رواية بيت جنب المقابر
الفصل الثلاثون30
بقلم دانيا
واحد من الرجال قال البت دي لقيناها واقعه في المقابر وسط القبور والكلاب قطعن هدومها وهسي زي الميته م حاسه بي حاجه الحمد لله م عوضها ، خالتي من شافت حالت بتها وقعت في ارضها ، انا جسمي كله بداء يرجف واطرافي بردت امي قالت للبراء دخلها جوا ورفعنا خالتي دخلناها جوا يلا وامين تمش وتبكي من الصدمه ، امي فحصت ملك وقالت لخالتي م تبكي يااختي هدي نفسك البت كويسه وبس غميانها بعد تصحى نعرف الحاصل عليها شنو رشتها بالمويه في وشها بدت تصحصح شويه شويه بدت تفتح عيونها خالتي مسكتها وبقت تبكي وبتسأل فيها يابتي الحاصل عليكي شنو والوداك هناك شنو يابت ، امي قالت ليها يااختي اهدي خليها تصحى وتأخد نفس .
صحت وبقت تعاين فينا واحد واحد وبقت تقول لينا البراء وين البراء البراء جاء من برا قال ليها انا هنا اها يابت احكي الحاصل شنو وكيف مشيتي المقابر وبتعملي شنو هناك قالت ليهو كيف يعني مشيت كيف انت المشيت قدامي امبارح بالليل وانا لمن شفتك ماشي استغربت ولحقتك وكنت بتكلم معاك وبناديك م عاوز ترد ، قال ليها انا؟ يابت انتي مجنونه انا بوديني المقابر بالليل شنو ونحن وسط النقاش دا مصدومين ومستغربين من البحصل خالتي قالت ليهو انت مشيت المقابر بالليل قال ليها ياخالتي انا عندي شنو في المقابر عشان امشيها بالليل استغفر الله العظيم اثناء ماهم بتناقشو اغمى عليها تاني .
ابوي جاء داخل قال ليهم البت دي ودوها فوق خليها ترتاح انتوا م شايفنها تعبانه كيف وانتوا همكم تتناقشو هي يمكن بتهضرب او شالها حمار النوم صحت وم واعيه هي بتعمل في شنو وطلعت مشت ، البراء شالها مشينا وديناها غرفتهم ترتاح خلينا خالتي قاعده جنبها وطلعنا ، لقينا ابوي قاعد في الهول وكان باديه على وشو ملامح القلق والانزعاج ، قال لأمي دا الكنا خايفين منو ياهو بدا يحصل والله يستر من الجاي وطلع مشى ، امي قعدت ممحنه ومحتاره تعمل شنو جينا قعدنا جنبها واسيناها قالت لينا الله كريم بتتسهل انتوا اتأخرتو على المدرسه هسي العربيه بتجي اطلعو عشان م تتأخرو اكتر طلعنا مشينا المدرسه وكل واحده فينا شارده بتفكر في الحصل وم لينا نفس لشيء.
ملك نايمه كل الوقت من الخلعه بقت م واعيه على شيء خالتي نزلت تحت امي كانت بتجهز في الفطور قعدت معاها وقالت ليها انا فكرت كتير ولقيت انو المكان دا م نفع معانا ومع ملك خاصة عشان كدا انا مفكره نلقى بيت ونرحلو جنب السوق او اي حي تاني ، المهم نحن في نفس المنطقه وح نزور بعض امي قالت ليها كدي اتريسو شويه قالت ليها دا انسب حل والله
جينا البيت بعد الدوام لقينا البيت هادي كأنو م فيهو زول سألنا امي من ناس خالتي قالت لينا قاعدين فوق ملك صحت لكن تاني رجعت نامت ، قلت ليها خلاص نحن ح نطلع نشوفها ، طلعنا ليهم فوق لقيناها نايمه وخالتي قاعده تصلي مشينا غرفتنا وبقينا نتناقش في الموضوع شفنا انو موضوع انو يرحلوا دا منطقي لأنو لو قعدو ح يحصل اكتر من كدا
المساء كدا جات رساله لإسراء من واحده من اخوات الولد قالت ليها العقد يوم الجمعه وعليك الله تعالوا ودعوني لأنو ح اسافر السعوديه ، اسراء بقت تفكر في موضوع اخوهم الغياظ داك قالت م ح امشي نهائي ، تاني جاتها رساله من البت قالت ليها اها يابت ح تجو صاح قالت ليها ان شاء الله.
الصباح اجتمعنا عاوزين نشرب الشاي خالتي فتحت موضوع الرحول مع ابوي قالت ليهو القى لينا بيت في حي تاني ، ملك قاطعت كلامها قالت ليها بيت شنو ياامي انا م عاوزة امشي بعيد من ناس خالتي وبقت تعاين للبراء هي اصلا من جوا قصدها البراء ماسكه كباية الشاي في يدها اتكسرت ليها في يدها كلنا بقينا نعاين ليها مخلوعين وهي بدت تنطط وتكورك قالت الشاي حار اتكشح ليها في يدها ، خالتي طوالي بقت تقول بسم الله الرحمن الرحيم ، امي قالت ليها الجو بارد عشان كدا الكبايه طقت واتكسرت مافي شيء آيه جيبي ليها مويه ومرهم من جوا جبتهم ليها خالتي قالت لأبوي عليك الله م تنسى موضوع البيت ضروري في اليومين دي نرحل .
المساء قاعدين في الغرفه وشاردين بنفكر في موضوع ناس خالتي ، اسراء قالت لينا ديل انسوا موضوعهم ديل وضعهم معروف لكن هاكم الخبر الجديد عقد ميار بكره يوم الجمعه دا امبارح رسلت لي رساله واصرت علي نحضرو لأنها ح تسافر السعوديه بعد العقد عاوزانا نودعها.
امنيه قالت ليها انتي الناس ديل م بتتوبي منهم نسيتي موضوع اخوها اللئيم داك، قالت ليها فكرت في الموضوع والله لكن نعمل شنو البت صاحبتنا وتاني يمكن م نتلاقى ، وبالنسبه لأخوهم دا آيه بتتكفل بالموضوع بقيت اعاين ليها ومنططه عيوني قلت ليها بتعجب انا؟ قالت لي ااي اسألي شواطينك ديل مش قالو بساعدونا اول ما قالت كدا المروحه وقعدت قربت تجي في راسها إلا جريناها قربت اديها كف قلت ليها كم مره قلت ليكي راعي لكلامك م بتفهمي انتي ول قايله الموضوع مزحه هسي المروحه دي لو جات في راسك كان متي ، امي جات قالت لينا الصوت دا شنو شافت المروحه واقعه في الارض اتهجمت وبقت تسأل فينا انتو كويسات وقعت في منو والوقعها شنو فهمت قالت إسراء عملت شنو ؟ قلت ليها اهدي ياامي م حصل شيء بتك دي انتي عارفاها جنها نضمي وكلام فارق م تشتغلي بالموضوع لمن البراء يجي بركب المروحه.
بقت بكره الصباح كلمنا امي بموضوع العقد وبعد الصلاه مشينا كلنا إلا خالتي وملك قاعدين في البيت وناس ابوي في السوق، من مشينا خلينا امي مع الحريم ودخلنا لميار جوا لقيناها بجهزو فيها والبيت مليان حريم عقدو ولبعد العصر جهزو الغداء ولبعد المغرب الناس لسه متلميه قاعدين في الحوش ميساء اخت ميار كانت م مبينه بعد شويه جات رساله لإسراء من تلفون ميساء تعالي السطح ساعديني في حاجات عاوزه اجيبها ، اسراء قامت قالت لينا ميساء عاوزاني هسي بجي قلت ليها تمام ، طلعت السطوح وهي بتنادي ميساء يا ميساء وينك وهي منوره فلاش التلفون ، بتنادي يابت وينك انا جيت مافي اي رد بعد شويه حست بحركه وراها اتلفتت ونورت بالتلفون شافت زول واقف نورت في وشو طلع دا اخوهن عاوزه تتكلم قفل ليها خشمها بي يدو