رواية بيت جنب المقابر
الجزء الثالث3 الفصل الرابع4
بقلم دانيا
سمعت صوت همس لي في اُذني " قوم الوقت مناسب لزيارة الأحباب " قمت من النوم مخلوع عاينت في كل انحاء الغرفه مافي اي شيء قلت بسم الله الرحمن الرحيم دا شنو الصوت دا ؟ لحظه! اتزكرت كلام الراجل الكبير اللقيتو في المقابر لمن قمت ماشي منو قال لي نفس الجمله دي بس بطريقة نفي " الوقت غير مناسب لزيارة الأحباب " قلت لا يا محمد بطل تربط الأحداث مافي حاجه من دا يمكن عشان تصرفاته غريبه عشان كدا حلمت بيهو شلت التلفون عاينت للساعه كانت عامله واحده ونص قلت احسن انوم واقوم اطلع قريب آذان الصبح قبل الناس يطلعوا للصلاة .
رقدت وختيت يدي في وشي نمت حبه تاني حسيت بأنفاس قريبه مني شديد وهمس لي نفس الصوت " قوم الوقت مناسب لزيارة الأحبه " قمت بسرعه وبرضو م كان في زول في الغرفه استغربت شديد وقلت لا بعدا انا تاني م ح اقدر انوم لازم اقوم اطلع عشان اعرف سر الزول دا شنو ، وليه الجمل حقتو الغريبه دي بتتردد في اذني .. قمت من السرير ولبس جزمه عشان لو حصل ووقعت في موقف حظير اقدر اجري ،، وشلت الشال حقي وتلفوني وطلعت وقفلت الباب بالمفتاح وشلتو معاي .
طلعت نزلت تحت المكان كان هادئ جداً كأنو انا النزيل الوحيد في الفندق طلعت الشارع برا برضو الشارع فاضي وهادئ غير صوت الأشجار لمن الهواء يهبها والأوراق والأكياس البتتحرك في الشارع بسبب الهواء تاني شيء مافي .. مشيت مسافه مافي ولا عربيه ولا ركشه في الشارع وقفت عاينت للساعه في التلفون عامله اتنين ،، قلت مافي حل غير امشي برجليني وإن شاء الله م تقبضني الشرطه بقيت ماشي في الشارع بخطوات مسرعه والهواء هابي والجو بين البارد والمعتدل بعد نص ساعه وصلت الحي الفيهو البيت داك .
بقيت بمشي وبتلفت قلت ناس الحي ديل بتمنى م يقبضوني زي المره الفاتت جيت ماري بجنب المقابر لمحت ضوء خافت في الغرفه الوصفها لي الراجل العجوز بقيت بعاين عليها اتزكرت الكلام القالو لي الراجل العجوز وكلماته الغريبه !! وقفت وفكرت اخش اسألو بعد تفكير دام لعدة ثواني قلت لا يا محمد دا ضياع للزمن .. قمت ماشي اكملي طريقي ناحية البيت سمعت صوت جاي من وراي قال لي " اتأخرت مالك ؟ " اتلفتت بخلعه وإستغراب شديد عاينت وراي لقيتو دا نفس الراجل العجوز بقيت واقف بعاين ليهو بدهشه شديده وهو شايل شمعه حمرا في يدو منورة وواقف بعاين لي بنظرات جامده اقشعر جسمي ،، قلت ليهو انت ؟ .
قال لي امشي الوقت بضيع منك قرب يخلص وقتك عاوز اقول ليهو قصدك شنو انت ؟ قبل افتح خشمي معاهو قبل مني ومشى بقيت واقف وفي راسي الف علامة إستفهام .. قلت ليهو لو سمحت !! م رد لي اتزكرت كلامه إنو الوقت بروح مني عاينت على إتجاه البيت قلت فكرت امشي على البيت تاني قلت لا اشوف الزول دا قصته شنو ؟ اتلفتت عليهو اتصدمت شديد لمن لقيتو اختفى إستغربت قلت مستحيل يكون وصل بالسرعه دي الحاصل شنو ؟ عاينت للساعه لقيتها اتنين ونص قلت لازم اركز على هدفي الجيت ليهو .
مشيت على البيت وقفت جنب الباب وعاينت يمين شمال مافي زول اتسلقت الباب طوالي ونزلت جوا البيت كان مظلم طلعت تلفوني من جيبي ونورت الفلاش ومشيت على باب البيت الجوا لقيتو مقفول .. قلت ياالله دي الحاجه الوحيده الماعملت ليها حساب ،، اتزكرت الباب الخلفي مشيت عليهو برضو لقيتو قافل للحظه حسيت بكسرة وخيبه الأمل بس اتزكرت ساجده قلت لا يامحمد اعمل اي شيء المهم تخش .... مسكت الباب وجريتو بقوه عملت صوت عالي قلت لا يمكن يسمع زول صوتو ويعمل لي مشكله .
خليهو ومشيت بالشباك برضو مقفول والساعه بقت تلاته ونص قلت هسي الناس بطلعو للصلاة احسن اتخاج وافكر في حل واجي راجع تاني المره الجايه ،، شلت نفس عميق واتأفأفت ومشيت على باب الحوش عاوز اطلع سمعت صوت باب البيت فتح وقفت مهجوم وجسمي رجف اتلفت على الباب لقيتو فاتح لمن اتخلعت .. وقفت مسافه بعاين ليهو بإستغرام وبعدها مشيت عليهو وقفت جنب الباب وبقيت بتحسبن وبعدين خشيت اول ما خشيت حسيت بطاقه غريبه كدا حسيت نفسي مخنوق .. دخلت ونورت تلفوني وبقيت بتفحص في البيت كان فاضي وصاني شديد ولا حتى اصوات حشرات م فيهو ،، وقفت في نص الصاله وقلت لنفسي يلا يا محمد انجز قلت بسم الله الرحمن الرحيم " ساجده ساجده وينك انا محمد ردي " سكت لثواني مافي اي رد بعد كم دقيقه سمعت صوت صرخه عاليه جايه من واحده من الغرف لمن حيلي اتهد ،، اتلفت على الغرفه ونورت الفلاش عليها