رواية بين الضياع واللقاء الفصل السادس 6 والسابع 7 بقلم شذى عبدالمكرم
حنة احمد الصغيرة كانت في البيت حنناهو بمزاج والحنة الكبيرة كانت في الصالة شكلية بس كانت حلوة بس ناقصها محمد للان ما ظهر
نعيمة: التنظيم حلو شديد
شمائل: اي والله اصحابو ما قصرو معاهو
نعيمة: اي والله بس اخوات العروس ليه عبيطات كدا
شمائل: منفسنات بس . بقينا نعاين لاخوات العروس وهم بعاينو فينا ساي حرب عيون بس لحدي ما خالتو مريم نادت شمائل مشت ليها وكانت شايلة جود في صفحتها وانا خلت معاي جمانة دي بتها الكبيرة بتقرأ في الروضة بقيت ارقص معاها ونحنا في كراسينا فجأة سمعنا اصوات بتقول ابشر يا عريس التفتنا محل الصوت
جمانة: خالو محمد . وجرت عليهو رفعها فوق كان معاهو رجال كلهم لابسين جلاليب شكلو اصحابو الضباط والفرحة بقت فرحتين وخالتو مريم بكت ذي كل مرة لمن محمد يرجع من المأمورية واحمد فرح بجية اخوهو الوحيد ما صدق وقامو رقصو فاصل خاص هو و اخوهو واصحاب محمد انا كنت واقفة ورا وبعاين بس ومسبوطة بجية محمد هو ما شافني نهائي لمن خلص الفاصل وبدأ واحد تاني والناس كلها بترقص كنت قاعدة جنب امي وخالتو مريم بعيد جات شمائل جرتني
شمائل: مالك قاعدة تعالي نرقص . كنت خجلانة
نعيمة: لالا ما دايرة اقوم . ميلت علي
شمائل: ما يكون خجلانة من محمد . وغمزت لي خجلت زيادة
نعيمة: هوس يا معفنة
شمائل: خلاص اثبتي لي
نعيمة: ابيت
خالتو مريم: قومي يا بتي ارقصي . سمعت كلام خالتو مريم ومشيت معاها الساحة فجأة عيني جات في عين محمد هو ابتسم لي وهز لي رأسو ذي كأنو بسلم علي بادلتو الابتسامة وغلبني الرقيص بقيت اصفق بس
شمائل: والله منظرك بضحك وانتي خجلانة من محمد . قرصتها بالراحة لمن خلص الفاصل مشيت على محمد بخجل
نعيمة: حمدالله على السلامة
محمد: الله يقبل حمدك . وبالراحة رجعت لمحل ناس امي وبقيت اتابعو بنظري وهو بتكلم مع اصحابو الضباط وكان لابس العمة بأدب كان مثال للرجل السوداني بحق وحقيقة كنت مبسوطة شديد برجوعو
الفاصل البعدو حبيت اكسر الخجل دا وما اركز مع محمد مسكت جمانة ودخلنا ساحة الرقص وبقيت ماسكة اياديها الاتنين وبرقص معاها و هي بتهز اكتافها بطريقة مضحكة بقيت اضحك واعمل زيها وبقينا نضحك رفعت رأسي لقيت محمد واقف بعيد وبعاين فينا بأبتسامة خجلت جا علينا طوالي جمانة فكت ايدي وحدة ومسكت ايدو وبقت ترقص وهي ماسكانا الاتنين وانا خجلانة فجأة رفعها فوق وبقى يرقص بيها وانا واقفة جنبهم وبميل في جسمي بس وبصفق وبعاين فيهم بفرحة لمن خلصنا اتمنيت انو الحفلة ما تخلص بس دايما اللحظات الحلوة ما بتدوم
بعدها جا العقد والفطور ومعروف العادات والتقاليد بتاعها عدت كل الاعراس ونفس اليوم بالليل كنا مع شمائل ورا البيت بنشرب قهوة لانو البيت جوا مليان ضيوف فعملنا صبارة قهوة وانسحبنا بالراحة وكانت بتنوم في جود جا احمد ماري شمائل نادتو
شمائل: العريس . طوالي جا
احمد: الخاتيكم هنا شنو .
شمائل: اقعد خلينا نآخد خشم خشمين تاني ما حنلم فيك . طوالي قعد جنبنا وكبى لروحو قهوة معانا
احمد: تشربو قهوة ذي دا ما حتنومو بالليل
نعيمة: انا دي بخت الكباية بجاي بنوم بجاي ما عندي مشكله . قامو ضحكو
احمد: مخلوق غريب عجيب . وضحكنا
شمائل: اها احساسك كيف وانت الليلة بقيت راجل مرا
احمد: والله للان حلو ما عارف الراجييني شنو
نعيمة: راجيك نكد وقرف وجوطة بس ربنا يعينك . قام ضحك
احمد: ربنا يعيني
نعيمة: انا كنت قافلة عليك بس خزلتني
احمد: بدل بيكي بس المشكله وين
نعيمة: ما بقبل براجل مرا . ضحكو
احمد: خلاص بقيت راجل مرا
شمائل: ما تخافي محمد قاعد
نعيمة: انتي يا شمائل حتمشي لربك شين . قامو ضحكو
شمائل: كيف
نعيمة: انا لو ضرتك ما حتديني لمحمد دا . جا صوتو
محمد: ومحمد مالو . اتخلعت طبعا قومت من محلي جارية حتى خليت شبشبي وسامعة فيهم بضحكو بصوت عالي بقيت واقفة وانا قلبي بضرب جات بت وقفت جنبي
البت: شمائل بتناديكي قالت مطلوب حضورك ضروري
نعيمة: معاها اخوانها الاتنين؟
البت: ايي . اتنهدت وقولت اواجه رجعت بالراحة وطبعا حفيانة مجرد وصلت ليهم فكو الضحكة فيني
نعيمة: انا راجعة بيتنا
شمائل: حترجعي بدون شبشبك . عاينت لرجولي وبقيت احرك فيهم
نعيمة: ايي خلي يضربهم الهوا شوية . ضحكو فيني
محمد: تعالي اقعدي ما بسألك . مشيت قعدت محلي وغيرنا الموضوع وبقينا نتونس عادي ومحمد شغال بتلفونو بس لمن الزمن اتأخر رجعت بيتنا
اليوم التاني كانت الزفة اتجهزنا ومشينا الحفلة العروس كانت حلوة ما شاء الله بقيت افتش في محمد لقيتو لابس بدلة ومعاهو اصحابو كلهم لابسين بدل بقيت اعاين فيهو بس فجأة في نص الحفلة اصحاب محمد كلهم طلعو برا الحفلة بدون مقدمات ومحمد مشى على للعريس وقال لي حالة في اذنو وقامو حضنو بعض شديد كأنو بودعو كدا وسلم على العروس ومشى لامو وحضنتو وقامت تبكي شكيت انو في حاجة حاصلة براحة نزلت جمانة من رجلي وتبعتو لبرا الحفلة سريع كان ماشي سريع ناديتو
نعيمة: محمد . استغرب لمن لقاني وراهو جا علي
محمد: في شنو
نعيمة: ما حتحضر باقي الحفلة؟
محمد: ما بقدر
نعيمة: ليه
محمد: طلعت لي مأمورية ضرورية
نعيمة: الزمن دا؟
محمد: شغلي ما عندو زمن محدد
نعيمة: انتبه على نفسك . هز لي رأسو ومشى سريع ركب عربيتو وانا رجعت جوا بس ما فهمت حاجه من باقي الحفلة لمن جا الجرتق وودعنا العرسان كانو حيبيتو في فندق والصباح حيسافرو...........
7
الايام مرت ومحمد لسع ما رجع من المأمورية يداب حسيت بالفقد كنت بعد الايام عشان يرجع بس ما رجع لمن في يوم طلعت للجامعة بدري وماشة على راحتي عشان اوصل الزلط وكنت مركبة سماعتي في صوت بوري كان وراي بس مع الموسيقى ما ركزت انو صاحب البوري معاي انا ولسع مواصلة مشى فجأة جا بجنبي عاينت على يميني نزل القزاز وطلع دا محمد طوالي جريت السماعة من اذني
محمد: يا اما ما سامعة يا اما عاملة فيها تقيلة . قومت ضحكت بفرحة كدا ورفعت ليهو السماعة
نعيمة: كنت بسمع في اغاني وانت جيت بتين
محمد: تعالي اركبي نحكي في الطريق . ما صدقت طوالي ركبت
نعيمة: حمدالله على السلامة
محمد: الله يقبل حمدك
نعيمة: من بتين هنا
محمد: وصلت امس المغرب
نعيمة: وطوالي نزلت الشغل؟
محمد: والله عندي شوية ملفات ماشي اقفلهم وانتي عارفة شغلنا ما فيهو راحة
نعيمة: بالجد والله ربنا بعينك
محمد: كيف مع الجامعه . رفعت ايادي بقلة حيلة واتنفست
نعيمة: والله ذي ما شايف باقي لي سنة وما عاوزة تخلص
محمد: قربتي . ابتسمت وهزيت ليهو رأسي وبقينا نتونس وسألني من حالي كنت مبسوطة شديد لمن وصلني الجامعة قبل انزل
محمد: بتخلصي متين . اتفاجأت من السؤال
نعيمة: الساعة 2 في حاجه ؟
محمد: كدا رقم تلفونك بعدين بتعرفي . مليتو الرقم ونزلت وكنت فرحانة شديد لمن بتقدل
ريم: ما دايرة تعرفينا على الرائد حقك دا
نعيمة: نوووو تشوفو يوم العرس بس . قامو ضحكو
فرودس: البايرة لو قامت كعبة . قومنا ضحكنا ومشينا على المحاضرة لمن اليوم خلص اتصل لي رقم غريب رديت طلع محمد
محمد: خلصتي؟
نعيمة: ايي
محمد: تمام جاي عليكي
نعيمة: اوكي . انتظرتو لمن جا اتصل لي وطلعت ركبت
نعيمة: ماشيين وين
محمد: السوق . رفعت حواجبي بصدمة
نعيمة: السوق!!!!
محمد: امي وصلتني على شوية حاجات بس ما بفهم فيهو وانتي كنتي الخيار الوحيد . ما باقي لي الا اخنقو بس اتمالك نفسي قربت ابكي افتكرت انو حيطلعني محل حلو بس للاسف اتوقع شنو من ضابط في الجيش وصلنا السوق قولت انتقم منو يلا لفلفتو ليك
محمد: نعيمة ياااخ خلي الباقي بكرة
نعيمة: سخنت بالكاكي دا ولا شنو . قام ضحك
محمد: انا نسيت انو الواحد بسخن كيف . قومت ضحكت
نعيمة: حنيت على حالتك خلاص خمس دقايق . سريع سريع اشترينا باقي الحاجات
محمد: عاوزة حاجة؟ لانو تعبتك معاي شديد
نعيمة: لالا . واتحركنا وقف في كافيه شال عصير وموية
محمد: اتفضلي
نعيمة: تعبت نفسك
محمد: دي حاجة بسيطة . ورجعني البيت وهو واصل بيتهم رغم انو مشيت معاهو السوق بس المشوار كان حلو وبديت ابني احلامي ومستقبلي ......
___________
من جانب محمد
بالليل قاعد مع امو بتونس معاهو
_ انت يا محمد ما ناوي تتزوج
__ ما مفكر يا امي
_ انت البكر و اخوانك كلهم اتزوجو والعمر دا ماشي دايرة اشوف اولادك قبل ما اموت
__ بعد عمر طويل ان شاء الله يا امي
_ ان شاء الله يا رب يلا ما معروف البحصل شنو وانت كم سنة قدامك وحتدخل ال40 سنة يا ولدي اتزوج
__ حاضر يا ست الكل يلا انا مشغول بموضوع الترقية دي عشان كدا كل فترة بطلع مأمورية ما فاضي انتي القي لي عروس انا واثق في اختيارك
_ من زمان دايرة ليك فيحاء بس صحبتي احلام بت حلوة ورزينة ومتعلمة ما شاء الله عليها
__ البتشوفيهو يا امي . جاهو اتصال وطلع مشى يرد امو قامت تزغرد شمائل جات على صوتها
شمائل: في شنو يا امي
خالتو مريم: اخيرا محمد اخوكي قرر يتزوج . هي ذاتها فكت الزغروتة
شمائل: العروس منو ان شاء الله يكون الفي بالي
خالتو مريم: فيحاء بت احلام . شمائل سكتت ثواني
شمائل: هو قرر ولا انتي اخترتي ليهو
خالتو مريم: هو مستحيل يختار انا كلمتو وهو وافق . ما قدرت تقول حاجه لانو من زمان امها بتقول ناوية تزوج محمد لفيحاء بس مستنية متين هو يوافق انو يتزوج وجا اليوم دا بس هي كانت عاوزة نعيمة لمحمد لانو شايفة الحب في عيونها بس ما في يدها حاجة بس خايفة من ردت فعل نعيمة من تعرف بالخبر دا......
__________
من جانب نعيمة
بعد يومين من موضوع السوق جاتنا خالتو مريم وشمائل المغرب كدا عملت ليهم الشاي وقعدنا نتونس فجأة حصلت الصدمة
خالتو مريم: جيت اكلمكم انو ولدي محمد قرر يتزوج
امي: الف الف الف مبروك ربنا يتمم ليهو على خير
خالتو مريم: اللهم آمين يارب
امي: العروس من وين
خالتو مريم: موش مرة حكيت انو عندي صحبتي بعتبرها ذي اختي اسمها احلام
امي: ايي
خالتو مريم: بس يلا العروس بتها
امي: والله كويس . وطبعا انا متابعة الحدث في صمت عجيب وشمائل بتعاين فيني
نعيمة: دقيقة اجيب سكر . ودخلت المطبخ وقلبي واجعني يعني محمد داير يتزوج طيب وانا بس كمان هو ما لمح لي انا براي البنيت احلام على الفاضي بقيت ابكي ما قدرت ارجع ليهم دخلت غرفتي وتميت بكيتي بعد زمن سامعة امي بتنادي فيني ما رديت مثلت نايمة دخلت لي الغرفة
امي: مشيتي تجيبي السكر وتاني ما رجعتي كيف تنومي وتخلي الضيوف . ما رديت
امي: قومي نوم المغارب ما كويس استني العشا يأذن ونومي
نعيمة: امي خليني ياااخ
امي: قومي يا بت
نعيمة: امي والله ما حأرجع انوم تاني حأنتظر العشا
امي: حركتك شينة مع ناس مريم
نعيمة: امي مشيت المطبخ وبطني وجعتني مشيت الحمام لقيتها جاتني فما قدرت ارجع . طبعا امي بتعرف انو الشهرية بتعبني فصدقتني
امي: اغلي ليكي جنزبيل؟
نعيمة: لالا بلعت مسكن
امي: ايواااا الحمدلله بس كأنو جاتك بدري شديد المرة دي
نعيمة: اي انا ذاتي ما اتوقعتها . خلتني وطلعت نسيت انو المفروض مدام كذبت فالكذبة دي حيترتب عليها حاجات كتير انو ما اصلي فيلا دي ادبرها كيف ونسيت ليك الموضوع الاساسي وهو عرس محمد بقيت افكر حأصلي صلواتي الخمسة كيف بدون امي ما تلاحظ ولمن تجي الحقيقية حأقول شنو لانو بتعب بالجد واصلا هي قربت من التفكير الكتير صدعت فجأة سمعت الآذان يلا كتمت براحة انسحب ومشيت وضيت وجيت صليت سريع ورجعت رقدت يداب اتذكر محمد وعرسو رجعت ابكي وبقيت اقول ربي لا تعلق قلبي بما ليس لي لمن نومت
يومين كدا خالتو مريم قالت لامي انو لازم امشي معاهم نودي حاجات الخطوبة امي جاتني وشمائل للان ما واجهتني
_ نعوم خالتك مريم كلمتني قالت تمشي معاهم تودو حاجات الخطوبة
__ امي ما ماشة انا
_ عيب انو ما تمشي وهي جات لحدي هنا
__ امي ما ماشة ما ماااااااشة
_ قومي قبل ما ادقك سريع . جرتني وقومت فتحت دولابي اقرب فستان لبستو ومشيت ليهم في البيت شمائل كانت بتعاين لي كأنها خجلانة مشيت ليها
نعيمة: يا كعبة من بتين بتمشي السوق براكي والاختار حاجات الخطوبة منو
شمائل: انا اخترتهم
نعيمة: شمائل مالك . عاينت لي بزعل كدا
شمائل: حتقدري تمشي معانا
نعيمة: البمنعني شنو وتاني حاجة مالك ذي الزول الخجلان
شمائل: بالجد خجلانة منك
نعيمة: شوفو الهبلة دي بالله كدا ورح نشوف عصيرهم حلو ولالا . قامت ضحكت والعربات وصلو وشيلنا الحاجات وطلعنا اتجاه العربات شايفة محمد واقف مشيت عليهو وانا العبرة خنقاني شديد والله نفسي ابكي بس اتشجعت ووقفت قدامو ومديت ليهو ايدي
نعيمة: الف مبروك . عاين لي مسافة طويلة لمن افتكرتو سرح بعيد
محمد: الله يبارك فيكي عقبالك
نعيمة: آمين يارب . ومشيت خليتو وركبت العربية.......