رواية ليثا
الفصل التاسع9
بقلم دانيا
وصلت البيت بفتح في الباب جو نسوان مشات في الشارع القدام بيتنا من شافني فجأة وقفن كأنو شافن شيطان بقن يعاينن لي تاني بقن يعاين لبعض ولفن رجعن بدربهن ..... شككني في روحي بقيت بعاين بإتجاهن مستغربه شديد لمن فكرت الحقهن واسألهن مالكن في شنو ؟ لكن تاني قلت مافي داعي اضيع زمني معاهن دخلت وقفلت الباب مشيت لقيت نهله راقدة في رقدتها ،، صحيتها قلت ليها قومي جبت ليكي ماذا اشربيها قبل تسخن م قامت قالت لي ختيها في التربيزة ختيتها ومشيت اتوضيت عاوزة اصلي الظهر الباب دق .
مشيت فتحت الباب لقيتها دي نجله جات قلت ليها جيتي بدري قالت لي ااي مافي حاجه اصلاً قربنا نخلص ختت يدها في راسها قالت لي لاااا نسيت المديرة كان قالت لي اجيها في المكتب بعد الحصه الأخيرة .... قلت ليها خير مالها ؟ قالت لي م عارفه والله م فسرت لي لكن يلا يازولة م مشكله بكرة بمشي ليها اشوف مالها اها نهله بقت كيف ؟ قلت ليها لسه نايمه وقدر ما حنستها نمشي المستشفى م رضت ،، خشينا جوا قلت ليها انا عاوزة اصلي كدي انتي اتكلمي معاها عشان لو حاسه نفسها تعبانه نوديها المستشفى بدري بدري .
شلت المصلايه وخشيت الغرفه بديت اصلي صليت ركعتين سمعت صوت والصوت دا من جوا بيتنا دا لكن م لواحده من اخواتي ... صوت بت كانت بتقول " مش قلت ليكن خلوني في حالي م بتفهمي انتي وتاني سمعت صوت نجله بتقول بصوت مبحوح " فكيني يابت جنيتي انتي فكيني " صلت وقمت سريع طلعت برا لقيت نهله مثبته نجله على رجل السرير وخانقاها وهي بتقول ليها مش قلت ليكم م ماشه مستشفى ؟ ونجله بتحاول تزحها من نفسها لمن هبطت .... وانا لمن شفتها حيلي كله مات جريت عليها وزحيتها منها دفرتها لمن وقعت في السرير قلت ليها نهله انتي م نصيحه .
لمن علامات اصابعينها ظهرن في رقبة نجله ومن شدة ما تعبت يلا بتحاول تلتقط انفاسها اتلفتت عاينت لنهله الكانت واقعه في السرير للحظه جسمي رجف لمن شفت السلسل في رقبتها وكيف ملامح وشها متغيرة وعيونها قلبن حمر زي الجمر ..... اتهجمت وقلت السلسل دا انا رميتو جوا الحمام الطلعو شنو بسم الله الرحمن الرحيم ،، والبت بتعاين لي تقول تأكلني ختيت يدي في راسها وبقيت بقرأ ليها بقت بتحاول تزح يدي من راسها وتصرخ ... نجله قامت وقفت جنبي وهي بتعاين لي بحيرة كبيرة سألتني سؤال انا العبرة خنقتني وم عرفت اقول ليها شنو قالت لي " نهله مالها يانسمه الحاصل شنو "؟
وفجأة بعد ما سمعت القرآن وقعت في السرير مغمى عليها قلت لنجله خليكي معاها انا هسي بجي قمت جاريه برا الباب دق جيت فتحت الباب .... وقفت وانا في دهشه كبيرة كان في تلاته اشخاص واقفين من بينهم خالي وتاني واحد شاب كدا بس ملامحو م غريبه عني ومعاهم عمك كبير في العمر ،، للحظه اتهجمت قلت في نفسي ابوي لو كبر وحصل الكم وستين كانت ملامحو ح تكون كدا سبحان الله .... قاطع تفكيري صوت خالي وهو بقول السلام عليكم يابتي .
اتلبشت وم عرفت اتصرف السلام رديتو بعد مسافه بقيت واقفه زي الصنم .... قلت ليهم اتفضلوا سلموا علي ودخلتهم جوا وقفوا جنب باب البرندا خشيت جوا كلمت نجله قلت ليها خالي جاء ومعاهو ضيوف ،، اتخلعت قالت لي خالي؟ خالي عرفو بمكانا شنو ؟ قلت ليها م بعرف صحي نهله دي وسوقيها جوا سندتها وخشن الغرفه .... مشيت عليهم قلت ليهم اتفضلوا دخلوا بعد قعدوا مشيت المطبخ جبت ليهم مويه ونجله جات سلمت عليهم ،، قمت ماشه اعمل ليهم عصير الراجل الكبير قال لي تعالي اقعدي يابتي م تعملي اي حاجه ،، قلت ليهم العصير جاهز بس اجيبو ليكم قال لي لالا والله متكفين يابتي ربنا يزيد خيرك .
جيت قعدت في الكرسي عاينت لخالي الكان مدنقر راسو وبعاين تحت للواطه تقول بحسب السيراميك .... قام الراجل الكبير قال لي طبعاً يابتي انا جدك ابو ابوكي الله يرحمه ويتقبله ويرحم والدتك ،، انا والله الفترة الفاتت دي كلها كنت مافي برا البلد وقت ابوكم اتزوج زاتو م كنت قاعد وم بكذب عليكن اخدت منو موقف لكن في النهايه اتقبلت إنو الحاجه دي قسمه وبعد وفاته كنت بسأل منكم وانا والله بتأسف ليكن جداً عن الشيء الحصل من اخوانكن اخوان الندامه عاين للشاب الكان معاهم برضو كان مدنقر راسو .... قال لي والله يابناتي مهما حيكت واتأسفت ليكن عن الحصل م بكفي ولا بوفي لأنو انت الإتحملتنو م شوية .
وانا والله بيعة بيتكن م كنت داري بيها لو عرفت م كان دا حصل واصلاً انا كنت دائماً لمن اتكلم مع اخوانكن وحبوبتكن بالتلفون كنت بقول ليهم الناس ديل لموهم عليكم واحتوهم .... لأنو بعد وفاة ابوهم م فضل ليهم غيرنا لكن هم كانوا بمشو فيني بالكلام وبسو الفي راسهم لكن انا جيت وم بقول ليكم بصلح كل شيء لأنو ما كل شيء ح يتصلح والإتفقد م برجع لكن انا بوعدكن إني ح اعوضكن ،، وانتن بناتي وعزيزات على قلبي زيكن وزي اخوانكن مافي فرق ... للحظه عيوني دمعن .
وخالي بقى يتعذر ويتأسف وبعديهو اتكلم الشاب وطلع دا اخونا الكبير عاينت لنجله حركت لي راسها بمعنى مافي مشكله .... قلت ليهو والله ياجدي انت على عينا وراسنا وليك كل الإحترام والتقدير وليكم جميعاً وجيتكم لينا بالدنيا اثناء ما بتكلم سمعنا صوت صرخه عاليه جايه من الغرفه قمت من الكرسي مخلوعه ختيت يدي في قلبي وعاينت لنجله ،، خالي قال لينا دي نهله مالها وجرى على الغرفه وجدي دا هبط في محلو غلبتو القومه .
مشينا عليها لقيناها راقده في السرير وبتصرخ ومنكشه شعرها وعيونها دي احمر من الجمر اول ما شافتنا قامت