رواية قلبان علي حافتي الحلم الفصل الثالث عشر 13 والرابع عشر 14 بقلم شذى عبد المكرم
13
في يوم جيت من الشغل مصدعة وكارهة روحي شديد ما اتفاهمت مع زول دخلت استحميت عشان جسمي يكون خفيف وفكيت شعري ورقدت نومت نوم عميق لفترة طويلة وفجأة سمعت اصوات جوطة في البيت قومت بتعب وانا مغمضة عين ومفتحة عين وبخلخل في شعري وهو منكوش شديد وطلعت الصالة سامعة صوت امي بتبكي واصوات كتيرة معاها ونسبة لانو انا لسع قايمة من النوم وما مجمعة وقفت قريب للصالة و بخلخل في شعري بتعب
شاهيناز: ماما في شنو؟ . فجأة الاصوات كلها اختفت رفعت رأسي لقيت كل الانظار علي كانو ماما وصوفيا وناني وعمران وشادي كانو بعاينو لي مخلوعين في المخلوق الواقف دا عاينت لبجامتي كانت ضيقة طوالي اخدت الجرية لغرفتي من الخلعة ودخلت الغرفة وقفت في المرايا عاينت لشكلي قربت ابكي دي كلها هينة المشكلة الشعر كان حالتو حالة نسبة انو نومت بيهو وهو مفرود وتاني لمن صحيت كنت بخلخل فيهو بقيت اضرب رجلي بزهج المشكلة ما هنا المشكلة عمران كان معاهم وشافني بالمنظر داك لمن اتذكرت قربت ابكي ورقدت في السرير بعد دقيقتين لمن جمعت اتذكرت انو شادي كان معاهم يعني رجع من السفر عندو أربعة سنة برا السودان لبست اسدال الصلاة ولفيت شعري وحجبت الطرحة بتاعت الاسدال وطلعت برا جريت لشادي وقف فوق قومت حضنتو شديد وبقيت ابكي لاني اشتقت ليهو شديد وهو يحاول يسكت فيني وانا ازيد في البكي
شادي: خلاص ما تبكي
شاهيناز: اربعة سنين يا كعب
شادي: معليش ياااااخ . حتى فكيتو
شاهيناز: حمدلله على السلامة يا غالي
شادي: الله يقبل حمدك
شاهيناز: اخيرا نورت البيت
شادي: يعني من دوني كان مظلم؟
شاهيناز: اتخيل بس . قام ضحك وبعدها اتجهت لعمران ومديت ليهو ايدي وعاينت ليهو كان كاتم الضحكة خجلت طوالي سلمت عليه سريع ورجعت جنب شادي وبقيت اتكلم معاهو وانا مبسوطة برجعتو بعد السنين دي كلها
شاهيناز: انا قولت شادي اتزوج هناك واسس ليهو اسرة وخلاص نسانا . قام ضحك
شادي: قربت بس جلت بشوية . كلنا ضحكنا
شادي: هسي انا اتوقعت اجي القى اطفال جاريين في الصالة بس للاسف انتي واختك للان بايرات . ضحكو هو وعمران وامي ضربتو في كتفو
شاهيناز: بايرات في عينك انا لسع عندي طموح دايرة احققها وصوفي لسه صغيرة ولا شنو يا صوفي؟ . كانت خجلانة كدا أبتسمت لي وهزت رأسها وهو التفت ليها
شادي: هسي يا صوفيا وصلتي اي مرحلة لمن خليتك كنتي في الثانوي يداب . كانت متوترة شديد وبضغط في اصابعها
صوفي: تانية جامعة
شادي: كبرنا ما شاء الله ولو ما خانتني ذاكرتي امي كان قالت لي صيدلة زي اختك
صوفي: ايي . التفت لعمران
شادي: وانت يا صحبي
عمران: انا مالي اوعى تقول لي قصدك ما خلصت جامعة؟ . ضحكنا كلنا
شادي: جامعة شنو ليك و انت سنتين قدام حيقوم ليك شعر ابيض . هنا كلنا ضحكنا يلا شادي نمبر ون في التنمر وعمران من بعدو
عمران: الله يسامحك
شادي: ويسامح الجميع بس قاصد انو عملت ليك بيت ولا لسه؟
عمران: والله محسسني كأنه من سافرت ما اتواصلنا وانا الجايبك هسي من المطار
شادي: قولت احتمال غنجت ما بعيد . بقينا نضحك عليهم يلا شادي دا رغم تنمرو دا فرحة البيت واول طلقة لامي بتريدو مبالغة
عمران: يلا من هسي عرسي ما معزوم
شادي: هو انا قال ليك منتظر عزومة منك؟ . طبعا شادي صديق الطفولة حق عمران وللان اصحاب اكتر مما يكونوا اخوانهم علاقتهم قوية رغم انو شادي سافر بس الغربة ما غيرت علاقتهم ابدا
امي: خليك من قبيل بتتنمر فيهم انت انجزت؟
عمران: طبعا يا عمتو شادي حيجيبها ليكي كافرة . هنا الصالة اتملت ضحك
شادي: من يومك بتحب تقد لي الشغل هسي لو ما اتكلمت كان اقنعتها اسلمت وجيبتها . بقينا نضحك بس
شاهيناز: دي ما بتنفع
شادي: بتنفع بس انتوا قولوا خير
امي: النصيحة واثقة في اختيارات وحيدي .
شادي: والله يا ست الكل ابوي عرف يختار . بقينا نضحك والجو كان حلو شديد برجوع شادي وقومنا انا وناني وصوفيا جهزنا العصاير والونسة جرت وامي رصت الغدا بمساعدتنا واتغدينا كلنا في جو اسري ظريف شديد
ولمن خلاص عمران قام عشان يمشي وشادي كان معاهو يقدمو
شاهيناز: انا كأني عندي منك حاجة يا عمران . شادي عاين لينا الاتنين بأستغراب
عمران: نسيتها
شادي: هي شنو؟
شاهيناز: شوكولاتة
شادي: دي القبيل وقفت في السوبر ماركت جيبتها ديك؟ . عاينت ليهو يعني داير يكذب علي
شاهيناز: هسي موش قال نساها؟
شادي: يمكن ديك ما حقك ودقيقة انتي موصياهو على شوكولاتة؟
شاهيناز: لالا بس لمن بجينا بجيب لي كل مرة . سكت مسافة كأنو بتذكر حاجة وهو مستغرب
شادي: العادة بتاعت الطفولة ديك؟
عمران: اختك ما عاوزة تكبر
شادي: خليك منها دي هبلة ساي . وقامو ضحكوا وكانوا طالعين وانا واقفة ومغيوظة منهم طلعو برا وقفت فترة كدا وكنت داخلة على جوا فجأة سمعت صوت عمران بنادي
عمران: نااز . التفت ليهو بس شوفت الشوكلاته طايرة في الجو ثبتها قبل ما تقع وطوالي طلع وقفت ثواني وانا مبتسمة ودخلت جوا وطلعت الاسدال ودخلت المطبخ ما عرفت اعمل شنو اصلا انا ما بعرف اطبخ لاني ما بدخل المطبخ الا للضروريات الحبشية بس بتشتغل والاكل بتعملو ماما لانو بابا عندو نظام غذائي معين ونحنا الشباب بنطلب دليفري كتير وخلاص يلا قولت اعمل كيك بس ابدأ من وين ما بعرف جيبت الهاند فري ولبستو وشغلت اغاني وفتحت النت وبقيت اطلع في المكونات وانا مبسوطة وبتمايل مع الموسيقى وبغني المقاطع الحافظاها فجأة شوفت امي وافقة في باب المطبخ نزلت الهاند فري من اذني وبضحك خفيف كانت بتعاين لي بأبتسامة
__ واقفة من قبيل؟
_ اممم يعني
__ عاوزة اعمل كيك
_ بتعرفي؟
__ حأجرب . ابتسمت لي
_ جربي حبيبتي انا ما حأتدخل حاولي لمن تظبط معاكي . انبسطت بكلامها واثناء نحنا واقفين جا شادي وحضن امي من ورا وكان متجه علي
شادي: يتعملو في شنو؟ . امي رفعت ايدها وبقت تلعب بشعرو وهو خاتي رأسو في كتفها منظرهم كان حلو وكيوت
امي: اختك عاوزة تعمل كيك
شادي: بتعرفي؟
شاهيناز: عاوزة اجرب
امي: جربي براحتك حبيبي . وساقت شادي وطلعوا وبديت اشتغل واديته كل طاقتي بس باظ في النهاية ناديت امي
__ ما عرفت ليها . وكنت حاسة بخيبة امل لاني تعبت فيها وعاوزة ابكي
_ ما تزعلي اكيد في خطوة ناقصة تعالي نبدأ مع بعض . جاتني وبقت تقول لي اعملي كدا وخلي كدا بس ما تدخل ايدها لقيت اني قلبت الخطوات لحدي ما انتهينا ودخلناها الفرن
_ بعد دا الكريمة حقها عاوزاها بيضة ولا بالشوكولا
__ امممم نشكلها مع بعض
_ تمام . وتاني ادتني تعليمات الكريمة وعملتها والكيكة جهزت طلعناها طلعت رهيبة كنت مبسوطة بالانجاز العملتو دا
__ماما عايني ليها رهيبة كيف
_ بتي شاطرة . ضحكت وجيت بوستها في خدودها
__ طالعة ليكي يا عسل تعالي نعمل الكريمة . وعملنا الكريمة وجيت صورت الانجاز حقي عشان يشوفها شخصي المفضل بعدين وبعدها جريت استحمى لاني بقيت كلي دقيق لمن خلصت جيت شيلتها وناديت البيت كلهم في الصالة والدنيا كانت ليل
شاهيناز: عاينو الانجاز دا . وانا بأشر ليهم على الكيكة
ابوي: اول مرة يكون في كيك في البيت؟
امي: لا بس شغل ايدها عشان كدا
ابوي: ما قادر اصدق عملتيهو انتي يا شاهيناز؟ . بقيت اعاين ليهو بفخر
شاهيناز: طبعا
ابوي: دا انجاز عديل محتاج صدقة . ضحكنا كنا
شادي: انا لو ما شوفتها جوا المطبخ كنت ما حأصدق بس انجزتي والله
شاهيناز: شكرا شكرا ماف داعي للمدح . بقو يضحكوا فيني
صوفيا: الشيف شاهيناز
شاهيناز: ماشة اشترك في توب شيف الموسم العاشر لو بدأ . ضحكو فيني
شادي: عان دي كمان اها حتعملي ليهم كل الحلقات كيك بالشوكولا؟
شاهيناز: لالا حأشكل يوم بالشوكولا البنية ويوم بالبيضة ويوم بالفانيلا وكدا يعني . بقو يضحكوا
ابوي: ربنا يعين راجلك بعدين
شاهيناز: ان شاءلله يا رب يلا تعالوا عشان نشوف طعم الانجاز دا
شادي: اشهد ان لا اله الا الله واشهد ان محمد رسول الله .
ابوي: اللهم انا نسألك السلامة في سفرنا هذا . بقينا نضحك وقطعتها و اي زول اخد قطعة والطعم كان ظابط وشكروه لي كتير وانا رأسي كبر من المدح الحصل الليلة دا
شاهيناز: صوفي خشمك . عاينت لي بأستغراب كدا وهزت لي رأسها بمعنى في شنو
شاهيناز: فيها كريمة بالجنبة . هي كانت جنب شادي قام مسح ليها الكريمة الجنب خشمها
شادي: هي قاصدة ليكي دا . حسيتها اتخلعت شديد وبقت تعاين ليهو بصدمة وهو طوالي انشغل بتلفونو قامت ودخلت غرفتها وانا لمن مسحو ليها انشغلت طوالي مع ماما بنتكلم لاني كنت جنبها وما ركزت انها قامت الا بعد فترة وشيلت جزء من الكيك في صحن ومشيت غرفتها لقيتها راقدة وبتعاين للسقف ورجولها في الارض يعني راقدة بعرض السرير جيت قعدت في السرير وحكرت جنبها
__ بسبس . عاينت لي بملل بكدا واخر نفس
_ همممم
__ مالك
_ شادي رجع . استغربت من جملتها دي
__ ما فهمت عليكي انتي ما عاوزاهو يرجع؟ . عاينت لي طويل ورجعت عاينت للسقف ما جاوبتني ودا زاد استغرابي
__ مالك يا بت؟
_ بكون نسى؟
__ نسى شنو
_ الحصل زمان وسبب سفرو؟ . سكتا مسافة وانا بفتكر الحصل زمان والخلى شادي يسافر كل السنين دي
__ قاعد يتعامل معاكي عادي احتمال نسى
_ امممممم . حننتني وهي ساكتة فجأة شوفت دمعتها نزلت وسايلة اتجاه اذنها جيت هزيتها
__ ياااخ انسي واتعاملي معاهو عادي كأنو ما حصل حاجة متأكدة بكون اتجاوز عشان كدا رجع
_ حيستقر هنا؟
__ دا السؤال البطرح نفسو بس حنعرف
_ امممممم
__ قومي اكلي انجازي دا
_ وجع لي بطني ما عاوزة . قومت ضربتها ضحكت لي
__ كلبة اصبري لي تاني ألقيهو . وشيلت صحني وقومت طالعة بقت تنادي فيني ما رديت ومشيت غرفتي واتذكرت عمران قومت رسلت ليهو صورة الكيك وكتبت ليهو عاين انجازي شاف الرسالة طوالي اتصل لي
__ شيف ناز للعالمية . قومت ضحكت
_ احم احم لابد من التواضع . قام ضحك
__ عملتيهو براكي؟
_ اتخيل بس
__ ما شاء الله
_ تمشي على خير شايف كيف راجلي بعدين حيكون محظوظ بي شديد
__ لا حيعيش حياتو كلو بكيك شوكولاتة؟
_ لا يااخ مرة بالشوكولا البنية ومرة بالبيضة ومرة بنكهة الفانيليا وكدا يعني . قام ضحك
__ والله لو محظوظ الا لو عشان اتحصل عليكي بس لو على خبراتك في المطبخ ربنا يعينو
_ هسي في ذم ومدح في نفس الجملة ارد على وينا فيهم
__ اختاري العجبك
_ اخترت
__ اها اختري وينا فيهم
_ ممكن احتفظ بالاجابة لنفسي واقولا ليك في الوقت المناسب . قام ضحك شديد لانو دي جملتو الكان قايلة لي لمن هداني البوكس حق الشتا
__ بالمناسبة
_ احكي
__ شكلك قبيل لمن شادي وصل . حسيت جسمي برد لمن اتذكرت منظري الطلعت بيهو قدامهم
_ اممم
__ دا شكلك دايما لمن بتصحي من النوم؟ . وفكا الضحكة وانا خلاص قربت ابكي من الاحراج
_ عمران تصبح على خير
__ لالا خلاص ما بتنمر فيكي
_ انت حقار والله ياااخ . قولت ليهو بزعل كدا
__ بهظر معاكي بس والله واصلا شكلك كان كيوت وانا بتحركي في شعرك
_ كذاب
__والله
_ امممممم . وغير لي الموضوع واتكلمنا شوية ونومت........
لَكِنَّها وَ بِطَريقةٍ ما .. تَمتلِك أكثر القُلُوب
قُوَّة وَ عَطف فِي آنٍ وَاحِد ♡︎ .❤️
يتبع........
قلبان_على_حافتي_الحلم_14
بيتنا رجع نور بوجود شادي فيهو بس صوفيا كانت متوترة وخايفة كل الوقت بالاخص لمن شادي يكون قاعد بس هو كأنو ما حاصلة حاجة ما مركز معاها ابدا وخططنا نعمل فعالية بمناسبة رجوع شادي من السفر فقررنا نطلع رحلة نغير جو وكلمنا الاهل كنا اربعة اسر عائلة محمد اللهو نحنا وعائلة محمود يعني ناس عمران وعائلة عمتو حواء وعائلة عمتو قسمة وخلاص قررنا اي بيت يمش بعربيتو الخاصة يلا بقينا نتجارى عشان نلحق للطلوع بدري لانو شادي اتجهز بدري وكان زهجان مننا شديد
شادي: شاهيناز والله بمشي بخليكم
شاهيناز: قربنا خلاص . جيت طالعة وانا بلبس في الحلق حقي . عاين لي بزهج
شادي: وين اختك؟
شاهيناز: في غرفتها قربت خلاص . فجأة جات طالعة
صوفيا: ماما ما لقيت الباور حقي
امي: الوردي ؟
صوفيا: ايي
امي: مع شادي . سكتت ما قدرت تقول حاجة بقت تعاين ليهو
شادي: يعني داك حقها؟
امي: ايي
شادي: في غرفتي جنب المرايا اجري شيليهو . مشت سريع لغرفتو واتأخرت شوية
شادي: بتعمل في شنو كدا . وطوالي مشى عليها في غرفتو وانا استغيلت الفرصة ورجعت غرفتي رتبت شنطتي من اول وجديد وطلعت لقيتهم رجعو من الغرفة
شاهيناز: نطلع؟
شادي: اول حاجة انتي طرحتك وين . هبشت شعري ماف طرحة ما عارفة نسيتها كيف جريت اتجاه غرفتي شيلتها من السرير لبستها
شادي: صوفيا طلعي القميص من البنطلون . واداها تحميرة كدا كانت شاكة البنطلون مع انو البنطلون جيب شورت وواسع بس خلاص براحة قامت طلعتو وقام هو اتقدم قدامنا همست لصوفيا
شاهيناز: رجع الوجع . وضحكنا وركبنا العربات واتحركنا وشادي اتصل لعمران قال اتحركو ووصلنا المكان وخلاص فرشنا الفرشات وقعدنا والجو ظريف الشباب كانو بعيدين شوية مننا كدا ونحنا البنات مع بعض بنتونس واخر رواق وطبعا علا جات معانا الرحلة وكانت قاعدة جنبي
علا: اها يا شيذو علاقتك كيف مع عمران . رفعت رأسي عاينت اتجاهو ورجعت عاينت ليهو وابتسمت
شاهيناز: ماشي حالها؟
علا: ما ارتبطتو لسع . ضحكت ليها
شاهيناز: عاوزانا نرتبط؟
علا: عاوزاكم تتزوجو عديل . ضحكت تاني
شاهيناز: خلي اخوكي يشد حيلو . كبستني
علا: يعني بتوافقي؟ . ضحكت شديد من لهفتها
شاهيناز: بهظر هوي ما وصلنا للمرحلة ديك خليكي مننا نحنا انتي كيفك وكيف العرس معاكي
علا: والله الحمدلله . وبقينا نتونس وبعدها وزعنا الحاجات على الشباب وانا شيلت الصبارة اوصلها للشباب قام عمران جا اتجاهي وقفنا في النص
عمران: الليلة ما اتطاقشنا . عاينت ليهو بزعل
شاهيناز: هو انت من شادي رجع ما شغال بي
عمران: لا والله ما كدا بس ياهو شادي عشان كدا وهو حابي يشوف البلد وكدا . وبقى يبرر لي لانو حسا بزعلي
شاهيناز: دا ما عذر اصلا بس يلا . اثناء وقفتنا جا شادي
شادي: مالكم
شاهيناز: عاوزة ادي عمران الصبارة حقت القهوة . ومديتها ليهو شالا مني
شادي: شاهيناز عاوز لي كباية عصير
شاهيناز: تمام . ورجعت اتجاه البنات وعمران مشى اتجاه الاولاد وشادي جاتو مكالمة مشى اتجاه صخرة كدا قعد فيها كبيت العصير وناديت صوفيا جاتني
شاهيناز: هاكي ودي العصير دا لشادي
صوفيا: لالا ما بمشي
شاهيناز: مالك
صوفيا: ما دايرة مشاكل مع شادي
شاهيناز: مشاكل شنو يا هبلة اديهو بس وارجعي . اقتنعت بكلامي وشالت العصير وكانت ماشة فجأة وقفت
صوفيا: ما شايفة شادي معاهم . اشرت ليها اتجاه الصخرة شافتو وانا متابعاها بنظرة لمن وصلت ليهو ما عارفة اتعترت ولا فقدت توازنها والكباية اتكشحت في شادي هو اتنفض ووقف فوق بخلعة وانا قومت جارية اتجاههم عشان ما تحصل مشكلة وصلت كدا شادي كان بنفض في قميصو فجأة صرخ فيها
شادي: انتي مجنونة ما بتعايني؟ . هي اتنفضت مع صوتو وخافت شديد مسكتها علي
شاهيناز: هي ما اتنبهت
شادي: عميانة هي؟ . وكان معصب هي طوالي رجعت وراي بخوف ومسكت فيني وكانت بتبكي
شاهيناز: شادي ما تصرخ هي ما قاصدة
شادي: من زمان ما مريحاني في حياتي حأرتاح منك متين كرهتيني عيشتي دا شنو البلوة دي . انا اتخلعت في كلامو وبقيت اعاين ليهو بصدمة وهي بتبكي بس وماسكة فيني
شاهيناز: دا كلام شنو البتقول فيهو دا . عمران شكلو انتبه لينا وجا علينا
شادي: كلو بسببك انتي موش انا كلمتك انتي؟ . كان بهرج
عمران: شادي مالك
شادي: عاين الهبلة دي عملت شنو . ومسك قميصو انا التفت لصوفيا وكانت بتبكي وهي بترجف جريتها علي ودموعي نزلت معاها
شاهيناز: يعني شنو يعني قميص لمن تصرخ كدا حريقة في قميصك . عصب مني وكان جاي علي عمران وقف بيناتنا ولزاهو من صدرو خفيف كدا ثبتو بس
عمران: حيلك حيلك
شادي: اصلا الاتنين ما منكم نفع
عمران: ما تصرخ كدا يااخ اكيد ما كانت قاصدة يعني تفتكر حتكشحو فيك قاصدة؟
شاهيناز: فهمو عليك الله من قبيل بحاول افهم فيهو وهو شغال يهرج ويصرخ
شادي: هو انا بصرخ ساي مجنون انا؟
عمران: خلاص يا شادي . وكان مثبتو عارفة لو عمران ما في نصنا كان ضربني عادي بس كنت ما خايفة لانو عمران واقف
شاهيناز: صوفيا اهدي خلاص . كانت بتبكي وبترجف شديد خوفتني عليها فكيتها وبقيت اعاين ليها بقيت ابكي شديد
شاهيناز: عمران عاين صوفي . الاتنين عاينو ليها كانت بترجف بطريقة مبالغة يلا الحالة جاتها لمن تخاف بترجف شديد وما بتقدر تآخد نفسها
عمران: مالا؟
شاهيناز: جاتها الحالة صوفي خلاص اهدي . لسع بترجف وشادي بعاين بس
شاهيناز: والله شادي ما قاصد يصرخ كدا موش يا شادي اتكلم . اخر كلام قولتو بصوت عالي وانا بعاين في شادي يداب اتنبه قرب علينا ومسك اياديها وبقى يتكلم معاها براحة
شادي: صوفيا . سحبت ايديها سريع ومسكت فيني شديد وهي بترجف
عمران: ناز امشي بيها هناك تحت الشجرة ديك عشان تهدأ . هزيت رأسي
شاهيناز: عمران نادي لي ماما تجي
عمران: تمام . ومسكت صوفيا ومشينا محل عمران كلمني وخلينا شادي واقف وعمران مشى نادى امي براحة جاتنا وهي خايفة
امي: مالا صوفي الحصل ليها شنو
شاهيناز: كشحت العصير في شادي وهو عصب فيها . جات مسكتها وحضنتها وصوفي بتبكي وبقت تتكلم معاها براحة وبتهدي فيها اصلا ماف زول بقدر لصوفي الا ماما لمن هدت شوية وانا واقفة وجنبي عمران كان بعاين فيني
عمران: ناز ما تبكي خلاص
شاهيناز: انت ما شوفت شادي قال ليها شنو . وزدت في البكي
شاهيناز: قال ليها متين ارتاح منك وقال ليها انتي بلوة . لمن اتذكرت الكلام بكيت تاني
عمران: شادي احمق وهو اكيد ما قاصد الكلام القالو . ولسع كنت ببكي
شاهيناز: عاين وصلها لمرحلة كيف والسبب انا بس لانو هو طلب مني انا العصير
عمران: انتي شن عرفك انو دا حيحصل
شاهيناز: المفروض من البداية اتذكر انو شادي وصوفي بيناتهم حساسية بسبب الحصل زمان وما اديها العصير
عمران: انا عارف انو نيتك كانت انو تزيلي التوتر البيناتهم عشان كدا عملتي كدا . الوحيد البفهمني
شاهيناز: اي والله
عمران: انا بفهمك عشان كدا بقول ليكي ما تبكي خلاص . مسحت دموعي
عمران: ايي كدا لانو بتبقي شينة وانتي بتبكي . قومت ضحكت فجأة ظهر شادي جا علينا ومشى على ناس امي وقعد تحت جنب صوفيا هي طوالي مسكت في امي
شادي: ما قاصد اصرخ فيكي . قالت ليهو هي ماسكة في امي وبتبكي
صوفيا: ما كنت قاصدة اكشح العصير بس فقدت توزاني
شادي: عارف انا وبعتذر ليكي على الحصل
صوفيا: انت من زمان بتكرهني . وزادت في البكي
شادي: ما بكرهك والله في زول بكره اختو؟
صوفيا: في انت
شادي: ما حصل والله وبعتذر تاني على الحصل والكلام الطلع مني ما حتسامحي اخوكي؟
صوفيا: ما حتصرخ فيني تاني؟
شادي: والله عارفاني ما بقدر اضبط اعصابي بس بحاول
صوفيا: تمام
شادي: المسامح كريم؟
صوفيا: المسامح كريم . وقام جا علينا انا وعمران وقف جنبنا.
عمران: انت ما حصل سمعت بكلام الرسول حق " رفقا بالقوارير "؟؟
شادي: هسي الجنبك دي قارورة؟ . كان قاصدني انا حمرت ليهو واصلا زعلانة منو ومن كلامو مع صوفيا
شاهيناز: عامل فيها ظريف بس نهائي ما جاي معاك . وكنت بعاين ليهو بعصبية كدا
شادي: شاهيناز احسن ليكي
شاهيناز: ما احسن ليكي ولا اي حاجة
عمران: ناز خلاص
شادي: ناز؟؟!!! . كان مستغرب في الاسم دا
عمران: شادي كفاية الحصل ورح للشباب . وجراهو ورجعو وانا مشيت على ناس امي لقيت صوفي هادئة وساكتة
شاهيناز: خلونا نرجع عشان الناس ما تفقدنا
امي: صح كلامك . ورجعنا محل الناس قاعدين
وحاولت اغير لصوفيا جوها بس كانت ما بتتفاعل كتير بس بتحاول وجابو كورة
مروة: تعالو نلعب
شاهيناز: ورح عرفات كيف وكيف
عرفات: ما عندي مشكلة
شاهيناز: صوفي قومي
صوفيا: ما عاوزة . جيت جريتها
شاهيناز: ماف حاجة اسمها ما عاوزة . وقومنا مشينا نلعب بيها طائرة فجأة الكرة مشت على اتجاه الشباب وانا كنت ماشة ارجعها في نص الطريق حسيت في حاجة اخترقت الشبشب ودخلت رجلي وطعنتني لجوا فكيت الصرخة وقعدت في الرملة ومسكت رجلي اول زول جاني جاري عمران كان خايف نزل تحت ومسك رجلي
عمران: مالك . كنت ماسكة باطن رجلي بألم والبنات وصلوني والشباب برضهم وحاوطوني
صوفيا: شاهيناز مالك . وعمران فكا ايدي من رجلي كانت بتنزف بس ما كتير شديد لانو كنت لابسة شبشب والفرع الطعني ما وصل لجوا شديد
شاهيناز: عمران براحة . كان خايف علي شديد ونسى انو معانا ناس
عمران: تعالي . عاوز يقومني
شادي: خليها انا برفعها . يداب انتبه ورجع شوية شادي رفعني بالمرة ومشى بي اتجاه البنات قعدني في الفرشة صوفيا جات نصفتو لي وعملت لي عطر كانت شايلاهو معاها هنا ما استحملت وصرخت وبكيت العطر حار نار ومسكت شادي كان لسع واقف معانا
شادي: خلاص خلاص انتهينا خوافة خلاص
امي: عشان ما فيك الالم
شاهيناز: كلميهو عليك الله ماما . قام ضحك ومشى وشايفة من بعيد عمران بعاين اتجاهي ورفع تلفونو عرفت انو عاوز يتصل علي كلمت صوفيا تجيب لي تلفوني من الشنطة وبالفعل كان متصل جاهز
صوفيا: تلفونك متصل
شاهيناز: ايي عمران
صوفيا: عرفتي كيف
شاهيناز: حسيت . وادتني التلفون ورديت
__ ناز انتي كويسة؟
_ عوارضي كتيرة بس كويسة الحمدلله
__ دي اسمها اقدار
_ ونعم بالحمدلله
__ ماف ألم؟
_ اكيد موجود بالاخص لمن صوفي كبت لي الريحة حسيت الوجع في قلبي
__ معاكي مسكن؟
_ لالا
__ خلاص ارتاحي اصلا اليوم قرب يخلص . حسيتو قلقان
_ حاضر وانت ما تقلق انا تمام التمام
__ انتبهي على نفسك . هنا ضحكت
_ عمران انا معاكم هنا لو ناسي . ضحك
__ يا زولة اسمعي الكلام
_ حاضر . وقفلنا جات علا قعدت جنبي
علا: عمران كان خايف عليكي شديد ما شوفتي لهفتو عليكي كانت كيف؟ . ضحكت خفيف وفهمت عليها بتحاول توصل لي انو عمران بحبني وعاوزة تلين قلبي اتجاهو وهي ما عارفة اني واقعة من زمان شديد
شاهيناز: كانت كيف ما ركزت . قرصتني خفيف
علا: مستهبلة . ضحكت
شاهيناز: من حقو يخاف علي موش بت عمو؟
علا: ايي اعملي فيها غبية . ضحكت شديد واخيرا اليوم خلص بعد احداث كتيرة بس كان حلو رغم كل حاجة.......
_____________
رجع صديق طفولتي واعز اصحابي بعد فراق دام اربعة سنين كانت صعبة بالنسبة لي لاني بطبيعتي ما بصاحب كتير يعني اصحابي معدودين وشادي كان الاقرب لي بس بسبب مشكلة عائلية قرر انو يسافر روسيا كنت متفاجئ من قرارو دا وحاولت معاهو انو يغير رأيو بس كان ثابت في قرارو وسافر بس تواصلنا ما انقطع وبحاول كل مرة اتحايل عليهو انو يرجع بس برفض لحدي ما عدت اربعة سنة واصريت عليهو فقرر انو يرجع إجازة
_عمران ما تكلم ناس البيت حابي اعملها ليهم مفاجأة
__ اها حتستقر هنا؟
_ لالا ما بقدر انا اسست حياتي هنا
__ حتقدر تقول لناس البيت انو جيت اجازة بس؟
_ بعد اخد فترة براحة حأكلمهم
__ والله انا شايف ماف ضروري لرجعتك تاني
_ حياتي كلها هنا يا مان . اتكلمنا شوية وقفلت منو ولمن جا زمن السفر كلمني ولمن وصل استقبلتو
__ ليك وحشة والله
_ والله انت اكتر ياااخ
__ طولت شديد لكن
_ الزمن جرا والله . ووصلتو بيتهم وفي الشارع شيلت لناز شوكولا في الطريق واديتو ليها وشادي استغرب انو لسع متذكرين عادة الطفولة حقتنا
بعد فترة قررنا نعمل رحلة على شرفو وطبقناها وطبعا ناز زعلانة مني لانو تواصلنا ما كان ذي زمان من شادي رجع هي مفتكرة اني نسيتها وهي ما عارفة انو ما زحت من بالي ولا لحظة واثناء الرحلة حصلت مشكلة بين صوفيا وشادي وحليناها بس اثناء اليوم شاهيناز جرحت رجلها اول زول لحقتها انا وكنت خايف عليها شديد يمكن الكل ركز عداي انا لانو همي كلو كان معاها ولمن رجعنا اتصلت عليها ما ردت علي قلقت عليها بس قولت اكيد نامت والصباح كنت طالع على الشغل تاني اتصلت ما ردت ما لقيت حل غير اني اتصل على شادي اتصلت عليهو كان صاحي من النوم
__ شنو يا مان من الصباح
_ نسيت انك عاطل وكدا
__ طالع على الشغل ولا شنو
_ ايي وانت برنامجك شنو الليلة
__ يا مان خليني اصحصح بالاول بعدها بوريك
_ خلاص تمام وقبل ما اقفل
__ سمعنا
_ ناز بقت كيف
__ ناز؟؟!!
_ قاصد شاهيناز
__ مالا شاهيناز
_ امس جرحت رجلها
__ والله ما عارف انت مصحيني من النوم لو ناسي يعني
_ اقطع وشك وواصل نومك . وقفلت منو قبل ما يركز اني مركز مع شاهيناز كتير مشيت الشغل وصلت كدا اتصلت لي ناز اتنهدت ورديت
__ من امس جادعة تلفونك وين
_ والله نايمة بس . جوطت فيها
__ انتي ما عارفة انو في واحد سجمان هنا بحاول يصل ليكي وما قادر وحضرة جنابك نايمة
_ عمران كدا استهدي بالله رجعنا متأخرين من الرحلة ذي ما عارف ورجلي وجعتني بلعت مسكن ونومت طوالي ويداب صاحية لقيت مكالمات منك
__ هسي كيف رجلك
_ احسن بس حأمشي المستشفى مع صوفي يشوفوها لي ولو محتاجة حقنة تتنوس حأخدها بس ما ظنيت اخدها لانو كانت فرع ما حديدة
__ تمام واديني تلفون لمن تكونو طالعين
_ تمام وانت في الشغل؟
__ ايي وصلت هسي
_ تمام وخلي بالك من نفسك
__ وانتي كمان . وقفلت منها يداب قلبي ارتاح انها كويسة
بعد خلصت دوام اتصلت لشادي انو يلقاني في البحر دا حسب خطتنا مع بعض كانت اتقابلنا وطلبنا قهوة
__ شادي
_ نعم
__ انت لازم تقعد تحكي مع صوفيا وتحلو المشكلة
_ ما عاوز افتح دفاتر نحنا قفلناها
__ ماف دفتر حيتقفل بالطريقة دي لانو امس تصرفك ما صح معاها
_ ما كنت قاصد
__ لانو قلبك ما صافي اتجاهها اقعد معاها واحكو واشكو لبعض لمن تصلو للسلام . اتنهد تنهيدة طويلة
_ صح كلامك
__ لانك حترجع تاني روسيا احسن ترجع وانتو متصالحين لانو انتو في النهاية اخوان صح ولالا؟ . سكت ما جاوب وسرح بعيد حبيت اديهو مساحتو الخاصة شوية سكتنا ذي خمسة دقايق وانا البقيت سرحان بعيد ومتوتر افتح معاهو الموضوع
_ عمران
__ نعم
_ مالك . عاينت ليهو مسافة وهو رفع حاجبو منتظر اجابتي
__ شادي انا داير اتزوج . حسيتو اتفاجأ
_ العروس منو . هنا سكتا وبقيت اعاين ليهو مسافة وهو بعاين فيني لمن طال سكوتي هو اتكلم
_ شاهيناز او ذي ما بتقول ليها ناز صح؟ ............