رواية اللون السابع للحب الفصل التاسع 9 والعاشر 10 بقلم شذى عبد المكرم
الايام مرت وبقيت احسن وشغالة غيار لجرحي التاني اصلا كان اسبوعين بس ويفكو لي الجرح وهسي قربت وكنت لسع في المستشفى ما خرجوني
_ عمار
__ نعم
_ لمن نطلع من هنا حنرجع طوالي صح؟
__ حنأجر شقة اسبوع او اسبوعين لمن خلاص الدكتور يقول فيكي تسافري حنرجع
_ وانت طول الفترة دي قاعد وين
__ في المستشفى بس ما قدرت افارقك
_ امممممم
__ نفسك في حاجه؟
_ اتكلم مع امي والبنات
__ ما طلبتي حاجة . اتصل لناس البيت فيديو كول عن طريق ابوهو واتكلمت مع امي وحكت لي الحصل وبعدها خلت التلفون للبنات
همس: اها بنوت الحصل شنو في غيابي
صفا: والله ما كنا فاهمين حاجه من غيرك
همس: حبايبي يا ناس اها يا جنة علاقتك كيف مع سفيان خليتو المناقرة ولا لسع
فردوس: لسع ذي ما نحنا ولسع بخاف منو
صفا: ولسع بتخالف كلامو . ضحكت
همس: نهائي ما ناوية تجيبيها لبر
فردوس: اعمل شنو واقف لي على الهبشة وطوالي بجوط فيني
همس: ربنا يعينك
فردوس: امين يارب
همس: ما حكيتو لي كيف بقيت مرت عمار للان ما مستوعبة طبعا
وسام: كلمك؟
همس: ايي بس بدون تفاصيل قال لي عشان اعمامك يرضو يخلوني اسافر معاكي
فردوس: هي خليني اقعد كويس واحكي ليكي الدراما الحصلت . قومت ضحكت
همس: اها سمعيني
فردوس: الدكتور قرر ليكي السفر وقال مرافق واحد بس يسافر واعمامك قررو وهو بسمع فيهم بس ولمن عمي محمد قال ليهو اها المطلوب مني شنو عشان السفر هنا هو اتدخل قال ليهم ماف زول حيمشي معاها غيري وقوم الدنيا وقعدها ولمن قالو لو كنت زوجها ممكن بدون تردد قال بعقد عليها والشكلة دورت تاني لمن عمي محمد طردو برا المجلس وما عارفة كيف اقنعهم فجأة اليوم التاني عمتي قالت لينا الرجال مشو عشان يعقدو لعمار وهمس . كنت متفاجئة من الكلام دا وفرحانة في نفس الوقت
صفا: احساسك كيف حاليا وانتي مرت عمار
همس: امممم ما عارفة
وسام: ما عارفة يا كلبة ولا طايرة السماء عديل . قومت ضحكت شديد
همس: ما اكذب متفاجئة ومصدومة وفرحانة بس كنت حأفرح اكتر لو كان في ظروف احسن من دا ومن دون جبر هسي بعتبر انو عمار انجبر يعقد علي نسبة للموقف الحصل لو ما تطلب الامر ما كان عقد
صفا: شوفي النص المليان من الكاسة احتمال بحبك ودي كانت فرصة ليهو
همس: بحبني كبتو وانا بعرفو وبعرف احساسو وخوفو دا ذي خوف ام على جناها
وسام: ننتظر ونشوف البحصل احتمال ما تنفصلو والله انا حاسة انو عمار بحبك ومستحيل يطلقك
فردوس: حتى انا والله وطبعا عمار مخاصمني
همس: ليه
فردوس: محملني ذنب الحصل ليكي . وحكت لي كل مواقفهم والله زعلت عليها شديد
همس: لمن نرجع بنحل الموضوع دا
فردوس: ان شاء الله يلا نخليكي ترتاحي شوية . ودعوني وقفلت منهم وبقيت اعاين للسقف منتظرة عمار يرجع بس اتأخر لمن نومت صحيت بحركة في الغرفة فتحت عيوني
_ عمار جيت؟
__ ايي
_ وين اتأخر كدا
__ طلعت مشوار
_ من دون تلفونك؟ . طلع واحد من جيبو استغربت
__عندك اتنين؟
_ دا كان قفل اندوريد واضطريت اشتري واحد جديد ووديتو عشان يفتحو لي بسبب الارقام الفيهو
__ ايواااا ومشيت وين
_ كتب بفتش لينا في شقة للايجار
__ ان شاء الله اتوفقت
_ الحمدلله لقيتو
__ حنطلع متين
_ بالكتير بكرة او بعدو
__ حلو مليت من الغرفة هسي ورا مشيني برا شوية
_ برا الجو بارد
__ عمار والله مالا ياااخ
_ خلاص نلف في المستشفى بس
__ تمام . قومني وجاب الكرسي المتحرك طبعا رجلي الشمال ما شغالة يعني اتشلت بس عمار طمني انو مع التمارين حترجع واصلا بدو لي فيها بالجد عمار صرف في علاجي دا مبالغ مالية كبيرة شديد ما عارفة كيف اجازيهو . قعدت في الكرسي ولفينا في المستشفى بس بالجد كبيرة شديد بس حلوة مبالغة
همس: حلوة لكن
عمار: شديد نمشي الطابق التاني؟
همس: ممكن؟ بس كيف مع الكرسي دا
عمار: في اصناصير
همس: ذي التلفزيونات ديك؟ . قام ضحك
عمار: ايي
همس: يا مرحى . ضحك ومشينا كانت تجربة ظريفة لفينا ورجعنا الغرفة...
اليوم التاني اصريت لعمار انو يخرجوني وبالجد تم الاجراءات وخرجوني ومشينا شقتنا كانت صغيرة غرفة وحدة بس ظريفة اصلا ما حنقعد كتير فيها.......
____________
من جانب سفيان
كان مفكر انو يتزوج وطبعا من دون تفكير انو العروس فردوس بس غير مخططاتو كلها بسبب حادث همس ما قدر يكون اناني فأنتظر لمن همس بقت كويسة وصحت من غيبوبتها وفي نفس اليوم الكان بتكلم فيهو مع عمار انو خرجوها من المستشفى قرر يمشي لابوهو وبالفعل مشى
__ ابوي
_ نعم
__ داير اتكلم معاك في موضوع ضروري
_ اتكلم سامعك
__ داير اتزوج انا
_ دا يوم المنى بس ما ننتظر عمار يرجع؟
__ انا ما داير اتزوج بكرة يعني بس نطلب ولحدي زمن العرس عمار بكون رجع
_ تمام وان شاء الله بس بنعرفها لانو زواج الغريبة بجيب المشاكل
__ فردوس بت عمي صابر
_ بت عمك خير ما اخترت يا ولدي خلاص بتكلم مع عمك
__ تسلم ابوي
وقام منو وهو بفكر في ردت فعل فردوس لانو عارف تفكير فردوس فيهو هي مفكرة انو بكرهها بس المتأكد منو انو حيتزوجها حيتزوجها وبعدها تفهم مشاعرو براحتها
ابوهو مشى لاخوهو
مصطفى: والله يا اخوي جاي ليك وكلي خير
صابر: اتفضل
مصطفى: سفيان ولدي دا داير بتك فردوس
صابر: بتي بتك لو عقدت ليهم بدون موافقتي ذاتو ما بعترض
مصطفى: ربنا يخليك خلاص كلم البت
صابر: تمام . وطلع منو وكلم سفيان بالحصل وفرح شديد.....
_____________
من جانب فردوس
خبر خروج همس الغيبوبة دا كان احلى خبر سمعناهو وبكينا لمن قولنا كفى ولقيناها بالتلفون لانو ما كنا مصدقين نهائي
وطبعا طول فترة الخمسة شهور العدت دا علاقتي بسفيان كانت متوترة لانو دايما بعمل عكس البقولو لي ودا بعصبو ومرات بعصب من دون سبب ودا زاد من خوفي اتجاهو وبقيت لو اشوفو طوالي بغير اتجاهي قبل ما يشوفني لمن امي جات ادتني خبر الموسم والخبر الصادم
__تعالي يا بت
_ نعم
__ عمك جا لابوكي وطلبك لسفيان ولدو
_ مستحيل بتهظري صح
__ هسي دا موضوع يهظرو فيهو . طوالي جوطت
_ ما بتزوج سفيان نهائي والله لو اموت
__ انتي هبلة يا بت
_ ابوي ما وافق لسع صح
__ زمان اداهو الموافقة بدون تردد . قومت ابكي وانا برجف كيف يعني اتزوج سفيان هم ما جاديين ولا شنو
_ ابوي دا ما دايرني ولا شنو
__ انتي مجنونة دا ود عمك يعني ما اداكي لزول غريب
_ والله سفيان دا احسن لي منو الغريب
__ ما تقولي كدا
_ والله يا امي
__ بس ما بنقدر نعمل حاجه
_ وعمي دا ما عارف انو ولدو بكرهني
__ يا بت سفيان ما بكرهك
_ ياااخ انتو ما عارفين حاجه وخليكي عارفة انو ابوي بموافقتو دي كتب موتي . ورقدت اديتها ضهري وبكيت بحرقة وحاسة انو حياتي انتهت
جوني وسام وصفا اتخلعو فيني
صفا: مالك يا بت .
فردوس: ابوي يا صفا
صفا: مالو عمو مصطفى
فردوس: داير يزوجني لسفيان اتخيلو
وسام: مستحيل طبعا
فردوس: والله العظيم
وسام: هو ما عارف انو سفيان بكرهك
فردوس: دي مشكلتي هنا
صفا: اتكلمي معاهو
فردوس: اقول ليهو شنو بس
صفا: حياا حبيبتي ما تزعلي احتمال بعد العرس يتغير . قومت ضحكت
فردوس: سفيان ويتغير والله الضحك بشرطني يااخ هو انا بعيدة منو مكرهني عيشتي لمن اتزوج يا الله ساعدني . ورجعت ابكي الفكرة براها بتقتلني لمن اتصلت لي همس
همس: جنة يا جنة . اتخلعت لمن قومت ابكي ليها
همس: مالك حبيبي
فردوس: ابوي داير يزوجني لسفيان اتخيلي . اتخلعت برضو
همس: جادة؟
فردوس: والله
همس: حتعملي شنو
فردوس: والله ما عارفة
همس: ما بأيدنا حاجة بس دا الكاتبو ربنا لو خير بتم ولو ما خير ما حيتم وسفيان مهما كان بكرهك او بحبك هو في النهاية ود عمك صح؟ يلا مستحيل يضرك وحتى انتي لمن حكيتي لي بمشكله الحرامي اول زول جا في بالك ياهو سفيان الشين دا بس يعني مهما عملتي ما ليكي غير سفيان دا بس ونستنى ونشوف تمام حبيبتي؟
فردوس: تمام تسلمي بردتي قلبي
همس: دا واجبي . اتكلمت معاي شوية وطمنتني بكلامها وصح كلامها في النهاية ود عمي ودي قسمتي برضى بيها بس حأحاول انو ما ازعلو عشان الحياة تمشي بس
جا ابوي وكلمني ورضيت بواقعي دا بس وقال انو لازم نبدأ في تفاصيل العرس بس اول ما عمار وهمس ينزلو السودان حنعمل العرس .....
عندما يكون الواقع بهذا الإنحدار ، فإن أسوأ ما قد يحدث لك هو أن تتأقلم .
10
اتفاجأت بخبر سفيان وفردوس دا وهميت ليها شديد كنت بصبر فيها لانو مدام ود عمها قال دايرها ماف اعتراض تاني لازم ترضى بس لمن عمار رجع
__ عمار انت عارف انو سفيان اتقدم لجنة؟
_ سفيان اتقدم لجنة؟
__ ما كنت عارف؟
_ لالا متين حصل الكلام دا وليه ما كلمني
__ هسي كنت بتكلم مع جنة وكلمتني
_ غريبة لكن . في كلامنا دا تلفونو ضرب وكان سفيان
_ دا سفيان
__ معناهو داير يكلمك . فتح الخط ودخل جوا لمن خلص جا لي
__ اها كلمك؟
_ ايي
__ اها
_ اها شنو
__ عمار ياااخ مالك . قام ضحك
_ جنك شمارات
__ يعرفوني بت كيف . قام ضحك
_ والله صح
__ اها قال ليك شنو
_ حيكون قال لي شنو مثلا داير يتزوج واتقدم بس
__ والله خسيس خلاص اها بقولا بالواضح ليه اختار جنة
_ كيف يعني زولة وبحبها واتقدم ليها . قومت فكيت الضحكة
__ منو بحب منو
_ مالك
__ خليك جادي
_ والله جادي هسي كلامي دا فيهو شنو
__ سفيان شنو كمان البحب
_ مالو ما بشر
__ اشك فيهو دايما معصب في الكل عداي انا ما بسألني
_ لانك بتخصيني . هنا فصلت
__ امممممم صح بجوط فينا ككل بس ما حصل سألني منفرد ذي جنة
_ امك ما بتقدر تسألك وانا موجود خلي سفيان . قومت اتذكرت حاجه
__ متذكرة لمن شاكلتني بسبب الروج وكنت ببكي امي بعد عرفت انو المشكله معاك قالت لي خلاص اسكتي هسي عمار بجي بنفخنا كلنا . قام ضحك وانا بعاين ليهو بحب وبتذكر حنيتو علي وخوفو علي
_ يلا عشان مدلعك بقيت تخالفي رأيي صح؟
__ حاشا وكلا والله بس البنات عصرو علي شديد بس تاني ما بتحصل والله
_ نشوف
__ اها حنرجع متين عشان احضر العرس
_ مالك مستعجلة كدا العروس انتي؟
__ بري متزوجة انا . قومنا ضحكنا
_ بطة هسي انتي مرتي؟
__ للان ما مصدقة الليلة حبيبتك لو عرفت حتنفخنا الاتنين
_ حبيبتي؟؟
__ ما عندك حبيبة؟
_ حبيبات ما حبيبة
__ سقطت من نظري . قام ضحك
_ صح كدا ما عندك حبيبة يا عمار
__ هو انتي اديتيني مجال لمن احب والله اهتمام ساي فيكي تموت غيرة . وضحكنا لانو كلامو صح اصلا لو بقى عندو حبيبة حأطفشها ليهو لاني ما بقبل زول يشاركني في اهتمام عمار
اليوم التاني عمار طلعني واتفسحنا شوية في سويسرا بس ما مشينا اماكن كتيرة لاني تقيلة وكنا بتجول بالكرسي المتحرك بس غيرت جو
__ شكرا عمار
_ ما بحب الشكر كدا
__ بتحبها كيف
_ عدي الجمائل لمن تبقي كويسة بوريكي . قومت ضحكت
__ كويس هسي تعال اشكرك خفيف كدا . وفتحت ليهو ايدي كأنو ما صدق طوالي جا جضني عليهو شديد
_ صحيح القال الناس بتحارب برد الشتا كدا . خجلت وضربتو في ضهرو
__ عمار عيب . ضحك وحكاني
_ عمار عيب . وضحكنا وفكاني وقعد جنبي
__ عمار انت ضعفت شديد
_ هموم الدنيا يا مرتي . والله عمار دا درامي بشكل بس بحبو قومت ضحكت
__ انتهيت عديل كدا
_ موش انتي رجعتي تتكلمي معاي اديني اسبوعين بعمل لي مشروع تسمين
__ انا ذاتي محتاجة
_ ما بقدر دي ميزانية عديل كدا
__ عمار خسارة فيني؟ . مسك يدي وعاين لي في عيوني بحب
_ خسارة حبيبتي انا . قومت سحبت ايدي وضربتو كتير وهو يضحك
__ خسارة التربية فيك يا حسرة
_ انا المربيكي ولا انتي المربياني
__ يا خسارة التربية بس . قام ضحك وسلم علي في خدي لمن خجلت وقام خلاني ودخل الحمام وانا بقيت اتبسم براي ذي الهبلة
قعدنا اسبوع بس والدكتور قال بعد دا ممكن ارجع السودان كنت مبسوطة لانو اشتقت لناس البيت شديد وكنت شغالة في التمارين الفيزيائية بس عمار قال حيشوف دكتور هناك يواصل لي وقطعنا التزاكر ولمن وصلنا المطار عمار وزن الكرسي حقي
__ حأمشي كيف للطيارة
_ انا قاعد اعمل شنو
__ كيف يعني
_ حأشيلك طبعا
__ ولمن نوصل المطار اوع تقول لي حتشيلني برضو مستحيل طبعا لو استقبلنا عمو وين تشيلني قدامو
_ عندك حل تاني؟
__ عمار ما مسافرة معاك او تشوف لي كرسي هناك
_ والله دا العندي بس . الفكرة براها بتخجل
_ ياااخ مالك هو انا داير اشيلك حبا فيكي؟
__ شكرا يا عمار شكرا عشان وضحت نيتك . قام ضحك
_ ياااخ مالك ياااخ ما قاصد كدا بس يعني انا ما داير اشيلك حبا في الشيل بس حالتك بتطلب كدا يعني انتي عيانة فأسترخي ساي
__ امممممم . شيلت هم من هسي حأخجل ياااخ يكون شايلني قدام عمي بس ماف طريقة ما بقدر امشي ولا بقدر اسند على رجلي اليمين مسافة والدكتور قال ذي اسبوعين تانية ما اركز عليها كتير ولا احملها كتير ركبنا الطائرة وطبعا عمار شالني للطيارة ركبنا اخر ناس عشان الزحمة وكدا وطبعا يوم كامل في الجو بس مع عمار ما بحس بيها
__ لمن كنا جايين اليوم الفي الجو دا حسيتو قرن وكنت خايف انو حالتك تسوء في الطيارة هنا وكنت هامي ولمن حسيت رأسي شاب بس حاليا راجعين وانتي جنبي هنا . مسكت ايدو ومليت في كتفو
_ عارفة انك عاينت بسببي كتير
__ والله في سبيل عافيتك اي حاجة بتهون
_ ليه كنت رافض انو زول تاني يجي معاي
__ هو انا جنبك متعذب لمن استنى اربعة شهور وانتي بعيدة ما عارف حالتك كيف مستحيل طبعا وبفكر لو صحيتي وانا ما جنبك حتعملي شنو
_ بالجد كنت حأزعل لو ما كنت الجنبي انت وما كنت حأتكلم معاك
__ عشان كدا كنت مصر ياااخ انتي بتي وقطعة من روحي
_ وبطتك . قام ضحك
__ وبطتي وام شبر ونص حقي . قومت ضحكت وبقيت نحكي ونضحك ونحنا مبسوطين
لمن وصلنا نزلوني اخر وحدة عمار نزلني ولمن وصلنا صالة الوصول خاتني في كراسي الاستقبال ومشا يشوف سفيان وعمو خليفة هم الجو يستقبلونا وصلهم لي حمدو لي السلامة ومشى مع سفيان يشوفو موضوع الشنط
خليفة: بتقدري تمشي؟
همس: لالا ما بقدر
خليفة: جيبتي معاكي الكرسي
همس: ايي بس عمار وزنها صعبة نشيلها جوا الطائرة
خليفة: ايوااا هسي كيف صحتك
همس: انا تمام الحمدلله بس لازم ارجع المقابلة بعد ستة اشهر لو ما قدرت برسل التقارير
خليفة: ايوااا كويس . وقعد يتونس معاي لمن ديلاك رجعو
عمار: نمش خلاص؟
خليفة: ايي
عمار: سفيان عربيتك ما بعيدة صح؟
سفيان: والله بعيدة شوية
عمار: خلاص مسافة نحنا نطلع قربها لاني حأشيل همس
سفيان: تمام . وقدم مع الشنط نحنا دقيقتين وعمار شالني في الاول خجلت بس الموضوع ما بأيدي ووصلنا للعربية وطلعنا ولمن وصلنا عمار نزلني دخلنا جوا يداب بدا موال البكي وامي دي تعزي بس كل ما تشوفني تبكي وتبكيني معاها
عمار: عمتي خلاص يااها همس كويسة ما تبكي خلاص
محمد: مها خلاص البت براها عيانة ما تبكيها كدا
مها: والله ما بيدي . وسكتت حتى انا سكتا
وبعدها قعدنا نتونس لمن عمار جاني راجع
عمار: لازم ترتاحي بعد دا
مها: اي ارتاحي بعد دا . جا علي عشان يشيلني قلعت عيوني لمن قرب مني
همس: عمار لا جيب لي الكرسي بس
عمار: ما فكيناهو من التغليف حقو كدا خليني ادخلك سريع ياااخ دا ما زمن خجلك
همس: عشان انت ما البشيلوك ما حاسي بي
عمار: اخر مرة ذاتو كسرتي لي ضهري . حمرت ليهو
همس: بالله؟ يلا نهائي ما حأخليهم يكفو التغليف تشيل كدا بس
عمار: والله مستعد اشيلك عمري كلو . طوالي فصلت وبقيت اتبسم ما استوعبت لقيت نفسي في الجو وشالني دخلنا غرفتنا بتاعت البنات لقيتها ذي ما هي ما اتغير فيها حاجه وقام طلع هو وامي جات ساعدتني غيرت ورقدت نومت شوية وبعدها طلعوني برا الجيران كانو بجو يكفرو لي لمن اليوم خلص وبالليل جانتي فردوس كانت بدو ليها في الحبسة وبقينا نتونس.....
_____________
من جانب فردوس
ابوي قال يبدو لي في الحبسة قولت ليهو انتظر همس قال همس كدا كدا راجعة ما حتفرق يعني زعلت بس ما بيدي حاجة وبديت الحبسة كدا امي جاتني
امي: اطلعي سفيان دايرك؟ . استغربت
فردوس: انا؟؟ داير بي شنو
امي: انتي هبلة يا بت دا حيبقى راجلك اطلعي شوفيهو . اتففت ولبست توبي وكممتو يعني عيوني بس البتشاف ومشيت ليهو لقيتو واقف
_ كيفك
__ كويسة الحمدلله وانت
_ الحمدلله العرس حيكون بعد شهر من هسي
__ امي كلمتني
_ ناقص حاجة؟
__ لالا
_ ما تترددي طوالي قولي لي
__ والله مشتهية لي عرديب وعاوزة لي لوح شوكولاتة ترند كدا ما عارفة اسمو شنو وبس . قام ضحك قولت في سري بضحك لي هسي عشان يبكيني بعدين بس استقل الفرصة هسي
_ تمام بكرة حأكون عندك في حاجه تانيه؟
__ لالا كفاية عشان الدق ما يبقى علي كتير بعدين
_ كيف يعني
__ ولا حاجه
_ خلاص ارجعي جوا
__ تمام . وانا التفت راجعة مشيت كم خطوة كدا التفت عاين ليهو كان مدخل اياديهو جوا جيوبو حاجة گدا هيبة وماشة على الارض بس ورا الهيبة دي بركان غصب واصلت المشي ودخلت جوا
امي: قال ليكي شنو
فردوس: سألني لو ناقصني حاجة
امي: ايوااا شوفتي حنين كيف
فردوس: حنينة انا والله
اليوم التاني طوالي سفيان جاب لي الحاجات الطلبتهم ما عارفة لقى الشوكولاتة ديك من وين وعرفها كيف انو دي الانا كنت قاصداها بس جابها لي واحلى ما في الموضوع دا كلو رجعة همس اشتقت لوجودها في تفاصيل حياتي........