رواية بيت جنب المقابر
الجزء الثاني2 الفصل السادس6
بقلم دانيا
قام على حيلو ورجع خطوتين لورا وقال لي قبيل لمن اتصلت ليكي مش كنتي كويسة ؟ عليك الله م تعملي كدا عارفك دي حركات منك عشان ترجعي لكن حاولي تفهميني ياساجده .... رفعت راسي عاينت ليهو بإستغراب شديد وقلت ليهو حركات مني انا يامحمد ؟ انت عرفتني الليله ول امس لمن تقول كدا مسحت دموعي وقمت عاوزة اطلع برا مسك يدي وقال لي معليش ياساجده والله م قصدي كدا لكن انا بالجد مستغرب جداً محتار من البحصل معاكي دا طيب انا مالي م بشوف الإنتي بتشوفيهو دا ؟ .
فكيت يدي منو براحه وقلت ليهو والله يامحمد م بعرف لكن البعرفو انا إني البيت دا م عاوزة اقعد فيهو انت ليه م قادر تستوعب انا لو قعدت هنا اكتر من كدا بجن ..... طلعت برا خليتو شبك يدينو في راسو ومررهم على وشو ومشى قعد في السرير ومخو جايط بالأفكار ،، مشيت المطبخ بقيت بعمل في الغداء وببكي حسيت العبرة خانقاني فجأة حسيت بحاجه ناعمه وباردة في نفس الوقت زي نسمة الهواء جات على وشي ومسحت دموعي وقفت وبقيت بعاين حوالي م شايفه شيء ،، عملت الغداء ومشيت صليت المغرب وخيت ختيت الغداء قبل انادي محمد جاء براهو طالع قعد وبقى يعاين لي كنت واقفه قال لي اقعدي مالك واقفه ؟ قلت ليهو م لي نفس .
قام على حيلو جاء مسكني من كتافي قعدني في الكرسي وقعد في الكرسي الجنبي ومسك يدي قال لي شوفي ياساجده انا م عندي مانع نغير البيت لكن اديني مهله يومين تلاته اكلم صاحبي يفتش لينا بيت قلت ليهو طيب تمام .... فجأة اللمبات الفي الهول بقت تنور وتطفي تنور وتطفي لمن طفت مرة واحده مسكت يد محمد شديد وقلت ليهو شفت اها كدا صدقتني؟ بقيت ارجف حسيت إنو اللمبات م طفت براها محمد قال لي اهدئي يابت سمي باالله واقري ازكار لو خايفه قال لي بكون الكهرباء قطعت او حاجه دقيقه اجيب التلفون من الغرفه عاينت للغرفه قلت ليهو شوف الغرفه منورة ،، قال لي طيب ورح الغرفه قمنا ماشين كنت ماسكه يد محمد اتعترت بالكرسي فكيت يدو قربت اقع .
دنقرت تحت بعاين لرجلي وجعتني شديد فكرتها اتجرحت رفعت راسي عاينت لمحمد كان واقف قدامي سريع مشيت مسكت يدو قلت ليهو ورح الغريبه هو م قال لي مالك الحاصل شنو .... سكت بس ومسكني من يدي فجأة شفت محمد طالع من الغرفه وشايل تلفونو وقال لي ساجده لو خايفه ورح معاي تحت السلم نشوف العطل وين انا اصلاً م بفهم في الكهرباء هو بتكلم ومدنقر في تلفونو وانا هنا حسيت الدم جمد في عروقي قلت لو محمد هناك انا ماسكه منو دا منو المعاي دا فجأة مسك يدي شديد