رواية كيان والشيطان الجزء الثاني الفصل الثالث 3 بقلم محمد منصور
بسم الله توكلت علي الله. وهو رب العرش العظيم
وتسافر سحر وتسيب اسيوط نهائي والمرة دي تروح اسكندرية وتشتغل في مصنع نسيج وتقعد في اوضة في دور ارضي كانت مخزن. وتعيش هي وامانه اللي بطنها بتكبر واللي جواها بيتكون وياما فكرت سحر انها تنزل اللي في بطن امانه لكن ازاي تقتل روح ملهاش ذنب. وخلصت شهور الحمل وجه وقت الولادة صرخت امانه اوي وماكنتش مستحملة الوجع وحاولت سحر انها تولدها لكن الولادة كانت متعثرة خرجت جري تشوف داية او دكتور يساعدها وبعد ساعه رجعت بممرضة ليها في الولادة وفتحت باب الاوضة علي امانه. صرخت من اللي شافته
وجريت ناحية امانه اللي ماتت وجنب منها ولد. ايوة ولد حتة من امانه وشبهها بالظبط برضو كان عيل مغولي صرخت سحر علي بنتها اللي ماتت. ما استحملتش الولادة ووجعها وحضنت ابن امانه وبصت له وقالت
جيت للدنيا اللي مليانه شر يا قلب ستك. جيت غدر وظلم اسميك اية بس. هاسميك كريم.
وضمته لصدرها اوي اوي وصرخت بحرقة وهي بتبص لبنتها الميته وقررت تدفنها وترجع الصعيد تاخد بتار بنتها من اللي كان السبب في موتها. ،،،،،،،،
وبعدها بيوم ومن جوة قطر الصعيد تقعد سحر وهي لابسة اسود في اسود وعلي حجرها كريم بترضعه بالبزازه وكان باين عليها انها فعلا ناوية تقتل واحد وهنا ظهر طيف امانه
وكانت لابسة فستان ابيض من حرير بصت لها سحر وقالت
امانه
امانه
شوفتي الفستان الجديد اللي جاب هولي ربنا
ابتسمت سحر وقالت
بقيتي تتكلمي يا امانه
امانه
اة. ربنا رجع لي كل حاجة اتحرمت منها في الدنيا. وباكل فاكهه حلوة اوي. وجاية لك وعايزاكي ترجعي
سحر بغل
ارجع واسيب اللي حرمني منك عايش متهني
امانه
ربنا هينتقم لك منه
سحر
لازم احرمه من حياته
امانه
وكريم ابني
سحر وهي بتبص ل كريم
كريم في عينية. زي ما كنتي انتي
امانه
الدم اخرته خراب
سحر
الخراب هيكون علي دماغ اللي حرمني منك
امانه
ارجعي يا امي وسيبي ربنا يجيب حقي وحقك من اللي عمل فيا كدة
سحر
والنار اللي في قلبي تبرد ازاي
امانه
والله انا في مكان احسن من الدنيا مليون مرة. افرحي لي انا وسط شجر ونور وفاكهة ما بتخلصش. من ساعه ما جيت هنا وانا عمري ما جوعت. وربنا وعدني تكوني معايا بس لو بعدي عن طريق الدم
وهنا تفتح سحر عيونها وتبص حوالين منها تلاقي نفسها في القطر وكريم بيعيط لان البزازة طلعت من بوقة فتحط
سحر البزازة تاني في بوق كريم وتقول في سرها
يارتني اقدر ابعد عن طريق الدم لكن اللي حصلك مش شوية يا امانه ولازم اخد حقك
وتحط ايدها علي السكينة اللي ربطها حوالين وسطها وهي مصممه اكتر علي الشر، ،،،،،،،
وتوصل البلد وتنزل من القطر وتروح ناحية جامع من الجوامع اللي جنب محطة القطر وتنادي علي شيخ الجامع
وبعد السلام تقول سحر
انت شيخ الجامع دة
الشيخ
ايوة يا بنتي
سحر وهي بتدي له كريم
انا رايحة دلوقتي المستشفي وداخلة اوضة العمليات الواد دة يبقي ابن بنتي ماتت وهي بتولده. وابوه كمان مات. وخايفة اموت وانا في العمليات ووقتها مش هايبقي لي حد في الدنيا.
الشيخ
مش فاهم يا بنتي عايزا اية مني
سحر
تخلي العيل دة معاك لو رجعت سليمة هخده منك وارجع بيتي وانا هربيه. ولو مت تودي اي ملجأ.
الشيخ
طلب غريب بصراحة
سحر وهي بتعيط وبتنزل تبوس رجله
بالله عليك. ما ترد الولد انا مش من هنا بس الدكتور بقي عيادة هنا وهو اللي قالي اجي له النهاردة علشان اعمل العملية. ادعي لي ارجع بالسلامه لي ابن بنتي
فكر الشيخ للحظات لكن سحر صعبت عليه ولقي نفسه بياخد الواد منها وهي بتقول
اسبوع بالظبط لو ما رجعتش ليك. اكرم الواد بالله عليك
الشيخ
باذن الله ترجعي له بالسلامه.
سحر
يارب اقدر ارجع له
واديت للشيخ شنطة فيها كام بزازه كراوية وينسون ولبن
وقالت
لو جاع هتلاقي هنا كل اللي يحتاجة
الشيخ وهو بيبص في الشنطة
مش هحتاج كل دة باذن الله بنت عمي لسة والده هودي الواد يرضع مع ابنها
سحر وهي بتبص ل كريم
امك ما لحقتش ترضعك. لكن ربنا بعت لك اللي ترضعك
وخدته في حضنها وباسته في جيبنه وهي بتعيط وقالت في ودانه
يمكن ما شوفكش تاني يا قلب ستك. بس لازم تعرف اني لو مت مش هموت الا لما اجيب حق امك
وسابته ومشيت وقلبها كان بيتقطع وقالت وهي بتبص لبعيد
اطمئنت علي حفيدي يا فهد وجه الوقت تدفع ثمن اللي عملته في بنتي، ،،،،،،،،،،
ويحل الليل وتروح سحر للمكان اللي في خيم الغجر. ووسط السكوت تبدأ تتسحب واحدة واحدة لغاية ما تدخل عند الخيم من مكان في ظهر الخيم هي تعرفه كويس بحكم انها كانت بتبات وسط الخيم دي وبسرعه راحت ناحية الخيمة اللي بينام فيها فهد وكنوز مراته ودخلت الخيمة وهي بتتسحب لقت كنوز في حضن راجل تاني غير فهد وريحة الخمرة فايحة من بوقه اتصدمت وراحت ناحية كنوز وحطت السكينة علي رقبتها وقالت بصوت واطي لكنه يخوف
اصحي يا كنوز.
فتحت كنوز عيونها وحست بالسكينة اللي علي رقبتها ولسة هتصرخ قالت لها سحر بنفس الصوت اللي يرعب
قسما برب العزة اغرزها واخليكي تموتي وانتي خاينه
وساعتها بصت سحر علي اللي النايم جنب كنوز فقالت كنوز وهي مرعوبه
انتي عايزا اية
سحر
فين جوزك فهد
كنوز
فهد قتله سلامه بعد ما سيبتي البلد باسبوع
سحر اتصدمت وقالت
بتقولي اية
كنوز
اللي انتي سمعتي
سحر
انا قبل ما اسيب البلد ضربت سلامه بالسكينة وسبته وهربت وهو ميت
كنوز
دة كان بيلعب بيكي يا سحر.
وهنا اتقلب الراجل اللي نايم جنب كنوز فقالت سحر
طيب قومي خلينا نكمل كلامنا برة، ،،،،،،،،
ومن قدام الخيم وبعيد عن الخيم بشوية تقعد سحر علي الارض وقدام منهاكنوز اللي كانت بتقول
سلامه دة تعبان. وكذب عليكي في كل كلمه قالها. لا مرات ابوه غجرية ولا هو المظلوم اللي ديما كانو بيعاملو وحش. ولا فهد لي ذنب في حمل بنتك
سحر
بس فهد قبل ما اتجوز سلامه قالي كلها يومين وتخرجي من هنا وتروحي لبيت جوزك هتوحشينا اوي. بس يارب الهدية اللي هبعتها مع امانه بنتك تعجبك
كنوز
دة كلام فهد كان بيقولو وخلاص. لانه فعلا كان عايز الشر ل امانه علشان ينتقم منك بعد اللي عملتي في. لكن الحقيقة اللي سلامه حكاها قدام مني ل فهد
ونرجع بالاحداث لكام شهر وسلامه قاعد في الخيمة مع فهد وكان بيشرب شيشة وبيقول له
كنت سكران طينة وما حستش بنفسي وبدل ما خش الاوضة عند سحر دخلت اوضة امانه. وحصل اللي حصل
فهد
وسحر عرفت باللي انت عملته في بنتها
سلامه
سحر لو عرفت حاجة زي دي فيها موتي
فهد
طيب ناوي علي اية
سلامه
ناوي اكمل في الجوازة دي شوية تاني. وابقي شوية في حضن البت وشوية في حضن امها
ويضحك سلامه بمنتهي الخسة ويضحك فهد وهو بيقول
عيش يا سيدنا واتمتع. بس ما تنساش حبيبك فهد.
خرج سلامه رزمة فلوس ورمها في حجر فهد وقال
خد دول
يمسك فهد الفلوس زي المسعور ويبدأ يعد فيهم وهو بيقول
ومين بقي عجبت سيدنا اكتر
سلامه وهو بيشد نفس من الشيشة
امانه. برضو بنت البنوت ليها طعم تاني.
فهد
اول مرة اعرف ان العبط ليهم طعم. وقال سحر فاكرا انك دايب فيها وفي سحر عيونها
سلامه الخبيث
خليها عايمة في البحر دة. وانا ليلة ماكون من امانه ابنج سحر. والساقية تلف تلف تلف
ويضحك سلامه، ،،،،،،،،،
هنا صرخت سحر وقالت لكنوز
بس. كفاية ما تحكيش تاني
كنوز
دة اهم حتة الحتة اللي جاية. ان سلامه كان مخلي ديما راجل من رجالته يراقبوا البيت علشان لو نزلتي ويوم ما نزلتي وروحتي كشفتي علي امانه وعرفتي انها حامل عرف سلامه و كان سلامه متوقع رد فعلك لبس قميص تحت الهدوم متغرق دم وعمل فتحه واحده في القميص دة يغرق هدومة كلها دم وقال يعني انتي قتلتي. مش بقول لك تعبان
سحر
طيب ما انا ممكن ساعتها كنت ضربته في رقبته مثلا
كنوز
كان هيدافع عن نفسه وهياخد منك السكينة بسهوله لكن انتي ضربتي ناحية القلب
وشاورت كنوز في المكان اللي طعنت في سحر سلامه استغربت سحر وقالت
انتي عرفتي ازاي التفاصيل دي
كنوز
من سلامه نفسه اللي جه حكي كل اللي حصل ل فهد.
وتتنهد كنوز وتقول
التعبان خلاكي تاخدي بنتك وتهربي علشان ما يتفضحش في البلد وابوه اللي سلامه بيترعب منه يخلي عبرة.
سحر
ابوة الحج المنشاوي
كنوز
هو. يرعب بلد كامله وهو سبب كل الحروق اللي في جسم سلامه.
سحر
طيب لية سلامه قتل فهد
كنوز
علشان فهد قرر بستغل اللي حصل بينك وببنه وبيهدد سلامه وطلب منه 100 الف ج. والا يروح لابوة المنشاوي ويعرفه ان ابنه حمل بنتك.
سحر
طبعا سلامه رفض وخلص عليه
كنوز
مش بالظبط. بس بعديها بيوم فهد جوزي مات مسموم
وما حدش يعملها الا سلامه. ومسيري اعرف مين الغجرية اللي ساعدت سلامه وسممت جوزي
سحر وهي بتبص للسكينة
عقبال انتي ما تعرفي مين اللي عملت في جوزك كدة. اكون انا خد حق بنتي من الخنزير سلامه.
كنوز
وانتي فاكرا انك بالساهل كدة هتروحي تقتلي وتمشي وسط عيلته وناسه
سحر
اومال اسيبه عايش. بعد اللي عمله
كنوز
لا. تستني لما يجي لغاية هنا ووقتها تعملي في اللي انتي عايزا. وعلي حظك كلها يومين ويجي يختار عروسة جديدة
سحر
انتي ازاي بتدخلي عندك بعد اللي عمله في جوزك
كنوز
ماقدرش اقول لا. والا احصل جوزي.
وتمد كنوز ايديها ل سحر وتقول
تارك وتاري من نفس الشخص. هساعدك تخلصي عليه
لكن سحر ما تمدش ايديها وتقول
انتي وجوزك كنتو السبب في اللي حصل لبنتي. مش هينفع اسامح وانسي
رجعت كنوز ايديها وقالت
حقك. ودلوقتي خشي نامي في اي خيمة وبكرة الصبح يبقي في كلام تاني، ،،،،،،،،،
ويجي اليوم اللي جه في سلامه عند الغجر وقابلته كنوز وقالت له
النهاردة بقي جايبة لك غجرية ما شوفتش في جمالها
سلامه بابتسامه صفراء
انا عارف يا كنوز ان ذوقك حلو
كنوز ببصة كلها مكر
بس المرة دي هتبقي احلي مرة
وخدته كنوز وراحت بي علي الخيمة اللي فيها سحر ودخل سلامه وسحر واقفة بظهرها بص وقال
لما الظهر بالحلاوة دي اومال الوش عامل ازاي
لفت سحر اتصدم سلامه وبان قد اية هو جبان وخسيس ولسة هيخرج من الخيمة لقي باب الخيمة بيولع والنار قايدة في رجع بص ل سحر قالت
واحد بس مننا هيطلع عايش من الخيمة. تفتكر مين
وخرجت سحر السكينة وسلامه ضحك وقال بخبث
هتقتلي حبيبك وجوزك
سحر
هقتل واطي وخسيس. هتك عرض عيله غلبانه وكان السبب في موتها وسابت عيل ابن كام يوم
سلامه
والله يعني انا بقيت اب
سحر
كويس انك اعترفت علشان دمك يبقي حلال
وقربت سحر من سلامه لكن سلامه كان بيبعد وهو بيقول
انتي فاكرة اني لما اموت هتبقي دي النهاية انا عندي عيلة هتاخد بتاري زي ما انتي جاية تاخدي تار بنتك
سحر وهي لسة بتقرب وهو بيبعد زي اوسخ جبان
مش مهم
سلامه
بلاش تفكري في نفسك فكري في ابن امانه. هو انتو سمتوا اية صحيح
وفي الوقت دة رفع سلامه كرسي برجله ورماه في وش سحر حاولت سحر تفادي الكرسي اللي جاي في وشها واستغل سلامه المشهد دة وهجم علي سحر ومسك بايدة الشمال ايد سحر اللي فيها السكينة وبالايد التانية خنق سحر بمنتهي القوة وقال
عايزا تقتليني يا مراة
حاولت سحر تفلت من ايده وهي بتقول بصعوبه
هقتلك واكل لحمك نئ
وغرزت ظوافر ايديها التانية في عينية صرخ سلامه وساب ايديها اللي فيها السكينة ودة كان وقت كفاية اوي علشان تغرز سحر السكينة في رقبه سلامه من الجنب وقالت بغل
المرة دي هتموت بجد
وقع سلامه علي الارض بعد ما ضربت سحر السكينة في رقبته وبص سلامه وقال بصعوبه
ولو بعد سنين تاري هيجي منك يا غجرية
سحر وهي بتلحس دم سلامه اللي علي السكينة قالت
انا مش غجرية
والنار بدات تاكل في الخيمة كلها راحت سحر ناحية الجنب الشمال من الخيمة وقالت
كنوز افتحي
لكن كنوز ما فتحتش وقالت بصوت الجنون
فهد مات بسببك والنهاردة بعد ما حقة رجع موتي انتي كمان
بدات النار تقرب من سحر وفضلت تبص حوالين منها لقيت سلامه اختفي بصت تشوفه خرج منين دة. لقيت الدم بتاعه ناحية قطع في الخيمة عملته النار راحت بسرعه ناحية القطع دة وخرجت منه لقيت سلامه بيركب عربيته وبيهرب جريت وراء منه هنا شافها الكلب هوهو عليها فضلت سحر تجري وهي مرعوبه والكلب بيجري ورها وجريت بسرعه اوي لكن الكلب قرب منها وهنا لقيت نفسيها بتلف للكلب وبتغرز السكينة في رقبته صعب عليها اوي وفضلت تبص له وهو بيتوجع وشالت السكينة من رقبته وبدات تطبطب عليه. وتبص له وهي مخنوقة ازاي عملت كدة. سحر مش قتاله قتله. هو بس شيطانها عمها وحزنها علي بنتها خلاها تقتل. وقلعت سحر الايشارب بتاعها ولفته حوالين رقبه الكلب يمكن الدم يقف شوية. وطبطبت عليه وهو بيعوي من الوجع. لكنها كان لازم تمشي وفعلا قامت و سابته ومشيت. ،،،،،،،،،،
وهي ماشية في البلد شافت ترعه راحت ناحيتها بسرعه وبدات تغسل هدومها وايديها وهي ندامه وبتقول لنفسها
بقيتي مجرمة يا سحر مجرمة
وفضلت تعيط ودموع الندم تغسلها وهي بتغسل ايديها اوي ورجعت لشيخ الجامع خدت كريم بسرعه وماستنتش القطر ركبت عربيه بيجو كانت رايحة القاهرة ومنها لاسكندرية. ،،،،،،،،،
وتعدي السنين وبقينا في سنه 2022. والصغير يكبر والكبير يبقي اكبر واكبر وسحر بقي عندها 55 س. وكريم بقي عنده 22. وفتحت سحر نصبه شاي جنب مصنع الملابس وبقيت تبيع لعمال المصنع وتكسب اللي يعيشها وكريم كل اللي في المنطقة كانو بيحبو اوي. ماهو كان بيلاغي كل الناس ولسانه طويل من الكلام اللي كان بيلقطوا من العمال اللي بيجوا لنصبه الشاي وفي يوم كانت سحر واقفة مع جارتهم ام خميس وكانوا بيتحاسبوا علي اسم في جمعية عاملينها سوي فقالت سحر
لا. يا ام خميس ما ينفعش دة كدة بقي انتي جاية علية اوي النهاردة يا ختي 15 في الشهر ولسة الجمعية
ما اتلمتش
ام خميس
والنبي يا ختي مش بمزاجي الدنيا مزنوقة والناس معذورة
سحر
ما انا كمان معذورة يا ام خميس وبصرف علي اليتيم دة
هنا بصت ام خميس ل كريم اللي كان عمال يبص لها وبيلعب لها حواجبة وبيقول
انا اليتيم يا ابيض
بصت له سحر وقالت
كريم كدة عيب
كريم
طيب اقول لها يا اسود
سحر
ما تقولش حاجة
فتضحك ام خميس وتقول
انت يا عسل تقول اللي انت عايزا. دة ربنا واحدة اللي يعلم اني بعتبرك زي خميس ابني
كريم وهو بيبعت لها بوسة في الهواء. قال بتلقائية. زي ما بيسمع العمال بيقولو
النهاردة بالليل في الخرابة
سحر بعصبية
قولت الكلام دة غلط بطل تقوله
كريم
طيب اقول النهاردة الصبح في الخرابة
سحر
قولت ما تقولش حاجة
كريم
طيب اعملي شاي يا سحر. اشرب واسكت
فتضحك ام خميس فتبص سحر ل ام خميس وتقول
ام خميس سيبك من كريم وبكرة بالكتير اوي الاقي الجمعية عندي. الله يرضي عنك ان،،،،،،،،،
وتسكت لما تلاقي عربيه مرسيدس موديل السنه تقف قدام النصبه بتاعتها وينزل منها. سلامه وبيبص لها وبيضحك نفس الضحكة الصفراء، ،،،،،،،،،،