رواية شلة بنات الفصل السابع عشر 17 والثامن عشر 18 بقلم شذى عبدالمكرم
بعد رجعت للشلة وقعدت بهدوء
نوسة: مالك كمان اوع تكوني اتناقشتي مع سام
روز: اكيد طبعا
نوسة: والله سام دا تعبان معاكي تعب
روز: يعني انا الغلطانة؟
نوسة: ما عارفة بس في نهاية الامر بتطلعي انتي الغلطانة
روز: المرة دي لا
ريان: ياااخ الليلة اجتماع هندسات السودان ما كان تتشاكلو في زمن ذي دا
روز: كيف يعني واجتماع شنو
ريان: ما سمعتي؟
روز: ما سمعت
ريان : يوم اجتماع افضل مهندسين خريجين الليلة وفي جامعتنا المرة دي قبل شوية وصلو الطلاب بس قالو بت بس وصلت الباقيين حيوصلو هسي دا وما تنسي انو سام افضل مهندس خريج حيكون معاهم ريان كلمتي قبل شوية
روز: دقيقه دقيقه بت وصلت؟
ريان : ايي
روز: احيااا انا . وعضيت يدي من الندم دي المرة التانية اتسرع في كلامي واجرحو
نوسة: خلاص شوفتيهو ذي المرة الفاتت وعملتي مشكله
روز: حصل والله
قمر: معناهو شتتي افكار الود وقعدتي . مع جملتها دي سرحت بعيد اكيد ما حيكون مركز مع الاجتماع
روز: اعمل شنو يا الله
هديل: والله انتي عجيبة يا روز
روز: ما كنت عارفه ياااخ . وقومت منهم قولت لازم احل الجوطة الانا عملتها دي مشيت سريع محل كان لقيتو واقف لقيت بالجد مجتمعين وكانو بتين وتلاتة اولاد ب سام وقفت مسافة ما بعيدة كدا واتصلت لسام وفصلت سريع ورسلت ليهو رسالة " سام عاين قدامك " قرا الرساله ورفع رأسو عملت ليهو بأيدي نظام تعال دقيقه بس استأذن وجاني سريع
_ ما عاوزة أخرك وعارفة ما حتكون مركز بسبب الحصل وعارفة اني اتسرعت بس وعد خلص اجتماع وانا بعزمك عشان اصالحك وانت تصالحني اوكي؟ . حسيتو انبسط بكلامي لانو ابتسم
__ اوكي
_ هسي انتبه مع الاجتماع وعاوزة توريهم منو سام اوكي؟
__ اعتبريهو حصل قبيل كنت ما مركز معاهم بس بعد جيتك دي حأكون مركز
_ لازم هسي ارجع عشان ما ااخرك نتلاقى بعد الاجتماع . عملت التفت على الجهتين كدا ماف زول عملت ليهو بأيادي شكل قلب . ابتسم بحب ومشى يداب قلبي ارتاح رجعت للشلة
نوسة: عملتي شنو
روز: حليت الموضوع الحمدلله
قمر: الحمدلله
نوسة: ربنا يصبر سام عليكي
روز: والله يصبر بس ما عندو حل تاني . ضحكو فيني ريان تلفونها ضرب ردت واتكلمت معاهو
ريان: دا ريان ماشة اشوفو وجاية . وقامت مننا
روز: عرفنا انو هديل متزوجة ونوسة مخطوبة وانا ونبأ وريان حشو حشو ذي ما بقولو لا دفعة هديل ولا دفعة نوسة بس متصالحين مع الوضع اها وانتي يا قمرية دفعتك وين
قمر: انا دفعتي ناس الف مبروك . ضحكنا فيها
روز: واضح جدا
قمر: المشكله ذي ما عارفين انو انا ذوقي صعب
نوسة: خليها لمن تقع ليها في واحد ما معروف رأسو من قعرو . قومنا ضحكنا
قمر: دقيقة اسألك يا روز ود اهلك الكان لابس قميص كحلي ونضارات في الخطوبة
روز: شوفتو الا رجال النسوان عيب يا قمر
قمر: عليك الله متزوح
روز: كان متزوج بس مرتو اتوفت ربنا يرحمها
قمر: ربنا يرحمها عندو اطفال؟
روز: انتي علقتي ولا شنو . قومنا ضحكنا
قمر: لا سؤال عادي
روز: لا ما عندو بس داك اكبر من ابوكي
قمر: قولي ما دايراني ليهو بس
روز: ايي لانو حجزتو لنفسي
قمر: والله اكلم ليكي سام
نوسة: لمن تجي تكلمي وريني عشان اكون شاهد
روز: سجمانات
قمر: اسمو منو هو
روز: اسمو احمد
قمر: ايواااا
نبأ: روز هداك ليهو مراد ورح معاي اديهو الكتب
روز: امشي براكي
نبأ: حلفتك ورح . قومت معاها مشينا عليهو سلمنا ليهو
نبأ: دي الكتب شكرا
مراد: العفو وكتبك لمن اخلصهم برجعهم ليكي
نبأ: عادي ما مشكله خلصهم براحتك
مراد: كلك ذوق اتفضلو اعزمكم على حاجة سام دا تقريبا في meeting
روز: ايي
مراد: خلونا نقعد
روز: لو ما مشغول بس
مراد: لالا عادي ياااخ . مشينا قعدنا واشترى لينا بارد وبقينا نعطي وندي في الكلام
روز: بستأذنكم سام دا رسل لي شكلو خلص انا بمشي وقرصت نبأ بالراحة نظام شدي حيلك ومشيت خليتكم وكذب سام لا خلص ولا اي حاجة
رجعت للبنات
هديل: وين نبأ
روز: خليتها مع مراد
هديل: ايواااا
بعد فترة اتصل لي سام انو خلص وانو الاقيهو في قريب من البوابة
روز: بنات حاطلع مع سام نوسة حترجعي براكي
نوسة: تمام . وطلعت ليهو
سام: نطلع ولا عندك حاجة
روز: نطلع . طلعنا وركبنا العربية
روز: كيف كان ال meeting
سام: كان حلو شديد واستفدت شديد منو
روز: اسفة كنت حأخربها ليك
سام: بالعكس انا بعتذر على الحصل وما بلومك على ردة فعلك
روز: انا لمن شوفتك صمتا التلفون ودخلتو جوا جيبك قلبي وجعني
سام: والله اسف بس كنا بنحكي في حاجة مهمة عشان كدا ما كنت عاوز اقاطعها وهي بتحكي
روز: بس ياااخ انا بغير ياااخ ما بتحمل اشوفك مع بت لمن تقعد معاها براكم
سام: فديتو الغيور حبيبي انا ما تخافي انا ليكي انتي بس انتي عارفة انا عملت شنو عشان اكسبك ياااخ انا تعبت معاكي تعب لمن كان مراد بقول لي ياااخ هي ما عاوزاك خليها بس كنت متمسك بيكي ولو كان ما قبلتي للان حأجري وراكي ما حأيئس نهائي
روز: في البداية كنت بزهج منك لانك كنت بتضايقني لاني كنت ما عاوزاك وكنت شايفة انو الموضوع دا ما غصب بس حاليا ندمانة على اي لحظة رفضتك فيهو والله ياااخ انا اكتر بت محظوظة في الدنيا دي بشكر ربي انو انت في حياتي
سام: انا المحظوظ والله . كنا بنتكلم لمن وصلنا وعزمتو نفس المطبخ الكان مشينا ليهو لانو ظريف شديد وطلبنا ولمن خلصنا الويتر جاب دفتر الفاتورة سام استلمها منو ونزلها تحت
روز: سام بحزرك جيبها . مداها لي فتحت الدفتر لقيت الفاتورة ماف استغربت بقيت اقلب فيها لمن رفعت رأسي لقيت سام مافي طبعا مشى دفع وجا راجع قعد
سام: مالك رابطة وشك . زعلت منو بالجد حمرت ليهو بس وما فتحت خشمي
سام: رزة مالك
روز: سام الفاتورة وين
سام: اهو ليها في يدك . قومت شيلت شنطة وجيت طالعة جا سريع لحقني مسكني من يدي
سام: رزة دقيقه ياااخ مالك انتي . سحبت ايدي منو
روز: ما بعرف وما تسألني فاهم . وجيت امشي تاني مسكني
سام: والله رجولتي ما بتسمح لي انو اخليكي تدفعي بأي شكل من الاشكال
روز: يبقى تاني ما حنطلع مع بعض
سام: ما تقولي كدا ياااخ
روز: كلامي واحد
سام: خلاص عندي ليكي عرض مناسب . رفعت ليهو حاجبي
سام: خلاص مدام زعلانة على العزومة عاوزك تعملي لي كيك مشتهيها بطريقتك الخاصة وتجيبا لي او اجي اشيلا انا رأيك شنو . سكتت دقيقة وضيقت ليهو عيوني كدا
روز: موافقة
سام: ظابط خلاص ياااخ بت حلوة دي . قومت ضحكت وطلعنا وصلني ومشى
بعد يومين كان عيد ميلاد نوسة اتصلت لرامي
_ رامي اسمعني هنا
__ اها
_ بكرة عيد ميلاد نوسة خليك عارف
__ عليك الله
_ ايي
__ الحمدلله انك ذكرتيني
_ اها فكرتك شنو
__ والله ما عارف ساعديني
_ اول حاجة لازم يومك يكون خفيف
__ دا اعتبريهو تم لانو مستحيل اضيع عيدميلادها
_ حلو تاني الهدية
__انتي بتعرفيها اطلبيها لي و واطلبي حقك برضو ورسلي لي رقم الحساب تمام
_ تمام وحتلقاها كيف
__ للزمن داك بفكر
_ هو بكرة بس
__ تمام لازم بالليل اتصل ليها اول زول
_ انت مكنة
__ دا بفضلك وبعدها لمن توصل الهدايا نلقى خطة
_ حلو . وقفلت منو.........
الثامن عشر 18
كنت بفكر في عيد ميلاد نوسة وكيف يكون والهدية اللازم اختارها لرامي والهدية اللازم اختارها من ناحيتي دخلت المتاجر الاون لاين فتشت وقولت مدام رامي حيدفع اختار على كيفي ولانو انا البيست تبعها بعرف ذوقها اخترت بمزاج وقال لي الاستلام بكرة وصفت ليهو الجامعة تبعنا واتفقنا على كل حاجة ورسلت لرامي رقم الحساب هو انا دايما بتصل ليها بالليل او برفع صورتها بس المرة دي قولت اخلي المجال لرامي مدام هو خطيبها عشان كدا
__________
من جانب نوسة
عيدميلادي كان باقي ليهو سويعات بس كنت راقدة وبفكر وبقول هسي لو كنا انا و رامي علاقتنا حب من طرفين كنت حأنتظر انو يعايد لي اول زول ولو نسى اشاكلو واعمل فيها زعلانة لمن يراضيني بس في حالتنا دي لا رامي يلا يلا عشان يلقى زمن يتكلم معاي وحتى ما بعرف تفاصيلي الدقيقة وانا بحب شنو ولا بكره شنو بس عارفة بعد زواجنا حيتغير دا كلو في عز تفكيري نادتني امي مشيت ليها
امي: رصي لابوكي الغدا يداب جا
نوسة: حاضر . مشيت رصيت ليهو وعملت ليهو الشاي ومشيت لميدو في غرفتو
نوسة: قاعد تعمل شنو
ميدو: براجع دروسي
نوسة: لازم تجتهد عشان تبقى دكتور كبير قدر الدنيا
ميدو: ذي رامي صح
نوسة: ايي ذي رامي
ميدو: اوكي . قعدت جنبو راجعت معاهو شوية لمن نام غطيتو ورجعت غرفتي بقيت اقلب في التلفون واشوف صوري والقى لي صور ظابطة عشان بعدين الساعة 12 ارفعها واعيد لنفسي عشان بعدين يشوفها رامي و يعيد لي بعد خلصت دخلت الميديا اتصفح شوية لمن خلاص باقي خمسة دقايق بس دخلت الواتس جاهز وبقيت اكتب عن عيد ميلادي واخليهو جاهز بس فجأة تلفوني رن لقيتو رامي اتفأجت اخر حاجة اتوقعتها اصلا رديت
__ الجميل خمسة دقايق ويكبر سنة . طوالي دموعي نزلت
_ يعني عارف؟
__ في زول ما بعرف عيدميلاد روحو؟ . قولت بدموع
_ لالا
__ بس خلاص حبيت اكون اول زول تبدي معاهو سنتك الجديدة
_ والله حتكون احلى بداية
__ وان شاءلله الباقيات كلها مع بعض
_ ان شاءلله يا رب . كنت مبسوطة حرفيا بالحصل كدا لمن تم الزمن
__ كل سنة وانتي اجمل وكل سنة وانتي احلى وارق بنت انا قابلتها في حياتي كل سنة وانتي جنبي كل سنة وانتي ملكة في نظري . بقيت ابكي بس والله حبيتو لرامي اضعاف ما كنت بحبو
_ رامي
__ عيون رامي احلى من يكبر سنة
_ انا جد محظوظة بيك والله
__ بالعكس انا المحظوظ بيكي لانو ماف وحدة حتستحملني وانا حياتي كدا بس انتي استحملتيني وحتى ما حصل حسستيني بحاجة او انو انا مقصر اتجاهك
_ لانو العلاقات بالتفاهم و التراضي وانا رضيانة اكون معاك وانت حياتك كدا العمر كلو
__ انتي ليه كدا
_ كدا كيف
__ جميلة كدا
_ يمكن لانو عيونك جميلة شايفني جميلة
__ او يمكن لانو قلبي حبك فشايفك جميلة . هنا فصلت واتفاجأت يعني هنا اعتراف صريح منو سكتا شوية وقولت ليهو براحة
_ يعني بتحبني؟
__ والله اكون غبي لو ما حبيتك . كنت طايرة من الفرح دي كانت اجمل هدية في عيد ميلادي ومستحيل انسى اليوم دا
__ عارف انك اتفاجأتي بس دا الحاصل ايي بحبك وانتي اول بت احبها لاني ما كنت لاقي زمن للحب ابدا وهنا انطبق عليكي مقو لة و لأنك جئت في الوقت الذي كنت أرفض فيه الحُب ، أحببتك أكثر مما ينبغي
_ رامي انت عارف انا كنت بقول عليك حلم لم يتحقق؟
__ بس اتحقق والله انتي المفروض تكوني حلم واجمل حلم . دي كانت اجمل مكالمة مع رامي وبعدها اتكلمنا ساعة كاملة
_ رامي انت ما شغال مستشفى بكرة
__ شغال وانتي شغالة جامعة صح
_ صح بس انا محاضرتي وحدة ومتأخرة شوية بس انت المستشفى بدري كدا حتتعب في القايم
__ لا عادي كل عشانك يهون
_ تسلم لي انا . اتكلمنا شوية ونومت كنت مبسوطة شديد ماف زول لاحقني وكدا ممكن اقول احتفلت بعيد ميلادي بأجمل طريقة.....
_________
من جانب روز
ما حبيت ازعج نوسة كنت عارفة انو رامي حيتصل ليها فرسلت ليها المعايدة في الشات ومشيت نومت الصباح لقيتها ردت لي وطلعنا ماشيين على الجامعة
روز: اها كيف احساسك وانتي الليلة عيد ميلادك
نوسة: والله يا رزة كان اجمل عيدميلاد مر علي
روز: ان شاءلله الباقيات كدا
نوسة: ان شاءلله يا رب طبعا اتصل لي رامي اول زول عايد لي ما اتوقعتها اصلا
روز: لو كان ما اتذكر كنت قتلتو
نوسة: انتي كلمتي صح لانو ما بعرف
روز: امممم سألني مرة وكلمتو والكويس انو ما نسى
نوسة: اااخ بس . وكانت مبسوطة والابتسامة لاخر ضرس فرحت ليها شديد وصلنا الجامعة وحضرنا المحاضرة وطلعنا وفطرنا واتصل لي ناس التوصيل مشيت البوابة استلمت الهداية وكلمت سام اداهو لصحبو تبع الكافتيريا
سام: حتمشي مع رامي
روز: اي ليه في شنو
سام: كنت داير اعرفك على زول او ممكن اقول على زولة . ضيقت ليهو عيوني
روز: زولة منو
سام: مرتي
روز: موافقة عشان اعرف ذوقك
سام: لو عاوزة تعرفي ذوقي عايني لنفسك
روز: دايرة افصل بس خيانتك دي ما سمحت لي . قام يضحك
سام : وين الخيانة في الموضوع
روز: دي منو مرتك دي
سام: انا مرتي وحدة بس واهو واقفة قدامي بس الداير اعرفك على مروة بت خالتي
روز: دي الكان شاكلتك عشانا . قام حاكاني
سام: اصلا الوقوف معاك بقرف ارجع للسنيورة ما تخليها تنتظر اكتر . قومت اضحك
روز: انت ما بتنسى ابدا
سام: نهائي اها البحصل شنو
روز: خلاص بقعد بتعرف عليها
سام: تمام . وقفت معاهو شوية ورجعت للشلة شوية اتصل لي رامي ما خليت نوسة تحس بحاجة وطبعا الشلة كدا عايدتها قومت مشيت الكافتيريا وشيلت الهدايا ومشيت لرامي
رامي: ياااخ انتي اجمل اخت ما عارف كنت حأعمل شنو بدونك
روز: انا قاعدة عشان اساعدك يلا دقيقة اتصل ليها عشان نفاجأها
رامي: بس كيف
روز: انا حأقيف بجوا وهي حتجيني واديها الهدية بتاعتي وانت تجي من ورا نخلعها وحتتفاجأ بجيتك
رامي: ظابط . بالفعل اتصلت ليها ووصفت ليها انا وين شايفاها جاية من بعيد لبدت الهدية ورا ضهري لمن وصلتني
نوسة: ليه واقفة هنا براكي في شنو
روز: كل سنه وانتي طيبه يا سكر . وطلعت ليها الهدية حضنتني شديد
نوسة: تسلمي حبيبتي ربنا ما يحرمني منك
روز: ولا منك يا رب . وكنا واقفين شايفة رامي جاي من وراها بالراحة قرب من اذنها
رامي: كل سنه وانتي طيبه يا جميل . اتخلعت والتفت سريع واتفاجأت برامي
نوسة: رامي . وختت اياديها في خشمها ضحكنا فيها
رامي: ايي رامي وجا يعايد ليكي
نوسة: ما مصدقة احلى مفاجأة
رامي: اتفضلي . ومد ليها الهدية حقتو
نوسة: بالجد شكرا ربنا ما يحرمني منكم . وقامت تبكي كنت متوقعة اصلا لانها اقل حاجة بتبكي حضنتها علي
روز: ما تبكي حبيبتي انا الليلة يومك يا جميل انتي . مسحت دموعها ورامي كان بعاين ليها بحب
رامي: روز معليش بس حأسرقها منك الليلة
روز: طوالي بس ترجعها
رامي: جدا
نوسة: تسرق شنو . ضحكنا لانها ما فهمت
روز: حيسرقوكي انتي . قامت خجلت
روز: خليكي هنا حأجيب ليكي شنطتك . هزت لي رأسها بمعنى تمام خليتها مع رامي ومشيت جيبت ليها شنطتها ودعتهم ومشو وانا اتصل لي سام انو مروة وصلت مشيت اشوفها واتعرفها عليها ظريفة شديد حبيتها بعدها هي وسام رجعوني البيت وهو مشى عشان يوصلها........
_____________
من جانب هديل
اتصلت لي هيام اخت حمزة طبعا صاحبتها علشان بعدين التعامل يكون احلى سلمت علي
_ قررتو تتمو زواجكم اخيرا . اتفاجأ
__ لالا لسع
_ كيف لسع وحمزة امس كان بتكلم مع ابوي وقال ليهو لازم تتم عرسك
__ حمزة لسع ما كلمني
_ شكلي طفشت الموضوع
__ لالا عادي اصلا حيجي يكلمني
_ اي صح لمن تنحبسي حأجي اقعد معاكي . ما حبيت اكسر لهفتها
__طوالي حبيبتي . اتكلمت معاها شوية وقفلت منها شياطيني قامت انا وحمزة اتفقنا انو العرس بعد اتخرج وهسي وين وعد الرجال الاداني ليهو انا وروز قومت اتصلت ليهو
__ حمزة
_ نعم
__ انت كيف تتأخذ قرار كدا
_ قرار شنو
__ انو تتم العرس
_ انت الكلمك منو
__ ما ضروري منو الكلمني كنت عارفة انو دا حيحصل عشان كدا ما كنت موافقة على فكرة العقد من الاساس
_ انتي ليه دايما بتحسييني انو انتي ما متمسكة بي ابدا يعني هسي ما عاجبك انو عقدنا انتي لو ما عاوزاني بس قولي لي
__ هسي دي علاقتو شنو بموضوعنا
_ ما هو نفس الموضوع شكلك ندمانة على العقد دا كدا قولي لي بالواضح ممكن عادي نفسخ مدام ما عاوزاهو فكري براحتك وارجعي كلميني بقرارك . وقفل الخط.........