رواية بين الضياع واللقاء الفصل الخامس 5 بقلم شذى عبدالمكرم
في يوم قاعدة في امان الله ضربت لي شمائل بعد سلمت علي
__ نعوم فاضية بكرة ؟
_ في شنو
__ محمد دا العميد حقهم حيجي زيارة لينا في البيت عاوزاكي تجي تساعديني لو بتقدري
_ شمائل انتي ما عاوزة تعديها علي خير صح وانا قولت ليكي بيتكم دا ما حأدخلو تاني وانتي عارفاني بخاف من الضباط
__ انتي ما بتخافي من الضباط بتخافي من محمد اخوي بس
_ ياهو براكي قولتيها بخاف من اخوكي
__ دا كان زمان ياااخ وانتي عارفة انو ما طولنا في الحي دا وما بعرف ناس الحي فما عندنا زول يساعدنا انا وامي . سكتا مسافة بفكر
_ خلاص تمام بكلم امي هو متين
__ بكرة تقريبا العصر كدا
_ تمام عندي محاضرة وحدة بخلصها وبنزل ليكم بهناك
__ تمام
مشيت كلمت امي ووافقت واليوم التاني مشيت الجامعة حضرت المحاضرة وجيت ليهم طوالي وبدينا الشغل كان كتير بس انجزنا
_ انتي اخوكي وين
__ في الشغل حيجي معاهم
_ ايوااا تمام
لمن العصر جا خلاص وصلينا ومنتظرينهم اتصل محمد قال انهم في الطريق شويه كدا لمن وصلو الحي كلو قلب عربات جيش التقول في جريمة كبيرة حاصلة انا لمن خوفت كانو كمية ضباط سريع سريع فضلناهم ما قصرنا معاهم ما قعدو كتير وطلعو
شمائل: الحمدلله عدا على خير
خالتو مريم: نعوم ما قصرتي معانا والله
نعيمة: معقولة يا خالتو بزعل منك والله دا واجبي
شمائل: برانا ما كنا حنعرف نعمل حاجه . شوية جا داخل محمد
محمد: يسلم اياديكم
كلنا: الله يسلمك . وطلع شوية كدا نسوان الحي جو يشمشرو لو ما عملو كدا ما حيعتبرو نسوان ابدا قعدت شوية ولميت البيت مع شمائل وغسلنا العدة رغم اعتراضها بس ما خليتها براها اتغدينا و صليت معاهم المغرب ورجعت البيت
امي: ما اتوقعت كمية الضباط ديل
نعيمة: ولا حتى انا
امي: هو اخو شمائل دا رتبتو شنو
نعيمة: رائد
امي: ما شاء الله تبارك الله عشان كدا
نعيمة: ايي وطبعا نسوان الحي طوالي بدخلو بعد ديلاك طلعو
امي: متوقعة اصلا
نعيمة: وطبعا اول وحدة رئيستهم نفسية السمينة . وضحكنا . وطبعا اسبوع كامل الحي بحكي بالحصل دا
بعد يومين كان عندنا تسليم اسايمنت وشالتني نومة لانو ساهرت بكتب فيهو الدكتور صعب شديد قومت لقيت الزمن اتأخر اتجهزت سريع
__ يا امي مالك ما صحيتيني ياااخ
_ حي انتي مجنونة جيت ليكي تلاتة مرات بس ابيتي تصحي
__ كان ترشيني بموية هسي اتأخرت
_ بتلحقي ان شاء الله اشربي شاي عشان تصحصحي
__ شاي شنو عليك الله يا امي ماف زمن . جريت طرحتي وقومت جارية لبستها جنب الباب وطلعت مستعجلة شبه جارية عشان الحق الزلط فجأة ظهرت لي عربية قربت تضربني صرخت وغطيت وشي بأيادي وسيد العربية جر فرمل تقيل وطلع رأسو بالشباك
_ انتي مجنونة يا بت دايرة تموتي . فتحت وشي لقيتو دا محمد بالدبل قبينة حقو لمن لقاني انا ضرب وشو خفيف بأيدو وحمر لي
_ اصلا المفروض كان اتوقع انو دا انتي . ما ركزت مع كلامو مشيت جهة شباكو
__ جنابو محمد وصلني معاك اتأخرت
_ انتي مجنونة ما ناقص بلاوي من الصباح
__ والله اتأخرت وعندي تسليم اسايمنت ضروري
_ وانا ذنبي شنو
__ وصلني للسوق في طريقك بس عليك الله .
_ ما بقدر
__ ما حتخسر حاجه . ما رد لي زعلت وزحيت من العربية وبقيت ماشة سريع عشان اوصل الزلط جا وراي بعربيتو
_ اركبي . ما صدقت طوالي ركبت العربية عالية شديد واتحركنا طوالي طلعت الاسايمنت من الشنطة وبقيت ارتب فيها حسب الصفحات وطلعت الفايل وركبتو
_ بتقري اي جامعة
__ بقرأ جامعة .........
_ اي كلية
__كلية ........ المستوى التالت
_ ما باين . عاينت ليهو بأستغراب
__ كيف يعني
_ بروشتك دي . عاينت ليهو بجدية كدا وقولت
__ اول حاجه انا ما روشة وتاني حاجه ما تحكم على الزول حسب الشكل الخارجي . قام ضحك
_ وانتي شكلك الخارجي كيف . لمن استوعبت ضحكت معاهو
__ محمد بسألك؟
_ محمد حاف كدا وين الاحترام
__ حتنادي لي علي ولا شنو . وضحكنا
_ حاسي انو حيجي يوم وانادي ليكي علي جد جد ويرفعك
__ اطمنك ما حيجي اليوم داك . واتدردشت معاهو شوية لمن لقيت نفسي قدام باب الجامعة عاينت بفرحة
__ شكرا محمد بالجد
_ العفو . ونزلت من العربية وهو اتحرك طوالي استلموني ليك صحباتي الكانو جنب البوابة
سمر: دا منو دا
نعيمة: جنابو محمد
ريم: جنابو عديل كدا والله ما اتعرفنا
نعيمة: رائد في الجيش . كلهم صرخو بصوت واحد
نعيمة: فصحتونا الله يفصحكم
فردوس: جادة انتي
نعيمة: والله العظيم اصلا هو جارنا في الحي
سمر: قادرة والله . رفعت ليها حاجبي بأفتراء
نعيمة: ودا كلامك . وهم ما عارفين قصتنا والله كان ماتو ضحك يلا دخلنا الجامعة وسلمت الاسايمنت في وقتو
تاني من اليوم داك محمد اختفى سألت شمائل منو قالت لي طلع مأمورية ما بتعرف حيرجع متين بقى لي شين بقيت ادعي انو يرجع بالسلامه واخوها التاني نزل السودان عشان يتم عرسو وطبعا طلع ذي كلام شمائل انو اخوها احمد دا ظريف ودمو خفيف عكس محمد وطبعا عرسو جاني في الجرح لانو خلصت امتحانات وكنت فري فحأستمتع بتفاصيلو بس كون محمد للان ما رجع من المأمورية دي كانت الحاجة المزعلاني وطبعا حصلت مشكلة في العرس بين اهل العريس والعروس اصلا لو ما حصلت مشكله ما حيعتبر عرس سوداني اصلا والسبب انو في توب ناقص في الشيلة قال حق عمتي العروس طبعا اهل العروس شفقانين شديد ودمهم بارد مشينا ليهم مع شمائل عشان نحل المشكله والحمدلله عدت على خير وطيبنا بخاطر احمد لانو بريدها للبت شديد وهي واضح انها طيبة بس اهلها بملو ليها رأسها بس بعد تسافر معاهو حتكون براحتها..........