رواية اعيدوا لي قلبي
الفصل الخامس5
بقلم دانيا
بقيت اعاين للورقه بصدمه كيف اختفت الكتابه ، دكتورة ربى قالت لي نومي يا دكتورة زكريات وخليني اعرف انوم ، عاينت ليها مسافه وقلت ليها حق علي ، قلت في نفسي نومي يازكرى عندك صحيه الساعه تلاته وخلي الهواجس دي .
هسي شوفي الكل قاعد مرتاح لو في شيء كان شافوهو ، نمت وصحيت على صوت المنبه الساعه تلاته ، طلعت ماشه عشان ادي المريضه الجرعه جيت ماشه في الممشى اسمع صوت بكى بصوت منخفض وكأنو بكى حرقه ، خليت عنبر الولاده والمريضه والجرعه وكسرت ملف بالممر التاني متتبعه الصوت لحد وصلت بلكونه زاتي م عرفتها تابعه لياتو قسم لأنو المستشفى كبيره ، عاينت في آخر المرر كان في زول قاعد مشيت عليهو كان مدنقر راسو وقاعد مكرفس رجلينو وخاتي راسو على رجلينو وببكي .
جيت قعدت جنبو قلت ليهو يااخ مالك قاعد تبكي إن شاء الله خير ؟ فجأة سكت ورفع راسو عاين لي قلت ليهو مش انت دكتور عبد الخالد؟مالك الحاصل شنو؟ ملامح مشو اتغيرت ومسكني من رقبتي وضغط عليها شديد وعيونو بقت لونها احمر من الغضب وعروق رقبتو ظهرو ، قال لي بنبرة غضب انتي دخلك شنو .
انا بقيت بفرفر زي الجداده عشان اخلص نفسي منو بقيت بحاول ابعد يدو من رقبتي ، ولسه هو ماسك فيها قوي نفسي ضاق وحسيت نفسي ح اقطلع اكسجين ، صحيت على صوت الدكاترة وهم بقولوا دكتورة انتي كويسة يادكتورة مالك نايمه هنا ، رشوني بمويه وقمت مخلوعه ، عاينت لقيت اربعه دكاترة وكلهم رجال قالوا لي الجابك هنا شنو في الوقت دا انتي م بتعرفي انو دا خاص بالدكاترة ، جناح الدكتورات في الطرف التاني .
قمت وانا متوترة وخايفه ومحرجه من كلامهم ، مشيت منهم بسرعه ، الصباح حمت المستشفى كلها وانا بفتش عن دكتور عبد الخالد ، واخيراً لقيتو في الطابق التحت جيت عليهو بكل غضب الدنيا قال لي صباح الخير يا دكتورة قبل يتم كلامو رصعتو كف قلت ليهو انت بتحاول تقتلني يا حيوان.
بقى يعاين رديت ليكي اتنين بدل واحد ، قلت ليهو وليك نفس تتكلم قال لي مشكلتك شنو انتي ، قلت ليهو كيف مشكلتي شنو قاعد تبكي زي الشفع اجي اسألك من مشكلتك تحاول تخنقني وتقتلني وهسي جاي تسألني بكل دم بارد مشكلتي شنو .
قال لي انا ؟ بدهشه وإستغراب قال لي انتي من جيتي حسيتك مجنونه بس هسي اتأكدت انا م بيتت هنا اصلاً بقيت اعاين ليهو قلت ليهو كيف يعني شاف الدكتور عامر ماري ناداهو قال ليهو انا امبارح كنت بايت هنا ؟ قال ليهو لا لشنو يعني