسام كان في اجازة شهر كامل هرموناتي قامت علي لانو اليوم كلو ما شغال بي نهائي كنت في الغرفة وهو بشاهد في الصالة مشيت وقفت قدام التلفزيون
سام: مالك ياااخ زحي من قدامي . قالها بزهج
روز: ما تتزهج فيني فاهم
سام: بالله يا زور انا ما فايق ولا رايق ليكي كدا زحي امشي فضي هرموناتك في زول تاني . زعلت منو وزحيت من التلفيزيون ودخلت الغرفة ولبست توبي وجيت طالعة
روز: ماشة بيت امي
سام: والسبب
روز: ما بعرف
سام: روز بالله خلي حركاتك دي
روز: يعني خلاص بقيت ما قادر تتحملني يلا وديني بيت امي . هو نزل رأسو ومسكو بأنو ختا اياديهو ورا رقبتو هو صح والله الفترة الاخيرة دي بقيت نكدية زيادة عن اللزوم
روز: سام انا ماشة
سام: دقيقه اوصلك . اتفاجأت من ردو دا دخل شال مفاتيحو
سام: اطلعي . كنت مصدومة فيهو كنت منتظرة انو يحنسني او كدا بس لا ماشي يوديني لامي طلعت وراهو وركبنا العربية خشمو ما فتحو لي لمن وصلنا
روز: تاني ما حأرجع نهائي خليك عارف
سام: تمام . بقيت مصدومة فيهو شكلو خلاص وصل لاخر حد معاي
روز: وبعد اولد تطلقني طوالي
سام: حاضر في حاجة تانية
روز: لالا خلي بالك من نفسك . ونزلت بزعل وهو دور عربيتو ومشى خلاني واقفة ضربت الباب فتحتو لي امي
امي: رزة بتي اتفضلي . دخلت وانا ساكتة ومشينا قعدنا
امي: مالك ساكتة
روز: ماف حاجة . ما عرفت اقول ليها شنو
امي: ارتاحي كيف مع الحمل
روز: خلاني نكدية زيادة عن اللزوم . قامت تضحك
امي: ربنا يعين سام عليك . قربت اقول ليها سام قنع خلاص وناوي يطلقني بس سكتا جابت لي عصير وبقينا نتكلم شوية فرقت لي كتير والتوأم رجعو من المدرسة وقعدو معاي وكل دقيقتين يهبشو في بطني ويضحكو
رايس: روز حبيبة جوز اللوز وين الحلاوة حقنا . ضحكت لانو دايما بجيب ليهم لو جاية الا المرة دي نسيت لانو جيت زعلانة
روز: نسيتهم بس المرة الجاية بجيب ليكم اتنين اتنين
ريل: يسس . وجرو يلعبو رجعت اتونس مع امي
روز: امي دايرة بطاطس بالدكوة وليمون كتير ولو بمبي بكون ما قصرتي . قامت ضحكت
امي: حاضر يا الست الحامل . ضحكنا ومشت سلقت لي البمبي والبطاطس مع بعض وحلت لي الدكوة قعدت اكل وابكي في نفس الوقت لانو اتذكرت سام وانو ناوي يطلقني وامي تضحك فيني
امي: والله هرموناتك عجيبة عديل كدا كأنك اول وحدة تحمل هسي بتبكي مالك
روز: اتذكرت حاجة . قامت تضحك
امي: وبتأكلي وبتبكي في نفس الوقت؟
روز: الاكل ما عندو علاقة بالزعل
امي: لالا حالتك دي مستعصية . واصلت اكل وابكي لمن خلصت وبعدها مشيت نومت قومت قريب للمغرب اتغدينا وبقيت اتونس مع ابوي لمن هو مشى الصلاة وبعدها انا صليت وبقيت قاعدة محتارة اشتقت لسام شديد وبقيت افكر فيهو فجأة الباب ضرب مشت ريل تفتحو اتأخرت شوية جا سام داخل وهو ماسكها من ايدها وهي ماسكة في ايدها التانية كيس وفرحانة وبقت تنادي في رايس ورايس جات طالعة
ريل: شوفي سام جاب لينا شنو . شكروهو وجرو جوا
سام: كيفك
روز: اشتقت ليك . و غطيت وشي بأيادي قام ضحك
سام: يعني الزهجة فكت كدا ممكن ارجعك معاي . فتحت وشي
روز: جيت ترجعني؟
سام: هو انا اقدر بلاكي ؟. غطيت وشي وهزيت رأسي بمعنى لالا قام ضحك تاني امي جات سلمت عليهو وقعد معانا ابوي رجع من الصلاة واتونسو شوية وطلعنا رجعنا بيتنا في الطريق
روز: سام
سام: نعم
روز: هل لو طلبت حاجة حترفض؟
سام: على حسب الطلب
روز: دايرة بروست
سام: شوفي اي حاجة نفسك فيها اكل او شراب ما تترددي ابدا اوكي؟
روز: لانو انت زهجت من نكدي . قولتها بزعل
سام: انا ما زهجت ومستحيل ازهج لانو الحاجة دي ما منك ابدا ودي هرمونات الحمل وانا قاصد اوديكي لامك لانك حترتاحي هناك واكتر زول بفهمك هي وكنت متأكد لمن اجي ارجعك بكون اعتي جميع حساباتك ودا الحصل فعلا
روز: ياااخ انت قطعة سكر بس . قام ضحك
سام: وانتي قطعة بطيخة . لاني بقيت سمينة قومت ضربتو وهو يضحك مشينا شال لي بروست ورجعنا البيت وبقيت احاول اخفف نكد بس ما بقدر بس سام مستحمل ماف طريقة .......
___________
من جانب نوسة
مشيت التطعيم مع امي ودينا التوأم بس ببكو بكي وانا ببكي معاهم قلب الام يا ناس وامي تضحك فيني بالليل كنت برتب الملابس في الدولاب وبحكي لرامي بالدراما العملتها محل التطعيم حلفت ما يطعنوهم بالاول لمن شوفت الشفع ببكو من الحقنة ورامي يضحك بس وهو كان بهز في يمان فجأة قولت ليهو
نوسة: رامي لو جيبت ولد تاني حأسمي يامن عشان تكتمل الرصة . وضحكت بس رامي وقف ضحك التفت عليهو لقيت ملامح وشو متغيرة قام رقد يمان في سريرو
رامي: نوسة تعالي . خليت الملابس وجيت قعدت جنبو مسك ايادي الاتنين
رامي: في حاجة لازم تعرفيها
نوسة: في شنو
رامي: نحنا ما بنقدر نجيب اولاد تاني . اتخلعت وسحبت يدي
نوسة: كيف يعني
رامي: انتي شالو ليكي الرحم بتاعك . ضحكت
نوسة: مستحيل طبعا بتهظر صح؟ . نزل رأسو تحت وانا لسع تحت الصدمة مستنية يقول لي انو بهظر لمن عرفتو جادي قومت فوق وبقيت ببكي بحرقة وماشة وجاية وخاتة ايادي من الخلعة وهو ماسك رأسو وببكي مشيت قعدت جنبو وحضنتو وبقيت ابكي شديد
نوسة: رامي يعني تاني ما حألد نهائي
رامي: انا السبب . زحيت منو بخلعة
نوسة: كيف
رامي: اليوم داك لو ما خليتك براكي ما كان دا حصل ليكي كدا واضطرو يشيلو الرحم . اتنفست براحة كنت قايلة هو القال يشيلو لي الرحم . رجعت تاني مسكت فيهو
نوسة: انت ما كنت عارف انو حيحصل كدا بس قلبي واجعني . وببكي بس وهو مسك فيني بعد كلامي دا افتكر انو حأخاصمو ولا كدا بس دا ما ذنبو ودا كان قضاء وقدر زحيت منو
نوسة: رامي انت كنت عاوز على الاقل تلاتة اولاد ما بقدر احقق ليك امنيتك دي
رامي: بس انا اولادي تلاتة حاليا . عاينت ليه بأستغراب نظام التالت دا جا من وين مسح لي دموعي
رامي: عندي يمنى ويمان ونوسة وديل بكفوني وزيادة . بكيت تاني ضماني لمن هديت ومن هناك تعاملو اختلف لرامي واهتمامو زاد لانو شايف انو هو السبب بس انا ابدا ما فكرت كدا وحمدت ربنا انو رزقني بولدين منو وانا كنت التالتة ليهو بس الكنت الخايفة منو انو في يوم يقول داير اولاد زيادة فيضطر انو يتزوج بس تعاملو معاي بوحي بأنو انا مكفياهو وزيادة وحبو زاد بالعكس وكنت فرحانة بالحاجة دي........
___________
من جانب ريان
انا وريان قصتنا بدت بمشكلة وللان وبعد اتزوجنا مشاكلنا ما انتهت بس مشاكلنا حلوة وبتضحك بس قصة اسماءنا بتضحك اكتر اي زول بستغرب انو الاتنين ريان بس نحنا عادي
__ ريان
_ نعم
__ امي عازمانا شاي المغرب
_ جدا
__ كانت عازمانا الغدا بس انا رفضت
_ والسبب
__ داير انفرد بمرتي الليلة
_ كيف يعني
__ عازمك غدا برا وبعدها من هناك نمشي ليهم . مشيت هبشت جيبنو
_ انت طبيعي؟
__ اسمعيني جليت الفكرة اطبخي الليلة يلا مع السلامه . قومت ضحكت ومسكتو
_ والله بهظر معاك ما تبقى مغموص كدا
__ انتي الما فيكي حسنة ابدا
_ ابو الريان خلاص افردها بهظر بس
__ ودا شنو ابو الريان دا
_ بعدين لو جيبنا ولد نسموهو الريان . قام يضحك
__ عشان نتم الناقص صح؟ . وضحكنا
_ رأيك شنو
__ مستحيل طبعا
_ حتى انا ذاتي قولت كدا . وضحكنا ومشيت قدمتو ومشى المكتب قعدت فكرت انو عاوزة اشتغل بس افتح الموضوع مع ريان بعدين يلا مشيت رسمت عند جارتنا كدا بمزاج واديتو دخان وجهزت لي توب وطقمتو بمزاج وجهزت لريان ملابسو والعصر لمن رجع ارتاح شوية وقومنا اتجهزنا وثبتا توبي بمزاج واخر ميكب
__ طالعة حلوة ما شاءلله
_ حلوات عيونك حبيبي
وطلعنا اتغدينا بمزاج واثناء الغدا
_ ريان انا عاوزة اشتغل
__ جدا
_يعني ماف مشكله؟
__ لا يعني شهادتك دي اخدتيها عشان تعايني ليها صح؟ . قومت ضحكت وبعد خلصنا لفينا شوية ومشينا لاهل ريان عزمو اخوانو الاتنين بزوجاتهم واللمة كانت حلوة
ام ريان: ريان . نحنا الاتنين ردينا مع بعض
الاتنين: نعم . كلهم ضحكو فينا حتى نحنا ضحكنا
ريان الشب: امي انتي كنتي قاصدة منو فينا
ام ريان: قاصدة مرتك
ريان الشب: ايوااا يعني انا كنت الدخيل
مرت اخوهو: انتو بتتعاملو كيف في البيت واسمكم واحد كدا
ريان البت: ما هو واحد بنادي الاتنين وبكون هو المقصود
مرت اخوهو: حي صح والله . ضحكو تاني
ريان البت: عمتي كنتي بتقولي شنو
ام ريان: ماشيين زيارة لعمة ريان الاسبوع الجاي في....... حتمشي معانا نحنا النسوان بس؟ . يعني سفر عديل
ام ريان: حنرجع نهاية اليوم . عاينت لريان نظام اخد الاذن ابتسم لي وهز لي رأسو
ريان البت: جدا بمشي معاكم . اخدنا قعدنا وطلعنا في الطريق
__حأفقدك شديد والله
_ بالنسبة؟
__ انا مسافرة وكدا . قام ضحك
_ دي ما اسمها سفر راجعين في نفس اليوم
__ احتمال اعصر عمتي نقعد يومين وكدا
_ والله بجيكي بالليل برجعك . قومت ضحكت
__ نشوف خلاص
بالفعل كم يوم وجا الجمعة وسافرنا وعجبتني الرحلة شديد قيلنا مع عمتهم وهي ظريفة ونحنا كنا خمسة نسوان وهي اصرت انو نبيت ونرجع الصباح بعد شكلة طويلة وعريضة اقتنعتنا وانو بكرة السبت حتى لو وحدة شغالة حتكون في اجازة اي وحدة اتصلت لراجلها تكلمو وانا اتصلت لريان
__ انتو ما جايين؟
_ بايتين
__ عليك الله
_ والله
__ يعني نفذتي الفي بالك
_ لا والله عمتك رفضت نرجع قالت بكرة بس
__ بكرة لو ما رجعتي بجيكي هناك
_ خلاص تمام . وقفلت منو وعمتو جابت لاي وحدة فينا توب وجلباب وقضيناها ونسة وضحك
اليوم التاني قبل الفطور رجالنا وصلو استغربنا طبعا جو هم وخروفهم وخضرواتهم وضبحنا في بيت عمتو وقضينا اليوم ولمينا ليها بيتها ورجعنا بيوتنا السفر ساعتين اصلا وصلنا اخر الليل ونومنا من التعب بعد يوم ظريف شديد
__________
من جانب قمر
سمعت كلام روز ومشيت واجهت احمد اني خايفة وهو اتفهم الموضوع وطمني استخرت وقررت اتم عرسي واحمد فرح بالخطوة دي وبدينا في ترتيبات العرس اداني شهرين اجهز روحي كنت شايفة انو الشهرين مناسبة جدا جا كلم ابوي وكان ما عندو مشكلة ابدا وبالفعل مرت الشهرين وعملنا عرسنا وبعد شهرين من العرس واحمد جاهو عقد شغل برا وعملنا لينا اجراءاتنا بتاعت السفر كنت زعلانة شوية لانو حأبعد عن اهلي وعن رفيقات عمري قبل السفر بأسبوع الشلة عملت لي قعدة ظريفة في بيت ريان مشيت و هديل جات مع بتها روز ونوسة مع توأمها يمنى ويمان وروز كانت حامل ونبأ حامل وريان لسع ربنا ما قسم ليها كانت قعدة ظريفة شديد بالجد مع قصرو معاي و اي وحدة جابت لي هدية للذكرى بس اليوم داك بكينا بكي بالاخص انا حأفترق منهم ........
الفصل الخامس والثلاثون والاخير من هنا