رواية اعيدوا لي قلبي
الفصل العاشر10
بقلم دانيا
دخلت بسرعه وقفلت الباب،، كانت الغرفه من جوا عباره عن غرفة عمليات قديمه... شكلها بوحي على إنو من سنين م اجريت فيها عمليه ،، كاسيها الغبار وخيوط العنكبوت .
فيها سرير وادوات العمليه وكل شيء كاسيهو الغبار بقيت بفتش في الغرفه م لقيت اي شيء مهم بدين الدكتور إبراهيم،، جيت عاوزة اطلع الباب ابى يفتح معاي ، بعد شويه سمعت نفس الأصوات ديك بدأت تظهر بقيت اتلفت م شايفه اي زول لاحظت كان في صندوق تحت السرير .
مشيت دنقرت طلعتو فتحت لقيت فيهو اوراق وملفات ... ولقيت فيهو اسم مريض كان اسمو"مرتضى حيدر " فتحت الملف لقيت كان المريض بعاني من خلطه في الدماغ واتعملت ليهو العمليه وكانت ناجحه ،، بس لمن فتشت اكتر في الصندوق لقيت تقرير وفاة لنفس المريض بعد اسبوع من العمليه خضع لعليه اخرى قبل يموت ومات في العمليه وبعد بس السبب شنو م عرفت .
وتاني جوا الصندوق لقيت ظرف فتحتو لقيت فيهو صور من داخل غرفة العمليات وكان فيها مصور بوضوع دكتور إبراهيم ومعاهو بعض الدكاترة كيف كانو بستأصلو قلب لمريض،، انا هنا استغربت شديد كيف صور ومن غرفة العمليات كمان !! بقيت بفتش في الصندوق وم انتبهت للزمن ،، عاينت للساعه لقيتها قربت تجي وحده ،، قلت لازم اطلع بسرعه شلت الاوراق ودخلتها في شنطتي وطلعت .
جيت طالعه صادفت دكتور من الدكاترة في وشي ،، وقفت مترددة بس بعدين مشيت لاهو سألني ولا انا اتكلمت معاهو مشيت بسرعه من قدامو ،، حضرت الإجتماع وطلعت عاوزة امشي العنبر اتفقد المرضى حقني ... دكتورة بيان نادتني قالت لي خليك عاوزاك في موضوع... بعد الناس طلعو كلهم قعدت معاي قالت لي احكي لي كل شيء ، عاينت ليها بدهشه قلت ليها بالنسبة لشنو احكي ليكي شنو؟؟ قالت لي كيف فتحتي الغرفه المقفولة والأنا حذرتك منها؟! .
قبل اجاوب ليها فكرت كتير ،، بعدها قلت في نفسي دكتورة بيان قديمه في المستشفى وبتكون عارفه كل شيء ، وانا لو وريتها بالحاصل اكيد ح تساعدني لأنها دفعة امي وعمتي سهيله من ايام المدرسه ،، قاطعت تفكيري هي وقالت لي اها راجياكي انا ،، قلت ليها بتردد ح احكي ليكي من الأول وبديت احكي ليها لحد آخر لحظه لي في الغرفه المقفولة ... بكدا فكرتها ح تساعدني .
حتى طلعت كل الأوراق والإثباتات المعاي ووريتهم ليها... بعد شافتهم سكتت لمسافه وبعدها قامت وقفت جنب الشباك وادتني ضهرها وم نطقت بحرف ،، تاني جاتني راجعه لمت كل الأدله من قدامي وفتحت خشمها قالت لي اسمعيني يا بتي ذكريات انا فاهمة كلامك دا وشايفه وعارفه ، بس خليني اقول ليكي حاجه "الإنسان في الحياه دي م ضروري إلا يصلح اخطائه واخطاء غيرو انت بس امشي صاح أما باقي الخلق حسابها على خالقها" فهمتيني انتي صاح؟! .
وهسي انتي جديده هنا وعشان م تدخلي نفسك في مشاكل وحسابات ويحصل فيكي زي د/ خالد ، من الاحسن تنسي الموضوع وانتبهي على شغلك وبس وانا بقول ليكي الكلام دا عشان خاطر عمتك وامك المرحومه ولو كانت واحده تانيه مكانك كان تشوفي اعمل فيها شنو ،، قمت على حيلي مصدومه من كلامها قلت ليها يعني انتي بتعرفي خالد مات كيف؟! قالت لي وانتي قايله الأوراق والمعلومات والصور دي كلها الجمعها منو غير خالد ؟؟....لكن دفع الثمن حياتو .
عشان كدا ابعدي من المواضيع دي يابت ديل ناس انتي م قدرهم وم تقولي م نبهتك ،، بعد قالت كدا لمت الأدله كلها وشخطت فيها كبريت وحرقتها قدام عيني ،، قلت ليها جنيتي انتي ليه عملتي كدا؟؟! مسكتني م خلتني اطفي النار لمن الورق كله حرق ، قالت لي بتمنى م تنسي كلامي وطلعت فاتت ،، خلتني منهارة وبقيت ابكي على الأدله الراحت مني ، قمت طالعه لقيت دكتورة نور عاينت لي م اشتغلت بيها قالت لي انتي كويسة ؟ قلت ليها ممتازة ومشيت منها .
المساء رجعت البيت لقيت عمتي سهيله منتظراني بفارق الصبر اول ما جيت استلمتني وبقت تديني محاضرات،، عاينت ليها مسافه قلت ليها دا لعب بأرواح الناس ياعمتي وانا م بسكت.... قالت لي يابتي يازكرى انتي مشيتي تشتغلي ول مشيتي تفتشي وراء غيرك وتنبشي اسرار ،، انا ح اتصل لأبوكي وح اكلم اعمامك بالحصل وتاني المستشفى بعينك م بتشوفيها ،، قلت ليها بزهج ونبرة حاده اعملي البتشوفيه انا م ح اقيف في حدي إلا بعد ادخل الدكتور دا السجن ياعمتي مع احترامي ليكي بس المره دي م ح اسمع كلامك ،، غضبت من كلامي وقالت لي بنبره حاده "دي عنادة امك الخلتها تخسر حياتها" .
انا كلامها دا دخل قلبي زي السكين بقيت اعاين ليها بخلعه ودموعي جرو ،، قلت ليها امي؟! في اللحظه دي عمتي هدى قامت جات مسكتني من كتفي قالت ليها سهيله دا كلام شنو؟ هنا هي سكت وحسيتها م كانت مركزة هي بتقول في شنو،، عاينت لي نظرة اسف وقالت لي انا آسفه... قلت ليها على اساس امي اتوفت في الولاده،، قبل تفتح خشمها بحرف مشيت منها دخلت غرفتي وقفلت الباب وبقيت ابكي لمن نمتا ،، صحيت المغرب جاتني في الغرفه وبقت تبكي وتتأسف وتقول لي م قصدي ازعلك بس انا الربيتك وبعتبرك بتي والله وبخاف عليكي اكتر من اولادي محمد ومنار ،، قلت ليها م مشكله م تهتمي للموضوع ومافي داعي يحصل خلافات بينا بسبب امور م بتخصنا قالت لي اوعديني تسيبي موضوع الدكتور دا نهائياً ،، عاينت ليها مسافه وقلت ليها بوعدك تاني م افتش وراء زول.
يوم الدوام حقي لمن مشيت المستشفى كانت دوام ليلي ،، بعد شغل وتعب ومراقبة مرضى وعمليتين لمرضى يايبنهم عاملين حادث ،، كانت الساعه عامله واحده ونص صباحاً ياداب فضيت وجيت انوم شوية وارتاح ،، جاني اتصال طلعت برا بتكلم وانا ماشه م لقيت نفسي غير واقفه جنب الغرفه ديك عاينت ليها حسيت قلبي بقى يدق بسرعه تاني قالت لا يازكرى انتي وعدتي عمتك سهيله انك م تدخلي في الموضوع قمت ماشه لقيت د/خالد في وشي.... قلت ليهو شوف انا م بقدر اساعدكم انسحبت من الموضوع شوفو غيري .
قبل اتم كلامي حسيت كأنو في حاجه ضربتني على راسي م وعيت غير الصباح لقيت نفسي في البيدروم حق المستشفى ،، قمت مخلوعه قلت وين انا بقيت اشوف طشاش بصعوبه لميت في نظارتي لبستها..