رواية شلة بنات الفصل الخامس عشر 15 والسادس عشر 16 بقلم شذى عبدالمكرم
نزلنا الجامعة بعد اجازة طويلة اشتقت لقعدات الجامعة والونسة مع الشلة واشتقت انو اشوف سام يوميا ان شاءلله من بعيد انا نزلت محاضرات طوالي بس هو قال حينزل الاسبوع الجاي مع عارفة ليه حاولت اصر عليهو بس رفض ينزل مع انو اخر سمستر ليهو بس شايفاهو بستهتر ساي لمن تمينا اسبوع في الجامعة هو نزل ولقيتو
_ لا خليك اسبوع تاني عليك الله
__ اشتقت ليكي عشان كدا نزلت . رفعت ليهو حاجبي
_ لالا ياااخ . قام يضحك
__ اي ياااخ
_ سجمان سام دا اخر سمستر ليك ما تستهتر ساي
__ انتي عارفه انو ما قاعد استهتر بالجامعة ما تخافي حبيبك راكز . قومت ضحكت
_ خليك دايما راكز كدا
__ ان شاءلله خلينا نقعد في حتة . وقعدنا
_ الليلة صحبك مراد وين
__ قاعد ليه بتسألي مني
_ عيني وقعت عليهو
__ شكلك ناوية تتعمي سريع والله حرام انتي لسع صغيرة . قومت ضحكت شديد لانو قالها بطريقة درامية
_ في سبيل مراد موافقة
__ روز امشي عديل قبل ما ارفع ايدي عليك ويقول ضرب بت
_ انت يدك حارة
__ مجربة؟ . رفعت ايدو كدا لفوق
_ لا بس واضحة . وضحكنا قعدت معاهو شوية ومشيت خليتو ورجعت للشلة
روز: نبأ جاهزة اعرفك على مراد
نبأ: متين
روز: بكرة لو جا . فرحت
نبأ: تمام . ميلت على نوسة الكانت بتشوف في خاتمها
روز: خطيبة اخوي
نوسة: همممم
روز: مالك سرحانة وين
نوسة: لا ماف حاجة
روز: رامي ما اتصل ليكي؟
نوسة: رسل لي رسالة بالليل انو مشغول وطمني انو كويس وتاني خلاص
روز: ما بعرف اقول ليكي شنو عشان اخفف عنك بس اخوي شغلو كدا
نوسة: روزة انا عارفة انو شغلو كدا وابدا ما معترضة بالعكس ما مصدقة اني بقيت خطيبة اخوكي
روز: هو اصلا من حقك تزعلي لانكم مخطوبين جديد والمفروض يكون في اهتمام مكثف بس انتي حظك كدا بس دي فترة وبتعدي مستحيل العمر كلو يكون مشغول كدا دي فترة التحضير بس مجرد ما يخلصها حيفضى ليكي . بعد كلامي دا فرحت وابتسامتها بانت
نوسة: وانا حأنتظر اليوم دا
فجأة كدا تلفونها رن وكان رامي
روز: شكلو حس بيكي . قامت تضحك
روز: امشي بعيد . وقامت من جنبنا ........
___________
من جانب نوسة
كنت بتكلم مع روز اتصل لي رامي قومت زحيت من الشلة ورديت ليهو
__ نوسة
_ اهلين رامي
__ كيفك
_ كويسة الحمدلله وانت
__انا بخير الحمدلله كيفك مع الجامعة
_ ماشي حالها خلصنا محاضرات وقاعدة مع الشلة
__ ايوااا حلو معليش ما قدرت ارجع ليكي من امس كنت مشغول شديد
_ لالا عادي عارفة انك مشغول شديد
__ ما زعلانة مني يعني
_ لالا ابدا
__ الحمدلله حبيت اسمع صوتك الحلو دا . ابتسمت بخجل
_ امممم . سمعت زول بتكلم معاهو
__ نوسة مضطر امشي بس برجع ليكي بعدين تمام ما تزعلي اوكي
_ لا ما بزعل يلا باي انتبه على نفسك
__ حاضر عيوني ليكي . وقفلنا وبقيت ابتسم براي في عز انشغالو افتكرني واتصل لي رجعت للشلة مبسوطة
روز: الوش نور يا ناس . ضحكت وقرصتها
نوسة: ياااخ دا رامي يااخ
روز: لالا ياااخ . ضحكت
نوسة: اي......
_________
من جانب روز
اليوم التاني لقيت سام وقعدت معاهو
_ وين مراد خليهو يجي . طوالي حمر لي
_ دقيقه افهمك قبل ما تقلب علي
__ اها
_ صحبتي نبأ بتحب القراءة ذيو وعاوزة كتب وعاوزة تسألو لو عندو كتب معينة
__ ايوااا
_ هسي بذمتك ابدلك بمراد؟ ياااخ انا عيني مليانة بيك . قام ابتسم
__ حبيبي انا خلاص اتصلي لصحبتك وانا بتصل على مراد
_ تمام . وهو اتصل وانا اتصلت شوية الاتنين وصلو وقعدنا الاربعة
روز: طبعا يا مراد نبأ بتحب القراءة ذيك وحابة تسألك من بعض الكتب موش كدا يا نبأ . هز لي رأسها بمعنى ايي
مراد: جدا . طبعا الاتنين شبه بعض هادئيين كدا خليناهم بتناقشو مع بعض وقومنا قعدنا في الطاولة الجنبهم و بقيت اتونس مع سام عاينت ليهم لقيتهم اندمجو سام همس لي
سام: اول مرة اشوف مراد مندمج كدا مع بت لانو شخصيتو دي ماف زول بفهمها لانو دودة كتب كان محتاج دودة كتب ذيو كدا . ضحكنا
روز: ان شاءلله يتفقو بس لانو نبأ دي الوحيدة الغامضة فينا
سام: واضح لانو ما حصل حكيتي لي عنها
روز: لانو ماف وحدة بتعرف هي بتفكر بشنو بحسها تكرهني كدا
سام: ليه ياااخ انتي منو ما بحبك
روز: ماف زول بحبني غيرك انت ونوسة
سام: نوسة دي جات من وين هوووي ما بقبل المشاركة . قومت ضحكت
روز: نوسة اولى منك
سام: بنختلف والله نوسة دي خليها تحب رامي بس انتي لا . بعاجبني تملكو دا بس اني ملكة في نظرو بقيت اعاين ليهو بحب شوية كدا رجعنا ليهم
روز: ان شاءلله لقيتي البتفتشي ليهو . ابتسمت لي
نبأ: اي مراد ما شاءلله عندو كمية روايات وكتب وقال حيجيب لي وحدات وانا حأديهو العندي
مراد: اي صح
سام: انتو حياتكم كلها كتب كدا هسي الشيتات دي ما مكفياكم؟ . ضحكنا كلنا
روز: دي ثقافة يا ما مثقف انت
سام: ما بتحبي الما المثقفين؟
روز: نهائي بحسهم كيف كيف
سام: مراد بالله بكرة جيب لي معاك كتاب داير ابقى مثقف . قومنا ضحكنا كلنا ودعناهم ومشينا مع نبأ شايفاها مبسوطة
روز: اها مراد كيف
نبأ: دا الكنت بفتش فيهو انو زول يفهمني ويكون بحب القراءة ذيي كدا
روز: بعد دا انتي وكيدك حبيبتي وانا حاساعدك . حضنتني
نبأ: بالجد شكرا روز
روز: عادي حبيبتي . ورجعنا للشلة قعدنا شوية ورجعنا البيت
بعد يومين كان يوم المهندس دي عادة عندنا في الجامعة بكرمو فيهو افضل مهندس في كل دفعة على حسب الرسم والخبرة الهو فيهو ودا ناس قسم المعمار طبعا وانا وشلتي مدنية وبنعمل احتفال بيحضرو كل اقسام الهندسة
_ سيمو الترتيب حلو لكن
__ شديد قامو بيهو البرالمة مع مساعدة كلية الفنون
_ ما شاءلله . وبدأ التكريم وبدأو من البرالمة لمن جا خريجين السنة
المزيع: افضل مهندس خريج سام عبداللطيف محمد سام . عاينت اتجاهو بخلعة كان واقف جنبي الناس قامت تصفق وهو مشى على المنصة طبعا هو بقرأ معمار جاتني نوسة
نوسة: وجع راجلك افضل مهندس خريج
روز: كدا خليني استوعب . قامت تضحك سام مشى استلم جائزتو ومعاهو شهادة كبيرة شديد عرضو متر إلا وجا راجع لي وهي انسحبت لمن شافتو جاي ولمن وصل لي قريت الشهادة
روز: سام عبداللطيف محمد سام الف مبروك
سام: الله يبارك فيكي
روز: طلعت بروف وانا ما عارفة وانا بقول سام مستهتر بس طلعت انا المستهترة والله . قام يضحك
سام: والله عشان بحب الرسم ودا ملعبي بس عشان كدا
روز: اصلا المعمار رسم وانت نجحت فيهو والله فرحت ليك شديد
سام: تسلمي حبيبتي
روز: لازم نحتفل بالمناسبة دي
سام: كيف
روز: حأعزمك برا الليلة بس خلينا نخلص الاحتفال
سام : متحمس انا . ضحكت ومد لي الشهادة بقيت ماسكاها او بالاصح حاضناها شوية كدا اصحابو نادوهو اداني الهدية وانا شيلت الهدية والشهادة ومشيت للشلة بتاعتي
هديل: اوووو سام دا طلع ما هين
قمر: احساسك شنو وانتي حبيبة افضل مهندس خريج . كنت حاسة بالفخر والله
روز: احم احم لابد من التواضع . قامو يضحكو
نوسة: لا الليلة ماف مجال للتواضع نهائي
نبأ: نوسة معاها حق الف مبروك ليهو
روز: الله يبارك فيكي
بعدها طلعنا مع سام عشان نحتفل
_ يلا اطلب الليلة يومك يا باشمهندس
__ مدام يومي يلا اطلبي على ذوقك يا انا . ابتسمت
_ تمام . طلبت ليهو وبعد خلصنا طلبت كيكة صغيرة عشان تنفع للاحتفال
_ والله احلى يوم معاكي لازم نتوجو بصورة . واتصورنا وقطعنا الكيك واحتفلنا ولمن جا الحساب شال الفاتورة مديت ايدي اشيلها منو
_ سام انا العزمتك
__ انا وانتي واحد
_ لا في دي ما واحد لو ما جيبتها تاني ما حأطلع معاك لحتة . ما سمع مني مشى دفع وجاني
__ نطلع؟ . ربعت ايادي بزعل
_ ما طالعة . قام ضحك ورجع قعد
__ خلاص نقعد ورانا شنو يا جميل انت . حمرت ليهو
_ ما تتكلم معاي
__ ما هو يا رزتي ما ظريفة في حقي كدا انا قاعد انتي تدفعي
_ دا تفكيرك كدا يا سام؟
__ خلاص افرديها المرة دي المرة الجاية لمن تعزميني بخليكي تدفعي انتي بس المرة دي دفعت وخلاص
_ وعد؟
__ وعد يا جميل انت . ابتسمت ليهو وطلعنا وصلني البيت ومشى كنت مبسوطة بأنجاز سام الليلة ..........
16
بعد يومين من يوم المهندس كنا قاعدين كدا اتصل رامي لنوسة بعد خلصت قالت لي انو رامي حيجي يسوقنا يطلعنا
روز: اخيرا فضى لينا السجمان
نوسة: انتي عارفه شغلو وكدا
روز: ايي دافعي لخطيبتك انتي السجمانة التانية . قامت تضحك
نوسة: دا اخوكي على فكرة
روز: شكرا ذكرتيني انا كنت مفكرة ود الجيران . تاني ضحكت شوية كدا رامي وصل طلعنا ليهو برا نزل من العربية سلم علينا
رامي: نمش؟
روز: رامي ممكن دقيقه . زحينا بعيد من نوسة شوية
روز: رامي اطلعو انت ونوسة براكم اتغدو برا
رامي: وانتي
روز: انا برجع البيت لانو انت بالجد اهملتها للبت من انخطبتو ما حصل طلعتو مع بعض بسبب ظروف شغلك انا قاعدة القاك في البيت بس هي لا هسي سوقها اي محل حلو قضو وقت ظريف وانا برجع البيت
رامي: ياااخ انتي احلى اخت والله
روز: عارفة عارفة هسي كدا اديني قروش الموصلات
رامي: لا وقبل ما اتصل كنتي حترجعي كيف
روز: ما هو بعد انت اتصلت ضمنت حق الرجعة واكلت القروش . قام يضحك واداني قروش مشيت لنوسة
روز: نوسة يلا امشي مع خطيبك انا حأرجع البيت
نوسة: كيف يعني
روز: الواحد دا يلا استمتعو باي . ما خليتها تستوعب مشيت ركبت ركشة ورجعت البيت.......
___________
من جانب نوسة
روز ما خلتني افهم حاجة فجأة اختفت من قدامي
رامي: نمش . كنت خجلانة منو اول مرة اطلع معاهو ركبت العربية وطلعنا مشينا مطعم هادئ وحلو شديد وقعدنا ولمن جينا نطلب
رامي: عاوزة شنو
نوسة: على ذوقك . بالفعل طلب لي على ذوقو اثناء منتظرين الطلب كنت خاتة يدي في الطاولة وبلعب بالدبلة لاني متوترة شوية
__ نوسة عارف نفسي اهملتك شديد ونحنا يداب مخطوبين جديد بس انتي عارفة طبيعة شغلي والضغط الانا فيهو
_ رامي انا من البداية عارفة ظرف شغلك وعارفة انو الموضوع ما بيدك وطبعا دا واجبك ودي حياة ناس وانا متقبلة وضعك دا
__ بالجد انا اخترت صح والله في البداية كنت خايفة انو تفكري اني ما مهتم ابدا
_ لا ابدا والله وكونو انو اخر الليل بترسل لي رسالة دا دليل انك ابدا ما ناسيني والله دا بكفيني ما ضروري حضورك جسديا
__ ما تقولي لي كلام حلو كدا بتخربيني . قومت اضحك
__ حأحاول انو افضي ليكي زمن لاني اهملتك بالجد
_ رامي انا من البداية عارفة انو شغلك كدا صح؟
__ صح
_ بس خلاص وعارفة انها فترة وبتعدي وكون انك بخير دا الاهم
__ انتي اصلا عسل كدا؟ . نزلت رأسي بخجل
__ الاسبوع دا حيكون ضاغط شوية والليلة عندي مناوبة للصباح
_ وليه طلعت
__ حبيت اشوفك
_ رامي انا قاعدة وحتشوفني
__ من انخطبنا ما شوفتك . ابتسمت ليهو مد ايدو هبش دبلتي
__ قاعدة في المحل الصح . ابتسمت بخجل
_ يعني هسي بعد نرجع حتمشي المستشفى طوالي؟
__ اي والله
_ ما حتتعب كدا؟
__ متعود على التعب حبيبتي . قالها بعفوية بس كانت حلوة لمست قلبي شديد جابو لينا الطلب واتغدينا وحكينا في شوية مواضيع تلفونو ضرب
رامي: ماف دكتور تاني؟
المتصل: ........
رامي: تمام جاي . قفل وعاين لي مسافة
نوسة: الواجب ينادي
رامي: اي والله في مريض محتاج يخرجوهو والمفروض امشي اوقع انا لاني المسوؤل عنو
نوسة: خلينا نطلع خلاص
رامي: بعوضها ليكي اسف بالجد والله
نوسة: لالا عادي . وحبيت الطف الجو
نوسة: هو كونو انو تعوضها لي دي شوية صعبة مع شغلك دا بس ممكن انا اشيل الاكل بتاعي واجي المستشفى ونأكل هناك عشان لو احتاجوك تمشي وتجي راجع لي . قام يضحك
رامي: والله فكرة حلوة شوية
نوسة: والفكرة لا تموت . وضحكنا وصلني وطلع طوالي كان احلى يوم بالنسبة لي......
_____________
من جانب روز
حسام كان عندو بحث ورسم وحاجات كتيرة كان مضغوط شديد ما قادر يتنفس
__ رزة شدة ما رأسي شابك ما عارف اعمل شنو
_ دا اخر سمستر حيكون شوية صعب بس هسي وراك شنو
__عندي بحثين داير اكتبو وعندي مرسم المفروض اخلصو وعندي تصاميم ما تميتها ولسع علي الشيتات والله دا جرا هوا عديل كدا
_ اممممم دا موضوع طويل شديد
__ مبالغة
_ هسي انت خلص التصاميم البديتها وانا بكتب ليك البحثين والمرسم دا ملعبك عارفة حتقدر ليهو بس محتاح رسم وهدوء
__ حتقدري تكتبي لي البحث؟
_ بقدر بس اديني العناويين تسليمهم بتين
__ بعد بكرة
_ ظابط في زمن
__ شكرا حبيبي ما عارف لولاكي كنت حأعمل شنو
_ لالا عادي ماف داعي للشكر هنا انت ابدا خلص التصاميم وانا ببدا البحوث رسل لي العناويين اوكي؟
__ اوكي . رسل لي العناويين وبقيت اكتب فيهم وكل شوية برسل ليهو رسالة بسألو مشى كيف لمن قال خلص تصميم وساهرنا لاخر الليل اتصل لي
__ خلصت جزء من التصاميم باقي لي اتنين بس
_ حلو انجزت وانا خلصت كتابة بحث واحد
__ بالجد؟
_ اي والتاني بكرة وكدا بكون خلصنا والمرسم دا تخصص ليهو زمن
__ انا اخر مرة قولت ليك بحبك متين؟
_ امممم تقريبا عندي اسبوعين ما سمعتها منك
__ كم انت قاسي يا سام
_ قاسي جدا . وضحكنا
__ والله يا رزة انا بحبك . خجلت
_ امممم
__ متين حترديها لي
_ يوما ما
__ وانا حانتظر اليوم دا . اتكلمنا شوية وقفلنا
اليوم التاني مشيت الجامعة وكتبت ليهو جزء من البحث هناك والبنات ساعدوني وطبعا ما لقيتو لانو مشغول شديد رجعت البيت وخلصت البحث التاني
_ سيمو خلصت البحث التاني
__ ما عارف اقول ليكي شنو
_ ما تقول حاجة ان شاءلله انت خلصت التصاميم
__ خلصتها الحمدلله
_ الحمدلله كدا باقي المرسم بس
__ اي وحابداهو بكرة
_ لو احتجت مساعدة انا جاهزة
__ تمام حبيبي
اليوم التاني مشيت الجامعة وحضرت محاضراتي وطلعت منها وكنت ماشة اودي ليهو البحث اتصلت ليهو ما رد ماشة على النشاط بس شوفتو قاعد مع بت كدا وبتونسو استغربت والغيرة شبت فيني مسكت تلفوني واتصلت شوفتو طلعو من جيبو وصمتو ورجعو جيبو حركتو دي كسرت حاجة جواي مشيت عليهو وقفت وراهو اتصلت تاني داير يصمتو تاني وقبل ما يصمتو قولت
_ ماف داعي تصمت التلفون كان عاوزة اديك البحث بس . ومديت ليهو البحث كان مخلوع فيني التفت على البت وابتسمت ليها
روز: السلام عليكم . بادلتني الابتسامة
البت: وعليكم السلام
روز: معليش قطعت ليكم الونسة
البت: لالا عادي . واتحركت من جنبهم نفسي ابكي بس سمعت وراي بناديني وقفت ليهو
_ نعم؟
__ خليني اشرح ليكي الحاصل
_ ماف داعي تشرح ارجع ما تخليها تنتظرك بس تاني لمن تكون عاوز تصمت مكالمة اتأكد انو الزول دا ما شايفك لانو حركة بتكسر الصراحة واسفة مرة تانية على الازعاج . كان زعلان شديد مسح جبهتو
__ روز انا لمن صمت التلفون ما كان عشان ... . وسكت
__ واصل القى حجة . ما رد كأنو بحاول يختصر الحديث
__ بس الصراحة البت حلوة تستاهل انو يصمتو التلفون عشانها تتهنو مع بعض ان شاءلله . ومشيت خليتو المرة دي كنت هادئة شديد مشيت للشلة قعدت كدا .........