رواية من انا الفصل الرابع عشر 14 بقلم مروة الصافي
خلصنا حاجاتنا ومشينا الفندق جهزنا حالنا وخلاص بكرة على سفر ان شاءالله امي اتصلت علي وقالت لي في مفاجاة بعد تجي قلت ليها عليك الله وريني قالت لي ماحتبقى مفاجأة
راسي بقى يودي ويجيب ياربي المفاجأة شنو رسلت لي حيدر انت عارف ناس امي عايزين يفاجؤني بس شنو قال لي اصبري بكرة قريب بتعرفي قلت ياربي الناس ديل داسين مني شنو غايتو عدى اليوم تقيل وبطيء وانا بالجد اشتقت لي ناس امي شديد
الصباح جاء اخيرا ومشينا المطار كملنا الاجراءات وركبنا الطيارة واقلعت بينا بالرغم من المسافة مابعيدة بس حسيتها طويلة والزمن طويل
اخيرا وصلنا وهبطت الطيارة وانا مافضل لي الا انزل بالشباك المهم نزلنا ومشينا السير شلنا عفشنا وطلعنا لقيت ناس امي منتظرننا جريت جري سلمت عليها ماتتخيلو سعادتي قدر شنو وسلمت على ابوي وحيدر شايفة في زول واقف معاهم مديت يدي سلمت عليه امي قالت لي يالت سلمي على اخوك عديل
انا نططت عيوني اخوي؟ قالت لي دا محمد اخوك لمن عرف اننا لقينا اصر يجي يلاقيك ما اقول ليكم انا السعادة الحسيتها في اللحظة دي اخووووووي ومسكتو وقعدت ابكي وهو كمان بكى معاي قلت ليه طول عمري نفسي يكون عندي اخ قال لي ماتتخيلي نحن من زمان راجينك قدر شنو امي طول عمرنا بتحكي لينا بيك وخلتنا نحبك حتى من غير نشوفك وعلى فكرة اسامة برضو حيجي قريب قلت ليه اسامة؟ قال لي اخوك التاني قلت ليها ياسلااااااام لمن تكونو معاي الاتنين عوض ربنا جميل قال لي اخيرا لقيناك وتاني مابنفرط فيك
اتلفت لقيت حيدر بس بعاين وحزين حسيت انو وراه كلام كتير بس ماقادر يتكلم قلت بعد نصل البيت بسألو ركبنا العربات ومشينا البيت لقينا ابوي ضاب*ح لينا كرامة قال لي عمو علي كرامة العمرة عملتها ليكم لو عندكم اي زول اعزموهو
قال ليه ماعندنا غير محمد اخوي خالتو نسيبة خافت من المشاكل قالت ليه خلينا نعزمهم في كرامتنا ان شاء الله الليلة ننبسط برانا انا لما قالت كدا ارتحت الحمدلله
بعد اكلنا دخلت غرفتي طلعت الهدايا لي ناس امي وخجلت ادي حيدر الهدايا حقتو قلت بعد امشي الجامعة اوديها ليه هناك اعتذرت لي محمد قلت ليها اسفة والله ماجبت ليك حاجة ماكنت عارفة بي جيتك قال لي يلا تعالي انتي وشوفي جبت ليك شنو
دخل دقايق جاء شايل شنطة ملانة هدايا لي فرحت فرح مش عشان الهدايا عشان حسيت قدر شنو هو بحبني وقدر شنو كنت محرومة من الاحساس دا ماف احلى من الاخ انا فرحانة بيه شديد
ناس عمو علي رجعو بيتهم وحيدر استأذن وانا مشيت غرفتي قلت انوم شوية قعدت شوية واتصلت لي حيدر
قفل شوية واتصل لي هو
قلت ليه مالك حاساك زعلان ولا متضايق كدا في شنو قال لي ماتاخدي في بالك ماعايز اشغلك كل شي بتسهل قلت ليه كيف يعني مالك في شنو احكي والا معتبرني غريبة قال لي غريبة؟ انتي اقرب انسان لي قلت ليه يلا طيب قول في شنو
قال لي امي ماعارفها مالها عايزة شنو مارضيانة اني اتقدم ليك مع انها في الاول فرحت انو ناس عمي لقوك ولمن كنتي ماف جو هي وابوي باركو لي ناس عمي وانا فرحت انو خلاص موضوعنا دا اول ماتجي حيتم
بس اتفاجأت بيها امس مارضيانة ومن امس انا وابوي بناكلم معاها وابوي قال لي لو هي مامشت مامشكلة هو بجي لي عمي براه بس انا عايزها هي تكون رضيانة وتجي معانا قلت ليه شوف لو امك مارضت نهائي انا مابقبل ماعايزة ابدأ حياتي بي مشاكل انا طول عمري بحلم بالاستقرار والهدوء
قال لي ان شاء الله ابوي بقدر يقنعها قلت ليه الكلام مش تقتنع الكلام تكون قبلانة من كل عقلها وقلبها قال لي ان شاءالله
هي بس لسه ماشافتك ولا شافت اخلاقك عشان كدا بس لو شافتك حتغير رأيها
قلت ليه ربنا يسهل قال لي هم عموما جايين بكرة يسلمو عليك قلت ليه تمام قال لي اها اجي معاهم ؟ قلت ليه البيت بيتك طبعا تتفضل في اي زمن
قال لي قبل كدا طلبت منك طلب وماقبلتي واسه تاني بعيد طلبي زمان كان عندك سبب اني غريب اسه بقيت ود عمك اها حتقبلي عزومتي ولا لأ قلت ليه خير ان شاء الله قال لي طيب اصلا بعد بكرة الجامعة حتفتح بعد المحاضرات انا عازمك غداء وفي المكان البتختاريه
قلت ليه انت عارف انا مابعرف اي مكان عمري لاكنت بطلع ولا شي اختار انت بس
بعدها ودعتو وقفلت كنت تعبانة قلت انوم شوية واقول اصلي العشاء نمت ماصحيت الا الساعة ١٢ قمت مخلوعة الصلاة فاتتني جريت جري اتوضيت وصليت العشاء وكم ركعة كدا لقيت محمد صاحي اتونست معاه مسافة قعدت الاخوان ماف احلى منها وبقى يحكي لي عن حياتو واحكي ليه
مشيت كملت نومتي وقمت صليت الصبح وتاني نمت لمن جات امي صحتني للشاي والفطور مع بعض قمت سريع اتجهزت وجيت فطرت طوالي وقمت رتبت المكان امي قالت لي وييييين نحن عايزينك ترتاحي بس قلت ليها ي امي انا مابحب اقعد ساي لازم اعمل اي حاجة اثناء مابنتكلم الباب دق مشى محمد فتحو طلعو ديل ناس عمي انا طبعا عرفتهم لانو معاهم حيدر
المهم سلمو علينا وعمي رحب بي شديد وكان فرحان شديد فرحتو من عيونو ظاهرة بس مرة عمي حسيتها انها بتجامل حتى سلامها كان بارد المهم مشيت المطبخ وعملت ليهم عصير وبعدو عملت قهوة وامي كانت عاملة كيك جبتو وجيت وقدمت ليهم سبحان الله حسيت مرة عمي نظرتها لي بدت تتغير وشوية شوية بقت تتونس معاي وتسألني من احوالي حسيت انها ارتاحت لي فعلا الزول لو ماشفتو واتعاملت معاه ماتحكم عليه وهي كان حكمت علي بس اللقتو عكس الكانت خاتاه او في زول كان ناقل ليها فكرة غلط عني
وطبعا من غير اي مقدمات ام حيدر قالت لي امي نحن عايزين امنية لي حيدر لو ماعندكم مانع انا بقيت مخلوعة عاينت لي حيدر لقيتو هو زاتو مخلوع حاجة نهائي مامتوقعة
عمي طوالي قال لي ابوي ايوا نحن ماحنلقى بت بي ادب امنية واخلاقها وياهو زيتنا في بيتنا
ابوي قال ليه حيدر ولدي واتربى على يدي وانا مابلقى احسن منو بس كمان لازم نشاور البت يمكن ماعندها رغبة انا في اللحظة دي قمت وجريت غرفتي والخجل كاتلني امي جات لاحقاني قال لي يابتي انا عارفة انك عايزاه بس الخجل في شنو كان تقولي رايك قلت ليها اتفاجأت وكمان اول مرة اتخت في الموقف دا
قالت لي اها اطلع اقول ليهم شنو قلت ليها اكيد موافقة امي طلعت ليهم قالت ليهم امنية موافقة بس امنية عندها ام واب تاني لازم يحضرو ويقولو رأيهم امي اتصلت لي خالتو نسيبة كلمتها دقايق وجات هي وعمو علي واريج وشوية اسمع ليك الذغاريت خالتو نسيبة جاتني ومسكتني وبقت تبكي وتضحك وامي جات وام حيدر كمان
قالو لي اها ماحتطلعي تباركي للعريس وهو يبارك ليك طبعا انا كنت مكسوفة شديد امي قالت لي قومي البسي ليك حاجة ابوك واخوك واعمامك عايزين يباركو ليك
المهم اتشجعت وطلعت باركو لي وحيدر كمان كنت خجلانة شديد مديت يدي بالعافية
المهم اليوم عدى وكل الفي البيت كانو فرحانين
الصباح جاء وانا انجهزت ماشة الجامعة امي صحت محمد يوديني بالعربية
طلعنا وفي الطريق لقينا حيدر واقف محمد وقف ليه انا نزلت ركبت ورا وهو ركب قدام
وصلنا الجامعة ونزلنا من العربية كدا لقينا ريم في وشنا وكانت حتموت من الغيظ انا سلمت عليها ولا ردت اما حيدر ولا عبرها اصلا عدى الزمن وخلصت محاضرات لقيت حيدر منتظرني في الباب وقف عربية ووصف ليه مكان ماشين
اها وصلنا مطعم كدا رهيب وهاديء كدا اتونسنا وخططنا العايزين نعملو ومتين واتغدينا ورجعني البيت سلمت على ناس البيت وقلت ليهم تعبانة عايزة اخد نومة شوية
نمت شوية وقمت م
ن النوم اصرخ وانكش في شعري...