رواية بيت جنب المقابر
الفصل الحادي والثلاثون31
بقلم دانيا
اسراء طلعت على السطوح الدنيا ظلام نورت فلاش التلفون وبقت تنادي ل ميساء ، ياميساء انا جيت وينك ، يابت وين انتي ، مافي رد بعد شويه سمعت صوت رجلين وراها اتلفتت وراها نورت في الزول من تحت لفوق كان راجل واقف نورت في وشو لقتو دا اخو البنات (ود الجيران).
اتخلعت فتحت خشمها عاوزة تتكلم قفل خت يدو على خشمها وقفل ليها خشمها عشان م تصرخ وبتدأ يقول ليها انتي قايلاني شافع ول شنو تعملي الحاجه وتمثلي انك م عملتيها الليله تشوفي اعمل فيكي شنو جراها على الطرف التاني عشان الناس م يسمعوها لو صرخت وحتى لو صرخت م بسمعوا لأنو في جوطه ولمه والناس مشغوله مع العرسان.
قاعدين مع الناس تحت بعد شويه شفت ميساء جات قلت ليها ياميساء إسراء وينا قالت لي م شفتها والله قلت ليها كيف يعني قبل شويه قالت انتي رسلتي ليها رساله قلتي ليها تعالي قالت لي والله ياآيه انا مع اللخمه تلفوني زاتو م بعرف ختبتو وين ، اثناء ما بتكلم معاها اختها نادتها قالت لي اتني فتشيها بتكون جوا او برا وانا بشوف ميار عاوزة شنو وبعدين بفتشها معاك ، مشت مني وخلتني محتاره إسراء مشت وين طوالي اتزكرت اخوهم قلت ياالله الود دا وينو م مبين .
اكيد في شيء غلط قمت خشيت جوا وبنادي اسراء وينك يإسراء مافي جواب فتشت البيت كلو م لقيتها جيت ماشه بإتجاه السلم سمعت صوت الصراخ في زول بقول زح مني يا عواليق ساعدوني ، قلت دا صوت اسراء المابغباني حيلي كله مات جريت جري طلعت فوق لقيتو مثبتها على حافة السطح اول ما جيت قال لي اوعك والله اقل حركه ارميها بيغادي قلت ليهو زح منها داير مننا شنو انت يامتخلف والله م اخليك فكها اثناء ما انا بتكلم معاهو اسراء قالت شوفي سطوح بيتنا اول ما عاينت على اتجاه السطح لقيت بت واقفه فوق اول مره اشوفها .
اسراء كانت بتحاول تفك روحها من الود دا وقعت بهناك وانا م قدرت احصلها بقيت واقفه في محلي زي الصنم وبصرخ والود زاتو اتهجم وبقى يعاين بهناك مخلوع ، انا قمت وحيلي م شاديني ورجليني يرجفو جريت تحت احصل اسراء قبل ما تموت ، الناس من شافوني جايه بالطريقه دي اتخلعوا وبقوا يقولوا لي يابت مالك في شنو جريت بإتجاه الحوش البي ورا لقيت اسراء واقعه غرقانة في دمها والناس اتلمو امي دي خلاص م فضل فيها حيل وقعت في محلها.
اتصلوا للشرطه وابوي جاء والبراء اخوي اسعفنا اسراء للمستشفى ، دخلوها العمليات ونحن جسمنا كلو يرجف من الخلعه ، ود الجيران داك ابوي حلف يقتلو في محلو داك بس الشرطه جات ساقتو وهو بس بردد والله انا م قاصد اقتلها كان قصدي اخوفها.
العمليه استغرقت ثلاته ساعات والدكاتره قالوا وضعها صعب خاتنها في الجناح الخاص العنايه المركزه، يومين وهي في العنايه واليوم التالت ماتت ، عم الحزن والسواد عيشتنا بعد موت اسراء عملنا المستشفى بيت بكى ، ابوي من الدكتور قال لينا الدوام لله والبركه فيكم وقع في حتتو جاتو زبحه .
بقت علينا بهنا جنازه اسراء وبهنا ابوي رقد بزبحه قلبيه ، شلنا الجثمان ومشينا البيت وخلينا ابوي راقد في المستشفى ، خلينا معاهو امنيه بس ونحن مشينا مع الجثمان بعد الدفن الناس بقو يجونا ديل داخلين وديل طالعين خلينا ملك سهى قالت لينا انا بمشي بقعد مع امنيه في المستشفى .
بعد العزاء باسبوع ابوي م قدر يتجاوز الصدمى ومات هو كمان بقت ايامنا كلها سوداء في البيت المشئوم دا ، البراء قال لينا امي م ح تتم العُده هنا نحن لازم نرحل منها اثناء ماهو بتكلم البيت كله بدا يتكركب فوق راسنا والحاجات بدت توقع في الارض البيت بقى عباره عن خرابه.
وفجأة الباب اتقفل بقوه لمن اضنينا صنت من الصوت وكان مكتوب في الباب بالخط العريض باللون الاحمر (م ح اسمح ليكم ترحلوا).