رواية كيان والشيطان الجزء الثاني الفصل الرابع 4 بقلم محمد منصور
ح(4)
كيان والشيطان 2
دم برئ
من تأليفي
محمد منصور منص
وقبل ما نبدأ… نوحّد الله ونصلّي على خير خلق الله سيدنا محمد، وعلى بركة الله نبدأ.
بسم الله توكلت على الله، وهو رب العرش العظيم…
★ تضحك أم خميس، فتبص لها سحر وتقول:
"سيبك من كريم يا أم خميس… وبكرة بالكتير أوي هلاقي الجمعية عندي. الله يرضى عنك بس—"
وفجأة… تسكت!
عربية مرسيدس موديل السنة تقف قدام النصبة بتاعتها.
ينزل منها …سَلَامة!
واقف بيبص لها… بنفس الضحكة الصفرا.
قرب منها ببطء… كأنه ملك الموت جاي ياخد روحها.
سحر بتبص له، عينيها متسعة من الصدمة… مش قادرة تنطق.
وهو وقف قدامها وقال… لكن بصوت مش صوته:
"كبرتي يا غجرية…"
أم خميس تبص لسحر باستغراب، وسحر بسرعة تقول:
"معلش يا أم خميس… امشي إنتي دلوقتي.
تمشي أم خميس وهي مستغربة:
إزاي سحر بتاعة الشاي تعرف واحد زي ده؟!
وفي نفس اللحظة… سحر بصوت متوتر:
"إنت صوتك ماله؟ اتغير ليه كده؟
بس مش مهم… قولي المفروض أقتلك كام مرة عشان تموت؟!
أنا آخر مرة غرست السكينة في رقبتك… ودمك كان مغرق الدنيا
سلامة ابتسم وقال:
"مش سلامة المنشاوي اللي يموت بسهولة كده."
سحر بحدة:
"عرفت مكاني إزاي؟ وجاي عايز إيه؟
بص على كريم وقال:
"ده كريم… ابن أمانة."
وقرب منه…
سحر بسرعة:
"كريم! ادخل جوه."
كريم متضايق:
"الأوضة حر يا سحر وأنا—"
سحر صرخت:
"قولت ادخل جوه!"
يدخل كريم… وسحر ترجع تبص ل سلامة
"سألتك سؤال… مردتش."
يقعد على الدكة بهدوء:
"اعملي كوباية شاي الأول… أظبط دماغي."
سحر تمسك براد المية المغلية:
"وكتاب الله لأحرقك بيها! وأخلي وشك زي أخلاقك!"
هو بهدوء:
"اهدي بس…"
سحر:
"رد! عرفت مكاني إزاي؟ وعايز إيه؟"
قال:
"وزعت صورتك على كل واحد من بلدنا شغال برة سوهاج…
لحد ما ناس شافوكي هنا في إسكندرية… وعرفوا عنك كل حاجة…وجابولي عنوانك."
سحر بحدة: "وجاي عايز إيه؟"
بص لها وقال: "جاي آخد ابن أخويا… كريم."
سحر اتصدمت: "ابن أخوك؟! إنت—"
قال بهدوء: "أنا رجب المنشاوي… أخو سلامة التوأم."
الشك ملي عيون سحر…
لكن رجب لاحظ ده وقال:
"لو أنا سلامة… فين أثر الطعنة في رقبتي؟"
قرب منها… وهي تبص كويس…
مفيش أي أثر!
سحر لسه شاكّة: "وريني ضهرك."
ابتسم: "بس كده؟"
قلع الجاكيت… وفتح القميص…
وسحر بصت…
مفيش آثار حروق!
اتصدمت أكتر…
وهو قال:
"ألبس هدومي بقى؟"
سحر وهي قاعدة ومش مستوعبة: "البس…"
لبس هدومه وقال: "صدقِتي إني مش سلامة؟"
سحر بعصبية: "سلامة أو مش سلامة… إنت جاي عايز إيه؟!
أنا بقالي سنين بهرب منكم… سيبوني في حالي!"
رجب بهدوء: "أنا هنا أصلّح غلطة أخويا…
اللي أذاكي أكتر ما تتخيلي."
سحر بصوت مكسور: "مش عايزة حاجة من حد."
رجب: "بس أنا مش أي حد…
أنا عم كريم…
ومش هقبل يعيش ابن أخويا كأنه ابن حرام."
سحر مصدومة…
رجب كمل: "كريم له ورث… 20 فدان و10 مليون جنيه.
حقه… سواء إنتي عايزة ولا لأ."
سحر: "إيه اللي بيحصل؟! إزاي عايز تساعدني بعد اللي عملته؟!"
رجب: "إحنا صعايدة…
الدم بالدم… بس الحق لازم يرجع.
وسلامة… مات بين إيدي… واعترف بكل حاجة.
ولو اللي عملتيه كان ظلم… كنت دورت عليكي ودبحتك."
سحر بصت له مش مصدقة: "إزاي تبقى أخوه؟!"
رجب: "البطن قلّابة…
دلوقتي ساعديني نرجّع الحق."
سحر: "عايز مني إيه؟"
رجب: "تيجي معايا البلد… نثبت نسب كريم… ونخلّص ورقه…
وبعدها إنتي حرة."
سحر سكتت…
بتفكر… في كريم… وفي مستقبله…
وفي الآخر… قررت.
"ماشي…"
ومن جوه بيت أم خميس…
سحر: "لو ما رجعتش خلال 16 يوم… بلغي الحكومة إني في سوهاج…
وممكن يكونوا قتلوني."
أم خميس بفزع: "يا ساتر! قتل إيه؟!"
سحر: "أي حاجة واردة مع الناس دي…"
أم خميس: "طب بلاش تروحي!"
سحر: "يمكن يكون فيه خير لكريم…"
★ في نفس الوقت…
كيان مع جوزها إسلام في المصيف…
استغلت إنه نايم… فتحت اللاب…
ودخلت على موقع "العراف"…
وبدأت تتفرج…
حكاية كريم…
والناس بتراهن…
مين يعيش… ومين يموت!
كيان بصدمة: "مش قادرة أسامح نفسي…
في ناس بتتأذي بسببي!"
إسلام: "انسِ الموقع ده… وخلينا نعيش!"
كيان: "مش قادرة…
دي مش مجرد حكاية… ده دم!"
فتحت فيديو لسحر وكريم…
وقالت: "شايف؟! الناس عايزة دمه!"
إسلام بقلق: "إحنا لازم نوقف ده."
كيان: "الحل في سوهاج… عند سلامة المنشاوي."
إسلام: "ناوية تعملي إيه؟"
كيان بعين مليانة إصرار: "هننقذ كريم…
وبعدين… نمسح موقع العراف من على وش الدنيا!"
إسلام: "إزاي؟!"
كيان: "نقطع راس الحية…
نخترق الدومين والسيرفرات…
ونبقى إحنا اللي نتحكم."
إسلام بدهشة: "إنتي مجنونة… بس صح!"
كيان: "بس الأول… كريم يبقى في أمان."
إسلام: "يبقى لازم نروح سوهاج."
كيان: "لازم… وبسرعة."
★ وفي الطريق…
جوه عربية المرسيدس…
سحر جنب رجب… وكريم ورا…
رجب بص لها وقال:
"حمد الله على السلامة يا غجرية…"
وفجأة…
صوته اتغيّر!
وبقى صوت سلامة… وهو بيكمل:
"يا بنت الأوساخ…"
سحر اتجمدت: "سلامة؟!"
وفي لمح البصر…
رش مخدر في وشها ووش كريم!
الدنيا لفت…
عينيها تقفلت…
وكريم وقع زيها…
وفقدوا الوعي…
ومن هنا…
كل اللي فات انتهى…
واللي جاي…
حكاية تانية خالص 🔥
يتبع…