رواية ليثا
الفصل الثاني2
بقلم دانيا
مرت خالي جات قالت لينا م تشغلوا تلاجتكم كدا بنستهلك كهرباء كتير والفواتير بتكتر علينا ،، خليت شغل الإسكريم امي قالت لي الدنيا دي يابتي لو حي فيها بتوريك العجائب لكن كله لخير قالت لي امشي بالقروش دي جيب ادوات خياطه وتطريز مشيت السوق جبتهم امي بقت تطرز جداعات وملايات ومناديل وانا بشيلهم بفرش بيهم جنب الدكان من البيت م بعيد واحياناً لمن يكونو كتار بمشي بيهم السوق والحمد لله المصاريف ماشه المدرسه قربت تفتح امي بقت تسهر عشان تزيد الكميه عشان تجهز لينا ادوات المدرسه للعام الدراسي الجديد طبعاً انا ح اضطر اعيد السنه لأنو ديك جمدتها .
في يوم امي كانت شغاله وانا قاعده جنبها حتى نسوان الحي بقت يجيبن ليها تيابهن وملاياتهن تشتغلهن ليهن تكف التياب .... كانت مساهر وانا قاعده جنبها بونسها وبعمل ليها شاي عشان تطرد النعاس قالت لي نومي يابتي بعدا الساعه جات 11 بكره كمان عندك قومه من الصباح وقعده طويله في الشارع ،، خلي البنات يساعدوكي قلت ليها لا ياامي انا اشتغلت لكن اخواتي م بخليهن يشتغلن انا بشتغل براي لكن مستحيل اخلي اخواتي ينزلن الشارع يشتغلن مش انتي كنتي بتقولي لينا العالم البرا سيء انا كبيرة وبعرف اتصرف وعاوزة اكون بمسابة اخوهن م اختهن .
امي دنقرت ودموعها جرن قالت لي بعدا كان متا بموت وانا مطمنه عليكن قلت ليها ياامي م تقولي كدا حضنتها وبقيت ابكي الصباح بدري قمت عملت ليهم الشاي وبعد شراب الشاي طلعت ..... مرت الأيام وبقيت بقول لأمي عاوزة اتعلم شوية شويه اتعلمت وبقيت بساعدها ،، جيت من الشغل داخله بعد العصر اتهجمت بأصوات الضجه الطالعه من بيتنا دي شنو جريت جوا لقيت مرت خالي واقفه في الحوش وبتشتم في اخواتي وامي جيت مصدومه قلت ليهم في شنو ؟ نهله قالت لي قالت لقت قروش مفقودة وبقت تقول لينا عمري م فقدت قروش م افقدها إلا بعد انتوا تخشو بيتي .
قلت ليهم حسبي الله ونعم الوكيل فيها م تتكلموا معاها تاني لمن خالي يجي من الشغل خشينا في عريشتنا وسكتنا منها .... شوية كدا امي وشها اتورم وتعبت شديد بقيت بحاول اهدي فيها ودموعي شلال جبنا ركشه وديناها المستشفى ،، واول ما وصلنا الدكاترة قالوا لينا الدوام لله وقفنا مصدومين وم مصدقين حتى الدموع جفت في عيونا بعد شوية جاء خالي كمل الإجراءات ورجعنا البيت ماشين وكأنو م رجلينا ديل م حاسين باي شيء كأنو الدم جمد في عروقنا الناس اتلمو وبقوا يعزو ياطير إنتوا بتقولوا في شنو انا دي بقيت جسد خالي روح كلام الناس من حولي دا بقيت بحسو زي الحديد البطاقش مع بعضو وبصدر صوت مزعج .
قالوا تعالوا ودعوها بناتها وين بناتها تعالوا ودعوا امكم اخواتي ببكن انا دي رفعوني رفع من الأرض جابوني وقفوني قدام الجثمان عيني دي رمش م بترمش .... بعد الناس رجعوا من المقابر والظلام سد والجران رجعوا بيوتهم عاينت للمكان الكانت امي بتطرز فيهو كان فاضي قمت مخلوعه بقابض امي وين امي بقيت بنادي زي المهسترة جاء خالي اداني كفين قالي لي اصحي امي ماتت وين كنتي انتي من قبيل بقيت ابكي بأعلى صوت قلت ليهو كذاب مرتو جات وراهو اتزكرت جوطتها حقت نهار قلت ليهو لو ماتت امي قتلتها مرتك الحاقده دي .
مضى اسبوع والوضع متشائم والبيت كئيب تاني جات مرت خالي تجدع في الكلام طلعت مسكتها من شعرها ولميتها مع الأرض في شمس الظهر الحاره ديك دقيتها دق العيش وعيالها كانوا في المدرسه وخالي في الشغل لمن جاء لقاها بحالة زي الساحره من الدقة القبيل اشتكت ليهو وبقت تبكي جاء داير يدقني قلت ليهو م بتقدر هي الغلطانه فكت خشمو قال لينا " اطلعوا لي من بيتي " ورفع يدو اشر لينا على الباب وقال كلام زي السم قال لينا " لو فيكم خير م كان ماتو اهلكم وانا ابتلي بيكم " حسيت كلامو دا زي الخناجر في قلبي قلت ليهو جداً .
الصباح طلعت بدري من القريه الهم فيها زاتو وقلت لأخواتي لمن الحاجات انا بفتش بيت وبجي بعربيه مشت قريه مننا ساعه نزلت من العربيه وبقيت بسأل وكل البيوت الأتعرضت علي غاليه شديد آخر واحد كان اجارو رخيص حبه مشيت شفته المرا ودتني ليهو ووقفت بعيد قالت لي خشي شوفيهو ..... وقفت عاينت ليهو من برا ساي منظرو م مطمن لكن لمن اتزكرت الحصل اتوكلت وخشت قلت بسم الله وخشيت من شدة ما خرابه البيت لمن العنكبوت باني فيهو .
كان عباره عن غرفتين وبرندا ومطبخ وحمام آخر شيء مشيت شفت المطبخ واثناء ما انا واقفه حسيت بحاجه بتمشي وراي اتلفتت م شفت حاجه .... قمت طلعت قلت اكسب الوقت اول ما جيت طالعه سمعت صوت همسات خافته قالت " ليثا " اتلفت جوا مافي اي شيء قفلت الباب ومشيت قلت اكيد بتوهم ساي ،، المره قالت لي عجبك؟ قلت ليها والله ياخ مضطره اعمل شنو؟ قالت لي ح تنزلوا فيهو متين؟ قلت ليها باقي اليوم دا قالت لي خلاص خلي المفاتيح معاكي وانا ساكنه في تالت بيت على يدك اليمين قلت ليها تمام تسلمي .
ودعتها ومشيت على السوق ركبت الحافله لمن وصلت القريه حقت ناس خالي من السوق جبت معاي دفار رفعت الحاجات وسقت اخواتي ومرت خالي واقفه بتعاين لينا وخالي كان مافي وطوالي طلعنا ..... واول ما طلعنا من قريتهم طلعت تلفون امي شلت الشريحه كسرتها وجدعتها وصلنا البيت الجديد البنات من شافوهو بقن يطنطنن هسي دا بيت ول خرابه يا نسمه ؟ قلت ليهم احسن دا ول بيت الزل ؟ سكتو ساي ودنقرن نزلنا الحاجات كانت الدنيا عصر .
حاسبت بتاع العربيه ونقلنا الحاجات دخلناهن الحوش قلت ليهن بعد ننضفوا جوا حتى ندخلوا الحاجات دخلنا بسم الله لمينا الوسخ الكبير كبير كبينا في شوالات ..... فجأة نهله صرخت وجدعت الوسخ من ايدها لمن اتجهمت جرينا عليها ليقناها واقفه وجسمها كله برجف قلت ليها بسم الله يابت مالك ؟ بقت تأشر لينا على الوسخ وبصوت متقطع قالت لي ايد ايد مرا ايد مرا في الوسخ لقيت ايد مرا عاينت للوسخ م شفت اي شيء نجله قالت ليها وين الإيد قولي بسم الله يابت انا كنت ماسكه عصاء في يدي نكت بيها الوسخ وزعتو كله في المكان م فيهو اي شيء والبت لمن عرقت وهي لسه مصرة إنها شافت يد في الوسخ.